మంచి సంగతులు – “మీడియా సంగతులు” పుస్తకంపై సమీక్ష

రేపటి చరిత్రకి దినుసును అందిస్తున్న పత్రికారంగ చరిత్ర మీద మనకి ఆసక్తి తక్కువే. నిజానికి పత్రికారంగంలో వచ్చిన పరిణామాలను గమనించడమూ అవసరమే. ఆ ప్రయత్నంలో భాగమే ‘మీడియా సంగతులు’. ప్రముఖ జర్నలిస్ట్, జర్నలిజం పాఠాలు చెప్పిన మాస్టారు గోవిందరాజు చక్రధర్ ఈ పుస్తకం రాశారు.  కాబట్టే పత్రికల నేపథ్యం, పత్రికల నాటి స్థానం, వర్తమానంలో ఉన్న స్థానాల గురించి చాలా లోతుగానే చర్చించారు. చక్రధర్ ప్రతికారంగంలోని వెలుగునే కాదు, చీకటిని తడమడానికి కూడా ప్రయత్నం చేశారు.

ప్రింట్ మీడియా తరువాత జరిగిన ఎలక్ట్రానిక్ మీడియా ఆవిర్భావం, ఇంటర్నెట్ గురించి కూడా ఇందులో చదవవచ్చు. అలాగే సాంకేతిక పరిజ్ఞానంతో పాటు పతనంలో కూడా పెరిగిన పోటీని ఇందులో రచయిత నిభాయింపుతోనే అయినా చర్చించారు. ఏ రంగంలో అయినా మార్పు సహజమే. కానీ మార్పునీ పతనాన్నీ వేర్వేరుగా చూడలేకపోతున్న చానెళ్ల, పత్రికాప్రచురణ సంస్థల మీద చక్రధర్ ప్రదర్శించిన నిరసనను అర్థం చేసుకోవలసిందే. పుస్తకం చివర తెలుగు పత్రికా రచయితల ఫోటోలు ఇవ్వడం రచయిత ఉత్తమ అభిరుచికి నిదర్శనం.

– కల్హణ , సాక్షి ఫన్‌డే , 20 ఫిబ్రవరి 2014.

 

“మీడియా సంగతులు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మీడియా సంగతులు on kinige

 

MediaSangatulu600

 

Related Posts:

సరదా కథల రచయిత “సత్యం మందపాటి” పుస్తకాలపై 20% ప్రత్యేక తగ్గింపు!

satyam mandapati

చమక్కులు, చురుక్కులుతో సరదా సరదాగా కథనాన్ని నడిపే రచయిత ‘సత్యం మందపాటి‘.
దీపావళి సందర్భంగా సత్యం మందపాటి గారి కినిగె ఈ-బుక్స్ మరియు ప్రింటు బుక్స్ పై 20% ప్రత్యేక డిస్కౌంటు లభిస్తుంది.
సత్యం మందపాటి గారి పుస్తకాల కోసం ఇక్కడ క్లిక్ చేయండి.

కినిగెలో లభ్యమయ్యే సత్యం మందపాటి గారి పుస్తకాలు:

ఎన్నారై కబుర్లు (ఒకటి)
ఎన్నారై కబుర్లు (మరోటి)
అమెరికా వంటింటి పద్యాలు
చీకటిలో చందమామ
అమెరికా బేతాళుడి కథలు
మేడ్ ఇన్ అమెరికా
తెలుగువాడు పైకొస్తున్నాడు – తొక్కేయండి!
చెట్టుక్రింద చినుకులు
ఎన్నారై కథలు

 

 

Related Posts:

ఆప్తవాక్యాలతో కర్తవ్య బోధ – “మంచిమాట- మంచిబాట” పుస్తకంపై సమీక్ష

 

ఇఫ్పటి పిల్లలు తల్లిదండ్రుల మాట వినకుండా పోతున్నారని, ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే మరో వ్యాసం ఆలోచింపజేస్తుంది.

ఆంధ్రభూమి, వనితాజ్యోతి, వండర్ వరల్డ్, ఆంధ్రప్రభ మొదలైన పత్రికల్లో ప్రచురింపబడిన వ్యాసాలలోని కొన్ని వ్యాసాలను మంచిమాట- మంచిబాట అనే పేరుతో సి.ఉమాదేవి వ్యాస సంకల్పం చేశారు. నేటి సమాజంలో మన చుట్టూ- జరుగుతున్న సంఘటనలు, మానవ మనస్తత్వాలు, జీవన విధానం, సంస్కృతికి సంబంధించిన వ్యా సాలు మనకు ఇందులో కనిపిస్తాయి. మన స్నేహితులతో మాట్లాడేటప్పుడు చెప్పే విషయాల్లా అనిపిస్తాయి. రచన సరళమైన శైలిలో వుంది. పిల్లలకు, పెద్దలకు అవసరమైన మంచి మాటలున్నాయి. మంచి మాటలను చెప్పి వదిలివేయలేదు. కొన్ని సందర్భాల్లో వాటిని తప్పకుండా ఆచరించాల్సిన అవసరాన్ని కూడా నొక్కిచెప్పారు. అరువుసొమ్ము బరువుచేటు, ఫాల్స్‌ప్రెస్టేజీతో ఇబ్బందులు తప్పవు, పటిష్టమైన కుటుంబం అవసరం, పెళ్ళిళ్ళల్లో వృధావ్యయం వ్యర్థం అనే నీతులను ఈ వ్యాసాలు బోధిస్తాయి. వృద్ధులంటే వయస్సు వృద్ధిచేసుకున్నవారు కాదు. పిల్లలను అభివృద్ధిపథంలోకి నడిపిన వారనడం, ప్రతి బిడ్డా ఒక పరిపూర్ణ వ్యక్తిగా రూపుదిద్దుకుంటేనే దేశానికి ఉన్నత పౌరులు తయారవగలరు, ప్రేమ అనేది రక్షణనివ్వగలగాలి, అనే వాక్యాల ద్వారా సందేశాన్ని అందించారు. మనల్నిబట్టే మన పిల్లలలో తల్లిదండ్రులు నిజాయితీగా వ్యవహరించాల్సిన ఆవశ్యకతను చెబుతారు. మానవత్వం, మృదుభాషణం అవసరమంటారు. ఒడినుండి బడికి లాంటివి సలహాలను, ధైర్యాన్నీ ఇస్తాయి. ర్యాగింగ్‌ను అరికట్టడం, డ్రైవింగ్‌లో మెళకువలు, వంట చేయడంలో జాగ్రత్తలు, పొదుపు ఆవశ్యకత మొదలైనవి నేటి సమాజానికి ఉపకరిస్తాయి. తెలుగులో మాట్లాడితే శిక్షలు వేస్తున్న నేటి పాఠశాల యాజమాన్యాల తీరును విమర్శించారు. సంబరాన్ని పెంచే పండుగలు వ్యాసంలో పండుగ వాతావరణాన్ని వర్ణిస్తే అరకులోయలో ప్రకృతి వర్ణన చేశారు. వర్క్‌హాలిక్‌గా వుండకుండా మనస్సును విశ్రాంతి వైపు మళ్ళించాలి, జీవించే కళను నేర్చుకుని వదిలివేయడం కాదు ఆచరించాలి. నెగెటివ్ థింకింగ్‌తో కుంచించుకుపోతున్న విజయావకాశాలు మొదలైనవి ఆత్మవిశ్వాసాన్ని పెంపొందిస్తాయి. పసి పిల్లలపై భారం మోపి వారిని వత్తిడికి గురిచేయవద్దంటారు. పిల్లలకు తల్లులే మంచి కౌన్సిలర్స్ అని చెప్పి పరీక్షల సమయంలో వారికి కల్పించాల్సిన సౌకర్యాలు, తల్లిదండ్రులు తీసుకోవలసిన చర్యలను వివరించారు. పిల్లలను బడికి పంపించేటప్పుడు తీసుకోవాల్సిన జాగ్రత్తలు తెలిపారు. ఇప్పటి పిల్లలు తల్లిదండ్రుల మాట వినకుండా పోతున్నారని , ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ?.. వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే వ్యాసం స్ర్తిలు వంటచేస్తేనే వారికీ, ఇంట్లోని వారికీ తృప్తికలుగుతుందని వంటను తంటాగా కాకుండా బాధ్యతగా చేయాలన్న భావాన్ని స్ఫురింపజేశారు. ఇంటిని తీర్చిదిద్దుకోవడంలోనే నేర్పు చూపించాలన్నారు. హోదాలు, సంపాదనలో వ్యత్యాసాలు, అధికారం చెలాయించడం లాంటివి దాంపత్య జీవితానికి ఆటంకం కలిగించే అంశాలని, చూడముచ్చటగా అన్యోన్యంగావుండే ఆదర్శదాంపత్యం అవసరమని, జీతాలు కాదు జీవితాలు పంచుకోవాలంటారు. ప్రేమకంటే సిన్సియారిటీ ముఖ్యమంటారు. ఈ రకంగా మనసున మనసై వ్యాసం హితవును బోధిస్తుంది. ఈ రకంగా ఈ పుస్తకం మంచిమాటను చెబుతూ మంచి బాటను చూపిస్తుంది.

-కె.లక్ష్మీఅన్నపూర్ణ, ఆంధ్రభూమి-అక్షర, 27/09/2014.

 

మంచిమాట- మంచిబాట” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మంచిమాట- మంచిబాట on kinige

ManchiMataManchiBata600

 

 

 

 

Related Posts:

దిటవు గుండెలున్న పల్లెటూరి కుర్రాడే ‘మూవీమొఘల్’

తెలుగు ప్రజలు గర్వించదగిన ప్రముఖులలో ఒకరు డి.రామానాయుడు. ఆయన సమకాలికులలో జ్ఞాపకాలకు భాష్యం చెప్పాలంటే పదునైన పంచెకట్టు పల్లెటూరి కుర్రాడు.దాదాసాహెబ్ ఫాల్కే,పద్మభూషణ్ వంటి అత్యున్నతమైన అవార్డులతో పాటు స్టార్ ప్రొడ్యూసర్,వర్క్ ప్రొడ్యూసర్,అధ్బుత నిర్మాత,గిన్నిస్ బుక్ ఆఫ్ వరల్డ్ రికార్డ్స్ లో చోటు పొందిన అరుదైన తెలుగువాడు, సేవానిరతి గల వ్యక్తి ఎంతోమందికి అన్నం పెట్టినవాడు……లాంటి ఎన్నో భుజకీర్తులు సంపాదించుకున్నవాడు,వినయశీలి ఆయన సాధించిన అరుదైన విజయాలను,జీవితాన్ని యువతకు స్ఫూర్తినిచ్చేలా ‘మూవీమొఘల్’ పుస్తకంలో అక్షరీకరించారు. సీనియర్ జర్నలిస్ట్ వినాయకరావు అరుదైన ఫోటోలను,విలువైన సమాచారాన్ని ఈ పుస్తకంలో అందించారు..

రామానాయుడు బాల్యం,దయార్ధ్రరహృదయం,వితరణదృష్టి,వ్యాపార దక్షత,చిత్రరంగ ప్రవేశం,తెగువ,ఆటుపోట్లు,కలుపుగోలుతత్వం,జాతీయ స్థాయి గుర్తి౦పు సహా సేవా కార్యక్రమాల ప్రస్దానాన్ని పాఠకజనరంజకంగా వ్రాశారు.రామానాయుడు మానవతావాది,భేషజాలు లేని మనిషి,గర్వం ఆయనకు ఆమడ దూరం.అయన తొమ్మిదోయేట అచార్య వినోబాభావే వారి గ్రామానికి వచ్చినప్పడు రెండున్నర ఎకరాలు భూమి ఇచ్చి అందర్నీ ఆశ్చర్యపరిచారు. విజయవాడ లయోలా కాలేజీ నిర్మాణానికి రెండు లక్షలు విరాళాలు సేకరించి ఇచ్చారు.రైసుమిల్లు నడిపారు.పొగాకు వ్యాపారం చేశారు.రవాణారంగంలో రాణించారు.ఆయన బస్సులను ప్రభుత్వం జాతీయ౦ చేయడంతో ఇటుకల వ్యాపారం చేసేందుకు మద్రాసు వెళ్ళారు.అది నచ్చక రియల్ఎస్టేట్ వ్యాపారం కోసం 50 వేల రూపాయలతో మహాబలిపురం వద్ద 94 ఎకరాలు కొనుగోలు చేశారు.ఆంధ్రాభవన్ హోటల్ వ్యాపారంలో పార్ట్నర్ గా చేరారు. చివరకు ఆంధ్రాక్లబ్ లో రామినీడు పరిచయంతో అనురాగం చిత్రంలో పార్టనర్ గా సినీరంగ ప్రవేశం చేశారు.సురేష్ మూవీస్ ఏర్పాటు చేసి రాముడు భీముడు చిత్రం ద్వారా తొలి సక్సెస్ సాధించారు.ఈ చిత్రమే ఆ తర్వాత బుల్లెమ్మ బుల్లోడు,సీతా ఔర్ గీతా,రామ్ ఔర్ శ్యామ్,గంగ మ౦గ,వాణి-రాణి వంటి అనేక చిత్రాలుగా పలుభాషల్లో నిర్మించడానికి స్పూర్తిగా నిలిచింది.

మొదట్లో అర్ధికంగా ఇబ్బందులు అధిగమించేందుకు ఎంతో తెగువతో ప్రేమనగర్ నిర్మించారు.తీరా విడుదలయ్యాక భారీవర్షాలు.ఆయన అశలు వదులుకున్నారు.డిస్ట్రిబ్యూటర్లు ఇది శతదినోత్సవ చిత్రమని చెప్పడంతో ఆయన ఆనందానికి అంతే లేదు.ఈ విజయ౦తో ఆయన జాతీయస్ధాయికి ఎదిగారు.  ప్రేమనగర్,జీవనతరంగాలు,చక్రవాకం,సెక్రటరి వంటి నవలాచిత్రాలు తీసి ఔరా అనిపించారు.బ్రహ్మపుత్రుడు,దేవత చిత్రాలు అయన్ను మరింత ము౦దుకు నడిపించాయి. శోభన్ బాబు,వెంకటేష్ లతో అత్యధిక చిత్రాలు నిర్మి౦చారు.తమిళంలో 10 స్ట్రయిట్ చిత్రాలు,మరో 14 అనువాద చిత్రాలు తీశారు. తమిళనాడు ముఖ్యమంత్రి జయలలిత నటి౦చిన 100వ చిత్రం ‘తిరుమాంగల్యం’(జీవన తరంగాలు) రామానాయుడే నిర్మించారు.ప్రేమనగర్,చంటి వంటి చిత్రాలు తెలుగు,తమిళ్ (శివాజీగణేషన్) ,హిందీ (రాజేష్ ఖన్నా) భాషల్లో కూడా విజయఢంకా మోగించాయి. దిల్దార్,దిల్ ఔర్ దీవార్,బందిష్ తోఫా,మక్సద్,దిల్ వాలా తో హిందీలో హిట్లు కొట్టారు.వెంకటేష్ కూడా హిందీలో అనారి(చంటి),తకదీర్ వాలా(యమలీల) వంటి చిత్రాల్లో నటించారు. స్టాటన్ ఐలెండ్ అనే ఆంగ్ల చిత్రం కూడా నిర్మించారు.50 యేళ్ళ సినీజీవిత౦లో ఆత్యధికంగా 50 కథా చిత్రాలు నిర్మించిన నిర్మాతగా గిన్నిస్ రికార్డుకు ఎక్కారు.ఇంద్రుడు చంద్రుడు,బొబ్బిలిరాజా సహా కామెడీ చిత్రాల చరిత్రలో చిరస్ధాయిగా నిలిచిన ‘ఆహ నా పెళ్ళంట’ తోపాటు 13 భారతీయభాషల్లో 140 చిత్రాలు నిర్మించారు .ముగ్గురు ముఖ్యమంత్రులు(ఎన్టీఆర్,జయలలిత,ఎమ్జీఆర్) ఆయన చిత్రాల్లో నటించి పేరు ప్రతిష్టలు పొందిన వారే.

‘రామానాయుడు అవసరమైతే ట్రాలీ కూడా లాగుతారు. సూటూబూటూ వేసుకున్నా లోలోపల పల్లెటూరి రైతులా కనిపిస్తారు’ అని కమల్ హాసన్ చేసిన ప్రశ౦సలు గమనార్హం.

ఇన్ని విజయాలు,స్టూడియోల నిర్మాణం,ప్రజల ప్రశంసలు,అంతర్జాతీయ స్ధాయి గుర్తింపు ఆయనకు ఊరికే వచ్చి ఒళ్ళో పడిపోలేదు.దిటవు గు౦డెలు,కష్టించే తత్వమే దానికి ఆలంబన.అలా౦టి ఓ పల్లెటూరి వ్యవసాయదారుని విజయ రహస్యాలను తెలియజేసే పుస్తకమిది ప్రతియువకుడు చదవాలి.

-తాతిరాజు , నవ్య వీక్లీ ,10 సెప్టెంబర్ 2014

 

MovieMoghal

“మూవీమొఘల్” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మూవీమొఘల్ on kinige

MovieMoghal

 

 

 

Related Posts:

ఓ అయ్యేఎస్ అనుభవాలు…”మోహన మకరందం” పుస్తకంపై సమీక్ష

ప్రతి ఐఏఎస్ అధికారి జీవితంలోనూ ఎన్నోకొన్ని ఆసక్తికరమైన అనుభవాలే ఉంటాయి. ముఖ్యమంత్రుల దగ్గరా ప్రధానమంత్రుల దగ్గరా కీలక హోదాల్లో పనిచేసి ఉంటారు కాబట్టి, ఆయా వ్యక్తుల్నీ వ్యక్తిత్వాల్నీ అతి దగ్గర నుంచి గమనించే అవకాశం ఉంటుంది. మోహన్‌కందా వృత్తి జీవితంలోనూ అలాంటి ప్రముఖులు చాలామందే తారసపడ్డారు. కొరకరాని కొయ్యల్నీ, మహామొండి ఘటాల్నీ కూడా తనదైన వ్యవహారదక్షతతో ఒప్పించి మెప్పించిన మృదుస్వభావి ఆయన. అవసరమైతే ఎదిరించిన దృఢస్వభావి కూడా. బాలనటుడిగా ఓ యాభై సినిమాల్లో నటించిన అనుభవాలు మొదలుకొని తన జీవితంలోని అనేకానేక ఆసక్తికరమైన జ్ఞాపకాల్ని ‘మోహన్ మకరందం’ రూపంలో అందిస్తున్నారు కందా. హాస్యస్పృహ దండిగా ఉన్న రచయిత కాబట్టి, పాఠకుడికి షడ్రసోపేతమైన విందే!

– రాజేంద్ర, ఈనాడు ఆదివారం అనుబంధం, 27 జూలై 2014

 

 

 

 

 

 

 

 

మోహన మకరందం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

 ***

మోహన మకరందం on kinige

Related Posts:

అంబేడ్కరిజం – “అద్వితీయుడు” పుస్తకంపై సమీక్ష

బాబా సాహెబ్ దార్శనికుడు. ఆయన సిద్ధాంతాల పునాదుల మీద సమసమాజాన్ని స్థాపించుకోవచ్చు. బి.ఆర్.అంబేడ్కర్ మెమోరియల్ ట్రస్ట్ సహకారంతో ప్రచురించిన ఈ పుస్తకం… ఆయన సిద్ధాంతాల్లోని భిన్న పార్శ్వాలను పరిచయం చేస్తుంది. రాజశేఖరయ్య ‘డాక్టర్ బి.ఆర్.అంబేడ్కర్ సామాజిక తత్వాన్ని’ వివరిస్తే…అఖిలేశ్వరి ఆయన్లోని స్త్రీవాదిని విశ్లేషించారు. ఆయన స్వప్నించిన గ్రామీణ భారతాన్ని సతీష్‌చందర్, ప్రపంచీకరణలో దళితుల స్థితిగతుల్ని నరసింహారెడ్డి కళ్లకుకట్టారు. పాతిక వ్యాసాలూ ఆ మేధావిని పాతిక కోణాల్లో పరిచయం చేస్తాయి.

శ్రీనివాస్, ఆదివారం అనుబంధం, 25th May 2014

 

 

 

 

 

 

 

 

అద్వితీయుడు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

అద్వితీయుడు on kinige

Related Posts:

“మకరంద బిందువులు” పుస్తకంపై సమీక్ష

ఇందులోని 18 వ్యాసాలు కేవలం విషయ విజ్ఞానం కోసమే కాకుండా సదాచారాల పట్ల అవగాహన కలిగించడానికీ, ధార్మిక జీవనం సాగించడానికీ దోహదం చేస్తాయి. మధురమైన వాక్కుల సమాహారమే ఈ గ్రంథం. సత్యవాక్కు, పరమాత్మతత్త్వం, ఆ దివ్యమంగళ మూర్తి గొప్పదనం తెలియజేసే వ్యాసాలతో పాటు భార్య, సంసార జీవితంలో దంపతుల పరస్పర జీవన విధానం వివరిస్తారు.మనిషికి మాత్రమే లభించిన దైవ సంబంధమైన వాక్కు గొప్పతనం, దాన్ని ఉపయోగించాల్సిన పద్ధతిని హత్తుకునేట్టు చెప్పారు. సుఖదుఃఖాలు, ఉత్పత్తి వినాశనం, లాభనష్టాలు, చావు బ్రతుకుల విశ్లేషణ, వినయాన్ని ఆవాహనం చేసే నమస్కారం గొప్పదనాన్ని ఆధ్యాత్మిక దృక్పథంతో చాటిచెప్పారు.ఓంకారాక్షరంలోని అకార, ఉకార, మకారాలనే మూడు మాత్రలు బ్రహ్మ విష్ణు శివతత్త్వాలను సూచిస్తాయంటారు రచయిత. వసుధైక కుటుంబ భావన గొప్పతనాన్ని వివరిస్తుంది మరో వ్యాసం. ఇలా ధార్మిక జీవనంపట్ల మనలో ఆసక్తి రేపి మనల్ని సజ్జనులుగా తీర్చిదిద్దుతాయీ వ్యాసాలు.

నవ్య వారపత్రిక, 4th June 2014

 

 

 

 

 

 

 

 

మకరంద బిందువులు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

మకరంద బిందువులు on kinige

 

Related Posts:

“అమృత వాక్కులు” పుస్తకంపై సమీక్ష

మనది ఆధ్యాత్మిక చింతన పుష్కలంగా ఉన్న దేశం. ఇలాంటి దేశంలో మానసిక ప్రశాంతతదే రాజ్యం. కానీ ఎప్పుడైతే ఆధ్యాత్మిక ఆలోచనా దృక్పథం సన్నగిల్లిందో అప్పటినుండి మానసిక సమస్యలు, మానసిక రోగాలు సమాజంలో ప్రబలిపోయాయి. అది నేరాల విస్తృతికి దారతీస్తోంది. సమాజం శాంతిని కోల్పోయింది. భద్రతను కోల్పోయింది. దీన్ని తిరిగి తెచ్చుకోవాలంటే ఏకైక ఔషధం ఆధ్యాత్మిక పరిమళాన్ని ఆస్వాదించడమే. ఈ పుస్తకంలోని 43 వ్యాసాలు ఇందుకు దోహదం చేస్తాయి. ఇతరుల సహాయం అవసరం లేకుండా మన ఆలోచనల్ని సరిదిద్దుకోవడానికి ఉపయోగపడే వ్యాసాలివి.

- నవ్య వారపత్రిక, 7th May 2014

 

 

 

 

 

 

 

 

అమృత వాక్కులు” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అమృత వాక్కులు” on kinige

Related Posts:

ప్రశ్నాక్షరాలు – ‘కొత్త వంతెన’ పుస్తకంపై సమీక్ష

కె.శ్రీనివాస్‌ అక్షరాలు పదునైన అస్త్రాలను తలపిస్తాయి. ఆ శైలిలో ఆలోచనా ఆవేశం సమపాళ్లలో ఉంటాయి. పదమూడేళ్ల క్రితం ‘ప్రజాతంత్ర’లో వెలువడిన వ్యాసాల్ని ఇప్పుడు ‘కొత్తవంతెన’ పేరుతో పుస్తకంగా తీసుకొచ్చారు. ‘మూసీ అంటే నీళ్లు మాత్రమే కాదు, మూసీ అంటే దక్కన్‌, మూసీ అంటే తెలంగాణ’ అంటూ మురికినీటి ప్రవాహంగా మారిపోతున్న ఆ జలవాహిని దుస్థితిని తలుచుకుంటారు. ‘కాకతీయులూ వద్దు, ఖాసిం రజ్వీలూ వద్దు’ అంటూ మధ్య యుగాల, ఆధునిక రాచరిక పాలనలోని దుర్మార్గాల్ని గర్హిస్తారు. ‘ఆకలినీ ఆత్మహత్యలనూ హత్యలనూ చూస్తావా ఉల్ఫెన్‌సన్‌?’ అంటూ ప్రపంచ బ్యాంకు ప్రతినిధి సందర్శనను నిరసిస్తారు. తెలంగాణా రాజకీయ, సాంస్కృతిక, సామాజిక పరిణామాలపై పుస్తకంలో నలభైకిపైగా వ్యాసాలున్నాయి.

- వినయ్, ఆదివారం అనుబంధం, ఈనాడు, 16th Feb 2014

 ఈ ఆర్టికల్‌ని ఈనాడు పుస్తకం పేజీలో చదవడం కొరకు ఈ క్రింద లింక్ క్లిక్ చేయండి:

 http://archives.eenadu.net/02-16-2014/Magzines/Sundayspecialinner.aspx?qry=pustaka


 

 

 

 

 

 

 

కొత్త వంతెన” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ లింక్‌ని అనుసరించండి.

***

కొత్త వంతెన on Kinige

Related Posts:

మార్పు చూసిన కళ్ళు

సీనియర్ జర్నలిస్టు, రాజకీయ వ్యాఖ్యాత భండారు శ్రీనివాసరావు సోవియట్ యూనియన్‌ ఉనికిలో ఉన్న చివరిరోజుల్లో మాస్కోలో పనిచేసినప్పుడు తను ప్రత్యక్షంగా చూసిన, పొందిన సోవియట్ రష్యా జీవితానుభవాలపై నాలుగేళ్ల క్రితం రాసిన కథనాలు అప్పట్లో చదవటం ఒక మహానుభూతిని కల్గించింది. ఒక రకంగా అవి బ్లాగ్ లోకంలో సంచలనం కలిగించిన ప్రత్యేక విశిష్ట రచనలు. 90ల మొదట్లోనే ముగిసిపోయిన సోవియట్ యూనియన్ వైభవోజ్వల శకాన్ని దాదాపు ఇరవయ్యేళ్ల తర్వాత మళ్లీ గుర్తు చేసుకోవలసిన సందర్భాన్ని రచయితే స్వంత మాటల్లో ఇలా చెప్పారు.

”ఇంచుమించు రెండు దశాబ్దాల క్రితం – మాస్కోలో గడిపివచ్చిన సుమారు ఐదేళ్ళ అనుభవాలను అక్షర బద్ధం చేసే ప్రక్రియ ఎప్పటికప్పుడు వాయిదా పడుతూ వచ్చింది. ఏకధ్రువ ప్రపంచ వ్యవస్తను ప్రశ్నిస్తూ- నూతన సామ్యవాద సిద్దాంతాలను ప్రవచిస్తూ – ఏడు దశాబ్దాలకు పైగా సాగిన మొట్టమొదటి ‘సోవియట్ కమ్యూనిష్ట్ ప్రభుత్వ చరమాంకాన్ని కళ్ళారా చూడగలిగిన అరుదయిన అవకాశాన్ని ఆలంబనగా చేసుకుని – ‘మార్పు చూసిన కళ్ళు’ అనే పేరుతో ఆనాటి అనుభవాలను గుదిగుచ్చి గ్రంధస్తం చేయాలనే ప్రబలమయిన కాంక్షను ఎన్నో ఏళ్ళుగా అదిమిపెట్టుకోవాల్సి వచ్చింది. దీనికి కారణాలు అనేకం. ఆనాడు నేను చూసింది మరో ప్రపంచం. అప్పటికీ ఇప్పటికీ యెంతో తేడా….

…..ఆ రోజుల్లో ‘అలా వుండేది, యిలా వుండేది’ అని రాస్తే నమ్మడానికి వీల్లేకుండా ఈనాటి రష్యన్ల జీవన విధానాలు గుర్తు పట్టలేనంతగా మారిపోయాయి. రతనాలను రాశులుగా పోసి- వీధి అంగళ్ళలో విక్రయించిన ‘స్వర్ణ యుగాలు’ చరిత్ర పుటల్లో ఆనవాలుగా మిగిలిపోయినట్టే – ఆ నాటి నా అనుభవాలు కూడా. నేను కమ్యూనిస్టుని కాను. వృత్తి రీత్యా వివిధ రాజకీయ పార్టీలవారితో అంటకాగి తిరిగివుండ వచ్చు కానీ ఏ రకమయిన రాజకీయ వాసనలను నేను వొంటబట్టించుకోలేదు. ఒక సామాన్యుడిగా అప్పటి కమ్యూనిస్ట్ రష్యాలో కాలుమోపాను . అక్కడ నేను గడిపిన ‘జీవనం’ నా జీవితంలోనే ఒక సువర్ణ అధ్యాయం. నేనూ, నా భార్యా పిల్లలూ – అత్యంత సుఖప్రదమయిన, గౌరవ ప్రదమయిన, తృప్తికరమయిన రోజులు గడిపింది ఆ రోజుల్లోనే. వాటిని గురించి ఏ కొంచెం చెప్పినా గోరంతను ‘కొండంత’ చేసి చెబుతున్నానేమో అని అనిపించకత ప్పదు. అందుకే ‘మార్పు చూసిన కళ్ళు’ అక్షరబద్ధం చేయడానికి ఇంతగా తటపటాయించాల్సి వచ్చింది…”

కమ్యూనిస్టు పార్టీ వాసన లేని వ్యక్తి, జీవికలో భాగంగా సామాన్యుడిగా అప్పటి కమ్యూనిస్ట్ రష్యాలో కాలుమోపిన వ్యక్తి… అక్కడ తాను గడిపిన జీవనం తన జీవితంలోనే ఒక సువర్ణ అధ్యాయం అని చెప్పుకున్నారు. “నేనూ, నా భార్యా పిల్లలూ – అత్యంత సుఖప్రదమయిన, గౌరవ ప్రదమయిన, తృప్తికరమయిన రోజులు గడిపింది ఆ రోజుల్లోనే.” అని కూడా పరమ నిజాయితీగా తన అంతరంగాన్ని ఆకర్షించారు.

”సోవియట్ యూనియన్లో అయిదేళ్ళు గడిపినా నేను కమ్యూనిజాన్ని, అవుపోశన పట్టినవాడిని కాను. నేను ముందే తెలియచేసుకున్నట్టు ఒక మామూలు మనిషిగా అక్కడికి వెళ్లాను. ఒక మిలియనీరుగా వెళ్లి వుంటే – నా కళ్ళకు మాస్కో వేరుగా కనిపించి వుండేదేమో. ఒక మామూలు పౌరుడి జీవితం ఎలా వుంటే బాగుంటుందో- అతడి అవసరాలు ఎలా ఉంటాయో తెలుసుకుని – వాటికి రూపకల్పన చేసినట్టుగా నాకు అనిపించింది. అయితే, కూడూ, నీడా, గుడ్డా మాత్రమే కాదు ఇంకా యేవో ఉంటాయని అక్కడి సామాన్య జనం ఆత్రపడ్డట్టుగా కూడా అనిపించింది.”

1987 నుంచి 1991 వరకు అంటే సోవియట్ యూనియన్ రద్దయ్యే వరకు విదేశీ ఉద్యోగి స్థాయిలో ‘పిల్లజమీందారు’ జీవితం గడిపిన శ్రీనివాసరావు గారు ఆ దేశం గురించి చేసిన అపురూప కృషిని నెత్తిన పెట్టుకుంటూ అప్పట్లోనే ఆయన రాసిన ఒక టపాకు ఇలా వ్యాఖ్య పంపాను.

“విదేశీ పర్యటనలు, విహారాలపై గతంలో ప్రముఖుల వ్యాసాలు, యాత్రా విశేషాలు ఎన్నో చదివాను. కాని వాటిలో చాలావరకు ఫలానా ప్రాంతం చూశామని, పలాని విశేషాన్ని తిలకించామని, పలానా కట్టడాన్ని చూశామని చెప్పేవారే తప్ప ఓ నగరజీవితాన్ని, ఓ వ్యవస్థ పనితీరును ఇంత హృద్యంగా, ఇంత ఆసక్తికరంగా రాయడాన్ని ఇంతవరకు నేను చూడలేదు. మీ అయిదేళ్ల మాస్కో జీవితాన్ని ఔపోసన పట్టినట్లు రాస్తున్నారు. ఒక వ్యవస్థ మంచిని చూడడానికి, గుర్తించి ప్రకటించడానికి మనం సిద్ధాంతాలు వల్లెవేయ వలసిన అవసరం లేదు. ముద్రలు తగిలించుకోవలసిన అవసరమూ లేదు. మీలా ఉన్నది ఉన్నట్లుగా, చూసింది చూసినట్లుగా, పలవరించి రాస్తే చాలు…

సోవియట్ వ్యవస్థ లోపాలు ఎన్నయినా ఉండవచ్చు కానీ ప్రజలందరికీ మంచి జీవన ప్రమాణాలను అందించడంలో అది సక్సెస్ అయినంతగా భూమ్మీద మరే దేశం కూడా కాలేదని మీ కథనాలబట్టి తెలుస్తోంది. కమ్యూనిస్టు వ్యవస్థ గొప్పతనాన్ని సిద్ధాంతాల ద్వారా మాత్రమే చదువుకున్న నాలాంటివారందరికీ మీరు ప్రత్యక్షంగా ఓ భూతల స్వర్గాన్ని కళ్లకు కట్టిస్తున్నారు.

జీవితంలో సమానత్వాన్ని ఇంత గొప్పగా ఆచరణలో చేసి చూపించిన ఆ గొప్ప దేశంలో మీరు కొన్నేళ్లు బతికారు. ఎంత ‘అదృష్ట’వంతులు మీరు. అదృష్టానికి మారుపదం దొరకడం లేదు నాకు. మీరు ఇలాగే రాస్తూ పోండి. వీలయితే మీరు మాస్కో జీవితంలో ఫోటోలు తీసుకుని ఉంటే వాటినే ఓ కథనంగా కూడా ప్రచురించండి. చిన్న క్యాప్షన్లతో అయిదారు ఫోటోలను ఒకే ఆర్టికల్‌గా పోస్ట్ చేయవచ్చు.

మానవ సమాజంలో ఒకనాడు వెలిగిన భూతలస్వర్గాన్ని భవిష్యత్తరాలకోసం మీరు బ్లాగీకరించి భద్రపరుస్తున్నారు. దయచేసి వెంటనే విశాలాంధ్రవారిని సంప్రదించండి. ఖచ్చితంగా మీ మాస్కో అనుభవాలను పుస్తక రూపంలో తీసుకురండి. కళ్లకు అద్దుకుని తీసుకోవడానికి మేం సిద్ధంగా ఉన్నాం. అలాగే మాస్కో జీవితంలో మీరు చూసిన లోపాలను కూడా తప్పక రాయండి. లోపాలను కూడా మీరు రాయకపోతే అది ఎప్పటికీ లోటుగానే ఉంటుది…”

సోవియట్ సమాజ ప్రభలు వెలిగిన కాలం, అది పతనమైన కాలం రెండింటిని ప్రత్యక్ష అనుభవంతో, సామాన్యుడి దృక్పధంతో చూస్తున్న, చెబుతున్న ‘మార్పు చూసిన కళ్లు’ చాలా ప్రాధాన్యత కలిగిన కథనం. సోవియట్ సమాజ చరిత్రను సామాన్యుడి కళ్లతో చూసి రాస్తున్న అసామాన్య కథనం ఇది. ప్రతి భాగం కథనం తీవ్రమైన ఉత్కంఠతో చదివిస్తుంది.

సోవియట్ యూనియన్‌ పతనానికి ముందు సమాజ జీవితాన్ని కళ్లారా చూసిన ఈ సామాన్యుడు, ఆ దేశాన్ని సందర్శించిన ఏ ప్రముఖుడూ రాయలేనంత పరమ నిష్పాక్షికంగా ఈ మార్పు చూసిన కళ్లు కథన పరంపరలో అక్షర బద్దం చేశారు. దశాబ్దాల తర్వాత కూడా తన ప్రాసంగికతను కోల్పోనటువంటి ఈ గొప్ప రచనను సమాజ చలనం, పరిణామాల పట్ల ఆసక్తి కలిగిన వారు చదవాలని కుతూహలపడితే ఆయన రాసిన 17 కథనాల లింకులను ఇక్కడ తెరిచి వరుసగా చదవండి. ఒక అద్భుత ప్రపంచం మీ కళ్లముందు ఆవిష్కరించబడుతుందనడంలో సందేహించవలసిన పనిలేదు.

ఈ పుస్తకంలోని కొన్ని మాస్కో  నగర జీవిత విశేషాలు

“మాస్కోలో శాకాహారులకు ఏమీ దొరకవు అన్న హెచ్చరికలతో బయలుదేరిన మేము – మాస్కో ఎయిర్ పోర్ట్ లో  లగేజి కలెక్ట్ చేసుకునేందుకు ఎదురు చూస్తున్నాము. హైదరాబాదు నుంచి సూటు కేసులనిండా పట్టుకొచ్చిన వంట  సంభారాలతో కస్టమ్స్ అధికారులనుంచి ఎలాంటి ఇబ్బంది ఎదురుకాలేదు కాని, మా ఆవిడ తెచ్చిన ఇంగువ డబ్బా కొంత తంటా తెచ్చిపెట్టింది. ఇంగువని ఇంగ్లీష్ లో ఏమంటారో ఆ క్షణంలో గుర్తురాలేదు. అది తినే వస్తువనీ, వంటల్లో వాడుకుంటామని ఎన్నో విధాలుగా చెప్పిచూసాను. ఇంగ్లీష్ భాష ఇసుమంత కూడా అర్ధం కాని రష్యన్ అధికారుల ముందు నా ప్రయత్నం వృధా ప్రయాస అని అర్ధం అయింది. పైపెచ్చు ఘాటయిన ఇంగువ వాసన వారి అనుమానాలను మరింత పెంచింది. చివరకు ఇంగువ ముక్క నోటిలో వేసుకుని నమిలి చూపించి, అది వారనుకుంటున్నంత ప్రమాదకరము, మాదక ద్రవ్యం కాదని రుజువు చేసుకున్న తరువాతనే అక్కడ నుంచి బయట పడగలిగాము”

‘మాస్కోలో పాలకు కొదవలేదు. వున్నదల్లా పెరుగుకే. అక్కడ దొరికే కిఫీర్ అనేది అటు పెరుగు ఇటు మజ్జిగ కాని బ్రహ్మ పదార్ధం. పాలు తోడు పెట్టి పెరుగు చేసుకోవచ్చు. కానీ, తోడుకు పెరుగేదీ? ఢిల్లీ నుంచి ఎవరో తెలిసిన పెద్దమనిషి వస్తుంటే ఓ చిన్ని గిన్నెడు పెరుగు పట్రమ్మని కోరాము. అలా దిగుమతి చేసుకున్న పెరుగుతో ప్రారంభించిన ‘తోడు’ ప్రయోగాలు కొద్దిరోజుల్లోనే విజయవంతమై సొంతంగా ఇంట్లోనే పెరుగు ఉత్పత్తిలో స్వయం సమృద్ధి సాధించగలిగాము. దాంతో ఇక మాస్కోలోని తెలుగు లోగిళ్ళలో పెరుగు వడలు, పెరుగు పచ్చళ్ళు, ఆవకాయ కారంతో పెరుగన్నాలు, మజ్జిగ పులుసులు స్వైర విహారం చేయడం మొదలెట్టాయి.”

చవక అనే పదం కన్నా చవక

‘మన రూపాయికి నూరు పైసలు మాదిరిగానే రష్యన్ రూబుల్ కు వంద కోపెక్కులు. ఒక కోపెక్కుకు దొరికే వస్తువులు కూడా వున్నాయి. ఉదాహరణకు అగ్గిపెట్టె, కోడి గుడ్డు లాటివి. గ్యాలన్ పెట్రోలు ముప్పయి కోపెక్కులు. పది రూబుళ్ళు మనవి కావనుకుంటే కారు ట్యాంకు నింపుకోవచ్చు. పాలకూ,పెట్రోలుకూ ధరలో తేడా వుండదు. ఒక్క మాస్కోలోనే కాదు దేశం అంతటా ఒకేవిధమయిన ధరవరలు. పల్లెల్లో బస్తీల్లో అంతా సమానమే. పైగా ప్రతి  వస్తువు మీదా దాని ధర ముద్రించి వుంటుంది. ఆఖరికి ఒక్కొక్క కోడి గుడ్డుపై కూడా ఒక్క కోపెక్కు అని ధర స్టాంప్ వేసి వుంటుంది. బేరసారాల అవసరం లేకపోవడం, ధర గురించిన బాధ లేకపోవడం – ఇవన్నీ భాష తెలియని మా బోంట్లకు వరంగా మారాయి”

విడాకులా! వద్దు  బాబోయ్!! అనే భర్తలు

“అక్కడ అన్ని విషయాల్లో పెద్దపీట స్త్రీ బాలవృద్ధులదే!. ఆనాటి కమ్యూనిస్ట్ ప్రభుత్వం ఆడవారికి కొన్ని ప్రత్యేక హక్కులు కల్పించింది. చలిదేశం కాబట్టి ప్రతి వారికి చిన్నదో పెద్దదో ఓ గూడు అవసరం. కొంపాగోడూ లేని వాళ్లు మనదగ్గరలాగా ఫుట్ పాతులపైనా, ప్లాటుఫారాలపైనా రోజులు వెళ్ళమార్చడానికి వీలుండదు. ఇళ్ళ కేటాయింపు ఆడవారి పేరుపై చేసే పద్దతి ప్రవేశపెట్టడంతో కాలక్రమేణా  ఇంటి వ్యవహారాల్లో పడతుల పట్టు పెరుగుతూ వచ్చింది. ఆర్ధిక స్వావలంబన స్వేచ్చాజీవితానికి ఆలంబనగా మారింది. నిండా ఇరవై ఏళ్ళు నిండకుండానే మొదటి ముగ్గురు  మొగుళ్లకు విడాకులు ఇచ్చి నాలుగో పెళ్ళికి సిద్ధం కాగల సత్తా రష్యన్ యువతుల సొంతం అయింది. సోవియట్ రష్యాలో ఏటేటా పెరిగిపోతున్న విడాకుల విషయంలో ఓ జోకు ప్రచారంలోకి వచ్చింది. భార్యాభర్తల్లో విడాకులు ఎవరు ఇచ్చినా, ఎముకలు కొరికే ఆ చలిదేశంలో, కొత్త ఇల్లు కేటాయించేవరకు పాత  పెళ్ళాంతోనూ, పాత  పెళ్ళాం కొత్త మొగుడితోను  కలసి పాత పెళ్ళాం పాత ఫ్లాటులో కొన్నాళ్ళపాటు కాలం గడపాల్సిన పరిస్తితి మగవాళ్లది. ఈ దుస్తితి పగవాళ్లకు కూడా రాకూడదని సరదాగా చెప్పుకునేవారు. ‘మాస్కో రేడియోలో నతాషా అనే సహోద్యోగి ఇరవై లోపే ఇద్దరికీ విడాకులు ఇచ్చి మూడో మొగుడితో సంసారం  చేస్తోంది. మా ఆవిడ శిలావిగ్రహం మాస్కో పురవీధుల్లో వేయించాలని సరదాగా అంటుండేది. ఎందుకంటే, పెళ్ళయిన పదహారేళ్ళ తరువాత కూడా ఇంకా అదే మొగుడితో  కాపురం చేస్తున్నందుకట.”

మాస్కో తెలుగు భోజనం

‘ఇస్కస్ బృందం తరపున మన రాష్ట్రం నుంచి వచ్చిన వారిని అంతకు మునుపే రెండు మూడు సోవియట్ నగరాలు చూపించి మాస్కోలోని ఓ పెద్ద హోటల్ లో బస ఏర్పాటు చేశారు.  బందరుకు చెందిన నరసింహమూర్తిగారనే పెద్దమనిషి ఆ బృందంలో వున్నారు. శాకాహారి అయిన మూర్తి గారు, రష్యాలో తిండీ తిప్పలు గురించి ముందుగానే వాకబు చేసుకుని, నాకు ఓ కార్డు ముక్క రాసి తాను వస్తున్న విషయం ముందుగానే తెలియచేసారు. వారిని కలవడానికి హోటల్ కు వెళ్ళిన నేను, వారితో వున్న రష్యన్ దుబాసీతో సహా  మొత్తం బృందాన్ని వెంటబెట్టుకుని వాళ్ల బస్సులోనే మా ఇంటికి తీసుకువెళ్లాను. బిలబిలమంటూ దిగిన అతిధులను చూసిముందు  మా ఆవిడ బిత్తర పోయినా వెంటనే తమాయించుకుని అందరికీ వంట ఏర్పాట్లు చేసింది. అంతా పచ్చళ్ళు, కారాలు, సాంబారు, పెరుగుతో భోజనాలు చేసి అన్నదాతా సుఖీభవా! అని ఆశీర్వదించి వెళ్లారు. అలా ఆ రోజు మా ఇంట్లో భోంచేసి వెళ్ళిన వాళ్ళలో చాలామంది ఇన్నేళ్ళ తరువాత ఇప్పటికీ కూడా ప్రతియేటా గ్రీటింగ్ కార్డులు పంపిస్తూనే వున్నారు. వాళ్ల సహృదయతకు ఖరీదు  కట్టే షరాబు యెవ్వడు?’

-భండారు శ్రీనివాసరావు, Andhra Prabha, 16th Feb 2014

ఈ ఆర్టికల్ ని ఆంధ్రప్రభ పేపర్‌లో చదవడం కొరకు ఈ క్రింద లింక్ క్లిక్ చేయండి.

http://www.andhraprabha.com/literature/book-review/our-mascow-experiences/12354.html

“మార్పు చూసిన కళ్ళు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్‌ని అనుసరించండి.

***

“మార్పు చూసిన కళ్ళు” on Kinige

 

 

 

Related Posts: