అనగనగా ఓ హిజ్రా… ‘ఒక హిజ్రా ఆత్మకథ’ పుస్తకంపై సమీక్ష

ఇది నా శరీరం. ఎలా అయినా మార్చుకుంటాను. ఇది నా మనసు. దానికి నచ్చినట్టే నడుచుకుంటాను. ఈ సమాజానికేం హక్కుంది నన్ను ప్రశ్నించడానికి?- అంటూ ధిక్కార స్వరాన్ని వినిపించిన ఓ హిజ్రా ఆత్మకథే ఈ పుస్తకం. తమిళనాడులోని పల్లెలో పుట్టిన ఓ అబ్బాయి…తన మగతనపు సంకెళ్లు తెంచుకుని… ప్రకృతి నిర్ణయానికి వ్యతిరేకంగా స్త్రీత్వాన్ని పొందాడు. హిజ్రాల్లో కలిశాడు. రేవతిగా పేరు మార్చుకున్నాడు. ఆ ప్రయత్నంలో కన్నవారికి దూరమయ్యాడు, సోదరుల చేతిలో చావుదెబ్బలు తిన్నాడు. బతుకుబండి నడిపించడానికి ఒళ్లమ్ముకున్నాడు. అంత కష్టపడ్డా… సాధించిందేమిటి? కోరుకున్న జీవితాన్ని ఆస్వాదించాడా, ఆశించిన ఆనందాల్ని అందుకున్నాడా? అన్న ప్రశ్నలకు జవాబులు దొరకాలంటే ‘ఒక హిజ్రా ఆత్మకథ’ చదవాలి. ప్రస్తుతం… సమాజంలో బహిష్కృతులుగా బతుకుతున్న తనలాంటి వారి కోసం ‘సంగమ’ అనే సంస్థ తరఫున పనిచేస్తున్న రేవతి కథ చదువుతున్నంతసేపూ మనసు అల్లకల్లోలం అవుతుంది. వీధుల్లోనో, దుకాణాల దగ్గరో చిల్లరపైసలు యాచించే మూడో ప్రకృతి జీవుల్లో రేవతి పోలికల్ని వెతుక్కుంటాం.

- వెంకట్ , ఈనాడు – ఆదివారం , 23-11-2014.

“ఒక హిజ్రా ఆత్మకథడిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

ఒక హిజ్రా ఆత్మకథ on kinige

 

OkaHijraAtmakatha600

Related Posts:

పురుషాధిక్యంపై ధిక్కారం..త్యాగసేవాసక్త – బెంగుళూరు నాగరత్నమ్మ పుస్తకంపై సమీక్ష

నల్లని శరీరచ్ఛాయ.. పదమూడేళ్లకే అనాథ… దేవదాసి. అయినా.. తల్లి పుట్టలక్ష్మమ్మ ఆకాంక్షలకు అనుగుణంగా భరతనాట్యం, కర్నాటక సంగీతం నేర్టుకుని లలిత కళలకు కాణాచిగా మారింది బెంగుళూరు నాగరత్నమ్మ. 26 ఏళ్లకే 146 పట్టణాలలో 1235 కచేరీలు చేసి, విద్యాసుందరి, గానకళావిశారద, త్యాగసేవాసక్త బిరుదులు పొంది, గృహలక్ష్మి స్వర్ణకంకణధారియై 1905 నాటికే ఆదాయపు పన్ను చెల్లించిన స్త్రీమూర్తి. నేను దేవదాసీని అని గర్వంగా చెప్పుకుని, ఓ గొప్ప కళాకారిణిగా నాగరత్నమ్మ ఎలా రాణించారో ఆర్‌ఎం ఉమామహేశ్వరరావు ఆకట్టుకునేలా రాశారు. చెళ్ళపిళ్ళ వెంకటశాస్త్రి, ఆచంట జానకీరామ్, మరుపూరి కోదండరామరెడ్డి.. నాగరత్నమ్మ ఔన్నత్యాన్ని జ్ఞాపకాల సహాయంతో వివరించారు. సంఘసంస్కర్త కందుకూరి వీరేశలింగంలోని పురుషాధిక్యతను ప్రశ్నించి సంచలనం సృష్టించిన నాగరత్నమ్మ, త్యాగరాజ ఆరాధనోత్సవాల్లో స్త్రీలు పాడరాదనే నిషేధాన్ని ధిక్కరించి మరో మార్పుకు నాంది పలికాలు. నాగరత్నమ్మకు శక్తినిచ్చిన అంశాలు, ప్రతికూల పరిస్థితుల నుంచి ఆమె ఎదిగిన తీరు, పురుషాధిక్యంపై ఆమె ధిక్కారం, ఆమె దాతృత్వం.. ఆమె ఆధ్యాత్మికంపై మరింత దృష్టిసారిస్తే ఇంకా బాగుండేదేమో!

– కె. భాస్కర్, ఆంధ్రజ్యోతి, 27th Jul 2014

 

 

 

 

 

 

 

 

 

బెంగుళూరు నాగరత్నమ్మ” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

బెంగుళూరు నాగరత్నమ్మ on kinige

 

 

Related Posts:

స్ఫూర్తిదాయకం.. ‘యోగి’ వ్యక్తిత్వం- “సమ్మాన్యుడు” పుస్తకంపై సమీక్ష

డా.సి.వి.యోగి అనే సంక్షిప్త నామంతో ప్రాచుర్యం సంపాదించిన ప్రతిభావంతుడు డా.చేంబోలు వెంకట యోగిగారి జీవిత చరిత్ర ఈ పుస్తకం.
ఆయన జీవిత విశేషాలను తెలియజేస్తూ ఆయన సమకాలికులు, కుటుంబ సభ్యులు రాసిన వ్యాసాలు ఇందులో ఉన్నాయి. ఇవిగాక ఆయనవద్ద చదువుకొని ఉన్నత స్థాయికి ఎదిగిన వ్యక్తులు తమ జ్ఞాపకాలను గుర్తుచేసుకుంటూ రాసిన వ్యాసాలు కూడా ఉన్నాయి.
సద్గురు శ్రీ శివానందమూర్తిగారి ఆశీస్సులతో వెలువడిన ఈ పుస్తకంలో శ్రీ శివానందమూర్తిగారి ఆధ్యాత్మిక సూక్తులు అసంఖ్యాకంగా ఆంగ్లంలో ప్రచురించారు.
విశ్రాంత ఉపన్యాసకులు యర్రంశెట్టి సత్యారావు పుస్తకానికి రాసిన ప్రస్తావనలో ‘‘డాక్టర్ యోగి జీవనశైలి ఎందరినో కదిలించింది, కరిగించింది. విద్యాదానమే ఆయన అందరికీ అందించిన నిజమైన యోగం. ‘యోగి’ అనే పరమపవిత్ర పదానికి ప్రతీకగా నిలిచారు’’ అన్నారు (పేజి 15).
అనేక మందికి విద్యాదానం చేసిన డా.యోగిగారికి మెట్రిక్యులేషన్ తర్వాత కాలేజిలో చేరి చదువుకొనే అవకాశం లేకుండా పోయింది. ప్రైవేటుగా చదివి హిందీలో ‘సాహిత్యరత్న’ డిగ్రీ సంపాదించారు. కాశీ వెళ్లి హోమియో వైద్యం నేర్చుకొని వచ్చి స్వస్థలం అనకాపల్లిలో హోమియో ప్రాక్టీసు మొదలెట్టారు. రాబడి తక్కువ కావటంతో ట్యూషన్స్ చెప్తుండేవారు.
స్వయంకృషితో పధ్నాలుగు భాషలు నేర్చుకొని పాండిత్యం సంపాదించుకొనగలిగారు. ఇదిగాక బిఎస్సీ, బి.కాం. తదితర డిగ్రీ పుస్తకాలు తెచ్చుకొని అధ్యయనంచేసి ఆ విద్యార్థులకూ ట్యూషన్స్ చెప్పేవారట. చూడటానికి ఇదంతా నమ్మశక్యంగా కనిపించదు. అయితే ఇవన్నీ అక్షర సత్యాలని ఈ పుస్తకంలోని వ్యాసాలు తెలియజేస్తాయి. కారుణ్య భావం, సేవాతత్పరత మొదలైన సద్గుణాలన్నీ ఆయన వ్యక్తిత్వంలో ఒక భాగమైపోయాయనే సంగతిని వెల్లడించే సంఘటనలు ఈ పుస్తకంలో ఉన్నాయి.
కాకినాడలో జిల్లా కలెక్టరుతో జరిపిన సంభాషణ (పేజి 66) డాక్టర్ యోగిగారిలో ఉన్న అద్భుతమైన ఆత్మవిశ్వాసాన్ని ప్రతిబింబిస్తుంది. ఈ సంభాషణకు సంబంధించి పేజి 119లో ఉన్న వివరాలు ఆశ్చర్యం కలిగిస్తాయి.
ఆయనలో అపారమైన విజ్ఞానం ఉండేది. దానికితోడు అద్భుతమైన వ్యక్తిత్వం. అందుకే కాకినాడలో హిందీ లెక్చరర్‌గా పనిచేస్తున్న కాలంలో అనేకమందిని ప్రభావితం చేయగలిగారు.
వారి పెద్ద కుమారుడు సినీ గేయ రచయితగా స్థిరపడ్డ ‘సిరివెనె్నల’ సీతారామశాస్ర్తీ. ఆయన రాసిన పెద్ద వ్యాసం ఒకటి ఈ పుస్తకంలో ఉంది. ఒక తండ్రిగా డా.యోగి ఏ విధంగా ఉండేవారో ఇందులో వివరించారు.
డా.యోగి జీవితకాలం కేవలం నలభై సంవత్సరాలు. అయినా ఆ స్వల్ప వ్యవధిలోనే ఆదర్శవంతమైన జీవితం గడిపి అనేకమందికి మార్గదర్శకులు కాగలిగారు.
సనాతన ధర్మానికి సంబంధించిన గ్రంథాలు చదివారు. ఉపన్యాసాలివ్వగల స్థాయికి ఎదిగారు. చదివిన వాటిని ఆచరణలోనూ చేసిచూపేవారు. ఆర్థిక పరిస్థితి అంతంతమాత్రంగా ఉన్నరోజుల్లోనూ ఇతరులకు సహాయం చేయటానికి వెనుకాడేవారు కాదు.
హోమియో వైద్యంలోనూ ఆయన విశేషమైన ప్రతిభ కలిగి ఉన్నారనే సంగతి, ఈ పుస్తకంలో ఇవ్వబడిన కొన్ని కేసురిపోర్టులు చూసినప్పుడు తెలుస్తుంది. మొదట్లో ఫీజు తీసుకున్నారు గానీ, తర్వాత కాలంలో మానేశారట. కారణమేమిటని ఒకరు అడిగినప్పుడు ‘్ఫజు కోసం పేషెంట్సును బాధపెట్టటం ఇష్టం లేదు’ అని జవాబిచ్చారట.
పిల్లలను సహజంగా ఎదగనివ్వాలన్నది వారి ఆలోచన. చదువు పేరుతో పిల్లలను ఒత్తిడికి గురిచెయ్యకూడదని ఆయన తరచూ అంటుండేవారట. కానె్వంటు చదువులు రాజ్యమేలుతున్న ఈ రోజులలో ఇది ఆలోచించవలసిన విషయం.
ఏ సబ్జక్టుకు సంబంధించిన పుస్తకమైనా ఒక్కసారి చదివితే ఆయనకు గుర్తుండిపోయేది. అసాధారణమైన ఆదరణాశక్తికి కారణం ఏమై ఉంటుందని అన్నప్పుడు ‘దైవానుగ్రహం’ అన్నది వారి జవాబు.
ఎవరైనా సనాతన ధర్మానికి సంబంధించిన తప్పుడు విమర్శ చేసినప్పుడు ఆయన సహించేవారు కాదు. తార్కికంగా వాదించి తగిన సమాధానం చెపుతుండేవారట.
ఆయన జీవితం వడ్డించిన విస్తరి కాదు. విశ్రాంతి నెరుగని జీవితం. సమస్యలు ఎదురైనప్పుడు వెనుకంజవేయటంకన్నా ఎదుర్కొని విజయం సాధించటం మిన్న అని ఆయన జీవిత చరిత్ర తెలుపుతుంది.
నిజాయితీగా జీవించి ‘పరోపకారార్థమిదం శరీరమ్’ అన్న సూక్తిని సార్థకం చేసిన గొప్ప వ్యక్తి డా.యోగి.
పుస్తకంలో చివరి అధ్యాయానికి ‘మహాభినిష్క్రమణం’ అని శీర్షిక ఇవ్వటం సముచితంగా ఉంది.
పుస్తకం ముగింపులో ‘యోగిగారి జీవితం యొక్క ప్రభావం మాతోనే అంతమవకూడదు. ఇంకా ముందు తరాల వారికి కూడ స్ఫూర్తిని ఇవ్వాలనే కాంక్షతో ఆయన కొండంత వ్యక్తిత్వాన్ని చిన్నదర్పణంలో చూపించటానికి ప్రయత్నించాను. నా ప్రయత్నం ఎంతవరకూ సఫలీకృతం అయిందో కాలమే నిర్ణయించాలి’ అన్నారు రచయిత.
వారి ఆకాంక్ష నెరవేరుతుందని ఆశించవచ్చు.

-ఎం.వెంకటేశ్వరశాస్ర్తీ, అక్షర, ఆంధ్రభూమి, 29/03/2014

***

ఈ సమీక్షను ఈనాడు పుస్తక సమీక్ష పేజీలో చదవడానికి ఈ క్రింది లింకు క్లిక్ చేయండి

http://www.andhrabhoomi.net/content/yogi

 

 

 

 

 

 

 

 

సమ్మాన్యుడు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

సమ్మాన్యుడు” on kinige

Related Posts:

మనమెరగని ఘంటసాల జీవితం

ఇంతవరకూ మనకు తెలిసింది ‘ఘంటసాల పాట’ మాత్రమే. ఆ ‘పాట’ వెనక ఉన్న జీవితం మనకు అంతగా పరిచయం లేదు. ఆ జీవితాన్ని, ఆయన అంతరంగాన్ని ఆవిష్కరించే ప్రయత్నంలో భాగంగా ఘంటసాల కుమార్తె శ్యామల తీసుకువచ్చిన పుస్తకం ఇది. ‘నేనెరిగిన నాన్నగారు‘ అనే పేరు చూడగానే కేవలం తండ్రితో తనకున్న అనుబంధాన్ని మాత్రమే చెబుతున్నారేమో అనుకుంటాం. కానీ, ఘంటసాల పూర్వీకుల పుట్టుపూర్వోత్తరాలతో పాటు ఘంటసాల బాల్యం, యవ్వనం, అంచెలంచెలుగా ఆయన ఎదిగిన క్రమాన్ని పాఠకుడి కళ్లు చెమర్చేలా ఎంతో ఆ్రర్దతతో, ఆర్తితో అవలోకించే ప్రయత్నం చేశారామె. కృష్ణాజిల్లాలో పుట్టి, విజయనగరం సంగీత కళాశాలలో చదివి, సినిమాల్లో పాటలు పాడ్డానికి వెళ్లడమే మనందరికీ తెలిసిన ఘంటసాల చరిత్ర. కానీ .. పౌరోహిత్యం జరుపుకునే కుటుంబంలో పుట్టి ఘంటసాల అనుభవించిన కటిక పేదరికం, తోటి పండితుడి చేత అవమానం పాలై సంగీతం అభ్యసించాలన్న పట్టుదలతో ఎవరీకీ చెప్పకుండా మహారాజా సంగీత కళాశాలను వెతుక్కుంటూ విజయనగరం వెళ్లడం, అక్కడ పట్రాయని సీతారామ శాస్త్రి చూపిన ఆదరణ, ద్వారం వెంకటస్వామినాయుడుగారి మెప్పుతో సంగీత కళాశాలలో సీటు సంపాదించడం, పిల్లజమిందారైన సహపాఠి ముద్దు పాపారావు అపూర్వ చెలిమి, ఆకలికి తాళలేక జోలె పట్టి అన్నం అడుక్కున్న తీరు, ఆనాటి దేవదాసి కళావరురింగు సరిదెల లక్ష్మీనరసమ్మ ఇచ్చిన ఆతిథ్యం, నూనూగు యవ్వనంలో స్వాతంత్య్రోదమంలో పాల్గొని జైలు పాలవడం, మేనమామ కూతురు సావిత్రిని పెళ్లాడడం, సముద్రాల రాఘవాచార్య సహకారంతో మద్రాసుకు మకాం మార్చడం … హెచ్.ఎం.వి.రికార్డులకు పాడుతూ కాణీ, అణా సంపాదించడం, తోటి గాయని వక్కలంక సరళ (కాదు సుమా కల కాదు సుమా – కీలుగుర్రం ఫేం)తో పెళ్లికుదరబోయి, అనుకోని పరిస్థితుల్లో మరో రంగూన్ ‘సరళ’తో ద్వితీయ వివాహం జరగడం, తమిళ గాయకుడు సౌందరరాజన్ ‘అన్నా నీవు తమిళంలో పాడితే మాకు బతుకు తెరువు లేదన్నా’ అని మొరపెట్టుకోగానే తమిళంలో పాటలు పాడటం మానేయడం, లేమిలో తనకు సహాయం చేసిన విజయనగరం మిత్రులకు కలిమిలో సహాయం చేసి రుణం తీర్చుకోవడం, తప్పనిసరి పరిస్థితుల్లో నాగయ్యకు (లవకుశ) గాత్రదానం చేయడం వెనకున్న కథా కమామిషూ, ఉత్తరాది సంగీత ప్రముఖులు బడేగులాం అలీఖాన్, మహమ్మద్ రఫీలతో అనుబంధం … ఇలా ఎన్నెన్నో సంఘటనలను సేకరించి గుది గుచ్చి అందించారు శ్యామల. ఘంటసాల చనిపోయినప్పుడు పద్నాలుగేళ్ల ప్రాయంలో ఉన్న శ్యామలకు తెలిసింది కొంతే అయినా, తండ్రిపైనున్న అవ్యాజ్యమైన ప్రేమతో ఎందరెందర్నో కలిసి, తనకు తెలియని తండ్రి వ్యక్తిత్వాన్ని ఆరాతీసి అక్షర రూపం ఇచ్చారామె. పుస్తకం సాంతం చేతిరాతతో ఉన్నా చదవడానికి ఎక్కడా ఇబ్బంది కలగకుండా కదిలించే శైలితో కథనం నడిపిన శ్యామల అభినందనీయురాలు. ఘంటసాల అభిమానులకు ఇదొక అపురూప కానుక.

గొరుసు
ఆదివారం ఆంధ్రజ్యోతి, 7 ఏప్రిల్ 2013

* * *

“నేనెరిగిన నాన్నగారు” డిజిటల్ రూపంలో కినిగెలో లభిస్తుంది. కినిగె వెబ్ సైట్ ద్వారా ప్రింట్ బుక్‌ని తగ్గింపు ధరకి తెప్పించుకోవచ్చు. మరిన్ని వివరాలకు ఈ లింక్‌ని అనుసరించండి.
నేనెరిగిన నాన్నగారు On Kinige

Related Posts:

నా యెఱుక – శ్రీ ఆదిభట్ల నారాయణదాసు స్వీయ చరిత్ర పై సమీక్ష

‘కథ’ యెఱుక గలిగినవాడి కథ – అనే శీర్షికతో ఆంధ్రభూమి దినపత్రికలో ప్రచురితమైన సమీక్ష ఇది.
హరికథ అనగానే మనకందరికీ జ్ఞప్తికి వచ్చేది ఆదిభట్ల నారాయణదాసుగారి పేరే. పూర్తి పేరు అజ్జాడ ఆదిభట్ట(ట్ల) నారాయణదాసు (1864-1945). దాసుగారు నవరస భరితమైన నవ హరికథా ప్రక్రియకు ఆద్యులు. దాసుగారి కన్నా ముందు ఎందరో హరికథలు చెప్పారు. కానీ, అపర శారదాదేవిగా పేరొందిన దాసుగారితో హరికథకే గొప్ప గుర్తింపు వచ్చిందనడంలో సందేహం లేదు. నా యెఱుక అనేది దాసుగారి స్వీయ చరిత్ర. ఇది లోగడ పుస్తక రూపం దాల్చి ప్రచురించబడినా, నేడు అందుబాటులో లేని కారణంగా గుంటూరు మిత్రమండలి వారు ఎంతో సాహసం చేసి మళ్లీ వెలుగులోకి తెచ్చారు. దాసుగారు రచించిన వారి యెఱుక 7 అధ్యాయాలు కాగా, పానుగంటివారు, చెళ్లపిళ్లవారు, దువ్వూరి శాస్ర్తీగారు, శంకర రామారావుగారు, పాతూరిగారు దాసుగారిపై వ్రాసిన వ్యాసాలూ పాఠకులకు ఎంతో విలువైన సమాచారాన్నిస్తాయి.
‘సుందర రూపము దృష్టికి, సంగీతమూ చెవికి, సువాసన ఘ్రాణమునకు, సుస్పర్శము శరీరమునకూ, మంచి చవి జిహ్వకు నభీష్టములు కదా!’ అన్నారు దాసుగారు. ఇవన్నీ వేర్వేరుగా అనుభవించే సుఖాలు. ఐతే, దాసుగారి సమక్షంలో అన్నీ ఒకేసారి అనుభవంలోకి వచ్చేవట. వారి జీవితంలో లోక సామాన్యమైన తీరూ, అలౌకికమైన అద్భుత శక్తీ మిళితమై ఉండేది కాబట్టే, గాంధర్వ గానామృతపేయంగా హరికథలు చెప్పగలిగారు. దాసుగారిలో అసాధారణ శక్తులుండేవి. అవన్నీ స్వభావసిద్ధంగా వచ్చినవే. దానికోసం ఆయన గురుశిక్షణ ఏదీ పొందలేదు. ఆట, పాట, ఆశుధార, అసాధారణ పాండిత్యం- వీటన్నిటినీ మించిన ధైర్యం దాసుగారి ఖ్యాతికి కారణాలు. సంగీత సాహిత్యాలూ, వేదమూ వారి కుల విద్యలు. మిగిలినవన్నీ ఆయన అశ్రమంగా నేర్చుకున్నవే. దేశీ సంగీతంతోబాటు ఆయనకు మార్గ సంగీతమూ కొట్టిన పిండే. హిందూస్థానీ సంగీతాన్ని సైతం అలవోకగా పాడేవారాయన. ఈ స్వీయ చరిత్రను గ్రాంథికంలోనే వ్రాసినా ఇప్పటికీ చదవడానికి ఇబ్బందిగా లేకపోవడం గమనార్హం.
అసలు హరికథలు ఎందుకు చెప్పాలని దాసుగారికి అనిపించిందో తెలియాలంటే 27, 93 పేజీల్లో దాసుగారే చెప్పడాన్ని మనం చదివి తెలుసుకోవచ్చు. అంబరీషోపాఖ్యానం ఏకబిగిన రచించి, గానం చేసిన రీతి దాసుగారి ప్రతిభకొక ఉదాహరణ మాత్రమే (పేజీ 101). దాసుగారు ఒకసారి విక్రమోర్వశీయం నాటకంలో రాజు పాత్ర వేసి అందరినీ ఆకట్టుకున్నారట (పేజీ 122). దాసుగారి కవితాశక్తి పరీక్ష, విజయం పొందిన రీతి గురించి చదివితే పాఠకులకు ఆశ్చర్యం కలగక మానదు (పేజీ 123). అలాగే, దాసుగారి క్లాస్‌మేట్స్ గురించి, విద్యాభ్యాసం గురించి వ్రాసిన అంశాలు పాఠకులను అలరిస్తాయి.
దాసుగారికి వ్యవహారిక భాష అన్నా, వితంతు వివాహాలన్నా గిట్టేది కాదు. తెలుగులో ఏమి వ్రాసినా గ్రాంథికంలోనే ఉండాలన్నది దాసుగారి అభిప్రాయం. బహుశా దీనివల్లనే దాసుగారికి వీరేశలింగం పంతులుకి వైషమ్యమేర్పడిందిలా ఉంది. దాసుగారు నా యెఱుక పేరుతో స్వీయ చరిత్ర వ్రాస్తున్నారని తెలుసుకొన్న వీరేశలింగం, ఆయనకన్నా ముందుండాలని తన స్వీయచరిత్ర వ్రాసి ప్రచురించారట. ఈ స్వీయ చరిత్రలో వీరేశలింగంతో జరిగిన మరో సంఘటనను దాసుగారు వ్రాసుకున్నారు. దానికి వీరేశలింగం పేరును ప్రస్తావించకుండా విచిత్ర వివాహకర్త విచిత్ర రచన అని చెప్పారు. ఈసప్ ఫేబిల్స్ (ఈసప్ కథలు) లో కొన్నిటిని తెలుగు చేయమని దాసుగారిని భీముడు అనే ఆయన బావగారు కోరగా, దాసుగారు 100 కథలను తెనిగించి, చివరన 4 పాదాలలో కథనీ, నీతిని ఇమిడ్చి గీతాలను నూఱుంగంటి అనే పేరుతో వ్రాశారు దాసుగారు. దానిని భీముడు వీరేశలింగం ప్రెస్‌లో ముద్రణకు ఇవ్వగా ఆయన ఆ పుస్తకాన్ని వెలుగులోకి రానీకుండా అదే తీరులో తాను వ్రాసి ఈసప్ కథలను ప్రచురించుకొన్నాడట (పేజీ 144- గొప్పవాళ్లుగా చెలామణి కావాలంటే ఆ మాత్రం చేయాలేమో?). మరో సందర్భంలో ఆయన హరికథలను చిన్నబుచ్చి మాట్లాడగా, దాసుగారు సరైన రీతిలో సమాధానాన్నివ్వడం కూడా మనం చదవొచ్చు (పేజీ 161).
మహారాజుల సమక్షంలో ఎన్నో హరికథలు చెప్పినా ఎవరికీ చేతులు జోడించడం గానీ, వారిని ‘యువర్ హైనెస్స్’అని గానీ ఎరుగని ధైర్యశాలి ఆయన. ఆ ఆత్మవిశ్వాసమే ఆయన్ని నడిపించింది. దేశ విదేశాల్లో విస్తృతంగా పర్యటించి హరికథలు చెప్పి మెప్పించిన దాసుగారు అవసరమైనపుడు ఇంగ్లీషు వివరణలనీ ఇచ్చేవారు. అంతేకాదు. టికెట్టు పెట్టి అష్టావధానం జరిపిన ఘనత దాసుగారిది (పేజీ 134). అన్నట్టు, దాసుగారి ఇంగ్లీష్, తెలుగు సంతకాలనూ ఈ పుస్తకంలో చూడొచ్చు (పేజీ 170). ఇక అనుబంధంలో హరికథ గురించి దాసుగారు స్వయంగా వ్రాసిన వ్యాసం అందరూ చదవాల్సిందే. వారు 70 ఏళ్ల వయస్సులో సంక్షిప్తంగా నామాట అనే శీర్షికన వ్రాసిన స్వీయచరిత్ర ద్విపద కూడా ఈ పుస్తకంలో చోటుచేసుకుంది (పేజీ 207). దాసుగారి పాండితీ వైభవాన్ని తెలిసిన రాజుగారు దాసుగారు పాడగా గ్రామఫోను రికార్డుచేశారు (పేజీ 188), కానీ అది మనకు దక్కకపోవడం నిజంగా విషాదకరం.
ఇంతకీ దాసుగారి నా యెఱుక ఎందుకు చదవాలి అని అడిగేవారికి జవాబు ఒక్కటే. ఆ కాలంలో చేతిలో పావలా లేకపోతే పెద్ద చదువులు చదవలేక ఎలాటి బాధపడాల్సి వచ్చేదో తెల్సుకోవాలన్నా వారి బాల్య యవ్వన దశల సంధికాలంలో అధ్యయన రీతుల్లోనూ, సంప్రదాయ నిరతిలోనూ వచ్చిన పెను మార్పులేమిటో తెల్సుకోవాలన్నా నా యెఱుక చదవాలి. అంతేకాదు. లోకంలో అనుకూల శత్రువులు, కృత్రిమ స్వభావులు మోసాలకెలా పాల్పడతారో తెల్సుకోవాలన్నా నా యెఱుక చదవాలి. అలనాటి అచ్చతెనుగు పద ప్రయోగాలను ఆస్వాదించాలన్నా కూడా నా యెఱుకను తప్పక చదవాలి. ఒకటి కాదు, రెండు కాదు. ముప్ఫైఏళ్ళ దక్షిణాపథ చారిత్రక, సాంస్కృతిక విషయాలనన్నిటినో నా యెఱుక చెబుతుంది. అంతేకాదు. దాసుగారి జీవనశైలిని తెలుసుకోవడానికి ఈ పుస్తకం ఇతోధికంగా ఉపకరిస్తుంది.
చక్కని ముద్రణ, సందర్భోచితంగా దొరికిన మేరకు ఛాయాచిత్రాలు, ఈ తరం వారికి ఇబ్బందిలేకుండా వివరణనిస్తూ ఫుట్‌నోట్స్- అన్నీ ఈ పుస్తకానికి సంపాదకులైన రవికృష్ణగారెంత శ్రమించారో చెప్పకనే చెబుతాయి. అలాగే గిరిధర్‌గౌడ్‌గారు వేసిన దాసుగారి ముఖచిత్రం పుస్తకానికి నిండుదనాన్నిచ్చింది. అట్టవెనక, కరుణశ్రీ పద్యం దాసుగారి గొప్పదనాన్ని గురించి చెప్పకనే చెబుతుంది. డిటిపి కాలంలో కూడా తప్పొప్పుల పట్టిక ఇవ్వడం విచిత్రంగా తోచినా, అది సంపాదకుల చిత్తశుద్ధిని తెలియజేస్తోంది.
నా యెఱుక- తొలి ముద్రణ ఎపుడు వచ్చింది, ఆ పుస్తకం తాలూకు ముందుమాట, కవర్ పేజీ వంటి వాటికి కూడా ఈ పుస్తకంలో కాస్త చోటు ఇచ్చివుంటే బాగుండేది. అలాగే, దాసుగారి పూర్తి బయోడేటాను తొలి పుటల్లో ఇచ్చి ఉండాల్సింది. వారి కుటుంబం గురించిన ప్రస్తావన ఎక్కడా రాలేదు. అటు దాసుగారూ ప్రస్తావించలేదు. సంపాదకులవారూ ఏమీ చెప్పలేదు. దాసుగారు దాదాపు డజను హరికథలను రచించి, గానం చేశారు. అవి ప్రస్తుతం అందుబాటులో లేవనే చెప్పాలి. ఈ పుస్తకం మనవి మాటల్లో చెప్పినట్లు, దాసుగారి హరికథలను కొద్దిపాటి వ్యాఖ్యానంతోనైనా సరే తిరిగి అన్నిటినీ ఒక సంకలనంగా వెలుగులోకి తేవాల్సిన అవసరం ఎంతైనా ఉంది.

వీక్యూబ్ రమణ
అక్షర, ఆదివారం ఆంధ్రభూమి, 23 సెప్టెంబర్ 2012

* * *

“నా యెఱుక” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా తక్కువ ధరకి ప్రింట్ పుస్తకాన్ని తెప్పించుకోవచ్చు. మరిన్ని వివరాలకు ఈ క్రింది లింక్‌ని అనుసరించండి.
నా యెఱుక On Kinige

Related Posts:

నిర్జన వారధి

నిర్జన వారధి

సమాజంలో మౌలిక మార్పులు కోరే సంస్కరణోద్యమం, జాతీయోద్యమం, విప్లవోద్యమం అనే మూడు ఉద్యమాల వారధి కొండపల్లి కోటేశ్వరమ్మగారు. ఈ మూడు ఉద్యమాలలోని స్త్రీల పోరాటపటిమకు, వేదనకు కూడా ప్రతినిధి. మూర్తీభవించిన ఉద్యమ రూపం. “నిర్జన వారధి” కోటేశ్వరమ్మగారి ఆత్మకథ. ఆమె జీవితం చదువుతుంటే ఒక వ్యక్తి జీవితంలో ఇంత దుఃఖం ఉంటుందా అని మనసు ఆర్ద్రమవుతుంది.

* * *

“నిర్జన వారధి” చదవడానికి ఈ క్రింది లింక్ పై క్లిక్ చేయండి
నిర్జన వారధి On Kinige

నిర్జీవంగా ఉన్న సీతారామయ్యను చూస్తే ఎన్నో జ్ఞాపకాలొచ్చాయి. ఇన్ని సంవత్సరాల జీవితాన్ని ఉద్యమం కోసం, ప్రజల కోసం…. ధారపోశాక చూడ్డానికి వాళ్ళ పార్టీవాళ్ళెవరూ రాలేదెందుకని? తమ ఉద్యమనేత చనిపోతే విభేదించాడని వదిలేస్తారా? నన్ను… సీతారామయ్య తనకి అనుకూలంగా లేనని చెప్పి ఆనాడు వదిలేశాడు. ఇప్పుడు సీతారామయ్యను వాళ్ళు వదిలేశారు. ఇంతేనా జీవితం?

కొండపల్లి కోటేశ్వరమ్మ

నిర్జన వారధి పుస్తకం ముందుమాట నుండి

ఇవీ…నేను అనుకున్నవి
నేను ఒక గొప్ప వ్యక్తినీ, రచయిత్రినీ కాకపోయినప్పటికీ ‘నీ జీవితం ఓ కావ్యం లాంటిది. అది పదిమందికీ తెలియడం అవసరం’ అని చెపుతుండేవాళ్ళు కొంతమంది పెద్దలూ, మిత్రులూ. ‘సామాన్యుని సాహసమెట్టిదో…’ చరిత్రలో నమోదు కావాలని మహీధర రామమోహనరావు, చేకూరి రామారావు, స్మైల్‌ వంటివాళ్ళు, పరకాల పట్టాభి రామారావు, మానికొండ సూర్యావతి వంటి మిత్రులు నన్ను ఆత్మకథ రాయమని ప్రోత్సహిస్తుండే వాళ్ళు.
జ్ఞాపకాలను తట్టి లేపితే కన్నీటి ఊట ఉబికి వచ్చే జీవితం నాది. తడిసిన ఆ అక్షరాలను అర్థవంతంగా కాగితం మీద పెట్టడం నా వల్ల అవుతుందా అనుకున్నాను. అందుకే ఇన్నేళ్ళుగా ఆ ప్రయత్నం చేయలేదు.
నా మనవరాళ్ళు అనురాధ, సుధ, నన్ను అమ్మమ్మా అని పిలిచే మరో మనవరాలు వసంత (వేమన వసంతలక్ష్మి) ‘నీ ఒంట్లో శక్తి తగ్గకముందే నీ జీవితాన్ని కథగా రాయి. ముందు తరాలకు తెలియకుండా దాన్ని మాసిపోనివ్వొద్ద’ని మరీ మరీ చెప్పారు.
అయినా నా శక్తీ, నా కంటిచూపూ అందుకు సహకరిస్తాయా అని సందేహించాను.
నీ మిత్రులు ఎందుకు రాయమన్నారో ఆలోచిస్తేనూ, విూరు ఆనాడు ఎందుకు ఉద్యమించారో గుర్తుచేసుకుంటేనూ నీ కన్నీరే కథగా ప్రవహిస్తుంది ప్రారంభించమన్నారు వాళ్ళు.
అచ్చు ప్రతిని సిద్ధం చేయడంలో అనురాధ, అనురాధ మిత్రులు వాసుగారు, వసంత ఎంతో సహకరించారు. సుందరయ్యగారు, రాజేశ్వరరావు గారిలాంటి వ్యక్తులు నా జీవితంతో ఎంతగానో ముడిపడిపోయిన వ్యక్తులు కాబట్టి సహచర కామ్రేడ్స్‌ మీద రాసిన సంస్మరణ వ్యాసాలను కూడా ఇందులో అనుబంధంగా చేర్చాను. ప్రత్యేకించి అనురాధ అచ్చు ప్రతిని సిద్ధం చేయడంలో చాలా శ్రమ తీసుకుంది.
స్త్రీ జనాభ్యుదయంపై ప్రేమాభిమానాలున్న ఓల్గాగారు అడగ్గానే ముందుమాట రాయడానికి ఒప్పుకున్నారు. నా కథను పాఠకులు లోతుగా ఆలోచించేటట్లుగా చారిత్రక ఉద్యమాల అవగాహనతో విశ్లేషించారు.
ఈ పుస్తక ప్రయత్నం గురించి తెలిసి దాన్ని అచ్చువేయడానికి హైదరాబాద్‌ బుక్‌ ట్రస్ట్‌ వారు ముందుకొచ్చారు. ‘సంస్కరణోద్యమం, జాతీయోద్యమం, కమ్యూనిస్టు ఉద్యమం, నక్సల్బరీ ఉద్యమం మొత్తం నాలుగు ఉద్యమాలతో సంబంధం ఉన్న జీవితం మీది. కనుక దేన్నీ వదిలిపెట్టకుండా రాయమని’ కొన్ని సూచనలిచ్చారు బుక్‌ ట్రస్ట్‌ గీత గారు. ఆ ప్రకారం మరికొన్ని అనుభవాలు గుర్తు తెచ్చుకుని రాశాను. మరికొన్నిటిని విమలగార్ని విశాఖపట్నం పంపి రికార్డు చేయించి ఇందులో చేర్చారు.
ఇందరి సహకారంతో నా జీవిత కథ ఇవ్వాళ నా 92వ యేట పుస్తక రూపంలో రానుంది. వారందరికీ నా హృదయపూర్వక కృతజ్ఞతాభివందనాలు.
నా జీవిత కథ చదివిన పాఠకులు ఇది సంఘ శ్రేయస్సు కొరకు రాయబడిందను కుంటే సంతోషిస్తాను. నా కథ మనిషిలో మంచిని ఏ కొంచెమైనా పెంచుతుందను కుంటే నా శ్రమ ఫలించిందనుకుంటాను. ఇన్నేళ్ళ నా బ్రతుకు వృథా కాలేదని తెలిసి తృప్తిపడతాను.

కొండపల్లి కోటేశ్వరమ్మ

* * *

ఈ పుస్తకం పై కొంతమంది పాఠకుల అభిప్రాయాలు

చదవదగ్గ పుస్తకం, చాలా రోజుల తర్వాత, కన్నీళ్ళు ఆపుకోలేకపోయా….

కృష్ణ ప్రవీణ్

నేనూ చదువుతూ ఉన్నా. ముప్పావు వంతు అయ్యింది. అద్భుతమైన పుస్తకం. ప్రవీణ్ గారికి మల్లే నాకూ కొన్ని చోట్ల కళ్ళలో నీరు, వెంటనే కోటేశ్వరమ్మ గారు తన జీవితాన్ని ఎదుర్కున్న తీరు చూసి బోలెడంత స్పూర్తీ కలిగాయి.

వి. బి. సౌమ్య

పుస్తకం చదివాను. తప్పకుండా చదవాల్సిన పుస్తకం. ఇంతకంటే ఎక్కువ వ్రాస్తే కోటేశ్వరమ్మగారి స్వయం ప్రకాశత్వాన్ని అర్థం చేసుకోనట్లు అవుతుంది అయినా ఒక వాక్యం, చదువుతున్నంతసేపూ కన్నీరు వరదలై కారింది, ఆ కన్నీటి ప్రవాహాన్ని కూడా ఆపుకోవాలనిపించలేదు.


చావా కిరణ్

* * *

“నిర్జన వారధి” చదవడానికి ఈ క్రింది లింక్ పై క్లిక్ చేయండి
నిర్జన వారధి On Kinige

Related Posts:

స్వీయ అనుభవాలు – సొంత మాటలు

జీవన కెరటాలు అనే ఈ పుస్తకం కొద్దిపాటి చదువుతో, పల్లెటూరి స్థాయి నుంచి ఎదిగి అంతర్జాతీయ స్థాయి వ్యక్తులతో కలిసి పనిచేసి జీవితాశయాలు నెరవేర్చుకున్న ఓ సామాన్యుడి అసాధారణ గాథ. ఒడిదుడుకుల జీవన గమనంలో ఎంచుకున్న రంగంలో కర్మయోగిగా పనిచేసి అనుకున్నది సాధించిన ఓ వ్యక్తి కథ ఇది. కేకలతూరి క్రిష్ణయ్య స్వీయచరిత్ర ఇది.

విద్యుద్దీకరణ అనే పెద్ద పెద్ద పదాలతో చెప్పినా, కరెంట్ స్తంభాలు పాతించడమే కదా అని తేలికగా తీసేసినా, ఆయన స్వీయ కథా స్రవంతిని చదవడం ఆసక్తికరంగా ఉంటుంది.
వృత్తిపరమైన అంశాలతో రచన ప్రారంభించి సందర్భానుసారంగా తన కుటుంబ నేపధ్యం గురించి వివరించారు రచయిత. ఈ పుస్తకం చదువుతున్నప్పుడూ ఓ జీవిత చరిత్రలా కాకుండా వ్యక్తిత్వ వికాస గ్రంథంలా అనిపించడానికి ఇదే కారణం.

క్రిష్ణయ్యగారు చిన్న పల్లెలో అత్యంత బీద కుటుంబంలో జన్మించి హైస్కూల్ స్థాయి వరకు మాత్రమే చదివి బ్రతుకుతెరువు కోసం గుమాస్తాగా, పోలీసుగా, వ్యవసాయదారుడిగా, వైద్యుడిగా, సూపర్‌వైజర్‌గా పనిచేసి, ఇంజనీర్‌గా ఎదిగి మన దేశంలోనూ, ఇతరదేశాలలోనూ అంతర్జాతీయ సలహాదారులతో పని చేసి ఇంజనీరుగా, కాంట్రాక్టర్‌గా, వ్యాపారవేత్తగా స్థిరపడ్డారు. తను స్వయంగా నేర్చుకున్న ఎన్నో అంశాలను ఎందరో కుర్రవాళ్ళకు నేర్పి వారూ జీవితంలో స్థిరపడడానికి దోహదం చేసారు. ఆయన జీవితానుభవాలు నేటి యువతకు మార్గదర్శకంగా ఉంటాయనడంలో ఎటువంటి సందేహం లేదు.

ఈ పుస్తకం ఎవరికి వారు చదువుకుని ప్రేరణ పొందవలసిందే. అయితే ఇందులోని కొన్ని అద్భుతమైన వాక్యాలను ఇక్కడ ఉటంకిస్తాను.

“ఆనందం డబ్బుతో రాదు, కావాలంటే రాదు. ఎదుటివారి ప్రేమ, ఆప్యాయత అర్థం చేసుకొని, మనం కూడా వాటిని ఇతరులకు ధారాళంగా పంచగలిగితేనే ఆనందం అందుతుంది.”

“తన గురించి, తన పరిస్థితి గురించి, బాధ్యత గురించి ఆలోచించకుండా ఇతరులను గొప్పల కోసం కొన్ని విధాలుగా సంతోషపెట్టాలనుకోవటం జీవితాన్నే దెబ్బతీస్తుంది.”

“ఎదుటి మనిషికి మేలు జరిగేపని, అప్పటికి మన గురించి చెడ్డగా అనుకున్నా పరవాలేదు, చొరవ తీసుకుని తెలియజెప్పడం మానవ ధర్మం.”

“పై మెట్టు మీద ఉన్నవాడు క్రింద మెట్లున్నాయని గుర్తుంచుకుంటే క్రిందపడడు.”

“దేవుడు మనతో కొన్ని పనులు ఎందుకు చేయిస్తాడో మనకు అర్థం కాదు. కష్టమైనా, ఇష్టం లేకపోయినా అంతా మన మంచికే అనుకుని చేసుకుపోవడమే మంచిది. కానీ అత్యాశతోనో, స్వలాభేపేక్షతోనో చేస్తే మేలు జరగకపోవచ్చు.”

“విద్య నేర్చుకున్న వ్యక్తి అయినా సమయానుకూలంగా, అప్పటి అవసరాన్ని గుర్తించి (కామన్ సెన్స్) ఆలోచించికపోతే, విజయం సాధించలేడు.”

“ఆయా అవసరమునకు తగినట్లు మన చర్య లేకపొతే మన కృషి నిరర్ధకమవుతుంది. మన సామర్థ్యాన్ని నిరూపించుకునే అవకాశంగా భావించాలి.”

“ఏ పని చిన్నది కాదు. చిన్న పని కదా అని అశ్రద్ధ చేయకుండా చేయడం వలన మేలు జరుగుతుంది.”

“మంచి ఉక్కు కొలిమిలో తయారు చేసి ఎంత కావాలో అంత పదును పెట్టుకోవచ్చు. ఇనుముకు ఎంత పదును పెట్టినా మండిపోతుంది. అదేవిధంగా సామర్థ్యం ఉన్న వ్యక్తి మీద వత్తిడి తెచ్చేకొద్దీ మెరుగుపడి పదును తేలుతాడు. సామర్థ్యం లేని వ్యక్తి మీద వత్తిడి తెస్తే తిరగబడతాడు.”

“మనకు ప్రాప్తం లేనప్పుడు దేవుడు కూడా ఇవ్వలేడు. ప్రాప్తం ఉన్నది ఎవరు తప్పించలేరు.”

“పని చేసేడప్పుడు ఇంకొకరి ఆలోచనలు వినకూడదనే అహంకారం ఉండకూడదు.”

“జీవితంలో సద్వినియోగం చేసుకున్న ప్రతి క్షణమూ నిన్ను కాపాడుతుంది. ”

“ప్రపంచంలో ఏ విషయమైనా, ఏ పనైనా పూర్తిగా నాకు తెలుసు అని చెప్పడానికి వీలు లేదు. ఎంత నేర్చుకున్నా, ఇంకా నేర్చుకోవలసింది ఎంతో ఉంటుంది. ”

“అత్యాశతో గాని, ఆవేశంతో గాని, స్వలాభంతోగాని తీసుకునే నిర్ణయాలు సక్రమంగా ఉండవు. మానవత్వంతో తీసుకున్న నిర్ణయం సక్రమంగా ఉంది మేలు చేస్తాయి.”

“ఒక వ్యక్తి బాధ్యత లేకుండా తిరిగేటప్పుడు ఒక లక్ష్యం, ఓర్పు, పట్టుదల ఉండవు. ఒక పధ్ధతి ఉండదు. ఏదో ఒక పని భయంతోనో, భక్తితోనో ఆరంభించి, కొన్ని పద్ధతులకు లోబడి, పని పూర్తి చేయవలననే ధ్యేయంతో, వ్యతిరేక పరిస్థితులకు తట్టుకొని నిలబడినప్పుడు ఓర్పు, సామర్థ్యం పెరుగుతుంది”

ఇలాంటి స్ఫూర్తినిచ్చే వాక్యాలు, ఉదాహరణలు ఈ పుస్తకంలో ఎన్నో ఉన్నాయి. 512 పేజీల ఈ పుస్తకం చదువరులకు ఎంతో ప్రేరణ కలిగిస్తుంది. రచయిత తన స్వీయ అనుభావాలు సొంత మాటలలో రాయడం వలన పుస్తకంలో అత్యంత నిజాయితీ కనపడుతుంది. ఆయన నిబద్ధత అర్థమవుతుంది.

జీవన కెరటాలు డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

జీవన కెరటాలు On Kinige

కొల్లూరి సోమ శంకర్

Related Posts:

“భీమాయణం” పుస్తకావిష్కరణ సభ

భీమాయణం అనేది గ్రాఫిక్ రూపంలో చెప్పబడిన డా. బి. ఆర్. అంబేద్కర్ జీవితచరిత్ర. పార్థాన్‌ గోండు చిత్రకారులైన దుర్గాబాయి వ్యాం, సుభాష్‌ వ్యాంలు అద్భుతమైన బొమ్మలు అందించగా, శ్రీవిద్య నటరాజన్, ఎస్. ఆనంద్‌లు కథనం అందించారు. ఈ చిత్రకళ విలక్షణమైనది. దట్టమైన అవుట్‌లైన్లతోనూ, నీడలతోనూ నిండి వుండే బొమ్మలు, బాధని. క్రూరత్వం పట్ల మునుపు తెలియని వేదనని వ్యక్తం చేస్తాయి. వివక్షకి గురవడానికి దక్షిణాఫ్రికా వెళ్ళాల్సిన అవసరం లేని ఓ వ్యక్తి కథ భీమాయణం. చరిత్ర పుస్తకాలలో భారత రాజ్యాంగ నిర్మాతగా మాత్రమే పేరుపొందిన వ్యక్తి కథ భీమాయణం. అంబేడ్కర్ అంటరానితనపు అనుభవాలను వెల్లడిస్తునే, దేశంలోని ప్రస్తుత కుల వ్యవస్థని ఎండగడుతుందీ పుస్తకం. ఎనిమిది భాషలలో వెలువడింది ఈ పుస్తకం.

సిఎన్‌ఎన్‌ ప్రకటించిన ‘ఐదు అత్యుత్తమ రాజకీయ కామిక్స్‌ పుస్తకాల్లో భీమాయణం ఒకటిగా నిలిచింది.

భీమాయణం పుస్తకం ఆవిష్కరణ సభ 29 జూలై 2012 నాడు సాయంత్రం మూడు నుంచి ఐదు గంటల వరకు హైదరాబాదులో జరుగుతుంది.

వేదిక: లమాకాన్, సి-బే బిల్డింగ్ తర్వాతి సందు, జివికె మాల్ ఎదురుగా, రోడ్ నెంబరు 1, బంజారా హిల్స్.
మరిన్ని వివరాలకు 9642731329 నెంబరుని సంప్రదించవచ్చు.

* * *

“భీమాయణం” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

భీమాయణం1 On Kinige

Related Posts:

ఒక ‘పనివాడి’ ఆత్మకథ

శ్రీ కేకలతూరి క్రిష్ణయ్య రచించిన జీవన కెరటాలు అనే పుస్తకంపై 10 ఫిబ్రవరి 2011 నాటి ఆంధ్ర్యజ్యోతి దినపత్రిక నవ్య పేజీలో “ఒక ‘పనివాడి’ ఆత్మకథ” అనే శీర్షికతో సమీక్ష వెలువడింది.

ఆత్మకథ ఎక్కువగా రచయితలు, మేధావులు, నాయకులు, కళాకారులు రాసుకుంటుంటారని, ‘పనివాళ్లు’ ఆ పని చేయడం అరుదని సమీక్షకులు అభిప్రాయం వ్యక్తం చేసారు. విద్యుత్ ట్రాన్స్‌మిషన్ లైన్ల నిర్మాణంలో పనిచేసే ఒక వ్యక్తి వృత్తిఅనుభవాలు ఎంత ఆసక్తికరంగా ఉండచ్చో కేకలతూరి క్రిష్ణయ్య ఆత్మకథ ‘జీవన పోరాటాలు’ చదివితే అర్థమవుతుందని సమీక్షకులు అన్నారు.

క్రిష్ణయ్య 72 ఏళ్ల క్రితం చిత్తూరు జిల్లా పాకాల మండలం శంఖంపల్లె గ్రామంలో పుట్టారు. హైస్కూలుతోనే చదువు ఆపేసినా అనుభవంతో ఇంజనీరై దేశవిదేశాల్లో 50 సంవత్సరాలకు పైగా వివిధ ప్రాజెక్టుల్లో పని చేశారు. ఆయన ఆత్మకథలోని కొన్ని భాగాలు సమీక్షలో క్లుప్తంగా ప్రస్తావించారు.

అవసరానికి మించి ఆలోచించి, సమస్యను పెద్దది చేసుకుని భయపడటం వంటి లక్షణాలు వ్యక్తి అభివృద్ధికి ఏ విధంగా ఆటంకంగా నిలుస్తాయో రచయిత ఉదాహరణ ద్వారా చెప్పిన ఘటన ఆసక్తిగా ఉంటుంది.

తాను చేసే వృత్తికి సంబంధించిన పనిలో ఎప్పుడు ఎవరు తన సహాయం కోరినా తప్పక సహాయపడాలని నిర్ణయించుకున్న క్రిష్ణయ్య నేపాల్ ఎందుకు వెళ్ళాల్సివచ్చిందో చెబుతారు.

ఒక పని చేసేడప్పుడు వృత్తి నిపుణులు ఎంత జాగ్రత్తగా ఉండాలో, శారీరకంగా ఎందుకు ఫిట్‌గా ఉండాలో మరో వృత్తాంతం ద్వారా చెప్పిన తీరు ఆకట్టుకుంటుంది.

జీవన కెరటాలు డిజిటల్ రూపంలో కినిగెలో లభిస్తుంది. పూర్తి వివరాలకు ఈ క్రింది లింక్‌ను అనుసరించండి.

జీవన కెరటాలు On Kinige

కొల్లూరి సోమ శంకర్

Related Posts:

వొడువని ముచ్చట

ఈ పుస్తకానికి సేత తెలంగాణా సిద్దాంత కర్త ప్రొఫెసర్ జయశంకర్ సార్, వ్రాత కొంపల్లి వెంకట్ గౌడ్.

తెలంగాణా చరిత్రలో ఒక కాన్సెప్ట్ కోసం పూర్తి జీవితాన్ని పణంగా పెట్టి పనిజేసిన జయశంకర్  సార్ అనుభవాలు రికార్డ్ చేసి అందించారు వెంకట్ గౌడ్.

పుస్తకం ఎట్లుండాలంటె… అని చెబుతూ, “నేను రాస్తే ఎట్లుంటది అంటే ప్రతి అక్షరం చెక్కినట్లు వుంటది. రాసే ప్రతీ పదం చదివేవాల్లను ఆలోజింపజేయాలె” అని అంటారు సార్.

జయశంకర్ గారు విద్యార్థిగా, ఉద్యోగిగా, టీచరుగా, పదవిలో ఉన్నా లేకున్నా తెలంగాణ సమస్యతోనే జీవితం పెన వేసుకున్న స్వచ్ఛంద కార్యకర్త. ఆయనకు ఏ రాజకీయ పార్టీలతో గాని, వేదికలతో గానీ, వాటిల్లో సభ్యత్వం గానీ లేవు. తెలంగాణా గురించి ఎవరు పనిచేసినా వారితో మమేకమై పని చేసారు. తను తెలంగాణా సిద్ధాంత కర్తను కానని, మొదట ఇంగ్లీషు మీడియాలో తెలంగాణా ఐడియలాగ్ అని రాయడం మొదలు పెట్టారని, కాలక్రమంలో దాన్నే తెలుగు మీడియా ‘సిద్ధాంతకర్త’గా అనువదించి ప్రాచుర్యం కల్పించిందని ఆయన వివరించారు.

ఇప్పుడు నడుస్తున్న ఉద్యమం ఎలా రివైవ్ అయిందో ఈ పుస్తకంలో తెలియజేసారు సార్.

‘తెలంగాణాలో ఏం జరుగుతోంది’ అనే పుస్తకానికి వచ్చిన ప్రాచుర్యం ఏ మాత్రం ఎక్స్‌పెక్ట్ చేయలేదని అంటారాయన.

అమెరికాలో తెలంగాణ డెవలప్‌మెంట్ ఫోరం అనే సంస్థ ఎలా ఏర్పడిందో సార్ వివరంగా చెప్పారు. దాని కోసం జయశంకర్ గారు అమెరికాలో విస్తృతంగా ప్రయాణించి ఎన్నో ఉపన్యాసాలిచ్చారు.

కెసీఆర్ తో తానెందుకు ఇంప్రెస్ అయ్యారో జయశంకర్ గారు చెబుతూ, కెసీఆర్ కాన్సెప్టులలో లోతుగా వెళ్ళి, విశ్లేషించి క్రిటికల్‌గా చర్చించేవారని అన్నారు. విషయ అవగాహన ఉండి తెలంగాణ ప్రజల్లో తెలంగాణ ప్రజల భాషలో నుడికారంలో తీసుకుపోయేటువంటి వ్యక్తి కెసీఆర్ అని సార్ భావించారు.

తెలంగాణవాదులని పరస్పరం కలవమని లక్ష్యం కోసం కలిసి పని చేయమని, అప్పుడే ఉద్యమం స్ట్రెన్తెన్ అవుతుందని జయశంకర్ చెప్పేవారు.

తనను ఎవరైనా విమర్శించినా, ప్రతి విమర్శ చేయనని చెబుతూ, “నాకు చేతనైంది చేస్తనయ్యా, తప్పైతే తప్పు, ఒప్పైతే ఒప్పు. …కాలం నిర్ణయిస్తది… ఎవరి పాత్ర ఏంది” అని అంటారు.

ఉర్దూ, తెలుగు, ఇంగ్లీషు మూడు భాషలు తెలిసుండం తెలంగాణా కాంటెక్ట్స్‌లో చాల అవసరమని, తనకున్న అడ్వాంటేజ్ అదేనని సార్ అంటారు.

కళారూపాలు ఉద్యమంపై చూపిన ప్రభావం గురించి చెబుతూ, సాంస్కృతిక దాడికి వ్యతిరేకంగా కల్చరల్ డైమెన్షన్ రావడానికి, తెలంగాణా సాంస్కృతిక పునరుజ్జీవనానికి కళారూపాలు ఎంతో దోహదం చేసాయని చెప్పారు.

తెలంగాణను తప్పకుండా జూస్తనని నమ్మిన వ్యక్తి జయశంకర్ గారు. తెలంగాణ రాష్ట్రం సంపూర్ణ అభివృద్ధి కోసం అన్నీ సాధ్యమవుతాయని ఆయన నమ్మారు.

బి.సి.లలో ఐక్యత లేదని, అదే తెలంగాణ ప్రాంతంలో సామాజిక న్యాయానికి ప్రతిబంధకం అని ఆయన భావించారు. రాష్త్రం ఏర్పడితే సామాజిక న్యాయం సంభవం అవుతుందని చెబుతూ, ఇక్కడి బలహీన వర్గాలలో చైతన్యస్థాయి పెరిగిందని, ఆ చైతన్యమే రాబోయే రాష్ట్రాన్ని కాపాడుతుందని ఆయన భావించారు.

కాకతీయ యూనివర్సిటీలో పనిచేసిన మూడేండ్లలో తను చేపట్టిన మార్పుల గురించి చెప్పారు సార్ ఈ పుస్తకంలో. ‘నేను చేసేపనిలో ఓపెన్‌నెస్ వుంటది, గుసగుసలు ఉండవు’ అంటారాయన.

నిజమైన బలహీన వర్గాలంటే ఆర్ధికంగా, రాజకీయంగా, సామాజికంగా నెగ్లెక్ట్ అయినవాళ్ళు తప్ప, ముస్లిమ్సా, దళితులా, బిసిలా అని గాదు…. నెగ్లెక్టెడ్ సెక్షన్స్…అని అభిప్రాయ పడ్డారు జయశంకర్ గారు.

కల్చరల్ మూవ్‌మెంట్, పొలిటికల్ మూవ్‌మెంట్ రెండూ కలిసి సాగాలని, అవి రెండూ ఒకదానికొకటి ముడిపడి ఉంటాయని సార్ భావిస్తారు. సామాజిక న్యాయం దృష్టితో చూస్తే ఇది అత్యవసరమని ఆయన అభిప్రాయం.

పిల్లల ఆత్మహత్యల గురించి వ్యాఖ్యానిస్తూ “ఈ జనరేషన్ యూత్‌లో చాల ప్రస్టేషన్స్ వున్నయ్. అవగాహన లోపం ఉన్నది. ఎక్స్‌పెక్టేషన్స్ వున్నయ్. ఇవన్నీ నాకు గూడ సరిగా అర్థం గావడంలేదు, పిల్లలు ఎందుకిట్ల జేస్తున్నరని. సెల్ఫ్ ఇంబ్యాలెన్, ఇది చాల విచిత్రమైన పరిణామం” అని అన్నారు.

డిసెంబర్ 9 ప్రకటన రావడానికి కెసీఆర్ దీక్ష ట్రిగ్గర్‍లా పనిచేసిందని, లాబీయిస్ట్‌ల కుట్రల వల్ల కేంద్రం వెనక్కి తగ్గిందని చెప్పారు. లాబీయింగ్ గురించి చెబుతూ, మద్రాసు నుంచి విడిపోడానికి లాబీయిస్టులు ఎంత శక్తివంతంగా పనిచేసారో చెప్పి అంతే శక్తితో ప్రస్తుతం పనిచేస్తున్నారని అన్నారు. ఇప్పుడు నడుస్తున్న లాబీయింగ్ లోపల కులాలున్నయ్, ప్రాంతాలున్నయ్, డబ్బుసంచులున్నయ్ అని చెబుతూ, లాబీలో ఉండే వారి కాంబినేషన్ మారచ్చు, కానీ లాబీలవేనని చెప్పారు.

లాండ్ రిఫార్మ్స్ అనేది ప్రత్యేక రాష్ట్రం ఉంటే వెంటనే జరిగిపోయేవని, ఆంధ్రప్రదేశ్ ఏర్పడడం వలన ఆనాటి ముఖ్యమంత్రి ప్రవేశబెట్టిన సంస్కరణలు ఆగిపోయాయని చెబుతారు.

తెలంగాణ రచయితల గురించి చెబుతూ…వారిని వాగ్గేయకారులిగా అభివర్ణించారు, కాకపోతే ఈ వాగ్గేయకారులు దేవుని గురించి కాకుండా మనుషుల వెతల గురించి రాసారని అన్నారు.

అధ్యాపక వర్గంలో తెలంగాణ గురించి మంచి అవగాహన ఉందని, కానీ ప్రత్యక్షంగా ఉద్యమంలో దిగి పనిచేయడానికి పరిమితులున్నాయని సార్ భావించారు.

మన్‌‍మోహన్‌సింగ్ భారత ప్రథాని కాకముందు ఆయనతో తనకున్న సంబంధాలని వివరించారు జయశంకర్.

తమది దిగువ మధ్యతరగతి కుటుంబమని చెబుతూ, చిన్నతనంలో తన విద్యాభ్యాసం సాగిన తీరుని వివరించారు. తన లైఫ్ యాంబిషన్ ఎకనామిక్స్‌లో లెక్చరర్ కావడం అని చెబుతూ, దాని సాధన కోసం ఎంతగా శ్రమించాల్సి వచ్చిందో వివరించారు.

తన జీవిత ప్రస్థానంలో భాగంగా ఏ ఊర్లో అయితే పుట్టారో, అదే ఊర్లో స్కూల్ టీచరుగా పనిచెసి, అదే ఊళ్ళో వైస్ ఛాన్సలర్‌గా పదవీ విరమణ చేసారు జయశంకర్.

దేశం మొత్తం మీద క్షీణిస్తున్న విలువల గురించి ఆందోళన చెందుతూ, కెరీర్, కెరీరిజమ్ పెరిగిపోయాయ్ని, సంపాదన ప్రధాన ధ్యేయమైపోయిందని అన్నారు. అధ్యయనం చేయడం తగ్గిపోతోందని, అధ్యయనం అంటే పుస్తకం చదవడమే కాదు. లైఫంతా అధ్యయనమేనని అన్నారు.

ఇప్పటి వరకు ఏ రచనలో రాని అనుభవాలను, జ్ఞాపకాలను రచయితతో పంచుకున్నారు సార్. అవి ఆయన భాషలోనే వస్తున్న పుస్తకం ఇది. ఇంకా ఎన్నో విషయాలు స్వయంగా జయశంకర్ గారు చెప్పినవి ఈ పుస్తకంలో ఉన్నాయి.

ఇది జయశంకర్ గారి చివరి పుస్తకం. చారిత్రక, సాంస్కృతిక నేపధ్యంలో అతి ముఖ్యమైన పుస్తకం. ఆయన మనసు విప్పి ఎన్నో విషయాలు చెప్పారు ఈ పుస్తకంలో. ఓ రకంగా ఇది ఆయన ఆత్మకథ అని భావించవచ్చు.

ఈ పుస్తకం డిజిటల్ రూపంలో కినిగెలో లభ్యమవుతుంది. వెల 90/- రూపాయలు. నెలకి 30/- రూపాయల అద్దెతో కూడా చదువుకోవచ్చు.

వొడువని ముచ్చట On Kinige

కొల్లూరి సోమ శంకర్

Related Posts: