అక్షరమే ‘ప్రపంచం’గా మారిన వేళ…’మన ప్రపంచం’ పుస్తకంపై సమీక్ష

అంశం ఏదైనా అది అక్షరాల వెలుగులో వ్యాస రూపం ధరిస్తే దాని ప్రభావ తీవ్ర తాకిడే వేరు. మనసుల్ని భావోద్వేగంతో కుదిపేస్తుంది. మనుషుల్ని అమితంగా ఆలోచింపజేసి కలచివేస్తుంది. ఈ వేదనకు మూలం వర్తమాన ప్రపంచాన్ని అనుభవంతో కాచి వడబోయడం. సామాజిక వ్యవస్థలోని సంఘర్షణల్ని ఉక్కపోత రూపంలో ఆరబెట్టడం. అలా చెలరేగిన కఠోర వాస్తవ దృశ్యరూపాల మంటలే జీవన సత్యాలుగా ఊపిరిపోసుకుంటాయి. ఇలాంటి సందర్భకోణాల్లోంచి చిత్రికపట్టిన శీర్షికా వ్యాసాల కలబోత నేపథ్యమే ఈ పుస్తక పరిచయ ముఖ చిత్రమైంది. దీని రచయిత దుప్పల రవికుమార్. వ్యాస రచనలో చెయ్యి తిరిగి అనుభవశాలి. ‘సత్యం’ సాయంకాల దినపత్రికలో రెండేళ్ళపాటు ‘వీక్లీకాలమ్’గా ధారావాహికంగా ప్రచురింపబడిన వ్యాస సంకలనమే ఈ ‘‘మన ప్రపంచం’’అనే వ్యాఖ్యాన పుస్తకం. కళింగాంధ్ర గుండె చప్పుడుగా అభివర్ణించే ఈ అక్షర లక్షల సముదాయాన్ని సిక్కోలు బుక్‌ట్రస్ట్ తొలి ప్రచురణగా జనం మధ్యకు దీనిని తీసుకొచ్చి పరిచయం చేసింది. ఈ ప్రయత్నంలో భాగంగా రవికుమార్‌గారు చేసిన అక్షర కృషి అంతాఇంతా కాదు. నైతిక విలువలు సమూలంగా అంతరించిపోతున్న సామాజిక వ్యవస్థలో ఒక లక్ష్యానికి కట్టుబడి నిలబడటం అంత తేలిక్కాదు. వృత్తి- ప్రవృత్తిరీత్యా నిబద్ధతను పాటిస్తూ తట్టుకొని ఏటికి ఎదురీదడం సాధారణ విషయం కాదు. చేసే పనిలో విషయముంటేనే అది సాధ్యపడుతుంది. అది రవికుమార్ లాంటి అరుదైన వ్యక్తులకు మాత్రమే రచయితగా చెల్లుతుంది.
మొత్తం 59 వ్యాసాలున్న ఈ సంకలనంలో రవికుమార్‌గారు స్పృశించని అంశంలేదు. సంఘర్షించని సందర్భక్షణం లేదు. చూసి స్పందించని దృశ్యం లేదు. అంతా ఒక ప్రణాళికాబద్ధంగా, వడపోతతో విశే్లణాత్మకంగా సమస్తాన్ని కళ్ళకి కట్టించే ప్రయత్నం చేశారు. అవసరమైనచోట చురుకైన వాతలు పెట్టారు. నిరంతర మెలకువతో చైతన్యపరిచి అంతర్లీనంగా ఉత్తేజితుల్ని చేశారు. ‘వాళ్లంతే’ శీర్షికా వ్యాసంలో ‘‘కేవలం రూపాయి నలిపి వాసన చూపిస్తే మనశ్శరీరాలు అప్పగించే నేటి తరపు జర్నలిస్టుల దౌర్బల్యాన్ని భరించి తీరాలని’’ పత్రికాముఖంగా రచయిత బాహాటంగా ప్రకటించినపుడు రవికుమార్‌లోని అంతర్విముఖత అతనిలోని ‘గట్స్’ని తేటతెల్లపరుస్తుంది.
ఆధ్యాత్మిక గురువులు సచ్చిదానంద, చినజియర్ స్వామి, రవిశంకర్ లాంటి వాళ్ళను ఉదాహరిస్తారు. పాలక-సంపన్న వర్గాలకు వ్యతిరేకంగా గొంతెత్తి, ఆదివాసుల పక్షాన హక్కులకోసం పోరాటం సలిపి, గుజరాత్ మారణకాండ బాధితుల తరఫున కొమ్ముకాసి నిలబడ్డ బాబాలెంతమంది ఉన్నారని నిలదీస్తారు. ఈ నిబద్ధత వెనుక నిక్కచ్చితనం ప్రతిబింబిస్తుంది. కాకరాపల్లి, సోంపేట వద్ద జరిపిన ప్రజాపోరాటాల స్ఫూర్తిని చైతన్యవాహికగా ప్రవహింపజెయ్యడంలో అందెవేసినతనం కనిపిస్తుంది. అభివృద్ధిపేరుతో ప్రభుత్వం ఆడుతున్న జూదం థర్మల్ విద్యుత్ కేంద్రాలతో ధర్మాన మూటగట్టుకున్న అపఖ్యాతిని బట్టబయలు చేస్తారు. ఉన్నదున్నట్టుగా కుండబద్దలుకొట్టి నిజాల్ని నిర్భయంగా వెల్లడిచేయడం ఇతని సహజ నైజాన్ని అద్దంపట్టిస్తుంది. పేదాగొప్పల మధ్య తారతమ్యాన్ని ఆర్థిక అసమానత్వం ద్వారా చాటిచెప్పే ప్రయత్నంచేస్తారు రచయిత.
రాజ్యాలను కూల్చడంలో అమెరికా పాశవిక చర్యలను వ్యాసంలో ఎండగడతారు. ఉగ్రవాదం, కార్పొరేట్ వర్గాలకు ఊడిగం చెయ్యడం, నిరుద్యోగం, పేదరికం లాంటి అంశాలకు జవాబుదారీతనం వహించాల్సి రావడాన్ని గుర్తుచేస్తారు. భాజపా, కాంగ్రెస్, టిడిపి, తెరాస, లోక్‌సత్తాల వైఖరిని ప్రస్ఫుటంగా ప్రతిఫలింపజేస్తారు. మద్యం సిండికేట్, కాంట్రాక్టింగ్, కోస్టల్ కారిడార్, బొగ్గు ఆధారిత విద్యుదుత్పత్తి కేంద్రాలు, గ్రానైట్ అక్రమ తరలింపు చర్యలు, మత్స్యసంపదల గురించి పూసగుచ్చినట్టు కళ్ళకు కట్టిస్తారు. దేశవ్యాప్త కుంభకోణాలకు అక్షర రూపమిస్తారు. వ్యాపార-మావోయిస్టు వర్గాల కార్యకలాపాలతో ప్రభుత్వ పాలనపై కొరడా ఝుళిపిస్తారు. ప్రపంచీకరణ మనిషిజంపై ఎలాంటి మార్పులను తీసుకొచ్చిందో- నైజీరియన్ రచయిత చినువా అచ్‌బె మాటల్లో వివరిస్తారు. పరారుూకరణ తీరును వ్యక్తీకరిస్తారు. వస్తు సంస్కృతి మోజులో వర్తమాన ప్రపంచ పోకడల తీరును హృద్యంగా ఆవిష్కరిస్తారు. మాతృభాష సంరక్షణోద్యమం ఆవశ్యకతను అంతర్లీనంగా నొక్కిచెబుతారు. శ్రీకాకుళ విప్లవ పోరాటస్ఫూర్తినీ, కథానిలయం ప్రాముఖ్యతనీ ప్రస్తావిస్తారు.
ఇంకా ప్రముఖుల పుస్తక రచనల గురించి వివరణ సాల్మన్ రష్డీ, తస్లీమా నస్రీన్, రెజాఅస్లాన్, వెండీ డోనిగర్, జితేందర్ భార్గవ, హమీష్ మెక్ డోనాల్డ్‌లతో పూర్తిచేస్తారు వ్యాసకర్త రవికుమార్. ఆంధ్రా- తెలంగాణాలు విడిపోయిన సందర్భాన్ని చారిత్రాత్మక ఘట్టంగాకాక, ఆలోచనాత్మకంగా విశ్లేషించుకోవాల్సిన తీరుతో మన మేథస్సుకు పదును పెడతారు.
అర్థశాస్త్రంలోని కౌటిల్యుడి మాటగా మనకు ఉద్బోధిస్తారు. ఇవి మచ్చుకు కొన్ని ఉదాహరణలు మాత్రమే. ఇందులో ఇంకా ఊహకి అందని ప్రశ్నలు, ప్రస్తావించని సందర్భాలు కోకొల్లలుగా మిగిలిపోయాయి. వీటి మూలాల లోతుల్లోకి వెళ్లగలిగితే కంటికి కనిపించని అట్టడుగు చీకటి కోణాలు ఎన్నో బయల్పడే అవకాశముంది. ఈ రచయిత లోచూపుకీ, దిశానిర్దేశత్వానికీ భవిష్యత్తు ఆశావహ దృక్పథంగా మారుతుందనడంలో ఎలాంటి అతిశయోక్తి కనిపించదు. భిన్న కోణాల్లో వ్యాసాలు రాయడంలో ఆరితేరిన దుప్పల రవికుమార్‌గారి సునిశిత పరిశీలనా దృష్టికి, విశ్లేషణా సామర్థ్యానికి ఎలాంటివారైనా దాసోహం పలకాల్సిందే. ఈ పుస్తకాన్ని చదివిన వారందరికి ఆ రకమైన అనుభవం అనుభూతిగా మిగిలిపోతుంది. సులభశైలిలో సరళ భాషలో రాయడంవలన అటు పాఠకుల మెప్పునూ, ఇటు విమర్శకుల ప్రశంసలనూ సమపాళ్ళలో అందుకోగలిగారు రచయిత.

–  రాజా, ఆంధ్రభూమి-అక్షర, 14/03/2015.

మన ప్రపంచం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

మన ప్రపంచం on kinige

ManaPrapamcham600

 

Related Posts:

వామపక్ష పోరాట క్రమం… “కామ్రేడ్ మాకినేని బసవపున్నయ్య-నా జ్ఞాపకాలు” పుస్తకంపై సమీక్ష

కామ్రేడ్ మాకినేని బసవపున్నయ్యగారి జీవితం ఒక ఉద్యమం. ఉద్యమమే వారి జీవితం. కామ్రేడ్ ఎంబీగా చిరపరిచితమైన బసవపున్నయ్యగారి జీవితాన్ని, భారతదేశ కమ్యూనిస్టు ఉద్యమాన్ని వేరువేరుగా చూడడం చాలా కష్టం. అసాధ్యం కూడా. భారతదేశ కమ్యూనిస్టు ఉద్యమంతో అంతగా మమేకమైన జీవితం బసవపున్నయ్యగారిది. వారి జీవిత ప్రస్థానం ఎలా మొదలైంది. బాల్యం ఎలా గడిచింది, విద్యార్థి జీవితాన్ని ఎలా గడిపారు. విద్యార్థి లోకానికి ఎలా నాయకత్వం వహించారు అనే దానితో ప్రారంభమై.. రాటుదేలిన కమ్యూనిస్టు నాయకుడిగా ఎలా ఎదిగారు, ఎలాంటి పోరాటాల్లో పాల్గొన్నారు అనేవరకు అనేక విషయాలు ఈ పుస్తకంలో వున్నాయి. స్వాతంత్య్రానికి పూర్వం కమ్యూనిస్టుపార్టీ నిర్వహించిన పోరాటాలు, రూపొందించుకున్న కార్యాచరణలు, ఎత్తుగడలు ఎలాంటివో ఈ పుస్తకం చదివి తెలుసుకోవచ్చు. తెలంగాణ సాయుధ పోరాటంలో పార్టీ అనుసరించిన వ్యూహాలు, ఎత్తుగడలు, వాటికి కారణాలు తెలుసుకోవచ్చు. మహాత్మాగాంధీ, సుభాష్ చంద్రబోస్‌ల పట్ల పార్టీవైఖరి, అలాగే ఎన్.జి.రంగా లాంటి నాయకుల పట్ల వైఖరి ఏమిటి? ఆ వైఖరికి కారణాలు ఏమిటి? లాంటి రాజకీయ అంశాలనే కాదు.. కామ్రేడ్ ఎంబీ జీవిత కాలంలోని సామాజిక పరిణామాలను కూడా ఈ పుస్తకం ద్వారా అర్థంచేసుకోవచ్చు. కామ్రేడ్ సీతారాం ఏచూరి మాటల్లో చెప్పాలంటే.. స్వాతంత్య్ర ఉద్యమంలోను, ఆ తరువాత కాలంలోనూ కమ్యూనిస్టు ఉద్యమప్రాభవం, దాని బలహీనతలను వివరించే పుస్తకం ఇది. ఇది ఏకబిగిన రచించిన పుస్తకం కాదు. కామ్రేడ్ బసవపున్నయ్యగారు వివిధ సందర్భాలలో ఇచ్చిన ఇంటర్వ్యూలలో వెలిబుచ్చిన అభిప్రాయాలను ఒక క్రమపద్ధతిలో కూర్చి రూపొందించిన పుస్తకం. ఇది కామ్రేడ్ బసవపున్నయ్యగారి జీవిత చరిత్రకాదు. ఆయన జీవితకాలంలోని రాజకీయ చరిత్ర. ఆయన జీవిత కాలంలోని సామాజిక చరిత్ర. ఆయన జీవితకాలంలోని కమ్యూనిస్టు చరిత్ర.

– వాసిరెడ్డి , ఆంధ్రభూమి – అక్షర , 25-4-2015.

నా జ్ఞాపకాలు” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

నా జ్ఞాపకాలు on kinige

NaaGnapakaaluPSBH600

 

Related Posts:

పరిమళాల కథా పుష్ప వృక్షం – “కథాకృతి – మూడవ భాగం” పుస్తకం పై సమీక్ష

సమీక్షలు వ్రాసేటప్పుడు ఆ రచయితలతోను, ఆ రచనా ప్రకాశకులతోనూ సమీక్షకుడు తన సంబంధాల పెరుగుదలలు తరుగుదలలు గురించి ఆలోచించరాదు, సమీక్షల్నీ, సమీక్షకుల్నీ గమనిస్తూ ఆలోచనలతో ప్రశ్నించే పాఠక వ్యవస్థ ఒకటి వుందనుకుంటే మంచి సమీక్షలూ సమీక్షా గ్రంథాలూ వస్తాయి. అలా వచ్చిన మంచి ప్రయోజనాత్మక గ్రంథం ఈ కథాకృతి గ్రంథం. ఇది మూడవ భాగంగా పరిచయాలు, పరామర్శలుగా వచ్చింది ఏ భాగానికాభాగమే ప్రత్యేక గ్రంథంగా భాసించేదే.
మామూలు సమీక్షలకు భిన్నంగా కొత్తచూపులతో తమవైన బేరీజులతో 51 కథల ఆత్మీయకోణ ప్రదర్శనలతో విహారిగారు ఈ పుస్తకాన్ని సంతరించారు.
ఎ కంపేనియన్ ఆఫ్ ఇంగ్లీషు లిటరేచర్ అని ఆక్స్‌ఫర్డు విశ్వవిద్యాలయంవారు, సాహిత్య కోశము (ప్రాచీనము), సాహిత్య కోశము (ఆధునికము) అని తెలుగు అకాడమీ వారు వేసిన గ్రంథాలు అవి పరిశోధక సంబంధాలు.
విహారిగారి ప్రణాళిక విభిన్నమైంది. పత్రికల్లో, కథాసంపుటాల్లో పుంఖానుపుంఖాలుగా కథలు వస్తున్నాయి. కథల పోటీలూ పెరిగాయి సాంవత్సరిక ప్రకిగణీయ కథాసంకలనాలు వ్యక్తులో విశ్వవిద్యాలయాలవారో వేస్తూనే వుంటున్నారు. మనం కొన్నిటిని చదివినా కొన్ని తప్పుకునే అవకాశాలుంటాయి.
సుప్రసిద్ధులు కథల్నే కాదు సుప్రసిద్ధులు కావలసిన కథారచయితల కథలూ ఎన్నో చదివి గుణకారణంగా కొన్నిటిని ఎంపికచేసుకుని హృదయాల్ని స్పృశించే కదిలించే విశేషాల్ని తెలపటం ఇందులో రచయితకు గల పండిన అనుభవం కనిపిస్తుంది.
ఈ పుస్తకం చదవడంవలన బహుళార్థసాధక ప్రయోజనాలున్నాయి. ఇందులో మనం చదివిన కథావిశ్లేషణలుంటే- ఇందువలనా మనకీ కథ నచ్చింది అని క్రొత్తగా అనిపిస్తుంది. చదవని కథల పరామర్శల్ని చదివితే ఇంత మంచి కథగా మనం చదవలేదని కొత్తగా మనం వానిని చదివి తీరుతాం. ఇంత గొప్ప కథల్లో మనం కొన్నిటినైనా ఇతర భాషల్లోకి అనువదించుకోగలుగుతున్నామా అనే ఆవేదన కలుగుతుంది.
ఒక్కొక్క కథకు ఆత్మనే ఎక్సరే తీసి శీర్షిక పెట్టారా అనిపించేటంతగా ఉంటుంది శీర్షిక. రచయిత్రి లేక రచయిత జీవన పరిచయాలు కథారచనల కీర్తులతో జోడించి ఇచ్చిన తరువాత కథా ప్రధాన ఘట్టవిశేషాలు చెప్పడం కథారచనా రంగంలో ఆ కథల స్థారుూభేదాల్ని తార్కికంగా చెప్పడం ఈ గ్రంథ విశేషం.
దహనం, ఆకాశదేవర, దగ్ధగీతం, వీరుడు మహావీరుడు, అడుగు, వేషం వంటి కథలు ఎందువల్ల గొప్పవో విహారి చెప్పారు.
రాయలసీమ రైతు వెతల్ని జీవద్భాషలో రాసిన శాంతి నారాయణకథ ‘కల్లమయిపాయ’ కథకు సేద్యం బరువునుమోస్తూ విరిగిన జాతి వెనె్నముక’ అని శీర్షిక పెట్టడం కథను విశే్లషిస్తూ ఎవరి ఉటంకింపునోకాక రచయిత ఉటంకింపుగా కథ అంటే రాయటంకాదు, చెప్పడమూ కాదు. ప్రదర్శించడం’ అని ఇవ్వడం బాగుంది. ఇప్పటికే పేరున్న పాత కథల్ని వాటి విలువల్ని గౌరవిస్తూ, 21వ శతాబ్ద కథల్నీ అధ్యయనం చేసి రాయడంకి ఉదాహరణగా కాంతి అవరోధాన్ని కళ్ళముందు నిలబెట్టిన ఖదీర్‌బాబు కథానిక; గెట్ పబ్లిష్‌డ్‌ని చెప్పవచ్చు.
అందులో విహారిగారు ‘‘తెలుగు కథానిక పురోగమనం నూరేళ్ళకు పైగా సాగుతూ వుంది. ఈ సుదీర్ఘ జైత్రయాత్రలో ఎన్నెన్ని విజయాలు ఎన్నెన్ని మైలురాళ్ళు!… కథానిక పరిణామ వికాసాల్లో ఇరవై ఒకటో శతాబ్దం ఒక కొండ గుర్తుకానున్నది. దానికి సూచనగా ఈ పదేళ్ళ కాలంలోనూ చాలా గొప్ప కథలు వచ్చాయి. అవన్నీ దిగ్భ్రమ కలిగించే తేజోరేఖలు’ అని అన్నారు. అటువంటి తేజోరేఖల్ని దర్శింపజేయడానికి ఇటువంటి కథాకృతులు మరిన్ని విహారి వంటివారి లేఖినుల నుండి రావాలి.
ఆయా కథల గురించి రాస్తున్న సందర్భాలలో విహారి కథ/ కథానిక రచనా పరిణామ ప్రస్థానాలను అలవోకగా ఆలోచనాంశాలు చెప్పడం పాఠక ప్రయోజనదాయకం. ‘మానవీయ విలువల్ని’ వినిపించే కథలు డా.ఎన్. రామచంద్ర స్వప్నదారులు అనే రచనలో సందర్భశుద్ధిగా రామచంద్ర ఇలా అన్నారని చెప్పారు. ప్రజల అవసరాలు, ఆలోచనలు, అవకాశాలు, ఆవిష్కరణలు పెరిగాయి. బాహిరమైన భౌతికావసరాలతో పాటు, ఆంతరమైన తాత్త్విక ధోరణులు చర్చల్లో నిలబడ్డాయి. సాహిత్యానికి కేవలం స్థానికతేకాక కొంతవరకైనా సార్వకాలికత, సార్వజనీనత, సార్వదేశికతా స్పర్శ అవసరం లేకపోతే మూస రచనలే సాహిత్య మౌలికత అయి కూర్చుంటుంది. కరువులు, కక్షలు, మట్టిమనుషుల కష్టాలు, స్ర్తి అస్తిత్వ వేదనలు, ఉద్యమాలు, వాదాలు, వివాదాలు, మనిషి సమాజం ప్రకృతి అనే త్రిపుటి చుట్టూ పరిభ్రమణంతోపాటు మానవ జీవితంలోని సున్నిత పార్శ్వాలన్నీ స్పృశించవలసి వుంటుంది. కళాత్మకంగా రచయతలకు ఆత్మవిశ్వాసం కొరవడే గుంపులతత్వం త్వరగా సమసిపోతే సాహిత్యానికి మరింత ఆదరణ, గౌరవం వుంటుంది’. ఈ వాక్యాలు వర్తమాన సాహితీ లోకంలో ఆలోచనాత్మకాలే.
ప్రసిద్ధులు చెప్పే వాక్యాల్నేకాక సామాన్యులు చెప్పే అసామాన్య ఆలోచనా వాక్యాలకు విలువ ఇవ్వడం వాటిని పాఠకులకి అందించడం విహారిగారి రచనా విశేషం.
లోగడ కథాకృతి రెండు భాగాల్లోనూ వందేసి పరిచయాలుండగా ఈ మూడవ భాగంలో యాభై కథావిహారాలున్నాయి. ఈ గ్రంథాన్ని విలక్షణ సమీక్షాగ్రంథంగా, తేజోరేఖల పరామర్శల గ్రంథంగా చెప్పుకోవచ్చు.
చాలా ప్రక్రియల్లో రచయితగా, అర్ధశతాబ్దంగా కథారచనల అధ్యయనపరునిగా పేరుపొందిన విహారి మంచి కథల్ని ఈతరం పఠితల దృష్టికి పరిచయం చేయాలనే సంకల్పం గొప్పది. నవలల గురించీ ఇటువంటి గ్రంథాలు అవసరం. రచయిత ‘గుప్పెడు జ్ఞాపకాల పూలపొట్లంగా ఈ గ్రంథాన్ని అభివర్ణించుకున్నారు. మనం దీనిని పరీమళాల కథా పుష్ప వృక్షంగా భావిద్దాం.

-సన్నిధానం నరసింహశర్మ,ఆంద్రభూమి – అక్షర,07/02/2015.

కథాకృతి మూడవ భాగం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

కథాకృతి మూడవ భాగం on kinige

Kathakruti3600

Related Posts:

‘మృత్యు’ముఖంలో ఎన్నెన్ని హావభావాలో..! – “మరణతరంగం”పుస్తకంపై సమీక్ష

‘‘ఎంతొ ఆరాటపడుతు జీవింతు వౌర
మృతియె లేకున్న రుచి ఏది బ్రతుకులోన’’

-అని గాలిబ్ అన్నట్లు, జీవించి వుండగానే మరణం పట్ల సజావైన దృక్పథం ఏర్పడాలి. చాలామంది మృత్యుభయంతో అనుక్షణం చస్తూండడం కూడా చూస్తూంటాం. ఏ పనిచేసినా అందరిలా చేయనివాడు కూడా అందరిలాగే చచ్చిపోతాడు. పాలగుమ్మి పద్మరాజుగారి ‘వియ్యన్న తాత మరణం’ కథ ఈ సంకలనంలో వుంది. ఆ మాటకొస్తే ఆయనవే ‘బాల్యం’, ‘గాలివాన’ కథలూ వున్నాయి. ‘మరణాన్ని గౌరవించిన రచయితల్లో పాలగుమ్మి పద్మరాజుగారి తరువాత ఎవరయినా.. ’అంటారు గోపాలం. ‘మరణ తరంగం’ పేర గోపాలం గారు వివిధ భాషలనుండి అనువదించిన పదహారు కథలు ఇందులో వున్నాయి. వివిధ ప్రపంచ భాషా కథలివి. పాలగుమ్మి పద్మరాజుగారి శత జయంతి సందర్భంగా ‘కథానికాజీవి’ వేదగిరి రాంబాబు శ్రీ వేదగిరి కమ్యూనికేషన్స్ పేర వీటికి గ్రంథరూపం కల్పించారు.

‘‘మనం పుట్టిన మరుక్షణం నుంచే చావుమొదలవుతుంది. ఈ సంగతి ఎవరికీ నచ్చదు. ఎవరికీ అర్థం కాదు. మనిషి బతుకు కథకు చావు ఒక అందమైన అంతం. వద్దంటే అది ఆగదు! ఎప్పుడొస్తుందో తెలియదు. కనుకనే చావంటే అదొక అర్థం గాని విషయం!మరణం మనిషిని రకరకాలుగా తాకుతుంది. బుజ్జగిస్తుంది. బాధ పెడుతుంది. బాధనుండి విముక్తివస్తుంది. కావలసిందల్లా మనం మరణం గురించి అర్థం చేసుకోవడమే!’’ అంటారు గోపాలం.

ఇందులోని పదహారు మరణ తరంగాలూ ఆ అర్థం చేసుకునే క్రమంలో ఉపకరించేవే. ‘మృత్యువంటే?’అనే రచనలో పోయినవాళ్ళకోసం దుఃఖించడం వ్యర్థం అన్న భావన వుంది. ‘‘పిన్నవారూ, పెద్దవారూ, అజ్ఞులూ, విజ్ఞులూ అందరూ మరణానికి సమానులే. తండ్రి కొడుకును కాపాడలేడు. తల్లి కూతురిని కాపాడలేదు. ఎవరూ ఎవరినీ కాపాడలేరు. అందుకని శాంతి కోరుకున్నవారు మరణంవల్ల కలిగే దుఃఖాన్ని త్యజించాలి!’’ అని బోధించాడు బుద్ధుడు. దక్షిణ అమెరికా, టర్కిష్ జానపద కథలూ ఇందులో అందించారు రచయిత. మిగిలిన జీవిత ఘటనల్లో ఎంతటి వైవిధ్యం కనబడుతుందో చావులోనూ అంత వైవిధ్యం కనబడుతుంది అన్న ‘ఉదయం’ కథలోని మాట సత్యం.

మడగాస్కర్ ప్రజల జానపద కథలో మనిషే మరణాన్ని కోరుకున్నాడనే విషయం వుంది. మీకెలాంటి మరణం కావాలో కోరుకోండి అని తొలి మానవుల జంటని దేవుడు అడిగాడట- ‘చంద్రుడి లాగానా? చెట్టులాగానా?’ అని.
చంద్రుడయితే తరిగి తరిగి ఒకనాడు మాయమవుతాడు. కానీ తిరిగి తను పుడతాడు. పెరుగుతాడు. కానీ చెట్టు విత్తులనూ, పిలకలనూ విడిచి తాను నశిస్తుంది. తన సంతతి మాత్రం సాగుతూనే వుంటుంది. సంతానం అవసరం లేదనుకుంటే చావుకూడా వుండదు. కానీ ఆ ఇద్దరు తొలి మానవులే ఎన్నాళ్ళు ఎవరికోసం బ్రతకాలి అందుకని వారు పిల్లలే కావాలని దేవుణ్ణి అడిగారట. అంచేతే మనం పోతాం, మనవారు వుంటారు అది సాగుతూంటుంది. ‘మృత్యుభోజనాలు’ కథ ఒళ్ళు జలదరింపచేస్తుంది. ఎవరైనాపోతే ఆ ఇంట వండుకోరు. పక్కవారు ఎవరైనా భోజనం పంపిస్తారు. ఈ టర్కిష్ కథలో ఆకలి ఆరాటాన్నీ, ఆర్తినీ విశదపరుస్తూ దరిద్ర స్వరూపానికి పరాకాష్టగా- పిల్లవాడు జ్వరం వచ్చిన ‘‘అన్న చచ్చిపోతే మూల బంగళావాళ్ళు భోజనం పంపిస్తారు కదూ!’’ అని తల్లిని అడుగుతాడు. ఇటాలియన్ కథ ‘యుద్ధం’, ఫ్రెంచ్‌కథ ‘ప్రియురాలి కోసం’ జపాన్ కథ ‘దేశభక్తి’ అర్జెంటీనా కథ ‘గొడ్డలివేటు’ అన్నీ మృత్యువుతో ముడివడిన కథలే.‘సహజ మరణాలకన్నా హత్యలు, ఆత్మహత్యలు, ప్రమాదాల్లో ప్రాణం కోల్పోవడాలు వార్తాపత్రికల్లో ప్రముఖంగా వస్తూంటాయి. సెలబ్రిటీల చావులు, అంతిమ సంస్కారాల ఫొటోలతో సహా సంతాప సందేశాలతో సహా అచ్చవుతూంటాయి. చావు అందరికీ ఒకటే అ యినా- చనిపోయినవారి గురించిన మీడియా కవరేజ్‌లు, నివాళి వ్యాసాలతో ‘చచ్చే చావుగా వుంద’ని వాపోయేవాళ్ళూ వున్నారు. మ రణం తరువాత తన గురించి సమాజంలో, కుటుంబ సభ్యులలోనూ ప్రకంపనలూ, ప్రతిస్పందనలూ మరణించినవారికి తెలుస్తాయో లేదోకూడా తెలియదు. ఆత్రేయ అన్నట్లు-

పోయినోళ్ళందరూ మంచోళ్ళు
ఉన్నోళ్ళు పోయినోళ్ళ తీపిగుర్తులు..

మరణ తరంగం అంతరాంతరాల్లో ఆలకించదగిన సముద్రం ఘోష. గోపాలం రేపిన ‘అల’జడి ఆహ్వానింపదగింది.

-సుధామ,03/01/2015,ఆంద్రభూమి – శనివారం – అక్షర.

మరణతరంగం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

మరణతరంగం on kinige

MaranaTarangam600

Related Posts:

‘వటపత్రశాయి’ పుస్తకం పై సమీక్ష

ఆధునిక తెలుగు కథాసాహిత్యంలో సుపరిచిత కథకులు సింహప్రసాద్‌గారు. పతనమవుతున్న మానవత్వ విలువలపై ఆవేదనతో రాస్తున్న అతికొద్దిమంది రచయితల్లో ఆయన ఒకరు. వర్తమాన జీవనంలోని సున్నిత అంశాలపై హృద్యంగా రాస్తున్న కథలు, నవలలు ఆకట్టుకుంటున్నాయి. గత నాలుగు సంవత్సరాల్లో వివిధ దిన, వార, మాస పత్రికలు నిర్వహించిన కథల పోటీల్లో పురస్కారం పొందిన ఇరవై కథలతో ‘వటపత్రశాయి’గా ఏడవ కథాసంపుటిని వెలువరించారు. పోటీకి వచ్చిన కొన్ని వందల కథలనుండి ఎన్నుకున్న కథ అంటే సహజంగానే ఆసక్తి కల్గుతుంది. మన చుట్టువున్న రకరకాల వైవిధ్య జీవితాల్ని పరిచయం చేస్తాయి.
మానవ సృష్టి నిరంతరంగా సాగుతూనే సమాజముంటుంది. గత కొన్ని దశాబ్దాలుగా పిండదశలోనే పిల్లలను తొలగించుకుంటున్న దుస్థితిని మనం చూస్తున్నాం. మాతృత్వం చాలా గొప్ప సంప్రదాయమని చాటిచెప్పిన కథ ‘వటపత్రశాయి’. పిల్లలను కనడానికి అనువైన యవ్వన కాలాన్ని కాదనుకొని డబ్బు సంపాదనకై పరుగుపెడ్తున్న దంపతులకు చెంపదెబ్బలాంటి కథ ఇది. కుటుంబ జీవనంలో స్ర్తీని ఒక సంపాదన వనరుగాకాక జగన్మాతగా చూడాలని, ప్రతి బిడ్డా వటపత్రశాయేనని చెప్పిన కథ ఆలోచింపజేస్తుంది. ఇతర పనులను వాయిదావేసుకున్న ఫర్వాలేదు కాని తల్లికావడాన్ని వదులుకోవద్దని నేటి తరానికి హితవుచెప్పిన కథ ఇది. మనం సుఖంగా ఉంటేనే సరిపోదు మన చుట్టు ఉండేవాళ్ళుకూడా బాగుండాలి. అనాథ పిల్లలకోసం నడుపుతున్న ఆశ్రమానికి సహాయం చేయడంకోసం అన్నపూర్ణమ్మ రోజు వండుకునే బియ్యంలో పిడికెడు తీసి పక్కనపెట్టి, నెల రోజుల తర్వాత ఆ బియ్యాన్ని నిర్వాహకులకు ఇచ్చి, వాళ్ళకు కొంత సహాయపడగలిగినందుకు తృప్తిచెందుతుంది. తమ పిల్లలు తమకు పెట్టకపోయినా పింఛన్ డబ్బులతో కాలం వెళ్లదీస్తున్న వృద్ధులు వాళ్ళు. తాము రోజు తినే తిండిని తగ్గించుకుని సహాయం చేస్తారు. మానవీయతకు అద్దంపట్టిన కథ ‘గుప్పెడు.’
‘వంశవృక్షం’ కథలో నీ ఎదుగుదల మూలాలను తెలుసుకోవాలని సూచిస్తారు. ఉద్యోగ జీవితంలో అవినీతి అక్రమ సంపాదనలో కూరుకుపోయి, తమకు నీడనిచ్చిన కుటుంబాన్నే మరిచిన ఉదంతం బాధను కల్గిస్తుంది. పేద పురోహితుడి అశక్తికి కారణం తనదగ్గర డబ్బు లేకపోవడం. తన పూర్వీకులు సహాయం కోరిన వాళ్ళను ఆదుకొని ఆస్తులను కోల్పోతారు. ఆ రెవెన్యూ అధికారి కుటుంబం కూడా వాళ్ళు అందించిన సహకారంతోనే నిలిచింది. ఆ కుటుంబం కష్టాల్లోఉంటే సహాయం చేయాల్సిందిపోయి డబ్బులకోసం సతాయించడం చూస్తాం. నేటి మానవ నైజానికి నిదర్శనమీ కథ. సాఫ్ట్‌వేర్ రంగంలో పనిచేస్తున్న మహిళలపై జరుగుతున్న అత్యాచార యత్నాలను ధైర్యంగా తిప్పికొట్టి, తగిన బుద్ధిచెప్పిన కథ ‘ఓ సీతకథ.’ ఒక లంబాడీ మహిళ బతుకుకై ఆర్ట్స్ విద్యార్థులకోసం తన అందమైన యవ్వనాకృతుల్ని అర్పించిన దీనగాథ ‘మోడల్’కథ. ఆమె దేహాన్ని చిత్రించి ఎంతోమంది గొప్ప చిత్రకారులైనారు. ఆమె ఆకలి మాత్రం తీరలేదు. చివరికి ఆమె శవంగా మారినా మోడల్‌గా ఉండి దహన ఖర్చులను సంపాదించుకున్న తీరు ద్రవింపజేస్తుంది.
కార్పొరేట్ విద్య అందించే డబ్బుకు దాసోహమన్న గణిత మేధావి సూరిబాబు గుర్తింపుకై పడిన తండ్లాటలో చదువుచెప్పిన గురువునే తక్కువచేసి ఆలోచించుకుంటాడు. పూర్వ విద్యార్థులు అందరు కలిసి ఆ గురువుకు సన్మానం చేయాలను కుంటారు. గురువు మాత్రం నాకన్న విశేషమైన కృషిచేసిన నా శిష్యుణ్ణి సన్మానం చేస్తానని సూరిబాబుకు సన్మానం చేస్తాడు. దాంతో అతనిలోని అహంకారం పటాపంచలవుతుంది. గురువు ఔన్నత్యాన్ని చాటిచెప్తూనే నేటి విద్యారంగంలోని అవలక్షణాలను కూడా చర్చించిన కథ ‘పరబ్రహ్మం.’
రైతులకు గిట్టుబాటు ధర లేక పంటలు వేయమని సమ్మెచేస్తున్న పట్టించుకోని ప్రభుత్వాల తీరును ఎండగట్టిన కథ ‘రోమ్-నీరో-్ఫడేలు’. ఆడపిల్లల జనాభా తగ్గడంతో పెళ్ళికోసం పరీక్షలురాసే రోజులు రానున్నాయని హాస్యంగా చెప్పిన కథ ‘రేపింతే’. ప్రపంచీకరణ ప్రభావంతో ప్రతీది వినోదభరితంగా ఉండాలనే మీడియా ప్రభావంవల్ల మానవత్వం మసకబారుతున్న వైనాన్ని కుండబద్దలుకొట్టినట్లు చెప్పారు ‘విష పరిష్వంగం’ కథలో. ఒక నిరుద్యోగి ఉరిని ఈవెంట్‌గా మార్చుకున్న వ్యాపార కోణాన్ని చూపి నివ్వెరపోయేట్లు చేశారు. మార్పు సహజం. రెండు దశాబ్దాల క్రితందాక కూడా కంప్యూటర్ల ప్రభావం లేదు. టైపు మిషన్‌లతో ఉపాధి చూసుకున్నవారు ఉన్నారు. ఆధునిక సాంకేతిక పరిజ్ఞానంతో శరవేగంగా వచ్చిన ప్రగతితో ఆ కుటుంబాలవారు ఉపాధికి దూరమయ్యారు. ఐనా నమ్ముకున్న వృత్తే కాపాడుతుందని నమ్మిన వృద్ధుని కథే ‘పాతనీరు’. పాతది పనికిరాదనే దృక్పధాన్ని నిరసించే కథ ఇది. ఒకప్పటి పాత నీరు కొత్తదే అని తెలిపిన కథ. దేని ఉపయోగం దానికి ఉంటుందని తెలుస్తుంది. నేటి అవినీతి ఉద్యోగులకు బుద్ధిచెప్పటానికి ఒక తెలివైన పౌరుడు లంచంగా దొంగనోట్లును ఇస్తాడు. దాంతో ఆ ఉద్యోగి పడిన అవస్థల కథే ‘గాంధీతాత నవ్వేడు’. నగరంలో పెరిగిన సెల్‌టవర్ల మూలన అంతరిస్తున్న పక్షుల గూర్చిన కథ ‘వాయసం.’ పిండాలు తినే కాకులు కనబడవు. మారిన అలవాట్లు కాకులకు తిండి లేకుండా చేశాయని ఆవేదన చెందుతారు. చివరికి పిండాలు తినడానికి కాకులు రావు కాని కుక్కలు ఎగబడుతున్నాయని వాస్తవ స్థితిని చిత్రీకరించారు. సర్‌గోసి మదర్ గూర్చిన కథ ‘తల్లీ నిన్నుదలంచి..’ పేదరికంలో మగ్గుతున్న ఒక కుటుంబం గర్భాశయాన్ని అద్దెకివ్వడం ద్వారా వచ్చే ఆదాయంతో బతకాలనుకుంటే, బిడ్డను కన్న తర్వాత వీసా సమస్యతో బిడ్డను వదిలించుకుంటే ‘విత్తనం నాదికాకపోయిన భూమినాదే’ కాబట్టి నేనే పెంచుకుంటానని ఆ తల్లి ధైర్యంగా బిడ్డను స్వీకరిస్తుంది.
మనిషికి నిజమైన ఆనందం సంపాదనలో లేదని పదుగురికి సహాయం చేయడంలోనే ఉందని చెప్పే కథ ‘మనిషి దేవోభవ’. అత్తాకోడళ్ల పోట్లాటలు కొత్తకాదు కాని టీవిల దగ్గరనుండి నేటి ఫేస్‌బుక్ వాడకం దాకా వాళ్ళ రుసరుసలు, తిట్టుకోవడాలు హాస్యంగా వివరిస్తూనే కొడుకుగా, భర్తగా పాత్రలను పోషిస్తూ ఆ పురుషుని బాధలను వర్ణించారు ‘ఒక యుద్ధం ఒక సంధి ఒక శాంతి’ కథలో. భార్యభర్తల మధ్య ఉండే చిన్నచిన్న సంఘటనలకు విపరీతంగా ఆలోచించి చిన్నాభిన్నం అవుతున్న ఇతివృత్తాలు అనేకంగా ఉన్నాయి. అందుకే తొందరపడి కఠిన నిర్ణయాలను తీసుకోవద్దని చెప్పేకథ ‘మనసా! తొందరపడకే.’ విలాసానికి బానిసైన ఒక బ్యాంకు ఉద్యోగి పతనావస్థకు దర్పణం ‘జారుడుమెట్లు’కథ. ‘రెయిన్‌రెయిన్ గో అవే’ రైమ్స్ నేర్పే కానె్వంటు చదువులను నిరసిస్తూనే వాన అవసరాన్ని చాటిచెప్పిన కథ ‘వాన వాన వల్లప్ప’. కుటుంబం ఆనందాల హరివిల్లు అంటారు. ఒక ఇంజనీరింగ్ ప్రొఫెసర్ ఉమ్మడి కుటుంబంగూర్చి పెద్ద ఉపన్యాసం ఇస్తే, ఒక చానల్ రిపోర్టర్ ఆయన అబద్ధాలను బట్టబయలుచేసి, తల్లిని మరిచిన నీది ఒక ఉమ్మడి కుటుంబమా? అని నిలదీస్తుంది ‘ఆత్మపదార్థం’ కథలో. ఇంకా కుల వివక్ష కొనసాగుతుందని, కష్టాల్లో ఉన్నవాళ్ళకు వాటి పట్టింపు ఉండదని, ఉత్తరాఖండ్ వరదల్లో యాత్రికులను సైనికులు కాపాడిన సాహస విధానాన్ని చక్కటి కథనంతో వివరించిన కథ ‘గబ్బిలం’. మొత్తంమీద విభిన్న సామాజిక అంశాలపై రాసిన సింహప్రసాద్ కథలు ఒక్కసారైన చదవాల్సిందే. కొలకలూరి ఇనాక్, పోరంకి దక్షిణామూర్తి, రాచపాళెం చంద్రశేఖరరెడ్డి ముందుమాటలు ఈ సంపుటికి అదనపు ఆకర్షణ.

-గోపగాని రవీందర్ 20/12/2014.ఆంద్రభూమి – శనివారం – అక్షర

“వటపత్రశాయి” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

‘వటపత్రశాయి’ on kinige

 

Vatapatrasai600

Related Posts:

“మశాల్” పుస్తకంపై సమీక్ష

ప్రతి ఉద్యమం సాహిత్యాన్ని సృష్టిస్తుంది. ఉద్యమంలోని నవ్యత సాహిత్యంలో కొత్త ఇతివృత్తానికి పాదుపోస్తుంది. కొన్నిసార్లు పాత శిల్పాన్ని తలదన్నే శిల్పం కూడా జతకూడుతుంది.మలి దశ తెలంగాణా ఉద్యమం వందలాది కవులను కొత్తగా తయారుచేసింది. అభ్యుదయ, ప్రగతిశీల విప్లవ కవులు కూడా ఇందులో పాల్గొన్నారు. ఇంత పెద్దఎత్తున ఈ అరశతాబ్దంలో ఏ ఉద్యమంలో రానంత సాహిత్యం వెలువడింది. ఐతే కొన్ని కారణాలవల్ల ఆ పుస్తకాల గురించి, కవుల గురించి లోకానికి తెలియరాలేదు. అంటే వాటిని సమీక్షించే పరిచయాలు, వాటిపై రాసిన వ్యాసాలు ఎక్కడా సరిహద్దులు దాటలేదు. రావలసిన పత్రికల్లో సైతం వ్యాసాలు రాలేకపోయాయి. అలాంటి పుస్తకాలలో వనపట్ల సుబ్బయ్య రాసిన ‘మశాల్’ సుదీర్ఘ కావ్యం ఒకటి. 192 పేజీల కావ్యం చదవడం మొదలుపెడితే ఆపరు. సాధారణంగా కవిత్వం చదివే పాఠకులు తగ్గిపోతున్నారు. కారణం ఏమంటే- దానిలో పునశ్చరణ అధికం. చెప్పిందే చెప్పి పాఠకుడిని విసిగిస్తారు. అసలే అర్థంకాని భాష. భావ చిత్రాల మర్మం తెలియదు. స్పష్టత ఉండదు. ఉంటే సమాసాల అన్వయత కుదరదు. కవి లేని పాండిత్యం చూపాలని ఆశించడంవల్ల కవిత సంక్లిష్టం అవుతున్నది. అలాంటి రోజుల్లో సుదీర్ఘ కావ్యం రాసి మెప్పించాడు కవి. ఎక్కడా చదవడం ఆపే పరిస్థితి రాదు. పాఠకుడికి సమయం చిక్కాలే తప్ప పుస్తకం చేతిలోకి తీసుకుంటే పక్కన పెట్టబుద్ధికాదు. కవి ఉద్రేక పూరిత స్వరం వెంబడి పాకే పాముల్లా అక్షరాల వెంట పడతాం. సుబ్బయ్య చేతిలోని కలం అలవోకగా పాదరసంలా కవిత్వం జారవిడిచింది.మిల్టన్ ‘వేస్‌లాండ్’ చదివిన పాఠకుడు ఇప్పుడు ఎవరైనా ఉంటే అలాంటి అనుభూతే ఈ పుస్తకం చదివాక కలిగిందని చెబుతాడు. ఉద్యమం ఇతివృత్తం అయినా చెప్పే విధానంలో ఎంతో నవ్యత సాధించాడు. మాండలిక పదాలు అంటామా లేదా అన్నది ప్రశ్నకాదు. జీవద్భాషా పదాలను ఉపయోగించుకున్న తీరు ప్రశంసనీయం. ఆ పదాలను వాడాలని వాడి పాఠకుడికి వివరణ ఇచ్చే పాత సంప్రదాయానికి గండికొట్టాడు. ఆ పదాలు చెంగు చెంగున ఎగిరి కవిత్వపు కాసారంలో కలువపూవు అందాలై మెరిశాయి. ఉద్విగ్నభావన కవితకు వేడి పుట్టించింది. కనబడని ఆవిరి అక్షరాలై కదిలినప్పుడు పాఠకుడు విచలితుడు అవుతాడు. రాతి సొరికలో కదలాడే మర్రి మొలకలా భావం పెరిగి పెద్దదై మనని ఆవరిస్తుంది. పచ్చపురుగులున్న తోటలో ముద్దబంతిపూలు వాలిపోయినట్లు పారిభాషిక పదాలు కవిత్వాన్ని ఖూనీచేస్తాయి. ఐతే ‘మశాల్’ ఆ పదాలు పూబంతుల తోరణాల్ని చూసి విప్పారిన దృష్టులవుతాయి.
ఉద్యమపు ప్రతి మలుపుని చరిత్రకారుడు గుర్తుంచుకుని తేదీలతో రాసినట్లు చారిత్రక క్రమవిధానాన్ని కవి పాటించి కవిత్వం చేశాడు. చాలామంది కవులకు చక్కని రహస్య కవితాశక్తి ఇది.ఒక నాలుగేండ్ల కాలంలో సాగిన మహత్తర ఉద్యమాన్ని వస్తువుగా తీసుకున్నా ఎన్నో దశాబ్దాల చరిత్రని తడుముతూ అనేక విషయాలను కవిత్వీకరిస్తాడు. కవి, తాను ఉద్రేకపడి రాయడం ఒక పద్ధతి. పాఠకులకి అంతే సంచలనం కలిగించడం ఒక పద్ధతి. ఇలాంటి భావ సంచలనం కలిగి ఉన్న కవిత్వం ప్రగతిశీల కవిత్వం నుండి ఈ మధ్య రాలేదు. ఇంత పెద్ద రచన కూడా లేదు. కవులు తమకుతాము స్వచ్ఛందంగా ఇల్లొదిలి, వీధి వదిలి, ఊరొదిలి, చేస్తున్న పనులు నదిలో ఉద్యమం గుమ్మాలపై నిలిచి కాహళి మోగించడం కొత్త. సుబ్బయ్య వృత్తిరీత్యా, కులం రీత్యా క్షురకుడు. అతని చేతిలోని కవికి ఉన్న పదనుని, నేర్పుని కలానికెక్కించాడు. అక్కడే అతను కవిగా గెలిచాడు. లబ్దప్రతిష్టులైన కవులు ఎందరో రాశారు. కాని చరణాల పేరు పదాల కుదింపు మాత్రమే.
మశాల్’ అంటే దివిటి. దీని వెలుగుని అస్తిత్వ అలజడి చేయడం ఒక పని. చరిత్ర లోతుల్లో పైకి కనుపించే అన్యాయాలను లోలోతుల్లోంచి అర్థంచేసుకుని విశద పరచడం రెండో పని. దివిటీ వెలుగు చిన్నదే. కాని దివిటీ కవిత్వ సంకేతార్థంలో చైతన్యం అని, ప్రేరణ అనీ, స్ఫూర్తి అని, చీకటితో పోరాడే ఖడ్గం అని అర్థం. అందుకే సమయోచితమైన పేరుపెట్టాడు.కవి వచనంలో ఒక తూగుని కూడా సాధించాడు. అది ఉపయోగించిన పదజాలంవల్లో లేదా భావాల క్రమ నిర్మాణంవల్లో ఏర్పడింది. ‘‘భగభగ మండే సూర్యుని కంట బొటబొట కన్నీళ్ళు కారడం’’ అన్నా, ‘‘నమ్మకం సడలించిన నక్షత్రాలను ఎరి/ మోదుగు పూదండలు అల్లి’’ అన్నా, నిశ్శబ్ద పావురాళ్ళనె చూశారు/ వాటి రెక్కల కింద తల్వార్‌లు చూడలేదు’ అని రాసినా తూగు ఎక్కడా తప్పలేదు. చదివించే గుణానికి తూగు అవసరం.పోరాడడానికి త్యాగాలొద్దు/ మండె మశాల్తీలై అనంతంగా వెలగాలి అని అన్నాడు. మశాల్‌ని మశాల్తీలు అని ప్రయోగించడం తూగు కోసమే. ‘‘సామవలతో కుందేళ్ళకు సంసారం ఎట్ల’’ వంటి ప్రాకృతిక అంశాన్ని రాజకీయ చేయడం కవికి కాలంతో పుట్టిన విద్య. మరోచోట ‘‘ఒక ఒప్పందం/ వెయ్యి ఆవుల దొప తీర్చాలె/ లేకపోతే సామ జీవులు సైతం యుద్ధప్రకటనలు చేస్తయి’’ అని హెచ్చరిస్తాడు.ఈ కవి లోగడే ‘వొల్లెడ’ కవితా సంకలనం తీశాడు. ‘జల్‌జలా’లో ఇతర కవులతోపాటు ఇరవై కవితలు ప్రచురించాడు. అప్పుడే విమర్శకుల దృష్టి నాకర్షించాడు. కాని ‘మశాల్’ వెలుగుని మరచిపోకుండా చేశాడు. అతని అన్ని భావాలతో ఏకీభవించినా, విబేధించినా అందరూ అతని మశాల్ వెలుగుని మాత్రం గుర్తించి తలలూపేలా చేశాడు. ఈ కవిత్వం ప్రాంతీయ మహోద్రేక కవితగా గుర్తించవచ్చు.
ఈ కవిత్వంలో స్ర్తీలను, యువకులను, విద్యార్థులను, అమరవీరులను పదే పదే గుర్తుచేసి వారి త్యాగాల బాటలో పాఠకులని ప్రయాణింపచేస్తాడు. వేయి మంది వీరులను ఉద్యమానికి విరాళంగా ప్రకటించిన వీరమాతలను కొనియాడడం ఎవరైనా హర్షిస్తారు. ప్రజాస్వామ్యంలో జనం తమ శక్తిని ప్రదర్శించినట్లే అక్షరాలు కూడా అమోఘమైన రీతిలో స్పందించాయి. ఇప్పుడు ఉద్యమం ముగియలేదు. ముందు పరుచుకునే ఉంది. న్యాయంకోసం, తగిన వాటాకోసం ఎదురు చూస్తున్నది. సుబ్బయ్య తన వచనాన్ని పదునెక్కించి ప్రజల తరఫున నిలుస్తాడని భరోసా ఇస్తుంది ‘మశాల్’.

-జయధీర్,ఆంధ్రభూమి – అక్షర, 06/09/2014

 

“మశాల్డిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

మశాల్ on kinige

 

Mashaal600

Related Posts:

సగటు జీవితాల్లో హాస్య చతురత – “సుబ్బలక్ష్మి కథలు” పుస్తకంపై సమీక్ష

‘చినుకు’ మాసపత్రికలో ప్రచురించబడిన చిన్న చిన్న కథలతో ఈ పుస్తకాన్ని ప్రచురించారు. మధ్యతరగతి సంసారాల్లో జరిగే సంఘటనలకు కాస్తంత హాస్యం జోడించి కథలుగా రూపొందించారు. సుబ్బారావూ సుబ్బలక్ష్మీ ఈ కథలలో నాయికా నాయకులు.పెన్ను, సెల్‌ఫోను లాంటి ఇంగ్లీషు పదాలు తెలుగులో కలసిపోయాయి. మాతృభాషాభిమానంతో అన్నీ తెలుగులో పలకాలని ప్రయత్నిస్తే ఎంత గందరగోళంగా ఉంటుందో తెలిపే కథ ‘బాబాయ్ అభిమతం’.శ్రీరామ నవమి పందిట్లోనుంచి చెవులు చిల్లుపడేటట్లు వస్తున్న పాటలకు తట్టుకోలేకపోయింది సుబ్బలక్ష్మి. బాగా ఆలోచించి మైక్ సెట్ కట్టేయించడానికి ఒక పథకం వేసి విజయం సాధిస్తుంది. ‘శ్రీరామనవమి’ కథలో ఇది కథాంశం.అన్నం తిన్నాక కంచం కడిగి బోర్లించడం మొదలుపెట్టాడు సుబ్బారావు. వద్దని సుబ్బలక్ష్మి చెప్తున్నా వినిపించుకోడు. కొన్నాళ్లయ్యాక పరిస్థితి మారిపోవడంతో కడగడం మానేస్తాడు సుబ్బారావు. ఇది ‘ఎంగిలి పళ్లెం’ కథ.పుస్తకమంతా ఇటువంటి చిన్న చిన్న సంఘటనలతో ఉంది. కథల సంఖ్య 21. పుస్తకం చివర ‘మల్లెతీగ’ పేరుతో ఒక నాటిక కూడా ఉంది. అందులోనూ హాస్యరసం ప్రధానాంశం.

-ఎం.వి.శాస్ర్తి,ఆంధ్రభూమి-అక్షర,27-09-2014.

సుబ్బలక్ష్మి కథలు” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

సుబ్బలక్ష్మి కథలు on kinige

 

SubbalaksmiKathalu600

Related Posts:

తెలంగాణ మాండలికంలో దళిత నవల – “సూర”నవల పై సమీక్ష

దళితులపై కొనసాగే ఆర్థిక, లైంగిక దోపిడీలను వివరించడంతోపాటు దళితులలో వున్న మూఢ విశ్వాసాలను, వెనుకబాటుతనాన్ని ‘సూర’ నవల చిత్రీకరించింది.ఊళ్లో బతకలేక మాల చెన్నడు, చంద్రి పట్నం వచ్చి కూలీనాలీ పనులు చేసుకుని బతుకుతుంటారు. తమ కొడుకు సూరడు చదువుకొని బాగుపడాలని వారి కోరిక. గారాబం, చెడు సావాసాలు మరిగిన సూరడ్ని దండించి బంధువు, కాలేజీ విద్యార్థి అయిన కేశవులు ఓ దారికి తెస్తాడు. పటేల్ కాశిరెడ్డి తమ ఇంట్లో పని చేయడానికని సూరడ్ని, చదివిస్తానని చెప్పి సర్కారు బళ్లో వేస్తాడు. కాశిరెడ్డి ఆర్థిక పరిస్థితి క్షీణించడంతో సూరడు హాస్టల్లో చేరిపోతాడు. హాస్టల్స్‌లో కొత్త ఉద్యోగాలు వస్తున్నాయి. పదివేలు తెచ్చుకుంటే అందులో కుదురుస్తానన్న కాశిరెడ్డి మాటలు నమ్మి చెన్నయ్య, చంద్రి ఊళ్లో తమ వంతుకు వచ్చిన పొలాన్ని అయినకాడికి అమ్మి పదివేలు తెచ్చి కాశిరెడ్డి చేతుల్లో పోసి, తర్వాత తాము మోసపోయామని తెల్సుకుంటారు. చేసేది లేక తిరిగి ఊరికి వచ్చి గుడిసె వేసుకుంటారు. తాగుడు మరిగి అనారోగ్యం పాలయిన చెన్నడు మంత్రాలు, భూతవైద్యుడు చుట్టూ తిరుగుతుంటాడు. తల్లిదంఅడుల కీచులాటలు, దాయాదులతో పోట్లాటలు చూసి విసిగిపోయిన సూరడు ఊరికి రావడం మానేస్తాడు. కాలేజీలో చేరిన సూరడికి నాగిరెడ్డి పటేల్ కూతురు పరిచయం కాస్తా ప్రేమలోకి దిగుతుంది. నాగిరెడ్డి తన కూతురు సూరడితో తిరగడం పరువు తక్కువని భావిచి సూరడ్ని చంపడానికి ప్రయత్నిస్తాడు. దాంతో ప్రేమికులిద్దరూ లేచిపోయి పట్నంలో కాపురం పెడతారు. అక్కడి నుండి సూరడు ఊరికి వచ్చి ఊళ్లో చేతబడి, మూఢ నమ్మకాలను పోగొట్టటానికి కృషి చేస్తాడు. ఊళ్లో మాల, మాదిగ పిల్లలను చేరదీసి వాళ్లకు చదువు చెప్పి రెండు గూడేలను ఏకం చేద్దామనుకుంటాడు. నాగిరెడ్డి ఊళ్లోని దళితుల పాస్‌బుక్కులు తీసుకునిపోయి బ్యాంకులో పెట్టి, అప్పులిప్పిస్తానని సంతకాలు చేయిస్తాడు. వచ్చిన డబ్బంతా తానే కాజేస్తాడు. అప్పు కట్టమని దళితులకు నోటీసులు వస్తాయి. నిలవేసిన దళితులను బెదిరించి పోలీసులతో కొట్టిస్తాడు. మరల సూరని మీద హత్యా ప్రయత్నం చేయిస్తాడు. దీంతో విసిగిపోయిన దళిత గారీబు పటేల్‌ను పొడిచి చంపి పోలీసులకు లొంగిపోతాడు.
ఇందలో మంచిగా బతుకుదామని చెన్నయ్య, చంద్రి ఊరు విడిచి పట్నం వస్తారు. ఊళ్లో వున్న పొలం అమ్ముకుని, ఆ డబ్బు పటేల్‌కిచ్చి మోసపోతారు. దాంతో తిరిగి ఊరికి వచ్చి కీచులాటలు, పోట్లాటలతో తమ జీవితాన్ని గడిపేస్తారు. అలా కాకుండా పటేల్ మోసం చేసినా, ఇక ఊళ్లో ఏం లేదని తెలుసుకుని పట్నంలోనే స్థిరపడి బతకడానికి ప్రయత్నం చేస్తే బాగుండేది. పట్టుదల, ముందుచూపు, స్వంత నిర్ణయాలతో, నీతివంతురాలిగా కనిపించే చంద్రి, సూరడు పెద్దవాడు కావడంతో గయ్యాళిగా, అప్రధాన పాత్రగా మారిపోవడం ఏం బాగాలేదు. అలాగే జయలక్ష్మి ప్రేమ వ్యవహారం కూడా పచ్చిగా, ఫాస్ట్‌గా, ఏకపక్షంగా సాగిపోతుంది. సహజత్వం లోపించింది. బాగా చదువుకుని ప్రయోజకుడై సూరడు దళితోద్ధరణకు పూనుకుంటే బాగుండేది. అలా కాక ఒక లక్ష్యం అంటూ లేకుండా తెగిన గాలిపటంలా ప్రవర్తించే సూరడు తన సుఖం తాను చూసుకునే వాడిలా చిత్రీకరించడం వల్ల ఆ పాత్ర ప్రయోజనమే దెబ్బతింది. ఆదర్శవాదం జోలికి పోకుండా యధాతథ వాదంతో నవల నింపేసినట్లు అనుకోవాలి. దళితులలో వున్న అజ్ఞానాన్ని, అమాయకత్వాన్ని ఆసరాగా చేసుకొని వాళ్లను పూజలు, మంత్రాల పేరిట ఎలా దోపిడీ చేస్తున్నారో ఇందులో చక్కగా తెలియజేశారు. గిరిజనులు హరిజనులే అన్ని ఉద్యోగాలను తన్నుకుపోతున్నారని అగ్రవర్ణాల వారు రెండు సందర్భాలలో తమ అక్కసును వెలిబుచ్చితే వారికిచ్చిన సమాధానాలు చెంపపెట్టులా ఉన్నాయి.
ఈ నవలను పూర్తిగా తెలంగాణ మాండలికం అందునా నల్లగొండ మాండలికంలో రాయడం విశేషం. ఇది ప్రాంతీయ మాండలికమే కాదు, కుల మాండలికం కూడా. ఉచ్ఛారణ పరమైన మాండలికాన్ని యథాతథంగా అక్షరీకరించడం వల్ల ఇది ఇతర ప్రాంతీయులకు ఒక పట్టాన అర్థం కావడం కష్టం. వస్తువును పక్కనబెడితే మాండలికాన్ని అభిమానించేవారు, రకరకాల మాండలికాల పట్ల ఆసక్తి గలవారు తప్పకుండా చదవాల్సిన పుస్తకం. పదేళ్ల కింద వచ్చిన ఈ పుస్తకం మళ్లీ రెండవ ముద్రణగా మన ముందుకు వచ్చింది.

-కె.పి.అశోక్‌కుమార్, ఆంధ్రభూమి-అక్షర,08/02/2014.

 సూరడిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

సూర on kinige

 

Sura600

Related Posts:

“చమత్కారం” పుస్తకంపై సమీక్ష

పుస్తకం పేరు ‘చమత్కారం’. చమక్కులు సరే నషాళానికి అంటే కారం కూడా ఉన్నదేమోనని వెదికితే చలవ మిరియాల కారమే దొరుకుతుంది. కబుర్లు చెప్పుకోనివాళ్లు కలసిమెలసి ఉండలేరు. మునిమాణిక్యం మొగుడూ పెళ్లాల సరసాలూ, విరసాలూ కలబోసిన స్వారస్యాన్ని మనకి అందించారు. శ్రీపాద వారూ తమ కథల్లో కొంత వాటా పంచుకున్నారు. పక్కవాళ్లని పలకరించకుండా ఉండలేరు కొంతమంది ప్రయాణాల పదనిసలలో. లోకాన్ని పట్టించుకోని రచయిత అందరూ అనుకునేట్లు నరకానికే పోతాడు. భమిడిపాటి ఎంచుకున్న గురుశిష్యుల సరస సంభాషణలు చదివితే ఏవో సినిమా పాటలు గుర్తొస్తాయి. ఒకోసారి ‘చెపితే వింటివ గురూ గురూ’ అంటే ‘వినకే చెడితిర శిష్యా శిష్యా’ అన్నట్టుంటుంది. భమిడిపాటి నూరిన చమత్కారాల్లో రాజకీయాలూ, విద్యారంగం, మహిళా లోకం, ప్రభుత్వ పథకాలూ, నరుల బలహీనతలూ వగైరా వగైరాలన్నీ ప్రస్తావనకొచ్చాయి.

ఆంధ్రభూమి,13-09-2014.

 చమత్కారం…! డిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

చమత్కారం…! on kinige

 

Chamatkaram600

Related Posts:

చమక్కులతో.. చక్కని గిలిగింతలు – “కొంచెం ఇష్టం కొంచెం కష్టం” పుస్తకంపై సమీక్ష

హాస్యం రాయడం అనుకున్నంత తేలిక కాదు. అందునా ‘కాలమ్’గా నడపడడం మరీ కష్టం. ‘శ్రీవారికి ప్రేమలేఖ’ చిత్ర కథా రచయిత్రిగా ఏనాడో గుర్తింపు పొందిన పొత్తూరి విజయలక్ష్మిగారు హాస్య కథా రచయిత్రిగా తదాదిగా మంచి గుర్తింపు పొంది, మంచి కథలనెన్నో వెలువరించారు. ఆంధ్రభూమి దినపత్రిక మహిళల పేజీలో మంచి కాలమిస్టుగా రాయడానికి ఎవరున్నారని ఎం.వి.ఆర్.శాస్ర్తీగారు ఓసారి మాటల సందర్భంలో అడిగినప్పుడు పొత్తూరి విజయలక్ష్మిగారి పేరు సూచించి ఆవిడతో ఆ విషయం చెప్పినప్పుడు, ఎడిటర్‌గారిని ఆవిడ కలవడం, అలా ‘కొంచెం ఇష్టం కొంచెం కష్టం’ కాలమ్ ‘భూమిక’లో ఏడాదికి పైగా వెలువడి పాఠకులను అలరించడం జరిగింది. నవలలు, కథలు రాశారు గానీ పొత్తూరి విజయలక్ష్మిగారు ‘కాలమ్’ రాయడం ఇదే మొదలు. కొంచెం కష్టం అనుకుంటూనే ఆవిడ ఇష్టంగా రాయడంతో పాఠకులు కూడా దీనిని ఇష్టపడ్డారు. స్ర్తిల పేజీలో కాలమ్ అంటే చీరలు, నగలు, వంటింటి కబుర్లు, ఆరోగ్య చిట్కాలు అన్న అపోహను అధిగమింపచేస్తూ సమకాలీన సమస్యలు మానవ మనస్తత్వాలు ఆఖరుకు రాజకీయాలు కూడా నేర్పుగా తన కాలమ్‌లోనికి ఒడుపుకుని విజయలక్ష్మిగారు కాలమ్ రచనలో తన పేరునే వరించారు. ‘పదం కాని పదం’ అంటూ ఊతపదాల గురించీ, పిల్లల్ని ఎవరింటికైనా తీసుకెళ్లడం గానీ, ఎవరైనా పిల్లలు ఇంటికొస్తే ఈ పిల్లలు వారితో ప్రవర్తించడం కానీ ఈరోజుల్లో ఎలా వుంటోందో వివరించే ‘అమ్మయ్య గండం గడిచింది’, అలాగే ఉచితానుచితాలు గురించీ, ఇస్ర్తిపెట్టె గురించీ, బఫే భోజనాల గురించీ, రహదారి ప్రయాణంలో వాహనదారు ‘సర్ట్ఫికెట్టు’ గురించీ, కాల్‌సెంటర్ల గురించీ, దైవాధీనం బతుకుల గురించీ, బహుమతుల కష్టాల గురించీ ఇలా ఒకటేంటి? అత్యల్పమనుకునే తేలికపాటి అంశాల గురించి కూడా చక్కని హాస్యాన్ని పండిస్తూ విశ్లేషించిన వ్యాసరచనలివి. పొత్తూరి విజయలక్ష్మిగారి శైలి హాయిగా కబుర్లాడుతున్నట్లు సరదాగా, సాఫీగా సాగిపోతుంది. అందువల్ల ఇవన్నీ చకచక చదివిస్తాయి.
అనేక సరదా అంశాల సమాహారం రచయిత్రి లోకజ్ఞతకు, వ్యవహార దక్షతకు దాఖలాగా అక్షర బద్ధమైన రచనలివి. ఈ కాలమ్‌లో భార్యలు, భర్తలు, కొడుకులు, కోడళ్లు, కూతుళ్లు, అల్లుళ్లు, మనుమలూ, మనుమరాళ్లు ఇలా బంధుమిత్ర సపరివార సమేత పాత్రలన్నీ అవసరార్ధం ఆవిడ చెప్పే విషయాల్లో ఆవిడ అనుభవ సంపదలోంచి జాలువారి పలకరిస్తుంటాయి. చక్కని చమక్కులు, వ్యంగ్య చురకలు, సామెతలు గుమ్మరించిన నవ్వుల కదంబం ఇది. ముఖాముఖి పలకరింపులు పోయి ముఖపుస్తక పలకరింపులు వచ్చాయంటూ చదివే అక్షరంమీద ప్రేమను పెంచే ప్రయత్నం చేసారు రచయిత్రి. ఈ పుస్తకానికి సరసి బొమ్మలు ముఖచిత్రంగా అమరడం ఓ విశేషం. ఎందుకంటే ఇప్పట్లో తెలుగు హాస్యంకు కొంచెం పెద్ద దిక్కుగా వున్న కార్టూనిస్టుగా సరసి, రచయిత్రిగా పొత్తూరి విజయలక్ష్మి గారలే ఆనుతున్నారు మరి. ‘చేదుకున్న వారికి చేదుకొన్నంత’గానీ, ఏ మాత్రం ‘చేదు’ లేని నిఖార్సయిన తీపి హాస్యం ఈ సంపుటి. చేతపట్టుకున్నాక కొంచెం.. కొంచెం.. అంటూనే ఎంతో ఇష్టపడగల పుస్తకాన్ని స ‘కాలమ్’గా వెలువరించిన రచయిత్రి కష్టానికి పుస్తకం కొని చదివి కొనియాడడమే చేయదగిన పని.

అల్లంరాజు,ఆంధ్రభూమి, 23-11-2014.

కొంచెం ఇష్టం కొంచెం కష్టం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

కొంచెం ఇష్టం కొంచెం కష్టం on kinige

 

KonchemIshtamKonchemKashtam600

Related Posts: