సాంస్కృతిక కడలిలో వ్యాస తరంగాలు..-‘‘రసతరంగిణి’’ పుస్తకంపై సమీక్ష

కవిత్వం, సంగీతం, నాట్యం, చిత్రం, నాటకం, జానపద రంగాలకు సంబంధించిన పరిచయ వ్యాసాల సంపుటి ‘‘రస తరంగిణి’’. ఏ అంశాన్నీ ప్రత్యేకించి అధ్యయనం చెయ్యకుండానే అనేక అంశాలపై విస్తరించిన వ్యాసాలివి. ఇందులో కొత్త ప్రతిపాదనలు ఉండవు. సిద్ధాంత చర్చ కనబడదు అని రచయితే చెప్పుకొన్నప్పుడు ఇక పేచీ ఏముంటుంది. అలాగని ఈ వ్యాసాలు ఉబుసుపోకకు రాసినవని అనుకొంటే పొరపాటే. ఏ రచన అయినా కొందరికైనా ఉపకరిస్తుంది. ఆలోచింపజేసి మనల్ని మనకి ఎఱుకపరుస్తుంది. ఇటువంటి రచనే ధర్మారావు రచన ‘‘రసతరంగిణి.’’
‘‘నన్నయ కవిత్వం నాద సౌందర్యం’’ అనేది తొలి వ్యాసం. సాహితీవేత్తలకి ఇదేమీ కొత్త అంశం కాదు. ‘‘తను కావించిన సృష్టి తక్కొరులకు చేతకాకుండా’’ ఉండేటట్టుగా భారతాన్ని సృష్టించింది నన్నయ కాదు- తిక్కన అని ఎఱ్ఱన కంఠోక్తి. సంగీత గుణం అసలు తెలుగు భాషలోనే వుంది. అజంత భాష కావటంవల్ల సంగీతానికి అనువైన భాష అయింది. ఇటాలియన్ కూడా అజంత భాష కావటంవల్లనే ‘‘ఇటాలియన్ ఆఫ్ ది ఈస్ట్’’ అన్నారు. అందరూ నన్నయ కవిత్వంలో అక్షర రమ్యత వుందంటారుగానీ పోతనతో పోలిస్తే నన్నయ స్థానం తర్వాతనే! అనిపిస్తుంది.
ఈ పుస్తకంలో గొప్ప వ్యాసం ‘‘మహాభారతంలో ధర్మస్థితికి అధోగతి’’ అనే వ్యాసం. సద్గురు శివానందమూర్తిగారి ఆంగ్ల ప్రసంగానికి ఇది తెలుగు సేత. అనువాదం అనిపించని అనుసృజన వంటిది. పాఠకుల్ని స్పందింపజేసే వ్యాసమిది. శ్రీనాథుడ్ని ఆంధ్ర జాతి కంఠీరవంగా పేర్కొంటూ రాసిన వ్యాసం విశేష రీతిలో సాగుతుంది. కాకరపర్తి సాంబయ్య కవి రాసిన అముద్రిత ప్రబంధం ‘‘విఘ్నేశ్వరాభ్యుదయం’’ విశిష్టతను వెలుగులోకి తెచ్చారు. ఆదిభట్ల, రాళ్ళబండి వంటివారి ప్రతిభా పాటవాలను వెల్లడించారు. ఆయా సందర్భాలలో వివిధ కవుల కవిత్వపు తీరుతెన్నుల్ని వివరించే వ్యాసాలు ఉన్నాయి.
‘‘తెలుగు అంతరించిపోతుందనే ఆందోళన అవసరం లేదు’’ అని ధర్మారావు అనటం సమంజసం కాదు. తెలుగు మాధ్యమానికి ప్రోత్సాహంలేదు. తెలుగు నేర్చుకోకుండానే తెలుగు నేలపై పెద్దపెద్ద అధికారులు కావచ్చు. ‘‘మావాడికి తెలుగురాదండి’’ అనేవారు. ‘‘నేను తెలుగులో మాట్లాడను, క్షమించండి’’అని పిల్లలకి ప్లకార్డులు తగిలించేవారు దూసి వారికి కనిపించలేదా! పూర్వం ఒక వాక్యంలో రెండోమూడో ఆంగ్ల పదాలుండేవి- ఇప్పుడో రెండోమూడో తెలుగు పదాలుంటున్నాయి. అంతరించటం అంటే ఇదే! ఒక్కసారి తమిళనాడు, కర్ణాటకలలోగల వారి మాతృభాషా స్థితిని పరిశీలించి వుంటే ఇలా అనేవారు కాదు.
‘‘స్వరం’’అనే విభాగంలో తెలుగువారికి గర్వకారణమైన సంగీత శిఖరాలను పరిచయం చేసి మన సంగీత ప్రాభవాన్ని గుర్తుచేశారు. నాట్యం, చిత్రం అంశాలలో కూడా దూసివారి అభినివేశం ప్రశంసార్హం. విస్మరిస్తున్న వ.పా. (వడ్డాది పాపయ్య)గారిని తెలియజేయటం అవసరంగా భావించారు. ‘‘కొన ఊపిరితో కొట్టుకుంటున్న కళ’’గా నేటి నాటకాన్ని పేర్కొనడం చాలావరకు సముచితమే. వారు పేర్కొన్న కారణాలతోపాటు ప్రభుత్వ ప్రోత్సాహం లేకపోవడం, విద్యావంతులు, సాహితీవేత్తలు నాటకంపై శ్రద్ధవహించకపోవడమూ కారణాలే.
‘‘జానపదం’’ విభాగంలో వివరించబడిన వ్యాసాలన్నీ విలువైనవే. ఈ తరం వాళ్ళకి జానపద నృత్యకళాకారులకి, జానపద గాయకులకు మంచి సమాచారాన్నిచ్చేవే. భామాకలాపం గురించి బాగా వివరించారు. అయితే భామాకలాపం రాసింది సిద్ధేంద్రయోగి అన్నది కనబడలేదు. కూచిపూడి భాగవతులూ బాగా ప్రదర్శిస్తారు. గిరిజనుల ‘థింసా’’ నృత్య విశేషాలను బాగా వివరించారు. ఉత్తరాంధ్రలో సవర జాతులు మాట్లాడే భాష సవర భాష. దీనిపై గిడుగురామమూర్తి ఎంతో కృషిచేశారు. ఈ సవరుల సంస్కృతి, గీతాలపై విలువైన సమాచారమిచ్చారు. చాలామందికి తెలీని ఆదివాసీల కళారూపం ‘‘మైమై గుర్రం’’- దీని గురించిన వ్యాసం అపూర్వం. ఉడుపుల పాటలు, చెంచు భాగోతం వంటి వాటిలో కొన్ని పాటలు కూడా ఉదాహరించవల్సింది. బుర్రకథా విశేషాలు సంక్షిప్తంగా ఇచ్చారు. స్ర్తిలు కూడా బుర్రకథా గానంలో (భద్రకాళి మొ.) పేరు పొందారు. మొత్తంమీద కళలు, సంస్కృతుల పట్ల అభిరుచి కలిగించేది, అభిరుచి ఉన్నవాళ్ళకి అదనపు సమాచారమిచ్చేది ‘‘రస తరంగిణి.’’

-ఆంధ్రభూమి , 15-11-2014.

 రసతరంగిణి డిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

రసతరంగిణి on kinige

 

Rasatarangini600

Related Posts:

అమెరికాలోనూ అంతే… “ముగ్గురు కొలంబస్‌లు” పుస్తకంపై సమీక్ష

అమెరికా పర్యటన చేసి వచ్చిన రచయిత్రి సోమరాజు సుశీల ఈ పుస్తకంలో తన యాత్రా విశేషాలను పాఠకులకు అందించే ప్రయత్నం చేశారు. పుస్తకంలో 19 అధ్యాయాలున్నాయి. రచన వ్యాస రూపంలో కాకుండా కథారూపంలో ఉండటంవల్ల యాత్రా కథనాలన్నీ ఆసక్తికరంగాఉన్నాయి.
విమానం ఎక్కబోయేముందు చేసుకునే ఏర్పాట్లతో పుస్తకం మొదలవుతుంది.
అమెరికా లో ఉన్న కాలంలో అక్కడి పద్ధతులనూ జన జీవితాన్నీ పరిశీలించిన రచయిత్రి, ఆయా సన్నివేశాలను పాఠకులకు కళ్లకుకట్టినట్లుగా ఉండేటట్లుగ వర్ణించారు. ఈ కథనాలకు చిత్రకారుడు వేసిన బొమ్మలు మరింత వన్నె తెచ్చాయి.
అమెరికన్ కుటుంబాలను పరిశీలించాక ‘దేశమేదయినా మానవ స్వభావం మాత్రం ఒకటే అనిపించింది’ అని ‘అల్లుడు జిందాబాద్’ శీర్షికలో తెలిపారు. అక్కడి తల్లులు కూడ పిల్లలకోసం తెగతాపత్రయపడతారని, మనవల రాకకోసం ఆత్రంగా ఎదురుచూస్తారనీ అన్నారు. సంసారాల్లో సాధ్యమైనంతవరకు సర్దుకుపోవాలని చూస్తుంటారు తప్ప, అంత తేలికగా విడాకుల జోలికి వెళ్లరని తన అభిప్రాయం వ్యక్తపరిచారు.
‘సరిగమ పదని’ శీర్షికలో ఒక సంగీత వాద్యగోష్ఠి కార్యక్రమం గురించి ప్రస్తావించారు. ప్రేక్షకులు ఎంతో శ్రద్ధగా ఆస్వాదించి, కళాకారుల పట్ల ఆదరాభిమానాలను ప్రకటించారని చెప్తూ, మన తెలుగునేల మీద మాత్రం చాలామందిలో కార్యక్రమం మధ్యలో లేచి వెళ్లిపోయే అలవాటున్నందుకు విచారం వ్యక్తంచేశారు.
తిరుగు ప్రయాణంలో బొంబాయి విమానాశ్రయంలో దిగినప్పుడు ఉద్యోగుల అలసత్వం వల్ల తిప్పలుపడ్డ సంగతి చెప్పారు. మనది స్వేచ్ఛభారతం అనే సంగతి గుర్తుచేసుకొని ‘బోలో స్వతంత్ర భారత్‌కీ జై’ అంటూ ముగించారు. అమెరికా విశేషాలు తెలుసుకోటానికి ఈ పుస్తకం పనికొస్తుంది.

 -ఎం.వెంకటేశ్వరశాస్త్రి ,25/10/2014 , ఆంధ్రభూమి-అక్షర

 

ముగ్గురు కొలంబస్‌లు”నవల డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

ముగ్గురు కొలంబస్‌లు on kinige

 

MugguruKolumbuslu600

Related Posts:

తాత్విక స్పర్శతో సమాజ హితం – “ఆలోకన -1″ పుస్తకంపై సమీక్ష

సుప్రసిద్ధ పత్రికా సంపాదకులు, చింతనాశీలురు నీలంరాజు వేంకట శేషయ్య పుత్రులు లక్ష్మీప్రసాద్ తండ్రి నుంచి రచనా పాటవం, ఉత్తమ జిజ్ఞాస వారసత్వంగా అందుకున్నారు. ఈ గ్రంథనామంలోని రెండు అంశాలు పాఠకులను ముందుగా ఆకర్షిస్తాయి. ‘ఆలోకన-1’ అని నామకరణం చేశారు. అంటే ఈ క్రమంలో మరికొన్ని పుస్తకాలు వెలువడనున్నాయని స్ఫురిస్తుంది. నిజమే. లోగడ లక్ష్మీప్రసాద్ రమణమహర్షి, జిడ్డుకృష్ణమూర్తి, నిసర్గదత్త మహారాజ్‌పై రచనలు ప్రత్యేక (సంపుటాలుగా) ప్రచురితమయ్యాయి. ఇప్పుడు సుమారు 270 వ్యాసాలు ‘ఆలోకన’ పేరుతో కొన్ని సంపుటాలుగా ‘విద్యార్థిమిత్ర ప్రచురణలు’వారు వెలువరిస్తున్నారు. రెండవ అంశం- గ్రంథం ఉప శీర్షిక ‘సామాజిక-ఆధ్యాత్మిక వ్యాస సంపుటి’అని చెబుతున్నది. మౌలికంగా ఇందులోని 49 వ్యాసాలలో ప్రతిదీ తాత్విక స్పర్శ వున్నదే. అయితే ఎందులోనూ సులభగ్రాహ్యం కాని ఆధ్యాత్మిక పరిభాష వుండదు. అంతుపట్టని గాఢ తాత్విక విచారధార వుండదు. అసలు వ్యాస సంవిధానమే విలక్షణంగా రూపుదిద్దుకుంది. సామాజిక హితాన్ని కాంక్షించే ఆధ్యాత్మిక భావాలను రచయిత విలక్షణ రూపంలో అందించారు. కథనానికి ఒక మహనీయుని జీవితఘట్టమో, సన్నివేశమో, అనుభవమో, సందేశమో వస్తువుగా స్వీకరించారు. చాలా వ్యాసాలు వ్యక్తిత్వ వికాసానికి దోహదం చేకూర్చేవిగా వున్నాయి. వాటికి కూడా తాత్వికత భూమికగా వర్తిస్తుంది. ఈ గ్రంథంలోని వ్యాసాలలో మహాపురుషులు, తత్వవేత్తలు, దార్శనికులు, యోగులు, వేదాంతులు, పండితులు, మహర్షులు, మతాచార్యులు, మఠాధిపతులు, సాహితీవేత్తలు ఇంకెందరో దర్శనమిస్తారు. వారి ప్రవచనాలు వినిపిస్తారు. అనుభవాలు పంచుకుంటారు. అవి పాఠకుల ఆలోచనల్ని తేజోమయం చేస్తాయి. ప్రత్యేకాంశాలుగా పేర్కోదగినవి వీటిలో అనేకమున్నాయి. అంతేకాదు. ఉదాహరణ యోగ్యమైన పంక్తులు ప్రతి పుటలోను చోటుచేసుకున్నాయి. కొన్నింటిని మాత్రమే వాచలిగా తెలియజేయడానికి సాధ్యమవుతుంది. రచన ఆద్యంతం సరళ వ్యావహారికంలో సాగింది. వ్యంగ్యం, హాస్యం, చమత్కారం సహితం చోటుచేసుకోవడం గమనార్హం. వ్యాసం మూడు భాగాలలో వుంటుంది. ఒక ప్రధాన భావ ప్రతిపాదన మొదటి భాగం. దానికి సంబంధించిన కథనం రెండో భాగం. ముగింపు సందేశ రూపంలో పాఠకుల్ని ఆధ్యాత్మిక సాధన దిశగా మరలిస్తుంది. ‘స్వయంగా తెలిసినదెంత?’ అనే వ్యాసంలో రచయిత మొదట జీవితమనే గురువు రూపేణా నేర్చుకున్నదే. అసలైన జ్ఞానమని ప్రతిపాదిస్తారు. తర్వాత గొప్ప పండితుడు వౌలింగ పుత్రుడు గౌతమబుద్ధుణ్ని కలిసినప్పుడు ‘నీ సొంత అనుభవమనేది ఒకటి చెప్పు’ అనే ప్రశ్నకు ఆ పండితుడు సమాధానం చెప్పలేకపోతాడు. ఈ కథనం వ్యాసంలో రెండో భాగం. చివర్లో ఆ పండితుడు బుద్ధుని శిష్యుడుగామారి సత్యం గ్రహిస్తాడు. ‘ధనం తృణప్రాయం’ అనే వ్యాస శీర్షికే రచయిత ఏమి చెప్పదలచుకున్నారో వ్యక్తంచేస్తుంది. వివేకానందుడు అమెరికా వెళ్లడం, అక్కడ భారతదేశంలో సేవాకార్యక్రమాలకు ధనం సేకరించడం వర్ణించారు. తిరిగి రాగానే ఆ ధనమంతా సంబంధిత కార్యకర్తలకు అప్పగిస్తాడు. ‘వెళ్లిన పని అయిపోగానే వివేకానందుడు మళ్లీ ఏమీలేని తన సన్యాసి బృందంలో కలిసిపోయాడు’ అనే వాక్యంతో వ్యాసం ముగుస్తుంది. నరేంద్రుడికి ‘వివేకానంద’అనే పేరు సూచించింది ఖేత్రిమహారాజు; ఆర్‌ఎస్‌ఎస్ వ్యవస్థాపకుడు హెడ్గెవార్ తెలుగువాడు, ఆయన పూర్వీకులది తెలంగాణలోని కందకుర్తి గ్రామం, మద్రాసు సభలో ఈ గ్రంథం రచయిత బాల్యంలో వేలి బంగారపు ఉంగరాన్ని గాంధీజీ స్వయంగా చిరునవ్వుతో తీసుకున్నారు; నారాయణగురు నెలకొల్పిన ఆలయాల్లో విగ్రహానికి బదులు నూనె దీపం వుండేది- వంటి సత్యాలు పాఠకులకు ఎంతో ఆసక్తిదాయకంగా వుంటాయి. జిజ్ఞాసువులు తప్పక చదవదగిన ఉత్తమ గ్రంథమంది.

 

-రామకృష్ణారావు, 13/09/2014 , ఆంధ్రభూమి – అక్షర.

 

ఆలోకన-1” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

ఆలోకన-1 on Kinige

 

Alokana1600

Related Posts:

ఈ కథానికలూ మంత్రాల్లాంటివే! – “మాటే మంత్రము” పుస్తకంపై సమీక్ష

ఆకాశం అనంతం. కనిపించే నిర్మలమైన ఆకాశం దాని సహజ రూపం కాదు. అలాగే నిశ్శబ్దంగా అన్నింటినీ భరించేటంత అవనిలోనూ సహజత్వం లేదు. ఇందుకు కారణాలు లేకపోలేదు. ఆకాశానికి భూమికీ మధ్య జరిగే మానవ సంఘర్షణలు, మనిషి మేధో మధనాల ఫలితమే ఈ అసహన మనోకృతులు ప్రకృతిని కూడా ఆవరించాయి. సముద్రాన్ని దేవతలు మధిస్తే అమృతం వచ్చినట్లు, వీటన్నింటినీ ఎంతో కొంత చదివి ఆకళింపు చేసుకొని సానపడితే తప్ప కథానిక పుట్టదు. తోడిన కొద్దీ మానవ జీవితంలో ఎన్ని సమస్యలున్నాయో వాటికి ఆలోచనాభరిత పరిష్కారాలే కథానికలు. ఒక వ్యక్తి తనకొచ్చిన సమస్యను పరిష్కరించుకోవడానికి ఎంతో ప్రయాస పడుతుంటాడు. అదే సమస్య ఎదుటి వ్యక్తికి రాగానే పరిష్కారం క్షణాల్లో చెప్పేయగలడు. అంటే ప్రతి సమస్యకు పరిష్కారం ఉందని మనకు అర్థమవుతుంది కానీ ఆ పరిష్కారం మనకెంత వరకు వర్తిస్తుందో అనేది ఆలోచించాల్సిన విషయం. సి.ఉమాదేవి రచించిన ‘మాటే మంత్రము’ అనే కథానికల సంపుటిని కథల సంపుటిగా సంబోధించారు. కానీ నిజానికిది కథానికలు. ఊహాజనితమైన ప్రపంచంలో నిత్యం ఊయలులూగుతూ తమకు దక్కని, తాము ఎదురుచూడని సన్నివేశాలతో కదిలేది కథని, వాస్తవ ప్రతిరూపాలన్నీ కథానికలనీ ప్రముఖ కథకులు వేదగిరి రాంబాబు గారి నుండి తెలుసుకున్నప్పటి నుండి చాలామంది కథానికలే రాస్తారని అర్థమైంది. ఆ కోవలో ఆలోచిస్తే ఉమాదేవిమాటే మంత్రము’ కథానికల కోవలోనివే అని చెప్పవచ్చు.
మానవ జీవతానికి రెండు రిటైర్మెంట్లు. ఒకటి ఉద్యోగరీత్యా, రెండవది జీవితరీత్యా! జీవితరీత్యా రిటైర్ అవ్వడానికి ఇంత వయసని ఎక్కడా లేదు. ఆ వయసనేది దేవుడు నిర్ణయం. కానీ ఉద్యోగరీత్యా రిటైర్‌మెంట్ అనేది తప్పనిసరి కానీ ఆ సంబంధిత వ్యక్తికి మాత్రం దిగులు ఆవరిస్తుంది. పైకి నవ్వుతూ కనిపించినా తనకున్న ఒక పని పోయేసరికి తను ఇక ఏమీ చేయలేడా? అనే ఆవేదన వెంటాడుతుంది. అందుకు తగినట్లుగా ఉదయమే ఆయనకేం తొందర? ఇంట్లోనే ఉంటారుగా అనే ఇంటిలోని వారి రకరకాల మాటలు వింటున్నా, తనకిన్నాళ్లు ఇచ్చిన ప్రాముఖ్యత ఇవ్వడం లేదనిపించి దిగులు పడిపోయేవారు ఎందరో. అదే విషయాన్ని ‘మౌనమే నీ భాష’ అనే కథలో అనంతం పాత్ర ద్వారా ఎంతో చక్కగా తెలిపారు. నాన్నకు పని లేదు. కనుక ఏదో ఒకటి మాట్లాడతారు’ అనే కొడుకు మాటలకు ఎంతో ఆవేదన చెందిన తండ్రి అనంతం ఇకపై మాట్లాడకూడదని నిర్ణయించుకుని వౌనం పాటిస్తాడు. ఆ మౌనం భరించక తిరిగి కుటుంబ సభ్యులందరూ మీరు మాట్లాడితేనే బావుంది అని దగ్గరకు చేరే సంఘటనల్ని ఈ కథలో చాలా అద్భుతంగా పలికించారు. ఇంట్లో వారు హడావిడిలోనో, కోపంతోనో, పని వత్తిడితోనో ఏదయినా అంటే అందులో ఏ మాత్రం నిజం ఉండదని తెలియజేయడం ఎంతో బావుంది. రచయిత్రి ఉమాదేవి తమదైన శైలిలో రచించారు. వయసు పెరిగినా మనసు పెరగదనేది నిజం అనిపిస్తుంది కొన్ని విషయాల్లో. సృష్టికి ఉదయాస్తమయాలు ఉన్నట్లే, మనిషి ఆకలిదప్పులు, ఆశలు ఆవేశాలు ఉండనే ఉంటాయి. వాటిని గురించి తెలిపే కథ ‘ఏం చేస్తున్నావు బుజ్జీ’ అనే కథ. సెల్‌ఫోను తనకెందుకు ఇంట్లోనే ఉంటుంది కదా? తనకేమయినా ఫోను వస్తే నాకు చేస్తే నేను ఇస్తాను కదా అనేది సాధారణంగా ప్రతి ఇంట్లో ఉంటుంది. స్త్రీకి స్వతంత్రత ఉండదనే విషయం ఇంకా అక్కడక్కడా కనిపిస్తూనే ఉంటుంది. అలా కాదు పిల్లలు పెద్దవారయి అమ్మకు ఒక ఫోను ఉండాలి అని కొనిస్తే, ఆ అమ్మకు మెసేజ్ ఇస్తే, అదీ అపరిచిత వ్యక్తి? అనేది సరదాగా సాగిన ఒక సంఘటనను కథానికగా మలచిన తీరు చాలా బావుంది.
ఉమాదేవి కథలన్నీ నాలుగు గోడల మధ్య జరిగే సంఘటనలే. ఇల్లు నాలుగు గోడలే అయినా ఉదయం నించి రాత్రి దాకా నలభై రకాల సమస్యలు వెంటాడుతూనే ఉంటాయి. సమస్యలు అయితేనేం? సామరస్యాలు అయితేనేం? అంతా అపురూపమే! ఇల్లంటేనే ఒక అపురూపం. అలాంటి అపురూప సంఘటనలను ఒకచోట చేర్చి ‘మాటే మంత్రము’ అనే శీర్షికతో కథానికల సంపుటి తీయడం ప్రశంసనీయం. ముఖ్యంగా నాన్న ఉండాలి, నాన్నా నీకేం కావాలి? మీరు క్యూలో ఉన్నారు. జీవిత చక్రం, అమ్మ సన్నిధి, పలుకే బంగారుమాయెనా? వర్షించని కన్నులు లాంటి కథలు పాఠకుల్ని ఎంతో అందమైన లోకంలో విహరించేలా చేస్తాయి. పెదవులపై చిరునవ్వు చిందించేలా చేస్తాయి. మొత్తానికి అందరినీ హాయిగా చదివించే కథలు ఇవి. ఎందరినైనా ఆకట్టుకోగల కథలివి.

-శైలజా మిత్ర, ఆంధ్రభూమి-అక్షర, 09/08/2014.

 

“మాటే మంత్రము” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మాటే మంత్రము on kinige

 

MateMantramu600

 

Related Posts:

ఆప్తవాక్యాలతో కర్తవ్య బోధ – “మంచిమాట- మంచిబాట” పుస్తకంపై సమీక్ష

 

ఇఫ్పటి పిల్లలు తల్లిదండ్రుల మాట వినకుండా పోతున్నారని, ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే మరో వ్యాసం ఆలోచింపజేస్తుంది.

ఆంధ్రభూమి, వనితాజ్యోతి, వండర్ వరల్డ్, ఆంధ్రప్రభ మొదలైన పత్రికల్లో ప్రచురింపబడిన వ్యాసాలలోని కొన్ని వ్యాసాలను మంచిమాట- మంచిబాట అనే పేరుతో సి.ఉమాదేవి వ్యాస సంకల్పం చేశారు. నేటి సమాజంలో మన చుట్టూ- జరుగుతున్న సంఘటనలు, మానవ మనస్తత్వాలు, జీవన విధానం, సంస్కృతికి సంబంధించిన వ్యా సాలు మనకు ఇందులో కనిపిస్తాయి. మన స్నేహితులతో మాట్లాడేటప్పుడు చెప్పే విషయాల్లా అనిపిస్తాయి. రచన సరళమైన శైలిలో వుంది. పిల్లలకు, పెద్దలకు అవసరమైన మంచి మాటలున్నాయి. మంచి మాటలను చెప్పి వదిలివేయలేదు. కొన్ని సందర్భాల్లో వాటిని తప్పకుండా ఆచరించాల్సిన అవసరాన్ని కూడా నొక్కిచెప్పారు. అరువుసొమ్ము బరువుచేటు, ఫాల్స్‌ప్రెస్టేజీతో ఇబ్బందులు తప్పవు, పటిష్టమైన కుటుంబం అవసరం, పెళ్ళిళ్ళల్లో వృధావ్యయం వ్యర్థం అనే నీతులను ఈ వ్యాసాలు బోధిస్తాయి. వృద్ధులంటే వయస్సు వృద్ధిచేసుకున్నవారు కాదు. పిల్లలను అభివృద్ధిపథంలోకి నడిపిన వారనడం, ప్రతి బిడ్డా ఒక పరిపూర్ణ వ్యక్తిగా రూపుదిద్దుకుంటేనే దేశానికి ఉన్నత పౌరులు తయారవగలరు, ప్రేమ అనేది రక్షణనివ్వగలగాలి, అనే వాక్యాల ద్వారా సందేశాన్ని అందించారు. మనల్నిబట్టే మన పిల్లలలో తల్లిదండ్రులు నిజాయితీగా వ్యవహరించాల్సిన ఆవశ్యకతను చెబుతారు. మానవత్వం, మృదుభాషణం అవసరమంటారు. ఒడినుండి బడికి లాంటివి సలహాలను, ధైర్యాన్నీ ఇస్తాయి. ర్యాగింగ్‌ను అరికట్టడం, డ్రైవింగ్‌లో మెళకువలు, వంట చేయడంలో జాగ్రత్తలు, పొదుపు ఆవశ్యకత మొదలైనవి నేటి సమాజానికి ఉపకరిస్తాయి. తెలుగులో మాట్లాడితే శిక్షలు వేస్తున్న నేటి పాఠశాల యాజమాన్యాల తీరును విమర్శించారు. సంబరాన్ని పెంచే పండుగలు వ్యాసంలో పండుగ వాతావరణాన్ని వర్ణిస్తే అరకులోయలో ప్రకృతి వర్ణన చేశారు. వర్క్‌హాలిక్‌గా వుండకుండా మనస్సును విశ్రాంతి వైపు మళ్ళించాలి, జీవించే కళను నేర్చుకుని వదిలివేయడం కాదు ఆచరించాలి. నెగెటివ్ థింకింగ్‌తో కుంచించుకుపోతున్న విజయావకాశాలు మొదలైనవి ఆత్మవిశ్వాసాన్ని పెంపొందిస్తాయి. పసి పిల్లలపై భారం మోపి వారిని వత్తిడికి గురిచేయవద్దంటారు. పిల్లలకు తల్లులే మంచి కౌన్సిలర్స్ అని చెప్పి పరీక్షల సమయంలో వారికి కల్పించాల్సిన సౌకర్యాలు, తల్లిదండ్రులు తీసుకోవలసిన చర్యలను వివరించారు. పిల్లలను బడికి పంపించేటప్పుడు తీసుకోవాల్సిన జాగ్రత్తలు తెలిపారు. ఇప్పటి పిల్లలు తల్లిదండ్రుల మాట వినకుండా పోతున్నారని , ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ?.. వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే వ్యాసం స్ర్తిలు వంటచేస్తేనే వారికీ, ఇంట్లోని వారికీ తృప్తికలుగుతుందని వంటను తంటాగా కాకుండా బాధ్యతగా చేయాలన్న భావాన్ని స్ఫురింపజేశారు. ఇంటిని తీర్చిదిద్దుకోవడంలోనే నేర్పు చూపించాలన్నారు. హోదాలు, సంపాదనలో వ్యత్యాసాలు, అధికారం చెలాయించడం లాంటివి దాంపత్య జీవితానికి ఆటంకం కలిగించే అంశాలని, చూడముచ్చటగా అన్యోన్యంగావుండే ఆదర్శదాంపత్యం అవసరమని, జీతాలు కాదు జీవితాలు పంచుకోవాలంటారు. ప్రేమకంటే సిన్సియారిటీ ముఖ్యమంటారు. ఈ రకంగా మనసున మనసై వ్యాసం హితవును బోధిస్తుంది. ఈ రకంగా ఈ పుస్తకం మంచిమాటను చెబుతూ మంచి బాటను చూపిస్తుంది.

-కె.లక్ష్మీఅన్నపూర్ణ, ఆంధ్రభూమి-అక్షర, 27/09/2014.

 

మంచిమాట- మంచిబాట” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మంచిమాట- మంచిబాట on kinige

ManchiMataManchiBata600

 

 

 

 

Related Posts:

‘గెలుపు తీరాని’కి ఇలా..’ఎక్స్‌లెన్స్ సాధించండి’ పుస్తకంపై సమీక్ష

ఇది చదివితే నాకేమిటి ప్రయోజనం..?’ – ఇప్పుడు పాఠకుడు పుస్తకాన్ని పట్టుకునే ముందు మనసులో వేసుకునే ప్రశ్న ఇది. ‘మీ జీవితం ఎక్స్‌లెంట్‌గా ఉంటుంది’ -అని చెబుతాయి వ్యక్తిత్వ వికాసానికి సంబంధించిన పుస్తకాలు. ఆ కోవలోనిదే కొండా చంద్రారెడ్డి రచించిన ఎక్స్‌లెన్స్ సాధించండి… ఆశించిన ఫలితాలు సాధిస్తూ జీవితాన్ని అద్భుతం మలుచుకోండి- అనే టైటిల్‌తో వచ్చిన పుస్తకం. ప్రతి వ్యక్తి జీవితంలో ఉన్నతిని, సుఖ సంతోషాలను కోరుకుంటాడు. వాటిని సాధించుకోవడానికి క్రమ పద్దతిలో అనుసరించాల్సిన వ్యూహం గురించి రచయిత వివరించారు. విద్యార్థులకైతే పరీక్షల్లో మంచి మార్కులు, మంచి ర్యాంకుతో మంచి కాలేజీలో సీటు, మంచి కంపెనీలో ఉద్యోగం, మంచి కేరీర్ ఇదీ నేటి యువత లక్ష్యాలు. నెగిటివ్ ఆలోచనల గురించి చక్కని విషయాలు ఉదహరించారు. ‘నేను అలా చేయకుండా ఉండాల్సింది, నా ముఖం నాకే నచ్చలేదు, ఈ పని నా వల్ల కాదు’ -అంటూ నిరంతరం నెగిటివ్ ఆలోచనల్లో మునిగి పో వడం వల్ల ఎలాంటి ప్రయోజనం ఉండదని, నిజంగానే వాటిని చేయలేని స్థితికి చేరుకుంటామని, మనిషి తన ఆలోచనలకు తగినట్టుగానే ఉంటాడని రచయిత వివరించారు. విజయం సాధించడానికి, ఉన్నత స్థితికి చేరుకోవడానికి పుస్తకంలో మార్గాలు చెప్పడంతోనే సరిపుచ్చుకోలేదు. ఒకసారి చదివి పక్కన పెట్టేయకుండా ఆచరించడానికి వీలుగా పుస్తకం చివరలో అనుబంధంగా ఎక్సర్‌సైజ్ బుక్ కూడా జత చేశారు. సాధారణంగా వ్యక్తిత్వ వికాస పుస్తకాల్లో చెప్పే అంశాలు ఒకే రకంగా ఉంటాయి. ఉదాహరణలు ఆసక్తి కలిగిస్తాయి. తాను చెప్పదలుచుకున్న అంశానికి రచయిత మంచి ఉదాహరణలు ఎంపిక చేసుకున్నారు.

-బి.ఎం, అక్షర, ఆంధ్రప్రభ, 26/07/2014

***

ఎక్స్‌లెన్స్ సాధించండి”పుస్తకం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

ఎక్స్‌లెన్స్ సాధించండి on kinige

Related Posts:

సమకాలీన సమస్యలపై వ్యంగ్యాస్త్రాలు – “కింగ్ మేకర్” పుస్తకంపై సమీక్ష

ప్రజల అభ్యున్నతికై మేధోమధనానంతరం ఏర్పడేవి సిద్ధాంతాలు. అవి ఓ రోజులోనో ఓ పూటలోనో ఏర్పడినవి కావు. అయితే సిద్ధాంత గ్రంథాలు ప్రజల గురించే వ్రాసినవైనా కొన్ని మేధావులకే అందేవి, కొన్ని సామాన్యులకు అందే విధంగానూ వుండడం లేకపోలేదు. అయితే రెండింటి అవసరమూ ఏకోన్ముఖమూ ప్రజాదృష్టే.
సిద్ధాంత భూమికల నుండి కళారూపాలుగా వివిధ సాహిత్యప్రక్రియలుగా వచ్చేవి మరింతగా ప్రజల్ని చేరతాయి. వ్యంగ్య రచనలు అలా చేరేవి. అలా చేర్చగలిగే దమ్మున్న శక్తిమంతుల్లో ఈనాటి వ్రేళ్ళలెక్కలో సతీష్‌చందర్ ముఖ్యులు. ఇందుకు అక్షరసాక్షి ఈ ప్రజారాజకీయ వ్యంగ్య రచనల కింగ్‌మేకర్ ఇవి ‘సిద్ధాంత రహస్య’ రచనలు.
రెండు మూడు పుటల్ని మించని రచనలు. ఒక్కొక్క సమకాలీన ప్రజాసమస్య ఒక్కో వ్యంగ్య కథానికను చెప్పినట్లుగా చెప్పడం. పాఠకుల భుజాలపై చేయివేసి తన మార్గానికి తీసికెడుతూ ఎన్నో కబుర్లు చెబుతారు. అవి ప్రజాసమస్యల ‘వాకబుర్లు’ అందులో పాలకుల్ని ఎండగట్టరు. ‘మండుటెండ గడతారు’. పాలకుల పట్ల ప్రజాకర్తవ్యాల చెకింగ్ మేకరవుతారు. ‘సర్వేజనా దుఃఖినోభవతు’, ‘ఎవరిని ఎన్నుకున్నా అదే తన్ను’,‘ఒక ఎత్తిపొడుపు కథ’, ‘నేర సారాలు’, ‘రాజ్యము’ చోరభోజ్యము, మగని చేతి విల్లు మగువల బిల్లు- వంటి రచనల్లో శీర్షికా పద చమత్కారాలే కాదు లోపలి రచనల్లో ఎన్నో పెదవి విరుపులకు అవకాశమివ్వని పదాల విరుపులు కథనాంశాలు వ్యంగ్య మర్యాదల్ని గుర్తుచేస్తాయి. అంబేద్కరు గ్రంథాల్ని చదివితే, ఒక మానవుడిగా ఆలోచిస్తే మన కళ్లల్లో మార్పులు వస్తాయి. సతీష్‌చందర్‌గారి ఈ వ్యంగ్య రచనలు చదివితే మన కళ్ళల్లో మార్పులు వస్తాయి.
కొండొకచో కళ్ళల్లో తడి నిండుతుంది, లేదా కళ్ళు ఎర్రబడతాయి. ఫలితంగా చూపు(విజన్) రూపుమారుతుంది. ఎదిరించలేని తత్త్వం మనకుంటే మనపై మనకే జాలికలుగుతుంది. లేదా వీరులపై కర్తవ్యోన్ముఖులమైనా అవతాం. నలభైఆరు రచనల వ్యంగ్య బాణాలు-ప్రజాస్వామ్యం, మతతత్త్వ రాజకీయం, ఆర్థికం, కులాధిపత్యం, మహిళల అణచివేత, విద్యారంగం, వామపక్షాలు, మీడియా, పౌరహక్కులు అనే తొమ్మిది పొదుల్లో ఉన్నాయి..
పంచమవేదం, పసుపు జాబిలి వంటి కవితా సంపుటాల కవిగా, పత్రికా సంపాదకునిగా, విశ్వవిద్యాలయాల్లో పాఠ్యాంశాలైన రచనలు చేసిన ప్రసిద్ధునిగా సీరియస్ కథారచయితగా, వెల్చేరు నారాయణరావు వంటి వారిచే ప్రశంసలు పొందినవారిగా సతీష్‌చందర్ సుప్రసిద్ధులు. ఈ కింగ్‌మేకర్‌లోని రచనలు ఆంధ్రప్రభలో ధారావాహికగా వచ్చినవి. కర్నూలు జిల్లా ప్యాపిలిలో వాడలో వినాయకుని పూజించుకున్నారు. ఆ వినాయకుని నిమజ్జనానికి వాడకి దూరంగాఉన్న వూరివారు ససేమిరా అంగీకరించలేదు.
ఆ సమస్యపై సతీష్‌చందర్ రాసిన ఇందులోని ‘‘అవాస్తవా’్ధన రేఖ’’ అనే రచన చదివితే సమాజం ఎక్కడికి పోతోంది అనే వాస్తవ ఆవేదన కలుగుతుంది.
అందులోని కొన్ని వాక్యాలు:
‘‘అమాయక వినాయకుడు ఊరి భక్తుల మాట వినకుండా వాడలో పూజలందుకున్నాడు. దాంతో ఆయన కూడా అస్పృశ్యుడయిపోయాడు. ఊరికి దూరమైన దళిత వినాయకుడయ్యాడు. ఆయన్ని నిమజ్జనానికి పోనివ్వమన్నది వూరు.
భారతదేశానికి, పాకిస్తాన్‌కి మధ్య లేదా భారతదేశానికీ బంగ్లాదేశ్‌కి మధ్య ఎలాంటి సరిహద్దురేఖ వుంటుందో ఊరికీ, వాడకీమధ్య ఓ సరిహద్దురేఖ వుంటుంది.
అది కులం గీసిన ‘అవాస్తవధీన రేఖ’…
వినాయకుడూ అస్పృశ్యుడయ్యాడు. ఆయన నిమజ్జనానికి పోనివ్వమన్నది వూరు. పోయినా వూరు మధ్యనుంచి వెళ్ళకూడదన్నది. ఇది తప్పన్న ఒకటి రెండు అగ్రవర్ణాల కుటుంబాలను వూరివారు తరిమికొట్టారు.
ఊరి తీరే అలాగుంటుంది. భూమి గుండ్రంగా ఉంటుందేమో కాని ఊరెప్పుడూ బల్లపరుపుగానే వుంటుంది. చతురస్రాకారంలోనే వుంటుంది’ అంటారు.
ఇది చదివినప్పుడు హిందువుగా ‘వ్యాకులం’ చెందుతాం.
మానవునిగా హృదయాన్ని కల్లోల పరచుకుంటాం. ఊరు చతురస్రాకారంలో వుంటుందనడంలో చాతుర్వర్ణ ఆకారమని ధ్వని.
ఊరూ, వాడా ఏకంకాని విషయాన్ని ఆయన ఇంకా ఎలా అభివర్ణిస్తారో గమనిద్దాం.
వినాయకుని పూజించిన వాడ వారి వేదనను చెబుతూ…
‘‘మీరే మతస్తులు అంటే? హిందువులని చెప్పుకోవచ్చా? అలా చెబితే స్వామి వివేకానంద వూరుకోవచ్చు. లేదా కామకోటి పీఠాధిపతి ఊరుకోవచ్చు. కాని ఊరు ఊరుకోదు’’ అంటారు.
ఇందులోనే వుంది సతీష్‌చందర్‌గారి శాస్ర్తియ విశే్ల్లషణా నైపుణ్యం. కేవలం కొందరు వ్యక్తులపై ఆయన వ్యంగ్యబాణ ప్రయోగం చెయ్యరు. సమూలంగా మారి తీరవలసిన వ్యవస్థపై గురిపెడతారు. ఆ గురి నలుగురి మెచ్చు పొందేలా వుంటుంది. రేఖామాత్రంగా సతీష్‌చందర్ వ్యంగ్య తీక్షణతను తెలపడానికే ఈ ‘అవాస్తవాధీన రేఖ’ వాక్యాల ఉటంకింపు.
ఈ రచయిత విలేఖరిగా, సంపాదకునిగా, ప్రసిద్ధ పత్రికల కాలమిస్టుగా పేరున్నవారు. అయితే ఆయన పత్రికల పక్షాన ఏమైనా రచనాసమరం సాగించారా? అంటే సాగించారని ఈ పుస్తకంలో గారడియా (మీడియా) శీర్షిక క్రింద ‘పాలకులూ పాఠకులే’ అన్న రచన నిలచి చెబుతుంది. పత్రికల లేక మీడియా గొంతు నొక్కాలని, అప్రజాస్వామికంగా భావించే ప్రజాస్వామిక రాజులకు మాటల కొరడాల రుచులు చూపిస్తారు.
‘పాలకులు కూడా పత్రికల్ని ప్రశ్నించవచ్చు. కానీ కొమ్ములొచ్చిన పాలకులుగాకాక సాధారణ పాలకులు గానే. కానీ ఆ ఇంగిత జ్ఞానాన్ని ఎందుకనో అప్పుడప్పుడు పాలకులు కోల్పోతూంటారు.
తాము యింటింటికీ వెళ్ళి జోలిపట్టి, రెండుచేతులూ జోడించి, వీలుంటే సాష్టాంగపడి, దీనాతిదీనంగా బిచ్చమెత్తగా, వచ్చిన ఓట్లతో పాలకులయ్యామన్న స్పృహ కోల్పోయినప్పుడల్లా పాతకాలం మహారాజులవుతారని అంటూ, నాటి రాజసభల్లో వార్తాహరుడు వచ్చి జయంజయం అంటూ మన యువరాజాగారు యుద్ధంలో శత్రువుల్ని కూరగాయలు తరిగినట్లు తరుగుతున్నారంటే వజ్రాల హారాలు ఇచ్చే వారని అదే వార్తాహరుడు తర్వాత వచ్చి ‘‘మన్నించాలి. యుద్ధంలో శత్రువుల వీర ఉతుకుడికి మన యువరాజాగారే వీరోచితంగా చతికాలబడ్డారనే సత్యవార్తను చెప్పగానే ఈ వార్తాహరుణ్ణి ఖండఖండాలుగా తరిగి కాకులకూ గద్దలకూ వేయండి అనే వారని అలాంటి వార్తాహరుల వంటి పత్రికలు కావు నేటివి అన్నారు. పత్రికలపై ఇప్పటి పాలకులు- నచ్చినప్పుడు వజ్రాలహారాల వంటివి విసరబోతారని నచ్చకపోతే పత్రికలపై కత్తులూ కటారులూ ఝుళిపించబోతారని అంటారు.
పత్రికలంటే- తుమ్మితే వూడిపోయే తక్కువ సర్కారులు కావంటారు. ప్రజలిచ్చిన స్వేచ్ఛే ప్రాణవాయువుగాసాగే పత్రికలపై పాలకుల దుస్సాహసాలకు శృంగభంగం తప్పదంటారు.
ప్రతి మనిషికీ స్వరపేటిక ఉంటుంది. శ్రీ సతీష్‌చందర్‌గారిది దుష్టపాలక దుష్టసమాజాల పట్ల సంపూర్ణ్ధిక్కార స్వరపేటిక అని కింగ్‌మేకర్ తర్కబద్ధంగా చెబుతుంది.

- సన్నిధానం నరసింహశర్మ, అక్షర, ఆంధ్రభూమి, 5th జూలై 2014

 

 

 

 

 

 

 

 

కింగ్‌మేకర్”నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

కింగ్‌మేకర్ on kinige

 

Related Posts:

అతివ అంతరంగ మథనం – “అన్వేషణ” నవలపై సమీక్ష

మనిషి జీవిస్తున్నాడా? లేక జీవిస్తున్నానని భ్రమలో ఉన్నాడా? అనే ఒక సందిగ్ధం ఈరోజుది కాదు. పురాణాల నుండి వస్తున్నదే! ఐతే- ఆ మాట నిర్భయంగా నేడు అంటున్నారు. అనుకుంటూనే ఆలోచిస్తున్నారు. గంటి భానుమతి రచించిన ‘‘అన్వేషణ’’ నవలలో నిజంగా మానవ జీవితంలోని అనేక కోణాలను అన్వేషించారు. అందరికీ తెలిసిన సమాధానాలపై ఎదురు తిరిగారు. తెలియని ప్రశ్నలను సంధించారు. ఈ 21వ శతాబ్దంలో కూడా ఇంకా అత్తింట్లో ఆవేదనలు, భర్త మూలంగా అవమానాలు, అనుమానాలు ఎదుర్కొంటున్న నేటి సమాజపు దుస్థితిని అభివర్ణించిన తీరు ఎంతో ఆకట్టుకుంది. అసలు స్త్రీ సంఘానికి భయపడాలా? లేక తన మనస్సాక్షికి భయపడాలా? అంటే నా ధోరణిలో మనస్సాక్షికే ఎక్కువ మార్కులు వేస్తాను. సంఘం అనేది గాలివాటుకు ఎగిరిపడుతున్న ఎండుటాకు లాంటిది. అదిగో అని చూపితే కనిపించకున్నా, అవును నాకూ కనిపించింది అంటూ ఎదుటిమనిషిని మరింత నిర్వీర్యం చేస్తుంది. కానీ మన మనస్సాక్షికి తెలుస్తుంది మనమేంటి? మనం జీవిస్తున్న విధానం ఏమిటి? అని. ఒక స్ర్తి అయినా, పురుషుడైనా మనస్సాక్షి ముందు తలెత్తుకుంటే చాలు గెలిచినట్లే..
అసలు  స్త్రీ అంటేనే ఒక కుటుంబం. స్త్రీ లేనిదే కుటుంబాలు ఎంతగా వెలవెలపోతుంటాయో మనం గమనిస్తూనే ఉంటాం. ఈ నవలలో విజయ అనే పాత్ర ఎన్నో సందిగ్ధాల మధ్య సతమతమవుతూ తన జీవితం అలా ఎందుకు ఒంటరి అయిపోయిందనే విషయంపై అన్వేషణ కొనసాగిస్తుంది. అలాంటి సమయంలో తనను ప్రేమించిన వ్యక్తి కూడా తల్లిదండ్రులు ఎవరో తెలియకుంటే పెళ్ళిచేసుకోవడం కష్టమని అనడం విజయను మరింత బాధిస్తుంది. పెళ్ళికి యువతి కావాలా? యువతికి యువకుడు ఉంటే చాలదా? అంటే చాలదు. ప్రేమకు ఇద్దరు చాలు పెళ్లికి మాత్రం రెండు కుటుంబాలు కావాలి అనే మాట విన్నాం. అయితే కుటుంబం ఎందుకు? అంటే మాత్రం రాబోయే తరాలకు ఒక చరిత్ర కావాలి. నాన్న అమ్మ ఎలాగో, అమ్మమ్మ, తాత, పెదనాన్న, చిన్నాన్న పిన్ని అత్త లాంటి వరసలన్నీ ఎంతో కావాలి. వారందరూ మనకంటూ ఏమీ చేయకపోవచ్చు. కానీ ఉన్నారనే ఆశ ముందుకు నడిపిస్తుంది. తల్లిదండ్రులు పునాదులైతే నా అన్నవాళ్ళు మూలస్తంభాలు. ఆ విషయమే ఈ నవలలో కనిపిస్తుంది.
గంటి భానుమతి ఎంతో సున్నిత హృదయులు. వీరిలోని నొప్పించేతత్వం లేని తనమే ఈ నవలకు పునాది అయింది. కారణం ఈ నవలలో మరీ బాధించే పాత్రలు చూపలేదు. కాలానుగుణంగా మనిషి తత్వం మారుతుందే తప్ప ఎవరూ చెడ్డవారు కారనే తత్వాన్ని తెలియజేసిన తీరు కడు రమణీయం. కాకుంటే మనుషుల్లో ఏదో ఒకటి కావాలని బాధ, ఉంటే ఎవరికి చెందుతుందో అనే బాధ, ఆస్తుల పంపకాలు, అక్కచెల్లెళ్ళ పోరాటాలు, రక్తసంబంధీకుల సమస్యలు చదువుతుంటే ఒకటుంటేఒకటిలేదనే తత్వంతో మనుషులు ఎదగలేకపోతున్నారా అనిపించక మానదు. అదే విషయం విజయ జీవితంలో కనిపిస్తుంది. తండ్రి వచ్చినా, అమ్మమ్మ, తాతయ్యలు ఉన్నా ఆస్తుల పంపకాలలో అనేక చేదుకోణాలను చూస్తుంది. పెద్దలు కుదిర్చిన వివాహాన్ని చేసుకున్న విజయ తల్లిని అన్వేషించడం మాత్రం ఆపలేదు. చివరకు తన తల్లి అత్యాచారానికి గురై చేయూతనిచ్చేవారు ఉన్నా అందుకోలేక, సమాజానికి ముఖం చూపించలేక మరింతగా కుంగిపోయి తన జీవితాన్ని పోగొట్టుకుందనే నిజాన్ని తెలుసుకుని కుమిలిపోతుంది. మరో వివాహం చేసుకుని వారి ద్వారా కూడా బిడ్డలున్నా వారి నుండి ఆదరణ లభించకపోవడంతో మొదటి భార్య కన్నబిడ్డ విజయ తండ్రిని తానే కొడుకై ఆదరిస్తుంది. తల్లిదండ్రులు ఎలాంటివారైనా అనుబంధం ముందు ఓడిపోక తప్పదని నిరూపిస్తుంది.
మనిషి జీవితంలోని మార్పుచేర్పులకు సమాజమే కారణం అయితే, వ్యక్తిగా తనను తాను గమనించుకునే స్థితికి మనిషి ఎపుడు చేరుకుంటాడు? అదే స్త్రీ అయితే తన పరిస్థితి ఏమిటి? అనే ప్రశ్నలను సంధించి సరికొత్త సమాధానాన్ని అందించిన తీరులో సాగిన వైనం మనల్ని ఆద్యంతం అలరిస్తుంది. వ్యక్తిత్వం అనేది ఒక స్ర్తికి సంబంధించింది అనడం కంటే వ్యక్తిత్వం ప్రతి వ్యక్తికి సంబంధించింది అని ముగించి ఉంటే మరింత బావుండేదనిపిస్తుంది. ఎందుకంటే ఒక ప్రశ్నగా స్త్రీ నిలబడినంతకాలం సమాజం తనకిష్టమైన సమాధానాలు చెబుతూనే ఉంటుంది. తానే ఒక సమాధానమైన రోజు ప్రశ్నలన్నీ ఏమవుతాయి? ఆలోచించాలి…!

-ఎస్.ఎం. అక్షర, ఆంధ్రభూమి, 21/06/2014

***

అన్వేషణ”నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అన్వేషణ on kinige

Related Posts:

‘తెలివి బరువు’ దిగితే.. అంతా తేలికే..!

జిడ్డు కృష్ణమూర్తి నాకు తెలుసా?” పుస్తక సమీక్ష ఇది.

* * *

పుస్తకం పేరులో ఒక ప్రశ్న. ఆ ప్రశ్న అడుగుతున్నది రచయిత అయితే, పుస్తకంలోని మొదటి ముప్ఫయిమూడు పేజీలు ప్రత్యక్షంగా, మిగతావి (ఈయన ఇతర రచనలతోబాటు) పరోక్షంగా జవాబు అందిస్తున్నాయి. కృష్ణమూర్తిగారిని ఆయన ‘కృ’ అన్న పేరుతో పిలిచారు. ‘కృ’కు నీలంరాజువారు బాగా తెలుసు. అయినా లక్ష్మీప్రసాద్‌లోని మంచితనం, మిగతా అంశాలను ‘తెలిసినంతమేరకు’ అన్న శీర్షిక కింద చేర్పించింది. ఈ రచయితకు తాను రాయదలచుకున్న అంశం తలకెక్కింది. వొంటబట్టింది. ఆయన సాయంతో పాఠకులు తమను తాము ప్రశ్న అడిగేసుకుని జవాబు వెదుకుతారు, ఈ పుస్తకం చదివితే!
మదనపల్లెలో పుట్టి చిన్నతనంలోనే ఇంగ్లండుకు తరలించబడిన జిడ్డు కృష్ణమూర్తి మనవాడు, తెలుగువాడు అని చెప్పుకోవడం మనలోని ఖాళీతనాన్ని చూపుతుంది. భారతీయుడివా అన్న ప్రశ్నకు ‘అవును. భారతదేశంలో పుట్టాను’ అని జవాబిచ్చాడు జె.కె. జె.కె అన్నపేరు ప్రపంచమంతటా తెలుసు. తెలియనిదల్లా మనకే. ఆయనేదో ప్రపంచానికి దారి చూపిస్తాడనుకుంటూ, అందరం ఆయన చుట్టూ మూగితే, అదేదో మీరే చేయాలి అని దారిచూపించాడాయన. శ్రీకృష్ణమూర్తిగారు, వారు లాంటి సంబోధనలను మించి ఎంతో ముందుకు సాగిన ఆ మనిషి ‘అర్థం కాడు!’ అనే స్థాయికి చేరుకున్నాడు. సమస్య అక్కడే ఉంది. జేకే మాటలు అర్థంకాకపోతే తప్పు ఆయనదా? లేక మనలో ఏదయినా లోపం ఉందా? ఈ రెండవ ప్రశ్నకు జవాబు చెప్పడానికి చేసిన ప్రయత్నమే లక్ష్మీప్రసాద్ రచనల్లో కనబడుతుంది. రచనలు కొన్ని ఒకచోటచేరి ఈ పుస్తకమయింది. దీన్ని నవల చదివినట్లు ఈ చివర నుంచి, ఆ చివర వరకు ఒక్కసారి చదివి, ‘అర్థం కాలేదు’ అని పక్కనబెడితే మాత్రం తప్పకుండా లోపం మనదే.
తెలివిగలవారు కూడా తెలివి అనే బరువు కింద నలుగుతుంటారు. ఆ బరువును తప్పించుకుంటే తప్ప, ఆలోచనలను స్వీకరించడం కుదరదు. ‘పాతది అంతమొందితే తప్ప నూ తన సృష్టి జరగదు’- అని ఈ పుస్తకం మొ దట్లోనే ఒకమాట కనబడుతుంది. దీన్ని గురించి చర్చకు అవకాశం ఉంది. జరగాలి. అందుకు మనం ప్రయత్నించాలి. జేకే చెప్పింది ఈ ప్రయత్నం గురించేననిపిస్తుంది.
జేకే మాటలు ఎందరి హృదయాల్లో నాటుకున్నాయో, ఎందరికి నిజంగా అర్ధమైనాయోనని ప్రసంగవశంగా రచయిత ఒకచోట అనుమానం వెలిబుచ్చి మనకు తెలియదు, అంటారు. కానీ, అందరూ ఆయన తమను ఆశీర్వదించాలనుకుంటారు. ఈ దండాలు, దాస్యాలు తప్ప మనకు ఆలోచనలు చేతగాలేదు. ‘మనకు చేతనయిందల్లా సేవ, పూజ, ఆరాధన, దీవెనలు అందుకోవడం మాత్రమే అయ్యుండాలి అంటారు రచయిత. జేకే చూపిన దారిని నడిచే సామర్థ్యం, కుతూహలం, సుముఖత మనలో లేవంటారీయన. అది జేకే దురదృష్టం అనేంతవరకు వెళతారు కూడా!
అందుకే కుతూహలం (మిగతా లక్షణాలు ఉండనివ్వండి) కలవారంతా ఈ పుస్తకం చదవాలి. ఇందులో మనకు ‘కృ’ ఆలోచనలమీద వ్యాఖ్యానాలు, అన్వయాలు కనబతాయి. భగవద్గీత విన్న తరువాత అర్జునుడు చప్పట్లుకొట్టలేదు. గొప్ప మాట విన్న తర్వాత చప్పట్లతో మన బాధ్యత తీరదు అంటారు ప్రసాద్. ఈయన మనకు సాయపడగలరనడానికి ఇంతకన్నా చక్కని ఉదాహరణ లేదేమో?
ఆనంద సామ్రాజ్యం తాళం చెవి, మనదగ్గరే ఉందన్నా, మనసులో శూన్యం కలిగితే, ఆ సంగతి, శూన్యంపోయిన తరువాత తెలుస్తుంది అన్నా, మనం (చప్పట్లు మాని) ఆలోచనలో పడిపోతాం. పడిపోవాలి. అదే ఈ పుస్తకం ఉద్దేశమనవచ్చు. కొన్ని విషయాలు చటుక్కున అర్థంకావు. అట్లాగని, అసలే అర్థంకావు, అనవచ్చా? సామూహిక అభిప్రాయాల బరువును కాసేపయినా దించుకుని, కనీసం తగ్గించుకుని ప్రయత్నిస్తే, కొత్త అభిప్రాయాలు అర్థమయ్యే వీలుంది. రచయిత ఈ బరువులతో నలిగినవారే. పడుకుని దండం పెడతారన్నారట. జేకే ‘వద్దని’ఆయనే వంగారట!
జేకే మతాలకు అతీతమయిన మాటలు చెప్పారని కూడా తెలియని వారున్నారు. అసలు ఆయన పేరుకూడా తెలియనివారి ప్రసక్తి ఇక్కడ రాదు. అనుకరణ, అనుసరణలు వద్దన్నారు. నేను గురువును కాను, నాకు శిష్యులు, అనుయాయులు లేరు అన్నారు. ఇంకా ఎన్నో అన్నారు! కొండ అద్దంలో లాగ ఆయన ఈ పుస్తకంలో కొంత కనిపిస్తారు.

గోపాలం కె.బి. ఆంధ్రభూమి అక్షర పేజి 24/08/2013

* * *

“జిడ్డు కృష్ణమూర్తి నాకు తెలుసా?” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.
జిడ్డు కృష్ణమూర్తి నాకు తెలుసా? On Kinige

Related Posts: