శీలమా? అదియేమి?

అనామకుడు అనే కలంపేరుతో డా. ఎ. ఎస్. రామశాస్త్రి రాసిన కథా సంకలనం – “శీలమా? అదియేమి?“.

సిద్ధాంతాల మూసకట్టులోంచి కాకుండా విశాల జీవితానుభవం నుంచి వచ్చిన కథలివి. ఇందులోవి చాలా వరకు బహుమతి పొందిన కథలే. ఇందులో మొత్తం 21 కథలున్నాయి. కొన్ని కథల గురించి ప్రస్తావిస్తాను.

అనంతం: ఈ కథలోని ప్రధానపాత్ర రామ్మూర్తికి హఠాత్తుగా తను చచ్చిపోతాననే భయం పట్టుకుంటుంది. కొడుకు కోడలితోనూ, మనవడితోనూ, మిత్రబృందంతోనూ ఉల్లాసంగా ఉండలేక పోతాడు. ఎప్పుడూ అదే దిగులు….. మానసికంగా కృంగిపోతుంటాడు. భయాన్ని దూరం చేసుకోడానికి వీలైనంత సేపు సముద్రపుటొడ్డున కూర్చుంటుంటాడు. చివరికి, చావుకి భయపడేకన్నా, చచ్చిపోవడమే నయమని భావించి సముద్రంలోకి నడవబోతాడు. అప్పుడో పదహారేళ్ళ అమ్మాయి ఎదురై అతన్ని ఆపుతుంది….. జీవితం వైపు నడుపుతుంది. ఆసాంతం ఆసక్తిగా సాగిపోయిన ఈ కథలో సముద్రం గురించి, కెరటాల గురించి రాసిన వాక్యాలు చదువుతూంటే మనమూ సముద్రం ముందు బీచ్‍లో కూర్చున్నట్లుంది.

అసంపూర్ణం: ఇది ఇద్దరు బావామరదళ్ళ కథ. బావ (కథకుడు) బాగా చదువుకుని గొప్ప శాస్త్రవేత్త అవుతాడు. అతనికెంత సేపు విజ్ఞానం మీదే దృష్టి! ప్రకృతిని ఆస్వాదించేంత సమయమూ, ఆసక్తి, భావుకత లేవు. ఇందుకు భిన్నంగా, మరదలు శైలజ భావుకురాలు. ప్రకృతిని ఆస్వాదించలేని బావ స్వభావాన్ని అర్థం చేసుకున్న ఆమె అతనికి తనకి జోడీ సరిపోదని గ్రహించి అతనితో పెళ్ళికి నిరాకరిస్తుంది. ఇద్దరూ వేర్వేరు పెళ్ళిళ్ళు చేసుకుని తమ జీవితాలను గడుపుతూంటారు. కథకుడు తను ఎంచుకున్న రంగంలో ఎంతో కీర్తి ప్రతిష్టలు సాధిస్తాడు. అయినా అతనిలో ఏదో అసంతృప్తి. కొన్నేళ్ళ తర్వాత ఓ ఫంక్షన్‍లో బావామరదళ్ళు కలుస్తారు. మరదలితో తన బాధని వ్యక్తం చేస్తాడు. బదులుగా, మరదలు నవ్వుతుంది. ఆ నవ్వులో అతనికి ఎన్నో అర్థాలు గోచరిస్తాయి. మనుషులను అర్థం చేసుకోకబోతే, ఏం జరుగుతుందో ఈ కథ చెబుతుంది.

ఆరంభం: ఓ పౌరాణిక గాధ ఆధారంగా అల్లిన కథ ఇది. వసుదేవుడు కృష్ణుడిని రహస్యంగా రేపల్లెకి తీసుకురావడం గురించిన కథ. ఓ గడ్డపాయన బుట్టలో బాబుని పెట్టుకుని యమునానదిని దాటి రేపల్లె వస్తాడు. దార్లో ఎదురైన ఓ అవిటి బాలుడిని ఊరిపెద్ద ఇల్లెక్కడ అని అడుగుతాడు. కుంటి బాలుడు నందుడి ఇంటికి దారి చూపించడంతో పాటు, వర్షంలో బాబు తడవకుండా గొడుగు వేసి పట్టుకుంటాడు. ఆ తర్వాత ఇంటికి వెళ్ళిపోతాడు. తెల్లారి నిద్రలేచేసరికి అతని శారీరక వైకల్యం పోయి, కాలు బాగయిపోతుంది. దైవం లీలలని ఉద్దేశించి రాసిన కథ ఇది.

ఏ గాలెటు వీస్తుందో: ఓ ఆర్థికవేత్త కథ ఇది. దేశంలో వడ్డీరేట్లు తగ్గాలని, అప్పుడే మన దేశం ఆర్ధికంగా పురోగతి సాధిస్తుందని నమ్మే అతను, పెన్షన్ డబ్బులపై వచ్చే వడ్డీ సరిపోక ఇబ్బందులు పడుతున్న మావయ్య కుటుంబాన్ని చూడాడానికి వస్తాడు. తను చెప్పే సిద్ధాంతం వారి జీవితాన్ని క్రుంగదీస్తుందోని గ్రహిస్తాడు. మరి తన అభిప్రాయాన్ని మార్చుకున్నాడా, లేదా? చిన్నప్పుడు తనకి సాయం తన వృద్ధికి దోహదం చేసిన మావయ్యకి ఇప్పుడతను ఏమైనా చేయగలిగాడా? ఆర్ధికవేత్త దృక్పథానికి, సామాన్య మధ్యతరగతి మహిళ దృక్కోణానికి మధ్య ఉండే వైరుధ్యాన్ని ఈ కథ చక్కగా వ్యక్తీకరించింది.

ఓ అజ్ఞానం లోంచి: ఇది ఓ పాత్రికేయుడి కథ. ఒక రచయిత గురించిన కథ. రెండు సుప్రసిద్ధ నవలలు రాసి, ఆ తరువాత విరమించి ప్రపంచానికి దూరంగా ఏకాంతంగా గడుపుతున్న ఆ రచయితని ఇంటర్వ్యూ చేసి ఓ వ్యాసం రాయలనేది విలేఖరి ఉద్దేశం. ఆ రచయిత ఎవరు? ఆ విలేఖరి సంకల్పం నెరవేరిందా?

ఓ వందనోటు కథ: డబ్బు నల్లధనంగా ఎలా మారుతుందో సోదాహరణంగా తెలియజేసిన కథ ఇది. “నల్ల ధనం నిరోధించడం ప్రభుత్వం, బ్యాంకులు చేసేపని కాదు. నల్లధనం ఉండకుండా ఉండాలంటే కరెన్సీ నోట్లను కాదు తెలుపు చేయాల్సింది….. మన మనస్సులను..” అంటుందీ కథ.

క్రైం 2000: ఇంటర్‍నెట్ ఆధారంగా చేసే సైబర్ నేరాలను ప్రస్తావిస్తూ, బ్యాంకు దొంగతనం సులువుగా ఎలా చేయచ్చో ఓ కుర్రాడు నిరూపిస్తాడు. అయితే మరో కుర్రాడు అంతే తెలివిగా ఈ నేరాన్ని నిరూపించి పోలీసులకు సాయం చేస్తాడు. సైబర్ నేరాలు పెరిగిపోతున్న ఈ కాలంలో ప్రతీ ఒక్కరు ఎంత అప్రమత్తత ఉండాలో ఈ కథ చెబుతుంది.

గూళ్ళు: విపరీతంగా పెరిగిపోతున్న అపార్టుమెంట్ సంస్కృతిలో, ఓ ఫ్లాట్‍లో ఉంటున్న ఓ యువజంట కథ ఇది. వారు ఎదుర్కుంటున్న సమస్యలు, వారి జీవితం ఎలా సాగుతోందీ, మార్పు కోసం ఏం చేయాలనుకున్నారు… ఇలా ఈ కథ ఆసక్తిగా సాగుతుంది. ఈ కథలోని చాలా సంఘటనలు మన అందరి జీవితాలలోనూ తారసపడేవే.

తెరవెనుక: ఇదో చక్కని కథ. మనిషికి తప్పు చేయాలనే ఆలోచన ఎందుకు కలుగుతుంది? తప్పు అనే భావన ఆలోచనలో ఉంటుందా? ఆచరణలో ఉంటుందా? వ్యక్తిగతంగా మనుషులకి ఉండే పిరికితనమే సమాజానికి లాభదాయకమా? ఇలా ఎన్నో ప్రశ్నలతో ఆలోజింపజేస్తుందీ కథ.

మీ: స్వర్గస్తుడైన తండ్రికి ఉత్తరం రూపంలో నివాళి అర్పించిన కొడుకు కథ ఇది. మనసు ఆర్ద్రమైపోతుంది ఈ కథ చదివాక.

మెరీనా…మెరీనా: ” ఏదో వస్తుంది… ఇంకేదో పోతుంది. ఓ దశ నుంచి ఇంకో దశకి ఎదగడం…. ఇదే జీవితం” అని ఈ కథ చెబుతుంది. స్వేచ్ఛలోనే ఆనందం ఉందనుకునే వ్యక్తి, బాధ్యతలోనూ ఆనందం ఉందని తెలుసుకుంటాడీ కథలో.

విముక్తి: మరణానికి దగ్గరగా ఉండి, ఇంకా మృత్యుఘడియలు సమీపించని వయోవృద్ధులుండే కుటుంబాలు ఎదుర్కునే సమస్యల గురించిన కథ ఇది. మనుషుల అవసరాలు, మనస్తత్వాలు బంధాలను ఎలా నిర్దేశిస్తాయో ఈ కథ చెబుతుంది. నిడివి ఎక్కువైనా చివరిదాకా ఆసక్తిగా చదివిస్తుంది.

శీలమా? అదియేమి?: శీర్షికలోనే కథ ఏమిటో చెప్పేసే కథ ఇది. శీలమంటే ఏమిటో విశ్లేషించారు రచయిత ఈ కథలో. ప్రగతి అంటే బాహ్యాలంకరణ కాదని, ఆలోచనల్లోనూ, ఆచరణలోనూ పురోగతి కావాలని రచయిత అంటారు. ఈ కథలో రచయిత విశ్వనాధ సత్యనారాయణగారి వాడుక భాష వంటి గ్రాంథిక భాషను ఉపయోగించే శైలిని వాడడానికి రచయిత ప్రయత్నించారు.

రచన శైలి ఆహ్లాదంగా ఉంటూ, ఆసాంతం హాయిగా చదివించే గుణం కలిగిన ఈ కథలు చదువరులలో ఆలోచనలు రేకెత్తిస్తాయి. మంచి కథలని చదివిన తృప్తి పాఠకులకు కలుగుతుంది. ఈ పుస్తకం ఇప్పుడు డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్ నొక్కండి.

శీలమా ? అది యేమి? On Kinige

కొల్లూరి సోమ శంకర్

Related Posts:

3 thoughts on “శీలమా? అదియేమి?

  1. రంగనాయకమ్మ గారి కేపిటల్ పుస్తకం, రా వి శాస్త్రి గారి ఆరు సారాకథలు మొద|| మీదగ్గర ఉన్నాయా? ఇక తమిళ రాజకీయాల మీద ప్రసాద్ గారు రాసిన వ్యాసాలను మీ కినిగే లో చూశాను. అవి పుర్తి సంకంకలన మా? లేక కొన్ని బాగాలా. కారణం గ్రేట్ ఆంధ్ర వెబ్ సైట్ లో ఆ వ్యాసపరమపర ఇంకా వస్తునే ఉన్నాది. టపాకు సంబందం లేని ప్రశ్నలు అడుగుతున్నాను. దయచేసి జవాబులు ఇవ్వగలరు.

  2. Sriram,

    కేపిటల్, ఆరు సారా కథలు ప్రస్తుతం కినిగెలో అందుబాటులో లేవు.
    తమిళ రాజకీయాలమీద వచ్చిన వ్యాసాలలో ఇది కేవలం తొలి భాగం మాత్రమే. తరువాతి బాగాలు త్వరలో వస్తాయి.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>