ఆసక్తిదాయక ‘దేవరహస్యం’ – ‘దేవరహస్యం’ పుస్తకంపై సమీక్ష

దేవుడు ఉన్నాడా ? ఉంటే ఎలా ఉండి ఉంటాడు ? అప్పటి జీవన విధానం ఎలా ఉండేది ? పురాణాలు , ఇతిహాసాలు నిజమేనా ? పుక్కిటి కథలా ? లాంటి ప్రశ్నలు వేసుకోని మనుషులెవరూ ఉండరు. కానీ దేవుడున్నాడనే నమ్మకం ఏర్పడ్డాక అందుబాటులో ఉన్న ఆధారాలను దానికి అన్వయించుకోవడం సహజం. అలాంటి ప్రయత్నమే కనిపిస్తుంది ‘దేవ రహస్యం‘ వ్యాస సంపుటిలో . వివిద పరిశోథన ఫలితాలతో తన అథ్యయనాన్ని జోడించి రచయిత ఆసక్తిదాయకంగా చెప్పారు.ఇందులోని ప్రతి అంశం వెనుక ఒక లౌకిక సంబంధ విషయం కనిపిస్తుంది.ఉదాహరణకు , చైత్రంలో వచ్చే ఉగాదితో సంవత్సరం మొదలైతే ఏడాది మధ్యలో వచ్చే భాధ్రపదంలో వినాయకుడికి చేసేది తొలిపూజ ఎలా అవుతుందన్నది చాలా మందికి కలిగే సందేహం. మన దేశం ప్రధానంగా వ్యవసాయ ఆధారితం కనుక ఆ పండుగను సేద్యానికి ఆపాదిస్తూ వివరించిన తీరు ఆలోచింపజేస్తుంది.గుజరాత్ సముద్రగర్భంలో కనిపించే ద్వారకాపురి నిర్మాణ విశేషాలను ఆధునిక కట్టడాలతో పోలుస్తూ చక్కటి వివరణ ఇచ్చారు.కొత్త ఆలోచనలకు, అనంతర పరిశోధనావకాశాలకు తెరలేపే గ్రంధంగా చెప్పవచ్చు.

-ఆరవల్లి జగన్నాధ స్వామి , 25-01-2015 , ఆంధ్రజ్యోతి-ఆదివారం.

Devarahasyam

దేవరహస్యం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

దేవరహస్యం on kinige

DevaRahasyam600

Related Posts:

సుపరిచితం – ‘అపరిచితం’ పుస్తకం పై సమీక్ష

బాగా తెలుసుననిపిస్తుందిగాని దేహం పరమ రహస్యం పచ్చి దగాకోరు అంటాడు నరేష్ నున్నాఅపరిచితం‘లో. మనకు బాగా తెలిసిన విషయాల్ని ఏమీ తెలియవన్నట్టు, మనకేమీ తెలియని విషయాలను ఎప్పటికీ తెలుసుకోలేనట్టు చెప్పడంలో నరేష్ చేయి మెలిపడ్డ రచయిత . ఆమె గురించి ఒక అలౌకిక ఆలాపన ఈ ‘అపరిచితం‘ . దేహ రహస్యం గురించి దాపరికం లేకుండా మాట్లాడుతున్నట్టు పైకి కనపిస్తుంది కానీ , కధనాన్ని లోతుల్లోకి వెళ్ళి అర్ధం చేసుకొంటే అనేక దేవ రహస్యాలు అర్ధమవుతాయి.ప్రేమ గురించీ, ఆమెతో చెప్పని వన్‌సైడ్ లవ్ గురించీ జ్ఞాపకాల తలపోత …. ప్రవాహంలా పాఠకులను పరుగులు పెట్టిస్తుంది.

-దేరా,ఆంధ్రజ్యోతి-ఆదివారం,23-11-2014.

AJ_Sunday_Aparachitham_23_11_2014

అపరిచితం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

అపరిచితం on kinige

 

Aparichitam600

Related Posts:

బ్యాటిల్ ఇన్ బాటిల్ – “’మ‌ద్య‌’తర‌గ‌తి ‘మందు’హాసం” పుస్తకంపై సమీక్ష

‘శ్రీశ్రీ రాసిపారేసిన పద్యాల గుబాళింపులు మనకుండగా వాడు తాగిపారేసిన సీసాల సంగతి మనకెందుకు’ అన్నాడు కాళోజీ .కానీ కాశీపతి మాత్రం ఆ సీసాలనే తెచ్చి మనకు పుస్తకంలో అందించారు . పద్యాలకు గుబాళింపులున్నట్లే ,సీసాలకు కూడా ఉంటాయి. దేని వాసన దానిదే. మద్యం,పద్యం,శ్రీశ్రీ సాహితీసేద్యం అన్నింటినీ రచయిత మనకు అందించారు .శ్రీశ్రీ తో తనకున్న మందుజ్ఞాపకాలే రాసినా శ్రీశ్రీ కి భాషపై ఉన్న అధికారం , నిషాలో కూడా సామాజికసృహ కోల్పోనితనం ,పదాలతో ఆడుకొనే పసితనం …………ఇవన్నీ మనకు ముచ్చట కలిగిస్తాయి.

రచయిత సరదాకి మందుహాసం అనిపెట్టినా సీరియస్ విషయాలు చాలా ఉన్నాయి.కాశీపతికి శ్రీశ్రీ తోనే కాదు సామాన్య ప్రజలతో కూడా సుధీర్ఘ అనుబంధం ఉంది. అనంతపురం ప్రజల తరుపున అనేక సందర్భాల్లో గట్టిగా గొంతు విప్పిన వ్యక్తి .జర్నలిస్ట్‌గా కూడా చేయితిరిగిన వాడు కాబట్టి ,పుస్తకంలో వేగంగా చదివించే శైలి ఉంది.పాటలో ఒక్క పదం మార్చడానికి ఒక నిర్మాత విమాన ప్రయాణాన్నే రద్దు చేయించిన శ్రీశ్రీ  ; మందు కంపెనీ కోసమని కాశీపతికి టెలిగ్రామ్ ఇచ్చి మద్రాసు పిలిపించిన శ్రీశ్రీ ; ఇద్దరు ఒకరే కానీ శ్రీశ్రీ ఒకడు కాదు.ఆయన అనేక రూపాల సమ్మేళనం , ఆయన మందు రూపాన్ని మరచిపోయి, కవిగా ఆయన విశ్వరూపాన్నిమాత్రమే గుర్తుంచుకోవాలి.బానిస తన సంకెళ్ళను తెంచుకోవడానికి ప్రయత్నిస్తాడు .కానీ మందు బానిస తన సంకెళ్ళను మరింతగా బిగించుకొంటాడు – ఇది శ్రీశ్రీ చెప్పిన మాటే.

వరవరరావు , ఇనాక్ ల ముందుమాటలు ఈ పుస్తకానికి బోనస్ .కొన్ని వ్యాసాల్లో కాశీపతి ఫస్ట్‌పర్సన్ నుండి థర్డ్ పర్సన్ కు జంప్ చేశారు.ఇది మందుహాస చమత్కృతిలో ఇదొక భాగమేమో !

-జి.ఆర్.మహర్షి , ఆదివారం-ఆంధ్రజ్యోతి , 26 Oct 2014.

MadyaTaragatiManduHaasam

‘మ‌ద్య‌’తర‌గ‌తి ‘మందు’హాసండిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

‘మ‌ద్య‌’తర‌గ‌తి ‘మందు’హాసం on kinige

 

MadyaTaragatiManduHaasam600

Related Posts:

మానవత్వపు పరిమళాలు – “రజనీగంధ” పుస్తకంపై సమీక్ష

‘పూలకు తల్లి ఒడి అయినందుకే పులకరిస్తుంది నేల’ అంటున్న పాపినేని శివశంకర్ కవిత్వం మానవత్వపు పరిమళాలను వెదజల్లుతుంది. పువ్వులంటేనే కాదు పువ్వుల్లాంటి మనుషులంటేనూ ఇష్టమంటారు. అందుకే ప్రపంచం పూలతోట కావాలని ఆకాంక్షిస్తారు. మనిషి, పుట్టుక, మానవ సంబంధాల్లోని సంక్లిష్టత పాపినేని శివశంకర్ కవిత్వంలోని ప్రధానాంశం. అందుకే ‘అన్నీ సడలిపోతున్నాయి/బంధాలు జారుముళ్ళవుతున్నాయి’ అంటారు. ఇటీవల ద్రవాధునికత పేరిట కొత్త ప్రతిపాదనలను ముందుకు తీసుకొచ్చిన పాపినేని 2005లోనే ‘ద్రవాత్మకం’ కవిత రాశారు. ‘ఏదీ నిలకడగా ఉండడం లేదు’ అని ఒక ఎరుకను కలిగించడంతో పాటు అన్నీ ‘దబ్బుదబ్బున పరిగెత్తుతున్నాయి/ ఘనాకృతులన్నీ ద్రవాలుగా మారుతున్నాయి’ అంటూ మార్పును కవిత్వీకరించారు. మోడ్రన్ పేరెంటింగ్ చాలా క్లిష్టమైనది.

గతంలోలా ఇదే చదవమని, ఇలాగే ఉండమని పిల్లలకు చెప్పలేని పరిస్థితి. ఇటువంటి స్థితిలో పిల్లలకు ప్రపంచాన్ని తెలియజెప్పి లక్ష్యాన్ని వారికే వదిలేయడం మంచిదనీ- ‘జీవితం ఒక అద్భుత పుష్పం వికసించే ప్రక్రియ/దాన్ని పరిమళభరితం చేసుకొమ్మని’ చెప్తారు పాపినేని. ‘మీ కోసమైనా ఇతరుల కోసమైనా కావాల్సి వస్తుందని/ ఒక కన్నీటిబొట్టుని బరిణెలో పెట్టి అందించాను’ అనే గంభీరమైన వాక్యాలతో ‘రజనీగంధ‘ పరిమళాలను పంచిన పాపినేని ‘గుంటూరమ్మాయి’ కవితలో కాస్తంత చిలిపితనాన్ని చిలకరిస్తారు. ‘మనుషులు తమ నీడలుగా మిగిలిపోయిన కాలం’, ‘మాగిపోయి అంతరంగ వస్త్రాల మీద/ ఎండ పడనీ’ అనే పాపినేని కవిత్వం ప్రస్తుతం సమాజంలోని మానవుడి అంతరంగ మథనానికి అద్దం పడుతుంది. మనిషి కన్నీటిని తుడిచి కాస్తంత పరిమళం అద్దే ప్రయత్నం చేస్తుంది.

 

-ఆదివారం అనుబంధం, ఆంధ్రజ్యోతి ,09/03/2014.

“రజనీగంధడిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

రజనీగంధ on kinige

 

Rajanigandha600

Related Posts:

కాలానికి కాపలాకాసే కథలు -” నిత్య గాయాల నది ” పుస్తకంపై సమీక్ష

ఇవి గత 13 ఏళ్ళలో వేర్వేరు పత్రికల్లో అచ్చయిన కథలు. ఈ కాలానికి తెలంగాణ చరిత్రలో చాలా ప్రాధాన్యత ఉంది. ఒకరకంగా తెలంగాణ ఉద్యమ నిర్మాణంతో మొదలుపెట్టి ఇప్పటి పునర్నిర్మాణ దశ వరకూ కథా సమయం విస్తరించింది. ప్రత్యేక తెలంగాణ ఉద్యమంతో నేరుగా అనుబంధంలో ఉండి రాసినవి కొన్ని కాగా, ఉద్యమ భావజాలాన్ని నిర్మించే అంశాలను చర్చించిన కథలు మరికొన్ని. బెజ్జారపు రవీందర్నిత్య గాయాల నది‘ కథా సంపుటిని చూస్తే ఉద్యమంతో పాటు ఎదిగొచ్చిన ఆర్థిక, మార్కెట్ శక్తుల చలనం కనిపిస్తుంది. భూ పాలకుడినే కాదు, భూమినే విముక్తి చేయాల్సిన అవసరం (పరాయి గ్రహం) తెలిసివస్తుంది. ఈ సంపుటిలోని 11 కథల్లో ‘చరణం జారిపోయాక’ వంటి ఒకటి రెండు కథలను వదిలేస్తే… రేపటి తెలంగాణ కోసం జాగారం చేస్తున్న, జాగురూకతని సూచిస్తున్న కథలే మిగతావన్నీ. “అల్లూరి దేశభక్తుడు… కొమరం భీం తీవ్రవాది ఎలా అయ్యా”రన్న ప్రశ్నతో (నిత్యగాయాల నది) మొదలయి. “తెలంగాణ వస్తే బస్సు చార్జీలు తగ్గుతాయా” అనే వాస్తవిక నిష్ఠూర ప్రశ్న (మూడు తొవ్వలు) దగ్గర ఈ కథలు పునర్నిర్మాణ దశలోకి మళ్ళాయి.

నిజానికి జాతి నిర్మాణం కోసం, ప్రజల విముక్తి కోసం జరిగే పోరాటాలను ప్రాంతీయ సంకుచిత కోణంలో కాక… ఒక సార్వజనీన సాంస్కృతిక విలువగా చూడాలి. ఉమ్మడి రాష్ట్రంలో ఆ పని జరగలేదనేది వాస్తవం. ఒక ప్రాంత సాంస్కృతిక ప్రత్యేకత నిరాకరించబడినప్పుడు సవ్యంగానో, అపసవ్యంగానో ఇలాంటి ప్రశ్నలు ఎదురుకాక తప్ప దు. ఈ ప్రశ్నలు ఉద్యమ భావజాల పునాదులుగా పనిచేసినా, ప్రజల నిత్య వ్యవహారిక, దీర్ఘకాలిక సమస్యలే ప్రాతిపదిక అవుతాయి. ఈ ప్రాతిపదికపైనే తెలంగాణ జనజీవనంలోని విశిష్ట, ప్రత్యేక నిర్బంధ పరిస్థితులను వేర్వేరు కాన్వాస్‌లు, భిన్న స్వరాల్లోంచి రవీందర్ చర్చించారు. కారల్ మార్క్స్ నుంచి మంత్రసానులు, గ్రామదేవతల దాకా అల్లుకుపోయిన తెలంగాణ వంటి సమాజంలో పునర్నిర్మాణ ప్రక్రియ ఎన్నో లోతులను చూడాల్సి ఉంటుంది. మూడు తొవ్వలు కథలో రవీందర్ సూచించినట్టు, సున్నితమైన భార్యాభర్తల సంబంధాల్లోని ఘర్షణలకూ ఒక భౌతిక ప్రాతిపదికను అది కనుక్కోవాల్సి ఉంది. కాలానికి కాపలా కాయడమే కవులు, కథకుల ప్రధాన కర్తవ్యం అనుకుంటే… ఆ పనిని రవీందర్ సమర్థవంతంగా చేశాడనే చెప్పాలి.

- వి. అరవింద్ , ఆదివారం అనుబంధం-ఆంధ్రజ్యోతి , 2 ఫిబ్రవరి 2014 .

నిత్య గాయాల నది” పుస్తకం డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

నిత్య గాయాల నది on kinige

 

NityaGayalaNadi

Related Posts:

నిర్భయ గీతానికి శత అక్షరమాలలు – “నివేదన” పుస్తకంపై సమీక్ష

ఒక పరభాష కవితకు వంద అనువాదాలు రావడం అరుదైన విషయం . అలల మాదిరిగా తేలియాడే శైలి , సొగసైన పదాల అల్లిక , వడివడిగా సాగే నడక ఉంటే తప్ప అన్ని అనువాదాలు రావు .అలాంటి కవితల్లో –

విశ్వకవి రవీంద్రనాథ్ ఠాగోర్ రాసిన “కొరొ జాగోరితో”  (వేర్ ద మైండ్ ఈజ్ విత్అవుట్ ఫీయర్ …) ఒకటి .

దీనిని తెలుగులో 95 మంది కవులు 100 సార్లు అనువాదం చేశారు . 1913 లో ఈ కవితను ‘గీతాంజలి’ పేరిట ఆదిపూడి సోమనాధరావు తొలిసారి అనువాదం చేశారు . ఆ తరువాత చలం, బాలాంత్రపు రజనీకాంతరావు, రాయప్రోలు సుబ్బారావు, కె.వి.రమణారెడ్డి , తిరుమల రామచంద్ర , అచంట జానకీరామ్ , చర్ల గణపతి శాస్త్రి , ధాశరధీ , కొంగర జగ్గయ్య – ఇలా లబ్ద ప్రతిష్టులైన రచయితలు తమదైన శైలిలో దీనిని తెలుగు లోకి తీసుకువచ్చారు . ఈ గేయం హైస్కూలు పాఠ్యాంశంగా అందరికీ సుపరిచితమైనదే . అయిన దానిలోని సొబగును , స్ఫూర్తిని – ఈ కవులు తమదైన శైలిలో పాఠకులకు అందించడానికి ప్రయత్నించారు . ఈ కవితలన్నింటినీ సంస్కృతి సంస్థ – నివేదన పేరిట ఒక సంకలనంగా తీసుకువచ్చింది . భావం ఒకటే అయినా తమవైన పదాల ద్వారా కొత్త అందాన్ని అద్దటంలో ఈ కవుల ప్రజ్ఞ పాఠకులను అలరిస్తుంది . రవీంద్రుడి కవిత్వంపైనా , తెలుగు సాహిత్యం పైనా ఆసక్తి ఉన్నవారు తప్పనిసరిగా చదవాల్సిన పుస్తకమిది .

 

-సివిఎల్ఎన్ ,ఆదివారం ఆంధ్రజ్యోతి .

Andhrajyothy_15_06_2014_022_002

“నివేదనడిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

నివేదన on kinige

 

NivedanaTagoreTeluguPoems600

Related Posts:

ఆత్మీయ ‘కధా’ సంపుటి – “గోరింట పూచింది” పుస్తకం పై సమీక్ష

చాలీచాలని సంపాదనతో కూడా కన్నవారు ఎంతమంది పిల్లలనైనా పోషిస్తారు.ప్రయోజకులైన సంతానం మాత్రం తల్లిదండ్రుల పోషణకు వంతులు వేసుకోవడం చూస్తున్నాం. ఈ ధోరణిని రచయిత మొదటి మూడు కధలలో మరోమారు ఎత్తిచూపారు. గ్రంధశీర్షికతో వచ్చిన ‘గోరింటపూచింది’ కధ 1970వ దశకంలో వచ్చిన ఉపాధ్యాయ దంపతుల ఇతివృత్తంతో వచ్చిన చిత్రాన్ని గుర్తుచేసింది.పల్లె వాతావరణాన్ని కళ్లకు కట్టే ‘గూడుతెగిన పక్షులు’ కధ ఇప్పుడు 50వ పడిలోని వారిని గత స్మృతులలోనికి తీసుకువెళుతుంది. పురాణగాధ ‘కచదేవయాని’ ఇతివృత్తాన్ని సమకాలీన పరిస్థితులకు అనుగుణంగా మలచారు. మొత్తం 13 కధల్లో స్నేహం , గుప్తదానం , రాజకీయాలు , ఎన్నికలు ప్రధాన ఇతివృత్తాలుగా ఉన్నాయి. రెండు కధలకు శీర్షికలు పొసగినట్లు లేదు . విషాదాంత కధకు సానుకూల కోణంలో (గోరింట పూచింది),సుఖాంత కధకు విషాద అర్ధంలో (గూడు చెదిరిన పక్షులు) శీర్షికలు పెట్టారు.

  • -అరవపల్లి జగన్నాధస్వామి , ఆంద్రజ్యోతి- ఆదివారం , 28 సెప్టెంబర్ 2014.

 

GorintaPoochindi @ Andhrabhoomi#Akshara_28-09-14

 

గోరింట పూచింది” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

గోరింట పూచిందిon kinige

 

Gorintapoochindi600

Related Posts:

జగన్నాథ కథ చక్రాల్

ప్రముఖ రచయిత జగన్నాథ శర్మ ‘నవ్య’ వారపత్రిక మొదటి పేజీలో రాస్తున్న చిరు కథల్లోంచి ఓ నూరు కథలను ఎంచుకుని ‘జగన్నాథ కథ చక్రాల్‘ పేరుతో ఈ పుస్తకాన్ని ప్రచురించారు. పత్రికా రచయిత కూడా అయినందువల్ల జగన్నాథ శర్మకు ఒక ఇతివృత్తాన్ని కథగా ఎలా మలచాలో తెలుసు.

తమ జీవిత కాలంలో అనేక వేల కథలు, కథానికలు, నవలలు, నాటకాలు చదివిన వారికి కూడా ఏమాత్రం ఊహకందని ఇతివృత్తాలు ఈ నూరు కథల్లోనూ కనిపిస్తాయి. ఇందులో కొన్ని ర చయిత స్వీయ అనుభవాలు అయి ఉండాలి. ఒక మారుమూల గ్రామంలో ఒక వ్యక్తి పేదలకు సహాయం చేయడానికి, ముఖ్యంగా వారి కడుపు నింపడానికి ఎటువంటి పద్ధతిని అనుసరించాడన్నది మొట్టమొదటి కథ ‘దేవుడిడ్లీ’లో కళ్లకు కడుతుంది.

ఆ ఊరిలో హోటల్ యజమాని ఒకరు గోడ మీద ‘ఒకటి దేవుడికి’ అనే స్లిప్‌ను అతికించి ఉంచుతాడు. ఆ హోటల్‌లో టిఫిన్ చేసే ప్రతివాడూ తప్పనిసరిగా ఓ ప్లేటుకు అదనంగా డబ్బులివ్వాలి. ఆ అదనపు ప్లేటు పేదవాళ్లకు వెడుతుంది. ఆ హోటల్ యజమాని ఉద్దేశ్యం తెలిసిన ఎవరూ అతని ఔదార్యాన్ని కాదనలేకపోతారు.

నవ్య వారపత్రికలోని సంపాదకీయ పుటలో ఆయన ఈ కథలు రాశారు. ఈ పేజీని చదవకుండా లోపలి పేజీల్లోకి వెళ్లలేని పరిస్థితిని జగన్నాథ శర్మ తన కథల ద్వారా కల్పించారంటే అందులో అతిశయోక్తేమీ లేదు. ఒకే ఒక్క పేజీలో ఇంత చక్కని కథను ఆణిముత్యంలా పొదగడం, ఆ కథ రంజింపజేసేదిగా ఉండడం శర్మకు మాత్రమే సాధ్యమైందనుకోవాలి. జీవితంలోని వివిధ కోణాలను ఈ కథలు అతి మధురంగా స్పృశించాయి. ఇందులోని ప్రతి ఇతివృత్తమూ హృద్యంగానే ఉంటుంది. మానవ సంబంధాల్లోని సున్నితత్వాన్ని ఇంత అద్భుతంగా కథల్లో చొప్పించడం అందరికీ సాధ్యం కాదు. ఇవి బొత్తిగా కాలక్షేపం కథలు కావు. వినోదం కోసం ఉద్దేశించిన కథలూ కావు. ఆసాంతం చదివిస్తాయి. తప్పకుండా మనిషినీ, మనసునీ ప్రభావితం చేస్తాయి.

జి. రాజశుక, ఆదివారం అనుబంధం, ఆంధ్రజ్యోతి దినపత్రిక, 22 జూన్ 2013

* * *

“జగన్నాథ కథచక్రాల్” డిజిటల్ రూపంలో కినిగెలోలభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.
జగన్నాథ కథచక్రాల్ On Kinige

Related Posts:

చందనపు బొమ్మలే

వందేళ్ల తెలుగు కథల్లో నుంచి, ఆ రచయితల నుంచి స్వీకరించవలసినవీ పరిహరించవలసినవీ విజ్ఞతతో గ్రహించిన యువ రచయితలు ఇప్పుడు వస్తున్నారు. తమదైన తాత్విక దృక్పథంతో జీవితాన్ని పరిశీలించి దానికి తగిన శైలిలో రచనలు చేస్తూ వర్తమాన కథను వెలుగుదారిలో నడిపిస్తున్న వీళ్ల సంకలనాలు తెలుగు కథకు ఉజ్వల భవిష్యత్తును వాగ్దానం చేస్తున్నాయి. అరుణ పప్పు కథా సంపుటి ‘చందనపు బొమ్మ‘ ఈ కోవకు చెందినదే. ఇందులోని పది కథల్లో తొమ్మిది శిల్పపరంగా ఉత్తమ పురుషలో చెప్పినవి. వీటిలో కనిపించే ‘నేను’ ఒక విద్యావంతురాలూ ఉద్యోగినీ అయిన యువతి. వృత్తిరీత్యా సమాజంలో రకరకాల మనుషులను కలుసుకునే అవకాశమూ అవసరమూ ఉన్న జర్నలిస్టు. ముందుతరపు స్త్రీల పోరాటాలు సాధించిన హక్కులు, అవకాశాలను అందిపుచ్చుకుని ఆత్మగౌరవంతో తమ పనులకు తాము బాధ్యత వహించే యువతులు ‘నేను’ అంటూ ఈ కథల్లో మనకు కనిపిస్తారు. జర్నలిస్టులు కాకపోయినా దీప, పూర్ణ, మృణ్మయి, లాలిత్య వంటివాళ్లు వివేకవంతులు, ఆలోచనాపరులు, జీవన ప్రేమికులు. లోపల ఉండవలసిన సున్నితత్వాన్నీ సంవేదనలనూ కాపాడుకుంటూనే అవసరమైన చోట నిర్భయంగా నిలబడతారు. ఈ కథలన్నిటిలో వ్యక్తుల మధ్య సంబంధాల్లోని రకరకాల ఛాయలు, మానసిక సంఘర్షణలు ప్రధానంగా కనిపిస్తాయి. మంచి కథకు క్లుప్తత, అనుభూతి ఐక్యత, సంఘర్షణ, నిర్మాణ సౌష్టవం అనే నాలుగు లక్షణాలూ ఉండాలని అంటారు విమర్శకులు వల్లంపాటి వెంకటసుబ్బయ్య. ‘చందనపుబొమ్మ’లోని కథలన్నిటిలోనూ అవి ఉన్నాయి. కథలకు నేపథ్యంలో రచయిత్రి అద్దిన రంగులు వాటిని పరిపుష్ఠం చేశాయి. ‘ఏకాంతంతో చివరిదాకా’లో కొండప్రాంతపు వర్ణన, ‘ఒక బంధం కావాలి’లో సముద్రతీరాన సూర్యోదయం, ‘భ్రమణకాంక్ష’లో కథానాయకుడి అనుభూతులు – ఇవన్నీ అలాంటి కొన్ని అందమైన రంగులు. తెలుగు భాషను చక్కగా ఉపయోగించే సామర్థ్యమున్న రచయిత్రి ఇంగ్లీష్ పదాలను, వాక్యాలను అత్యవసరమైతే తప్ప వాడకుండా ఉంటే బాగుంటుంది. ‘చందనపుబొమ్మ’తో తమ ప్రచురణలను ప్రారంభించిన రాష్ట్ర కథానిలయం నందలూరువారు ప్రతి ఏడూ ఇలాంటి ఒక యువ కథాగుచ్ఛాన్ని అందిస్తారని ఆశిద్దాం.

పి. సత్యవతి
ఆదివారం ఆంధ్రజ్యోతి, 7 ఏప్రిల్ 2013

* * *

“చందనపు బొమ్మ” డిజిటల్ రూపంలో కినిగెలో లభిస్తుంది. కినిగె వెబ్ సైట్ ద్వారా ప్రింట్ బుక్‌ని తగ్గింపు ధరకి తెప్పించుకోవచ్చు. మరిన్ని వివరాలకు ఈ లింక్‌ని అనుసరించండి.

చందనపు బొమ్మ On Kinige

Related Posts: