కథ వెనకున్న కథకు పట్టం కట్టిన తానా పుస్తకం – ‘కథ నేపధ్యం-2′ పుస్తకంపై సమీక్ష

కథకు నేపధ్యం ప్రకృతి సమాజమే – జంట పక్షుల్ని విడదీసిన వాల్మీకి పశ్చాత్తాపంతో రామాయణ ఇతిహాస కథను సృష్టిస్తే ,  భారత భాగవతాల పేరిట వేలాది గొలుసుకట్టు కథలు సమకూర్చాడు వ్యాసుడు .ప్రాచీన భారతీయ కథా సంస్కృతి ఒక చెంప ,పారిశ్రామిక విప్లవ కాలం ను౦డి నేటి  ప్రపంచ అర్థిక విధానాల దుష్పరిణామాల వరకు ఐరోపా ను౦డి సంక్రమి౦చిన ఆధునిక కథా ప్రక్రియ మరోచెంప భారతీయ కథా సంస్కృతిని అనాదిగా పరిపుష్టం చేస్తూ వస్తున్నాయని కోవెల ప్రసన్నాచార్య , జగన్నాధ శర్మ వంటి ఎంతోమంది చెప్పగా వింటున్నాం.

గురజాడ ‘దిద్దుబాటు’  మొదలు పాలగుమ్మి ‘గాలివాన’ వరకు …. సామాజిక , వర్గ ప్రయోజనాల కోసం రాస్తున్న నవ చైతన్య కధల వరకూ తెలుగు కథ ఖండాంతరాలకు విస్తరించింది . కథకు ఆలోచన రూఫుదిద్దుకోవడానికి వెనుకున్న ప్రేరణ ఏమిటి ? సమాజ౦పై  చెరగని ముద్ర వేస్తున్న కథలు ఎలా పుడుతున్నాయి . ఆ కథల్లో నిజమెంత ? కల్పన ఎంత ? వైవిధ్యమున్న గొప్ప కథలు ఎలా ఫుట్టాయి ? అనే విషయాల్ని కధకుల స్వీయ విశ్లేషణలతో అక్షరీకరించాలనే తానా ప్రచురణల సంకల్పానికి అక్షరరూపమే 900 పేజీల  ‘కథ నేపధ్యం’ ఒకటీ , రెండూ భాగాలు.

గత యేడాది జనవరిలో 25 మ౦ది కథలు నేపధ్యాలతో ‘కథ నేపధ్యం -1’ వెలువడగా,ఇప్పుడు తాజాగా ‘కథ నేపథ్యం -2’  విడుదలైంది .35 మ౦ది రచయితల కథలు ,నిజజీవిత౦లో ఉన్న ఆ కథలోని పాత్రలు, రచయితలు ఎలా ప్రేరణ పొందారు . దాని సామాజిక ప్రయోజన౦ ఏమిటి ? అనే అంశాలిందులో ఉన్నాయి. శ్రీకాకుళం జిల్లా రచయిత అట్టాడ అప్పల్నాయుడు నాగావళి కధ ‘భధ్రయ్య ‘ , కరీ౦నగర్ జిల్లా రచయిత అల్లం రాజయ్య కథ ‘మనిషిలోని విధ్వంసం’ కథల్లో బాధితులు భధ్రయ్య , రాజారాంలకు రచయితలు చూపిన దిశానిర్దేశం పోరాటమే ! భధ్రయ్య పిడికిలి బిగించి ఊరేగింపులో కలిసిపోతే , కొడుకు ఆత్మహత్యను చూసి భరించలేక రైతుబిడ్డ రాజారాం నడిచెళ్ళి చౌరాస్తాలో కూలబడిపోతాడు.( అందులో ఒకటి  రామగిరి అడవికి పోయేదారి ).

లైంగికహింస భరించలేక పెళ్ళయిన రెండు నెలలకే పరాయిదేశంలో భర్తను హతమార్చిన భార్య దీపిక కథ ‘పరివర్తన’  వాస్తవఘటన ఆధారంగా అరె సీతారామయ్య రాసిన కథ . ఎక్కడైనా స్త్రీ సమస్య ఒక్కటే అంటారాయన – అంతర్గత సంఘర్షణ అనంతరం నమాధానపడి మానవపరమార్ధాన్ని గ్రహించి వాస్తవ ప్రపంచ౦లోకి వచ్చిన నళిని కథ ‘గుర్తు’  అంతర్గత నేపధ్యాన్ని వివరించే అర్.వసుంధరాదేవి కథ ఇది. ఎందరో స్త్రీల జీవితాల్లో జరిగిన యథాతథ ఘటనలకు కథారూపం ఆర్.ఎమ్.ఉమామహేశ్వరరావు ‘ఒంటేపమాను’ఓ సమూహానికి ప్రతినిధిగా బతికిన చెంచేలమ్మ కథ ఇది. సామరస్యానికీ , సౌందర్యానికీ ప్రాధాన్యమిచ్చే స్త్రీకి, విధ్వంసాన్ని, ఘర్షణను ఆశ్రయించే పురుషుడికి మధ్య సంబంధాలను చెప్పే కుప్పిలిపద్మ కథ ‘వనమాల’.  ఇలా ఇందులో కథలు పఠితలో మానసిక చైతన్యాన్ని సమకూర్చే౦దుకు దోహదం చేస్తాయి.

-లలితా త్రిపురసుందరి , నవ్య వీక్లీ , 17 సెప్టెంబర్ 2014 .

KadhaNepadyam2@NavyaWeekly_17Sep2014

“కథ నేపథ్యం -2” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కథ నేపథ్యం -2 on kinige

KathaNepathyam2600

Related Posts:

ఆశావాదమే జీవనవేదం

వివిధ పత్రికలలో ప్రచురించబడిన ఇరవై కథానికలు ఈ పుస్తకంలో ఉన్నాయి. జీవితాన్ని వేర్వేరు కోణాలలో పరిశీలించి విశ్లేషించటం ఇందులో చూడవచ్చు. పుస్తకానికి ముందుమాట రాస్తూ డా.వేదగిరి రాంబాబు ‘మానవ సంబంధాలమీద రచయిత్రికి గట్టి నమ్మకం ఉందని, నిర్మలమైన ప్రేమతో అవి నిలబడతాయని రచయిత్రి గాఢంగా నమ్ముతున్నారని’ అన్నారు. పరిచయాలు వేరు, స్నేహాలు వేరు, ప్రేమలు వేరు, అవసరానికి సహాయ పడటం వేరు- దేని స్థానం దానిదే. అది తెలుసుకోకుండా ఒక దానిని మరొకటిగా భావించినప్పుడు సమస్యలొస్తాయి. ఈ సత్యాన్ని తెలియజేసేదే ఈ పుస్తకంలోని ‘పగటి కల’ కథ. దుర్మార్గంగా వ్యవహరించటం అనేది పరిస్థితులనుబట్టి ఉంటుందని, దానికి ఆడా, మగా అన్న తేడా ఉండదనీ ‘జాతర’ కథ సూచిస్తుంది. ఈ కథ ముగింపులో ‘పురుషులవల్ల స్ర్తిలు బాధలు పడుతున్నారన్నది ఎంత నిజమో, అదే విధంగా ఒక కోణంలోంచి గమనిస్తే పురుషులు కూడా స్ర్తిల మూలంగా ఎంతో నరకం అనుభవిస్తున్నది కూడ నిజం’ అని రచయిత్రి చెప్పటం ఆలోచించతగ్గది. జీవితాన్ని విశ్లేషిస్తూ ఆశావాద దృక్పథం అవసరమని తెలుపుతుంది ‘పిచ్చుక గూళ్లు’ కథ. ‘అడ్డా’ కథ కార్మికుల జీవన పోరాటాన్ని సమస్యలతో సర్దుకపోవటాన్ని తెలుపుతుంది. ‘చచ్చి సాధించేది ఏదీ లేదు. సమస్యలను ఎదుర్కోవాలి. బతుకు పోరాటం కొనసాగించాలి’ అనే ఆశావాద వైఖరిని ‘జీవితానికి ఆవలి గట్టున’ కథ ఉద్బోధిస్తుంది.

ఎం.వి.శాస్ర్తి , ఆంధ్రభూమి అక్షర పేజి, 13/07/2013

* * *

“అడ్డా” పుస్తకం డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.
అడ్డా On Kinige

Related Posts:

హృదయాన్ని కదిలించిన కథలు

మొత్తం 30 కథల్ని కూర్చి ‘శాలువా‘ పేరుతో అచ్చు వేయించారు. భాష, శైలి, భావం ఈ కథల్లో పొదిగారు. కథల్ని ఉపోద్ఘాతంతో మొదలెట్టటం ఆయనకు అలవాటు. అది ఆయన ఎత్తుగడ. వస్తుపరమైన గుణవిశేషంతో పాటు శిల్పం కూడ ప్రాధాన్యం సంతరించుకుంది.
కథ రాయగానే సరికాదు. సందేశం ఉండాలి. అప్పుడే దానికి విలువ పెరుగుతుంది.
కవి, రచయిత సమాజంలోని కుళ్ళు కుతంత్రం, మూఢనమ్మకాలు, అవినీతి వంటి అంశాల మీద దృష్టి సారించి వాటి నిర్మూలనకు తమ వంతు కృషి చేయాలి. అదే చేసారు పిడుగు పాపిరెడ్డి గారు. ఒక్క మాటలో చెప్పాలంటే పిడుగుల్లాంటి కథలు పాఠకులకు అందించారు కవి. పల్లె తనాన్ని పల్లె భాషలోనే చెప్తేనే రక్తికడుతుందనడానికి ఈ కథలే తార్కాణం.

తూములూరి రాజేంద్రప్రసాద్
చిత్ర సకుటుంబ సచిత్ర మాసపత్రిక జూలై 2013

* * *

“శాలువా” కథాసంపుటి డిజిటల్ రూపంలో కినిగెలో లభిస్తుంది. మరిన్ని వివరాలకు ఈ లింక్‌ని అనుసరించండి.
శాలువా On Kinige

Related Posts:

అమెరికాలో జీవనం.. అనుభూతుల సారం

ఆ నేల, ఆ నీరు, ఆ గాలి అన్ని నవోదయ షాపుల్లోనూ లభిస్తుంది వెల: రూ.80, కినిగే.కామ్‌లో కూడా దొరుకును. అరవై, డెబ్భై దశాబ్దాలలో అమెరికాకు ప్రవాసం వెళ్ళిన అతి కొద్దిమంది భారతీయుల్లో వేలూరి వెంకటేశ్వరరావు ఒకరు. అక్కడికి వెళ్ళినా మన జన్మభూమిని, అమ్మ భాషనీ మరిచిపోక, తెలుగులో కథలు రాస్తున్న వారు కొద్దిమందిలో ఒకరు. ఇలా ఎందుకన్నానంటే ఈ రోజుల్లో అమెరికా వెళ్ళినవారు తెలుగునే మరిచిపోతున్నారు, ఇక కథలు రాయడం కూడానా? అందుకే వెంకటేశ్వరరావుగారి కృషిని ముందుగా అభినందించాలి. అమెరికాలోనే కాదు, భారతదేశంలో ఉండి కూడా తెలుగును మరచిపోతున్న వారెందరో! మరొక మాట ఏమంటే- ప్రతి ఒక్కరి నోటా వినే ఒకే ఒక మాట ‘టైం లేదండీ’ అని. నిజమే అందరికీ ఉరుకుల పరుగుల జీవితమే కానీ అందులోంచి కొద్ది సమయాన్ని సాహిత్యం కోసం కేటాయించాలంటే ముందస్తుగా భాషపైనా సాహిత్యం పైనా ప్రేమ, అభిమానం ఉండాలి. ఇవి కలిగినవారు కనుకనే వెంకటేశ్వరరావుగారు ఈరోజు ఈ-మాట అనే వెబ్ పత్రికకి డెబ్భై ఏళ్ళ వయసులో కూడా తరగని హుషారుతో సంపాదకత్వం వహిస్తూ ఉండటం ఆయనకి తెలుగు భాష పట్ల మమకారాన్ని చాటుతోంది. గత ఏభై ఏళ్ళలో తను రాసిన కథలన్నిటినీ పుస్తకంగా తీసుకురావడం చాలా ముదావహం. అమెరికా జీవితాన్ని దాదాపు నాలుగు దశాబ్దాలపైనే అనుభవిస్తూ, అక్కడే స్థిరపడినవారు వెంకటేశ్వరరావు దంపతులు. ముందుమాటలో రచయిత అమెరికా స్టైల్‌లోనే ఒక మాట అన్నారు. కథ చదవగానే ‘వావ్’ అనిపించాలని. నిజమే- కొన్ని కథలు చదివాక నాకలాగే అనిపించింది. పాఠకులకు కూడా అనిపిస్తుంది అనడంలో అతిశయోక్తిలేదు. కానీ అన్ని కథలు చదివించేలా లేవు. కొన్ని సింప్ల్ నేరేషన్‌లా అనిపిస్తాయి. అయినా అమెరికా జీవితానికి, అప్పటి రోజుల్లో ఉన్న స్థితిని కొంత ఆవిష్కరించడం కొన్ని కథల్లో బాగుంది. ఉదాహరణకి ‘గోమేజ్ ఎప్పుడొస్తాడో?’’, ‘మేటామార్పాసిస్’ లాంటి కథలు. అక్కడి జీవన విధానాన్ని మాత్రమేకాక గోమేజ్ అనే వ్యక్తిలోని నిజాయితీని ప్రతిబింబించే ఆ కథ తప్పక ఆకట్టుకుంటుంది. మేటామార్పాసిస్ ఫ్రాంజ్ కాఫ్కా శీర్షిక తీసుకున్నా ఈ కథను మలచిన కథనం బాగుంది. రంగనాథం అమెరికా వెళ్ళిన కొద్దిరోజులకు ఎలా ఎంతగా మారాడో చెప్తూపోతే ఇదేమీ గొప్ప కథకాదు కానీ ఆఖరిలో ఎంత మారినా అవసరం కొద్దీ తన ఆహారపు అలవాట్లుమారవు- మన భారతీయుడికి ముఖ్యంగా తెలుగువాడికి అని చెప్పడం ఈ కథలో పంచ్. ప్రముఖ కథకుడు వాసిరెడ్డి నవీన్ తన మాటలో వ్యంగ్యం వెంకటేశ్వరరావుగారి కథకు చిరునామా అన్నారు. అది నిజమే. ప్రతి కథలోనూ ఒక వ్యంగ్యం. ఆంగ్లంలో ఐతే ‘‘టాంగ్ ఇన్ చీక్’’ కామెంట్ అంటాము. అలా కథనంలోనే ఇమిడిపోయే వ్యంగ్యం పాఠకులని చదివిస్తుంది. ‘‘స్వర్గంలో స్టిప్ టీజ్’’ కథ చాలా హాస్యస్ఫోరకంగా ఉంది. ముఖ్యంగా పుస్తకం టైటిల్ కథ- ‘‘ఆ నేల, ఆ నీరు, ఆ గాలి’’ పురాణ పాత్రలైన సీతారామ లక్ష్మణులు వనవాసంలో గోదావరి కృష్ణ దాటుతున్న సమయంలో సీత, లక్ష్మణుడు రాముడిని ఎదిరించడం, పెన్నా దాటగానే మళ్ళీ అతడి కాళ్లకు మొక్కి మన్నించమని కోరడం- మనల్ని నవ్వించినా, రాముడు వ్యాఖ్యలో- ‘ఆ నేల, గాలి, నీరు మహిమతో అక్కడివారు గొడవ పడకుండా ఉండరు’ అనడం కొంచెం ఆగ్రహం తెప్పించవచ్చు ఆయా ప్రాంతాల వారికి. నవ్వేసుకుంటే ఈ కథ బాగానే ఉంటుంది. ఇక కథనంలో రచయత చేసిన ప్రయోగాలు కథాచిత్రాలుగా ఆయన రాసిన ప్రక్రియ నేటి చదువరులకి ఇష్టంగా ఉండవచ్చు. కొన్ని నాస్టాల్జియా కథలు ప్రవాసుల్లో తప్పవు మరి. వారి తెలుగు మాస్టారి గురించి ఆయన వెలిబుచ్చిన గౌరవం చాలా ప్రశంసనీయం. రచయత తన జీవిత భాగస్వామి శాంతిగారికి అంకితమిచ్చారు ఈ పుస్తకాన్ని. సీరియస్ పాఠకుడికి ఇందులో ఏమీలేదు గానీ, లైట్ రీడ్‌గా పనికొచ్చే పుస్తకం అని చెప్పవచ్చు.

జగద్ధాత్రి, 30/03/2013 నాటి ‘అక్షర పేజి’

* * *

కినిగె వెబ్ సైట్ ద్వారా ప్రింట్ బుక్‌ని తగ్గింపు ధరకి తెప్పించుకోవచ్చు. మరిన్ని వివరాలకు ఈ క్రింది లింక్‌ని అనుసరించండి.

ఆ నేల, ఆ నీరు, ఆ గాలి On Kinige

Related Posts:

చందనపు బొమ్మలే

వందేళ్ల తెలుగు కథల్లో నుంచి, ఆ రచయితల నుంచి స్వీకరించవలసినవీ పరిహరించవలసినవీ విజ్ఞతతో గ్రహించిన యువ రచయితలు ఇప్పుడు వస్తున్నారు. తమదైన తాత్విక దృక్పథంతో జీవితాన్ని పరిశీలించి దానికి తగిన శైలిలో రచనలు చేస్తూ వర్తమాన కథను వెలుగుదారిలో నడిపిస్తున్న వీళ్ల సంకలనాలు తెలుగు కథకు ఉజ్వల భవిష్యత్తును వాగ్దానం చేస్తున్నాయి. అరుణ పప్పు కథా సంపుటి ‘చందనపు బొమ్మ‘ ఈ కోవకు చెందినదే. ఇందులోని పది కథల్లో తొమ్మిది శిల్పపరంగా ఉత్తమ పురుషలో చెప్పినవి. వీటిలో కనిపించే ‘నేను’ ఒక విద్యావంతురాలూ ఉద్యోగినీ అయిన యువతి. వృత్తిరీత్యా సమాజంలో రకరకాల మనుషులను కలుసుకునే అవకాశమూ అవసరమూ ఉన్న జర్నలిస్టు. ముందుతరపు స్త్రీల పోరాటాలు సాధించిన హక్కులు, అవకాశాలను అందిపుచ్చుకుని ఆత్మగౌరవంతో తమ పనులకు తాము బాధ్యత వహించే యువతులు ‘నేను’ అంటూ ఈ కథల్లో మనకు కనిపిస్తారు. జర్నలిస్టులు కాకపోయినా దీప, పూర్ణ, మృణ్మయి, లాలిత్య వంటివాళ్లు వివేకవంతులు, ఆలోచనాపరులు, జీవన ప్రేమికులు. లోపల ఉండవలసిన సున్నితత్వాన్నీ సంవేదనలనూ కాపాడుకుంటూనే అవసరమైన చోట నిర్భయంగా నిలబడతారు. ఈ కథలన్నిటిలో వ్యక్తుల మధ్య సంబంధాల్లోని రకరకాల ఛాయలు, మానసిక సంఘర్షణలు ప్రధానంగా కనిపిస్తాయి. మంచి కథకు క్లుప్తత, అనుభూతి ఐక్యత, సంఘర్షణ, నిర్మాణ సౌష్టవం అనే నాలుగు లక్షణాలూ ఉండాలని అంటారు విమర్శకులు వల్లంపాటి వెంకటసుబ్బయ్య. ‘చందనపుబొమ్మ’లోని కథలన్నిటిలోనూ అవి ఉన్నాయి. కథలకు నేపథ్యంలో రచయిత్రి అద్దిన రంగులు వాటిని పరిపుష్ఠం చేశాయి. ‘ఏకాంతంతో చివరిదాకా’లో కొండప్రాంతపు వర్ణన, ‘ఒక బంధం కావాలి’లో సముద్రతీరాన సూర్యోదయం, ‘భ్రమణకాంక్ష’లో కథానాయకుడి అనుభూతులు – ఇవన్నీ అలాంటి కొన్ని అందమైన రంగులు. తెలుగు భాషను చక్కగా ఉపయోగించే సామర్థ్యమున్న రచయిత్రి ఇంగ్లీష్ పదాలను, వాక్యాలను అత్యవసరమైతే తప్ప వాడకుండా ఉంటే బాగుంటుంది. ‘చందనపుబొమ్మ’తో తమ ప్రచురణలను ప్రారంభించిన రాష్ట్ర కథానిలయం నందలూరువారు ప్రతి ఏడూ ఇలాంటి ఒక యువ కథాగుచ్ఛాన్ని అందిస్తారని ఆశిద్దాం.

పి. సత్యవతి
ఆదివారం ఆంధ్రజ్యోతి, 7 ఏప్రిల్ 2013

* * *

“చందనపు బొమ్మ” డిజిటల్ రూపంలో కినిగెలో లభిస్తుంది. కినిగె వెబ్ సైట్ ద్వారా ప్రింట్ బుక్‌ని తగ్గింపు ధరకి తెప్పించుకోవచ్చు. మరిన్ని వివరాలకు ఈ లింక్‌ని అనుసరించండి.

చందనపు బొమ్మ On Kinige

Related Posts:

చారిత్రక యానాం కథలు

ఇవి యానాం కథలు. వంతెన అవతల 1947 ఆగస్టు 14 అర్ధరాత్రి తారాజువ్వలు ఆకాశంలో వెలుగులు జిమ్ముతుంటే వంతెన ఇవతల చీకట్లో మూగగా నిలబడిపోయిన ఫ్రెంచి వలసలోని తెలుగు ప్రజలు… నోరొచ్చి ఇన్నాళ్ళకు చెప్పుకున్న కతలు. సాహిత్యం కూడా చరిత్ర ఖజానానే అనుకుంటే… దాట్ల దేవదానం రాజు ‘యానాం కథలు’ చారిత్రక గనేనని చెప్పాలి. చరిత్ర రచనలో చిక్కటి భావుకత్వం కలగలిస్తేనే ఇలాంటి కథలు తయారవుతాయనిపిస్తుంది.

ఫ్రెంచి వలసల్లో బతుకు సాపేక్షంగా బ్రిటిష్ వలసలకన్నా మెరుగేననేది ఈ సంపుటిలోని 18 కథలు చదివాక అర్థమయ్యే విషయం. దోపిడీ లేదని కాదు గానీ, స్థానిక సంస్కృతులు, సంస్కారంపై చిన్నచూపు లేదని కాదు గానీ, యానాం జనజీవనంలోని వైవిధ్యాన్ని మాత్రం చెదరగొట్టలేదు ఫ్రెంచి దొరలు. ప్రపంచంలోనే గొప్ప పౌర సమాజానికి ప్రతినిధులమన్న అభిజాత్యం వారి పాలనలోనూ, వ్యవహార, వ్యక్తీకరణల్లోనూ కనిపిస్తుంది. మనసుపడిన యువకుడితో గడిపేందుకు తన భార్యను అనుమతించిన పాల్ షెల్జ్‌లో (కథోర్‌జియ్) కనిపించేది ఈ అభిజాత్యమే. ప్రేమించిన కామాక్షి కోసం యానాంలోనే ఉండిపోవాలని రొబేర్ నిర్ణయించుకోవడం (లా’మూర్’) అలాంటి వ్యక్తీకరణే. తోటి బ్రిటిష్, డచ్ అధికారుల సాంగత్యంతో పొగరుగా వ్యవహరించిన ఒకరిద్దరు పౌర అధికారులు మినహాయిస్తే, చాలావరకు యానాంతో ఏదో ఒక సంబంధంలోకి వచ్చినవారే.

ఈ మినహాయింపు యానాంలోని బ్రాహ్మణ కులానికీ వర్తిస్తుంది. ఫ్రెంచి పాలన పట్ల పట్టింపుతోనూ, వంతెన అవతలి బ్రిటిష్ వలస పాలనలోని ఎదుర్లంకలో రెక్క విప్పిన ఆధునికత, జాతీయోద్యమం పట్ల మమేకతతోనూ ఉన్న కులమది. దొర బంగ్లాపై జెండా ఎగరేసిన బాపన్న, జంధ్యం తెంపిన దొరపై తిరుగుబాటు లేవదీసిన వెంకటయ్య (తీర్పు వెనుక), ఆధునిక విద్యలు నేర్చుకుని బతుకును మెరుగుపరుచుకున్న రామశాస్త్రి (మండువా లోగిలి)… ఈ ప్రభావాలకు ప్రతినిధులే.

తెలంగాణ ఉద్యమం నేపథ్యంలో ఈ కథలకు గొప్ప ప్రాసంగికత ఉండడం మరో ప్రత్యేకత. తెలుగు మాట్లాడేవారికి రెండు రాష్ట్రాలు ఉండడం తప్పా అనేది ప్రాంతీయవాదుల ప్రశ్న. కానీ, అలా జరిగితే రెండు కాదు, మూడు ప్రాదేశిక సరిహద్దుల్లో తెలుగు ప్రజలు జీవించాల్సి ఉంటుంది. ఎందుకంటే, గత అరవై ఏళ్ళుగా యానాం విడిగానే ఉంది. అలా ఉండడం ద్వారానే సాంస్కృతికంగా, సామాజికంగా, చారిత్రకంగా తమ ప్రాంతానికి ఉన్న ప్రత్యేకతను కాపాడుకోగలమని మెజారిటీ యానాం ప్రజలు భావిస్తున్నారు. నాలుగు కూడళ్ళ మధ్య నిలబడి ఈనాడు తెలంగాణ కోరుతున్నదీ ఇదే కదా!

వి. అరవింద్
ఆదివారం అనుబంధం, ఆంధ్రజ్యోతి దినపత్రిక, 24 మార్చి 2013

* * *

“యానాం కథలు” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ లింక్ చూడండి.

యానాం కథలు On Kinige

Related Posts:

మాస్టర్ స్టోరీటెల్లర్ -వల్లంపాటి వెంకటసుబ్బయ్య

ప్రముఖ రచయిత, విమర్శకుడు, అనువాదకుడు అయిన వల్లంపాటి వెంకటసుబ్బయ్య కథలపై సాక్షి దినపత్రికలో “ఒక కథావిమర్శకుడి తొలి అడుగుజాడలు” అనే శీర్షికతో వెలువడిన సమీక్ష ఇది.

* * *

కథలు ఎలా రాయాలో కథాశిల్పం అంటే ఏమిటో అని పుస్తకాలు రాసిన వల్లంపాటి వెంకటసుబ్బయ్య కథలు ఎలా ఉంటాయి అనే కుతూహలం పాఠకులకు రావడం సహజం. వాటిని చదవాలని ఆశపడటమూ సహజం. అయితే మంచి తేయాకు ఏదో ఆ తేయాకు నుంచి మంచి డికాక్షన్ వస్తుందో రాదో పరీక్షించి చెప్పే నిపుణుడికి తేయాకు పండించడం తెలియకపోవచ్చు. బహుశా వల్లంపాటి ఈ ఎరుకతోనే కథలు రాయడం మానేశారా? లేదా సృజనలో నిమగ్నమైతే తానొక్కడే లబ్ధి పొందుతాడు… సృజన కోసం ప్రయత్నించేవాళ్లకు సహాయకారి కాగలిగితే అనేకమందికి ఉపయోగపడతాడు అనే సూత్రం కనిపెట్టడం వల్ల కథాసృజనను వదిలిపెట్టి కథావిమర్శను స్వీకరించారా?

ఏమైనాగాని ఆయన చనిపోయిన రెండుమూడేళ్లకు ఆయన కథలన్నీ ‘వల్లంపాటి కథలు’గా రూపుదాల్చడం చాలామంది పాఠకులకు సంతోషం కలిగించే విషయం. అసలు వల్లంపాటి ఇన్ని కథలు రాశారా అని ఆశ్చర్యపోయే నేటి తరం రచయితలు కూడా ఉన్నారు. 1958లో కథలు రాయడం ఆరంభించిన వల్లంపాటి 1970ల వరకూ కథలు రాసినట్టున్నారు. ఆ తర్వాత రాయలేదు. ఈ కథలన్నింటిని పరిశీలిస్తే వీటిలో కూడా ఆ రోజుల్లోని కథల ధోరణి, పేదరికం, మధ్యతరగతి విలువలు, రచయిత తననుతానే రచయితగా ప్రధానపాత్రగా ప్రవేశపెట్టి రాయడం వంటివి కనిపిస్తాయి. రాసిన ప్రతి కథా ఏదో ఒక సమస్యను చూపడానికి ఏదో ఒక విలువను ప్రతిపాదించడానికి ఏదో ఒక పతనాన్ని సూచించడానికి ప్రయత్నించడం అర్థమవుతుంది. అదే సమయంలో దృక్పథం అంటూ ఏమీ లేకుండా కలం నుంచి జారిన కథలు కూడా లేకపోలేదు. అందుకే వీటిని వల్లంపాటి ప్రామాణికమైన రచనలుగా ఎంచకుండా తొలి అడుగుజాడలుగానే చూడాలి. అందుకనే ఏమో తాను జీవించి ఉండగా, వీటి అవసరం ఉందా లేదా అనే సంశయంతో వల్లంపాటి వీటిని పుస్తకంగా తెచ్చి ఉండరు.

కాని- కథాపాఠకులు, మరీ ముఖ్యంగా కథారచయితలు ఈ కథలను తప్పక చదవాలి. ఒకకాలపు జీవితం గురించి తెలుసుకోవడానికి కథాపాఠకులు, ఒక రచయిత/విమర్శకుడు కథారచనను సాధన చేసిన పద్ధతిని ఆ పద్ధతిలో అతడి జయాపజయాలను అర్థం చేసుకోవడానికి కథా రచయితలు ఈ పుస్తకాన్ని చదవాలి.

వల్లంపాటి ఈ సంకలనంలో కచ్చితంగా కొన్ని కథలతో గాఢమైన ముద్ర వేసే ప్రయత్నం చేస్తారు. ‘రానున్న శిశిరం’ వంటి కథల్లో తన చేయి తిరిగిన రచనాశైలితో ఆశ్చర్యం గొలుపుతారు. కథకు అవసరంలేని వృధావర్ణనలు, వృధా సంఘటనలు కథలో ఉండరాదు అని నమ్మిన వల్లంపాటి తన కథలన్నింటిలోనూ ఆ సూత్రాన్నే పాటించారనిపిస్తుంది. స్ట్రయిట్‌గా పాయింట్‌లోకి దిగడం చూడవచ్చు.

అయితే ఇవి ఇప్పుడు ఔట్ డేటెడా?
మధ్యతరగతి ఉన్నంతకాలం మధ్యతరగతి గురించి రాసిన ఏ కథా ఔట్‌డేటెడ్ కాదు. కాకపోతే కాసింత మేకప్ మార్చుకొని మళ్లీ మళ్లీ కనిపిస్తుంటుందంతే. ఆ సంగతి అటునుంచితే- ప్రతి రచయితా చేసిన కృషి రికార్డు కావాల్సిందే. ఆ మేరకు వల్లంపాటి కథలకు సంబంధించి ఈ సంపుటి ఒక నాణ్యమైన రికార్డు. రాయలసీమ భాషకు, జీవితానికి దర్పణం లాంటి నవలను రాయాలన్న కోరిక తీరకుండానే వెళ్లిపోయిన వల్లంపాటి తన కోరికను తీర్చుకోలేకపోవడం ఒక లోటైతే అలాంటి ఎన్నో కలలు కనే సాహిత్యకారులకు స్ఫూర్తిగా వారిని ప్రోత్సహించే శక్తిగా ఉండి వారి కలలు సాకారం కావడానికి ప్రయత్నించిన ఆయన ప్రెజెన్స్ లేకపోవడం చాలా పెద్ద లోటు. పుస్తకం ప్రింటింగ్, క్వాలిటీ చాలా బాగున్నాయి.

కె.సువర్చల

“వల్లంపాటి వెంకటసుబ్బయ్య కథలు” పుస్తకం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.
వల్లంపాటి కథలు On Kinige

Related Posts:

ఎవరికి తెలియని కథలివిలే? (“చందనపు బొమ్మ” – సమీక్ష)

పప్పు అరుణ రాసిన కథల సంకలనం “చందనపు బొమ్మ” పై గ్రేట్ ఆంధ్రా. కామ్ వారి సమీక్ష నుంచి… కొన్ని భాగాలు.

* * *

మన చుట్టూ చాలా సమాంతర ప్రపంచాలు ఉంటాయి. వాటిలోకి మనం తొంగి చూస్తే అనేక ఆశ్చర్యకరమైన విషయాలు కనిపిస్తాయి. మన చుట్టూ ప్రతి రోజు కనిపించే మనుషుల్లోనే కొత్త కోణాలు ఆవిష్కృతమవుతాయి. అలాంటి కోణాలను స్పృశిస్తూ వెలువడిన ఒక కథాసంకలనమే ‘చందనపు బొమ్మ’.

ఈ మధ్యకాలంలో తెలుగుకథలలో పూర్తిస్థాయి తెలుగువాడుక తగ్గుతూ వస్తోంది. తెలుగులో పదాలున్న భావాలకు కూడా ఇంగ్లీషు పదాలను ఉపయోగించడం సామాన్యమైపోయింది. ఈ కథలలో స్వచ్ఛమైన తెలుగు కనిపిస్తుంది.

మంచి తెలుగు కథలు కావాలనుకొనేవారు చదవాల్సిన సంకలనమిది.

సమీక్ష పూర్తి పాఠానికి ఇక్కడ నొక్కండి.

* * *

“చందనపు బొమ్మ” డిజిటల్ రూపంలో కినిగెలో లభిస్తుంది. కినిగె వెబ్ సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.
చందనపు బొమ్మ On Kinige

Related Posts:

ప్రత్యక్ష సంఘటనలకు అక్షర రూపం (అడ్డా పుస్తక సమీక్ష)

ఈ పుస్తకంలో ఏ కథానిక చదివినా రచయిత్రి తానెగిరిన, కళ్ళెదుట చూసిన సంఘటనలకు అక్షర రూపమిచ్చినట్లు స్పష్టంగా కనిపిస్తుంది. సమాజం, వ్యవస్థ – గాడి తప్పుతోందనే ఆవేదన, మనుషులు అత్యాశలకి పోయి నిండు జీవితాలని బలి పెట్టుకుంటున్నారనే ఘోష పుట పుటలోనూ కనిపిస్తాయి. వాస్తవిక ఆలోచనలకు ప్రతిరూపం “ప్రేమ శిఖరాల మీద” కథ అయితే, స్త్రీకి ఉండే చట్టాన్ని దుర్వినియోగం చేసుకుని భర్తని, అత్తగారిని జైలుపాలు చేసే కథ “జాతర”. సామాజిక దృక్కోణం, అవినీతి, అన్యాయం, కునారిల్లుతున్న అనుబంధాలు, వంచన, అవహేళన….. ఇలాంటి వాటికి వ్యతిరేకమైన భావన ఈ రచయిత్రి ప్రతీ కథానికలోనూ కనిపిస్తుంది.
ఇన్ని ఉండబట్టే వేదాంత తత్వం ఆమెలో “బతుకు ఒక కలైతే….?” అనే కథని రాయించిందని ఇట్టే తెలిసిపోతుంది.
మనిషి ప్రాపంచిక సుఖాల కోసం అత్యాశాలకు పోతూ, స్వార్థంతో ద్వేషాన్ని పెంచుకుని, తమ గోతిని తామే తవ్వుకుంటారనే వాస్తవాన్ని కల ద్వారా కళ్ళకు కట్టినట్లు చూపించారు రచయిత్రి. అంతే కాదు – కల గన్న పాత్ర మేల్కొని, తమ తప్పు తెలుసుకుని, జీవితాన్ని మార్చుకోవాలనుకోవడం రచయిత్రి మనోభావాలని, భావోద్వేగాన్ని పాఠకులు గ్రహిస్తారు. రోడ్డు మీద పోతూ, మనకి కలిగే అనుభవాలని, సంఘటనల్ని గుర్తు చేస్తూ, వాటికి ఆశావహ దృక్పథంతో చెప్పే ముగింపు ప్రతి కథానికలోనూ మనల్ని ఆలోజింపచేస్తాయి.

కాటూరు రవీంద్ర త్రివిక్రమ్ (చిత్ర మాసపత్రిక, అక్టోబరు 2012 సంచిక నుంచి)

* * *

“అడ్డా” డిజిటల్ రూపంలో కినిగెలో లభిస్తుంది. కినిగె వెబ్ సైట్ ద్వారా ఆర్డర్ చేసిన్ ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

అడ్డా On Kinige

Related Posts:

మనిషికి ఉండాల్సిన ‘ మెలకువ’

ప్రముఖ కథా రచయిత్రిగా పి. సత్యవతి తెలుగు పాఠకులకు, సాహితీప్రియులకు సుపరిచితులు. ఆమె రచించిన ఓ పద్నాలుగు కథలే ఈ ‘మెలకువ‘. కథలన్నీ చిన్నవే అయినా వాటిల్లోని సారం గొప్పది. చిన్న సంఘటనల వెనుక దాగి ఉండే పెద్ద నిజాలు, సాధారణమైనవిగా వినిపించే సంభాషణల వెనుక పొంచి ఉండే మానవ ప్రవృత్తులూ ఈ కథల్లో దర్శనమిస్తాయి. వీటిల్లో ఎదురయ్యే మనుషుల్లో ఎక్కువ మంది- భూమి నుండి, గ్రామీణ పరిసరాల నుండి దూరమైన మొదటి లేదా రెండో తరం నగర జీవులు. త్వరితగతిన యాంత్రికమూ, సంక్లిష్ట భరితమూ, అమానుషమూ అవుతున్న నగర జీవనపు బాధితులు. అయితే ప్రధాన పాత్రలన్నీ కూడా తమ చుట్టూ పరుచుకున్న వలయాలని ఛేదించి ముందుకి సాగిన స్త్రీలవి. “జీవితం ఒక అనుదిన చర్యగా, స్వయంచరితంగా మారబోయే ప్రమాదఘంటికలు మోగబోయినప్పుడు చప్పున వాటిని సృజనతో ఆపాలి” అని సత్యవతిగారే స్వయంగా పేర్కొన్నారు. అందుచేత ఈ కథలన్నీ జీవితానికి బాగా దగ్గరగా, విశాలమైన సృజనాత్మక వనంలో సంచరిస్తాయి.

ఆస్తి పంపకాలు వెల్లడించే వాస్తవాలు (‘భాగం’), ఏం చేసినా (నోరున్న) ఆడవాళ్ళే చెయ్యాలనే నిజం (‘భారవాహిక’), ఇంట్లోని పరిస్థితుల్ని చక్కదిద్దుకోవాలంటే బయటకుపోయి గౌరవంగా పనిచేసుకోవాలనే స్త్రీల అవగాహన (‘కాడి’), మారుతున్న పరిస్థితుల్లో స్త్రీ పురుష సంబంధాల్ని పునర్నిర్మించుకోవాల్సిన అవసరం (‘ఆవిడ’), అర్థవంతమైన జీవితాన్ని, కనీసం అమెరికా ఆశయాన్నయినా సమర్థవంతంగా చేరుకోగల సామర్థ్యం, నైపుణ్యం కల్పించని నేటి చదువులు (‘ఒక రాణి – ఒక రాజా’)… ఇలాగే మరెన్నో కోణాలు. ఇక తలమానికమైన ‘మెలకువ’ కథలో- ఎన్నో సంవత్సరాలపాటు సాగిన సహవాసంలో, కాపురంలో ఏర్పడే మాటలకు అందని, మాటలు అక్కర్లేని పరస్పర అవగాహన, సమతుల్యాల్ని సున్నితంగా, హాస్యభరితంగా చిత్రీకరిస్తూనే- ‘పల్చని గాజుగోడలు’ పొరలుగా ఏర్పడకుండా ఉండాలంటే, జీవితాన్ని ఆస్వాదించాలంటే- నిత్యం మేల్కొని ఉండాలనే గంభీరమైన విజ్ఞతను కలగజేస్తారు రచయిత్రి. మనం అనవసరంగా వాడే కొన్ని ఇంగ్లీషు మాటల్ని చక్కని తెలుగులో ఎలా చెప్పుకోవచ్చో సత్యవతిగారు సూచిస్తారు : ‘చెక్క మొహం’, ‘చదివే కళ్ళజోడు’, ‘పిలిచే గంట’- ఇలాంటి పద ప్రయోగాల్లో.

చిన్న మాటల్లోనే పెద్ద విషయాలు చెప్పవచ్చనీ, వస్తువే శైలిని నిర్దేశిస్తుందనీ (‘ఆత్మలు వాలిన చెట్టు’, ‘నేనొస్తున్నాను..’) జీవితంలో ఏదీ కూడా పైకి కనిపించేటంత సరళంగా ఉండదనీ, స్వేచ్ఛ, ఆత్మగౌరవం కావాలంటే సంఘర్షణ తప్పదనీ ఈ కథలు మనకు తెలియజేస్తాయి. కథలన్నీ సెలయేరుల్లా గలగలా సాగిపోయినా వాటిల్లో నిశ్శబ్ద గంగానదీ ప్రవాహం లాంటి గాంభీర్యం ఏదో దాగి ఉన్నదనిపిస్తుంది. ఇందుకు కారణం బహుశా తీర్పు చెప్పే ధోరణిలో కాకుండా ఔదార్యం, కారుణ్యభావంతో, మనుషులంటే గౌరవంతో రచయిత్రి ఈ కథల్ని సృష్టించినందువలన కావచ్చు. జీవితాన్ని, తెలుగు భాషని, సాహిత్యాన్ని ప్రేమించేవాళ్ళు మాత్రమే కాక కొత్త గా రాస్తున్న వాళ్ళు, రాయాలని ఉత్సాహపడేవాళ్ళు కూడా సత్యవతిగారి ఈ కథల నుండి చాలా తెలుసుకోవచ్చు, నేర్చుకోవచ్చు. ముందుమాటలో శివారెడ్డిగారన్నట్టు ‘జడప్రాయ యాంత్రిక రచనా విధానాన్నించి రక్షించేది అధ్యయన అన్వయా లే”. ఇవి రెండూ ఈ కథల్లో మెండుగా కనిపిస్తాయి.

ఉణుదుర్తి సుధాకర్ (ఆదివారం ఆంధ్రజ్యోతి, 2 సెప్టెంబర్ 2012)

* * *

“మెలకువ” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్ చూడండి.
మెలకువ On Kinige

Related Posts: