చీకటి వెలుగుల ప్రతిబింబం (“లైఫ్ ఎట్ చార్మినార్” పై సమీక్ష)

సాహిత్య ప్రస్థానం పత్రిక మే 2012 సంచికలో “నచ్చిన పుస్తకం” అనే శీర్షిక క్రింద “చీకటి వెలుగుల ప్రతిబింబం” అనే పేరుతో శ్రీ వొరప్రసాద్ గారు అయినంపూడి శ్రీలక్ష్మి రాసిన “లైఫ్ ఎట్ చార్మినార్” అనే కవితా సంకలనాన్ని సమీక్షించారు. ఆకాశవాణి హైదరాబాద్ కేంద్రంలో పనిచేస్తున్నశ్రీమతి అయినంపూడి శ్రీలక్ష్మి గతంలో ‘అలల వాన‘ కవితా సంపుటి వెలువరించారు. తాజాగా విశేషరీతిలో ‘లైఫ్ ఎట్ చార్మినార్‘ డాక్యూ పోయెమ్ అనే సుదీర్ఘ కవితతో పాఠకుల ముందుకు వచ్చారు.

అర్థవంతంగానూ, పొందికగానూ కూర్చిన కవిత్వం పాఠకులను అలరిస్తుందని. చిక్కటి కవిత్వానికి విలక్షణమైన కవితా వస్తువు మరింత వన్నె తెస్తుందని వొరప్రసాద్ పేర్కొన్నారు. హైదరాబాద్ అనగానే గుర్తుకు వచ్చే ‘చార్మినార్’ ఈ దీర్ఘ కవితా వస్తువు అని చెబుతూ, చార్మినార్ విలక్షణత, విశిష్టత ఈ కవితలో చక్కగా ప్రతిబింబించిందని ఆయన అన్నారు.

చారిత్రక కట్టడం ప్రాధాన్యత, మత సామరస్యం, అక్కడి ప్రజల జీవనోపాధి, మక్కామసీదు, పావురాలు వంటి వన్నీ ఈ దీర్ఘకవితా ప్రయాణంలో పాఠకుడిని విభిన్నంగా పలకరిస్తాయని, చదువరులు ఆశ్చర్యపడేలా చార్మినార్ పరిసరాలను కొత్త కోణాలలో కవయిత్రి ఆవిష్కరించారని ఆయన అభిప్రాయపడ్డారు. కవితలకు తగ్గ అందమైన భావచిత్రాలు పాఠకుడికి గిలిగింతలు పెడతాయని అన్నారు.

‘చార్మినార్ -/నాకు విచ్చుకున్న దోసిలిలా అనిపిస్తుంది /దేవుణ్ణి-/ ఏ కోరిక కోసమో అర్థిస్తున్న భక్తునిలా అనిపిస్తుంది’ శూన్యాకాశంలోకి నిట్టనిలువుగా పైకిలేచిన చార్మినార్ గోపురాలను చేతులుగా మలిచి కవిత్వ శిల్పం చేస్తారు. చార్మినార్ పక్కనే ఆనుకుని ఉండే మక్కామసీదులో వేలాది భక్తులు నిత్యం చేసే నమాజు దృశ్యాన్ని ఈ వాక్యాలు ఆవిష్కరిస్తాయి. నాలుగు శిఖరాల చార్మినార్ నాలుగు రోడ్లుగా విస్తరిస్తూ మనుషుల్లో మానవత్వం నింపుతుందని కవితాత్మకంగా చెబుతారు. “నాలుగు దిక్కులా రోడ్లు వేసుకున్న చార్మినార్/ మనుషుల రక్తాల్లో/ ఏ సమున్నత మానవతావాదాన్నో/ ప్రవహింపజేస్తున్నట్టుగా అనిపిస్తుంది” అనడంలో మనుషుల్లో మానవత్వం ఒక నిరంతర ప్రవాహంగా కొనసాగాలనే భావనను బలంగా వ్యక్తీకరించే ప్రయత్నం కనపడుతుంది. భావ వ్యక్తీకరణకు శక్తివంతమైన పదాలను ఉపకరణంగా చేసుకోవడంలోకవయిత్రి ప్రతిభ వెల్లడవుతుంది. ఎటువంటి భావాన్నైనా తన వస్తువు పరిధి దాటకుండా సమర్థవంతంగా కవిత్వీకరించగలిగారు. ప్రతీ వాక్యంలో ఆర్థ్రత,కరుణ, మానవీయత అంతర్లీనంగా ప్రతిఫలిస్తాయని వొరప్రసాద్ అన్నారు.

‘నగరమంతటా/తెల్ల ముఖమల్ లా పరుచుకున్న చలి పవనం/చార్మినార్ కు/ వందల మీటర్ల దూరంలోనే “గాయబ్” అవుతుంది /’షాదాబ్’ బిర్యానీ సొగసైన పరిమళాలు /హైకోర్టు – గుల్జార్ హౌస్ వరకు/గాలిలో తేలివస్తాయి’ ఈ చరణాలు పాఠకుల మనసులను ఆహ్లాదపరుస్తాయని, చలిని తెల్లని మఖమల్ వస్త్రంతో పోల్చిన కవయిత్రి భావుకత అబ్బురపరుస్తుందని అంటారు సమీక్షకులు. బిర్యానీ పరిమళాలు మన నాసికను చేరుకుంటాయట.

ఈపుస్తకంలో అనేక చోట్ల కవయిత్రి భావాలు పాఠకుడిని ఆకట్టుకుంటాయి. “హరేక్ మాల్ బీస్’ అరుపులు /’దేనేకీ బాత్ బోలో భాయ్’ బుజ్జగింపులు అన్నీ కలిసి/ ఏ అజ్ఞాత సంగీతకారుడో కూర్చిన మనుష్య సంగీతాన్ని వినిపిస్తుంటాయి’ అంటారు. మనుషుల నిత్యజీవన సమరాన్ని చక్కటి కవితా చరణాలుగా మలుస్తారు.మనుష్య సంగీతం అనేది ప్రతీ మానవ హృదయాన్ని స్పందింపచేసే భావన. మనుషులు మనుషుల కోసం మానవీయంగా స్పందించినప్పుడు ఒక మంచి సమాజానికి ఆస్కారం ఉంటుంది. ఒక సమిష్టి భావన మనిషికి బలాన్నిస్తుంది.

‘జనం కళ్ళల్లోకి తొంగిచూస్తే చాలు…/ ఆకాశంలోని నక్షత్రాలన్నీ కూడబలుక్కొని/ చార్మినార్ పరిసరాల్లోకి / ఏ ఫ్లెయింగ్ సాసర్ లేకుండానే / దిగివచ్చినట్లనిపిస్తాయి’ అంటూ మనుషుల కళ్లను నక్షత్రాలతో పోల్చి కవయిత్రి మెప్పిస్తారని వొరప్రసాద్ అన్నారు. ప్రతీకాత్మకంగా, భావనాశక్తి ద్వారా అభివ్యక్తీకరిస్తూ దీర్ఘకవితను హాయిగా చదివేలా కవయిత్ర్రి రాసారని, పదబంధాలనిండా సామాజిక స్పృహ పరుచుకుని ఉంటుందని ఆయన అన్నారు. అక్షరాలన్నీ అంతర్లీనంగా సామాజిక సంగీతాన్ని వినిపిస్తాయని సమీక్షకులు అభిప్రాయపడ్డారు.

పూర్తి సమీక్ష సాహిత్య ప్రస్థానం మే 2012 సంచికలో లభ్యమవుతుంది.

ఇన్ని చక్కని కవితలున్న ఈ పుస్తకం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.

లైఫ్ @ చార్మినార్ On Kinige

Related Posts:

సాఫ్ట్ వేర్ ఇంజినీర్లకు నడుము నొప్పి రాకుండా యోగాసనాలు …

సాఫ్ట్ వేర్ ఇంజినీర్లకోసమే ప్రత్యేకంగా యోగాసనాలు మీకు ప్రొఫెసర్ యం వెంకట రెడ్డి గారు సైబర్ నిపుణులు – యోగ అనే పుస్తకంలో అందించారు, అక్కడ నుండి నడుము నొప్పి తగ్గించే ఈ ఆసనాలు మీ కోసం.

PagesfromCyberNipunuluYogaఈ పుస్తకం మరిన్ని  వివరాలకు, ఈపుస్తకం, ముద్రణా పుస్తకం తగ్గింపు ధరలతో కొనడానికి కినిగె దర్శించండి. 

సైబర్ నిపుణులు – యోగ On Kinige

Related Posts:

కినిగె వార్తా తంతి మే 26 2012

 
** Rudrani Thumb Image **రుద్రాణి
మధుబాబు – నవల
** Amurtham Kurisina Ratri Thumb Image **అమృతం కురిసిన రాత్రి
దేవరకొండ బాల గంగాధర తిలక్ కవితలు.
** Shabbash raa Shankara Thumb Image ** శబ్బాష్‌రా శంకరా!
తనికెళ్ళ భరణి – శివతత్వాలు
** Ramayana Vishavruksham Thumb Image ** రామాయణ విషవృక్షం
రంగనాయకమ్మ విశ్లేషణాత్మక రచన.
** EvaritO Ela Matladali Thumb Image ** ఎవరితో ఎలా మాట్లాడాలి?
‘రామాయణంలో హనుమంతుడు’ ఆధారంగా రూపొందిన పుస్తకం.
** Draupadi Thumb Image ** ద్రౌపది
డా. యార్లగడ్డ లక్ష్మీప్రసాద్ నవల


** Gnapika Thumb Image ** జ్ఞాపిక
తరతరాల గుడివాడ ప్రాంత శత కవిత
** Tera Naam Thumb Image **తేరా నామ్ ఏక్ సహారా?!
నున్న నరేశ్ రచన
** ShadowShadowShadow Thumb Image ** షాడో! షాడో!! షాడో!!!
మధుబాబు – షాడో ఎడ్వెంచర్
** Yuddhakala Thumb Image **యుద్ధకళ
సన్–జు “ది ఆర్ట్ ఆఫ్ వార్” తెలుగులో
** Tree My guru Thumb Image **Tree, My Guru
చెట్టు నా ఆదర్శం
** Kavisamayam Thumb Image ** ఇది కవిసమయం
365 లఘు కవితల సమాహారం
** Nivedana Thumb Image **నివేదన
ఒక భగ్నప్రేమికుడి హృదయ (ని)వేదన ఇది
** melakuva Thumb Image **మెలకువ
పి. సత్యవతి కథాసంపుటి
** Hatharatnavali Thumb Image **Hatharatnavali
an important treatise on Hathayoga

ప్రింట్ పుస్తకాలు :
Hatharatnavali Tree, My Guru వనమాల చారిత్రక వ్యాసమంజరి
పర్యావరణ కథలు తెలంగాణా అస్తిత్వ పోరాటం ఏటి ఒడ్డున సాహితీ విరూపాక్షుడు విద్వాన్ విశ్వం
త్రిపుర కథలు Political Stories ముందే మేలుకో కవిరాజు త్రిపురనేని రామస్వామి జీవితము: కృషి
శ్రీకృష్ణదేవరాయలు రాజు గారి కొమ్ము పరాయోళ్ళు వొడువని ముచ్చట

మ బ్లాగుల నుండి:
** Paryavarana Kathalu Thumb Image ** పూర్ణచంద్రతేజస్వి “పరిసర కతెగళు”
(పర్యావరణ కథలు) : ఓ పరిచయం
** Rajugari Kommu Thumb Image ** Satire at its best
Book Review
** Nannagari vyasalu Thumb Image ** మిత్రవాక్యం
“నాన్నగారి వ్యాసాలు” నుంచి

Related Posts:

ఎస్సైన్‌మెంట్ కరాచీ

సుప్రసిద్ధ డిటెక్టివ్ రచయిత మధుబాబు కలం నుంచి జాలువారిన మరో షాడో ఎడ్వంచర్ “ఎస్సైన్‌మెంట్ కరాచీ“.

బాంబే నగరంలో పదిహేను రోజుల క్రితం సముద్రతీరంలో షికార్లు కొట్టటానికి పోయిన పాతికమంది యువకులు వున్నట్లుండి మాయం అయ్యారు. ఎక్కడికి పోయారో, ఎలా పోయారో ఎవరికీ అంతుబట్టని మిస్టరీ అయింది. మాయం అయిన యువకుల్ని వెతకటానికి బాంబే పోలీసులు తీవ్రంగా ప్రయత్నించారు. ఆ ప్రయత్నఫలితంగానే బాంబేకు వందమైళ్ళ దూరంలో సముద్రంలో తేలుతూ కనిపించింది మాయమైన యువకుల్లో ఒకతని శరీరం. అతని తలపై పెద్ద గాయం ఉంది, మెదడు మాత్రం లేదు. ఆపరేషన్ చేసి మెదడుని తీసేసినట్లు పోస్ట్ మార్టమ్ నివేదికలో తెలుస్తుంది.

అదే సమయంలో… ఆసియాఖండం మొత్తంమీద బ్రెయిన్ సర్జరీలో అత్యంత నిష్ణాతులైన ముగ్గురు కాన్పూర్ మిలటరీ డాక్టర్లు కూడా మాయం అయిపోయారు. ఎక్కడికి పోయారో ఏమయిపోయారో ఎవరికీ తెలియదు. యువకులు మాయం అయిన సంఘటనకు, ఈ బ్రెయిన్ సర్జన్లు మాయం అయిన సంఘటనకు సంబంధం వుందని సిఐబి తెలుసుకుంటుంది. డాక్టర్లు మాయమయ్యే కొన్ని గంటల ముందు కరాచీ నుంచి తమ కార్యకలపాలు కొనసాగించే ఇద్దరు పేరు మోసిన విదేశీ నేరస్తులు బాంబేలో తచ్చాడినట్లు తెలుస్తుంది. వెంటనే కరాచీ వెళ్ళి వాళ్ళ చర్యల్ని కనిపెట్టి … ప్రపంచ ప్రఖ్యాతి చెందిన మన డాక్టర్లనీ, మాయం అయిపోయిన ఆ అమాయక యువకుల్ని రక్షించి మనదేశం తీసుకురావల్సిన బాధ్యత షాడోపై మోపుతారు.

ఇక ఎస్సైన్‌మెంట్ కరాచీ మొదలవుతుంది. షాడో పాకిస్తాన్ ఎలా చేరాడు? కరాచీలోని నేరస్తులను ఎలా ఎదుర్కున్నాడు? ఈ క్రమంలో ఎన్ని ప్రమాదాలను తట్టుకున్నాడు? మాంటీరియోలా ఎందుకు నటించాడు? దావూద్‌ని ఎలా బోల్తా కొట్టించాడు? షాడోకి ఉడుం ఏ విధంగా సాయం చేసింది? డా. ముస్తఫా రచించిన కుట్రని షాడో ఎలా చేధించాడు?

ఈ ప్రశ్నలన్నింటికీ సమాధానాలు ఈ రోమాంచక నవలలో లభిస్తాయి. “ఎస్సైన్‌మెంట్ కరాచీ” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

ఎస్సైన్‌మెంట్ కరాచీ On Kinige

కొల్లూరి సోమ శంకర్

Related Posts:

రుద్రాణి

రుద్రాణి

 

 

 

రచన:

మధుబాబు


 

© Author

© Madhu Baabu

This digital book is published by -

కినిగె డిజిటల్ టెక్నాలజీస్ ప్రయివేట్ లిమిటెడ్.

సర్వ హక్కులూ రక్షించబడ్డాయి.


All rights reserved.


No part of this publication may be reproduced, stored in a retrieval system or transmitted in any form or by any means electronic, mechanical, photocopying, recording or otherwise, without the prior written permission of the author. Violators risk criminal prosecution, imprisonment and or severe penalties.


 

రుద్రాణి

గుర్రుపెట్టి నిద్రపోతున్నాడు గంగారాం. మందపాటి కంబళిని పాదాల దగ్గిర్నించి తలదాకా ముసుగుపెట్టి, బెడ్ రూమ్ తలుపులన్నిటినీ గట్టిగా బంధించి, ఎట్టి పరిస్థితిలోనూ తనను ఎవరూ డిస్టర్బ్ చేయొద్దని స్ర్టిక్టెస్ట్ ఇన్‌స్ర్టక్షన్స్ ఇచ్చి మరీ గురకలు తీస్తున్నాడు.

అతని రోజువారీ వ్యవహారాలను ఆర్గనైజ్ చేయటానికి సెక్రటరీలు పాతికమందిపైనే వున్నారు. అలవాటు ప్రకారం వారందరూ తమ తమ మందీ మార్బలంతో బెడ్ రూమ్ కి ఎదురుగా వున్న విశాలమైన హాల్లో నిలబడి ఎదురు చూస్తున్నారు.

కంచుతో పోతపోసిన విగ్రహాల మాదిరి కండలు తిరిగిన శరీరాలతో బెడ్ రూమ్ ద్వారానికి అటూ ఇటూ నిలుచుని వున్నారు ఇద్దరు బాడీ గార్డులు.

రాజస్థాన్ రాష్ట్రంలో వున్న మోరీ కొండల్లో పశువుల్ని మేపుకుంటూ వుండేవాళ్ళు వారిద్దరూ….. వట్టి చేతులతోనే నలభైకిలోల బరువుండే కొండరాళ్ళను పిండిపిండిగా కొట్టిపారేయగల బలవంతులు.

రెండు వందల యాభై ఆవుల్ని, నలభై రెండు మేలుజాతి ఒంటెల్ని వారి తల్లిదండ్రులకు బహుమతిగా ఇచ్చి, వారిద్దరినీ తనకు బాడీగార్డులుగా వుండటానికి వప్పించాడు గంగారాం….. తనవెంట అస్సాం తీసుకు వచ్చాడు.

అతని మాటను తప్ప మరెవ్వరి మాటనూ వినిపించుకోరు వారిద్దరూ….. బెడ్ రూమ్ ద్వారం దగ్గిర తాము కాపలా నిలబడిన తర్వాత….. సాక్షాత్తూ దేవుడు దిగివచ్చినాసరే లోపలికి పోనీయరు. తాము నిలబడిన ప్రదేశంలోనుంచి ఒక్క అడుగు కూడా అవతలికి వేయరు.

ధనియా అంటారు వారిలో పెద్దవాడిని. మునియా అంటారు అతని సోదరుడిని.

పదిగంటల వరకూ ఓపికగా వెయిట్ చేసి చేసి, సహసం నశించిపోవటంతో మెల్లిగా మునియా దగ్గిరికి వెళ్ళాడు గంగారాం సెక్రటరీలలో ఒకతను.

తనంతట తను లేచేవరకూ సాబ్ తనను ఎవరూ డిస్టర్బ్ చేయొద్దని చెప్పారు. ముందు మీ పనులు చూసుకుని తీరికగా రండి….. ఇప్పుడు మాట్లాడటం కుదరదు…  .నిష్కర్షగా సమాధానం ఇచ్చి, అవతలికి వెళ్ళిపొమ్మన్నట్లు చేయి వూపాడు మునియా.

అతను అలా చేయి ఊపిన తర్వాత వెనక్కి జరగకపోతే ఏం జరుగుతుందో ఆ సెక్రటరీకి బాగా తెలుసు.

అయినా సరే కాస్తంత ధైర్యం చేసి అలాగే నిలబడ్డాడు.

ప్లీజ్ మునియా…. అర్జంట్‌గా మాట్లాడాల్సిన పని ఒకటి పడింది. జపాన్‌లో మన బిజినెస్ సెంటర్ మీద దాడి జరిగింది…  . వెంటనే మనం ఏదో ఒకటి చేయాలి. ఆలస్యం చేస్తే మనం అలుసయిపోతాం. ప్రిస్టేజ్ దెబ్బ తింటుంది. జపాన్‌లో బిజినెస్‌లన్నీ మూసేయాల్సిన పరిస్థితి వచ్చేస్తుంది…  చిన్న కంఠంతో తనను ఇబ్బంది వెడుతున్న సమస్యను గురించి అతనికి తేలిక మాటలతో వివరించాడు.

గంగారాం సాబ్ దగ్గిర పనిలో చేరకముందు అతను పశువుల్ని కాచుకుంటూ వుండేవాడని ప్రగాఢంగా విశ్వసించటంవల్ల వచ్చిన తంటా అది.

అన్నతో కలిసి మోరీ కొండగుట్టల్లో పశువుల్ని కాచేవాడు మునియా అని అనటంలో అసత్యం ఏమీ లేదు. కాని ఆ పని చేస్తూనే, అతను తమ గ్రామంలో వున్న రిటైర్డ్ మిలటరీ అధికారి ఒకతని దగ్గిర నాలుగు భాషల్ని, కంప్యూటర్స్ గురించి కొన్ని ప్రాధమిక విషయాల్ని నేర్చుకున్నాడనే సంగతి ఆ సెక్రటరీకి తెలియదు.

ఉన్నట్లుండి ఇప్పుడు ఆ విషయం బయటపడేసరికి నోరు వెళ్ళబెట్టవలసిన పరిస్థితి అతనికి ఎదురయింది.

అది ఎలా ఎదురయిందంటే -

సెక్రటరీ మాటల్ని వినగానే తెల్లటి పల్వరుస బయటికి కనిపించేలా నోరంతా తెరిచి ఒక నవ్వు నవ్వాడు మునియా.

ఇటీజ్ యువర్ హెడేక్…  . మై బిజినెస్ ఈజ్ టు గార్డ్ దిస్ డోర్…  . యూ డూ యువర్ డ్యూటీ అండ్ లెట్ మీ డూ మైన్…  చక్కటి ఉచ్ఛరణతో, ఖచ్చితమైన మాటలతో అవతలికి వెళ్ళిపోమ్మని మరోసారి సూచించాడతను.

అచ్చమైన ఇంగ్లీషులో చెప్పిన తర్వాత కూడా అక్కడే నిలబడితే పరువులు దక్కవనే సంగతి చటుక్కున బోధపడేసరికి, తనకు తెలియకుండానే వెనక్కి తిరిగి, మిగిలినవారి దగ్గిరికి వచ్చేశాడు ఆ సెక్రటరీ.

ఈ రాజస్థాన్ బద్మాష్‌లకు గర్వం చాలా అధికం అయిపోయింది. మనం ఏదో ఒకటి చేయకపోతే, ఎందుకూ పనికిరాని వాళ్ళమని అనిపించుకుంటాం…  .లోగొంతుకతో తన అభిప్రాయాన్ని అక్కడి వారందరికీ తెలియచేశాడు ఒక సీనియర్.

వాళ్ళదేం వుంది? గంగారాం సాబ్ ఇచ్చిన ఇన్‌స్ట్రక్షన్‌ని తూచా తప్పకుండా పాటిస్తున్నారు…  . మనం చేయవలసింది, చేస్తున్నది అదేకదా!నిర్లిప్తంగా అన్నాడు మరొకతను.

మనం చేసేదానికి, వాళ్ళు చేస్తున్నదానికి తేడా లేదా? గది గుమ్మం దగ్గిర బొమ్మల మాదిరి నిలబడటానికి, జపాన్, కొరియా, ధాయ్‌లాండ్‌లలో వున్న బిజినెస్ సెంటర్లన్నిటినీ మేనేజ్ చేయటానికి సంబంధం అసలు వున్నదా? పడుకునేముందు తనంతట తాను నిద్రలేచేదాకా ఎవర్నీ లోపలికి రానీయవద్దన్న గంగారం సాబ్ – నిద్రలేచిన తర్వాత జరిగిందేమిటో తనకు వెంటనే ఎందుకు చెప్పలేదని నా మీద కారాలు మిరియాలు నూరడా? నన్ను తల్లక్రిందులుగా వేలాడదీయమని ఆ మునియాగాడికే ఆర్డర్స్ ఇవ్వడా…  .? ఉక్రోషం అణుచుకోవటం అసాధ్యమై, జీరపడిన కంఠంతో కాస్తంత పెద్దగానే అరిచాడు బెడ్ రూమ్ దగ్గిరికి వెళ్ళి, వెనక్కి వచ్చిన సెక్రటరీ.

ఆ మాటలు మునియా చెవులకు చేరితే, అతని రియాక్షన్స్ ఎలా వుంటాయోనని వెంటనే అటుకేసి చూశారు మిగిలిన వారందరూ.

చేరితే ఏమిటి? చేరనే చేరాయి ఆ మాటలు. మునియాతోపాటు అతని సోదరుడు ధనియాకు కూడా చక్కగా అర్థం అయ్యాయి.

గంగారాం సాబ్‌ని గురించి మాకంటె మీకే బాగా తెలుసు. సందర్భాన్ని బట్టి అంతకుముందు తను చెప్పిన మాటల్ని తనే మర్చిపోయాడాయన. నోటికి వచ్చినట్లు తిట్టిపోస్తాడు. అయినా సరే ఎంతో విశ్వాసంగా పనిచేస్తున్నారు మీరు. ఎందుకు చేస్తున్నారు? మీకు రోషం పాశం లేవా?” ఉన్నట్లుండి కనులు చిట్లించి చూస్తూ సూటిగా ప్రశ్నించాడు ధనియా.

రోషాల ప్రసక్తి వచ్చేసరికి ఎర్రగా జేవురించింది సీనియర్ సెక్రటరీ వదనం.

మా రోషాల గురించి నిన్నగాక మొన్న వచ్చిన మీకు ఏం తెలుసు బే? గంగారాం సాబ్ దగ్గిర కొలువులో చేరకముందు పన్నెండుమందిని నిలబెట్టి నరికిన చేతులివి. బులంద్ జైలు గోడలు దూకి నలభై రెండు కిలోమీటర్ల అడవుల్లో పరుగులు తీసిన పాదాలు ఇవి….. మా గురించి మాట్లాడే హక్కు మీకున్నదా…  .?” కరకరమంటున్న కంఠంతో గట్టిగా అడిగాడు.

కంగుతిని ముఖాన్ని పక్కకు తిప్పుకుంటాడనుకున్నారు మిగిలిన వారందరూ. ఆ కంఠాన్ని విన్న ధనియా పొరపాటున కూడా అటువంటి పని చేయలేదు సరికదా, తమ్ముడి మాదిరిగానే తెల్లటి పల్వరుస బయటికి కనిపించేలా నవ్వాడతను.

అటువంటి మొనగాడివైన నువ్వు, రోజుకు నాలుగుసార్లు నోటికి వచ్చిన తిట్లన్నిటినీ గంగారాం సాబ్ తిడుతుంటే ఎందుకు తల వంచుకుని భరిస్తున్నావ్?” అని అడిగాడతను.

పోలీసులు నన్ను పట్టుకుని లాటీలతో విరగబాదుతుంటే, అడ్డుపడి కాపాడాడు గంగారాం సాబ్…   ఆకలితో అలమటించిపోతున్న నా కుటుంబాన్ని నేను జైలునుంచి తిరిగి వచ్చేటంత వరకూ ఆదుకున్నాడు. జైలునుంచి రాగానే నాకు ఈ ఉద్యోగం ఇచ్చి, గౌరవంగా బతికే ఏర్పాట్లు చేశాడు…  తనెందుకు గంగారాం సాబ్ తిట్టే తిట్లను భరిస్తున్నాడో వివరంగా చెప్పాడు ఆ సెక్రటరీ.

మా కథ కూడా అటువంటిదే. సరిహద్దు ప్రదేశాల్లో దొంగతనాలు చేస్తూ, అడ్డువచ్చిన వారిని కౄరంగా హతమార్చే బందిపోటు గుంపులు రెండు మా గ్రామం మీద పడితే, వంటిచేత్తో ఆ గుంపుల్ని పారద్రోలాడు గంగారాం సాబ్. ఆ గలాటలో గాయపడి ప్రాణాలు కోల్పోవాల్సిన మా తల్లిదండ్రులకు వైద్యం చేయించి, మాకు ఎనలేని ఉపకారం చేశాడు…  . మరి మేము ఆ ఋణాన్ని తీర్చుకోవాలంటే ఏం చేయాలి? మిమ్మల్నందర్నీ ఆయన గదిలోకి తోలి నోరు తెరుచుకు చూస్తూ నిలబడాలా?”

సూటిగా వినవచ్చిన ఆ విచిత్రమైన ప్రశ్నను ఆలకించేసరికి, అక్కడ వున్న వారందరి పెదవుల మీదికి పరుగుతీస్తూ వచ్చేశాయి పెద్ద పెద్ద చిరునవ్వులు.

మనం అందరమూ గంగారాంసాబ్‌కి ఋణపడి వున్న వాళ్ళమే…   ఆ ఋణం తీర్చుకోవటానికి ఇక్కడ ఉద్యోగాలు చేస్తున్నామేగాని, ఉద్యోగాల వల్ల వచ్చే డబ్బు కోసం కాదు…   గంగారాం సాబ్ మనసెరిగి నడుచుకోవటమే మన కర్తవ్యం. నోళ్ళు మూసుకుని ఎక్కడివాళ్ళక్కడ నిలబడండి. సాబ్ నిద్రలేచేవరకూ కదలను కూడా కదలవద్దు.ఉన్నట్లుండి ఒక ఆర్డర్ వంటి మాటను అందరికీ వినిపించాడు పాతిక సంవత్సరాల వయస్సుండే చిన్న సెక్రటరీ ఒకతను.

అంతకు ముందు అరనిమిషం వరకూ తమ మనస్సులను వేధించిన మాటలన్నిటినీ ఒక్కసారిగా మర్చిపోయారు అందరూ…   సభామందిరం లాగా, సువిశాలంగా వున్న హాల్లో గోడలను ఆనించివున్న మెత్తటి సోఫాలలో కూర్చుని వెయిటింగ్ మొదలు పెట్టారు మరోసారి.

పది గంటలు దాటింది. గంగారాంసాబ్ నిద్ర లేవలేదు. పదకొండు గంటలు అయింది. నిద్ర మేల్కొన్న అలికిడి కూడా బయటికి వినిపించలేదు.

పదకొండుగంటల రెండు నిముషాలకు గఁయ్ మని మ్రోతలు చేసింది సీనియర్ సెక్రటరీ దగ్గిర వున్న సెల్ ఫోన్. ఉలిక్కిపడి దాని వంక చూశాడతను. చూసిన వెంటనే మునియా, ధనియాల మాదిరి పల్వరుస బయటికి కనిపించేలా పెద్దగా నవ్వాడు.

ఏమిటది? ఎక్కడినుంచి ఆ కాల్?” సస్పెన్స్‌ని భరించలేక ఆత్రుతగా అడిగాడు అతని సహచరుడు ఒకతను.

గంగారాం సాబ్ ఎటువంటి ఇన్పర్మేషన్ ఇచ్చినా నిర్మొహమాటంగా విభేదించగల కాల్ ఇది…  తిరుగులేనిది…  క్షణంసేపు కూడా వెయిట్ చేయటానికి వీలుకానిదిఅంటూ ఆన్ బటన్‌ని ప్రెస్ చేసి చెవికి ఆనించుకుంటూ “యస్ సార్…  అన్నాడు.

బాబాయ్…  బాబాయ్…  అంటూ వినవచ్చింది ఒక పసిబిడ్డడి కంఠం.

ఒక్కక్షణం బాబూ…   ఒక్కక్షణం ఆగితే బాబాయ్ సాబ్ మాట్లాడతారు…   ఒకే ఒక్కక్షణం….అంటూ సోఫాలోంచి చెంగున లేచి బెడ్‌రూమ్ ద్వారం దగ్గిరికి పరిగెత్తాడు ఆ సెక్రటరీ.

అంతకుముందు జరిగిన సంభాషణలన్నిటినీ మరిచిపోయినట్లు అతను అలా దూసుకు రావటాన్ని చూశారు మునియా, ధనియా.

మీ మాటలే తప్ప ఎదుటివారి మాటలు మీకు అర్థంకావు…  .అని అంటూ ఉక్కుముక్కలవంటి బాహువుల్ని ముందుకు జాచాడు మునియా.

గంగారాం సాబ్ దగ్గిరికిపోయి అర్జంటుగా చెప్పు…  . ఢిల్లీ నుంచి కాల్ వచ్చింది. చిన్న గురువుగారు లైన్‌లో వున్నారు…   ఆలస్యం చేస్తే నీ పని, నా పని, ఈ చుట్టుపట్ల కనిపించేవారందరి పనీ అవుట్ అయి పోతుంది. కమాన్…  . మూవ్…  .ఖంగుమంటున్న కంఠంతో చెప్పాడు సెక్రటరీ. వట్టిగా చెప్పటంకాదు, సెల్‌ఫోన్‌ని ముందుకు జాచాడు.

కొత్తగా అక్కడికి రావడంవల్ల ఆ మాటలు మునియాకి అర్థం కాలేదు. చిన్న గురువుగారు అంటే ఎవరో అతనికి కొంచెంగా కూడా బోధపడలేదు. నొసలు విరుస్తూ అతను తన అన్నకేసి చూస్తుండగానే మరోసారి ఫోన్‌లో నుంచి వినవచ్చింది బుడతడి కంఠం.

బాబాయ్…. బాబాయ్…  .

మునియా, ధనియాలకు తెలిసి గంగారాం సాబ్‌ని అలా పిలిచే వారెవరూ లేరు…  . అటువంటి పిలుపుల్ని వినటంకోసం ఆయన బెడ్ మీదినించి లేస్తాడని కూడా వారికి తెలియదు.

అయిపోతారు నాయనలారా…   ఎందుకు చెపుతున్నానో అర్థం చేసుకోండి…   మీకు ధైర్యం లేకపోతే నన్నయినా లోపలికి పోనీయండి….. త్వరగా…  అంటూ వారిద్దరినీ మరింతగా అదరగొట్టాడు ఆ సెక్రటరీ.

అప్పటికప్పుడు అన్నిటికీ తెగించి, బెడ్ రూమ్ తలుపుల్ని తెరిచాడు మునియా…  లోపలికి వెళ్ళమని కనులతోనే సైగ చేశాడు.

రెండు అంగల్లో వెళ్ళి బెడ్ దగ్గిర నిలబడ్డాడు సెక్రటరీ. పుష్పక విమానం మాదిరి విశాలంగా వున్న ఆ బెడ్ మీద అడ్డదిడ్డంగా పడుకుని వున్న గంగారాం సాబ్ భుజాన్ని పట్టుకుని గట్టిగా కుదిపాడు.

చటుక్కున కళ్ళు తెరిచాడు గంగారాం సాబ్…  తన దగ్గిర నిలబడి వున్నది ఎవరో గమనించిన వెంటనే విపరీతమైన కోపంతో ఎర్రగా మారి పోయాయి కనులు. పిడికిలి బిగించి బలంగా అతని ముఖంకేసి గురి పెట్ట బోతున్న సమయంలో__

బాబాయ్…  బాబాయ్…  అంటూ వినవచ్చింది సెక్రటరీ చేతిలోని సెల్ ఫోన్‌లో నుంచి.

మంత్రం వేసినట్లు మటుమాయం అయిపోయింది గంగారాం సాబ్ వదనంలో ప్రత్యక్షం అయిన కోపం.

ఇక్కడే వున్నానమ్మా…   ఏం కావాలి? బాగున్నావా? ఆమ్ తిన్నావా?” ఆ ఫోన్‌ని తీసుకుంటూ ఆనందంగా అడిగాడు.

బాబాయ్…   బాబాయ్…  అంటూ వత్తి వత్తి పలికాడు ఫోన్ చేసిన బుడతడు.

చెప్పమ్మా? బాబాయ్‌నే మాట్లాడుతున్నాను…  అమ్మ వున్నదా అక్కడ?” మరింత ప్రేమగా అడిగాడు గంగారాం సాబ్.

End of Preview.
Rest of the book can be read @
http://kinige.com/kbook.php?id=789
* * *
Read other books of Mr. Madhubabu @
http://kinige.com/kbrowse.php?via=author&id=20

Related Posts:

మిత్రవాక్యం (“నాన్నగారి వ్యాసాలు” నుంచి)

గుంటూరు హిందూ కాలేజీలో ఇంటర్‌మీడియేట్‌ చదివిన రెండేళ్ళు (1943-45), సత్యమూ నేనూ సహాధ్యాయులం. మా ఇద్దరికీ సాహిత్యాభిలాష ఉండేది, మా ఇద్దరి ఆర్థికస్థితిగతులూ తుల్యం; ఆరోజుల్లోనే నేను ప్రౌఢంగా పద్యాలు రాసేవాణ్ణి. ‘ఏరా’ అంటే ‘ఏరా’ అని పిలుచుకొనేంత చనువు మా ఇద్దరిమధ్య ఏర్పడ్డది. తెలుగు అధ్యాపకులకు (పళ్ళె పూర్ణప్రజ్ఞాచార్యులు, పిల్లలమర్రి హనుమంతరావుగార్లు, మొ. వారికి) మేమంటే ఇష్టం. మరికొందరు సహాధ్యాయులతో కలిసి ”ఆంధ్రసాహిత్య మండలి” అనే రచయితల సంస్థను సత్యమూ నేనూ స్థాపించాం. ఆ పేరుతో మా ఊళ్ళలో కొన్ని సభలు నిర్వహించాం.

ఇంటర్మీడియేట్‌ ప్యాస్‌ అయింతర్వాత మాదార్లు వేరైనాయి. అతను ఉద్యోగంలో చేరాడు. నేను అప్పుడు (1945) గుంటూరులో ఉన్న ఆంధ్ర యూనివర్సిటీలో తెలుగు ఆనర్స్‌లో చదువు కొనసాగించటానికి చేరాను. ఆపై రెండేళ్ళా వాల్తేరులో చదివాను. అతను కాకినాడ, చిత్తూరు మొదలైన చోట్ల పనిచేసి 1948కి మళ్ళీ గుంటూరు చేరాడు. నేను ఆనర్సు ప్రథమశ్రేణిలో ఉత్తీర్ణుడనై గుంటూరు హిందూకాలేజీలో స్పెషల్‌ ట్యూటర్‌ ఉద్యోగంలో చేరాను. మళ్ళీ మా స్నేహం ఒక ఏడదిపాటు కలిసి ఉండటంతో బలీయమైంది.

1949లో నేను ఆంధ్రా యూనివర్సిటీలో తెలుగుశాఖలో ఉపన్యాసకుడిగా ఎంపికై వాల్తేరు వెళ్ళాను. రేపల్లెలో 1950 ఫిబ్రవరి 26న జరిగిన నా వివాహానికి సత్యం వచ్చాడు. 1950 మే 26న జరిగిన అతని పెళ్ళికి, సత్యం కోరికమేరకు బెజవాడకు మా గురువులు పళ్ళె పూర్ణప్రజ్ఞాచార్యులవారిని గుంటూరు నించి నాతో తీసుకుని వెళ్ళాను. ఆ సందర్భంలో మూడుపద్యాలు రాసి చదివాను (చూ. నా చిన్ననాటి పద్యాలు (1998), సుమత్రయి, పుట 15).

సత్యం నాకంటే రెండేళ్ళు పెద్ద; నన్ను ‘తమ్ముడూ’ అంటుండేవాడు. అతని సహస్రపూర్ణచంద్రదర్శనోత్సవ సందర్భంగా అతని రెండో కూతురు, ప్రసిద్ధ కవయిత్రి, డా. చిల్లర భవానీదేవి అతను రాసిన వ్యాసాలన్నిటినీ సేకరించి చిన్న పుస్తకంగా అచ్చు వేయించటానికి చేస్తున్న ఈ ప్రయత్నం అభినందనీయం.

ఈ సంకలనంలో 1945-62 మధ్య అప్పుడప్పుడు సత్యం రాసిన ఎనిమిది వ్యాసాలున్నాయి. అతను ఉద్యమశీలి; సంస్కృతభాషాప్రచారిణీసభకు కార్యదర్శిగా చాలా ఏళ్ళుండి ఆ భాషా వ్యాప్తికి ఎంతో కృషిచేశాడు. సంస్కృతభాషను గురించి, సమకాలీన విద్యావిధానంలోని లోపాలను గురించి రాసిన వ్యాసాలు అతని స్వతంత్రాలోచనావిధానాన్ని ఆవిష్కరిస్తాయి. కొన్ని వ్యాసాలు అతని తెలుగు సాహిత్యాభిలాషను ప్రదర్శిస్తాయి. సత్యం తన ఉత్తరజీవితం ప్రధానంగా న్యాయవాద వృత్తికీ భగవచ్చింతనకు వినియోగించాడు.

నా మిత్రుడు శ్రీ కోటంరాజు సత్యనారాయణ శర్మ, సతీసమేతంగా శతవసంతాలకు తక్కువగాకుండ ఆరోగ్యంతో జీవించాలని భగవంతుణ్ణి ప్రార్థిస్తున్నాను.

భద్రిరాజు కృష్ణమూర్తి

* * *

నాన్నగారి వ్యాసాలు” పుస్తకం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.

నాన్నగారి వ్యాసాలు On Kinige

Related Posts:

రుద్రాణి

సుప్రసిధ్ధ రచయిత మధుబాబు కలం నుంచి జాలు వారిన అద్భుత సోషియో-ఫాంటసీ నవల రుద్రాణి.

షాడో కొడుకు మాస్టర్ షాడో గంగారాంని చూడాలనుకోవడం, ఢిల్లీ నుంచి అస్సాం రావడంతో కథ మొదలవుతుంది. పిల్లాడితో కలసి దేవీ ఉత్సవంలో పాల్గొనడానికి వెళ్ళిన బిందూ, గంగారాం సమక్షంలోనే షాడో కొడుకుని ఎవరో అపహరిస్తారు. గంగారాం ఎంత ప్రయత్నించినా బాబు ఆచూకీ తెలియదు. మొత్తం సి.ఐ.బి ఉద్యోగులందరూ అస్సాం, చుట్టుపక్కల ప్రాంతాలలో వెతుకులాటకి సిద్ధమవుతుంటారు. టోక్యో నుంచి ఇండియాకి చేరిన షాడో కులకర్ణిగారితో కలసి బిడ్డ తప్పిపోయిన ప్రాంతాలలో వెతకడం మొదలుపెడతాడు. చివరికి ఓ కొండ గుహలో తన కొడుకుని బంధించడం గమనించి, అక్కడి దుండగులని ఎదిరించి బిడ్డని సురక్షితంగా బయటకు తీసుకొస్తాడు. బిడ్డకి రంగు రాయి ఒకటి ఆకర్షణగా చూపి తనతో తీసుకువెళ్ళిన ఆ మనిషి కనబడడు, ఆ రాయి కనబడదు.

ఇంతలో ఇంటర్ పోల్ నుంచి షాడోకి అత్యవసరమైన సందేశం ఒకటి అందుతుంది. కొన్ని దేశాలలో పాత కాలం వజ్రాలు, విలువైన జాతి రత్నాలు దొంగిలించబడుతున్నాయట నార్వేదేశంలో అత్యంత ప్రాచీనమైన రెండు వజ్రాలున్న కంటైనర్ ఒకటి ఆఫ్రికా ఎడారులలో మిస్సయిందట. దాన్ని ట్రేస్ చేసి అప్పగించాలి. ఇంటర్‌పోల్ డైరక్టర్ గ్రిఫోర్డ్ విన్నపంతో ఆ ఎస్సైన్‌మెంట్ ఒప్పుకుంటాడు షాడో. ఇప్పటివరకు గుండాలు, రౌడీలు, దొంగలు వంటి మాములు సాంఘిక నవలలా సాగిన కథ క్రమంగా జానపద సరళిలోకి మారుతుంది. షాడోని, అతని వెంట వచ్చిన వ్యక్తిని కొందరు ఆటవిక జాతుల వాళ్ళు పట్టుకుని మరో నాగరిక నేరస్తుల గుంపుకి అప్పగిస్తారు. వీళ్ళతో జరిగే పోరాటాలు, యుద్ధాల నేపధ్యంలో కథ జానపదం వైపు మళ్ళడానికి బీజం పడుతుంది. రకరకాల వజ్ర్రాలను సేకరించి మిట్టమధ్యాహ్నం సూర్యకిరణాలు వాటి మీద పడే సమయంలో పసిపిల్లల రక్తంతో వజ్రాలను తడిపితే ఓ అద్బుతమైన, సుసంపన్నమైన లోకంలోకి ప్రవేశించగలుగుతారనే నమ్మకంతో ఈ దురాగతాలకి ఒడిగడుతోందో ముఠా.

అనుకున్నట్లుగానే ఆ విలువైన రంగురాళ్ళ మీద సూర్యకాంతి పడగానే ఓ ప్రకాశవంతమైన మెరుపుతో కూడిన ఆవరణ కనబడుతుంది. మాయమైన వజ్రాల కంటైనర్ కంటబడడంతో, దాన్ని మీదకి దూకే క్రమంలో షాడో ఆ కాంతి వలయంలో పడి కొత్త లోకంలోకి అడుగుపెడతాడు. ఇక ఇక్కడి నుంచి కథంతా జానపద రీతిలో సాగుతుంది. నగరంలోని సంపన్నులు బీదల్ని ఊరికి దూరంగా ఉంచడం, హేళన చేయడం గమనిస్తాడు షాడో. తనకి ఆశ్రయం ఇచ్చిన కుటుంబనికి మేలు చేసి, ఓ వర్తకుడి పటాలంలో చేరి వలీదా నగరంలో అడుగుపెడతాడు. వర్తకుడిని, వర్తకుడి కూతురిని ఆ నగరపు ఖైదు చేయించడంతో, రాజు ముందుకు వెళ్లక తప్పదు షాడోకి.

షాడో లాంటి వీరుల కోసమే తానింత కాలం ఎదురుచూస్తున్నట్లు చెబుతాడా రాజు. షాడోని ఓ సాయం చేయమని అడుగుతాడు. అది ఎంత ప్రమాదకరమో, ఏ విపత్కర పరిస్థితులకు దారితీస్తుందో ఏమీ ఆలోచించకుండా వెంటనే అంగీకరిస్తాడు షాడో. బదులుగా, వర్తకుడిని అతని కూతురిని విడుదల చేయమంటాడు. రాజు షాడోని ఓ గదిలోకి తీసుకువెడతాడు. రాజుగారి కొడుకు అక్కడ అపస్మారక స్థితిలో ఉంటాడు. ఏదో విషజంతువు గాయపరచడం వల్ల అతను ప్రమాదంలో చిక్కుకున్నాడు. విషం ప్రాణాలు తీయకుండా చేయగలిగిన వైద్యులు అతనికి స్పృహ తెప్పించడంలో మాత్రం విఫలమయ్యారు. “ఇక్కడికి పదిరోజుల ప్రయాణంలో సులోమీ పర్వతాలున్నాయి. ఆ పర్వతాల్లో వున్న పిశాచాలకు చిక్కి ప్రాణాలు పోగొట్టుకోకుండా అవతలి ప్రక్కకు చేరుకోగలిగితే సువిశాలమైన సులోమీ మైదానప్రాంతం అగుపిస్తుందిట…. రకరకాల రాజ్యాలు, వివిధ రకాల నగరాలు కలిగివుండే ఆ మైదాన ప్రదేశంలో ఎక్కడో దట్టమయిన అటవీప్రాంతం ఒకటి వున్నదిట….. ఆ అడవిలో రుద్రాణి అనే పువ్వు దొరుకుతుందిట_ ఆ రుద్రాణి పుష్పంతో తయారుచేయబడిన లేపనాన్ని ఉపయోగిస్తే నా కుమారుడు ఆరోగ్యవంతుడవుతాడని వైద్యులు చేపుతున్నారు. నువ్వు ఆ పుష్పాన్ని తెచ్చిపెట్టాలి” అన్నాడు రాజు.

కథ క్రమంగా అంతిమ ఘట్టానికి చేరుకుంటోంది. రుద్రాణి పుష్పం కోసం ఆ పర్వతాలలో అడుగుపెడటాడు షాడో. ఎన్నో ప్రమాదాలను ఎదుర్కుంటాడు. ఓ ముసలామె షాడోకి ఆతిథ్యం ఇచ్చినట్లే ఇచ్చి, అతని గుర్రాన్ని చంపి ఆ మాంసంతో విందు చేసుకోవాలనుకుంటుంది. తోటి ముసలాళ్లందరిని పిలుస్తుంది. వారు షాడో మీద పడగా, వారితో పోరాటం పూర్తయ్యేసరిక్ తెల్లారిపోతుంది. కాలినడకన ఇంకో పర్వతం వద్దకు చేరుతాడు. అక్కడో రెండు ఆటవిక జాతులు ఒకరితో ఒకరు యుద్ధం చేసుకోగా, ఒక ఆటవికలు గుంపు మరో గుంపుని పూర్తిగా తుడిచిపెట్టి వెళ్ళిపోతుంది. అక్కడే ఉన్న షాడో వారందరిక్ సామూహిక దహన సంస్కారాలు చేస్తాడు. వాళ్ల పిల్లలతో కలసి, శత్రుస్థావరం వైపు వెడతాడు. ఉపాయంతో వారిని అణచివేసి, పిల్లల తల్లిదండ్రులను విడిపిస్తాడు.

అక్కడి నుంచి బయల్దేరి మూడో పర్వతం వద్దకి చేరగానే పురాణాలలోని గండభేరుండ పక్షి లాంటి అతి పెద్ద రాక్షస పక్షి షాడో మీద పడుతుంది. అది తన పిల్లలకి ఆహారంగా షాడోని ఎత్తుకెళ్ళి ఓ చీకటి గుహలో పడేస్తుంది. అక్కడ్నించి తప్పించుకోవాలంటే అది ఇంకో ఆహారాన్ని తెచ్చినప్పుడు దాని కాళ్ళు పట్టుకుని దాంతో పాటు గాల్లోకి ఎగరడం తప్ప మరో మార్గం కనపడదు. ఆ ప్రయత్నంలో పక్షి గాయపడి తప్పించుకోడంతో లోయలోకి దిగి నడక సాగిస్తాడు షాడో. ఓ వాగు వద్ద కొంతమంది మనుషులు ఎదురయితే వారితో పాటు అడవిలో కట్టెలు కొట్టి వాళ్ళ గ్రామానికి వెళ్ళి ఆహారం తిని విశ్రాంతి తీసుకుంటాడు. అక్కడి గ్రామపెద్దను రుద్రాణి పువ్వు గురించి అడుగుతాడు.

ఇంతలో గండభేరుండ పక్షుల గురించి దండోరా వినబడుతుంది. ఆ ప్రాంతపు రాణి ఆ దండోరా వేయిస్తోంది. గండభేరుండ పక్షుల గ్రామలపై దాడి చేస్తున్నయాని, సురక్షితంగా ఉండండి అంటూ రాణి చేసిన ప్రకటన అది. అక్కడ జరిగిన ఓ సంఘటన వలన షాడోని రాణి గారి ముందు ప్రవేశబెడతారు. ఇక్కడ నుంచి నవలలోని చివరి అంకానికి తెరలేస్తుంది. రాణి గారి శత్రువుని నిర్మూలించే క్రమంలో షాడో దట్టమైన ఓ లోయలోకి జారిపోతాడు. ఎందరెందరో చేరాలని ప్రయత్నించిన ఆ అద్భుతమైన, సుసంపన్నమైన లోకమే అది. ఎక్కడ చూసినా, బంగారం… వజ్రాలు… జాతి రత్నాలు ఉన్నాయక్కడ. అంతే కాదు వజ్రాల కంటైనర్‌ని దొంగిలించిన అగంతకుడు కూడా కనపడ్డాడు. పోరాటాలూ, సాహసాలు ముగిసాక, షాడో ఆ వజ్రాల కంటైనర్‌ని చేజిక్కించుకుంటాడు. వలీదా రాజుకి రుద్రాణి పుష్పం అందిస్తాడు. తను వచ్చిన పని ముగిసింది కాబట్టి తిరిగి మామూలు ప్రపంచంలోకి అడుగుపెట్టాలని అనుకుంటూ వజ్రాలపై సూర్యకాంతి పడేలా చేసుకుని విజయం సాధిస్తాడు. ఆ క్రమంలో వెలువడిన పొగ ఉక్కిరిబిక్కిరి చేయడంతో స్పృహ కోల్పోతాడు. తెలివి వచ్చేసరికి ఇంటర్ పోల్ ఏజంట్లు, తన మిత్రుడు సమీర్ కనబడతారు. ఎప్పటిలాగే ఎస్సైన్‌మెంట్‌ని విజయవంతంగా ముగించినందుకు ఇంటర్‌పోల్ షాడోని అభినందిస్తుంది.

వీధి గుండాల పోరాటాలతో సాంఘిక గాధగా మొదలై, ఆటవికుల, జంతువులు మధ్యగా సాగి రాజులు, రాణులు, సైనికులు, కుట్రలు కుతంత్రాలతో జానపద కథగా మారి మళ్లీ డిటెక్టివ్‌లు, సీక్రెట్ ఏజెంట్ల రాకతో థ్రిల్లర్‌గా మారిన ఈ నవల చివరిదాక ఆసక్తికరంగా సాగి పాఠకులకి అమితాసక్తిని కలిగిస్తుంది.

రుద్రాణి నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‌ని అనుసరించండి.

రుద్రాణి On Kinige

కొల్లూరి సోమ శంకర్

Related Posts:

పూర్ణచంద్రతేజస్వి “పరిసర కతెగళు” (పర్యావరణ కథలు) : ఓ పరిచయం

మీ చెప్పులను ఎప్పుడైనా కుక్కలు ఎత్తుకెళ్ళాయా? పల్లెటూళ్ళతో మీకు సంబంధం ఉంటే తప్పనిసరిగా ఈ అనుభవం ఎదురయ్యే వుంటుంది. అయితే వాటి బారిన పడకుండా మీ చెప్పులను రక్షించుకోవాలంటే ఏంచెయ్యాలి? ఎడమ చెప్పు కుడివైపునా , కుడిచెప్పు ఎడమవైపునా ఉంచండి. కుక్కలు వాటివైపు వెళ్ళవు. ఎందుకంటారా? అవి దెయ్యం కాలిజోళ్ళని భయపడతాయి. నమ్మబుద్ధవటంలేదా? పూర్ణచంద్ర తేజస్వి అనే ప్రఖ్యాత కన్నడ రచయిత రాసిన ‘పరిసర కతెగళు’ అన్న కన్నడ కథాసంపుటాన్ని తెలుగుచేసి శాఖమూరి రాంగోపాల్ గారు అందించిన ‘పర్యావరణ కథలు‘ చదవండి. అందులో మరడు ఈ సత్యాన్ని శాస్త్రీయదృష్టిగల తేజస్విగారి ముక్కు పట్టుకుని మరీ చెపుతాడు. ఆయన మన చెవి పట్టుకుని ఆ వైనాన్ని ఓ కథచేసి వినిపిస్తాడు.
ఉడుంపట్టు అనటం వినీ ఉంటారు, అనీ ఉంటారు. ఆ పట్టు ఎలాంటిదో ఎంతటిదో మీరు చూసి ఉండరు. అది కళ్ళకు కట్టినట్టు, మనసుకు ‘ఉడుంపట్టు’ పట్టేటట్టూ చెపుతారు తేజస్వి.
కోతులు వచ్చి ఇళ్లమీదా, దొడ్లమీదా పడి నానాయాగీ చేస్తే మీరేం చేస్తారు? వాటిని చంపెయ్యాలనుకుంటారు. అయితే అవి దైవస్వరూపాలు గదా ఎలా చంపుతాం అంటాడు గాడ్లీ. పాపం ఆ మానవుడు అందుకోసం నానాపాట్లూ పడి ఓ బోను తయారుచేస్తాడు. దానితో వాటిని పట్టుకుని తీసుకువెళ్ళి అడవిలో వదిలెయ్యాలని అతగాడి పథకం. పట్టుకుంటాడు. దైవస్వరూపాలు గదా. అందుకోసం వాటికి తిండి ఏర్పాట్లు చేస్తాడు. తీరా తీసుకువెళ్ళి బోను తెరిస్తే, తిండి మరిగిన ఓ కోతి బయటకు వెళ్ళదు. దానిని బయటకు తరమటానికి తను బోనులోకి వెళ్ళేసరికి పొరపాటున అందులో చిక్కుకుపోతాడు. ఆ గాడ్లీ కథ వింటారా అయితే తేజస్విగారి స్వానుభవాలతో నిండి ఈ ‘పర్యావరణ కథలు’ చదవండి.
పర్యావరణం అన్న పదం తెలుగులో ప్రస్తుతం చెలామణీ ఉంది. ప్రపంచవ్యాప్తంగా ఈ పదం ఒకటి రెండు దశాబ్దాలుగా వినపడుతోంది. ఈ పదం వ్యక్తంచేసే అంశంలో అనేక ఫిర్యాదులు ఉన్నాయి. వన్యజీవుల అంతర్ధానం, వన్య జీవిత విధ్వంసం అందులో ఒకటి. మన అనుభవజ్ఞులైన ప్రాణుల అంతర్ధానానికి కారణం మానవులమైన మన అత్యాశ. మానవీయ దృష్టితో చూచినా, మన బాగుకోసమే అని గ్రహించినా అవి అంతరించిపోకుండా మనం జాగ్రత్త పడాలి. పౌరులు తమ ప్రభుత్వాలనూ, దేశాలు ధనిక దేశాలనూ ఒత్తిడి చేసి తగు జాగ్రత్త చర్యలు తీసుకోవాలన్నద దీని సారాంశం. వనాలు కొట్టివేసి వానలను తగ్గించి, తద్వారా ఉష్ణోగ్రతలలో మార్పులకు కారణమవుతున్నాం. హానికర రసాయనాల వినియోగంతో మరింత వాతావరణ మార్పులకు దోహదం చేస్తున్నాం. పర్యావరణం అనగానే ఈ అంశాలు, వాదనలూ, వివరణలూ మనలో కదులుతాయి. ఈ పుస్తకం శీర్షిక వాటిని ఎంతోకొంత గుర్తుచేస్తుంది. దీనివల్ల పుస్తకానికి అదనపు అమ్మకపు విలువ చేరుతుందా లేక ఆ దృష్ట్యా చదవాలనుకునే వారికి అసంతృప్తి కలిగిస్తుందా అనేది ప్రశ్నార్థకం.
పోతే- కన్నడిగుల రాష్ట్రకవిగా గౌరవింపబడే కువెంపుగారి కుమారుడు పూర్ణచంద్ర తేజస్వి. 1938లో పుట్టిన వీరు 2007లో కీర్తిశేషులయారు. కవిత్వం, కథ, నవల, నాటకం, యాత్రాసాహిత్యం, అనువాదాలు, విమర్శ, శాస్త్ర -కల్పన (scientific fiction) వంటి అనేక ప్రక్రియలలో సాహిత్య కృషిచేశారు. “అబచూరిన పోస్టాఫీసు” అన్న వీరి కథా సంపుటాన్ని కన్నడ ప్రగతిశీల (progressive) సాహిత్యానికి ఆరంభంగా భావిస్తారు. ఈ పేరుతోనూ, “తబరినకతె” అన్న పేరుతోనూ విడుదలైన సినిమాలు అనేక పురస్కారాలు అందుకున్నాయి. ఈయన చదువు ముగించుకుని లోహియా ప్రభావంతో వ్యవసాయం చేయటానికి పశ్చిమ కనుమలలో తేయాకు తోట కొని వ్యవసాయం చేశారు. అక్కడి అనుభవాలతో తను పరిసరాల ప్రేమికునిగా మారానని, ఆ మారిన విధానాన్ని ఈ కథలలో అర్థంచేసుకోవచ్చని తేజస్వి తన పుస్తకంలోని మొదటి రచనలో ఇలా చెపుతారు. “నేను చెప్పే చిన్నా, చితకా నా స్వంత అనుభవాలలోని సంఘటనలకు, పర్యావరణంకు ఏదో సంబంధాన్ని నేరుగా చూపించలేనండి! అయితే నా బతుకు బాటలో ఇది (ఈ రాతలు) నేను నడచివచ్చిన దారి అని మాత్రం చెప్పగలనండి”. వానలమయమైన పశ్చిమ కనుమలలోని ఓ కుర్రవాని దృష్టినుండి చెప్పిన తొలి కథతోనే రాజ్యోత్సవ పురస్కారం అందుకుని తండ్రి ఛాయనుంచి బయటపడిన తేజస్వి ఈ కథా సంపుటం పదహారు ముద్రణలకు పైగా అమ్ముడుపోయింది “కర్వలు” అనే వారి నవల 26 ఏళ్ళు గడిచినా ప్రతివారం అమ్ముడుపోయే తొలి పది పుస్తకాలలో ఒకటి అంటారు.
ఈ సంపుటంలోని కథలలో పాత్రలు మళ్ళీ మళ్ళీ వస్తుంటాయి. ఇది మనలని పాత్రలకు, కథా వాతావరణానికీ అలవాటు చేస్తుంది. తెలియని విషయాలపట్ల, వ్యక్తుల పట్ల, జీవిత వివరాల పట్ల మనలో ఓ పీపింగ్ టామ్ ఉంటాడు. తేజస్వి దీనిని చక్కగా వాడుకుంటారు. సాహసాలు, అడవులు, వేట వంటి వస్తువులతో తెలుగులో కథలు రాకపోలేదు. ఈ వాతావరణంతోనే మనకు సి.రామచంద్రరావు ఇంతకన్న నేర్పరితనంతో కథలు చెప్పారు. వేట ఇతివృత్తంగా పూసపాటి కృష్ణంరాజు, పతంజలి, అల్లం శేషగిరిరావు వంటి వారు రాసారు. ఏమైనా ఈ పుస్తకంలా అవి పదహారు ముద్రణలు పొందలేదని మనం ఒప్పుకోవాలి. పుస్తకాలు కొని చదవటంలోనూ, మంచి రచయితలకు తమ సృజనతో కడుపు నింపుకునే అవకాశం ఇవ్వటంలోనూ, కన్నడిగులు మనకన్న చాలా ముందున్నారన్నది మనం తలొంచుకుని ఒప్పుకోవలసిన విషయం. కనీసం ఈ పుస్తకం విషయంలోనైనా మనమీదున్న ఈ చెడుపేరు తప్పించుకోటానికి దీనిని కొని చదువుదాం. తెలుగులో మనం చదవాలన్న ఆశతో దీనిపై కాలాన్నే కాక ధనాన్ని వెచ్చించిన శాఖమూరి రాంగోపాల్ గారికి కొని, కృతజ్ఞతలు చెపుదాం.
ఈ పుస్తకం అనువాదం గురించి కూడా ఓమాట అనుకోక తప్పదు. కథా వాతావరణానికి భాష అమిరినా, చదువుకోటానికి కాస్త అడ్డుపడుతుంటూనే ఉంటుంది. కొన్ని కన్నడ పదాలు ప్రతిభటన (ప్రతిఘటన) వంటివి వాడకుండా ఉంటే బాగుండేది.
అలాగే దాదాపు అన్ని కథల వెనుకా ఉస్మానియా విశ్వవిద్యాలయం లైబ్రరీనుండి నిద్రాణమైన కథలు అనటం సరిగా లేదు 16 ముద్రణలు పొందిన కథాపుస్తకాన్ని వెతికి తీసాననటం అనువాదకుని కృషిగా చెప్పవచ్చుగాని, పుస్తకానికి శోభనివ్వదు.

వివిన మూర్తి
(ప్రజాసాహితి మే,2012 సంచిక నుంచి)

* * *

” పర్యావరణ కథలు” డిజిటల్ రూపంలో కినిగెలో లభిస్తుంది. ఈ క్రింది లింక్‌ని అనుసరించండి.

పర్యావరణ కథలు On Kinige

Related Posts:

Kinige Newsletter 19 May 2012

స్వాగతం.
టాప్ తెలుగు పుస్తకాలు
** Rudrani Thumb Image **రుద్రాణి
మధుబాబు – నవల
** EvaritO Ela Matladali Thumb Image ** ఎవరితో ఎలా మాట్లాడాలి?
‘రామాయణంలో హనుమంతుడు’ ఆధారంగా రూపొందిన పుస్తకం.
** Macchala Gurram Thumb Image **మచ్చల గుర్రం
మధుబాబు జానపద నవల.
** Draupadi Thumb Image ** ద్రౌపది
డా. యార్లగడ్డ లక్ష్మీప్రసాద్ నవల
** OperationCounterSpy Thumb Image ** ఆపరేషన్ కౌంటర్ స్పై
మధుబాబు – షాడో స్పై థ్రిల్లర్
** Chinese Beaty Thumb Image **చైనీస్ బ్యూటీ
మధుబాబు – షాడో స్పై థ్రిల్లర్

కొత్త తెలుగు పుస్తకాలు


** Banzaay Thumb Image ** బంజాయ్
మధుబాబు – షాడో ఎడ్వెంచర్
** Martin Luther King Thumb Image **ఆయుధం పట్టని యోధుడు
డా. మార్టిన్ లూథర్ కింగ్ జీవితచరిత్ర
** Keratam Thumb Image ** కెరటం నా కిరీటం
డా. సి. భవానీదేవి కవితా సంకలనం
** Chivaraku Migilindi Thumb Image **చివరకు మిగిలింది?
“గాన్ విత్ ద విండ్”కు అనువాదం
** Parishakaram Thumb Image **పరిష్కారం
డా. ఎం.వి. రమణారెడ్డి కథాసంపుటి
** Dynamite Dora Thumb Image ** డైనమేట్ డోరా
మధుబాబు – షాడో స్పై థ్రిల్లర్
** Teluginti Draupadi Thumb Image **తెలుగింటికొచ్చిన ద్రౌపది
డాక్టర్ ఎం.వి. రమణారెడ్డి రచన
** Amma Nannu Thumb Image **అమ్మా…… నన్ను క్షమించొద్దు
డా. సి. భవానీదేవి కథాసంపుటి
** Family Photo Thumb Image **ఫ్యామిలీ ఫొటో
కుటుంబ వ్యవస్థ విలువని చాటిన నవల.

ప్రింటు పుస్తకాలు 20శాతం వరకు తగ్గింపుతో…
ఏటి ఒడ్డున వనమాల చారిత్రక వ్యాసమంజరి మనీప్లాంట్
పర్యావరణ కథలు తెలంగాణా అస్తిత్వ పోరాటం కృష్ణారెడ్డి గారి ఏనుగు సాహితీ విరూపాక్షుడు విద్వాన్ విశ్వం
కవిరాజు త్రిపురనేని రామస్వామి జీవితము: కృషి Political Stories ముందే మేలుకో త్రిపుర కథలు

మా బ్లాగుల నుండి…
** Repati Vartamanam Thumb Image ** సాహిత్య చంద్రికలు
“రేపటి వర్తమానం” కవితా సంపుటి పరిచయం
** Kalamlo Prayanam Thumb Image ** సైన్సూ, ఫిక్షన్ కలిపి
పుస్తక సమీక్ష
** Astram Thumb Image ** చిన్న కథల పొది – “అస్త్రం”
పుస్తక సమీక్ష

Related Posts:

తెలుగు కవిత్వ లోకంలో ఓలలాడండి ….

ప్రతీ ఏడాది, ఆ సంవత్సరం ప్రచురితమైన కవితల్లోంచి అత్యుత్తమ కవితలని ఎంచుకుని ఒక సంకలనంగా ప్రచురిస్తున్నారు సాహితీమిత్రులు. కాలానుకనుగుణంగా కవితలను పరిణామాల్లో అంశాలకు ఆవిర్భావ వికాసాలకు ఇవి దర్పణాలు. సంపాదకులు పాపినేని, దర్భశయనం వారి ప్రమాణాల మేరకు కవితల్ని ఎన్నిక జేయడం జరుగుతుంది.

2007 నుండి 2011 వరకు వచ్చిన ఐదు కవితా సంకలనాలనూ మీరు ఇప్పుడు 25 శాతం తక్కువకు కొనుగోలు చెయ్యండి, తెలుగు కవితా లోకంలో ఓలలాడండి.

తెలుగు కవితా లోకంలో విహరించడానికి ఇప్పుడే http://kinige.com/koffer.php?id=40 దర్శించి Buy this Offer మీట నొక్కండి.

కవిత 2007 – 2011 … 25 శాతం తక్కువకు! On Kinige

Related Posts: