‘మనసు పలికె’ సందేశాత్మక వినోదం

రాసిన ప్రతి కథలో సందేశాత్మకత జోడించి హాస్యస్ఫోరకంగా కథను అల్లే నేర్పు ఈ రచయితకు ఉగ్గుతో అబ్బిన విద్య. కథనంలోని చతురత పాఠకుడిలో ఆసక్తి రేకెత్తించి వదలకుండా చదివిస్తుంది. క్లుప్తత ఇంకో ప్లస్ పాయింట్. దీనివలనే కేవలం నాలుగేళ్లలో 40 పై చిలుకు కథలు రాయగలిగారేమో! వినోదపు సిరా నింపుకుంటే గాని కదలని కలం ఆయనిది. గతంలో వచ్చిన ‘కుడి ఎడమైతే’ హాస్య కథలకీ, ఈ సంపుటిలోని కథలకూ పెద్ద వ్యత్యాసం లేదు. రెంటిలోనూ మానవ ప్రవృత్తుల్లోని వైరుధ్యాలు, మనుషుల విభిన్న, వింత పోకడలే కనిపిస్తాయి.

‘పడమటిగాలి’లో పాశ్చాత్య సంస్కృతి మత్తులో ఊగిపోతూ వెర్రి పోకడలు పోయే ‘గణపతిశాస్త్రి’ కుటుంబాన్ని ఉదాహరణగా తీసుకుని, అతి సున్నితంగా, వ్యంగ్యంగా తనదైన బాణీలో వెక్కిరించారు. భార్యాభర్తల మధ్య పొడచూపిన పలచని పొరలాంటి ఘర్షణని కథాంశంగా తీసుకుని రాసిన కథ ‘మన (సే) శత్రువు’. ఈ కథనంలో స్వగతమే డామినేట్ చేసింది. ముఖ్యంగా ఇతివృత్తాల్లో ‘ప్రేమ’ స్వైరవిహారం చేయడం గమనార్హం. కాలేజీ ప్రేమల నేపథ్యాన్ని మనసు గిలిగింతలు పెట్టేలా చిత్రిస్తారు. ప్రేమ వ్యవహారాల్లో ప్రేమికులు విధిగా పాటించాల్సిన కొన్ని పద్ధతులు, మనసుని అదుపులో పెట్టుకోవడంలోని మెళకువలు ‘లవ్ మి లావణ్యా!’ లాంటి కథల్లో సూచిస్తూనే మరోవైపు దంపతుల మధ్య ఉండాల్సిన అవగాహన ప్రాముఖ్యతని ‘సంగమం’ లాంటి కథల్లో చెప్పారు.

ఇందులోని పదహారు కథలూ భిన్న పరిమళాలు వెదజల్లే రంగురంగుల పువ్వులు. ఒక పువ్వుని ఆఘ్రాణిస్తే చాలు కమ్మిన మత్తుతో మనకు తెలియకుండానే మరో పువ్వుకోసం పేజీని తిరగేస్తాం.

గొరుసు
(ఆదివారం ఆంధ్రజ్యోతి, 22 జూలై 2012)

* * *

మనసు పలికె ” డిజిటల్ రూపంలో కినిగెలో లభిస్తుంది. కినిగె ద్వారా ప్రింట్ పుస్తకం ఆర్డర్ చేసి తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మనసు పలికె On Kinige

Related Posts:

అదివో… అల్లదివో….

ఎం. వెంకటేశ్వరరావు రాసిన 25 కథల సంకలనం “అదివో…అల్లదివో…“. మధ్యతరగతి మనస్తత్త్వాలకు అద్దం పట్టిన కథలివి. ఆశలు, కోరికలు, ఆశయాలు, ఊహలు, వాస్తవాలు, మధుర స్మృతులు, బాధాజ్ఞాపకాలు…. ఇలా మధ్యతరగతి జీవితాలని అలవోకగా వ్యక్తీకరించిన కథలివి.

కుటుంబాలు ఎలా ఛిద్రమవుతున్నాయో, ఆర్ధిక విలువలు మానవత్వాన్ని ఎలా శాసిస్తున్నాయో చెప్పే కథలు చాలానే వచ్చినా, ఇందులోని కథలకు ఇతివృత్తం చాలా వరకు అదే అయినా, కథనం నూతనంగా ఉంది. ముగింపు వాస్తవికంగా ఉంది.

అమెరికాకి ఎగిరిపోయిన కొడుకుల స్వార్ధం లేదా భార్యల మాటల జవదాటలేని అసమర్ధ భర్తలు…. మౌనంగా బాధలు సహించే అత్తమామలు ఇలాంటి పాత్రలెన్నో ఇతర కథల్లో తారసపడతాయి. అయితే, ఈ సంపుటంలోని కథలలో బాంధవ్యాలని స్వార్థపూరితం చేసిన మనుషులకు అంతే ధీటుగా సమాధానం చెప్పే పాత్రలు తారసపడతాయి. చదువరుల మెప్పు పొందుతాయి.

తమ ముందు తరం ప్రతినిధులైన పెద్దలకూ నచ్చజెప్పలేక, తమ తర్వాతి తరమైన తమ పిల్లలకు సుద్దులు చెప్పలేక సతమతమయ్యే కుటుంబీకులెందరో ఉన్నారు. అందుకే ఈ పుస్తకంలోని కథలు వర్తమాన సమాజాన్ని ప్రతిబింబిస్తున్నాయని చెప్పచ్చు.

ఉద్యోగ విరమణ చేసి ఇంట్లో ఖాళీగా ఉంటూ అనవసరంగా డబ్బులు వృధా చేసే ఓ తండ్రికి కొడుకు కోడలు పడుతున్న అవస్థలు ఎలా అర్థమవుతాయి? కాలికి చిన్న దెబ్బతగిలితేనే, అవసరం ఉన్నా లేకపోయినా ఎక్స్ రే తీయించుకోవాలనుకున్న ఆ వ్యక్తి తన అమెరికా ప్రయాణాన్ని ఎందుకు మానుకున్నాడు? ఆపరేషన్ చేసినా బ్రతుకుతాడో లేదో తెలియని యువకుడికి సాయం చేయాలని అతనికి ఎందుకు అనిపించింది? ఇలాంటి సంఘటనలు మధ్యతరగతి జీవితాల్లోనే సాధ్యమవుతాయి. అందుకే ఈ కథలు చదువుతుంటే మన కథలు అనిపిస్తాయి.

చాలా కథల్లో మనుషుల్లోని లోపాలను ఎత్తి చూపినా అవే కథల్లో వాటిని ఎలా సరిదిద్దుకోవచ్చో ఆయా పాత్రల ద్వారా చెప్పిస్తారు రచయిత.

తన పైఅధికారి తన పై అకారణంగా ద్వేషం పెంచుకుంటున్నందుకు బాధపడిన ఓ ఉద్యోగి, ఛిన్నాభిన్నమైన జీవితాన్ని పునర్నించుకునేందుకు ప్రయత్నిస్తున్న ఓ మహిళ కూతురి పట్ల తాను కూడా అకారణంగా ద్వేషం పెంచుకుని ఆ పిల్లని అసహ్యించుకున్నట్లు గ్రహించగానే, తన తప్పు దిద్దుకుంటాడు. తనకెదురవుతున్న బాధ తన ద్వారా మరొకరు అనుభవించకూడదన్న జీవిత సత్యాన్ని అతను పాటించగలిగాడు.

విద్యార్థులు, ఉపాధ్యాయుల మధ్య ఉండాల్సిన పవిత్రబంధం సడలిపోతున్న తీరు, సమాజంలో వెర్రితలలు పోతున్న ఆధునిక పోకడలను కొన్ని కథలలో అద్బుతంగా వ్యక్తం చేసారు రచయిత. సంఘం ఇలా మారడంలో మన ప్రమేయం ఎంతవరకు అని పాఠకులు ప్రశ్నించుకోక మానరు.

ఈ సంపుటంలో చోటు చేసుకున్న రెండు రైతు కథలు కర్షక సోదరుల కష్టాలను, మౌన ఆక్రందనలను ఎలుగెత్తి చాటాయి. వ్యవస్థలో లోపమెక్కడా అని ఆలోచనలోకి దింపుతాయి. అన్నదాత వ్యథలెలా తీరుతాయోనని కించిత్ దిగులు కూడా కలుగుతుంది.

చివరగా, ఈ సంపుటానికి శీర్షిక అయిన “అదివో… అల్లదివో..” కథ గురించి చెప్పుకోవాలి. తిరుమల వెళ్ళాలంటే ఇప్పుడు సామాన్యలు ఎందుకు విముఖత చూపిస్తున్నారో ఈ కథ చదివితే అర్థం అవుతుంది. ఎన్ని అవకతవకలున్నా, ఇబ్బందులు పడుతున్నా, జనాలు ఇంకా ప్రతీ రోజు వేల సంఖ్యలో తిరుమల ఎందుకు వస్తున్నారో కూడా అర్థమవుతుంది.

మనుషుల్లోని నెగటివ్ లక్షణాలని ప్రస్తావించిన పాజిటివ్ కథలు ఇవి.

“అదివో…అల్లదివో…” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

అదివో… అల్లదివో! On Kinige

కొల్లూరి సోమ శంకర్

Related Posts:

అడ్డా (పుస్తక సమీక్ష)

ఆలోచనలను రేకెత్తించి, జీవితం పట్ల అవగాహనను పెంచి, ఆశావహ దృక్పథాన్ని కలిగించడం మంచి కథల లక్షణాలలో ముఖ్యమైనది. ఈ లక్షణం శైలజామిత్ర గారి ‘అడ్డా‘ కథానికల సంపుటిలోని కథలన్నిటిలోనూ ప్రస్పుటంగా కనిపిస్తుంది. వివిధ పత్రికలలో ప్రచురితమైన ఇరవై కథలు ఈ సంపుటిలో చోటు చేసుకున్నాయి. కొన్ని కథలు జీవితంలోని చీకటి కోణాలను ఆవిష్కరిస్తూనే, వెలుగునూ చూపుతాయి. అన్నీ హాయిగా చదివించే కథలే.
కూలినాలి చేసుకుంటూ గుడిశెల్లో బతుకీడ్చే వాళ్ళ మధ్య రోజూ చోటుచేసుకునే కీచులాటలు,గొడవలతో పాటు ఒకరిపట్ల ఒకరికున్న కనికరం అత్యంత సహజంగా చిత్రించబడిన కథానిక ‘అడ్డా’. పొద్దున్న తను పనిలోకి వెళ్ళడానికి అడ్డుపడిన గంగమ్మ బిడ్డలను, మధ్యాహ్నం తన ప్రాణాలను సైతం లెక్క చేయకుండా మంటల నుంచి కాపాడుతుంది బాలమ్మ. దాంతో బాలమ్మ పట్ల గంగమ్మకు చెప్పలేని కృతజ్ఞత పుట్టుకువస్తుంది. దాచకున్న పైసలూ,బట్టలూ, నిలువ నీడా సర్వం బుగ్గిపాలైన కష్టంలోనూ మనుషులు ఒకరి మనసులో ఒకరు స్థానం పదిలం చేసుకోవడం మనసుకు హత్తుకునేలా వివరించారు ఈకథానికలో. భార్యాభర్తల మధ్య ప్రేమను సైతం ఆర్థిక పరిస్థితులే నిర్ణయిస్తాయి. అవసరాలకు తగ్గ ఆదాయం లేని దిగువ మధ్యతరగతి కుటుంబాల్లో ఇవి మరీ చిక్కులు తెచ్చిపెడతాయి. అలాంటప్పుడు ఒకరినొకరు అర్థం చేసుకుని పరిస్థితులను మెరుగుపరచుకోవడానికి ప్రయత్నించాలే తప్ప, లేనిపోని భావోద్వేగాలకు, వాదవివాదాలకు లోనై కన్నీళ్ళకు బలైపోకూడదని హెచ్చరిస్తుంది ‘ప్రేమాంజలి’ కథానిక.
తాగుబోతు మగడి చేత చావుదెబ్బలు తినివచ్చిన పనిమనిషి లక్ష్మమ్మకూ, ఆమె పిల్లలకూ ఇంత తిండిపెట్టి రాత్రి పడుకోవడానికి చోటిస్తుంది సీత. అర్ధరాత్రి దాటాక పీకల దాకా తాగివచ్చిన సీత భర్త, తల్లిగారింటి నుంచి డబ్బులు తెమ్మని ఆమెను వేధించడం గమనించిన లక్ష్మమ్మ, తన స్థితి డోలు వచ్చి మద్దెలతో మొరపెట్టుకున్నదని గ్రహించి తెల్లవారేసరికి మొగుణ్ణి వెతుక్కుంటూ బయలుదేరుతుంది. ‘పనిపిల్ల’ కథలో, అన్నీ ఆద్యంతం చదివించే కథలే.

స్వప్న మాసపత్రిక, సెప్టెంబరు 2012 సంచిక నుంచి

* * *

“అడ్డా” డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‌ని అనుసరించండి.

అడ్డా On Kinige

Related Posts:

నిగ్గు తేల్చిన సత్యాలు (“గంధం చెట్టు” పై సమీక్ష)

“ఆవేశం వద్దు శేఖరం. పతివాళ్ళకీ ఒక సిద్దాంతం, దృక్పథం ఉంటాయి. అందరూ మన భావాల్తో ఏకీభవించాలనుకోవటం కూడా తప్పే”. ఈ విధంగా జీవన సిద్ధాంతాల్ని తనదైన కోణంలోంచి చూసి విశ్లేషించి నిగ్గు తేల్చిన సత్యాలు ఎన్నో ‘గంధం చెట్టు‘లో పరిమళిస్తాయి. తన చుట్టూ ఉన్న జీవితాల్నీ మనుషుల్నీ ఒక బయటి వ్యక్తిగా పరిశీలించి, ఒక్కోచోట నిష్పాక్షికంగా పరిష్కార మార్గాల్ని చూపించారు రచయిత. ఒకప్పటి గ్రామీణ నేపధ్యంతో నేటి గ్రామాల్ని పోల్చి చూపడం; పోలీసులు వారి విధి నిర్వహణ, ప్రభుత్వం, ప్రజలు, ఉన్నవారి, లేనివారి ఆలోచనా సరళి, సాఫ్ట్‌వేర్ ఉద్యోగాలు, ఆ ఉద్యోగాల మెరుపుల వెనుక వున్న మరకలని ప్రతిభావంతంగా చిత్రించారు రచయిత.

15 కథలున్న ఈ సంకలనంలో 12 కథలు ‘ప్రథమ పురుష’లో చెప్పడం వల్ల కథల్ని అల్లినట్లు కాకుండా జీవితాలని చిత్రించిన అనుభూతి పాఠకులకు కలిగిస్తాయి. నెలకు యాభైవేలకు పైగా సంపాదిస్తేనే గానీ గడపలేమనే సాఫ్ట్‌వేర్ ఉద్యోగుల జీవితాల్లోకి తొంగి చూస్తే ఆశ్చర్యం వేస్తుంది. అయినా ఇది నిజం (ఊబి). అయితే అవగాహనతో పరిస్థితులను చక్కదిద్దు కోవచ్చునంటాడు రచయిత (ముందుగోడ). “పోలీసు ఉద్యోగం పులిస్వారీ వంటిదని బ్రతకాలనుకున్నవాళ్ళూ ఈ స్వారీ చేయవల్సిందే”నంటాడు రచయిత. తనని నరికేసినా సువాసనా, చల్లదనం ఇచ్చే గంధం చెక్కలాంటి హోటల్ ఓనర్ ‘అయ్యర్’లు ఇంకా ఉన్నారని చెప్పినా, రెక్కలు రాగానే చెట్టంత కొడుక్కి అందాక ఉన్న ఇల్లు ‘పంజరం’లా కనిపిస్తుందని చెప్పినా, కొల్లేరుకు వలస వచ్చే పక్షుల గురించి పట్టించుకునే ప్రభుత్వం అక్కడ బ్రతికే ప్రజల గురించి ఆలోచించడం లేదని చెప్పినా రచయిత గన్నవరపు నరసింహమూర్తి కథల్లో క్లుప్తత, వాస్తవితకత పుష్కలంగా కనపడుతుంది.

కూర చిదంబరం
పాలపిట్ట జులై 2012 సంచిక

* * *

“గంధం చెట్టు” డిజిటల్ రూపంలో కినిగెలో లభిస్తుంది. అంతేకాదు, ఈ కథల సంకలనం ప్రింట్ బుక్‌ని ఇప్పుడు కినిగె ద్వారా తగ్గింపు ధరకి తెప్పించుకోవచ్చు. మరిన్ని వివరాలకు ఈ క్రింది లింక్‌ని అనుసరించండి.
గంధం చెట్టు On Kinige

Related Posts:

బహుముఖీన వస్తు ప్రకటన శైలజామిత్ర కధానికల సంపుటి ” అడ్డా”

ఈనాటి తెలుగు పత్రికా పాఠకులకు సుపరిచితమయిన పేరు శైలజామిత్ర. సంగీత సాహిత్యాలలో ఉన్నత విద్యా అర్హతల్ని సాధించి, ఆయా రంగాలలో తనదైన ముద్రతో విశేష ప్రశంసల్ని పొందుతున్న విదుషీమణి ఆమె. అనువాద ప్రక్రియలలోనూ ఆరితేరిన చేయి అమెది. కవిత్వం, కధ నవల, సమీక్ష వంటి సాహిత్య ప్రక్రియల్లో ఇబ్బడి ముబ్బడిగా కృషి చేస్తూ చదవరులకి తన రచనా సాదు ఫలాలను అందిస్తున్నారు. ఉషోదయ వెలుగు పత్రికలో ‘మానవీయం’ అనే అంశంపై 48 సామాజిక వ్యాసాల్ని వెలువరించారు. భక్తి రంజనిలో ‘ఆధ్యాత్మికం-జీవితం’ శీర్షికన 54 వ్యాసాలు రాసారు. బాలసాహిత్యంలో ‘నేలపైని నక్షత్రాలు’ అనే నవల telugupoetry.com ద్వారా పాటకులకు అందించారు. శ్రీ వెంకటేశాయ నమహా: అనే మాసపత్రికలో పన్నెండు భక్తి గేయాలు రచించారు. ఇక బహుమతులు, అవార్డులు, సన్మాన సత్కారాలు అనేకం ఆమె ప్రతిభా స్వరాన్ని, ప్రజ్ఞా దురంధరత్వాన్ని వరించాయి. శైలజామిత్ర ఇదివరలో ఆరు కవితా సంపుటాలను, తరంగాలు పేరున ఒక కధా సంపుటి ప్రచురించారు. విస్త్రుత అధ్యయన శీలం ఆమె నిరంతర రచనా కృషికి ఎత్తిన జయపతాక.
శైలజామిత్ర రెండవ కధా సంపుటి ‘అడ్డా‘ ఆమె ‘అక్షరం నా ఆత్మాయుధం, సాహిత్యంతోనే నా సహచర్యం’ అనే లక్ష్య శుద్ధిని ముందుమాటగా కూర్చుకుని వచ్చింది కధానికా సంపుటి. పుస్తకంలో 20 కధలున్నాయి. అన్నీ ఇదివరలో వివిధ పత్రికల్లో ప్రచురింప బడినవే. వీటిలో కొన్ని బహుమతులు పొందిన కధానికలు.
సంపుటిలో ముందుగా చెప్పుకోవలసిన అంశం వస్తు వైవిధ్యం. వర్తమాన సామాజిక (దుః)స్థితికి ‘మనిషి’ బహిరంతర సంఘర్షణకి, దర్పణం పడుతూ అన్ని కధాంశాలు మనల్ని అంతర్ముఖీనం చేస్తాయి. ఆలోచన ప్రేరకంగా నిలుస్తాయి.
‘అడ్డా’ మీది కూలీల్లో పూట గడుపుకోవడానికి పడే యాతనల మధ్య మనిషి బలహీనతలుగా బయటకు వచ్చే ఈర్ష్యాసూయలు, ఎత్తుజిత్తులు తెరమీద కనబడుతూ ఉంటాయి.అయితే, వాటి వెనుక ఉన్న మానవీయ సహజాతులుగా దయ, పరోపకారం వంటి గొప్ప గుణాలు అవసరానికి ప్రచోదితాలై సహాయాన్ని సహకారాన్ని అందిస్తాయి. ‘అడ్డా’ లోని ఇతివృత్తం ఇదే. గుడిసెలు తగలబడుతుంటే ప్రాణాల్ని మాత్రం లెక్కచేయని తీరున గంగమ్మ పిల్లల్ని కాపాడింది బాలమ్మ. ఈ గంగమ్మే బాలమ్మను పక్కకు తోసి, తిట్టిపోసి ఆమె బదులు కులికి పోయిందా రోజు! స్థానీయత, దేశీయత, సహజత్వం, వాస్తవికత , కలిగిన మంచి కధ. భాష శైలి కూడా పానిపట్టు దగ్గరికి వెళ్ళటం వలన కధకొక శిల్ప గుణ వైశిస్త్యాన్ని కుర్చాయి.
భర్త ఇంట్లో నుంచి వెళ్ళిపోతే, దూరంలో ఎవరో వ్యక్తి చనిపోయినట్లు తెలిసాక ఆ వ్యక్తి తన భర్త ఏమో అనుకోని తల్లడిల్లి పోతుంది అంజలి. ఆయనగారు అప్పుల వాళ్ళ నుంచీ తప్పుకోవడానికి ఎటో వెళ్ళాడు! భార్య ప్రేమకు చలించి తన తప్పును గ్రహిస్తాడు భర్త. కధ పేరు ప్రేమాంజలి!
భార్యకు కూడా మనసుంది అని భావించే భర్తలు, కోడలు పరాయి వ్యక్తి కాదు కుటుంబంలో భాగం అని భావిన్చాగలిగే అత్తలు ఉంటే ఈ సమాజం ఇంతకంటే ఆనంద దాయకంగా ఉంటుంది కదానే సంవేదనకు అక్షర రూపం “సరికొత్త సూర్యోదయం” కధ. రచనా పరంగా ఇందులో మాధవి పాత్ర మనస్తాత్విక విశ్లేషణకు మంచి ఉదాహరణగా నిలిచింది.
కొన్ని వర్తమాన సమాజ ధోరణుల మీద ధర్మాగ్రహాన్ని ఎంతో నిశితంగా చూపారు శైలజామిత్ర. ముందు మాటలో వేదగిరి రాంబాబు గారు అన్నట్లు సమాజ ఉద్దరణ కోసం మనుషుల కన్నా ఆయుధాలే ముందు ముందు పనికి వస్ద్తాయని డైరెక్ట్‌గా సూచనా చేసారు. ఆ కధపేరు ” జాతర”
‘బతుకుమోపు’ కధానిక రైతు కష్టాల్ని కన్నీళ్ళనీ ఆర్ద్రంగా స్పృశించి రేపటి శుభోదయం పట్ల ఆశా భావాన్ని ప్రోది చేస్తుంది. డబ్బు వర్సెస్ మానవ సంబందాలు: భక్తి వర్సస్ మోసాలు వంటి అమానవీయ స్థితిగతుల పట్ల తమ భాధా తప్త హృదయానికి అక్షరీకరణం చేసారు రచయిత్రి. కధానిక పేరు “కాలగమనం”
‘అడ్డా’ కధా సంపుటి నిండా మనకు తెలిసిన పరిస్థితులున్నాయి. అవాంచనీయమైన మనస్తత్వాలున్నాయి. మనుషులున్నారు. సమాజంలోని అస్థవ్యస్థత ఉంది. మనుషుల్లోని ప్రవర్తనా సంకీర్ణత ఉంది. ‘ ఇది మంచిది కాదు’ అనే ప్రభోదించే దృశ్య కరణ౦ ఉంది. ‘ ఇది ఇలా ఉంటే మనం మరికొంత హాయిగా ఉండగలం అనే సూచనా చేస్తే ధైర్యాభివ్యక్తీకరణం ఉంది. చీకటిని ద్వేషిస్తూ చీకట్లోనే కుర్చుని బతుకులు తెల్లర్చుకునే బలహీనుల కంటే చీకటి కావాలి, గోరంత వెలుగును పట్టుకుని గట్టుకు చేరే ఆత్మ విశ్వాసం కలిగిన అభిమాన దనులు ఎక్కువగానే ఉన్నారు.
కధానికా నిర్మాణానికి ఒక ఖచ్చితమైన ఒరవడిని పెట్టుకున్నారు శైలజామిత్ర. ఆమె కధలన్నీ ప్రశ్నల్ని రేపుతూ మొదలవుతాయి. వాటి విశ్లేషణతో మొదలవుతాయి. వాటికి సంభావ్యతతో కూడిన సమాధానంతో ముగుస్తాయి. ఆ సమాధానం పరిష్కారం కాకపోవచ్చు. జీవితం అన్ని సందర్భాలలో వడ్డించిన విస్తరి కాదు కదా? ఈ తెలివి కలిగిన రచయిత్రిగా శైలజామిత్ర తన జ్ఞాన గంగని మనకు అందించారు.
కధా శిల్ప పరంగా ‘అడ్డా’లో కధలన్నీ చదివించే గుణంతో మెరుపు లీనుతున్నాయి. కొన్ని వ్యాస కధల్లా ఉన్నా, లేక కధా వ్యాసాల్లా ఉన్నా వస్తైక్యతని కోల్పోని గుణం వాటిని మంచి కధలుగా నిలుపుతోంది. శైలజా మిత్ర ప్రతి కధ పాటకుని హృదయాన్ని ఆత్మీయంగా ఆర్ద్రంగా పలకరిస్తుంది. అదే ఆమె రచనా విజయం.
‘అడ్డా’ని కొని చదివి ఆనందించండి

సమీక్షకులు: విహారి

* * *

“అడ్డా” డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‌ని అనుసరించండి.

అడ్డా On Kinige

Related Posts:

నిర్మాణాత్మక కథలు (పరాయోళ్ళు సమీక్ష)

ఇంజనీరింగ్ విద్యలో ఒక పాఠ్యాంశముంటుంది, ‘ఆర్థోగ్రాఫిక్ ప్రొజెక్షన్స్’ అని. ఒక వస్తువును సమగ్ర అవగహన కోసం నిర్థిష్టమైన బహుకోణాల్లో శాస్త్రీయంగా దర్శించడం. బహిర్ అంతర్ వివరాలను నిస్పష్టంగా గ్రహించగల్గడం… యిక, ఆ వస్తువు / యంత్రభాగం / నిర్మాణం రూపకల్పన, అభివృద్ధి, ఉద్ధరణ దిశలో అడుగులు వేయడం… ఇదీ ఈ ‘పరాయోళ్ళు’ రచయిత వృత్తిరీత్యా ఒక ఇంజనీర్ కావడం వల్ల ‘సమాజం’ అనే వ్యవస్థను బహుముఖమైన కోణాల్లో దర్శిస్తూ పౌరబాధ్యతతో, వ్యథతో, ఆశావహమైన కాంక్షతో అనుశీలించారు. భ్రష్టుపట్టిపోతున్న సమాజం, పూర్తిగా నేలమట్టస్థాయికి పతనమైపోయిన నైతిక విలువలు, అదుపూ ఆజ్ఞాలేని అవినీతి, నిస్సిగ్గు దోపిడి, రాజకీయ అరాచకం, సున్నిత హృదయాలను దుఃఖమయం చేసే అతిసేచ్ఛ… ఇవన్నీ ఈ పుస్తకంలోని దాదాపు అన్ని కథల్లోనూ కథావస్తువులుగా పాఠకునికి కనబడ్తూ లోతుగా ఆలోచింపజేస్తాయి. ఒక వ్యవస్థలోని లోటుపాట్లనూ, లోపాలనూ ఎత్తిచూపడమంటే వాటిని మరమ్మత్తు చేయదగిన కీలకాంశాలుగా తెలియజేస్తూ స్పృహింపజేయడమేకదా… అన్న కోణంలో గనుక ఈ పుస్తకంలోని ప్రతి కథను పాఠకుడు స్వీకరించగల్గితే ‘పరాయోళ్ళు‘ కథాసంపుటి వర్తమాన ఆధునిక సమాజంలోని వివిధ రంగాల్లో దృశ్యాదృత్యంగా ఉన్న రుగ్మతలన్నింటినీ పాఠకుల ముందు పరిష్కారార్థం ప్రతిపాదించింది. వీటిలో ఒక్కటి కూడా ప్రేమకథ, వ్యంగ్య, హస్య, ఉబుసుపోక, కాలక్షేప, చమత్కార కథ లేదు. ప్రతి కథా ఏ హృదయమున్న భారత పౌరున్నయినా సంక్షుభితున్ని చేస్తున్న సామాజిక జాఢ్యాల గురించే విప్పి చెబుతుంది. ఆలోచింపజేస్తుంది. పౌరబాధ్యతను గుర్తుచేసి తనవంతు కర్తవ్యాన్ని స్ఫురింపజేస్తూ ప్రతి కథా సామాజిక కోణంలో ప్రయోజనకరమైన ఒక జ్ఞాపకంగా మిగిలిపోతుంది.

ఉమామహేశ్వర్ అవగాహన కల్గిన ఇప్పటి యువతరానికి ప్రతినిధి. వృత్తిరీత్యా ఇంజనీరై ఉండి బోధనావృత్తినుండి సాఫ్ట్‌వేర్ పరిశ్రమలోకి చేరి మేడిపండువంటి రంగాల్లోని డొల్లతనాన్నీ, అంతర్గత పర్యావరణాన్నీ గుప్తంగా దాగిఉన్న ప్రపంచీకరణ వికృత విధ్వంసాన్నీ అతిదగ్గరగా వీక్షిస్తున్న వాడు. అందుచేతనే కొన్ని కథల్లో అత్యంత హానికరమైన, కాకిబంగారంలా కనిపించే సందర్భాల మూలల్లోకి చేరి జీవితాలను విప్పి చూపించగలిగాడు. ఇవేవీ ఊహించి, కల్పించి, అలంకరించి చెప్పిన కథలు కావు. అందుకే ఈ కథలు సరళంగా, స్వచ్ఛంగా నిరలంకారంగా గొప్పగా ఉన్నాయి. సమాజ సౌందర్యానికి టెక్కు లెక్కువ ఉండనట్టే ఈకథలకు కృత్తిమ ప్రక్కవాయిద్యాలు లేవు. సూర్యకిరణాల్లో సూటిగా ఉన్నాయి.

1991 నుండి గరళజలంవలె విస్తరించడం మొదలైన ‘ప్రపంచీకరణ’ స్థానీయరంగాల్లోకి ప్రవేశించి కనబడకుండా ఎలా వ్యాపించి కళ్ళముందే చూస్తూండగా చూస్తుండగానే ఎలా మూలాలను ధ్వంసం చేస్తుందో రచయిత ‘ది ధూల్ పేట ఇండస్ట్రీస్(ప్రై) లిమిటెడ్’ కథలో ఎంతో సంయమనంతో వివరించాడు. మల్లేష్ యాదవ్ ఒక బడుగుదేశానికి ప్రతీకగా, సుబ్బిరాజు అగ్రదేశానికి ప్రతీకగా గ్రహించి చదువుకుంటూపోతే కుట్రపూరిత వ్యాపార వికృత రూపురేఖలు కళ్ళముందు ప్రత్యక్షమౌతాయి. అట్లాగే ‘నిశ్శబ్ద విప్లవం’లో ఐ.టి. పరిశ్రమల్లోని బోలుతనాన్నీ, కార్పొరేట్ సంస్కృతి మాయలో వ్యక్తులు వంకర్లుపోతూ అపసోపాలుపడే సూడో ప్రవర్తనలు, తన జీవవంతమైన మూలాలను మరిచి ప్రదర్శించే వికార పోకడలు, అసలు మనిషికి జీవదాతమైన ఆహారాన్నందించే వ్యవసాయ రంగంపట్ల చులకనభావం… యివన్నీ కృష్టమోహన్, సంజన్న పాత్రలద్వారా
ఒక ఆశావహమైన భావిని దృశ్యమానం చేశాడు రచయిత. ‘మాయరోగం’ కథలో కూడా ప్రశాంతమైన చిన్న పట్టణాల్లో ఆర్.ఎమ్.పి.ల ద్వారా స్థానిక వైద్యసదుపాయాలను ఎలా కార్పొరేట్ ఆస్పత్రులు ఆక్టోపస్‌లా విస్తరిస్తూ ధ్వంసం చేస్తున్నాయో వృద్యంగా చెప్పబడింది. ‘వాటర్’, ‘బ్లాక్ హోల్’, ‘రూపాంతరం’ కథలు మనుషుల్లో ఆలోచనలు, మాటలు, చేతలూ పూర్తిగా వేర్వేరనీ, లోలోపల అంతా ఆదర్శవంతంగా వల్లిస్తూ… చేతలదాకా రాగానే అవకాశవాద తత్వంలో లంచాల రూపంలో, దోపిడీ తత్వంతో ఎగబడి దండుకోవడమేననీ శక్తివంతంగా చెప్పబడింది.

రచయితగా ఉమామహేశ్వర్ కు ఈ సమాజం ఇలా ఉంటే బాగుంటుంది అని ‘స్వప్న సదృశ’మైన కొన్ని ఊహలున్నాయి. ‘మన అవసరం’ అన్న కథలో సూర్యప్రకాశ్ పాత్రద్వారా ఆ ఆరోగ్యవంతమైన ఆకాంక్షను బలంగా చెప్పారు. అదేవిధంగా ‘ఆనందకుటీరం’ కథలో వృద్ధులు కొందరు తమ ప్రశాంత జీవనం కోసం ఏర్పాటు చేసుకున్న ఆశ్రమం అనుకున్నట్లుగానే శాంతివంతంగా ఉన్నా దాన్నింకా అర్థవంతం, ఆదర్శవంతం చేసేందుకు అనాథ బాలల ఆలనపాలనను కూడా స్వీకరించడం ద్వారా ఓ పరిపూర్ణతను సాధించవచ్చునని వినూత్న సూచనను చేశారు. బాగుంది.

దీంట్లోని కథలన్నీ యిదివరకు ప్రముఖ తెలుగు వెలువడ్డయే. సీరియస్ కథా పాఠకులకు తెలిసినవే. రచయిత పాఠకులకు ఆరోగ్యవంతమైన ఆలోచనలను శాస్త్రీయంగా అందివ్వడంలో కృతకృత్యుడయ్యాడు. శైలి సరళంగా, పఠనీయంగా ఉంది. మంచి కథల సంపుటి ఇది. ఉమామహేశ్వర్ అభినందనీయుడు.

రామా చంద్రమౌళి
(పాలపిట్ట , జూలై 2012 సంచిక నుంచి)

* * *

పరాయోళ్ళు డిజిటల్ రూపంలో కినిగెలో లభిస్తుంది. కినిగె నుండి “పరాయోళ్ళు” ప్రింటు పుస్తకం తగ్గింపు ధరకు తెప్పించుకోవచ్చు. మరిన్ని వివరాలకు ఈ క్రింది లింక్‌ని అనుసరించండి.

పరాయోళ్ళు On Kinige

Related Posts:

అక్షర పరిమళం (“ద్రోహవృక్షం” పుస్తక సమీక్ష)

మనసులో బాధ బరువు మోస్తున్నప్పుడు తేలికైన పుస్తకం ఒకటి చదివితే హృదయంలో అక్షరాల చిరుజల్లుల పరిమళం వెల్లివిరుస్తుంది. అపుడు ఆలోచనల వేడి, సాంద్రత తగ్గుముఖం పడుతుంది. అటువంటి పుస్తకాలు తెలుగులో చాలా తక్కువే అయినా డాక్టర్ వి. చంద్రశేఖరరావు రాసిన ‘ద్రోహవృక్షం’ ఈ కోవకి చెందినదే. ఈ పుస్తకం చదువుతుంటే మనం ఎక్కదో విహరిస్తున్నామనే భావన, అక్షరాలు మనల్ని వెంబడిస్తున్నాయనే అపోహ, పాత్రలన్నీ సుపరిచితాలే అనే భావన మనలో చోటుచేసుకునే ముఖ్య అనుభూతులు. బహుశా రచయితకు అడవులు, పూలు, పర్యటనలు, ప్రకృతి అంటే అమితమైన అనురాగం అనుకుంటా. అందుకే పాఠకుడి చిటికెనవేలు పట్టుకుని తెలియని ప్రపంచం వైపు తీసుకు వెళుతుంటారు. మనం ఎక్కడికి వెళుతున్నాం, ఏం తెలుసుకుంటున్నాం అనే జిజ్ఞాస కూడా పాఠకుడిలో లేకుండా చేస్తారు. ఒకసారి కాదు, పేరాను రెండుసార్లు చదివినా మనకు తెలియని అనుభూతి మనల్ని వెంటాడినట్టే అనిపిస్తుంది. ఇందులో ఇరవై కథలు ఉన్నట్టు చెప్పారు. కానీ ఒక నవలలో 20 అధ్యాయాలు అన్నట్లుగా అనిపిస్తుంది. ఒక కథకు, మరో కథకు ఎక్కడో ఏదో కనిపించీ, కనిపించకుండా సన్నని దారం ఉన్న భావన కలుగుతుంది. సుందరం, పూర్ణలు రచయితకి అత్యంత ప్రియమైన పాత్రలే. సుందరమైన ప్రకృతిలోనే పరి’పూర్ణ’మైన జీవితం అనుకోవలా? ఇందులో ఏ కథ బావుంది? అని ప్రశ్నిస్తే, ఏ కథ బావుండలేదు? అని ఎదురుప్రశ్న వేయాలనిపిస్తుంది. మరో మాటలో చెప్పాలంటే ఇదో వచన కావ్యంలా అనిపించింది.
‘కాలం ఎగిరిపోవటాన్ని నేను గమనించాను. సుందరం ఒక్కడే, ఈ ప్రపంచంలో అనిపించడం మొదలుపెట్టింది. సుందరం అనే ఆలోచన లేకపోతే నేను శక్తిహీనంగా మారిపోవటం గమనించాను’ (55 పేజి) అని ది లైఫ్ అండ్ టైమ్స ఆఫ్ సత్యప్రకాశంలో ఒక చోట ఉన్న పేరా. ఇది అచ్చం భావకవితలా ఉంది కదూ. అతను అతనిలాంటి మరొకడు అనే శీర్షికగల కథలో ఇలా ఉంది. “ఆ చెట్లపై నివాసమున్న వందలాది పక్షుల శవాలు, పొదల చాటున, రోడ్ల పక్కన. అదో భయానకమైన దృశ్యం. హాస్టల్‌కు చేరే నీళ్ళ పంపుల్లో సీవేజ్ వాటర్ కలిసి, హాస్టళ్ళంతటా డయేరియాలు, విషజ్వరాలు వ్యాపించేది కూడా ఆ నెలలోనే…” (89 పేజి) సుందరం కలలది ఏ రంగు అనే కథలో ‘ కమల వెంటనే తేరుకొని, కళ్ళలోని అందోళనని తుడిచేసి (కొడుకు చేసే బెదిరింపులు కాసేపు మరిచిపోయి) తనదైన మనోహరాన్ని ముఖంపైకి తెచుకొని ఎట్లా ఉన్నావయ్యా… ఎన్నేళ్ళయ్యింది నిన్ను చూసి, పిరికిగా, భయంగా ఉండేవాడివి, గట్టిగా పట్టుకుంటే కందిపోయే పూవులా ఉండేవాడిని’ అని (పేజి 131) ఇందులో పాత్రలతో సంబంధం లేదు. ఏ పేరా చదివినా ఎక్కడి నుంచి ఎక్కడికి చదివినా ఆసక్తికరంగానే ఉంటుంది. అదే రచయిత ప్రత్యేకత.
ఇక పోతే, హెచ్. నరసింహం ఆత్మహత్య శీర్షికన హైదరాబాద్ లోని ప్రదేశాలను పరిచయం చేస్తూ, ఎర్లీ టీన్స్‌లో గోల్కొండ నా ఎడ్వెంచర్ స్పాట్, ఫలక్‌నుమా నా రహస్య డేటింగ్ ప్లేస్, ఆ రోజుల్లో ప్రేమికులకు కొన్ని ప్రత్యేక ప్రదేశాలు ఉండేవి. ఇందిరాపార్కు, టాంక్‌బండ్, బిర్లామందిర్ (ముఖ్యంగా మెట్ల పైన), గండిపేట చెరువు, యూనివర్సిటీ లోపలి రోడ్డు… (పేజి 217) అంటూ చదువుతూ ఉంటే యవ్వనం దాటిన వారికి మధుర స్మృతులు గుర్తొస్తుంటాయి. ‘హైదరాబాద్ రోడ్లపైనే నా బాల్యమంతా గడచిపోయింది. గుర్తు పట్టలేనంతగ ఆ రోడ్ల రూపం మారినా, అపార్ట్‌మెంట్లు, రంగు దీపాలు, పెద్ద పెద్ద మాల్స్, అయినా ఆ రోడ్లపై పాదం పెట్టగానే ఒక గాఢమైన పరిమళం, నన్ను ఇప్పటికీ చుట్టుముట్టుతుంది. సజీవమైన భాష, ఆత్మీయమైన పలకరింపు, ఎరుపురంగు మెహందీలు, గాలి పటాలు, పురాతనమైన ఆత్మలకు సరికొత్త అలంకరణలు, రోడ్లను చూడగానే, జ్ఞాపకాల ప్రదర్శన నన్ను వివశురాల్ని చేస్తుంది.’
ఏ పేజి తిరగేసినా, ఏదో కొత్తదనం, మాధుర్యం మనల్ని పలకరిస్తునే ఉంటుంది. మనల్నిమనం వెనక్కి తిరిగి ఇలానే చూసుకోవాలనిపిస్తుంది. ఇలాంటి బాల్యం ద్రోహవృక్షంలోనూ దర్శనమిస్తుంది. పుస్తకం చదువుతుంటే కొత్త విషయాలు ఎన్నో తెలుసుకునే అవకాశం లభిస్తుంది. ఎక్కడో ఎక్కడో ఇలాంటి సంఘటనలు మనకు తారసిల్లిన భావం కలుగుతుంది.

టి. వేదాంతసూరి
(వార్త, ఆదివారం అనుబంధం, 17 జూన్ 2012)

* * *

ద్రోహవృక్షం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.

ద్రోహవృక్షం On Kinige

Related Posts:

ప్రశ్నల్ని సంధించే కథలు

రెండు దశాబ్దాలుగా తెలుగువారి జీవితంలో అనేక మార్పులు వస్తున్నాయి. ఈ మార్పులకు మూలం ప్రపంచీకరణ. మన తెలుగువాడు పి.వి. నరసింహారావు ప్రధానమంత్రి అయ్యాక ప్రవేశపెట్టిన ఉదారవాద ఆర్థిక విధానాలు ఫలితంగా ప్రైవేటీకరణ విశ్వరూపం దాల్చింది. మార్కెట్ శక్తులు విస్తరించాయి. ఈ కారణంగా గాలి, నీరు కూడా అమ్మకపు సరుకులయ్యాయి. నీటితో కోట్లాది రూపాయలలో వ్యాపారం సాగుతుంది. కానీ ఆ నీటి చెంత పని చేసే వాడికి మాత్రం మంచినీళ్ళు కూడా లభించవు. ఈ కఠోర వాస్తవాన్ని హృదయం చెమర్చే రీతిన కథగా రాశారు జి. ఉమామహేశ్వర్. ఆ కథ పేరు ‘వాటర్’. నీళ్ల కోసం యుద్ధాలు జరిగే ఈ పరిణామానికి మూలం ప్రపంచీకరణ అనుకూల విధనాల్లో వుంది. దీనిని నర్మగర్భంగా చెబుతూ పాఠకులని ఆలోచింపజేస్తారు రచయిత.
ఉమామహేశ్వర్ పదేళ్ళ పైబడి కథలు రాస్తున్నారు. మొదటిసారిగా ‘పరాయోళ్ళు‘ శీర్షికన ఆయన కథల సంపుటి వెలువడింది. ఇందులో పద్నాలుగు కథలున్నాయి. రెండు కథలు మినహా మిగతావన్నీ ఉదారవాద, ఆర్థికవాద విధానాల దుష్ప్రభావం ప్రజల జీవితాన్ని ఏ విధంగా చిన్నాభిన్నం చేసిందో చెబుతాయి. ‘అభివృద్ధి’ గురించి పాలకులు చెప్పే కబుర్లని తిరస్కరించే చెంచుల చైతన్యస్థాయిలోని పరిణితిని ‘చెంచుమిట్ట’ కథ చెబుతుంది. రకరకాల స్కీములతో మనుషులని లోబరుచుకోవాలని చూసే మార్కెట్ మాయాజాలాన్ని తూర్పూరాబట్టే కథ ‘గొర్రె చచ్చింది’. అవసరం లేనివాటిని అవసరాలుగా భ్రమింపజేసి సొమ్ము చేసుకునే మార్కెట్ కుతంత్రాలని ప్రశ్నించే కథ ‘ది ధూల్‌పేట్ ఇండస్ట్రీస్ (పై) లిమిటెడ్’. జనాల బలహీనతల మీద ఆడుకునే మార్కెట్ వ్యూహాలు ఎంత దుర్మార్గంగా ఉంటాయో ఈ కథలో చూస్తాం.
‘పరాయోళ్ళు’ కథ ఇవాళ తెలుగునాట నెలకొన్న రాజకీయాలకు సరిగ్గా ప్రాతినిధ్యం వహిస్తుంది. ఎక్కడివాళ్ళు ఎక్కడికైనా వెళ్ళచ్చు, తప్పు లేదు. కానీ తమ ఊరునీ, తమ బతుకునీ దెబ్బతీస్తామంటే మాత్రం పరాయోళ్ళ దౌష్ట్యాన్ని ప్రశ్నిస్తారు. ప్రపంచీకరణ సందర్భంగా ఎక్కడ్నించి ఎక్కడికయినా వెళ్ళి బతకడం సాధారణాంశం. ఈ విధంగా ఇందులోని పద్నాలుగు కథలు విభిన్న సమాజికాంశల్ని చర్చకు పెడతాయి. ప్రభుత్వ ఆర్థిక విధానాల ఫలితంగా చెదిరిపోతున్న బతుకు జాడల్ని పట్టి చూపుతాయి. సామాజిక సంక్షోభాలకు సంబంధించిన అనేక ప్రశ్నల్ని సంధిస్తాయి.

వై. వసంత
(22 ఏప్రిల్ 2012 నాటి వార్త ఆదివారం అనుబంధం లోని పుస్తక సమీక్ష నుంచి)

* * *

పరాయోళ్ళు కథాసంపుటి డిజిటల్ రూపంలో కినిగెలో లభిస్తుంది. మరిన్ని వివరాలకు ఈ లింక్‍ని అనుసరించండి.
పరాయోళ్ళు On Kinige

Related Posts:

వేలుపిళ్ళై

ఈ కథలను రాసింది సి. రామచంద్రరావుగారు. ఇంగ్లీషు, తెలుగు, తమిళ పాత్రల చుట్టూ అల్లిన ఈ కథలన్నీ రచయిత తనకు తెలిసిన, పరిచితమైన జీవితంలో నుంచి ఏరుకుని, పరిశీలించి, భావనచేసి రాసినవే.

ఈ సంకలనంలోని కొన్ని కథలను పరిచయం చేసుకుందాం.

వేలుపిళ్ళై: వేలుపిళ్లై ఓ టీ ఎస్టేటులో కూలీగా పనిచేస్తూ వుండేవాడు. ఒకసారి ఎస్టేటు కండక్టరుతో మాటా మాటా వచ్చి పని మానేస్తాడు. కొండలకింద వున్న పొల్లాచీ సంతలో లక్ష్మీవారాలు అమ్ముడైపోగా మిగిలిన ఉల్లిపాయ, చింతపండు, కాయగూరలూ కొని ప్రోస్పెక్టు ఎస్టేటు కూలీలకి అవ్మేువాడు. కొన్నాళ్ళకి వేలుపిళ్లై పెద్దబజార్లో అంగడి ప్రారంభించాడు. కలిసొస్తుంది. వేలుపిళ్లైకి సిరి అబ్బడంతో తనపేరు చిరస్థాయి చేసుకోవాలని కోరిక పుట్టింది. పేరు శాశ్వతంగా నిలిచే దానం ఏదైనా చెయ్యడానికి నిర్ణయం చేసుకుని ఎస్టేటు కూలీలతో సంప్రదించాడు. వినాయకుని గుడి కావాలని అడిగారు కూలీలు. ‘సరే’ అన్నాడు వేలుపిళ్లై. భార్య వద్దంటుంది. ఆమె మాటలని లెక్క చేయకుండా, పని మొదలుపెడతాడు వేలుపిళ్ళై. ముందుగా గోపురం సిద్ధమైపోతుంది. ఒక రాతి పలక మీద వేలుపిళ్ళై ధర్మం అని రాయించుకుని మురిసిపోతాడు. అయితే వినాయకుడి విగ్రహాన్ని చేయించడానికి అతనికి కుదరదు. చివరికి ఓ గుడిలోంచి విగ్రహాన్ని దొంగిలించి తెస్తాడు. ఆ ప్రయత్నంలో పారిపోతుండగా సెందామరైతో పరిచయం ఏర్పడుతుంది. ఆమెతో చాటు మాటు వ్యవహారాలు సాగిస్తాడు. వినాయకుడి విగ్రహాన్ని ప్రతిష్టించడానికి, నాటకం ఆడి భార్యనగలని తాకట్టు పెట్టి, డబ్బు తెచ్చుకుంటాడు. తనని మోసం చేసి డబ్బు తీసుకున్నాడన్న సంగతి తెలిసి భార్య అతడిని విడిచి వెళ్ళిపోతుంది. సెందామరైని తీసుకొచ్చి ఇంట్లోనే కాపురం పెడతాడు. ఆమె వచ్చాక అతనికి మరింత కలిసొస్తుంది. ఆమె వలన తన జీవితం మారిపోయిందనే ప్రగాఢ విశ్వాసం అతనిలో కలుగుతుంది. ఆమె మీద ఎన్ని అపనిందలు వచ్చినా పట్టించుకోడు. ఆమె చనిపోతే, అన్నపానీయాలు మాని వినాయకుడి గుడి దగ్గర కూర్చుంటాడు. మనుషుల్లోని కీర్తికండూతిని, తామనుకున్న పనిని పూర్తి చేసేందుకు ఎంతటి పనికైనా వెనుకాడకపోవడాన్ని తమకి భరోసా కల్పించిన వారి పట్ల అమితమైన అనురాగాన్నిపెంచుకోడాన్ని ఈ కథ చిత్రిస్తుంది.

నల్లతోలు: కొందరు తెల్లవారు చదువుకున్న భారతీయులని తమతో సమానంగా చూసేవారు. అటువంటి కుటుంబమే మిస్టర్‌ అండ్‌ మిసెస్‌ స్టూవర్ట్‌. వారితో సంబంధాలు కలుపుకుని తానూ సైతం ఆంగ్లేయుడిలానే ప్రవర్తిస్తుంటాడు పేట్ అనబడే ప్రతాపరావు. ఒకసారి వారిచ్చే పార్టీకి వెడతాడు పేట్. అక్కడ బ్రిటీషు యువకులు చాలా మంది ఉంటారు. తాగి వాగడం మొదలుపెడతారు. తమ మధ్య ఈ నల్లతోలు గాడెందుకు అని పేట్ నుద్దేశించి వ్యాఖ్యానిస్తాడు డంకన్ హార్వీ అనే కుర్రాడు. కొంత వాగ్వాదం తర్వాత, పేట్‌రావ్‌‌ని పట్టుకుని ఈడ్చడం ప్రారంభించాడు డంకన్‌హార్వీ. పేట్‌రావ్‌ కొంత గింజుకుంటాడు. నలుగురూ సాయంపట్టి అతన్ని గది బయటికి నెట్టి తలుపు మూసేస్తారు. ఈ విషయం విని మిస్టర్‌ స్టూపర్ట్‌ కోపోద్రిక్తుదవుతాడు. “బ్రిటిష్‌యువకులంతా మృగాల్లాగా ప్రవర్తించారు” అంటాడు. “నా అతిథిని అవమానపరచడానికి డంకన్‌కి ఏం అధికారం వుంది!” అని గర్జిస్తాడు. “అంతా వెళ్ళి పేట్‌కి క్షమాపణ చెప్పుకోండి” అంటాడు. ఇంతలో అతడి భార్య అక్కడికి వస్తుంది. తమ కూతురిని చేసుకోబోయేది డంకన్ అని గుర్తు చేస్తుంది. మౌనంగా ఉండిపోతాడు. నిస్సహాయంగా ఇల్లు చేరుతాడు పేట్.

ఏనుగుల రాయి: ప్రోస్పెక్ట్ టీ ఎస్టేటు, కండక్టరుగా పనిచేస్తున్నాడు తంగముత్తు. కొత్తగా వేునేజర్‌లా వచ్చిన సిమ్మన్సు పదిరోజులైనా కాకుండానే, ఎస్టేటంతా తెగ తిరిగేశాడు. వచ్చే ఏడాది టీ నాటబోయే స్థలం కోసం ఇప్పటినుంచీ వెతుకుతున్నాడు. ఓ స్థలం చూసి, దాని గురించి వాకబు చేస్తే, అది టీ నాటడానికి మంచి స్థలం అని పదేళ్ళ క్రితవేు అప్పటి మేనేజరు నిర్ణయించి నర్సరీ ఏర్పాటు చేసాడని, కానీ అక్కడ మొక్కల్ని ఏనుగులు బ్రతకనీయవని తెలుస్తుంది. ఆ క్రమంలో అతనికి ఏనుగుల రాయి గురించి తెలుస్తుంది. ఏనుగుల రాయికి, టీ మొక్కలకి ఉన్న సంబంధం ఏమిటి? ఏనుగులు ఎందుకు ఆ మొక్కలపై పగబట్టాయో తెలుసుకోవాలంటే ఈ కథ చదవాల్సిందే.

టెన్నిస్ టూర్నమెంట్: పేదవాడైనా, టెన్నిస్ బాగా ఆడగల గిరిని చూసి ఆకర్షితురాలవుతుంది ధనవంతుల కుటుంబానికి చెందిన కమల. తండ్ర అభీష్టానికి వ్యతిరేకంగా గిరిని పెళ్ళాడి ఇంట్లోంచి వెళ్ళిపోతుంది. మొదట్లో ఇద్దరూ సరదాగా ఉంటూ కలసి టెన్నిస్ ఆడుకునే వారు. అయితే రాను రాను గిరికి టెన్నిస్ పట్ల వ్యామోహం అధికమై, ఇంటిని, భార్యని నిర్లక్ష్యం చేయడం మొదలుపెడతాడు. తానేదో గొప్ప ఆటగాడినని, తాను గట్టిగా ప్రయత్నిస్తే డేవిస్ కప్ కైనా ఆడగలనని అనుకుంటాడు గిరి. కానీ అతని ఆట అంతంత మాత్రమేనని అతని మిత్రుడయిన కథకుడికి తెలుసు. కొన్నేళ్ళ తర్వాత మిత్రులిద్దరూ కలుసుకున్నప్పుడు ఉద్యోగం మానేసి ఆట మీద దృష్టి పెట్టానని గిరి చెబుతాడు. కుటుంబమెలా గడుస్తుందని కథకుడు అడిగితే, కమల వాళ్ళ నాన్న కలిసిపోయారని, ఆయన డబ్బుతో వ్యాపరం చేయనున్నానని చెబుతాడు గిరి. కమల కరుడు గట్టిన ద్వేషాన్ని సైతం మర్చిపోయి తండ్రి పంచన ఎందుకు చేరిందో తెలుసుకోవాలంటే ఈ కథ చదవాల్సిందే.

ఉద్యోగం: ఈ కథ జగన్నాధం అనే ఓ న్యాయమూర్తి కథ, వెంకట రమణ అనే ఓ పేదింటి న్యాయవాది కథ. ఈ కుర్రప్లీడరు కేసులు వాదించే తీరుని గమనించి,అతని పట్ల ఆకర్షితుడవుతాడు జగన్నాధం. జగన్నాధం ఉద్దేశంలో లాయరుగా ప్రావీణ్యం సంపాదించడానికి కావలసినవి అభిరుచి, కాలం. వెంకటరమణ కూడా కాలక్రవేుణా ‘లా’ సూత్రాలకి చిలవలూ, పలవలూ కల్పించి వ్యాఖ్యానం చెయ్యడం, ప్రతి వాదనకీ పది కేసులు ఉద్ఘోషించి బలపరచడం నేర్చుకుంటాడని, కాలం కాని మరొకటి కాని నేర్పలేని ఏదో ప్రజ్ఞ వెంకటరమణలో వుందని, అది అతన్ని వృత్తిలో చివరంటా తీసుకుపోతుందని ఆయన భావిస్తారు. వీరి పరిచయం పెరిగి వెంకటరమణ జగన్నాధం ఇంటికి వచ్చిపోయేంత చనువు ఏర్పడుతుంది. ఈ క్రమంలోనే జగన్నాధం గారి కూతురు నిర్మల్, వెంకట్ ఒకరినొకరు ఇష్టపడతారు, పెళ్ళాడుతారు. కాలక్రమంలో వెంకట రమణ ప్రాక్టీసు తగ్గుతుంది, న్యాయవాది వృత్తి విరమించుకుని ఏదైనా ఉద్యోగం చూసుకోవాలనుకుంటాడు. ఇలా ఎందుకు జరిగిందో తెలుసుకోవాలంటే ఈ కథ చదవాలి.

గాళిదేవరు: ఇది ఓ కాఫీతోటల కంపెనీ మానేజరు, సిబ్బంది కథ. కంపెనీ వృద్ధి చెందుతూంటుందీ, కానీ అభివృద్ధికి పాటుపడుతున్న కార్మికులు మాత్రం ఎన్నో కష్టాలు పడుతుంటారు. చిన్న ఉద్యోగుల కష్టాలు వివరించి, ముఖ్యంగా వాళ్ళ యిళ్ళయినా బాగుచేసి నూతన వసతులు కల్పించమని కంపెనీని కోరేడు మానేజర్ సోమయ్య. ఎలక్ట్రిసిటీ కూడా యిస్తే బాగుంటుందని రాయబోయి, ఆగిపోతాడు. అలా చేస్తే వేునేజిమెంటుకీ, తక్కిన చిల్లర ఉద్యోగులకీ వుండే వ్యత్యాసం సన్నగిల్లిపోతుందేమోనని భయం వేసింది. ఎలక్ట్రిసిటీ ప్రసక్తి ఎత్తకుండా ఉత్తరం ముగించాడు సోమయ్య. మానేజ్‌మెంట్ ఒప్పుకుని, కార్మికుల ఇళ్ళు బాగు చేయించడానికి, బాత్ రూమ్‍లు కట్టించడానికి అనుమతినిస్తుంది. ఈ విషయమై మాట్లాడి ఒప్పందం చేసుకునేందుకు బెంగుళూర్ వెళ్ళి, కిల్లిక్‌సన్‌ అండ్‌ కంపెనీకి వెడతాడు. అక్కడి ఆఫీసర్ చిన్నప్ప వీరి ఎస్టేట్ వివరాలు విని గాళిదేవరు ఉన్న ఎస్టేట్ అని తెలుసుకుని తానే స్వయంగా అక్కడికి వస్తాడు. గాళిదేవరు ఎవరు? అయన మహత్యమేమిటి? ఆ ఎస్టేట్‌కి ఒకప్పటి యజమాని అయిన వేుంగిల్స్‌ గాళిదేవరు ఆగ్రహానికి ఎలా గురయ్యాడు? ఎందుకు ఎస్టేట్‌ని అమ్మేసుకుని స్వదేశం వెళ్లిపోయాడు? మానవ మనస్తత్వాలని, ప్రాకృతిక శక్తుల పట్ల మనుషుల భయాన్ని, తోటివారి బలహీనతలపై ప్రాక్టికల్ జోకులు వేసి ఆనందించే స్వభావాన్ని ఈ కథ చిత్రిస్తుంది. కాఫీ తోట వర్ణన అద్భుతంగా ఉంటుందీ కథలో.

ఫ్యాన్సీడ్రెస్‌పార్టీ: లలితా మురళీలది అన్యోన్య దాంపత్యం. మురళీ టీ తోటలో మానేజర్‌గా పనిచేస్తూంటాడు. మురళి ఆఫీసుకు వెళ్ళిపోతే, లలితకి ఏమీ తోచదు. టీ తోటల్లో జీవితం ఎంతో ఒంటరిగా వుంటుంది. ఇక్కడ చాలా భాగం కూలీలే. కొద్దిమంది గుమాస్తాలూ, ఫ్యాక్టరీ సిబ్బంది కూడా వుంటారు. వేునేజ్‌మెంట్‌ హోదాలో వున్నవాళ్ళు వీరితో కలవడం ఎలానూ పడదు. ఉన్న మానేజ్‌మెంట్ ఉద్యోగులందరూ కలిసేదీ ఏ మూడు నెలలకి ఒకసారో అవుతుంది. ఈ సారి అందరూ కలిసినప్పుడూ, ఏవో రొటీన్ కార్యక్రమాలు కాకుండా కొత్త, భిన్నమైన కార్యక్రమాలు రూపొందించాలని అనుకుని ఫాన్సీ డ్రెస్ పార్టీ ఏర్పాటు చేస్తుంది లలిత. అందరూ తాము వేసుకోబోయే డ్రెస్ గురించి గోప్యంగా ఉంచాలి, కనుక తాను వేసుకోదలచిన జపాన్ డ్రెస్ గురించి భర్తకి చెప్పదు లలిత. ఒక రోజు అనుకోకుండా ఆ డ్రెస్‌ని చూస్తాడు మురళి, అది అతనికి నచ్చదు, దాన్ని వేసుకోవద్దంటాడు. భార్యభర్తలలో అభిప్రాయబేధాలొస్తాయి. ఇద్దరూ ఒకరిమీద ఒకరు అలుగుతారు. తర్వాత ఏం జరిగిందనేది ఆసక్తిదాయకంగా ఉంటుంది. ఒక ఫాన్సీ డ్రెస్ లలిత మురళీల మధ్య దూరం కల్పిస్తే, మరో ఫాన్సీ డ్రెస్ వారిద్దరిని కలుపుతుంది. టీ ఎస్టేట్‌లో పనిచేసే ఉద్యోగుల జీవితాలను దగ్గరగా చూపిస్తుందీ కథ.

క్లబ్ నైట్: ఒకప్పుడు బాగా రాసే రచయిత హఠాత్తుగా రాయడం మానేస్తాడు. టీ ఎస్టేట్ ప్రెసిడెంట్ కాబట్టి పనుల ఒత్తిడి వలన రాయడం లేదని పాత మిత్రుడు భావిస్తాడు, కానీ ఆ రచయిత అసలు వివరం ఇలా వివరిస్తాడు “ఎవరో ఎక్కడో మెచ్చుకుంటున్నారని నెలలూ, ఏళ్ళూ తరవాత వినికిడిగా తెలిస్తే ఏం తృప్తిగా వుంటుంది? రాసింది నీ చుట్టూ వున్న వాళ్ళని కదిలించడం చూడగలిగితేనే కదా ఇంకా రాయాలనే వుత్సాహాం పుట్టేది!” అంటాడు. మిత్రుడు అంగీకరించడు. మళ్ళీ రాయాలని పట్టుపడతాడు. మళ్ళీ రాయడం తన వల్ల కాదని, “గడించిన పేరుని భద్రంగా రక్షించుకుంటూ రాయడం మానెయ్యాలా, చిత్తశుద్ధితో రాసి ఆకట్టుకున్న వాళ్ళ అభిమానాన్ని పోగొట్టుకునే ప్రమాదాన్ని ఎదుర్కోవాలా?” అంటాడు. చివరికి అతను మళ్ళీ రాసాడో లేదో తెలుసుకోవాలంటే ఈ కథ చదవాలి.
పచ్చటి టీ, కాఫీ తోటలలో చూడడానికి అందంగా ఉండే బయట కొండలూ, స్వచ్ఛమైన గాలి అన్నీ ఉంటాయి. వీటితో పాటు పెద్దా చిన్నా తారతమ్యాలూ, స్పర్థలూ కావేషాలూ, నటనలూ, ఆశ్రిత పక్షపాతాలూ, అన్ని చోట్లా వున్నట్లే ఇక్కడకూడా అదే మోతాదులో తాండవిస్తూ వుంటాయని ఈ కథ చెబుతుంది.

చివరిదాక ఆసక్తిగా చదివించే కథలున్న ఈ పుస్తకం డిజిటల్ రూపంలో కినిగెలో లభిస్తుంది. వెల రూ. 50/- . నెలకి రూ. 30/- అద్దెతో కూడా చదువుకోవచ్చు.

వేలుపిళ్లై On Kinige

కొల్లూరి సోమశంకర్

Related Posts:

కృష్ణారెడ్డి గారి ఏనుగు

అభిజాత్య కన్నడ-తెలుగు భాషా (అనువాద) సంశోధన కేంద్రం (రిజిష్టర్డ్‌)

ఇం.నెం. 5-10, రోడ్‌ నెం. 21, దీప్తిశ్రీనగర్‌, మియాపూర్‌ పోస్ట్‌

హైదరాబాద్‌ – 500 049. ఫోన్‌ : 040-65520386

మొబైల్‌: 9052563666కృష్ణారెడ్డి గారి ఏనుగు

మూలం : దివంగత పూర్ణచంద్ర తేజస్వి

అనువాదం : శాఖమూరు రామగోపాల్‌

ఇం.నెం. 5-10, రోడ్‌ నెం. 21,

దీప్తిశ్రీనగర్‌, మియాపూర్‌ పోస్ట్‌

హైదరాబాద్‌ – 500 049.

ఫోన్‌ : 040-65520286

ధర : రూ. 100/-

ప్రథమ ముద్రణ

జనవరి, 2011

ప్రతులు : 1,000

డి.టి.పి.

చేగిరెడ్డి వెంకటేశ్వరరెడ్డి

సెల్‌: 9989253506

ప్రింటర్స్‌

శ్రీ ఉదయ్‌ ప్రింటర్స్‌

నారాయణగూడ, విఠల్‌వాడి

హైదరాబాద్‌

ఫోన్‌ : 64511385, 23260110

ప్రతులకు:

శాఖమూరు రామగోపాల్‌

ఇం.నెం. 5-10, రోడ్‌ నెం. 21, దీప్తిశ్రీనగర్‌,

మియాపూర్‌ పోస్ట్‌, హైదరాబాద్‌ – 49.

ఫోన్‌: 04065520286, మొబైల్‌:9052563666

ప్రచురణ/పంపిణీదారులు :

అభిజాత్య కన్నడ – తెలుగు భాషా (అనువాద) సంశోధన కేంద్రం (రిజిష్టర్డ్‌)

ఇం.నెం. 5-10, రోడ్‌ నెం. 21, దీప్తిశ్రీనగర్‌, మియాపూర్‌ పోస్ట్‌

హైదరాబాద్‌ – 500 049. సెల్‌ : 9052563666


కథాక్రమం

తేట తెలుగులో కన్నడ కస్తూరి.. 6

అభిశంస.. 7

ఏరిన ముత్యాలు…. 9

నా మాట.. 12

కృష్ణారెడ్డి గారి ఏనుగు… 15

ఒక రూపాయి….. 76

మాయదారి మనస్సులోని మర్మం….. 93

వ్యభిచారం…. 111

వరాహ పురాణం….. 136

కాంచన రధం…. 162

ఫలితం…. 179

పేగుబంధం…. 195

పగుళ్ళు….. 213

యాతన (హింస). 225

వదులుకోటం (తెంచుకోటం). 239

తాతగారి వారసత్వ పరుపు మీద మనమడికి ఎంత నిద్రో!. 248

ఆముదం త్రాగిన తాసీల్దారు… 259

పాపం పిచ్చయ్య స్థితి.. 271

వైరాగ్యంలోని మహిమ… 281


దివంగత పూర్ణచంద్ర తేజస్విగారు కన్నడంలో సహజసుందరంగా అందించిన కథలను సేకరించి వాటిని తెలుగువారికి అందించాలని అనువాదం చేసిన శ్రీ శాఖమూరు రామగోపాల్‌గారు అభినందనీయులు. అందులో పెద్ద కథ విలక్షణమైన కథగా కృష్ణారెడ్డిగారి ఏనుగుఉన్నందువలన ఆ కథ విలక్షణం వల్ల ఈ కథా సంపుటికి ఆ కథ పేరే పెట్టడం జరిగింది.

Continue reading

Related Posts: