మార్చి 2014 నాలుగవ వారంలో టాప్ టెన్ పుస్తకాలు

మార్చి 2014 నాలుగవ వారంలో కినిగెపై టాప్ టెన్ పుస్తకాలు

1.మోహన మకరందండా.మోహన్ కందా
2. షాడో ఇన్ థాయ్‌లాండ్ మధుబాబు
3.అమెరికా అనుభవాలువేమూరి వేంకటేశ్వరరావు
4. పాకుడురాళ్ళురావూరి భరద్వాజ
5.త్రినేత్రుడు-1సూర్యదేవర రామ్ మోహనరావు
6.సమ్మాన్యుడుచేంబోలు శ్రీరామశాస్త్రి
7.A to Z ఇన్వెస్ట్‌మెంట్ గైడ్శ్రీనివాస్
8. వెన్నెల్లో ఆడపిల్లయండమూరి వీరేంద్రనాథ్
9.మిథునంశ్రీరమణ
10.అమృతం కురిసిన రాత్రిదేవరకొండ బాల గంగాధర తిలక్

Related Posts:

కినిగె ఉగాది కానుక: ఉచితంగా శ్రీ జయనామ సంవత్సర(2014-2015) పంచాంగం!

కినిగె పాఠక మిత్రులకు శ్రీ జయనామ సంవత్సర ఉగాది శుభాకాంక్షలు!

శ్రీ జయనామ సంవత్సర ఉగాది సందర్భంగా కినిగె పాఠకులకు ఉచితంగా అందిస్తోంది “శ్రీ విఖసన ఆర్షధర్మ పీఠం వారి దృక్‌సిద్ధాంత పంచాంగం 2014-15″.

తిధి, వార౦, నక్షత్ర౦, యోగ౦, కరణ౦ మొదలైన వివరాలను అందిస్తూ, వైష్ణవ శ్రీ కృష్ణాష్టమి, విజయదశమి వంటి పండుగలను ఎలా నిర్ణయించాలో ఈ పంచాంగంలో సవివరంగా తెలియజేసారు పంచాగకర్తలు శ్రీయుతులు ముత్తేవి శ్రీనివాస శశికాంత్ మరియు నారాయణం తాండవకృష్ణ చక్రవర్తి.
వివిధ రాశుల వారికి ఆదాయ వ్యయాలు, రాజపూజ్యం, అవమానం వివరాలు చెబుతూ శ్రీ జయనామ సంవత్సరంలో ఆయా రాశులలో జన్మించిన వ్యక్తుల రాశి ఫలితాలను వెల్లడించారు.
వివిధ శుభకార్యాలకు కావల్సిన ముహూర్త నిర్ణయాలు, వివిధ పీడా/బాధా నివారణలకు పాటించవలసిన చర్యలు ఈ పంచాంగం సూచిస్తుంది.

శ్రీ జయనామ సంవత్సర పంచాంగం on kinige

 

 

Related Posts:

సున్నితమైన పోహళింపు ‘జూకామల్లి’

ఎంత చేయి తిరిగిన రచయిత్రి (త్రు)లయినా కథలుగా కొన్ని ఇతివృత్తాలను ఎన్నుకోవడానికి వెనుకాడతారు. మరీ ముఖ్యంగా సామాజికమైన ప్రచారాంశాలుగా వుండే వాటి జోలికి పోదలుచుకోరు. అందులో సృజనాత్మకత లేదని కొందరి భావన అయితే ఆ అంశాలకు ప్రచారకులుగా తమపై ముద్రపడుతుందేమోనని కొందరి జంకు. కానీ నిజానికి ప్రతిభామతి అయిన రచయిత (త్రి) ఎలాంటి ఇతివృత్తాన్ని ఎన్నుకున్నా పఠితలో ప్రభావోపేతంగా దానిని కథనం చేయవచ్చు. నిజానికి రచయితగా సమాజహిత చింతనతో అలాంటి అవసర విషయాల పట్ల పఠితను ఆలోచనాత్మకంగా చేసి ఆచరణ శీలిని చేయడం బాధ్యత కూడాను.
మునుపు ‘మనసున మనసై’ కథా సంపుటితో జ్యేష్ఠ లిటరరీ అవార్డును కూడా అందుకున్న ఉత్తమ కథారచయిత్రి డాక్టర్ కె.బి.లక్ష్మి ఇటీవలే వెలువరించిన ఇరవై ఒక్క కథల సరికొత్త సంపుటి జూకామల్లి. అనుభూతి గాఢత, కవితాత్మకత, రమణీయశైలి గల కె.బి.లక్ష్మి ఈ కథల సంపుటిలోని కొన్ని కథల ద్వారా సమాజం పట్ల బాధ్యతగల రచయిత్రిగా కూడా తనను తాను నిరూపించుకుంటోంది. ఇది ఆహ్వానించదగిన పరిణామం. ఎందుకంటే ‘కాంతా సమ్మిత తయోపదేశయుజే’ అని కావ్యప్రయోజనాన్ని ప్రాచీనులు నిర్దేశించినట్లు- ఎవరు ఎలా చెబితే నలుగురూ వింటారో, చెప్పిన మంచిని అనుష్ఠిస్తారో అలా చెప్పగల కమనీయ కథనశైలి కె.బి.లక్ష్మిలో పుష్కలంగా వుంది.
‘జూకామల్లి’ అని సంకలనానికి పేరుండడంలోనే మంచి విజ్ఞత కనబడుతుంది. నిజానికి జూకా అంటే చెవులకు స్ర్తిలు పెట్టుకునే ఒక నగ. మల్లి అంటే సౌరభాలు వెదజల్లే పుష్పం. అలంకారం ఏదయినా అలంకారం కోసం కాక నలుగురికీ పరీమళాలు అందించే ప్రయోజనశీలమైనప్పుడే సార్థకత అని ధ్వనింపచేశారు. జూకామల్లి అంటే నిజానికి ఒక రకం మల్లెపూవే! అది వ్రేలాడే అందమే కాదు పరీమళ పరివ్యాప్తి కూడాను. రచయిత్రియే అన్నట్లు ఊహలు తక్కువ. చాలావరకు జీవితాను భవంలోనుంచి వచ్చిన వాస్తవాలే. అత్యల్పంగా అనిపించే వాటినే విలక్షణంగా, హత్తుకునే రీతి సందేశ సంభరితంగా, అందరికీ పరిచితిలోని సినిమా పాటల మాటల ఔచిత్యప్రయోగ మధురిమలతో, సంసార సరాగాల సంభాషణలతో శృంగార హాస్యాల సున్నితమైన పోహళింపులతో చెప్పడం లక్ష్మీ కథన కళ.
ఈ సంకలనంలోని మొదటి కథ జనని. వీరేశం, సావిత్రిల అపురూప పుత్రిక జనని. వీరేశానికి కూతురంటే ప్రాణం. అతని బావమరిది సదాశివకు చెల్లెలు సావిత్రి అంటే ప్రాణం. సదాశివ కోరిక మీద జనని అయిదో పుట్టినరోజు వేడుకలు అతని ఊళ్లో జరిపించారు వీరేశం దంపతులు. వీరేశం ఆరోగ్యంకోసం మొక్కుకున్న సావిత్రిని జనని తమ దగ్గర వదిలి సిరిపురం గుడికి వెళ్లడానికి ఒప్పించినా తీరా బయలుదేరే వేళకి రోడ్డుదాటిన వారిని చేరుకోడానికి ‘నాన్నా నేనూ వస్తా’ అంటూ జనని పరుగుతీసి వేగంగా వస్తున్న వాహనం గుద్దుకుని ఆసుపత్రికి తీసుకెళ్ళగా మరణిస్తుంది. అసలే అనారోగ్యపు వీరేశం స్పృహ తప్పిపడిపోతాడు.
‘‘మీ ముందు ఒక్కటే పరిష్కారం వుంది. పాప ప్రాణం ఏ క్షణంలోనైనా పోవచ్చు. కొన ఊపిరితో వుంది. అయితే కళ్లు కాలేయం, మూత్రపిండాలు ఇతర రోగులకు ఉపయోగించవచ్చు. ఆలోచించండి. సమయం తక్కువగా ఉంది’’ అని పాప పోయేముందు డాక్టర్ చెప్పగా సావిత్రి గుండె రాయి చేసుకుని ‘డాక్టర్ చెప్పినట్లు చెయ్యి అన్నయ్యా’ అంటుంది. పాప కిడ్నీతో వీరేశం పునర్జన్మనెత్తుతాడు. పాప రెండు కళ్ళు కంటి ఆస్పత్రికి, లివర్ గ్లోబల్ ఆస్పత్రికి పంపుతారు. మరో కిడ్నీతో అదే ఆస్పత్రిలో ఇంకో రోగికి అమరుస్తారు. అలా జనని తన తండ్రినే బ్రతికించుకుని నలుగురికీ మహాప్రాణదాత అయింది. ఈ కథ ‘అవయవదానం’ అన్న అంశం మీదనే అయినా కథాకథనం పఠితను కదిలిస్తుంది.
సంకలనం పేరిట ‘జూకామల్లి’ ఓ కవితాత్మక కథనంగా ఉత్తమ పురుషలో సాగుతుంది. నడుము కింది భాగం పోలియోవల్ల చచ్చుబడిపోయినా ఆమెను ప్రేమించి పెళ్లాడిన కృష్ణ సాంగత్యంతో అనురాగవల్లిగా ఎదిగి సాధికారతను సాధించిన ఉద్యోగిని అయిన మహిళ కథ జూకామల్లి. ఆ చెవుల జూకాల తూగులో, ఊగులో సంతోషం పరివ్యాప్తం చేసిన సుతార భావుక కథ ఇది. పల్లెలో దూరాల్ని పట్నం దగ్గరచేసిందనిపించే ‘ఊరుమారినా ఉనిక మారునా’, సభావేదికల మీద గ్రంథ సమీక్ష చేసే వారి స్థితిని పరిస్థితిని వ్యంగ్యంగా విశదపరిచే ‘సమీక్ష’, బాల కార్మిక సంక్షేమ స్ఫూర్తి తెలిపే ‘చెలిమి’, టీవీ ఛానెళ్ళ అర్థం పరమార్థం అందుకోవాల్సిన తీరు తెన్నులను చమత్కారంగానూ, విచక్షణాత్మకంగానూ అందించే ‘ఇప్పుడు కాసేపు బ్రేక్!’ వంటి కథలు ఎన్నో ఇందులో. వైవిధ్యంతో, విలక్షణతతో చదివించి అలరిస్తాయి. కథలో సంభాషణలు నడపడంలో కె.బి.లక్ష్మిది ఓ ప్రత్యేకత. సరసంగా, సహజంగా, సున్నితంగా విషయాన్ని విశదం చేస్తూ కన్విన్స్ చేయగల రచనా ప్రతిభ తనది. కేవలం కథారచయిత్రి మాత్రమేకాక బాధ్యతగల ఓ జర్నలిస్టు, ఒక సాధికారిక వనిత కూడా కాబట్టే లక్ష్మి కథలు ఉపదేశాన్నీ ఉత్సాహాన్నీ కూడా రంగరించుకుని జీవితం పట్ల ఒక మమకారాన్నీ, మనుషుల పట్ల ప్రేమనీ, మానవీయ విలువల పట్ల ఆచరణాత్మకతనూ ప్రేరేపించేవిగా భాసిస్తూంటాయి.

–సుధామ, ఆంధ్రభూమి, 22nd Mar 2014

 http://www.andhrabhoomi.net/node/135716

 

 

 

 

 

 

 

 

 

 

 

 

 

 

జూకామల్లి” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.

***

జూకామల్లి on kinige

 

 

 

 

Related Posts:

మార్చి 2014 మూడవ వారంలో టాప్ టెన్ పుస్తకాలు

మార్చి 2014 మూడవ వారంలో కినిగెపై టాప్ టెన్ పుస్తకాలు

1.మోహన మకరందండా.మోహన్ కందా
2. షాడో ఇన్ థాయ్‌లాండ్ మధుబాబు
3. రామాయణ విషవృక్షం రంగనాయకమ్మ
4.అమెరికా అనుభవాలువేమూరి వేంకటేశ్వరరావు
5. పాకుడురాళ్ళురావూరి భరద్వాజ
6.వొడువని ముచ్చటప్రొఫెసర్ జయశంకర్
7.బుద్ధుడు – బౌద్ధధర్మండా.పొనుగోటి కృష్ణారెడ్డి
8.అమృతం కురిసిన రాత్రిదేవరకొండ బాల గంగాధర తిలక్
9.కొల్లేటి జాడలుఅక్కినేని కుటుంబరావు
10.మనీ పర్స్-2 శ్రమలేని ఆదాయంవంగా రాజేంద్ర ప్రసాద్

Related Posts:

స’మ్మోహన’ మకరందం

ఛళ్లున తగిలి నొప్పి కలిగించే సంఘటనను కూడా నవ్వుపుట్టించేలా చెప్పాలంటే భాషపై పట్టే కాదు, హాస్యప్రియత్వం కూడా మెండుగా ఉండాలి. పైగా అలాంటి వ్యక్తికి అపారమైన పాలనా అనుభవం కూడా ఉంటే పాఠకుడికి హాయిగా చదువుకోగల పుస్తకం లభిస్తుంది. అలాంటి పుస్తకమే- మోహన మకరందం. ముగ్గురు ముఖ్యమంత్రుల దగ్గర కీలకమైన బాధ్యతలు పోషించిన మాజీ ఐఏఎస్ అధికారి మోహన కందా జీవితానుభవాల చరిత్ర ఇది.. “నేనే కాదు.. ఉన్నత స్థానంలో ఉండే ప్రభుత్వాధికారులందరూ ఎఱ్ఱనలే. నన్నయ గ్రాంధికంలా ఉంటారు ఒక ముఖ్యమంత్రి. తిక్కన వ్యవహారికంలా ఉంటారు ఆయన వారసుడు. ఇద్దరి మధ్యా జరిగే ట్రాన్సిషన్ స్మూత్‌గా ఉండేలా, అధికార బదిలీ కుదుపుల్లేని ప్రయాణంలా ఉండేలా చూసేవాళ్లం మేమే”.. అనే మోహన్ కందా జీవితంలోని ఆసక్తికర భాగాలు..
గమనించారా… నా పేరూ, గాంధీగారి పేరూ ఒకటే! – మోహన్! దానికో స్టోరీ ఉంది. ఏడో నెలలో పుట్టిన నేను ఉంటానో, ఊడతానో అని పేరు కూడా పెట్టలేదు మా వాళ్లు. స్వాతంత్య్ర యోధురాలు, మహిళా ఉద్యమసారథి దుర్గాబాయి దేశ్‌ముఖ్‌గారున్నారు కదా, ఆవిడ అందరికీ దుర్గాబాయమ్మగారు కానీ నాకు దుర్గమ్మపిన్నే. తనూ మా అమ్మా కాకినాడలో క్లాస్‌మేట్స్. ప్రాణస్నేహితులు. ఉద్యమాల్లో కలిసి పనిచేశారు. మేం మద్రాసు వచ్చాక మళ్లీ స్నేహం బలపడింది.
మద్రాసు వచ్చాక ఆవిడ ఆంధ్రమహిళా సభ పెట్టింది. సభకు అడయార్‌లో ఓ భవంతి కట్టి దాని శిలాఫలకాల ఆవిష్కరణకు గాంధీగారిని రప్పించింది. గాంధీగారు వచ్చినపుడు నన్ను తీసుకెళ్లి ఆయన చేతిలో పెట్టారు. ఆయన నన్ను ఆశీర్వదించారు. అంతే.. నాకు ఆయన పేరు – మోహనదాస్ అని పెట్టారు. రాను రాను ‘దాసు’ కాలగర్భంలో కలిసిపోయింది. కాలక్రమేణా అది మోహన్‌బాబుగా.. మోహన్‌గా మిగిలింది.

* * *

కాకినాడలో మా మాతామహుడు చావలి రామసోమయాజులుగారు పేరుమోసిన కాంగ్రెసువాది. ఆయన పేరుమీద వీధి కూడా ఉందక్కడ. మద్రాసు లెజిస్లేటివ్ కౌన్సిల్‌లో మెంబర్ ఆయన. కాకినాడ మున్సిపాలిటికి పదహారేళ్లు నిర్విఘ్నంగా చైర్మన్‌గా చేసారు. ఆయనకు గుఱ పు బండి ఉండేదట. అది సాయంకాలం ఇంటికెళ్లే టైం అయిపోతే ఎవరు చెప్పక్కరలేకుండానే వెనక్కితిరిగి దానంతట అదే వచ్చేసేదట. తర్వాత గవర్నమెంటు సర్వీసులో చేరాక అటువంటి జీవాలను చాలా చూశాను. ఆఫీసుకి వచ్చే టైం మాట ఎలా ఉన్నా, వెళ్లే టైము కాగానే ఠంచన్‌గా వెళ్లిపోయేవారు. మొహం కడిగేసుకోవడం, బ్యాగ్ సర్దేసుకోవడం అన్నీ సాయంత్రం 5 గంటల లోపునే! అప్పుడు తెలిసింది – ఆ గుఱ ం గత జన్మలో ప్రభుత్వోద్యోగి అయి ఉంటుందని!

* * *

ట్రిక్కులు పనిచేయవు…
నా పేరు చెప్పగానే ఓ తరం వారు “పెళ్లి చేసి చూడు” సినిమాలో చిన్న పిల్లవాడి వేషం వేశారు కదా అంటారు. “అమ్మా నొప్పులే..” అనే ఓ నృత్య నాటికలో నేను స్కూలు పిల్లవాడి వేషం వేశాను. అదెలా జరిగిందంటే – మేం మైలాపూర్‌లో చెంగళనీర్ పిళ్లయార్ వీథిలో ఉండేవాళ్లం. దానికి దగ్గర్లో ఉన్న లజ్ కార్నర్‌లో హిమాలయా కూల్‌డ్రింక్స్ అని ఒక దుకాణం ఉండేది. అక్కడ కూర్చుని ఏవేవో కబుర్లు చెబుతూ ఉండేవాడ్ని. ఓ రోజు నేను అక్కడ కూర్చుని వాగుతూ ఉంటే నా ధోరణి చూసి “వీడికి స్టేజి ఫియర్ లేనట్టుంది. మనకు పనికి వచ్చేట్టున్నాడు” అనుకున్నారేమో, ఇద్దరు నా దగ్గరికి వచ్చి “బాబూ సినిమాల్లో యాక్ట్‌చేస్తావా?” అని అడిగారు(ట).
“తప్పకుండానండి పదండి” అన్నాను(ట).
“ముందర మీ అమ్మని, నాన్నని అడుగుదాం. ఇంటికెళ్దాం పద” అన్నారు(ట) వాళ్లు.
“అది మాత్రం వొద్దు. నేను యాక్ట్ చేయాలని మీకుంటే ముందర నన్ను తీసుకెళ్లండి తర్వాత వాళ్లకి చెబుదాం” అని వాళ్లని తొందర పెట్టేశాను(ట). వాళ్లు ఘటికుడివిరా బాబూ అనుకుని ఉంటారు.
తీసుకెళ్లి చిన్న ఆడిషన్ ఏదో చేశారు. అది బాగుంది లాగుంది. వేషం ఆఫర్ చేద్దామని మా ఇంటికి వచ్చారు. నేను సినిమాల్లోకి వెళ్లడం మా అమ్మకి సరదాయే. కానీ మా నాన్నకి చెప్పాలంటే భయం. అందుకే వాళ్లతో “ముందర మీరు కానివ్వండి. తర్వాత నేను ఆయనకు నింపాదిగా చెబుతా” అంది(ట).

* * *

ఎన్‌టిఆర్ – కోడితో పోటీ పడాలి..
ఎన్.టి. రామారావు గారి దగ్గర పనిచేయడం చాలా కష్టం. అలా అని పాపం ఆయన బ్రహ్మరాక్షసుడేమీ కాదు… చిక్కల్లా బ్రాహ్మీముహూర్తంలో.. అంటే తెల్లవారుఝామున ప్రారంభమయ్యే ఆయన దినచర్యతోనే… మనం కోడితో పోటీ పడి లేచి రెడీగా ఉండాలి. అప్పటికప్పుడే ఫోను చేసి నిద్ర లేపి మాట్లాడేస్తారు. “అబ్బే, ఇప్పుడు మీరు చెప్పినా బుర్రకెక్కదు. పదిగంటలకు ఆఫీసుకి వచ్చాక చెప్దురుగాని..” అంటే కుదరదు. ఆయన ముఖ్యమంత్రి. నేను ఆయన దగ్గర స్పెషల్ సెక్రటరీని. ఓ రోజు అటువంటి ‘అసురవేళ’లో నిద్రలేపి “మోహన్, ఆ సొసైటీది వాళ్ల కిచ్చేసేయ్..” అని ఒక్క ముక్క చెప్పేసి ఫోను పెట్టేశారు. నిద్రలో జోగుతూ విన్నాను. నిద్రమత్తు దిగాక ఆలోచిస్తే ఏమీ బోధపడలేదు – సవాలక్ష సొసైటీలలో ఏ సొసైటీ గురించి చెప్పారు? ఏది ఇవ్వాలి? వచ్చిన వాళ్లెవరు? వాళ్లేమడిగారు? ఈయన దేనికి సమ్మతించారు?
ఆయనకే ఫోన్ చేసి అడగాలా? అడగగలనా? ఏమీ తెలియనట్టు ఊరుకోనా?… గలనా? ఆ సొసైటీ ఏదో కనిపెట్టలేక, అప్పుడు సిఎం ఆఫీసులో మిత్రుడు హేమచంద్ర ప్రసాద్‌కి (రామారావుగారికి ప్రయివేట్ సెక్రటరీ) ఫోన్ చేసి “బాబూ, సరిగ్గా కాస్సేపు క్రితం ఆయనను కలిసిందెవరో గుర్తు పెట్టుకో. నేను ఆఫీసుకి వచ్చిన తర్వాత చెప్పు” అని చెప్పాను. ఆఫీసుకి వెళ్లాక ఆ వెళ్లినతన్ని పట్టుకుని, పిలిపించి “నువ్వేం అడిగావ్? ఆయన ఏం చేస్తానన్నారు?” అని కనుక్కుని… ‘ఓహో, ఇతను ఇలా అడిగాడు కాబట్టి ఆయన ఇలా చేస్తానని అని ఉంటారు” అనుకుని… రెండు ప్లస్ రెండు నాలుగన్నట్టు లెక్క వేసి సంగతి తెలుసుకుని దాని ప్రకారం అమలు చేశాను.
రిజర్వ్ బ్యాంక్ గవర్నగా పనిచేసి రిటైరైన వై. వేణుగోపాలరెడ్డి గారంటే నాకు చాలా గౌరవాభిమానాలు. ముక్కుసూటిగా మాట్లాడడంలో ఆయన దిట్ట. చెన్నారెడ్డిగారు ముఖ్యమంత్రిగా ఉండగా ఆయన హైదరాబాదు జిల్లా కలెక్టర్. ఓ రోజు రాత్రి (అదే అర్ధరాత్రి) చెన్నారెడ్డిగారు ఆయనకు ఫోన్ చేసి “ఐ వాంట్ యూ టు కమ్ ఇమ్మీడియేట్లీ. ఓ విషయం డిస్కస్ చేయాలి” అన్నారు. వై వి రెడ్డిగారు తొణక్కుండా చెప్పారు – “నేను మా ఫ్రెండ్స్‌తో కూచుని ఓ చిన్న డ్రింక్ తీసుకుంటున్నాను సర్. ఇప్పుడొస్తే బాగుండదేమో! రేపు పొద్దున్న వస్తాను. కాదూ కూడదు అర్జంటు విషయం అంటారా, ఇప్పుడే ఫోన్‌లో చెప్పేయండి. ఏం చేయగలమో చూద్దాం” అన్నారు. చెన్నారెడ్డి గారికి అలాంటి జవాబు ఎప్పుడూ వచ్చి ఉండదు. చాలామంది అటువంటి పరిస్థితుల్లో ఉండవచ్చు కానీ ఆ విధంగా చెప్పడం మాత్రం వేణుగోపాలరెడ్డిగారికే చెల్లింది.

* * *

మేం ఏ ఎండకా గొడుగు పడతామా?
‘మా బ్యూరాక్రాట్స్‌కు ఎఱా ప్రగడే ఆదర్శం’ అని నేనంటే మీరు ఆశ్చర్యపడతారని నాకు తెలుసు. ఎందుకంటే ‘కవిత్రయం అనగా ఎవరు?’ అన్న బిట్ క్వశ్చన్‌కు ఆన్సర్‌గా రాసేటప్పుడు తప్ప ఎఱా ప్రగడ మనకు ఎక్కడా తగలడు.
నేనే కాదు ఉన్నత స్థానంలో ఉండే ప్రభుత్వాధికారులందరూ ఎఱ నలే. నన్నయ్య గ్రాంధికంలా ఉంటారు ఒక ముఖ్యమంత్రి. తిక్కన వ్యావహారికంలా ఉంటారు ఆయన వారసుడు. ఇద్దరి మధ్యా జరిగే ట్రాన్సిషన్ స్మూత్‌గా ఉండేలా, అధికార బదిలీ కుదుపుల్లేని ప్రయాణంలా ఉండేలా చూసేవాళ్లం మేమే. వరుసగా వచ్చే ఇద్దరు ముఖ్యమంత్రుల మధ్య పార్టీలు వేరే ఉండవచ్చు, సిద్ధాంతాలు తేడాగా ఉండవచ్చు, వయోభేదం ఉండవచ్చు, వేగంలో వ్యత్యాసం ఉండవచ్చు, విద్యాధిక్యతలో, అవగాహనలో, ప్రవర్తనలో, నైతికతలో – ఎన్నో రకాల భేదాలు ఉండవచ్చు.
ఎన్ని ఉన్నా పరిపాలించబడే ప్రజలకు మాత్రం తేడా తెలియకూడదు. ఒకే ప్రభుత్వం అనూచానంగా నడుస్తున్నట్టు అనిపించాలి. ముఖ్యమంత్రి ఎవరైతేనేం, ఏ పార్టీ అధికారంలో ఉంటేనేం, మనం నిత్యం చూసే ఆర్‌డీఓగారు మారలేదు, ఆయన పనితీరూ మారలేదు అనిపించాలి. నిజానికి మార్పు ఉంటుంది. కానీ అది మార్పులా అనిపించకుండా చూడడమే బ్యూరాక్రసీ లక్షణం. ఈ క్రమంలో బ్యూరాక్రసీ చాలా అవస్థే పడుతుంది. ఎఱా ప్రగడను పట్టుకుని నువ్వు నన్నయకు విధేయుడవని తిక్కనా, తిక్కనకు విధేయుడవని నన్నయా శంకించలేదు కానీ బ్యూరాక్రసీకి మాత్రం పాత వ్యవస్థకు విధేయులనే నింద మోయక తప్పదు.

— నవ్య పేజీ, ఆంధ్రజ్యోతి, 20th March 2014

మోహన మకరందం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.

***

మోహన మకరందం on Kinige

Related Posts:

మనీ పర్స్ 2 శ్రమలేని ఆదాయం

చిట్ ఫండ్స్ లాభమా? నష్టమా?

నేలని నమ్మినవాడు ఎన్నడూ చెడిపోడా?

రియల్ ఎస్టేట్ పెట్టుబడికి ఏ జాగ్రత్తలు తీసుకోవాలి?

వంద రూపాయలతో పది వేల కోట్లు….. ఎలా?

ఏడాదికి 9% వడ్డీ గిట్టుబాటయ్యే ఎండోమెంట్ బీమా పాలసీ ఏది?

ఎల్‍ఐసి ఎండోమెంట్ పాలసీలో రాబడి ఎంత?

ఏది ఉత్తమ పెట్టుబడి?

నమ్మకానికి అమ్మవంటిది ఎల్‌ఐసి మాత్రమేనా?

ప్రైవేటు బీమా కంపెనీలని నమ్మవచ్చా?

ఏజంటు లేకుండా పాలసీ తీసుకోవచ్చా?

పిల్లలని కోటీశ్వరులని చేయడం ఎలా?

పోస్టల్ ఆర్‌డి, బ్యాంక్ ఆర్‌డి లలో ఏది ఎక్కువ లాభం?

వేయి రూపాయలు = లక్ష రూపాయలు

బంగారానికీ కల్తీ కావాలి.

ఆరోగ్య మహాభాగ్యానికి ఏమి చేయాలి?

బ్యాంకులో ఫిక్స్‌డ్ డిపాజిట్ లాభమా? నష్టమా?

బంగారం ఎలా కొంటే మంచిది?

ఆరోగ్య మహాభాగ్యానికి ఏమి చేయాలి?

జీవిత బీమా తక్కువయితే నేరం, ఎక్కువయితే ప్రమాదం?

…. ఇంకా ఎన్నో ఆర్థిక సందేహాలకు చదవండి

వంగా రాజేంద్ర ప్రసాద్ రాసిన

మనీ పర్స్ 2 శ్రమలేని ఆదాయం

Related Posts:

మార్చి 2014 రెండవ వారంలో టాప్ టెన్ పుస్తకాలు

మార్చి 2014 రెండవ వారంలో కినిగెపై టాప్ టెన్ పుస్తకాలు

1. రెడ్ సిల్వర్‌ మధుబాబు
2. భారతీయ సంఖ్యాశాస్త్రం ముదిగొండ గోపీకృష్ణ
3. పాకుడురాళ్ళురావూరి భరద్వాజ
4.మోహన మకరందం మోహన్ కందా
5.రామాయణ విషవృక్షంరంగనాయకమ్మ
6.అమెరికా అనుభవాలువేమూరి వేంకటేశ్వరరావు
7.రామ్@శృతి.కామ్అనంతరామ్ అద్దంకి
8.డేగరెక్కల చప్పుడుయండమూరి వీరేంద్రనాథ్
9.వోడ్కా విత్ వర్మసిరాశ్రీ
10.A to Z ఇన్వెస్ట్‌మెంట్ గైడ్శ్రీనివాస్

Related Posts:

షాడో మధుబాబు గారి సన్మాన పత్రం

ప్రఖ్యాత నవలా రచయిత, “షాడో” సృష్టికర్త
శ్రీ షాడో మధుబాబు గారికి
పాలకొల్లు – గజల్ శ్రీనివాస్ కళాపరిషత్ అందిస్తున్న
సువర్ణాక్షర సుమహారం

పరమపావన కృష్ణవేణీ నదీతీరంలో తోట్లవల్లూరు గ్రామంలో సూర్యనారాయణరావు-భారవి దంపతుల పుణ్యఫలంగా జన్మించి తెలుగు సాహితీరంగంలో సరిక్రొత్త విప్లవాన్ని సృష్టించి ఛాయాకేతనాన్ని ఎగురవేసిన ప్రతిభాశాలురు మీరు!

తొలినాళ్లలో సంస్కృతానువాదాలు, మలినాళ్ళలో పద్య ప్రబంధాలు, నవలికలు, గల్పికలతో అలరారిన తెలుగు భాషా యోషకు అపరాధ పరిశోధనాత్మకంగా ఒక నీడ కల్పించారు మీరు. యువతరాన్ని ఉఱ్ఱూతలూగించారు.

పాశ్చాత్య సాహితీ ప్రక్రియను తెలుగుజాతికి అనుసంధానించి సర్ ఆర్ధర్ కానన్ డయల్ వేసిన ఆంగ్లపు మాటను తెలుగువారికి పరిచయం చేసి; అచ్చతెలుగు షెర్లాక్ హోమ్స్‌గా షాడోను తీర్చిదిద్దిన ఘనులు మీరు.

1973లో మొదలైన మీ షాడో ప్రస్థానం అప్రతిహతంగా 150 నవలలదాకా సాగింది.తెలుగు యువకుల హృదయాలలో మీ ‘షాడో’ ఏర్పరచుకున్న స్థానం అనితరసాధ్యం. ఆ తరం విద్యార్ధులలో మీ పుస్తకం చదవనివారు లేరంటే అతిశయోక్తి లేదు. మొత్తంగా 250 పైన రచనలు చేసి అన్ని రచనలు ప్రజా హృదయాలలోకి జొప్పించగలిగారు మీరు.

వృత్తిపరంగా ఉపాధ్యాయునిగా ఎంతోమంది విద్యార్ధుల భవితకు పునాదులు వేశారు మీరు. నూజివీడు రసం మామిడిపండు కోసం ప్రజలంతా ఎలా ఎదురుచూస్తారో అలాగే నూజివీడు నుంచి వచ్చే మీ పుస్తకాలకోసం ఎదురుతెన్నులు నిత్యం వుండేవి.

తరం తరం నిరంతరంగా చదివించే పుస్తక రచయితగా నిలచిన మీకు తరాల అంతరాలు మారినా నిలిచే రచనలను అందించిన శ్రీ పినిశెట్టి శ్రీరామమూర్తి పురస్కారాన్ని అందిస్తోంది మా డా|| గజల్ శ్రీనివాస్ పాలకొల్లు కళాపరిషత్.
మా పట్టణ అధిష్టాన దేవత శ్రీ క్షీరారామ రామలింగేశ్వరుని ఆశీస్సులతో మీరు నిండు నూరేళ్ళు పచ్చగా వెచ్చగా వుండాలని ఆశిస్తూ..

డా|| గజల్ శ్రీనివాస్ పాలకొల్లు కళాపరిషత్

పాలకొల్లు
02-03-2014

***

మధుబాబు గారి పుస్తకాలు” డిజిటల్ రూపంలో కినిగెలో లభిస్తాయి. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాలను తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.

మధుబాబు గారి పుస్తకాలు on Kinige

Related Posts:

రాయల నాటి నిజాలకు దర్బణం

దురదృష్టవశాత్తూ చరిత్రలో వాస్తవాలకంటే పురాణాలూ కల్పనలే ఆంధ్ర దేశ చరిత్రకారులను ఎక్కువ ఆకర్షించినట్టు కనిపిస్తుంది. అందుకే మన చరిత్ర పుస్తకాలలో ఎక్కువ భాగం పౌరాణిక చరిత్రలుగా మిగిలిపోయాయి. చరిత్ర పరిశోధనలో, రచనలో ఈ స్థితిని మార్చే ప్రయత్నం చేసిన వ్యాస సంకలనం మోదుగుల రవికృష్ణ సంపాదకత్వంలో వెలువడిన ‘సాహితీ సమరాంగణ సార్వభౌమ శ్రీకృష్ణదేవరాయశ్రీ’ ఈ పుస్తకంలోని ఇరవై ఏడు వ్యాసాలలో శ్రీకృష్ణదేవరాయలను, విజయనగర సామ్రాజ్యాన్ని పాఠకులకు సరళంగా పరిచయం చేయడమే కాదు, వారి చేయి పట్టుకుని సాదరంగా ఆ కాలానికి తీసుకెళ్ళి నాటి ఘటనలను, నిజాలను కళ్ళకు కట్టినట్టు దర్శింపజేస్తాయి.

గత నూరేళ్ళలో రాయలపై వివిధ కాలాలలో అమరనాథవర్మ, గాడిచర్ల, నేలటూరి వెంకటరమణయ్య, రాళ్ళపల్లి అనంతకృష్ణశర్మ, పిలకా గణపతిశాస్త్రి, దివాకర్ల వెంకటావధాని, కృష్ణశాస్త్రి, భావరాజు వెంకట కృష్ణారావు వంటి ఎంతోమంది ప్రముఖ చరిత్ర, సాహితీకారులు రాసిన అమూల్యమైన వ్యాసాలే కాదు, వి.ఎ.కె రంగారావు, అరిశెట్టి సాయిప్రసాద్ వంటి ఈ తరం చరిత్రకారుల తాజా వ్యాసాలూ ఇందులో ఉన్నాయి. శ్రీకృష్ణ దేవరాయల చరిత్ర, సాహిత్యం వంటి అంశాలపై ప్రచారంలో ఉన్న అనేక అపోహలనూ, మిత్‌లనూ శాస్త్రీయంగా తొలగిస్తూ అదే సమయంలో రాయల వ్యక్తిత్వంపై ఒక అవగాహనను పాఠకులలో ఏర్పరుస్తుందీ వ్యాస సంకలనం.

శ్రీకృష్ణ దేవరాయలపై ఇంతవరకూ ఆంధ్ర, ఆంగ్లభాషలలో వెలువడిన 246 గ్రంథాల జాబితాను ఇవ్వడం చరిత్ర పరిశోధనలకూ, ఆసక్తిపరులకూ ఎంతో ఉపయోగకరం. ముఖ్యంగా అందుబాటులో ఉన్న చారిత్రక ఆధారాల సహాయంతో గిరిధర గౌడ్ చిత్రీకరించిన రాయల ప్రతిరూపం ఈ వ్యాస సంకలనానికే కాదు, చరిత్రను దృశ్యమానం చేసే ప్రక్రియకే హైలైట్. ఇది చరిత్రకారులనూ, సామాన్య పాఠకులనూ ఒకే ఆసక్తితో చదివిస్తుంది. కృష్ణదేవరాయల చరిత్రను 102 ఛాయాచిత్రాలతో సహా ఎంతో సమగ్రంగా అక్షరీకరించిన సంపాదకుల కృషి అభినందనీయం.

- డి. లెనిన్, ఆదివారం ఆంధ్రజ్యోతి, 23rd Feb 2014

సాహితీసమరాంగణ సార్వభౌమ” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ లింక్‌ని అనుసరించండి.

***

సాహితీసమరాంగణ సార్వభౌమ on Kinige

Related Posts:

జీవన వలయం – వలయం (కథా సంపుటి) పై సమీక్ష

సామాజిక దృక్కోణాన్ని ఆవిష్కరించే కథల్లో వర్తమాన జీవితం తొణికిసలాడుతుంది, చుట్టూ కనిపించే పరిస్థితుల్నే కథలుగా అల్లిన వైనం ప్రస్ఫుటమవుతుంది. రాచపూటి రమేశ్‌ ‘వలయం’ సంపుటి ఇందుకు ఉదాహరణ. మధ్యతరగతి స్థితిగతుల్నీ సంక్షోభాల్నీ ఆనందాల్నీ రచయిత కథల ద్వారా ఆవిష్కరించారు. చేనేతకారుల వెతలకూ కతలకూ ‘తాతకో నూలుపోగు’ అద్దంపడితే, ‘కొన్ని జీవితాలింతే’ ఓ ఏకాకి జీవితపు హృదయ స్పందనల్ని అక్షరీకరించింది. వియ్యాలవారి కయ్యాల్ని ‘ఎదురుకోట’ వైవిధ్యంగా వివరిస్తే, ‘వారికి కొంచెం నమ్మకమివ్వండి’ వ్యథాభరిత పరిస్థితుల్లో ఆశావాదాన్ని ప్రకటిస్తుంది. మనిషితనమే అసలైన మతమనే సిద్ధాంతాన్ని ‘నీడలు… నిజాలు’ మరోసారి గుర్తుచేస్తే, ‘వెంటవచ్చేది’ జీవన పరమార్ధాన్ని వెల్లడించింది. ప్రతి కథలో కొత్త మెరుపును దర్శింపజేయాలన్న రచయిత దృక్పథం మెచ్చదగినది.

—-కావూరి వంశీ విద్వత్, ఆదివారం అనుబంధం, 16th Feb 2014

వలయం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.

***

వలయం on Kinige

 

Related Posts: