తిరిగిరాని జీవనం – “కొల్లేటి జాడలు” పుస్తకంపై సమీక్ష

ఎవరయినా తమ చిన్న నాటి జీవితం గురించి ఎందుకు రాసుకుంటారు? ఎందుకు పాత జ్ఞాపకాలను కలబోసుకుంటారు? మక్సీమ్ గోర్కీ, అలివర్ గోల్డ్ స్మిత్, ఆర్కె నారాయణ్ తదితర ప్రపంచ ప్రసిద్ధ రచయితలు కీర్తి శిఖరాలను అధిరోహించిన  తర్వాత కూడా మళ్లీ వెనక్కు ఎందుకు తొంగిచూశారు? తాము ఎప్పుడో అధిగమించిన బాల్యాన్ని మళ్లీ ఎందుకు గుర్తు చేసుకున్నారు? అసలుకు… జనం ఎందుకు తమ పూర్వ జీవితాలను గుర్తు చేసుకుంటారు? వీటికి సమాధానం చెప్పడం ఎంత సులభమో.. అంత కష్టం కూడా. క్లుప్తంగా చెప్పాలంటే బాల్యం అనేది మనం మళ్లీ మళ్లీ వినాలనుకునే మధుర గీతం.

ఏ వర్గ జీవితం గడుపుతున్నా, ఏ ఆర్థిక స్థితిలో ఉన్నా తల్లిదండ్రుల ఆలనా పాలనలో మనిషి గడిపే భద్రజీవితం బాల్యం. అందుకే మనిషి ఎంత ఉన్నత స్థాయికి ఎదిగినా.. తమ చిన్ననాడు కుటుంబం కలిగించిన భద్రతను దానివెనుక ఉన్న జీవన సమతుల్యాన్ని పదే పదే గుర్తు చేసుకుంటూనే ఉంటాడు. కాని మన కళ్లముందే మనకు ఆనందం కలిగించిన ఆ మధురమైన ఊహలు చెదిరిపోతే… ఉమ్మడి కుటుంబ జీవితంతో పాటు ఒక ప్రాంత జీవితాన్ని చిరకాలం నిర్దేశించిన సమాజం, దాని జీవన వ్యవస్థ కరిగి, ఆవిరైపోతే… మనిషి తనకు తాను చేసుకుంటున్న విధ్వంసం మన పునాదులనే, మధుర జ్ఞాపకాలనే ఉన్నఫళాన పెకిలించి వేస్తుంటే.. ఆ జీవుడి వేదన ఎలా ఉంటుందో.. విషాదంగా, దయనీయంగా చిత్రించిన అరుదైన నవల ‘కొల్లేటి జాడలు
తెలుగు పాఠకలోకానికి సుపరిచితులైన అక్కినేని కుటుంబరావు చిత్రించిన బాల్య స్మృతులే ‘కొల్లేటి జాడలు‘. తన బాల్య జీవితాన్ని ఆనందంతో, కమ్మటి జ్ఞాపకాలతో నింపిన ఒక మంచి నీటి సరస్సును ఒకే ఒక్క తరం.. ధ్వంసం చేసిన తీరును, ఒక సామాజిక విషాదాన్ని భయానక స్వరంతో ఆయన ఈ పుస్తకంలో పొందుపర్చారు. తన కళ్లముందే ఆసియా ఖండపు అతి పెద్ద మంచినీటి సరస్సు సమూలంగా నాశనమైపోయిన తీరు పట్ల రచయిత విలాపమే ‘కొల్లేటి జాడలు‘. ఈ కోణంలో చూస్తే ఇది ఒక వ్యక్తి ఎప్పటికీ తిరిగి రాని బాల్యం గురించి రాసుకున్న కథ మాత్రమే కాదు. ఒక సమాజం చేజేతులా నాశనం  చేసుకున్న తిరిగిరాని జీవనం గురించిన మ్రోగించిన ప్రమాద ఘంటిక.
జీవితంలో డబ్బుకు కాకుండా అవసరాలకు మాత్రమే ప్రాధాన్యత ఉండిన రోజుల్లో కొల్లేరు ఒక మంచి నీటి సరస్సుగానే కాకుండా తనను నమ్ముకున్న వారందరికీ నిలకడైన, సరళంగా సాగిపోయిన స్థిర జీవితాన్ని అందించింది. మంచినీటి సరస్సులో పుష్కలంగా దొరికే చేపలను పట్టి బతికే జీవితంలో ఉన్న సరళత్వాన్ని ఈ నవల ఎంతో సహజంగా చిత్రించింది. అదే సమయంలో పెట్టుబడి సహస్ర రూపాల్లో ప్రవేశించి చేపలను, రొయ్యలను పెంచి, ఒక అద్భుత సరస్సును మురికినీటి కయ్యలుగా మార్చిన క్రమంలో… ఒక తరం జీవితంలో, ఒక సమాజ గమనంలో ప్రవేశించిన విధ్వంసాన్ని కూడా ఈ నవల పట్టి చూపింది. పక్క ఊళ్లకు పోయి చేపలమ్ముకుని బతికిన జీవితంలో భారీ పెట్టుబడి ప్రవేశించి దూరప్రాంతాలకు చేపల ఎగుమతిని ప్రారంభించిన జీవితం మొదలైన క్రమంలో అక్కడి ప్రజలు, సమాజం, వారనుభవించిన ఉమ్మడి సంస్కృతి ఎలా కళ్లముందే ఆవిరవుతూ వచ్చిందో కొల్లేటి జాడలు కళ్లకు కట్టేలా చూపింది.
ఈ నవల తనకు తానుగా, ఆనందం నుంచి విషాదం వరకు పయనించిన ఒక స్థల పురాణం. రచయిత అరవయ్యేళ్ల క్రితం మిగిల్చుకున్న కొల్లేటి బాల్య జ్ఞాపకాలను అక్షరం అక్షరంలా మలిచి ఒక సమాజ విధ్వంసాన్ని పాఠకులకు, తన ప్రాతం ప్రజలకు చూపించడానికి చేసిన ప్రయత్నమే కొల్లేటి జాడలు. వాళ్ల తప్పు వాళ్లకు తెలిసింది గాని చాలా ఆలస్యంగా తెలిసింది అంటూ కొల్లేటి ప్రాంత ప్రజల కనువిప్పును రచయిత పట్టుకున్న తీరు అక్కడ ఒక దశాబ్ద కాలంలో జరిగిన దుష్పరిణామాలను పట్టి చూపించింది.
కొల్లేరు అంటే ఒకప్పుడు ప్రకృతి, స్థానిక సమాజం ఒద్దికగా, సామరస్యంగా, సరళాతిసరళంగా సాగిన ప్రశాంత జీవితం. ఆ సరస్సు తీరం వెంబడి ఉన్న గ్రామాలు, మనుషులూ, గొడ్డూగోదా, పనిపాటలూ, వంటలు, తిండి, సంబరాలు, వినోదాలు, శ్రమ, అలవాట్లు, ఆచారాలు వంటి వన్నీ అక్కడ దొరికే చేపల చుట్టూ, పండే పంటల చుట్టూనే కాకుండా, ప్రకృతికి, మనిషికి మధ్య సహజ సంబంధానికి గుర్తుగా తారాడుతూ వచ్చాయి. ప్రకృతితో ఈ మానవీయ సంబంధాన్ని కొల్లేటి జాడలు అత్యంత మనోహరంగా చూపించింది. తరాలుగా దోనెలో కూచుని తిరిగిన జీవితాన్ని అక్కడిప్పుడు డబ్బు కమ్మేసింది. మామూలుగా కాదు.. ఒక జీవావరణ, జీవన, పాలనాపరమైన విషాదం అక్కడిప్పుడు తాండవిస్తోంది.
ఇప్పుడు కొల్లేటిని మనం రచయిత చూపుతున్న కొత్త దృష్టితోనే చూడాలి. ఆ ప్రాంతంలోని రెండు మూడు మధ్యతరగతి రైతు కుటుంబాల చుట్టూ తిరిగిన ఈ నవల, 60 సంవత్సరాల క్రితం జీవితంతో పోలిస్తే కొల్లేటికి ఇప్పుడు జరిగిన సామూహిక మానభంగం ఎంత హేయమైందో యావత్ సమాజానికి చూపిస్తూ ఒక సామూహిక భయాన్ని, తీవ్ర హెచ్చరికను చేస్తోంది. చిన్నతనంలో తమందరినీ సాకిన ఒక అద్భుతమైన నీటి సరస్సు ముక్కలై, విధ్వంసమై, మాఫియా చేతుల్లో చేపల చెరువులుగా మరణిస్తున్న దృశ్యం రచయితనే కాదు. పాత్రలనే కాదు, చదువుతున్న పాఠకులను కూడా కలకాలం వెంటాడుతుంది. ఆనాటి మంచి నీటి సరస్సు జాడల వెంట రచయిత జ్ఞాపకాల పడవ ప్రయాణమే కథ. ఇది కథ కంటే జీవితం. కాల్పనిక పాత్రలు కాకుండా కొల్లేటి ప్రాంత ప్రజలు సామూహికంగా తమను వ్యక్తం చేసుకున్న స్వీయ గాథ ఇది.
కమ్యూనిస్టు ఉద్యమాల ప్రేరణతో అక్కడ అయిదు వందల ఎకరాలలో సమిష్టి వ్యవసాయం మొదలై అయిదేళ్లు బంగారం పండించి కరువు సమస్యను దూరం చేసుకున్న మంచి ప్రయోగం కూడా రాజకీయాలు,  స్వార్థం కారణంగా ఎలా కుప్పగూలిపోయిందో, చివరికి ఆ ప్రాంతం ప్రాంతమే చేపల చెరువులుగా మారిపోయి జీవితాన్నే ఎలా కంపు పట్టించాయో రచయిత చెబుతున్నంత వరకు కొల్లేరు విషాదం తెలీదు.
లక్ష ఎకరాల విస్తీర్ణం, పశ్చిమ గోదావరి జిల్లాలో ఎక్కువగా, కృష్ణా జిల్లాలో తక్కువగా పరుచుకున్న కొల్లేరు, ఆసియాలో అత్యంత ప్రాచీనమైన మంచినీటి సరస్సు. ప్రపంచ ప్రసిద్ధమైన పక్షుల ఆవాస కేంద్రం. ఒకప్పుడు లక్ష పెలికాన్ జాతి పక్షులకు ఆశ్రయమిచ్చిన పలస కేంద్రం. అలాంటిది రోజుకు కొల్లేరు తీరప్రాంతం నుంచి 500 లారీల చేపలు కలకత్తాకు ఎగుమతి అయ్యేంతగా అక్కడ జీవితం ఎదిగిపోయింది.
ప్రపంచంలో మరే దేశంలో అయినా ఇంతపెద్ద మంచి నీటి సరస్సు ఉంటే ఇంత అన్యాయంగా దీని ఊపిరి తీసేవారా అనే ప్రశ్న తలెత్తుతుంది. ఈ ప్రశ్న లేవనెత్తడమే ఈ నవల విశిష్టత. తమ ప్రాంతాన్ని మళ్లీ పూర్వ వైభవంలోకి తీసుకుపోవాలని ఇప్పుడక్కడ వ్యక్తులు, సంస్థలూ చేస్తున్న ప్రయత్నాలు ఫలించాలని కోరుకోవడం తప్ప కొల్లేరు గురించి ఇంకేమీ ఆలోచించలేం.

- ఆంధ్రప్రభ , 21 మార్చి 2014.

 

కొల్లేటి జాడలు”నవల డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కొల్లేటి జాడలు on kinige

 

KolletiJaadalu600

 

Related Posts:

“ఊహాచిత్రం” పుస్తకం పై సమీక్ష

“తెలుగు భాషను మరుగుపరుస్తున్నారన్న అపవాదును మోసే తరంలోనివాడిని. ఆంగ్ల మాధ్యమంలో చదువులు, కార్పొరేట్ ఉద్యోగాల పరుగుల మధ్యలో తెలుగు భాషాభిమానాన్ని, సాహితీ ఆసక్తిని సజీవంగా ఉంచుకోవచ్చని చెప్పడానికి నేను ఒక చిన్న ఉదాహరణ మాత్రమే.. రేపటి తరానికి రెండు కథలు, నాలుగు పద్యాలు, కాసిన్ని సామెతలు చెప్పి తెలుగు భాషని రుచి చూపించండి. ఆ తరువాత పఠనాసక్తిని కలిగించి వదిలిపెట్టండి. ఏ మాధ్యమంలో చదివినా, జీవనానికి మరే భాష అవసరం అయినా తెలుగు మీద మక్కువ ఎక్కడికీ పోదు. అందుకు నేనే సాక్ష్యం..” అంటున్నారు ఊహాచిత్రం కథల సంపుటి రచయిత అరిపిరాల సత్యప్రసాద్.
ఆయన అన్నది అక్షరసత్యం. వెనుకటి ఏడు తరాలు చూసుకున్నా కలికాలానిక్కూడా రచయితలు అనేవారు లేని కుటుంబ నేపథ్యంలో పుట్టిన రచయితలో సాహిత్యాభిలాష పుట్టడానికి కన్నతల్లి తొలి పునాది వేశారు. అమ్మ అంటే ఇప్పుడాయనకు ఒకటే జ్ఞాపకం. పాత సినిమా పాటలు, లలిత సంగీతం, రేడియో పాటలు. నిత్యం పని చేసుకుంటూ ఆమె వీటి మధ్యే బతికిన రోజులు రచయిత జీవితంలోనే అత్యంత సంతోషకరమైన జ్ఞాపకాలలో ఒకటి. తర్వాత నాన్న రాత్రిపూట రేడియోలో వినే కర్నాటక సంగీతం. త్యాగరాజు, శ్యామదాసు, పురంధరదాసు, సుబ్బలక్ష్మి, శమ్మంగుడి, పట్టమ్మాళ్. వీళ్లంతా నాన్న సేకరించిన వందలాది సంగీతం క్యాసెట్ల రూపంలో రచయిత బాల్యంలో మెరిసిన సంగీత సామ్రాట్టులు. అమ్మ సాహిత్య, సంగీతాభిరుచి, నాన్న సంగీత రికార్డుల సేకరణ.. కళల గురించి ఏ ఇంట్లోనయినా ఆసక్తి కలగడానికి ఇవి చాలవా?
ఇక మేనత్త పరిచయం చేసిన పోతన పద్యాలు, బాల్య జీవితాన్ని పద్యమయం చేసేశాయి. తెల్లవారు జామున చెట్టుమీది పూలు కోస్తూ, ఆమె పాడిన పద్యాలు, శ్లోకాలు రచయితకు నేటికీ నందివర్ధనం చెట్టు మీద నుంచి రాలిపడిన మంచుబిందువులంత స్పష్టంగా గుర్తుకొస్తూనే ఉన్నాయి. ఇక నాన్నమ్మ చెప్పిన పూటకూళ్ల పెద్దమ్మ కథలు, కాశీమజిలీలు, భోజరాజు కథలు, విక్రమార్కుడు, రామాయణ, మహాభారత కథలు, రమణీయ బాల్యంలో మెరిసిన రసరమ్య గీతాలు.
లోహితా లోహితా అంటూ హరిశ్చంద్రుడు ఎంత ఏడ్చాడో కానీ, నానమ్మ ఆ కథ చెప్పిన ప్రతిసారీ ఏడవడం ఆశ్చర్యకరమైన, మర్చిపోని జ్ఞాపకమైతే, కథతో, అందులో ఉండాల్సిన ఎమోషన్‌తో తొలి పరిచయం అప్పుడే ఏర్పడిపోయిందట.
ఆ తర్వాత కనపడ్డ పుస్తకమల్లా చదవటం, ఇంగ్లీషు, తెలుగు, కాలక్షేప నవలలు, సీరియస్ రచయితలు ఇలా కిరాణా కొట్టులో కట్టిచ్చిన పొట్లాల కాగితంతో సహా కనబడ్డ పుస్తకమల్లా చదివి నమిలేస్తున్న క్రమంలో శ్రీశ్రీ కవిత్వంతో పరిచయం మయూరి వారపత్రికలో కలం కల కవితగా పరిణమించింది. ఆ పునాది 1995 ఆంధ్రప్రభ ఆదివారం పత్రికలో దీపావళి కథల పోటీలో సాధారణ ప్రచురణకు బాట వేసింది.
మీకంటూ ఒక శైలి ఏర్పడాలంటే ఇంకా ఎక్కువగా చదవాలంటూ రచయిత, సాహితీ విమర్శకులు వసుంధర సలహాతో ఆరేడు సంవత్సరాలు ఏమీ రాయకుండా అజ్ఞాతవాసంలో ఉంటున్నట్లుగా అధ్యయనంలో మునిగిపోవడం. ముళ్లపూడి, కొకు, బుచ్చిబాబు, చలం , షిడ్నీ షెల్డన్, అగాథా క్రిస్టీ వంటి మహామహుల రచనలు చదువుతున్న కొద్దీ కుంచించుకుపోయి నేను రాసినవి కథలేనా అనే అనుభూతితో అలా చదువుతూ పోవడం… గుజరాత్‌లో చదువులు, కార్పొరేట్ ఉద్యోగాలు, ఉజ్జయని మంచినీటి కటకట ప్రభావంతో మళ్లీ కలం కదలిక. ఈ క్రమంలో కొత్తగా పరిచయమైన టెక్నాలజీ సాయం తీసుకుని బ్లాగులు, అంతర్జాలంతో మొదలై ఇప్పుడు వివిధ పత్రికలు, ఆన్‌లైన్ పత్రికలలో రచనల పరంపర.
ఇదీ 35 సంవత్సరాల ఆధునిక విద్యాధిక యువకుడి జీవిత సాహిత్య నేపధ్యం. ఈయన తొలి కథల సంపుటి ‘ఊహాచిత్రం‘ తెలుగు సాహిత్యానికి ఒక సత్యప్రసాదం. తెలుగుభాష త్వరలో అంతరించనుందన్న అనుమానం అంతర్జాతీయ ప్రచారమవుతూ భయపడుతున్న కాలంలో ఇలాంటి నమ్మకాల్ని, అతి ప్రచారాలాను, అనుమానాలను నిర్ద్వంద్వంగా తొలగించే శక్తివంతమైన కథల గుచ్చమే ఊహాచిత్రం. ఈ సంపుటిలోని 13 కథలు మళ్లీ మనముందుకు కొకు, రాచకొండ, రంగనాయకమ్మ, మల్లాది, యండమూరి.. ఇలా సమకాలీనంగా ఉన్నత శిఖరాలకు చేరుకున్న మహాకథకులందర్నీ మరోసారి గుర్తుచేస్తూ జీవితాన్ని కాచి వడపోసిన  అరిపిరాల కథలు. తెలుగు తెలతెలబోతోంది, తెలుగుకు భావి లేదు అనే రాతల్ని, కూతల్ని కూడా అభాసగా మారుస్తున్న కథలను ఈసంపుటిలో మనం చూడవచ్చు.
ఊహాచిత్రం, స్వప్న శేషం, తుది బంధం, ఐదువందల రూపాయల నోటు, చిరాకు రామనాథం, ఏడు తరవాత, మంత్రిగారి సమాధి, చినుకులా రాలి, వానర వీరుడు, చిలక రాయబారం, మబ్బుతునక, ఈరేశంగాడి ముచ్చట, ఓపెన్ టైప్, మేరా భారత్ మహాన్, పద్మావతీ శ్రీనివాసం, మంచినీళ్ల బావి, కలిసివచ్చిన ఇల్లు, భూదేవతమ్మ ఇవీ ఈ సంపుటిలోని 13 కథలు. నేల మీద జీవధారల్ని కాలుష్యం చేసి తన మనుగడకే ముప్పు తెచ్చుకుంటున్న మనిషి తీరు పట్ల తీవ్ర అభ్యంతరం,  ఆధునిక దాంపత్యానికి అపరూప విశ్లేషణ, డబ్బే సర్వస్యమనుకునే నేటి తరం తీరుపై అపూర్వ స్పందన, తనను నచ్చే ప్రపంచం, తానుండే ప్రపంచం ఒకటి కాని స్థితిలో భావుకుల స్వప్నశేషాలు. కార్పొరేట్ ఉద్యోగుల జీవితాల్లో పద్మావతీ శ్రీనివాసం, కళ్లకు కట్టిన మనోవిశ్లేషణ, మంచినీరు తాగునీరుగా, అమ్మకపు నీరుగా మారిన వ్యాపారీకరణ, జీవన వేదాంతాన్ని ఇమిడ్చిన అద్బుతమైన కథన కౌశలం, ఇవన్నీ కలిస్తే అరిపిరాల కథలు..
కంపెనీ కొన్నప్పుడు ఆ కంపెనీని వృద్ధిలోకి తీసుకొచ్చిన ఉద్యోగస్థులు ఆ కంపెనీలో భాగం కాకుండా పోతారా (ఉద్యోగం పోగొట్టుకున్న వాడి ఆవేదన). ‘పొలం భూదేవత. తల్లితో సమానం. అమ్మనెలా అమ్మమంటావ్? భూదేవతంటే లక్ష్మీదేవి కాదు. అన్నపూర్ణ, పదిమందికి అన్నం పెట్టే తల్లి’ తోటి సైనికుడు చనిపోతే కనీసం అటువైపు చూడనైనా చూడకుండా యుద్ధంలోకి పరుగెత్తే సైనికుల్లా కొలీగ్స్..  ‘సంసార కాలం మొత్తం ముళ్లు ఏరిపారెయ్యడానికే సరిపోయింది. పూలదారులు పక్కనే ఉన్నా ముళ్లు ఏరే పనిలో వాటిని గుర్తించనే లేదు’.
కుప్పిలి పద్మగారన్నట్లు ‘ఈ కథలు మనలని గాభరాలో ముంచెత్తవు, నిద్రపుచ్చవు, నిర్లిప్తంగా కూడా ఉంచవు కాని, మన చుట్టూ ఉన్న మనుష్యులని ఆరోపణలతో కాక, ఆత్మీయంగా అర్థం చేసుకునే వైపు మనల్ని నడిపించే పాజిటివ్ కథలు. మనకు ఊహ తెలిసిన నాటి నుంచి మనం తెలవారుఝామున వినే చరిపరిచిత స్వరాన్ని ఈ కథలు తిరిగి మనలోకి ప్రవహింపచేస్తాయి.’ ఆధునిక జీవితంలోని డొల్లతనాన్ని, కపటత్వాన్ని ఆవిష్కరిస్తూనే మనిషి మనిషిగా బతకడం లోని ఆనందాన్ని కూడా వివరించే కథలివి. సత్యం కోసమో. జీవితానికి అర్థం కోసమో.. లేక తనకే తెలియిని ఒక జ్ఞాపకం కోసమో రచయిత సాగించిన వెతుకులాటను ఈ కథల్లో చూసిన తర్వాత మనం కూడా కాస్త ఆలోచనలో పడతాం.
ఇంతకుమించి ఏ కథకుడికైనా కావలసింది ఏమిటి? అరిపిరాల సత్యప్రసాద్ గారి కథలను మనమూ చదువుదామా మరి.

 ఆంధ్రప్రభ , 7 మే 2014 .

ఊహాచిత్రండిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

ఊహాచిత్రం on kinige

 

OohaChitram600

 

Related Posts:

చిత్తూరువారి కథల విందు! – “చిత్తూరు కథ” పుస్తకంపై సమీక్ష

ఇది చిత్తూరు జిల్లా గురించిన కథ కాదు! ఆ జిల్లాకు చెందిన రచయితలు వెలార్చిన కథలు. చిత్తూరు వేషభాషలు, నైసర్గిక చిత్రణల నేపథ్యంలో జీవితంలోని వివిధ పార్శ్వాల్ని తడిమే కథలివి. జిల్లాకు చెందిన కథా రచయితలు కె.సభా (మిథున లగ్నం), మధురాంతకం రాజారాం (అంబ పలుకు.. జగదంబా పలుకూ), నరేంద్ర (పురోహిత్ పరిషత్), మహేంద్ర (జర్తె), వల్లంపాటి వెంకటసుబ్బయ్య (అందని పళ్లు), కరణం బాలసుబ్రహ్మణ్యం పిళ్త్లె (జింకపిల్ల), ఆర్.వసుంధరాదేవి (పిచ్చిగీతలు), సుంకోజి దేవేంద్రాచారి (అన్నంగుడ్డ), పేటశ్రీ (చిత్తానూరు పంచమి)… ఇలా 44 మంది కథలున్నాయిందులో. ఎక్కడికక్కడ ‘స్థానిక’ గొంతుకల్ని గట్టిగా వినిపించడం ఆధునికానంతర లక్షణం. ఆ ప్రభావంతోనే గత రెండు దశాబ్దాలుగా తెలుగు కథ.. ఇంతవరకూ మాటపెగలని కంఠాలెన్నింటినో వినిపిస్తోంది. ఈ స్థానికత, ప్రాంతీయత ఆధారంగా సాహిత్య సృజనే కాకుండా.. ప్రత్యేక సంకలనాలు రావడం ఇటీవలి పరిణామం. వాటిలో ‘చిత్తూరు కథ‘ ప్రమాణాల పరంగానూ విశిష్టమైందని చెప్పాలి. ఆ విషయంలో సంకలనం తీసుకొచ్చిన తెలుగు భాషోద్యమ సమితి ప్రయత్నం అభినందనీయం.

– జె.రాజు , ఈనాడు ఆదివారం ,8 ఆగష్ట్ 2014.

ChittorKatha

“చిత్తూరు కథడిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

చిత్తూరు కథ on kinige

ChittooruKatha600

Related Posts:

అమెరికాలోనూ అంతే… “ముగ్గురు కొలంబస్‌లు” పుస్తకంపై సమీక్ష

అమెరికా పర్యటన చేసి వచ్చిన రచయిత్రి సోమరాజు సుశీల ఈ పుస్తకంలో తన యాత్రా విశేషాలను పాఠకులకు అందించే ప్రయత్నం చేశారు. పుస్తకంలో 19 అధ్యాయాలున్నాయి. రచన వ్యాస రూపంలో కాకుండా కథారూపంలో ఉండటంవల్ల యాత్రా కథనాలన్నీ ఆసక్తికరంగాఉన్నాయి.
విమానం ఎక్కబోయేముందు చేసుకునే ఏర్పాట్లతో పుస్తకం మొదలవుతుంది.
అమెరికా లో ఉన్న కాలంలో అక్కడి పద్ధతులనూ జన జీవితాన్నీ పరిశీలించిన రచయిత్రి, ఆయా సన్నివేశాలను పాఠకులకు కళ్లకుకట్టినట్లుగా ఉండేటట్లుగ వర్ణించారు. ఈ కథనాలకు చిత్రకారుడు వేసిన బొమ్మలు మరింత వన్నె తెచ్చాయి.
అమెరికన్ కుటుంబాలను పరిశీలించాక ‘దేశమేదయినా మానవ స్వభావం మాత్రం ఒకటే అనిపించింది’ అని ‘అల్లుడు జిందాబాద్’ శీర్షికలో తెలిపారు. అక్కడి తల్లులు కూడ పిల్లలకోసం తెగతాపత్రయపడతారని, మనవల రాకకోసం ఆత్రంగా ఎదురుచూస్తారనీ అన్నారు. సంసారాల్లో సాధ్యమైనంతవరకు సర్దుకుపోవాలని చూస్తుంటారు తప్ప, అంత తేలికగా విడాకుల జోలికి వెళ్లరని తన అభిప్రాయం వ్యక్తపరిచారు.
‘సరిగమ పదని’ శీర్షికలో ఒక సంగీత వాద్యగోష్ఠి కార్యక్రమం గురించి ప్రస్తావించారు. ప్రేక్షకులు ఎంతో శ్రద్ధగా ఆస్వాదించి, కళాకారుల పట్ల ఆదరాభిమానాలను ప్రకటించారని చెప్తూ, మన తెలుగునేల మీద మాత్రం చాలామందిలో కార్యక్రమం మధ్యలో లేచి వెళ్లిపోయే అలవాటున్నందుకు విచారం వ్యక్తంచేశారు.
తిరుగు ప్రయాణంలో బొంబాయి విమానాశ్రయంలో దిగినప్పుడు ఉద్యోగుల అలసత్వం వల్ల తిప్పలుపడ్డ సంగతి చెప్పారు. మనది స్వేచ్ఛభారతం అనే సంగతి గుర్తుచేసుకొని ‘బోలో స్వతంత్ర భారత్‌కీ జై’ అంటూ ముగించారు. అమెరికా విశేషాలు తెలుసుకోటానికి ఈ పుస్తకం పనికొస్తుంది.

 -ఎం.వెంకటేశ్వరశాస్త్రి ,25/10/2014 , ఆంధ్రభూమి-అక్షర

 

ముగ్గురు కొలంబస్‌లు”నవల డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

ముగ్గురు కొలంబస్‌లు on kinige

 

MugguruKolumbuslu600

Related Posts:

తాత్విక స్పర్శతో సమాజ హితం – “ఆలోకన -1″ పుస్తకంపై సమీక్ష

సుప్రసిద్ధ పత్రికా సంపాదకులు, చింతనాశీలురు నీలంరాజు వేంకట శేషయ్య పుత్రులు లక్ష్మీప్రసాద్ తండ్రి నుంచి రచనా పాటవం, ఉత్తమ జిజ్ఞాస వారసత్వంగా అందుకున్నారు. ఈ గ్రంథనామంలోని రెండు అంశాలు పాఠకులను ముందుగా ఆకర్షిస్తాయి. ‘ఆలోకన-1’ అని నామకరణం చేశారు. అంటే ఈ క్రమంలో మరికొన్ని పుస్తకాలు వెలువడనున్నాయని స్ఫురిస్తుంది. నిజమే. లోగడ లక్ష్మీప్రసాద్ రమణమహర్షి, జిడ్డుకృష్ణమూర్తి, నిసర్గదత్త మహారాజ్‌పై రచనలు ప్రత్యేక (సంపుటాలుగా) ప్రచురితమయ్యాయి. ఇప్పుడు సుమారు 270 వ్యాసాలు ‘ఆలోకన’ పేరుతో కొన్ని సంపుటాలుగా ‘విద్యార్థిమిత్ర ప్రచురణలు’వారు వెలువరిస్తున్నారు. రెండవ అంశం- గ్రంథం ఉప శీర్షిక ‘సామాజిక-ఆధ్యాత్మిక వ్యాస సంపుటి’అని చెబుతున్నది. మౌలికంగా ఇందులోని 49 వ్యాసాలలో ప్రతిదీ తాత్విక స్పర్శ వున్నదే. అయితే ఎందులోనూ సులభగ్రాహ్యం కాని ఆధ్యాత్మిక పరిభాష వుండదు. అంతుపట్టని గాఢ తాత్విక విచారధార వుండదు. అసలు వ్యాస సంవిధానమే విలక్షణంగా రూపుదిద్దుకుంది. సామాజిక హితాన్ని కాంక్షించే ఆధ్యాత్మిక భావాలను రచయిత విలక్షణ రూపంలో అందించారు. కథనానికి ఒక మహనీయుని జీవితఘట్టమో, సన్నివేశమో, అనుభవమో, సందేశమో వస్తువుగా స్వీకరించారు. చాలా వ్యాసాలు వ్యక్తిత్వ వికాసానికి దోహదం చేకూర్చేవిగా వున్నాయి. వాటికి కూడా తాత్వికత భూమికగా వర్తిస్తుంది. ఈ గ్రంథంలోని వ్యాసాలలో మహాపురుషులు, తత్వవేత్తలు, దార్శనికులు, యోగులు, వేదాంతులు, పండితులు, మహర్షులు, మతాచార్యులు, మఠాధిపతులు, సాహితీవేత్తలు ఇంకెందరో దర్శనమిస్తారు. వారి ప్రవచనాలు వినిపిస్తారు. అనుభవాలు పంచుకుంటారు. అవి పాఠకుల ఆలోచనల్ని తేజోమయం చేస్తాయి. ప్రత్యేకాంశాలుగా పేర్కోదగినవి వీటిలో అనేకమున్నాయి. అంతేకాదు. ఉదాహరణ యోగ్యమైన పంక్తులు ప్రతి పుటలోను చోటుచేసుకున్నాయి. కొన్నింటిని మాత్రమే వాచలిగా తెలియజేయడానికి సాధ్యమవుతుంది. రచన ఆద్యంతం సరళ వ్యావహారికంలో సాగింది. వ్యంగ్యం, హాస్యం, చమత్కారం సహితం చోటుచేసుకోవడం గమనార్హం. వ్యాసం మూడు భాగాలలో వుంటుంది. ఒక ప్రధాన భావ ప్రతిపాదన మొదటి భాగం. దానికి సంబంధించిన కథనం రెండో భాగం. ముగింపు సందేశ రూపంలో పాఠకుల్ని ఆధ్యాత్మిక సాధన దిశగా మరలిస్తుంది. ‘స్వయంగా తెలిసినదెంత?’ అనే వ్యాసంలో రచయిత మొదట జీవితమనే గురువు రూపేణా నేర్చుకున్నదే. అసలైన జ్ఞానమని ప్రతిపాదిస్తారు. తర్వాత గొప్ప పండితుడు వౌలింగ పుత్రుడు గౌతమబుద్ధుణ్ని కలిసినప్పుడు ‘నీ సొంత అనుభవమనేది ఒకటి చెప్పు’ అనే ప్రశ్నకు ఆ పండితుడు సమాధానం చెప్పలేకపోతాడు. ఈ కథనం వ్యాసంలో రెండో భాగం. చివర్లో ఆ పండితుడు బుద్ధుని శిష్యుడుగామారి సత్యం గ్రహిస్తాడు. ‘ధనం తృణప్రాయం’ అనే వ్యాస శీర్షికే రచయిత ఏమి చెప్పదలచుకున్నారో వ్యక్తంచేస్తుంది. వివేకానందుడు అమెరికా వెళ్లడం, అక్కడ భారతదేశంలో సేవాకార్యక్రమాలకు ధనం సేకరించడం వర్ణించారు. తిరిగి రాగానే ఆ ధనమంతా సంబంధిత కార్యకర్తలకు అప్పగిస్తాడు. ‘వెళ్లిన పని అయిపోగానే వివేకానందుడు మళ్లీ ఏమీలేని తన సన్యాసి బృందంలో కలిసిపోయాడు’ అనే వాక్యంతో వ్యాసం ముగుస్తుంది. నరేంద్రుడికి ‘వివేకానంద’అనే పేరు సూచించింది ఖేత్రిమహారాజు; ఆర్‌ఎస్‌ఎస్ వ్యవస్థాపకుడు హెడ్గెవార్ తెలుగువాడు, ఆయన పూర్వీకులది తెలంగాణలోని కందకుర్తి గ్రామం, మద్రాసు సభలో ఈ గ్రంథం రచయిత బాల్యంలో వేలి బంగారపు ఉంగరాన్ని గాంధీజీ స్వయంగా చిరునవ్వుతో తీసుకున్నారు; నారాయణగురు నెలకొల్పిన ఆలయాల్లో విగ్రహానికి బదులు నూనె దీపం వుండేది- వంటి సత్యాలు పాఠకులకు ఎంతో ఆసక్తిదాయకంగా వుంటాయి. జిజ్ఞాసువులు తప్పక చదవదగిన ఉత్తమ గ్రంథమంది.

 

-రామకృష్ణారావు, 13/09/2014 , ఆంధ్రభూమి – అక్షర.

 

ఆలోకన-1” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

ఆలోకన-1 on Kinige

 

Alokana1600

Related Posts:

మంచి సంగతులు – “మీడియా సంగతులు” పుస్తకంపై సమీక్ష

రేపటి చరిత్రకి దినుసును అందిస్తున్న పత్రికారంగ చరిత్ర మీద మనకి ఆసక్తి తక్కువే. నిజానికి పత్రికారంగంలో వచ్చిన పరిణామాలను గమనించడమూ అవసరమే. ఆ ప్రయత్నంలో భాగమే ‘మీడియా సంగతులు’. ప్రముఖ జర్నలిస్ట్, జర్నలిజం పాఠాలు చెప్పిన మాస్టారు గోవిందరాజు చక్రధర్ ఈ పుస్తకం రాశారు.  కాబట్టే పత్రికల నేపథ్యం, పత్రికల నాటి స్థానం, వర్తమానంలో ఉన్న స్థానాల గురించి చాలా లోతుగానే చర్చించారు. చక్రధర్ ప్రతికారంగంలోని వెలుగునే కాదు, చీకటిని తడమడానికి కూడా ప్రయత్నం చేశారు.

ప్రింట్ మీడియా తరువాత జరిగిన ఎలక్ట్రానిక్ మీడియా ఆవిర్భావం, ఇంటర్నెట్ గురించి కూడా ఇందులో చదవవచ్చు. అలాగే సాంకేతిక పరిజ్ఞానంతో పాటు పతనంలో కూడా పెరిగిన పోటీని ఇందులో రచయిత నిభాయింపుతోనే అయినా చర్చించారు. ఏ రంగంలో అయినా మార్పు సహజమే. కానీ మార్పునీ పతనాన్నీ వేర్వేరుగా చూడలేకపోతున్న చానెళ్ల, పత్రికాప్రచురణ సంస్థల మీద చక్రధర్ ప్రదర్శించిన నిరసనను అర్థం చేసుకోవలసిందే. పుస్తకం చివర తెలుగు పత్రికా రచయితల ఫోటోలు ఇవ్వడం రచయిత ఉత్తమ అభిరుచికి నిదర్శనం.

– కల్హణ , సాక్షి ఫన్‌డే , 20 ఫిబ్రవరి 2014.

 

“మీడియా సంగతులు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మీడియా సంగతులు on kinige

 

MediaSangatulu600

 

Related Posts:

సరదా కథల రచయిత “సత్యం మందపాటి” పుస్తకాలపై 20% ప్రత్యేక తగ్గింపు!

satyam mandapati

చమక్కులు, చురుక్కులుతో సరదా సరదాగా కథనాన్ని నడిపే రచయిత ‘సత్యం మందపాటి‘.
దీపావళి సందర్భంగా సత్యం మందపాటి గారి కినిగె ఈ-బుక్స్ మరియు ప్రింటు బుక్స్ పై 20% ప్రత్యేక డిస్కౌంటు లభిస్తుంది.
సత్యం మందపాటి గారి పుస్తకాల కోసం ఇక్కడ క్లిక్ చేయండి.

కినిగెలో లభ్యమయ్యే సత్యం మందపాటి గారి పుస్తకాలు:

ఎన్నారై కబుర్లు (ఒకటి)
ఎన్నారై కబుర్లు (మరోటి)
అమెరికా వంటింటి పద్యాలు
చీకటిలో చందమామ
అమెరికా బేతాళుడి కథలు
మేడ్ ఇన్ అమెరికా
తెలుగువాడు పైకొస్తున్నాడు – తొక్కేయండి!
చెట్టుక్రింద చినుకులు
ఎన్నారై కథలు

 

 

Related Posts:

ఈ కథానికలూ మంత్రాల్లాంటివే! – “మాటే మంత్రము” పుస్తకంపై సమీక్ష

ఆకాశం అనంతం. కనిపించే నిర్మలమైన ఆకాశం దాని సహజ రూపం కాదు. అలాగే నిశ్శబ్దంగా అన్నింటినీ భరించేటంత అవనిలోనూ సహజత్వం లేదు. ఇందుకు కారణాలు లేకపోలేదు. ఆకాశానికి భూమికీ మధ్య జరిగే మానవ సంఘర్షణలు, మనిషి మేధో మధనాల ఫలితమే ఈ అసహన మనోకృతులు ప్రకృతిని కూడా ఆవరించాయి. సముద్రాన్ని దేవతలు మధిస్తే అమృతం వచ్చినట్లు, వీటన్నింటినీ ఎంతో కొంత చదివి ఆకళింపు చేసుకొని సానపడితే తప్ప కథానిక పుట్టదు. తోడిన కొద్దీ మానవ జీవితంలో ఎన్ని సమస్యలున్నాయో వాటికి ఆలోచనాభరిత పరిష్కారాలే కథానికలు. ఒక వ్యక్తి తనకొచ్చిన సమస్యను పరిష్కరించుకోవడానికి ఎంతో ప్రయాస పడుతుంటాడు. అదే సమస్య ఎదుటి వ్యక్తికి రాగానే పరిష్కారం క్షణాల్లో చెప్పేయగలడు. అంటే ప్రతి సమస్యకు పరిష్కారం ఉందని మనకు అర్థమవుతుంది కానీ ఆ పరిష్కారం మనకెంత వరకు వర్తిస్తుందో అనేది ఆలోచించాల్సిన విషయం. సి.ఉమాదేవి రచించిన ‘మాటే మంత్రము’ అనే కథానికల సంపుటిని కథల సంపుటిగా సంబోధించారు. కానీ నిజానికిది కథానికలు. ఊహాజనితమైన ప్రపంచంలో నిత్యం ఊయలులూగుతూ తమకు దక్కని, తాము ఎదురుచూడని సన్నివేశాలతో కదిలేది కథని, వాస్తవ ప్రతిరూపాలన్నీ కథానికలనీ ప్రముఖ కథకులు వేదగిరి రాంబాబు గారి నుండి తెలుసుకున్నప్పటి నుండి చాలామంది కథానికలే రాస్తారని అర్థమైంది. ఆ కోవలో ఆలోచిస్తే ఉమాదేవిమాటే మంత్రము’ కథానికల కోవలోనివే అని చెప్పవచ్చు.
మానవ జీవతానికి రెండు రిటైర్మెంట్లు. ఒకటి ఉద్యోగరీత్యా, రెండవది జీవితరీత్యా! జీవితరీత్యా రిటైర్ అవ్వడానికి ఇంత వయసని ఎక్కడా లేదు. ఆ వయసనేది దేవుడు నిర్ణయం. కానీ ఉద్యోగరీత్యా రిటైర్‌మెంట్ అనేది తప్పనిసరి కానీ ఆ సంబంధిత వ్యక్తికి మాత్రం దిగులు ఆవరిస్తుంది. పైకి నవ్వుతూ కనిపించినా తనకున్న ఒక పని పోయేసరికి తను ఇక ఏమీ చేయలేడా? అనే ఆవేదన వెంటాడుతుంది. అందుకు తగినట్లుగా ఉదయమే ఆయనకేం తొందర? ఇంట్లోనే ఉంటారుగా అనే ఇంటిలోని వారి రకరకాల మాటలు వింటున్నా, తనకిన్నాళ్లు ఇచ్చిన ప్రాముఖ్యత ఇవ్వడం లేదనిపించి దిగులు పడిపోయేవారు ఎందరో. అదే విషయాన్ని ‘మౌనమే నీ భాష’ అనే కథలో అనంతం పాత్ర ద్వారా ఎంతో చక్కగా తెలిపారు. నాన్నకు పని లేదు. కనుక ఏదో ఒకటి మాట్లాడతారు’ అనే కొడుకు మాటలకు ఎంతో ఆవేదన చెందిన తండ్రి అనంతం ఇకపై మాట్లాడకూడదని నిర్ణయించుకుని వౌనం పాటిస్తాడు. ఆ మౌనం భరించక తిరిగి కుటుంబ సభ్యులందరూ మీరు మాట్లాడితేనే బావుంది అని దగ్గరకు చేరే సంఘటనల్ని ఈ కథలో చాలా అద్భుతంగా పలికించారు. ఇంట్లో వారు హడావిడిలోనో, కోపంతోనో, పని వత్తిడితోనో ఏదయినా అంటే అందులో ఏ మాత్రం నిజం ఉండదని తెలియజేయడం ఎంతో బావుంది. రచయిత్రి ఉమాదేవి తమదైన శైలిలో రచించారు. వయసు పెరిగినా మనసు పెరగదనేది నిజం అనిపిస్తుంది కొన్ని విషయాల్లో. సృష్టికి ఉదయాస్తమయాలు ఉన్నట్లే, మనిషి ఆకలిదప్పులు, ఆశలు ఆవేశాలు ఉండనే ఉంటాయి. వాటిని గురించి తెలిపే కథ ‘ఏం చేస్తున్నావు బుజ్జీ’ అనే కథ. సెల్‌ఫోను తనకెందుకు ఇంట్లోనే ఉంటుంది కదా? తనకేమయినా ఫోను వస్తే నాకు చేస్తే నేను ఇస్తాను కదా అనేది సాధారణంగా ప్రతి ఇంట్లో ఉంటుంది. స్త్రీకి స్వతంత్రత ఉండదనే విషయం ఇంకా అక్కడక్కడా కనిపిస్తూనే ఉంటుంది. అలా కాదు పిల్లలు పెద్దవారయి అమ్మకు ఒక ఫోను ఉండాలి అని కొనిస్తే, ఆ అమ్మకు మెసేజ్ ఇస్తే, అదీ అపరిచిత వ్యక్తి? అనేది సరదాగా సాగిన ఒక సంఘటనను కథానికగా మలచిన తీరు చాలా బావుంది.
ఉమాదేవి కథలన్నీ నాలుగు గోడల మధ్య జరిగే సంఘటనలే. ఇల్లు నాలుగు గోడలే అయినా ఉదయం నించి రాత్రి దాకా నలభై రకాల సమస్యలు వెంటాడుతూనే ఉంటాయి. సమస్యలు అయితేనేం? సామరస్యాలు అయితేనేం? అంతా అపురూపమే! ఇల్లంటేనే ఒక అపురూపం. అలాంటి అపురూప సంఘటనలను ఒకచోట చేర్చి ‘మాటే మంత్రము’ అనే శీర్షికతో కథానికల సంపుటి తీయడం ప్రశంసనీయం. ముఖ్యంగా నాన్న ఉండాలి, నాన్నా నీకేం కావాలి? మీరు క్యూలో ఉన్నారు. జీవిత చక్రం, అమ్మ సన్నిధి, పలుకే బంగారుమాయెనా? వర్షించని కన్నులు లాంటి కథలు పాఠకుల్ని ఎంతో అందమైన లోకంలో విహరించేలా చేస్తాయి. పెదవులపై చిరునవ్వు చిందించేలా చేస్తాయి. మొత్తానికి అందరినీ హాయిగా చదివించే కథలు ఇవి. ఎందరినైనా ఆకట్టుకోగల కథలివి.

-శైలజా మిత్ర, ఆంధ్రభూమి-అక్షర, 09/08/2014.

 

“మాటే మంత్రము” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మాటే మంత్రము on kinige

 

MateMantramu600

 

Related Posts:

ఆబాల గోపాలానికీ సరళ వ్యావహారికంలో “భాగవతం”

నవ్య వారపత్రికలో సంవత్సరానికి పైగా వెలువడి పాఠకుల విశేష ఆదరణ పొందిన రచన భాగవతం . భాగవతం ఎవరు రాశారు? ఎందుకు రాశారు? ఏ ప్రయోజనాన్ని ఆశించి రాశారు? భాగవతం వల్ల పాఠకులకు లాభించేదేమిటి? భాగవతం ఎందుకు చదవాలి? వంటి అనేక ప్రశ్నలకు జవాబుగా ఆబాలగోపాలానికి సరళ వ్యావహారికంలో అర్ధమయ్యేలా అయలసోమయాజుల నీలకంఠేశ్వర జగన్నాధశర్మ ‘అరణి’ పేరిట అందించే అధ్బుత రచన ఇది .

ద్వాపరయుగం చివరి దశలో శ్రీ మహావిష్ణువు అంశతో జన్మించాడు కృష్ణద్వైపాయనుడు(వేదవ్యాసుడు),కలియుగంలో మానవులంతా అవినీతిపరులై , పాపాలే ప్రాణవాయువుగా జీవిస్తారని , ఆపదలకూ , అపార్ధాలకు లోనవుతారని ధ్యానయోగంలో గ్రహించి వారికి ధర్మస్వరూపాన్ని తెలియజెప్పేందుకు రాశిలా ఉన్న నాలుగు వేదాలను విభజించాడు.పంచమ వేదాన్ని(భారతం) సర్వవ్యాప్తం చేసేందుకు శిష్యులకు భోధించాడు. అయినా ఆయనను తీవ్ర మనోవ్యధ వెంటాడడంతో నారదమహర్షి ఆదేశానుసారం భాగవత రచన చేశాడు.పాండవ వంశజుడైన పరీక్షిన్మహారాజు శమీకమునిని అవమానించినందుకు అతడి కుమారుడు శృంగి శాపానికి గురవుతాడు. ఏడురోజుల్లో మరణం తధ్యమని విచారపడుతూ గంగానదిలో ప్రాయోపవిష్టుడై పరీక్షిత్తునకు మహాభాగవతాన్ని వినిపించాడు శుకమహర్షి. ప్రజలు కలియుగంలో ఎలాంటి పాపాత్ములై సంచరిస్తారో తెలియజేశాడు.కలియుగధర్మాన్ని చెప్పి బ్రహ్మోపదేశం చేశాడు.దీనినే నైమిశారణ్యంలో పద్దెనిమిదివేల శ్లోకాలలో శౌనకాదిమునులకు సూతుడు వినిపించాడు.ఆ విధంగా మహాభాగవతం మానవలోకంలో దశదిశలా వ్యాపించింది.ఈ భాగవతాన్ని ఎక్కడ పఠిస్తారో ఆ స్ధలం పుణ్యతీర్ధంతో సమానం.దీనిని విన్నవారు మోక్షపదం అందుకుంటారు.భాగవతం కంటే మోక్షదాయకమైనది మరోటిలేదు.

ఇలాంటి పురాణ విజ్ఞానాన్ని కొందరికే పరిమితం చేయడం , తరతమభేదాలకు అతీతంగా చదివించేందుకు అవకాశం కల్పించని కారణంగా మన సమాజం అనేక మనస్పర్ధలకూ, విభజనలకు దారి తీసింది.అలాంటి తప్పులకు పరిహారమే సార్వజనీనమైన జనభాష.తెలుగుభాషను పట్టిపట్టి చదువుకొనే కొత్తతరంవారు కూడా చదివి అర్ధం చేసుకోవడానికి,తద్వారా భాషా మాధుర్యాన్ని అనుభవించి భాషాభిమానాన్ని వృధ్ధి చేసుకోవడానికి కూడా తోడ్పడే రచన ఇది.

వ్యాసభాగవతాన్ని జనసామాన్యానికి చేరువ చేసేందుకు యాభైనాలుగు శీర్షికలు,ఉప శీర్షికలతో నవ్యలో అరణి(కలం పేరు) చేసిన ఈ రచనకు అనూహ్య స్పందన లభించింది.పాఠకదేవుళ్ళు వేలాది లేఖలతో నవ్య వారపత్రికను ముంచెత్తారు. ఆ స్పూర్తితో విస్తారమైన భక్తజనకోటిని అలరించేందుకు అమరావతీ ప్రచురణకర్తల చొరవతో అరణి భాగవతం ఇప్పుడు తిరిగి పుస్తకరూపంలో వెలువడింది. మనకు తెలియని ఎన్నో పాత్రలు , కథలు , వాటిని హృద్యంగా వివరించే సరళ వర్ణనలు ఇటు పిల్లలనూ అటు పెద్దలనూ వదలకుండా చదివింపజేస్తాయి.భాగవతోత్తముల కధలు , శ్రీ కృష్ణుని బాల్యక్రీడలు ,జరాసంధునితో బలరామకృష్ణుల యుధ్ధం , రుక్మిణీ కళ్యాణం సహా అష్టభార్యలతో వివాహాలు , శమంతకమణి కథ, శివకేశవుల యధ్ధం , పౌండ్రకవాసుదేవుని కథ , ధర్మరాజు రాజసూయం , శిశుపాలవధ , సుభద్రార్జునుల వివాహం , అర్జున గర్వభంగం , అవతార సమాప్తి వరకు ఇందులోని కథలన్నీ ప్రతిరోజు చదువుకొని తరించేవే ! పెద్దలతో పాటు ముఖ్యంగా పిల్లలకూ ఎంతగానో ఉపకరించే పుస్తకమిది.

నవ్య వారపత్రిక –  08/10/2014

 

Bhagavatam_15Oct2014_NavyaWeekly

 

 

“భాగవతం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

భాగవతం on kinige

 

Bhagavatam600

 

Related Posts:

సీమ “వేగు చుక్కలు”

భౌతికంగా చూస్తే రాయలసీమ రాళ్ళసీమలానే కనిపిస్తుంది కానీ,తాత్విక కోణం లోంచి ఇది రతనాలసీమ. పద్యం ఎంత లోతుగా , ఎంత బలంగా ఈ సీమలో వేళ్ళూనికొని పోయిందో , తత్వం అంతకన్నా ఎక్కువగా జనం నోట వినిపిస్తుంది. శృంగార , విలాస వస్తువై బ్రాహ్మణ పండితుల భుక్తిమార్గమై , రాజుల లోగిళ్ళలో దొర్లిపడిన పద్యమే , విచిత్రంగా అన్ని బంధాలను తెగతెంచుకొని ,రెక్కలు విచ్చుకొని ఊళ్ళలో,వాడల్లో తిరుగులాడిన దృశ్యమూ రాయలసీమలో కనిపిస్తుంది. పండిత గోష్ఠి లో రాగయుక్తంగా ధ్వనించి ఒకప్పుడు గండభేరుండాలను తొడిగించుకున్న పద్యమే , ఇప్పుడు ఊరి చివర ఎనుమును కోసి భాగాలేసే మాదిగల నోట కమ్మగా వినిపిస్తుంది.ఈ వైరుధ్యపు లోతుల్ని వెతికే పని సాహిత్యంలో ఇప్పటికీ బలంగా జరగలేదనే చెప్పాలి.అయితే ఈ వైరుధ్యపు తీరుతెన్నులను కళ్లకు కట్టినట్లుగా చెప్పే ప్రయత్నం మాత్రం వినోదిని ఇటీవల చేశారు .ఉద్యోగ రీత్యా కడపలో ఉన్న వినోదిని , కడప జిల్లాలో పుట్టి పెరిగిన ముగ్గురు వాగ్గేయకారుల సాహిత్యాన్ని సామాజిక కోణంలోంచి విశ్లేషించారు. ఈ ముగ్గురిలోని సారూప్యతలను పట్టుకున్నారు.తేడాలను గుర్తించారు. అన్నమయ్య ,వేమన, వీరబ్రహ్మం – ఈ ముగ్గురినీ కడప జిల్లా వాసులగానే భావిస్తారు. అన్నమయ్య 15వ శతాబ్దానికి చెందినవాడు , మిగిలిన ఇద్దరూ 17వ శతాబ్దానికి చెందినవారు. అన్నమయ్య బ్రాహ్మణకులంలో పుట్టినవాడు కాగా , వేమన శూద్రుడు, కాపు కులంలో పుట్టాడు . వీరబ్రహ్మం శ్రామిక కులంలో పుట్టిన శూద్ర బహుజనుడు. అయితే ముగ్గురూ , వారి కాలాల్లోని సమాజాన్ని లోతుగా చూసిన వాళ్ళు . ఈ పరిశీలన వీళ్ళలో అలజడిని రేపింది .అసమానతపై ఆగ్రహాన్ని కలిగించింది.లోలోపల జరిగిన ఘర్షణే ఈ ముగ్గురినీ కవులుగా మార్చింది.సమాజంలోని దుర్మార్గపు రీతులను చూసి కలిగిన వైరాగ్యం వీళ్లని తాత్వికులగా మార్చింది. పరిస్థితులని చూసి కలిగే వేదన , ప్రజలను చైతన్యపరిచే ప్రయత్నం ,తిరుగుబాటు తత్వం ఈ సీమ కవిత్రయంలో కనిపిస్తాయి.

అన్నమయ్య , వీరబ్రహ్మం లు దేవున్ని అడ్డం పెట్టుకొని సమాజంలోని కుళ్ళుని బయటపెడితే , వేమన ఏకంగా దేవుడినే కడిగేస్తాడు. దురదృష్టం ఏమంటే , ఈ ముగ్గురు మహాకవులనీ కులాలవారీగా పంచేసుకోవడం . దేవుళ్ళను విగ్రహాలుగా మార్చేసుకోవడం . 32వేల కీర్తనలు రాసిన అన్నమయ్యను తిరుమల తిరుపతి దేవస్థానం అద్భుతంగా జనంలోకి తీసుకువచ్చినా , అది కేవలం భక్తి కోణానికే పరిమితమయ్యింది.వేల కీర్తనల్లో జనం నోట పలికేది వందలే.వాటిల్లోనూ ఎక్కువ భక్తి పదాలే. కొద్దిగా భక్తి చాటున శృంగారమూ కనిపిస్తుంది. కానీ , అట్టడుగు వర్గాల బతుకుచిత్రాన్ని అన్నమయ్య పాటకట్టిన తీరు రావల్సినంతగా జనంలోకి రాలేదు . ‘అన్నమయ్య సామాజిక ధృక్పధం’ అనే శీర్షికతో వినోదిని రాసిన వ్యాసంలో ఆమె ఉదహరించిన పదాలను చూస్తే అన్నమయ్యని ఇంత మిస్సయ్యామా అనిపిస్తుంది.పోతులూరి వీరబ్రహ్మం విషయంలోనూ దారుణమైన అన్యాయము జరుగుతోందని అర్ధమవుతుంది.

గొప్ప సామాజికవేత్తను , ఒట్టి కాలజ్ఞానిగా పరిమితం చేస్తున్న తీరు భాధపెడుతుంది.వీరబ్రహ్మం మహత్యాలను ప్రచారం చేసినంతగా , ఆయన కవిత్వాన్ని జనంలోకి తీసుకెళ్ళడం లేదు . సామాజిక అసమానతలపై దేవుడి చాటునే అయినా , వీరబ్రహ్మం కవిత్వాన్నే ఆయుధంగా మలచుకొని పోరాడిన వైనాన్ని ‘ పోతులూరి వీరబ్రహ్మం’ అనే వ్యాసంలో వినోదిని వెల్లడిస్తారు. పై ఇద్దరిలా కాకుండా లోకరీతిని తప్పుపడుతూ ఎడాపెడా వాయించేసిన కవి వేమన. కుల వైషమ్యాలనీ , దేవుడి పేరిట సాగే దురాచారాలనీ వివక్షని వాడుక మాటల్లోనే దుయ్యబట్టిన వేమన ఇప్పటికీ జనం నాలుక మీద నిలిచిపోయాడు.దళితకోణం నుంచీ , స్త్రీల కోణం నుంచీ కూడా వినోదిని ఈ ముగ్గురు మహాకవుల సాహిత్యాన్ని పరిశీలించారనీ ఈ పుస్తకం చదివితే అర్ధమవుతుంది. వీరి సాహిత్యం మీద ఇంకా లోతైన అధ్యయనం జరగవలసిన అవసరాన్ని వినోదిని వేగుచుక్కలు’ గుర్తుచేస్తుంది.

– ఆర్.యం.ఉమామహేశ్వరరావు , ఆదివారం ఆంధ్రజ్యోతి , 22 జూన్ 2014 .

 

Andhrajyothi_22nd June 2014

 

“వేగు చుక్కలుడిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

వేగు చుక్కలు on kinige

 

Veguchukkalu600

Related Posts:

  • No Related Posts