ఇవి మహనీయుల స్వరభాస్వరాలు

మరణించిన వారు బతికి ఉన్న సమయంలో చెప్పిన మాటలు మధురంగా, ఒక్కోసారి ఆశ్చర్యంగా, ఒక్కోసారి అద్భుతంగా గోచరిస్తాయి. అయితే వారి మాటలను ఏరి కూర్చి ‘అభౌతిక స్వరం‘ అనే పేరుతో పుస్తక రూపం ఇచ్చారు మాధవ్ సింగరాజు. నిరంతరం ఆలోచిస్తూ, అపుడపుడు అతి దగ్గరివారితో నవ్విస్తూ అన్నీ తెలిసినా ఏమీ తెలియనట్లు ఉండే మాధవ్ కలం నుంచి ఒక దినపత్రికలో వారం వారం జాలువారిన ధారావాహికకు పుస్తక రూపం ఇది. ప్రతి వారం పాఠకులకు విసుగు కలిగించకుండా, అందరినీ ఆకట్టుకునేలా రాయడమంటే మాటలు కాదు. కానీ ఎక్కడా వైవిధ్యం చెడకుండా ఒక ప్రవాహంలా తనదైన శైలిలో సాగిపోతుంది ఈ రచన. ఇక్కడ ఒకటి రెండు ఉదాహరణలందించి ఈ పుస్తకాన్ని రుచి చూపాలనిపిస్తోంది.

చార్లీ చాప్లిన్ అధ్యాయంలో ఇలా ఉంది.
“దగ్గర్నించి చూస్తే ఏ జీవితమైనా గొప్పగా ఉండదు. లాంగ్ షాట్‌లో చాప్లిన్ మీకు అందంగా కనిపించడమే, జీవితంలోని విషాదం. నాలో అహంకారం, అరాచకం మాత్రమే కాదు, ఇంకా అనేకం ఉన్నాయి. బద్దకం, అబద్ధం, అసంబద్ధత అన్నీ కలిస్తే నేను. నా కారును నేను ఎక్కువ దూరం డ్రైవ్ చెయ్యలేదు. నడపడం ఇష్టం అలా ఎంత దూరమైనా, కొంచెం స్విమ్మింగ్ వచ్చు, ఆటలు ఆడడం రాదు, ఆ మధ్య ఒక పత్రికలో నా ఫొటో వచ్చింది. పోలో ఆడుతూ గుర్రం పక్కన నిలబడి ఉన్నట్లు. అదో జోక్….. విశ్రాంతి కోసం కొరొనాడో వెళ్ళినప్పుడు నా ఫ్రెండ్ ఒకడు తన పోలో గేమ్ డ్రెస్ ఇచ్చి, దాన్ని తొడుక్కుని ఫొటో దిగమన్నాడు. అపుడు తీసింది ఇది” అంటూ చెప్పుకొచ్చారు. ఎదిగిన వారు కొద్దిగా ఒదిగి ఉండాలంటారు. అదే విధంగా ఎదిగిన వారు ఎప్పుడూ వాస్తవాలు చెప్పుకోడానికి వెనుకాడరు. ఉన్న విషయాన్ని కుండబద్దలు కొట్టినట్లు చెబుతారు.

ఇక ఒక కవి అదీ భారత దేశానికి నోబెల్ బహుమతి తెచ్చిన కవి రవీంద్రనాథ్ ఠాగూర్ ఊహలు, కలలు ఎలా ఉన్నాయో చెప్పడానికి ఒక మచ్చుతునక. “రాత్రి చిత్రమైన కల వచ్చింది. కలకత్తాను మహత్తరమైన మంచు మేఘమేదో కమ్మేసింది. ఇళ్ళు భవనాలు కనిపించడం లేదు. అప్పుడు నేను పార్క్ స్ట్రీట్‌లో గుర్రపు బగ్గీపై వెళుతున్నాను. సెయింట్ జేవియర్స్ కాలేజి దగ్గరకు రాగానే ఒక్క సారిగా ఆ భవంతి పెరగడం మొదలైంది. చాలా వేగంగా, ఎత్తుగా, చిక్కటి మంచుని చీల్చుకుంటూ అలా ఆకాశంలోకి పెరుగుతూ ఉంది. ఊర్లోకి ఎవరో కొత్త మనుషులు వచ్చి ఇలాంటి మాయలు చేస్తున్నారని జనం వింతగా చెప్పుకుంటున్నారు” అంటూ ఇది సాగుతుంది. ఆ కవి ఊహాజనిత ఘటనపై ఎంత బాగా చెప్పారో ఇది తెలియజేస్తుంది. ఇలా చెప్పుకుంటూ పోతే ఒక్కో వ్యక్తిది ఒక్కో ప్రత్యేకత. ఇలా సుమారు 50 మంది అభౌతికి స్వరాలను ఇందులో వినిపించారు. పుస్తక ముద్రణలోనూ ఒక ప్రత్యేకత కనిపించేలా ప్రయోగాలు చేసారు. పుస్తకం మొదటిదైనా ఎంతో అనుభవం దాని వెనుక దాగి ఉందని పాఠకులకు తెలిసిపోతుంది.

టి వేదాంత సూరి, ఆదివారం అనుబంధం, వార్త దినపత్రిక 28 అక్టోబరు 2012

* * *

అభౌతిక స్వరం On Kinige

Related Posts:

కాలాతీత భావాలు

చలసాని ప్రసాదరావుఇలా మిగిలేం‘ ప్రతి ముద్రణా ఒక అలజడే! మొదటిసారి 1991 ఆగస్టులో వెలువడినప్పుడు మరే గ్రంథం మీదా జరగనంత విస్తృత చర్చ జరిగింది. మోటూరి హనుమంతరావును సైతం నిలదీయడానికి చలసాని వెనకాడలేదు. రావి నారాయణరెడ్డిని పెద్ద మితవాదిగా పేర్కొన్నారు. గజ్జెల మల్లారెడ్డిని వూసరవెల్లిగా చిత్రించారు. ‘ఖడ్గమృగోదగ్ర విరావం – పులి చంపిన లేడి నెత్తురు’ను తిరగేసి శ్రీశ్రీకే వేసికొట్టాలని చూసిన బాలగంగాధర తిలక్ కవితని ‘చాపల్యం’గానే భావించారు. ఇవన్నీ చలసాని ప్రత్యక్షానుభవాలనుంచి వచ్చినవే. అన్నీ స్వీయానుభవంలోనివయినప్పుడు దాపరికం ఎందుకన్న ధీమా ఆయన వ్యక్తం చేశారు. ఓ ‘బాధ్యత’గానే ఇదంతా రాశానని చెప్పుకున్నారు. కమ్యూనిస్టు మహోద్యమం ఇలా ఛిన్నాభిన్నమైపోవడానికి గల కారణాల్లో ‘కొన్నింటిని’ ఆ ఉద్యమ నాయకులు సరిదిద్దుకోవాలన్నది ఈ రచనాలక్ష్యం. ఆలోచనను రేకెత్తించటం వరకూ అది నెరవేరిందనే అనుకుంటున్నానని మలిముద్రణవేళ వాసిరెడ్డి నవీన్‌కు ఇచ్చిన ఇంటర్వ్యూలో పేర్కొన్నారు. చలసాని పదో వర్ధంతి సందర్భంగా వచ్చిన మూడో ముద్రణ ఇది.

జివిఎన్ మూర్తి
ఈనాడు ఆదివారం అనుబంధం 22 జులై 2012.

* * *

‘ఇలా మిగిలేం’ డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా తక్కువ ధరకే ప్రింట్ బుక్ ఆర్డర్ చేయవచ్చు. మరిన్ని వివరాలకు ఈ క్రింది లింక్‌ని అనుసరించండి.
ఇలా మిగిలేం On Kinige

Related Posts:

ఎన్నారై కథలు

కినిగెలో ఉన్న ప్రవాసాంధ్ర రచయితల కథల సంక్షిప్త పరిచయం ఈ వ్యాసం.

ఎన్నెమ్మ కథలు:
చాలా కాలం క్రితమే అమెరికాలో స్థిరపడిపడిపోయిన రచయిత్రి నిడదవోలు మాలతి కథల సంకలనం ఇది. ఎన్నెమ్మ కథలు అనేవి నిడదవోలు మాలతి గారు తన బ్లాగులో ’ఊసుపోక’ అనే శీర్షికతో రాసుకున్న టపాల సంకలనం. పత్రికలలో ప్రచురించాలి అంటే అది కథో, వ్యాసమో, కవితో, ఫీచరో అయి ఉండాలి. ఇలాంటి వర్గీకరణ చట్రాలలో ఇమడవు ఈ ఎన్నెమ్మ కథలు. ఎన్నో చెణుకులు, చురకలు, చమక్కులు ఉన్న వ్యాసాలు ఈ పుస్తకంలో ఉన్నాయి.
ఎన్నెమ్మ కథలు On Kinige

శ్యామ్‌యానా:
మెడికో శ్యామ్‌గా సుప్రసిద్ధులైన డా. చిర్రావూరి శ్యామ్ రాసిన కథల సంకలనం ఇది. రచయిత మెడికో అయినప్పటికీ, ఈ సంకలనంలో వైద్యం, ఆసుపత్రి, రోగుల నేపధ్యంలో అల్లిన కథలు తక్కువే. ఈ కథలను రచయిత 1971/72 నుంచి 1979 మధ్యలోనూ, ఐ.సి.సి.యు అనే కథని 1981-82 మధ్యకాలంలోను రాసారు. వీటిని ఓ సంకలనంగా తెచ్చే ప్రయత్నం 2010 నాటికి సాధ్యమైంది. ఈ కథా సంకలనాన్ని జులై 2010లో వంగూరి ఫౌండేషన్ ఆఫ్ అమెరికా వారు ప్రచురించారు. మంచి కథలున్న ఈ శ్యామ్‌యానా హాయిగా చదివిస్తుంది.
శ్యామ్‌యానా On Kinige

రంగుటద్దాల కిటికీ:
బ్లాగ్ ప్రపంచంలో కొత్తపాళీగా ప్రసిద్ధులైన ఎస్. నారాయణ స్వామి గారి కథాసంకలనం ఇది.
అమెరికా అవడానికి లేండ్ ఆఫ్ మిల్క్ అండ్ హనీ అయితే అవచ్చు కాని, అమెరికాలో జీవితం పూలబాట కాదు. అలాగని భరించలేనిదీ కాదు. సాధారణంగా అమెరికాకి సంబంధించిన తెలుగు కథల్లో కనబడే ఆహార భాషా వ్యవహార భేదాల చర్చని అధిగమించి, వలసవచ్చిన తెలుగు మనుషులు ఈ అమెరికా సమాజంలో అంతర్భాగమయ్యే ప్రయత్నంలోని అనుభవాలని కొంచెం లోతుగా, మరికొంచెం విశాలంగా పరిశీలిస్తూ – కొన్ని సరదా కథలు, కొన్ని ఆలోచింపచేసే కథలు, మరి కొన్ని సులభంగా మరిచిపోలేని కథలు, చక్కని భాష, కథకి తగిన కథన శిల్ప వైవిధ్యం – అన్నీ కలిసి రంగుటద్దాల కిటికీ.
రంగుటద్దాల కిటికీ On Kinige

సరిహద్దు:
గొర్తి సాయి బ్రహ్మానందం గారి రచన “సరిహద్దు”. అన్ని చక్కని కథలైనా, పుస్తకం శీర్షిక అయిన సరిహద్దు కథ అద్భుతంగా ఉంటుంది. మెక్సికో సరిహద్దు దాటి చట్టవిరుద్ధంగా అమెరికాలో ప్రవేశించిన హేవియర్ అనే ఓ వ్యక్తి కథ ఇది. స్వదేశంలో ఇంటి దగ్గర చిన్నచిన్న పనులైనా చేసి ఎరుగని వ్యక్తి అమెరికాలో జానిటర్‌గా పనిచేస్తాడు. అమెరికన్లు తలచుకుంటే ఇల్లీగల్‌గా దేశంలో ఉంటున్న వారిని ఏరేయడం పెద్ద కష్టం కాదు, కానీ మరెందుకు అలా చేయడం లేదు? దాని వెనుక ఉన్న చీకటి కోణం ఏమిటి? ఈ అమెరికా అన్నది ఓ మాయాజాలమని, వయసులో ఉన్న కుర్రాడు అందమైన అమ్మాయి మోహంలో పడ్డట్టు అందరూ ఈ దేశపు మాయలో పడిపోతారంటాడు హేవియర్. మనసు భారమైపోతుందీ కథ చదివాకా.
సరిహద్దు On Kinige

ఉరి:
బ్లాగర్ శరత్ నాగం రచించిన నవల ఇది. ఇది ఒక మనో వైజ్ఞానిక నవల మరియు మానసిక విశ్లేషణాత్మక నవల. మానసిక మాంద్యంతో, అలజడితో వ్యక్తులు ఎలా యాతన అనుభవిస్తారో, తమకు సరిపడని బాహ్య ప్రపంచంతో ఎంత సంఘర్షణ అనుభవిస్తారో ఒక చక్కని థ్రిల్లర్ రూపేణా ఉత్సుకత కలిగిస్తూ చెప్పడం జరిగింది. ఇది చదవడం వలన మనోరుగ్మతల గురించి మంచి అవగాహన రాగలదు. ఓ రకంగా ఇది రచయిత ఆత్మకథగా అనుకోవచ్చు.
ఉరి On Kinige

మూడోముద్రణ:
కన్నెగంటి చంద్ర రాసిన 22 కథల సంకలనం ఇది. అన్నీ కథలు బావున్నా, “సిగ్గు కథ” గురించి ప్రత్యేకంగా ప్రస్తావించాలి. చిన్న పాప నుంచి, పెళ్ళయి శ్రీమతిగా మారేవరకు ఆడపిల్లల జీవితం ఎలా సాగుతుందో ఈ కథ చక్కగా చెబుతుంది. తలను నేలకు తాకేదాకే వంచగలిగే స్థితికి స్త్రీలు ఎందుకు చేరుతారో ఈ కథ చెబుతుంది. ఓ మహిళ అచ్చమైన ఆడదిగా ఎలా మారిపోతుందో చెబుతుందీ కథ. మిగతా కథలూ తక్కువేం కాదు.
మూడోముద్రణ On Kinige

* * *

విభిన్న సమాజాల కథలను భిన్న దృక్పథాల నుంచి చదవడం గొప్ప అనుభూతి. వీటిని హాయిగా ఆస్వాదించవచ్చు.

కొల్లూరి సోమ శంకర్

Related Posts:

చెట్లకు డబ్బులు కాయటం లేదు. సరే!! వాల్‌మార్టులకు పూస్తాయా?

ప్రజాసాహితి అక్టోబరు 2012 సంపాదకీయం

Praja Sahiti October 2012 Editorial

* * *

ప్రజాసాహితి అక్టోబరు 2012 On Kinige

Related Posts:

కాకుల హంగామా అధికమయింది

ఆశ అక్టోబరు 2012 సంపాదకీయం

Aasha October 2012 Editorial

* * *

ఆశ అక్టోబరు 2012 On Kinige

Related Posts:

ప్రభుత్వం స్పష్టమైన ప్రకటనతో ముందుకురావాలి

నడుస్తున్న చరిత్ర అక్టోబరు 2012 సంపాదకీయం

Nadustunna Charitra Oct 2012 Editorial

* * *

నడుస్తున్న చరిత్ర అక్టోబరు 2012 On Kinige

Related Posts:

మిసిమి అక్టోబరు 2012 సంపాదకీయం

మిసిమి అక్టోబరు 2012 సంపాదకీయం
Misimi October 2012 Editorial

* * *

మిసిమి అక్టోబరు 2012 On Kinige

Related Posts:

ఇది తనికెళ్ల భరణి రాసిన మూడు నాటికల సంకలనం. ఇందులో జంబూ ద్వీపం, కొక్కొరొక్కో, ఛల్! ఛల్‍! గుర్రం అనే నాటికలు ఉన్నాయి. తనికెళ్ళ భరణి సినిమాలలో బిజీ కాకముందు రచించి ప్రదర్శించిన నాటికలివి. వివిధ పరిషత్తులలో ప్రదర్శించబడి, అనేక బహుమతులు గెలుచుకున్న నాటికలివి. నిడివి తక్కువగా ఉండి సులువుగా ప్రదర్శించగల నాటికలు ఇవి. పదునైన సంభాషణలతో నటులను, వీక్షకులను, చదువరులను ఉద్వేగానికి గురిచేసే నాటికలివి. అస్తవ్యస్త సమాజంపై భరణి సంధించిన వ్యంగ్యాస్త్రాలివి.
తనికెళ్ళ భరణి నాటికలు 123 On Kinige

జంబూ ద్వీపం ఓ పొలిటికల్ సెటైర్. ఇది ఓ ప్రయోగాత్మకమైన నాటిక. అన్ని పాత్రలూ కడుపుబ్బనవ్వించీ చివరకు కన్నీరు పెట్టిస్తాయి. బహుశా ‘జంబూద్వీపం’ సినిమాగా కూడా రావొచ్చు.

కేవలం రెండే రెండు పాత్రలతో రూపుదిద్దుకున్న తొలి నాటిక ఇదేనేమో. “ఈ నాటిక ఆడి ఆ రోజుల్లోనే – రెండు నెలల్లో దాదాపు ముప్ఫై అయిదువేల రూపాయలు సంపాదించాం. ఈ ప్రదర్శన కోసం బళ్ళుకట్టుకొచ్చీ – సుందరం దగ్గరా నా దగ్గరా ఆటోగ్రాఫులు తీసుకునేవారు ప్రేక్షకులు. కొక్కొరోకో – ఓ మధురానుభూతి.” అని అంటారు భరణి ‘కొక్కొరొక్కో’ గురించి.

“సరదాగ ‘మందు’ మీద ఏదైన హాస్య నాటిక రాయమంటే ‘గుర్రమెక్కడం’ అనే సామెతని మనస్సులో పెట్టుకుని రాసిందే ఛల్! ఛల్! గుర్రం’. చాలా సరదా నాటకం… చాలా తేలిగ్గా ప్రదర్శించొచ్చుగూడ. శ్రీమతి సూర్యకాంతంగారికి సన్మానం చేసి ఆ సందర్భంగా ఈ నాటిక ప్రదర్శిస్తే ఆవిడెంతో ముచ్చటపడి పోయింది!” అని అంటారు భరణి ‘ఛల్! ఛల్! గుర్రం’ గురించి.

ఈ నాటికలు చదవడం గొప్ప అనుభవం.
Click here to read these natikalu of Tanikella Bharani

తనికెళ్ళ భరణి నాటికలు 123 On Kinige

Related Posts:

కాలేజీ కథల, వ్యక్తిత్వ కలల షామియానా

మెడికో శ్యాంగా ప్రసిద్ధులైన డాక్టర్ చిర్రావూరి శ్యాం కథలు చదవడం, వాటి గురించి రాయడం అదో ముచ్చటైన ముచ్చట. ఇవి కథలా…ఊహూ… కవితలా… కాదే… మరి భయానక బీభత్స, సైకో అనాలసిస్‌లా.. కానే కాదు.. మ్యూసింగ్స్‌లాంటి… కవితాత్మక వచనం!! మొదట గాలికి నడిచాను.. తర్వాత నడవాలని నడిచాను.. నడవలేక ఆగాను.. ఆగి గతం తలచాను… ఇంతకీ నడిచానా లేదా.. అని తనని తనే ప్రశ్నించుకొని, మారని కాలాన్ని వడసి పట్టి, తనదైన చమక్కుతో చురుకుమనేలా మనకి అందించారు.. వీటికి ఉదాహరణ.. కథకుని కథ, ఆలోచనల ట్రైన్‌లో, సాహిత్యం కథ.
ఈ కథలు చదవటం ఒక అనుభవం.. అన్ని అనుభవాల్లాగే.. ఎవరికివారు అనుభవించి.. కథకుడు చెప్పిన విషయాల్ని అర్థంచేసుకొని, చెప్పలేని భావాన్ని కూడా ఆస్వాదించేలా చేస్తాయి. ఒక్కోసారి ఇది ఒక కొటేషన్ల పుస్తకంలా అనిపిస్తుంది… మరోసారి… జీవన సారాన్ని కాచివడపోసిన వైద్యవృత్తిలో మనుషుల శరీరాల్ని, రచయితగా వాళ్ళ మానసిక ప్రవృత్తులను కూడా.. యవ్వన గీతలంత స్పష్టంగా చెప్తారు.
ఒక్కోసారి.. శ్యాం ఎలక్తడ్ థాట్స్ లాంటి…ఈ కథలు చదువుతుంటే… మన ఆత్మని మనం స్పర్శిస్తున్నట్టు ఉంటుంది. ఈ ముసుగులన్నీ తీసి మానవత్వంవైపు.. అది అర్థంచేసుకొనే మనుష్యుల వైపు…వాళ్ళ మనసులవైపు మనల్ని నడిపిస్తాయి.
నాకున్న సెక్తోరియాల్ చదువరులు నాకు చాలు అని రచయిత ధైర్యంగా చెప్పగలిగినా… అంత నిజాయితీని కావాలనుకుంటూ… భరించలేని మనుషులు కూడా ఏకాంతంలో.. నిజాన్ని ఒప్పుకుని… ఒక సంజాయిషీ లాంటి.. సంవేదన పడేలా చేసే కథలివి..!!
కాదేదీ కవితకనర్హం.. అన్నారు కవి వర్యులు.. శ్యాంగారి లాంటి వారి చేతిలో పడితే, కాఫీ, ముక్కుపుడక, యెర్ర జాకెట్టు, మెత్తబుగ్గలు కూడా అద్భుత కథావస్తువులవుతాయని.. ఇందులో కథలు చదివితే తెలుస్తుంది.ఇక.. వ్యక్తిగా సామాజిక దృక్పధాన్ని.. మనలోని మారని తనాన్ని, యిట్టే చెప్తాయి ఈ కథలు,. ప్రత్యేక ఉదాహరణ, డౌరీ హౌమచ్..? లాంటి కథలు… ఈ రచయిత ఈ కథలన్నీ అతని విద్యాకాలంలో అంటే అరవై డెబ్భై దశకాల్లో రాసారంట… నిజం.. కుర్ర డాక్టర్ల కలల షామియానా మీద ఒట్టు…!!
కొన్ని కథలు, మ్యూసింగ్స్ మాత్రమే రాసినా.. అవన్నీ ఒక కావ్యంలా అనిపిస్తాయి… సామాజిక పరిస్థితులపైన అశక్తతని కూడా… అందమైన కవితాత్మక సందేశాలు… మనల్ని హడావిడి పెట్టకుండా ఆలోచింపచేస్తాయి. ఉయ్యాలలో కూర్చున్న వాళ్ళు ముందుకే కాదు.. వెనక్కి కూడా ఊగుతారు.. ఎక్కువగా తూగకుండా ఈ కథలు మనల్ని మానవత్వం వైపుకి వడిసి పట్టటం ఖాయం.

సాయి పద్మమూర్తి, ఆంధ్రభూమి దినపత్రిక 30/09/2012

* * *

శ్యామ్‌యానా డిజిటల్ రూపంలో కినిగెలోలభిస్తుంది. మరిన్నివివరాలకు ఈ క్రింది లింక్‌ని అనుసరించండి.
శ్యామ్‌యానా On Kinige

Related Posts:

స్పైడర్ వెబ్

డిటెక్టివ్ నవలా రచయిత మధుబాబు కలం నుంచీ జాలువారిన థ్రిల్లర్ “స్పైడర్ వెబ్“.

ఇంటర్‌పోల్ ఎస్సైన్‌మెంట్ పై స్విట్జర్లాండ్ బయల్దేరాడు షాడో. హఠాత్తుగా అతనెక్కిన విమానం హైజాక్ చేయబడింది. హైజాకర్లు విమానాన్ని దారిమళ్ళించి ఇటలీ లోని ట్యూరిన్ తీసుకువెడతారు.

ఎయిర్‌పోర్టు నుంచీ బయటకు వస్తుండగా తనని బంధించిన వారికి స్లిప్ ఇచ్చి తప్పించుకుంటాడు షాడో. సమాచారం తెలుసుకున్న ఇటలీ స్పెషల్ స్క్వాడ్ కమాండర్ మాసిలీ షాడోని పట్టుకోడాని ఓ స్పైడర్ వెబ్ అల్లుతాడు. ఇటలీ సెంట్రల్ బ్యాంక్ నుంచీ దాదాపు ఇరవై మిలియన్ డాలర్ల విలువచేసే బంగారం షాడో దొంగిలించాడని, అతన్ని పట్టిచ్చిన వాళ్ళకి పదివేల డాలర్లు బహుమతి ప్రకటించాడు.

ఇక నగరం అంతా షాడో కోసం వెదుకులాట మొదలవుతుంది. ఒక హోటల్ వద్ద ఓ బాలుడిని రక్షించే ప్రయత్నంలో షాడో పోలీసులకి దొరికిపోయాడు. తను చెయ్యని నేరం తనపై మోపి తనను ఎందుకు బంధించారో తెలుసుకోవాలనుకుంటాడు షాడో.

ఇటలీ స్పెషల్ స్క్వాడ్ ఏజెంట్లకు అసాధ్యమైన పని ఒకటి చేసిపెట్టడం కోసం షాడోని బంధించినట్లు చెబుతాడు మాసిలీ. ఇటలీ దేశానికి దూరంగా సముద్ర మధ్యంలో వుండే రోజ్లాండ్ దీవి కానొకప్పుడు ఈ దీవి ఇటలీ పరిపాలనలోనే వుండేదని, ప్రస్తుతం అది స్వతంత్రదేశం అయిందని, ప్రపంచంలో రకరకాల నేరాలుచేసి ఎవరికీ దొరకకుండా తప్పించుకొని తిరిగే నేరస్థులు ఆ దీవిలో ఆశ్రయం పొందుతూ వుంటారని చెప్పాడు మాసిలీ. కొంతకాలం క్రితం కొందరు విద్రోహులు ఇటలీ ఆటమిక్ రీసెర్చి సెంటర్ మీద దాడిచేసి అపరిమిత మేధాశక్తి సంపన్నుడయిన ప్రొఫెసర్ ఫెడరిక్‌ని కిడ్నాప్ చేశారు. ఇటలీ స్పెషల్ స్క్వాడ్ ఏజెంట్లు ఎంతో కష్టపడి అతను రోజ్లాండ్ దీవిలో వుండే పెద్దజైలులో బంధింపబడి వున్నట్లు తెలుసుకోగలిగారని, షాడో వెళ్ళి ప్రొఫెసర్ని రక్షించి తీసుకురావలని ఆదేశిస్తాడు మాసిలీ.

రోజ్లాండ్ ద్వీపంలోని జైలు సంగతి ప్రపంచంలోవున్న సీక్రెట్ సొసైటీలన్నిటికీ తెలుసు. అనుమతి లేకుండా అందులోకి వెళ్ళటం కష్టం. వెళితే ప్రాణాలతో బయటికి రావటమనే ప్రసక్తి లేనేలేదు. రోజ్లాండ్ జైలులోకి పోయి ప్రొఫెసర్ ఫెడరిక్ ని విడిపించటం కంటే, మాసిలీ కళ్ళల్లో దుమ్ముకొట్టి పారిపోవటమే మంచిదని నిర్ణయించుకున్నాడు షాడో. కాని, ఆ నిర్ణయాన్ని అమలుపరచటానికి అడ్డువచ్చింది అతని అభిమానం. చేయని నేరాన్ని తనపై రుద్దినందుకు వాళ్ళకి తగిన గుణపాఠం నేర్పాలనుకున్నాడు.

తర్వాత ఏం జరిగింది? మాసిలీకి షాడో నేర్పిన పాఠం ఏమిటి? ప్రొఫెసర్ ఫ్రెడెరిక్‌ని షాడో రక్షించాడా లేదా? అతని కిడ్నాప్ వెనుక ఉన్నది ఎవరు? ఈ ప్రశ్నలన్నింటి సమాధానాలు ఈ ఆసక్తికరమైన నవలలో లభిస్తాయి.

* * *

స్పైడర్ వెబ్ నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

స్పైడర్ వెబ్ On Kinige

కొల్లూరి సోమ శంకర్

Related Posts: