వామపక్ష పోరాట క్రమం… “కామ్రేడ్ మాకినేని బసవపున్నయ్య-నా జ్ఞాపకాలు” పుస్తకంపై సమీక్ష

కామ్రేడ్ మాకినేని బసవపున్నయ్యగారి జీవితం ఒక ఉద్యమం. ఉద్యమమే వారి జీవితం. కామ్రేడ్ ఎంబీగా చిరపరిచితమైన బసవపున్నయ్యగారి జీవితాన్ని, భారతదేశ కమ్యూనిస్టు ఉద్యమాన్ని వేరువేరుగా చూడడం చాలా కష్టం. అసాధ్యం కూడా. భారతదేశ కమ్యూనిస్టు ఉద్యమంతో అంతగా మమేకమైన జీవితం బసవపున్నయ్యగారిది. వారి జీవిత ప్రస్థానం ఎలా మొదలైంది. బాల్యం ఎలా గడిచింది, విద్యార్థి జీవితాన్ని ఎలా గడిపారు. విద్యార్థి లోకానికి ఎలా నాయకత్వం వహించారు అనే దానితో ప్రారంభమై.. రాటుదేలిన కమ్యూనిస్టు నాయకుడిగా ఎలా ఎదిగారు, ఎలాంటి పోరాటాల్లో పాల్గొన్నారు అనేవరకు అనేక విషయాలు ఈ పుస్తకంలో వున్నాయి. స్వాతంత్య్రానికి పూర్వం కమ్యూనిస్టుపార్టీ నిర్వహించిన పోరాటాలు, రూపొందించుకున్న కార్యాచరణలు, ఎత్తుగడలు ఎలాంటివో ఈ పుస్తకం చదివి తెలుసుకోవచ్చు. తెలంగాణ సాయుధ పోరాటంలో పార్టీ అనుసరించిన వ్యూహాలు, ఎత్తుగడలు, వాటికి కారణాలు తెలుసుకోవచ్చు. మహాత్మాగాంధీ, సుభాష్ చంద్రబోస్‌ల పట్ల పార్టీవైఖరి, అలాగే ఎన్.జి.రంగా లాంటి నాయకుల పట్ల వైఖరి ఏమిటి? ఆ వైఖరికి కారణాలు ఏమిటి? లాంటి రాజకీయ అంశాలనే కాదు.. కామ్రేడ్ ఎంబీ జీవిత కాలంలోని సామాజిక పరిణామాలను కూడా ఈ పుస్తకం ద్వారా అర్థంచేసుకోవచ్చు. కామ్రేడ్ సీతారాం ఏచూరి మాటల్లో చెప్పాలంటే.. స్వాతంత్య్ర ఉద్యమంలోను, ఆ తరువాత కాలంలోనూ కమ్యూనిస్టు ఉద్యమప్రాభవం, దాని బలహీనతలను వివరించే పుస్తకం ఇది. ఇది ఏకబిగిన రచించిన పుస్తకం కాదు. కామ్రేడ్ బసవపున్నయ్యగారు వివిధ సందర్భాలలో ఇచ్చిన ఇంటర్వ్యూలలో వెలిబుచ్చిన అభిప్రాయాలను ఒక క్రమపద్ధతిలో కూర్చి రూపొందించిన పుస్తకం. ఇది కామ్రేడ్ బసవపున్నయ్యగారి జీవిత చరిత్రకాదు. ఆయన జీవితకాలంలోని రాజకీయ చరిత్ర. ఆయన జీవిత కాలంలోని సామాజిక చరిత్ర. ఆయన జీవితకాలంలోని కమ్యూనిస్టు చరిత్ర.

– వాసిరెడ్డి , ఆంధ్రభూమి – అక్షర , 25-4-2015.

నా జ్ఞాపకాలు” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

నా జ్ఞాపకాలు on kinige

NaaGnapakaaluPSBH600

 

Related Posts:

ఆప్తవాక్యాలతో కర్తవ్య బోధ – “మంచిమాట- మంచిబాట” పుస్తకంపై సమీక్ష

 

ఇఫ్పటి పిల్లలు తల్లిదండ్రుల మాట వినకుండా పోతున్నారని, ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే మరో వ్యాసం ఆలోచింపజేస్తుంది.

ఆంధ్రభూమి, వనితాజ్యోతి, వండర్ వరల్డ్, ఆంధ్రప్రభ మొదలైన పత్రికల్లో ప్రచురింపబడిన వ్యాసాలలోని కొన్ని వ్యాసాలను మంచిమాట- మంచిబాట అనే పేరుతో సి.ఉమాదేవి వ్యాస సంకల్పం చేశారు. నేటి సమాజంలో మన చుట్టూ- జరుగుతున్న సంఘటనలు, మానవ మనస్తత్వాలు, జీవన విధానం, సంస్కృతికి సంబంధించిన వ్యా సాలు మనకు ఇందులో కనిపిస్తాయి. మన స్నేహితులతో మాట్లాడేటప్పుడు చెప్పే విషయాల్లా అనిపిస్తాయి. రచన సరళమైన శైలిలో వుంది. పిల్లలకు, పెద్దలకు అవసరమైన మంచి మాటలున్నాయి. మంచి మాటలను చెప్పి వదిలివేయలేదు. కొన్ని సందర్భాల్లో వాటిని తప్పకుండా ఆచరించాల్సిన అవసరాన్ని కూడా నొక్కిచెప్పారు. అరువుసొమ్ము బరువుచేటు, ఫాల్స్‌ప్రెస్టేజీతో ఇబ్బందులు తప్పవు, పటిష్టమైన కుటుంబం అవసరం, పెళ్ళిళ్ళల్లో వృధావ్యయం వ్యర్థం అనే నీతులను ఈ వ్యాసాలు బోధిస్తాయి. వృద్ధులంటే వయస్సు వృద్ధిచేసుకున్నవారు కాదు. పిల్లలను అభివృద్ధిపథంలోకి నడిపిన వారనడం, ప్రతి బిడ్డా ఒక పరిపూర్ణ వ్యక్తిగా రూపుదిద్దుకుంటేనే దేశానికి ఉన్నత పౌరులు తయారవగలరు, ప్రేమ అనేది రక్షణనివ్వగలగాలి, అనే వాక్యాల ద్వారా సందేశాన్ని అందించారు. మనల్నిబట్టే మన పిల్లలలో తల్లిదండ్రులు నిజాయితీగా వ్యవహరించాల్సిన ఆవశ్యకతను చెబుతారు. మానవత్వం, మృదుభాషణం అవసరమంటారు. ఒడినుండి బడికి లాంటివి సలహాలను, ధైర్యాన్నీ ఇస్తాయి. ర్యాగింగ్‌ను అరికట్టడం, డ్రైవింగ్‌లో మెళకువలు, వంట చేయడంలో జాగ్రత్తలు, పొదుపు ఆవశ్యకత మొదలైనవి నేటి సమాజానికి ఉపకరిస్తాయి. తెలుగులో మాట్లాడితే శిక్షలు వేస్తున్న నేటి పాఠశాల యాజమాన్యాల తీరును విమర్శించారు. సంబరాన్ని పెంచే పండుగలు వ్యాసంలో పండుగ వాతావరణాన్ని వర్ణిస్తే అరకులోయలో ప్రకృతి వర్ణన చేశారు. వర్క్‌హాలిక్‌గా వుండకుండా మనస్సును విశ్రాంతి వైపు మళ్ళించాలి, జీవించే కళను నేర్చుకుని వదిలివేయడం కాదు ఆచరించాలి. నెగెటివ్ థింకింగ్‌తో కుంచించుకుపోతున్న విజయావకాశాలు మొదలైనవి ఆత్మవిశ్వాసాన్ని పెంపొందిస్తాయి. పసి పిల్లలపై భారం మోపి వారిని వత్తిడికి గురిచేయవద్దంటారు. పిల్లలకు తల్లులే మంచి కౌన్సిలర్స్ అని చెప్పి పరీక్షల సమయంలో వారికి కల్పించాల్సిన సౌకర్యాలు, తల్లిదండ్రులు తీసుకోవలసిన చర్యలను వివరించారు. పిల్లలను బడికి పంపించేటప్పుడు తీసుకోవాల్సిన జాగ్రత్తలు తెలిపారు. ఇప్పటి పిల్లలు తల్లిదండ్రుల మాట వినకుండా పోతున్నారని , ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ?.. వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే వ్యాసం స్ర్తిలు వంటచేస్తేనే వారికీ, ఇంట్లోని వారికీ తృప్తికలుగుతుందని వంటను తంటాగా కాకుండా బాధ్యతగా చేయాలన్న భావాన్ని స్ఫురింపజేశారు. ఇంటిని తీర్చిదిద్దుకోవడంలోనే నేర్పు చూపించాలన్నారు. హోదాలు, సంపాదనలో వ్యత్యాసాలు, అధికారం చెలాయించడం లాంటివి దాంపత్య జీవితానికి ఆటంకం కలిగించే అంశాలని, చూడముచ్చటగా అన్యోన్యంగావుండే ఆదర్శదాంపత్యం అవసరమని, జీతాలు కాదు జీవితాలు పంచుకోవాలంటారు. ప్రేమకంటే సిన్సియారిటీ ముఖ్యమంటారు. ఈ రకంగా మనసున మనసై వ్యాసం హితవును బోధిస్తుంది. ఈ రకంగా ఈ పుస్తకం మంచిమాటను చెబుతూ మంచి బాటను చూపిస్తుంది.

-కె.లక్ష్మీఅన్నపూర్ణ, ఆంధ్రభూమి-అక్షర, 27/09/2014.

 

మంచిమాట- మంచిబాట” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మంచిమాట- మంచిబాట on kinige

ManchiMataManchiBata600

 

 

 

 

Related Posts:

‘గెలుపు తీరాని’కి ఇలా..’ఎక్స్‌లెన్స్ సాధించండి’ పుస్తకంపై సమీక్ష

ఇది చదివితే నాకేమిటి ప్రయోజనం..?’ – ఇప్పుడు పాఠకుడు పుస్తకాన్ని పట్టుకునే ముందు మనసులో వేసుకునే ప్రశ్న ఇది. ‘మీ జీవితం ఎక్స్‌లెంట్‌గా ఉంటుంది’ -అని చెబుతాయి వ్యక్తిత్వ వికాసానికి సంబంధించిన పుస్తకాలు. ఆ కోవలోనిదే కొండా చంద్రారెడ్డి రచించిన ఎక్స్‌లెన్స్ సాధించండి… ఆశించిన ఫలితాలు సాధిస్తూ జీవితాన్ని అద్భుతం మలుచుకోండి- అనే టైటిల్‌తో వచ్చిన పుస్తకం. ప్రతి వ్యక్తి జీవితంలో ఉన్నతిని, సుఖ సంతోషాలను కోరుకుంటాడు. వాటిని సాధించుకోవడానికి క్రమ పద్దతిలో అనుసరించాల్సిన వ్యూహం గురించి రచయిత వివరించారు. విద్యార్థులకైతే పరీక్షల్లో మంచి మార్కులు, మంచి ర్యాంకుతో మంచి కాలేజీలో సీటు, మంచి కంపెనీలో ఉద్యోగం, మంచి కేరీర్ ఇదీ నేటి యువత లక్ష్యాలు. నెగిటివ్ ఆలోచనల గురించి చక్కని విషయాలు ఉదహరించారు. ‘నేను అలా చేయకుండా ఉండాల్సింది, నా ముఖం నాకే నచ్చలేదు, ఈ పని నా వల్ల కాదు’ -అంటూ నిరంతరం నెగిటివ్ ఆలోచనల్లో మునిగి పో వడం వల్ల ఎలాంటి ప్రయోజనం ఉండదని, నిజంగానే వాటిని చేయలేని స్థితికి చేరుకుంటామని, మనిషి తన ఆలోచనలకు తగినట్టుగానే ఉంటాడని రచయిత వివరించారు. విజయం సాధించడానికి, ఉన్నత స్థితికి చేరుకోవడానికి పుస్తకంలో మార్గాలు చెప్పడంతోనే సరిపుచ్చుకోలేదు. ఒకసారి చదివి పక్కన పెట్టేయకుండా ఆచరించడానికి వీలుగా పుస్తకం చివరలో అనుబంధంగా ఎక్సర్‌సైజ్ బుక్ కూడా జత చేశారు. సాధారణంగా వ్యక్తిత్వ వికాస పుస్తకాల్లో చెప్పే అంశాలు ఒకే రకంగా ఉంటాయి. ఉదాహరణలు ఆసక్తి కలిగిస్తాయి. తాను చెప్పదలుచుకున్న అంశానికి రచయిత మంచి ఉదాహరణలు ఎంపిక చేసుకున్నారు.

-బి.ఎం, అక్షర, ఆంధ్రప్రభ, 26/07/2014

***

ఎక్స్‌లెన్స్ సాధించండి”పుస్తకం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

ఎక్స్‌లెన్స్ సాధించండి on kinige

Related Posts:

సమకాలీన సమస్యలపై వ్యంగ్యాస్త్రాలు – “కింగ్ మేకర్” పుస్తకంపై సమీక్ష

ప్రజల అభ్యున్నతికై మేధోమధనానంతరం ఏర్పడేవి సిద్ధాంతాలు. అవి ఓ రోజులోనో ఓ పూటలోనో ఏర్పడినవి కావు. అయితే సిద్ధాంత గ్రంథాలు ప్రజల గురించే వ్రాసినవైనా కొన్ని మేధావులకే అందేవి, కొన్ని సామాన్యులకు అందే విధంగానూ వుండడం లేకపోలేదు. అయితే రెండింటి అవసరమూ ఏకోన్ముఖమూ ప్రజాదృష్టే.
సిద్ధాంత భూమికల నుండి కళారూపాలుగా వివిధ సాహిత్యప్రక్రియలుగా వచ్చేవి మరింతగా ప్రజల్ని చేరతాయి. వ్యంగ్య రచనలు అలా చేరేవి. అలా చేర్చగలిగే దమ్మున్న శక్తిమంతుల్లో ఈనాటి వ్రేళ్ళలెక్కలో సతీష్‌చందర్ ముఖ్యులు. ఇందుకు అక్షరసాక్షి ఈ ప్రజారాజకీయ వ్యంగ్య రచనల కింగ్‌మేకర్ ఇవి ‘సిద్ధాంత రహస్య’ రచనలు.
రెండు మూడు పుటల్ని మించని రచనలు. ఒక్కొక్క సమకాలీన ప్రజాసమస్య ఒక్కో వ్యంగ్య కథానికను చెప్పినట్లుగా చెప్పడం. పాఠకుల భుజాలపై చేయివేసి తన మార్గానికి తీసికెడుతూ ఎన్నో కబుర్లు చెబుతారు. అవి ప్రజాసమస్యల ‘వాకబుర్లు’ అందులో పాలకుల్ని ఎండగట్టరు. ‘మండుటెండ గడతారు’. పాలకుల పట్ల ప్రజాకర్తవ్యాల చెకింగ్ మేకరవుతారు. ‘సర్వేజనా దుఃఖినోభవతు’, ‘ఎవరిని ఎన్నుకున్నా అదే తన్ను’,‘ఒక ఎత్తిపొడుపు కథ’, ‘నేర సారాలు’, ‘రాజ్యము’ చోరభోజ్యము, మగని చేతి విల్లు మగువల బిల్లు- వంటి రచనల్లో శీర్షికా పద చమత్కారాలే కాదు లోపలి రచనల్లో ఎన్నో పెదవి విరుపులకు అవకాశమివ్వని పదాల విరుపులు కథనాంశాలు వ్యంగ్య మర్యాదల్ని గుర్తుచేస్తాయి. అంబేద్కరు గ్రంథాల్ని చదివితే, ఒక మానవుడిగా ఆలోచిస్తే మన కళ్లల్లో మార్పులు వస్తాయి. సతీష్‌చందర్‌గారి ఈ వ్యంగ్య రచనలు చదివితే మన కళ్ళల్లో మార్పులు వస్తాయి.
కొండొకచో కళ్ళల్లో తడి నిండుతుంది, లేదా కళ్ళు ఎర్రబడతాయి. ఫలితంగా చూపు(విజన్) రూపుమారుతుంది. ఎదిరించలేని తత్త్వం మనకుంటే మనపై మనకే జాలికలుగుతుంది. లేదా వీరులపై కర్తవ్యోన్ముఖులమైనా అవతాం. నలభైఆరు రచనల వ్యంగ్య బాణాలు-ప్రజాస్వామ్యం, మతతత్త్వ రాజకీయం, ఆర్థికం, కులాధిపత్యం, మహిళల అణచివేత, విద్యారంగం, వామపక్షాలు, మీడియా, పౌరహక్కులు అనే తొమ్మిది పొదుల్లో ఉన్నాయి..
పంచమవేదం, పసుపు జాబిలి వంటి కవితా సంపుటాల కవిగా, పత్రికా సంపాదకునిగా, విశ్వవిద్యాలయాల్లో పాఠ్యాంశాలైన రచనలు చేసిన ప్రసిద్ధునిగా సీరియస్ కథారచయితగా, వెల్చేరు నారాయణరావు వంటి వారిచే ప్రశంసలు పొందినవారిగా సతీష్‌చందర్ సుప్రసిద్ధులు. ఈ కింగ్‌మేకర్‌లోని రచనలు ఆంధ్రప్రభలో ధారావాహికగా వచ్చినవి. కర్నూలు జిల్లా ప్యాపిలిలో వాడలో వినాయకుని పూజించుకున్నారు. ఆ వినాయకుని నిమజ్జనానికి వాడకి దూరంగాఉన్న వూరివారు ససేమిరా అంగీకరించలేదు.
ఆ సమస్యపై సతీష్‌చందర్ రాసిన ఇందులోని ‘‘అవాస్తవా’్ధన రేఖ’’ అనే రచన చదివితే సమాజం ఎక్కడికి పోతోంది అనే వాస్తవ ఆవేదన కలుగుతుంది.
అందులోని కొన్ని వాక్యాలు:
‘‘అమాయక వినాయకుడు ఊరి భక్తుల మాట వినకుండా వాడలో పూజలందుకున్నాడు. దాంతో ఆయన కూడా అస్పృశ్యుడయిపోయాడు. ఊరికి దూరమైన దళిత వినాయకుడయ్యాడు. ఆయన్ని నిమజ్జనానికి పోనివ్వమన్నది వూరు.
భారతదేశానికి, పాకిస్తాన్‌కి మధ్య లేదా భారతదేశానికీ బంగ్లాదేశ్‌కి మధ్య ఎలాంటి సరిహద్దురేఖ వుంటుందో ఊరికీ, వాడకీమధ్య ఓ సరిహద్దురేఖ వుంటుంది.
అది కులం గీసిన ‘అవాస్తవధీన రేఖ’…
వినాయకుడూ అస్పృశ్యుడయ్యాడు. ఆయన నిమజ్జనానికి పోనివ్వమన్నది వూరు. పోయినా వూరు మధ్యనుంచి వెళ్ళకూడదన్నది. ఇది తప్పన్న ఒకటి రెండు అగ్రవర్ణాల కుటుంబాలను వూరివారు తరిమికొట్టారు.
ఊరి తీరే అలాగుంటుంది. భూమి గుండ్రంగా ఉంటుందేమో కాని ఊరెప్పుడూ బల్లపరుపుగానే వుంటుంది. చతురస్రాకారంలోనే వుంటుంది’ అంటారు.
ఇది చదివినప్పుడు హిందువుగా ‘వ్యాకులం’ చెందుతాం.
మానవునిగా హృదయాన్ని కల్లోల పరచుకుంటాం. ఊరు చతురస్రాకారంలో వుంటుందనడంలో చాతుర్వర్ణ ఆకారమని ధ్వని.
ఊరూ, వాడా ఏకంకాని విషయాన్ని ఆయన ఇంకా ఎలా అభివర్ణిస్తారో గమనిద్దాం.
వినాయకుని పూజించిన వాడ వారి వేదనను చెబుతూ…
‘‘మీరే మతస్తులు అంటే? హిందువులని చెప్పుకోవచ్చా? అలా చెబితే స్వామి వివేకానంద వూరుకోవచ్చు. లేదా కామకోటి పీఠాధిపతి ఊరుకోవచ్చు. కాని ఊరు ఊరుకోదు’’ అంటారు.
ఇందులోనే వుంది సతీష్‌చందర్‌గారి శాస్ర్తియ విశే్ల్లషణా నైపుణ్యం. కేవలం కొందరు వ్యక్తులపై ఆయన వ్యంగ్యబాణ ప్రయోగం చెయ్యరు. సమూలంగా మారి తీరవలసిన వ్యవస్థపై గురిపెడతారు. ఆ గురి నలుగురి మెచ్చు పొందేలా వుంటుంది. రేఖామాత్రంగా సతీష్‌చందర్ వ్యంగ్య తీక్షణతను తెలపడానికే ఈ ‘అవాస్తవాధీన రేఖ’ వాక్యాల ఉటంకింపు.
ఈ రచయిత విలేఖరిగా, సంపాదకునిగా, ప్రసిద్ధ పత్రికల కాలమిస్టుగా పేరున్నవారు. అయితే ఆయన పత్రికల పక్షాన ఏమైనా రచనాసమరం సాగించారా? అంటే సాగించారని ఈ పుస్తకంలో గారడియా (మీడియా) శీర్షిక క్రింద ‘పాలకులూ పాఠకులే’ అన్న రచన నిలచి చెబుతుంది. పత్రికల లేక మీడియా గొంతు నొక్కాలని, అప్రజాస్వామికంగా భావించే ప్రజాస్వామిక రాజులకు మాటల కొరడాల రుచులు చూపిస్తారు.
‘పాలకులు కూడా పత్రికల్ని ప్రశ్నించవచ్చు. కానీ కొమ్ములొచ్చిన పాలకులుగాకాక సాధారణ పాలకులు గానే. కానీ ఆ ఇంగిత జ్ఞానాన్ని ఎందుకనో అప్పుడప్పుడు పాలకులు కోల్పోతూంటారు.
తాము యింటింటికీ వెళ్ళి జోలిపట్టి, రెండుచేతులూ జోడించి, వీలుంటే సాష్టాంగపడి, దీనాతిదీనంగా బిచ్చమెత్తగా, వచ్చిన ఓట్లతో పాలకులయ్యామన్న స్పృహ కోల్పోయినప్పుడల్లా పాతకాలం మహారాజులవుతారని అంటూ, నాటి రాజసభల్లో వార్తాహరుడు వచ్చి జయంజయం అంటూ మన యువరాజాగారు యుద్ధంలో శత్రువుల్ని కూరగాయలు తరిగినట్లు తరుగుతున్నారంటే వజ్రాల హారాలు ఇచ్చే వారని అదే వార్తాహరుడు తర్వాత వచ్చి ‘‘మన్నించాలి. యుద్ధంలో శత్రువుల వీర ఉతుకుడికి మన యువరాజాగారే వీరోచితంగా చతికాలబడ్డారనే సత్యవార్తను చెప్పగానే ఈ వార్తాహరుణ్ణి ఖండఖండాలుగా తరిగి కాకులకూ గద్దలకూ వేయండి అనే వారని అలాంటి వార్తాహరుల వంటి పత్రికలు కావు నేటివి అన్నారు. పత్రికలపై ఇప్పటి పాలకులు- నచ్చినప్పుడు వజ్రాలహారాల వంటివి విసరబోతారని నచ్చకపోతే పత్రికలపై కత్తులూ కటారులూ ఝుళిపించబోతారని అంటారు.
పత్రికలంటే- తుమ్మితే వూడిపోయే తక్కువ సర్కారులు కావంటారు. ప్రజలిచ్చిన స్వేచ్ఛే ప్రాణవాయువుగాసాగే పత్రికలపై పాలకుల దుస్సాహసాలకు శృంగభంగం తప్పదంటారు.
ప్రతి మనిషికీ స్వరపేటిక ఉంటుంది. శ్రీ సతీష్‌చందర్‌గారిది దుష్టపాలక దుష్టసమాజాల పట్ల సంపూర్ణ్ధిక్కార స్వరపేటిక అని కింగ్‌మేకర్ తర్కబద్ధంగా చెబుతుంది.

- సన్నిధానం నరసింహశర్మ, అక్షర, ఆంధ్రభూమి, 5th జూలై 2014

 

 

 

 

 

 

 

 

కింగ్‌మేకర్”నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

కింగ్‌మేకర్ on kinige

 

Related Posts:

సున్నితమైన పోహళింపు ‘జూకామల్లి’

ఎంత చేయి తిరిగిన రచయిత్రి (త్రు)లయినా కథలుగా కొన్ని ఇతివృత్తాలను ఎన్నుకోవడానికి వెనుకాడతారు. మరీ ముఖ్యంగా సామాజికమైన ప్రచారాంశాలుగా వుండే వాటి జోలికి పోదలుచుకోరు. అందులో సృజనాత్మకత లేదని కొందరి భావన అయితే ఆ అంశాలకు ప్రచారకులుగా తమపై ముద్రపడుతుందేమోనని కొందరి జంకు. కానీ నిజానికి ప్రతిభామతి అయిన రచయిత (త్రి) ఎలాంటి ఇతివృత్తాన్ని ఎన్నుకున్నా పఠితలో ప్రభావోపేతంగా దానిని కథనం చేయవచ్చు. నిజానికి రచయితగా సమాజహిత చింతనతో అలాంటి అవసర విషయాల పట్ల పఠితను ఆలోచనాత్మకంగా చేసి ఆచరణ శీలిని చేయడం బాధ్యత కూడాను.
మునుపు ‘మనసున మనసై’ కథా సంపుటితో జ్యేష్ఠ లిటరరీ అవార్డును కూడా అందుకున్న ఉత్తమ కథారచయిత్రి డాక్టర్ కె.బి.లక్ష్మి ఇటీవలే వెలువరించిన ఇరవై ఒక్క కథల సరికొత్త సంపుటి జూకామల్లి. అనుభూతి గాఢత, కవితాత్మకత, రమణీయశైలి గల కె.బి.లక్ష్మి ఈ కథల సంపుటిలోని కొన్ని కథల ద్వారా సమాజం పట్ల బాధ్యతగల రచయిత్రిగా కూడా తనను తాను నిరూపించుకుంటోంది. ఇది ఆహ్వానించదగిన పరిణామం. ఎందుకంటే ‘కాంతా సమ్మిత తయోపదేశయుజే’ అని కావ్యప్రయోజనాన్ని ప్రాచీనులు నిర్దేశించినట్లు- ఎవరు ఎలా చెబితే నలుగురూ వింటారో, చెప్పిన మంచిని అనుష్ఠిస్తారో అలా చెప్పగల కమనీయ కథనశైలి కె.బి.లక్ష్మిలో పుష్కలంగా వుంది.
‘జూకామల్లి’ అని సంకలనానికి పేరుండడంలోనే మంచి విజ్ఞత కనబడుతుంది. నిజానికి జూకా అంటే చెవులకు స్ర్తిలు పెట్టుకునే ఒక నగ. మల్లి అంటే సౌరభాలు వెదజల్లే పుష్పం. అలంకారం ఏదయినా అలంకారం కోసం కాక నలుగురికీ పరీమళాలు అందించే ప్రయోజనశీలమైనప్పుడే సార్థకత అని ధ్వనింపచేశారు. జూకామల్లి అంటే నిజానికి ఒక రకం మల్లెపూవే! అది వ్రేలాడే అందమే కాదు పరీమళ పరివ్యాప్తి కూడాను. రచయిత్రియే అన్నట్లు ఊహలు తక్కువ. చాలావరకు జీవితాను భవంలోనుంచి వచ్చిన వాస్తవాలే. అత్యల్పంగా అనిపించే వాటినే విలక్షణంగా, హత్తుకునే రీతి సందేశ సంభరితంగా, అందరికీ పరిచితిలోని సినిమా పాటల మాటల ఔచిత్యప్రయోగ మధురిమలతో, సంసార సరాగాల సంభాషణలతో శృంగార హాస్యాల సున్నితమైన పోహళింపులతో చెప్పడం లక్ష్మీ కథన కళ.
ఈ సంకలనంలోని మొదటి కథ జనని. వీరేశం, సావిత్రిల అపురూప పుత్రిక జనని. వీరేశానికి కూతురంటే ప్రాణం. అతని బావమరిది సదాశివకు చెల్లెలు సావిత్రి అంటే ప్రాణం. సదాశివ కోరిక మీద జనని అయిదో పుట్టినరోజు వేడుకలు అతని ఊళ్లో జరిపించారు వీరేశం దంపతులు. వీరేశం ఆరోగ్యంకోసం మొక్కుకున్న సావిత్రిని జనని తమ దగ్గర వదిలి సిరిపురం గుడికి వెళ్లడానికి ఒప్పించినా తీరా బయలుదేరే వేళకి రోడ్డుదాటిన వారిని చేరుకోడానికి ‘నాన్నా నేనూ వస్తా’ అంటూ జనని పరుగుతీసి వేగంగా వస్తున్న వాహనం గుద్దుకుని ఆసుపత్రికి తీసుకెళ్ళగా మరణిస్తుంది. అసలే అనారోగ్యపు వీరేశం స్పృహ తప్పిపడిపోతాడు.
‘‘మీ ముందు ఒక్కటే పరిష్కారం వుంది. పాప ప్రాణం ఏ క్షణంలోనైనా పోవచ్చు. కొన ఊపిరితో వుంది. అయితే కళ్లు కాలేయం, మూత్రపిండాలు ఇతర రోగులకు ఉపయోగించవచ్చు. ఆలోచించండి. సమయం తక్కువగా ఉంది’’ అని పాప పోయేముందు డాక్టర్ చెప్పగా సావిత్రి గుండె రాయి చేసుకుని ‘డాక్టర్ చెప్పినట్లు చెయ్యి అన్నయ్యా’ అంటుంది. పాప కిడ్నీతో వీరేశం పునర్జన్మనెత్తుతాడు. పాప రెండు కళ్ళు కంటి ఆస్పత్రికి, లివర్ గ్లోబల్ ఆస్పత్రికి పంపుతారు. మరో కిడ్నీతో అదే ఆస్పత్రిలో ఇంకో రోగికి అమరుస్తారు. అలా జనని తన తండ్రినే బ్రతికించుకుని నలుగురికీ మహాప్రాణదాత అయింది. ఈ కథ ‘అవయవదానం’ అన్న అంశం మీదనే అయినా కథాకథనం పఠితను కదిలిస్తుంది.
సంకలనం పేరిట ‘జూకామల్లి’ ఓ కవితాత్మక కథనంగా ఉత్తమ పురుషలో సాగుతుంది. నడుము కింది భాగం పోలియోవల్ల చచ్చుబడిపోయినా ఆమెను ప్రేమించి పెళ్లాడిన కృష్ణ సాంగత్యంతో అనురాగవల్లిగా ఎదిగి సాధికారతను సాధించిన ఉద్యోగిని అయిన మహిళ కథ జూకామల్లి. ఆ చెవుల జూకాల తూగులో, ఊగులో సంతోషం పరివ్యాప్తం చేసిన సుతార భావుక కథ ఇది. పల్లెలో దూరాల్ని పట్నం దగ్గరచేసిందనిపించే ‘ఊరుమారినా ఉనిక మారునా’, సభావేదికల మీద గ్రంథ సమీక్ష చేసే వారి స్థితిని పరిస్థితిని వ్యంగ్యంగా విశదపరిచే ‘సమీక్ష’, బాల కార్మిక సంక్షేమ స్ఫూర్తి తెలిపే ‘చెలిమి’, టీవీ ఛానెళ్ళ అర్థం పరమార్థం అందుకోవాల్సిన తీరు తెన్నులను చమత్కారంగానూ, విచక్షణాత్మకంగానూ అందించే ‘ఇప్పుడు కాసేపు బ్రేక్!’ వంటి కథలు ఎన్నో ఇందులో. వైవిధ్యంతో, విలక్షణతతో చదివించి అలరిస్తాయి. కథలో సంభాషణలు నడపడంలో కె.బి.లక్ష్మిది ఓ ప్రత్యేకత. సరసంగా, సహజంగా, సున్నితంగా విషయాన్ని విశదం చేస్తూ కన్విన్స్ చేయగల రచనా ప్రతిభ తనది. కేవలం కథారచయిత్రి మాత్రమేకాక బాధ్యతగల ఓ జర్నలిస్టు, ఒక సాధికారిక వనిత కూడా కాబట్టే లక్ష్మి కథలు ఉపదేశాన్నీ ఉత్సాహాన్నీ కూడా రంగరించుకుని జీవితం పట్ల ఒక మమకారాన్నీ, మనుషుల పట్ల ప్రేమనీ, మానవీయ విలువల పట్ల ఆచరణాత్మకతనూ ప్రేరేపించేవిగా భాసిస్తూంటాయి.

–సుధామ, ఆంధ్రభూమి, 22nd Mar 2014

 http://www.andhrabhoomi.net/node/135716

 

 

 

 

 

 

 

 

 

 

 

 

 

 

జూకామల్లి” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.

***

జూకామల్లి on kinige

 

 

 

 

Related Posts:

నిరాశకు నిష్క్రమణ పలికే కథల సంపుటి ‘ఆసరా’

గీతలన్నా, గీతాలన్నా తనకిష్టమని చెప్పే శ్రీమతి వారణాసి నాగలక్ష్మి మంచి కథా రచయిత్రిగా కూడా పాఠకలోకానికి పరిచితురాలు. వానచినుకుల్లో తడుస్తున్న వాళ్ళకు గొడుగు ఎవరైనా ఇస్తే ఎంత ఆసరానో కన్నీటి జడిలో తడిసే వారికి కొండంత ధైర్యాన్నిచ్చే ‘ఆసరా‘ సంపుటిలోని కథల వంటి కథలు అంత ఆలంబన. ‘బంగారపు పళ్లేనికైనా గోడ చేర్పు ఉండాలి’ అన్నట్లు, ఎంతటి వాళ్ళకైనా ఏదో ఒక సమయంలో ఆసరా అవసరపడుతుంది. ‘పాడి ఉన్నా పంటలు ఉన్నా పంచుకునే మనిషుండాలి’ అని తోడు-నీడ సినిమా పాటలో అన్నట్లు కష్టాలను కన్నీళ్ళనే కాదు, మన ఆనందాన్నీ పంచుకునే వాళ్ళున్నదే జీవితం.
ఈ సంపుటిలో వరసగా నాలుగు కథలు చదివాక నాకు ఏం చెప్పాలని పదే పదే అనిపించిందో సరిగ్గా అవే మాటలు ‘మేఘన’ కథలో కనిపించాయి. “సృజనాత్మక రచనలో చెప్పదలచిన విషయాన్ని మొహాన కొట్టినట్లుగానో, లేదా అరటిపండు వొలిచి చేతిలో పెట్టినట్లుగానో చెప్పకూడదు. పాఠకుడిలో ఆలోచన రేకెత్తించేలా, చిరునవ్వు మొలిపించేలా, నిద్రపోతున్న వ్యక్తిని వెచ్చని సూర్యకిరణం మేల్కొలిపినట్లుగా, మనసు ఆర్ద్రమై కళ్ళు చెమర్చేలా, సూచనప్రాయంగా, దృశ్యాదృశ్యంగా రచన సాగాలి” మేఘన కథలో సృజనాత్మక రచన వర్క్ షాప్ నిర్వహించే సాహితీ వైద్యుడు సుధీర్ సంజయ్ చెప్పిన మాటలు నిజానికి రచయిత్రివే. శ్రీమతి నాగలక్ష్మి కథల్లో కనిపించే నేటి మానవ సంబంధాలు, సమస్యలు, అంతస్సంఘర్షణలు, వాగ్వివాదాలు, చిలిపి తగవులు – అన్నింటిలోనూ సౌకుమార్యం కనిపిస్తుంది. తిట్టినా అందులో పదునుతోపాటు నాగరికత కనిపిస్తుంది. నవ సమాజాన్ని నిశితంగా పరిశీలించి నిర్లిప్తంగా ఉండే మనుషుల్ని ఈ సమస్య గురించి ఆలోచించమంటుంది. ఈ సంపుటి పేరు ‘ఆసరా’ గర్భస్థ శిశువుగా ఉన్నప్పుడు తల్లిపేగు (బొడ్డుతాడు) ఆసరా. చివరి వార్ధక్య దశలో చెట్టంత బిడ్డలో, చేతికర్రో ఆసరా. ఈ మధ్య సాగే జీవనయానంలో ఆసరా ఎన్నోసార్లు అవసరమవుతుంది. మొదటి కథ పేరే ‘ఆసరా’ సైబర్ కేఫ్‌లలో చిరుచీకటి నిండిన కేబిన్లలో యువతీ యువకులు యౌవనమైకంలో చేసే శృంగార చేష్టల్ని వీడియో తీసి బ్లాక్ మెయిల్ చెయ్యటం గురించి మనకు తెలుసు. అటువంటి సమస్య వచ్చినప్పుడు ఎగతాళి చేసి స్నేహితులు, తిట్టి తల్లిదండ్రులు వాళ్ళని మరింత నీరుగారిపోయేలా చేస్తారు. అందుకు ఫలితమే ఎన్నో ఆత్మహత్యలు. ఆ కాసేపు వివేకంతో, ఓర్పుతో ధైర్యం చెప్పేవాళ్ళుంటే, సమస్యకు పరిష్కారాన్ని సూచించే వాళ్ళుంటే ఆ ‘ఆసరా’ జీవితాన్నే నిలబెడుతుందని ఈ కథ చెబుతుంది. తప్పు దిద్దుకోవటానికి తల్లి చేయూతనిస్తే ఒక పడుచుపిల్ల జీవితం మళ్లీ పచ్చగా మారుతుందని చెప్పే ఈ కథ ఇటు యువతకు, అటు తల్లిదండ్రులకు కనువిప్పు. సమాజంలో ‘పీడించటం’ అనేది వర్ణాలకు, వర్గాలకు పరిమితం చేస్తుంటారు. ‘అమృతాన్ని సాధించు’ కథ చదివినప్పుడు బలవంతులు, బలహీనుల్ని పీడిస్తారనీ, అందుకు వర్ణ, వర్గాలు అతీతమని అనిపిస్తుంది. పదిమంది మెప్పు కోసం ఆదర్శ వివాహాలు చేసుకొని వివక్ష విషాన్ని కడుపులోనే దాచుకొని పండంటి కాపురాన్ని పాడుచేసుకుంటున్న ఒక జంట కథ ఇది. తన ప్రేమకోసం తన వాళ్ళందరినీ వదిలి వచ్చిన భార్యను ‘అగ్రవర్ణపు అహంకారి’గా మాత్రమే చూసే అవినాశ్ ఆత్మన్యూనతా భావంతో, పేరుకుపోయిన పగతో భార్య నీరదను నిజంగానే ‘కురిసే మేఘం’గా మార్చాడు. అవినాశ్ పురుషుడిగా తన ఆధిక్యత భార్య మీద చూపిస్తే నీరదను ఆసరాగా నిలిచే సునంద ఇంట్లో పనిపిల్లమీద ఆధిపత్యం సాగిస్తుంది. ‘తప్పులు దిద్దువారు తమ తప్పులెరుగరు’మరి!
ఒళ్లు కొవ్వెక్కిన వెధవ ఒంటరిగా వచ్చే ఆడపిల్లను మానభంగం చేస్తే తప్పు చేసిన వాడు హాయిగా తిరుగుతుంటాడు. ఆ అమ్మాయి ఆత్మహత్య చేసుకుంటుంది. అమెరికా మొగుడు మోసం చేస్తే ఆమెకూ ఆత్మహత్యే గతి. మనకు కనబడుతున్న కన్నీటి కథలివి. కాని ‘సంధ్యారాగం’ కథలో ‘సావేరి’కి సుమేధ ఆసరాతో బ్రతికి సాధించాలనే పట్టుదల వచ్చింది. బొద్దింకను చూస్తే భయపడే సావేరి పసిఫిక్ మహా సముద్రం మీద ‘హాట్ ఎయిర్ బెలూనింగ్’ చేసేంత ధైర్యవంతురాలైంది. “’వే’ని వెతికి పట్టుకోవాలి. అది తీసేస్తే ‘సారి’ మిగిల్తుంది. నువ్వు ‘సావేరి’ని. అందమైన రాగానివి.“ అన్న స్నేహితురాలి మాటల ఆసరా విలువ అమూల్యం.
జీవితాన్ని మధురంగా, రాగసుధా భరితంగా ఊహించుకుని కలలుకనే అమ్మాయిలు తనను పట్టించుకోని భర్త దొరికితే మానసిక వేదనకు గురౌతారు. ఆ కోపంలో ‘మొమెంట్ ఆఫ్ ప్లెజర్’ ఫలితంగా వచ్చిన గర్భాన్ని తీయించేసుకోవాలనుకుంటారు. అది భర్తకు బుద్ధి చెప్పటమనుకుంటారు. కడుపున పడిన బిడ్డను కాదనుకునే హక్కు తల్లికి లేదని, జన్మనివ్వటం అద్భుతమైన ఘట్టమనీ చెప్పే కథ ‘చిన్నబోదా చిన్నప్రాణం’. ఆడపిల్లల్ని వద్దనుకున్న పాపం తరతరాలను కట్టికుదుపుతుందని ‘రేపటి ప్రశ్న’ కథ హెచ్చరిస్తుంది. అత్తగారొస్తుంటే దెయ్యం వస్తున్నట్లు భయపడిన కోడలు ఆమె ప్రేమతోరాసిన ‘ఒక ప్రేమలేఖ’ మానవ సంబంధాల తియ్యదనానికి నిదర్శనం. అర్థం చేసుకోవటం కష్టం. అపార్థంతో నిందలు వెయ్యటం సులభమనే సందేశం ‘ప్రేమతో మీ పెద్దత్త’ కథలో చూడవచ్చు. అమ్మ అనురాగానికి అద్దంపట్టిన కథ ‘గోడమీదబొమ్మ’. బాపు- రమణల ‘రాధాగోపాళం’ను చూసి ముచ్చటపడి రచయిత్రి మురిపెంగా రాసుకున్న కథ ‘శ్యామాగోపాళం’. (ఆఁయ్! అమ్మా! మమ్మల్నే ఇమిటేట్ చేస్తావా? మా పాత్రల్ని (గిన్నెలు కాదు రాధా గోపాళం) జాతీయం చేస్తావా? అని పెద్దాళ్ళిద్దరూ ఖోప్పడ్డారేమో?) కథా వస్తువులు, కథ నమూ నచ్చే కథల ‘మిక్చర్’ ‘ఆసరా’ కథా ప్రియులను మెప్పిస్తుంది. నేటి నిజాలను హితంగా, మితంగా చెప్పిన శ్రీమతి నాగలక్ష్మి అభినందనీయురాలు.

డా. బి.ఉమాదేవి, నది మాసపత్రిక, సెప్టెంబరు 2013

* * *

“ఆసరా” కథా సంపుటి డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.
ఆసరా On Kinige

Related Posts:

“కథాపయనంలో కొత్త పుంతలు…” ‘ఆసరా’ కథాసంపుటి గురించి…

వారణాసి నాగలక్ష్మి గారి కథా సంపుటి “ఆసరా”కి ముందుమాటగా కౌముది వెబ్‌జైన్ సంపాదకులు కిరణ్ ప్రభ గారు ఇలా రాసారు.

* * *

సమస్యలని సమస్యలుగా కాక నిత్యజీవితంలో ఎదురయ్యే సంఘటనలుగా మలచి పాఠకులకి చూపిస్తే వాటిల్లో తమని తాము చూసుకోగలుగుతారు. ఇంక తర్వాత రచయిత ఏమి చెప్పినా పాఠకుడికి ఆత్మీయంగానే అనిపిస్తుంది. అలాంటి పాఠకుడు చివరంటా కథారచయితతో కలిసి ప్రయాణిస్తాడు. ఆ ప్రయాణపు చివరి మజిలీ (కథ ముగింపు) కూడా ఊరేగింపులూ, ఉద్యమాలూ, నినాదాలూ కాకుండా సున్నితంగా హృదయాన్ని తట్టి వదిలే దృశ్యమైతే రచయిత పాఠకుడికి చిరకాల మిత్రుడిగా మిగిలిపోతాడు. ఈ టెక్నిక్ ని అద్భుతంగా ఒడిసిపట్టుకుని తీవ్రమైన సమస్యలని సైతం సున్నితమైన కథా వస్తువులుగా మలచగల రచయిత్రి శ్రీమతి వారణాసి నాగలక్ష్మి గారు.

నాగలక్ష్మిగారు లలిత గీత రచయిత్రిగా ఏడెనిమిదేళ్ళ కిందట ఫోన్ ద్వారా పరిచయమయ్యారు. ఆమెకి ప్రతి పోటీలోను బహుమతులు గెలుచుకోవడం అలవాటని మాకప్పుడు తెలీదు!(ఈ సంపుటిలోని కథలలో బహుమతుల వివరాలని చూశాక మీరూ అంగీకరిస్తారీ యథార్థాన్ని!) నిజానికి మా పరిచయం కూడా ఆమెకి బహుమతి తెచ్చిపెట్టిన సందర్భమే. లలిత గీత రచనా పోటీల్లో బహుమతి వచ్చిందని తెలియచేయడానికి ఫోన్ చేసి మాట్లాడాం… ఆ తరువాత మేము నిర్వహించిన కథారచనా పోటీల్లో కూడా వరుసగా బహుమతులు అందుకున్నారు. మా పోటీలకి న్యాయనిర్ణేతలు మారినా విజేతల జాబితాలో మాత్రం నాగలక్ష్మిగారి పేరు ఉండాల్సిందే….! అది వారి రచనలకున్న విలువ, నాణ్యత, గుర్తింపు. తద్వారా నాగలక్ష్మి గారి మిగతా రచనలూ, ప్రచురితమైన పుస్తకాలూ చదివే అవకాశం లభించింది.

ఆమె లలిత గీతాల్లో, చిత్రలేఖనాల్లో కనిపించే లాలిత్యమే కథా రచనల్లో కూడా కనిపిస్తుంది. ఏ కథా కూడా ఊసుబోక వ్రాసినట్లు, కేవలం ఊహాలోకంలోంచి ఊడిపడినట్లు అనిపించదు. ఏదో సందేశం ఇచ్చితీరాలి అన్న దృక్పథం కంటే జీవితాన్ని జీవితంగా చూపిస్తూ మధ్యలో ఎదురయ్యే ఇబ్బందులకీ, సమస్యలకీ పరిష్కారం ఇదేనేమో ఆలోచించండి అని మనసు పొరల్ని స్పృశించి వదిలేస్తారు. రెండు మూడు దశాబ్దాల కిందటి కుటుంబ సంబంధ బాంధవ్యాలని గుర్తుచేసే కథలు కొన్నీ (ఒక ప్రేమలేఖ, ప్రేమతో పెద్దత్త, వినిపించని రాగాలు… మొదలైనవి), మారని కాలం, వేగవంతమైన జీవన విధానాలు, నాలుగు వీధుల కూడలిలో నిలబడ్డ సందేహాస్పద యౌవనాలు… వీటిని ప్రతిబింబించే కథలు ఇంకొన్నీ (ఆసరా, సంధ్యారాగం… మొదలైనవి), వర్తమాన సమాజిక కోణాలకి నిలువుటద్దంలాంటి కథలు మరికొన్నీ (ప్రగతి ఫలాలు, ఇది కల కాదు, రేపటి ప్రశ్న… మొదలైనవి).

కొన్ని కథల ముగింపు చదివిన ప్రతిసారీ కళ్ళు చెమరుస్తాయి. పెద్ద, పెద్ద ఉపన్యాసాలు ఉండవు. సంక్లిష్టమైన కథా శిల్ప భేషజాలు కనిపించవు. ఒక్క వాక్యం చాలదూ అనిపిస్తారు. ‘మేఘన’ కథ ముగింపులో నాన్నమ్మ గారింటి వద్ద ఆంక్షల మధ్య గడిపిన చిన్నారి “ఏమైందంటే… నాన్నమ్మ నన్ను తిట్టలేదు… కొట్టలేదు… ఎత్తుకోలేదు కూడా…” అంటుంది. “ఎత్తుకోలేదు కూడా…” అన్న రెండు పదాల్లో పసిపాప మనస్తత్వాన్ని పూర్తిగా దర్శింపచేశారు. ‘వినిపించని రాగాలు’ కథ చివరలో “రాత్రంతా వీచిన పెరటి గాలి నా మనసు నిండా ప్రాణ వాయువు నింపింది. ఉతికి ఆరేసిన వస్త్రంలా నా హృదయం ప్రక్షాళితమైంది. కారు ముందుకి కదులుతుంటే నా మనసు వాళ్ళ మధ్యే ఆగిపోయింది” అంటారు. ఇందులో కూడా చివరి వాక్యంతో పాఠకుల హృదయాల మీద ఎంతో బలమైన ముద్ర వేస్తారు. అలాగే ‘ఒక ప్రేమలేఖ’ ముగింపు కూడా. ఈ ‘ఒక ప్రేమలేఖ’ కథ చదివి ఎంతో ఇష్టపడి ‘స్వప్న’ పత్రిక నుంచి అనుమతి పొంది వెంటనే ‘కౌముది’ లో కూడా ప్రచురించడం జరిగింది. అలాగే ఏ కథలోనైనా పాత్రలతో, తన భాషలో కాక, ఆయా వ్యక్తిత్వాలకి తగినట్లు మాట్లాడించడంలో కూడా నాగలక్ష్మిగారు కథా రచయిత్రిగా మంచి నేర్పు ప్రదర్శించారు. ఈసంపుటంలో మిగతా కథలకంటే భిన్నంగా నిలిచేవి శ్యామా గోపాళం(హాస్యకథ), మానవ ప్రయాణం (కవితాత్మక అధివాస్తవిక చిత్రణ). ఇవి కూడా నాగలక్ష్మిగారి కలానికున్న విభిన్నతకి దర్పణాలు.

ముందుకి నడవండి.. కథా వీధిలోకి అడుగుపెట్టండి… కథలే మిమ్మల్ని నడిపిస్తాయి.

నాగలక్ష్మిగారి కలం నుంచీ ఇలాగే సజీవమైన కథలు నిరంతరం వెలువడాలని మనసారా ఆశిస్తూ…

కిరణ్ ప్రభ

* * *

ఈ పుస్తకం డిజిటల్ రూపంలో కినిగెలో లభిస్తుంది. మీ కాపీని నేడే సొంతం చేసుకోండి.

ఆసరా On Kinige

Related Posts:

“ఆప్తవాక్యం” – ‘ఆసరా’ కథాసంపుటి గురించి….

వారణాసి నాగలక్ష్మి గారి కథా సంపుటి “ఆసరా”కి ముందుమాటగా ప్రముఖ అనువాదకురాలు శాంతసుందరి గారు ఇలా రాసారు.

* * *

వారణాసి నాగలక్ష్మితో నాకు పరిచయమై నాలుగేళ్ళయింది. అప్పట్లో కథా రచయిత్రిగా పరిచయమైన నాగలక్ష్మి మొదటి పుస్తకం ‘ఆలంబన’ నన్ను బాగా ఆకట్టుకుంది.’భూమిక’ సంస్థ చేపట్టిన హిందీ అనువాదాల కోసం ఆ పుస్తకం మొత్తం చదివాను.

ఆ తరువాత ఆమె కవితలూ, పాటలూ,గేయాలూ రాస్తుందనీ, ఇంకా చిత్రాలు కూడా వేస్తుందనీ తెలిసింది. ఇంత చిన్నవయసులో అంత బహుముఖమైన ప్రజ్ఞని సాధించటం చూసి చాలా సంతోషం వేసింది. ఇవన్నీ ఆమెలోని కళాకారిణిని నాకు పరిచయం చేశాయి. అటు చదువులో కూడా అద్భుతమైన విజయాలు సాధించిందని తెలిసి అబ్బురపడ్డాను. ఎవరైనా తల్చుకోవాలేగాని, దేన్నైనా సాధించేందుకు ఎంతటి ప్రయత్నమైనా చెయ్యగలరు అనటానికి నాగలక్ష్మి ఒక ఉదాహరణ. ఇంత ప్రతిభ ఉండి కూడా నాగలక్ష్మిలోని గాంభీర్యం, అదే సమయంలో సరళంగా అందరితో కలిసిపోయే స్వభావం మా ఇద్దరి మధ్యా ఆత్మీయమైన స్నేహానికి దారి తీసింది.

నాగలక్ష్మి కథలన్నీ పత్రికల్లోనూ, వెబ్ పత్రికల్లోనూ ఎంతోమంది చదివే ఉంటారు. ఇతర ప్రక్రియల్లో కలం సారించినప్పటికీ, ఆమెకి బాగా గుర్తింపు తెచ్చినవి కథలేనని నా అభిప్రాయం. కథల్లో నేపథ్యం తెలుగువారి జీవితాలే, కానీ ఎప్పటికప్పుడు ప్రపంచంలో ఏం జరుగుతున్నదో తెలుసుకోవాలన్న జిజ్ఞాస ఉన్న రచయిత్రి కావటం వల్ల, ఆమె కథల కాన్వాసు పెద్దదిగా కనిపిస్తుంది. సైన్స్ విద్యార్థిని కాబట్టి దానికి సంబంధించిన ప్రస్తావన కూడా, కథావస్తువునుబట్టి కనిపిస్తుంది- ఈ కోవకి చెందిన కథలే.

కవయిత్రీ, పాటల రచయిత్రీ నాగలక్ష్మి వచనంలో కూడా ఆ లక్షణాలు సందర్భానుగుణంగా కనిపిస్తూ ఉంటాయి. నాగలక్ష్మి రచనా శైలిలోని విశిష్టత చెప్పాలంటే, కథ చెప్పే విధానం స్పష్టంగా, సామాన్య పాఠకుడికి కూడా సులభంగా అర్థమయ్యేలా చెప్పగలదు. పాఠకుడు కథ చదవటం మొదలు పెట్టాడంటే మధ్యలో ఆపే ప్రసక్తే లేదు. అందువల్లనేమో నాగలక్ష్మి కథలకి ఎక్కువగా పోటీల్లో బహుమతులు లభిస్తూ ఉంటాయి. కథావస్తువులో వైవిధ్యం, కథ చెప్పటంలో నైపుణ్యం, మంచి భాషా శైలీ నాగలక్ష్మి కథల్లోని ప్రత్యేకత.

నాగలక్ష్మి నన్ను తన కథల పుస్తకానికి ముందుమాట రాయమన్నప్పుడు నేను ఆశ్చర్యపోయాను. నేను కథా రచయిత్రినీ, విమర్శకురాలినీ కాను, కేవలం అనువాదకురాలిని. కానీ ఎంతో ఆప్యాయంగా, మా స్నేహాన్ని కారణంగా అనుకుని ఈ నాలుగు మాటలూ, నాకు తోచినవి రాశాను. స్నేహితుల కోరికని ఎవరైనా తోసిపుచ్చగలరా మరి?

ఆర్. శాంత సుందరి

* * *

ఈ పుస్తకం డిజిటల్ రూపంలో కినిగెలో లభిస్తుంది. మీ కాపీని నేడే సొంతం చేసుకోండి.

ఆసరా On Kinige

Related Posts: