“వంగూరి ఫౌండేషన్ అమెరికా” వారి ఎంపిక చేసిన పుస్తకాలపై 50% ప్రత్యేక తగ్గింపు

ఉగాది సందర్భంగా వంగూరి ఫౌండేషన్ అమెరికా వారి కినిగె ఈ-బుక్స్  పై 50% ప్రత్యేక డిస్కౌంటు లభిస్తుంది.ఈ అవకాశం ఉగాది వరకు మాత్రమే గమనించగలరు.

వంగూరి ఫౌండేషన్ అమెరికా వారి పుస్తకాల కోసం ఇక్కడ క్లిక్ చేయండి.

కినిగెలో డిస్కౌంటు లభ్యమయ్యే వంగూరి ఫౌండేషన్ అమెరికా వారి పుస్తకాలు:

 

vanguriF

1 తూర్పు బడి… పడమర గుడి… కలశపూడి శ్రీనివాసరావు
2 అమెరికామెడీ నాటికలు వంగూరి చిట్టెన్‍ రాజు
3 అమెరికా తెలుగు కథానిక – పదవ సంకలనం మల్టిపుల్ ఆథర్స్
4 ప్రవాసాంధ్రుల ఆశాకిరణం పూడిపెద్ది శేషుశర్మ
5 ఆత్మార్పణ పెమ్మరాజు వేణుగోపాలరావు
6 అమెరికా తెలుగు కథా సాహిత్యం – ఒక సమగ్ర పరిశీలన వంగూరి చిట్టెన్‌రాజు మరియు తన్నీరు కళ్యాణ్ కుమార్
7 విదేశీ కోడలు కోసూరి ఉమాభారతి
8 అమెరికా తెలుగు కథానిక – తొమ్మిదవ సంకలనం మల్టిపుల్ ఆథర్స్
9 అవంతీ కళ్యాణం లలితా రామ్
10 ఘర్షణ – కథలు అపర్ణ మునుకుట్ల గునుపూడి
10 ఘర్షణ – కథలు అపర్ణ మునుకుట్ల గునుపూడి
11 అమెరికా తెలుగు కథానిక – 12 వ సంకలనం మల్టిపుల్ ఆథర్స్

Related Posts:

‘మృత్యు’ముఖంలో ఎన్నెన్ని హావభావాలో..! – “మరణతరంగం”పుస్తకంపై సమీక్ష

‘‘ఎంతొ ఆరాటపడుతు జీవింతు వౌర
మృతియె లేకున్న రుచి ఏది బ్రతుకులోన’’

-అని గాలిబ్ అన్నట్లు, జీవించి వుండగానే మరణం పట్ల సజావైన దృక్పథం ఏర్పడాలి. చాలామంది మృత్యుభయంతో అనుక్షణం చస్తూండడం కూడా చూస్తూంటాం. ఏ పనిచేసినా అందరిలా చేయనివాడు కూడా అందరిలాగే చచ్చిపోతాడు. పాలగుమ్మి పద్మరాజుగారి ‘వియ్యన్న తాత మరణం’ కథ ఈ సంకలనంలో వుంది. ఆ మాటకొస్తే ఆయనవే ‘బాల్యం’, ‘గాలివాన’ కథలూ వున్నాయి. ‘మరణాన్ని గౌరవించిన రచయితల్లో పాలగుమ్మి పద్మరాజుగారి తరువాత ఎవరయినా.. ’అంటారు గోపాలం. ‘మరణ తరంగం’ పేర గోపాలం గారు వివిధ భాషలనుండి అనువదించిన పదహారు కథలు ఇందులో వున్నాయి. వివిధ ప్రపంచ భాషా కథలివి. పాలగుమ్మి పద్మరాజుగారి శత జయంతి సందర్భంగా ‘కథానికాజీవి’ వేదగిరి రాంబాబు శ్రీ వేదగిరి కమ్యూనికేషన్స్ పేర వీటికి గ్రంథరూపం కల్పించారు.

‘‘మనం పుట్టిన మరుక్షణం నుంచే చావుమొదలవుతుంది. ఈ సంగతి ఎవరికీ నచ్చదు. ఎవరికీ అర్థం కాదు. మనిషి బతుకు కథకు చావు ఒక అందమైన అంతం. వద్దంటే అది ఆగదు! ఎప్పుడొస్తుందో తెలియదు. కనుకనే చావంటే అదొక అర్థం గాని విషయం!మరణం మనిషిని రకరకాలుగా తాకుతుంది. బుజ్జగిస్తుంది. బాధ పెడుతుంది. బాధనుండి విముక్తివస్తుంది. కావలసిందల్లా మనం మరణం గురించి అర్థం చేసుకోవడమే!’’ అంటారు గోపాలం.

ఇందులోని పదహారు మరణ తరంగాలూ ఆ అర్థం చేసుకునే క్రమంలో ఉపకరించేవే. ‘మృత్యువంటే?’అనే రచనలో పోయినవాళ్ళకోసం దుఃఖించడం వ్యర్థం అన్న భావన వుంది. ‘‘పిన్నవారూ, పెద్దవారూ, అజ్ఞులూ, విజ్ఞులూ అందరూ మరణానికి సమానులే. తండ్రి కొడుకును కాపాడలేడు. తల్లి కూతురిని కాపాడలేదు. ఎవరూ ఎవరినీ కాపాడలేరు. అందుకని శాంతి కోరుకున్నవారు మరణంవల్ల కలిగే దుఃఖాన్ని త్యజించాలి!’’ అని బోధించాడు బుద్ధుడు. దక్షిణ అమెరికా, టర్కిష్ జానపద కథలూ ఇందులో అందించారు రచయిత. మిగిలిన జీవిత ఘటనల్లో ఎంతటి వైవిధ్యం కనబడుతుందో చావులోనూ అంత వైవిధ్యం కనబడుతుంది అన్న ‘ఉదయం’ కథలోని మాట సత్యం.

మడగాస్కర్ ప్రజల జానపద కథలో మనిషే మరణాన్ని కోరుకున్నాడనే విషయం వుంది. మీకెలాంటి మరణం కావాలో కోరుకోండి అని తొలి మానవుల జంటని దేవుడు అడిగాడట- ‘చంద్రుడి లాగానా? చెట్టులాగానా?’ అని.
చంద్రుడయితే తరిగి తరిగి ఒకనాడు మాయమవుతాడు. కానీ తిరిగి తను పుడతాడు. పెరుగుతాడు. కానీ చెట్టు విత్తులనూ, పిలకలనూ విడిచి తాను నశిస్తుంది. తన సంతతి మాత్రం సాగుతూనే వుంటుంది. సంతానం అవసరం లేదనుకుంటే చావుకూడా వుండదు. కానీ ఆ ఇద్దరు తొలి మానవులే ఎన్నాళ్ళు ఎవరికోసం బ్రతకాలి అందుకని వారు పిల్లలే కావాలని దేవుణ్ణి అడిగారట. అంచేతే మనం పోతాం, మనవారు వుంటారు అది సాగుతూంటుంది. ‘మృత్యుభోజనాలు’ కథ ఒళ్ళు జలదరింపచేస్తుంది. ఎవరైనాపోతే ఆ ఇంట వండుకోరు. పక్కవారు ఎవరైనా భోజనం పంపిస్తారు. ఈ టర్కిష్ కథలో ఆకలి ఆరాటాన్నీ, ఆర్తినీ విశదపరుస్తూ దరిద్ర స్వరూపానికి పరాకాష్టగా- పిల్లవాడు జ్వరం వచ్చిన ‘‘అన్న చచ్చిపోతే మూల బంగళావాళ్ళు భోజనం పంపిస్తారు కదూ!’’ అని తల్లిని అడుగుతాడు. ఇటాలియన్ కథ ‘యుద్ధం’, ఫ్రెంచ్‌కథ ‘ప్రియురాలి కోసం’ జపాన్ కథ ‘దేశభక్తి’ అర్జెంటీనా కథ ‘గొడ్డలివేటు’ అన్నీ మృత్యువుతో ముడివడిన కథలే.‘సహజ మరణాలకన్నా హత్యలు, ఆత్మహత్యలు, ప్రమాదాల్లో ప్రాణం కోల్పోవడాలు వార్తాపత్రికల్లో ప్రముఖంగా వస్తూంటాయి. సెలబ్రిటీల చావులు, అంతిమ సంస్కారాల ఫొటోలతో సహా సంతాప సందేశాలతో సహా అచ్చవుతూంటాయి. చావు అందరికీ ఒకటే అ యినా- చనిపోయినవారి గురించిన మీడియా కవరేజ్‌లు, నివాళి వ్యాసాలతో ‘చచ్చే చావుగా వుంద’ని వాపోయేవాళ్ళూ వున్నారు. మ రణం తరువాత తన గురించి సమాజంలో, కుటుంబ సభ్యులలోనూ ప్రకంపనలూ, ప్రతిస్పందనలూ మరణించినవారికి తెలుస్తాయో లేదోకూడా తెలియదు. ఆత్రేయ అన్నట్లు-

పోయినోళ్ళందరూ మంచోళ్ళు
ఉన్నోళ్ళు పోయినోళ్ళ తీపిగుర్తులు..

మరణ తరంగం అంతరాంతరాల్లో ఆలకించదగిన సముద్రం ఘోష. గోపాలం రేపిన ‘అల’జడి ఆహ్వానింపదగింది.

-సుధామ,03/01/2015,ఆంద్రభూమి – శనివారం – అక్షర.

మరణతరంగం” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

మరణతరంగం on kinige

MaranaTarangam600

Related Posts:

విలువల సంఘర్షణ – “ఘర్షణ – కథలు” పుస్తకం పై సమీక్ష

అపర్ణ కథల్లో రెండురకాల జీవితాల్ని చూస్తాం. ఒకటేమో, అమాయకమైన తెలుగు గ్రామీణ జీవితం, మరొకటి గడసరి అమెరికన్ సంస్కృతి. ‘ఆగుపిల్లా! మామూలు చామంతులు కాదు. ఒకటిన్నర శేరు నక్షత్ర చామంతులు తెమ్మని చెప్పు. చామంతులకి మాచిపత్ర ఆకులు అందంగా ఉంటాయి. అవో గుప్పెడు తీసుకుని రమ్మను. జడగంటలున్నాయా?’ (పువ్వుల జడ)…బతుకు పరుగులో పడిపోయి, దాదాపుగా మనం మరచిపోతున్న సంప్రదాయ సంభాషణలు ఈ కథల్లో వినిపిస్తాయి. ‘చూసేవా! సంగీత సాధన వల్ల ఎన్ని ఉపయోగాలో? ఆనందం, ఆరోగ్యం, సాహిత్యం, భాషా పటుత్వం, స్పష్టత, భక్తి’ (సంగీతమే వర సుఖదాయిని)… తరహా హెచ్చరికలు ఆనందం పేరుతో మనమంతా నెత్తినెక్కించుకుంటున్న అపభ్రంశ జీవనశైలిని గుర్తుచేస్తాయి. ‘అమెరికా వస్తే విజ్ఞానం పెంచుకుంటామనుకున్నాం. కానీ విలువల్ని మర్చిపోతామనుకోలేదు’ (లోకరీతి)… అచ్చంగా అమెరికన్లలా బతకాలనుకునే పిల్లల్ని తలుచుకుని ప్రవాస మాతృమూర్తులు అనుభవించే సంఘర్షణను చూస్తాం. కుక్కపిల్లల పుట్టినరోజు పార్టీల్ని ఒకప్పటి కాలభైరవ సమారాధనతో పోల్చే సునిశితమైన హాస్యమూ సంకలనంలో అంతర్లీనమే. అమెరికాలో ఉంటున్న రచయిత్రి… గ్రామీణ జీవితాన్నీ, నేటి అమెరికన్ జీవనశైలినీ సరిపోల్చి చక్కని సందేశాలతో కథల్ని ముగించారు.

- వినోద,ఈనాడు ఆదివారం, 18 – 1 – 2013.

Gharshana

“ఘర్షణ – కథలు డిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

ఘర్షణ – కథలు on kinige

GharshanaKathalu600

 

Related Posts:

‘వటపత్రశాయి’ పుస్తకం పై సమీక్ష

ఆధునిక తెలుగు కథాసాహిత్యంలో సుపరిచిత కథకులు సింహప్రసాద్‌గారు. పతనమవుతున్న మానవత్వ విలువలపై ఆవేదనతో రాస్తున్న అతికొద్దిమంది రచయితల్లో ఆయన ఒకరు. వర్తమాన జీవనంలోని సున్నిత అంశాలపై హృద్యంగా రాస్తున్న కథలు, నవలలు ఆకట్టుకుంటున్నాయి. గత నాలుగు సంవత్సరాల్లో వివిధ దిన, వార, మాస పత్రికలు నిర్వహించిన కథల పోటీల్లో పురస్కారం పొందిన ఇరవై కథలతో ‘వటపత్రశాయి’గా ఏడవ కథాసంపుటిని వెలువరించారు. పోటీకి వచ్చిన కొన్ని వందల కథలనుండి ఎన్నుకున్న కథ అంటే సహజంగానే ఆసక్తి కల్గుతుంది. మన చుట్టువున్న రకరకాల వైవిధ్య జీవితాల్ని పరిచయం చేస్తాయి.
మానవ సృష్టి నిరంతరంగా సాగుతూనే సమాజముంటుంది. గత కొన్ని దశాబ్దాలుగా పిండదశలోనే పిల్లలను తొలగించుకుంటున్న దుస్థితిని మనం చూస్తున్నాం. మాతృత్వం చాలా గొప్ప సంప్రదాయమని చాటిచెప్పిన కథ ‘వటపత్రశాయి’. పిల్లలను కనడానికి అనువైన యవ్వన కాలాన్ని కాదనుకొని డబ్బు సంపాదనకై పరుగుపెడ్తున్న దంపతులకు చెంపదెబ్బలాంటి కథ ఇది. కుటుంబ జీవనంలో స్ర్తీని ఒక సంపాదన వనరుగాకాక జగన్మాతగా చూడాలని, ప్రతి బిడ్డా వటపత్రశాయేనని చెప్పిన కథ ఆలోచింపజేస్తుంది. ఇతర పనులను వాయిదావేసుకున్న ఫర్వాలేదు కాని తల్లికావడాన్ని వదులుకోవద్దని నేటి తరానికి హితవుచెప్పిన కథ ఇది. మనం సుఖంగా ఉంటేనే సరిపోదు మన చుట్టు ఉండేవాళ్ళుకూడా బాగుండాలి. అనాథ పిల్లలకోసం నడుపుతున్న ఆశ్రమానికి సహాయం చేయడంకోసం అన్నపూర్ణమ్మ రోజు వండుకునే బియ్యంలో పిడికెడు తీసి పక్కనపెట్టి, నెల రోజుల తర్వాత ఆ బియ్యాన్ని నిర్వాహకులకు ఇచ్చి, వాళ్ళకు కొంత సహాయపడగలిగినందుకు తృప్తిచెందుతుంది. తమ పిల్లలు తమకు పెట్టకపోయినా పింఛన్ డబ్బులతో కాలం వెళ్లదీస్తున్న వృద్ధులు వాళ్ళు. తాము రోజు తినే తిండిని తగ్గించుకుని సహాయం చేస్తారు. మానవీయతకు అద్దంపట్టిన కథ ‘గుప్పెడు.’
‘వంశవృక్షం’ కథలో నీ ఎదుగుదల మూలాలను తెలుసుకోవాలని సూచిస్తారు. ఉద్యోగ జీవితంలో అవినీతి అక్రమ సంపాదనలో కూరుకుపోయి, తమకు నీడనిచ్చిన కుటుంబాన్నే మరిచిన ఉదంతం బాధను కల్గిస్తుంది. పేద పురోహితుడి అశక్తికి కారణం తనదగ్గర డబ్బు లేకపోవడం. తన పూర్వీకులు సహాయం కోరిన వాళ్ళను ఆదుకొని ఆస్తులను కోల్పోతారు. ఆ రెవెన్యూ అధికారి కుటుంబం కూడా వాళ్ళు అందించిన సహకారంతోనే నిలిచింది. ఆ కుటుంబం కష్టాల్లోఉంటే సహాయం చేయాల్సిందిపోయి డబ్బులకోసం సతాయించడం చూస్తాం. నేటి మానవ నైజానికి నిదర్శనమీ కథ. సాఫ్ట్‌వేర్ రంగంలో పనిచేస్తున్న మహిళలపై జరుగుతున్న అత్యాచార యత్నాలను ధైర్యంగా తిప్పికొట్టి, తగిన బుద్ధిచెప్పిన కథ ‘ఓ సీతకథ.’ ఒక లంబాడీ మహిళ బతుకుకై ఆర్ట్స్ విద్యార్థులకోసం తన అందమైన యవ్వనాకృతుల్ని అర్పించిన దీనగాథ ‘మోడల్’కథ. ఆమె దేహాన్ని చిత్రించి ఎంతోమంది గొప్ప చిత్రకారులైనారు. ఆమె ఆకలి మాత్రం తీరలేదు. చివరికి ఆమె శవంగా మారినా మోడల్‌గా ఉండి దహన ఖర్చులను సంపాదించుకున్న తీరు ద్రవింపజేస్తుంది.
కార్పొరేట్ విద్య అందించే డబ్బుకు దాసోహమన్న గణిత మేధావి సూరిబాబు గుర్తింపుకై పడిన తండ్లాటలో చదువుచెప్పిన గురువునే తక్కువచేసి ఆలోచించుకుంటాడు. పూర్వ విద్యార్థులు అందరు కలిసి ఆ గురువుకు సన్మానం చేయాలను కుంటారు. గురువు మాత్రం నాకన్న విశేషమైన కృషిచేసిన నా శిష్యుణ్ణి సన్మానం చేస్తానని సూరిబాబుకు సన్మానం చేస్తాడు. దాంతో అతనిలోని అహంకారం పటాపంచలవుతుంది. గురువు ఔన్నత్యాన్ని చాటిచెప్తూనే నేటి విద్యారంగంలోని అవలక్షణాలను కూడా చర్చించిన కథ ‘పరబ్రహ్మం.’
రైతులకు గిట్టుబాటు ధర లేక పంటలు వేయమని సమ్మెచేస్తున్న పట్టించుకోని ప్రభుత్వాల తీరును ఎండగట్టిన కథ ‘రోమ్-నీరో-్ఫడేలు’. ఆడపిల్లల జనాభా తగ్గడంతో పెళ్ళికోసం పరీక్షలురాసే రోజులు రానున్నాయని హాస్యంగా చెప్పిన కథ ‘రేపింతే’. ప్రపంచీకరణ ప్రభావంతో ప్రతీది వినోదభరితంగా ఉండాలనే మీడియా ప్రభావంవల్ల మానవత్వం మసకబారుతున్న వైనాన్ని కుండబద్దలుకొట్టినట్లు చెప్పారు ‘విష పరిష్వంగం’ కథలో. ఒక నిరుద్యోగి ఉరిని ఈవెంట్‌గా మార్చుకున్న వ్యాపార కోణాన్ని చూపి నివ్వెరపోయేట్లు చేశారు. మార్పు సహజం. రెండు దశాబ్దాల క్రితందాక కూడా కంప్యూటర్ల ప్రభావం లేదు. టైపు మిషన్‌లతో ఉపాధి చూసుకున్నవారు ఉన్నారు. ఆధునిక సాంకేతిక పరిజ్ఞానంతో శరవేగంగా వచ్చిన ప్రగతితో ఆ కుటుంబాలవారు ఉపాధికి దూరమయ్యారు. ఐనా నమ్ముకున్న వృత్తే కాపాడుతుందని నమ్మిన వృద్ధుని కథే ‘పాతనీరు’. పాతది పనికిరాదనే దృక్పధాన్ని నిరసించే కథ ఇది. ఒకప్పటి పాత నీరు కొత్తదే అని తెలిపిన కథ. దేని ఉపయోగం దానికి ఉంటుందని తెలుస్తుంది. నేటి అవినీతి ఉద్యోగులకు బుద్ధిచెప్పటానికి ఒక తెలివైన పౌరుడు లంచంగా దొంగనోట్లును ఇస్తాడు. దాంతో ఆ ఉద్యోగి పడిన అవస్థల కథే ‘గాంధీతాత నవ్వేడు’. నగరంలో పెరిగిన సెల్‌టవర్ల మూలన అంతరిస్తున్న పక్షుల గూర్చిన కథ ‘వాయసం.’ పిండాలు తినే కాకులు కనబడవు. మారిన అలవాట్లు కాకులకు తిండి లేకుండా చేశాయని ఆవేదన చెందుతారు. చివరికి పిండాలు తినడానికి కాకులు రావు కాని కుక్కలు ఎగబడుతున్నాయని వాస్తవ స్థితిని చిత్రీకరించారు. సర్‌గోసి మదర్ గూర్చిన కథ ‘తల్లీ నిన్నుదలంచి..’ పేదరికంలో మగ్గుతున్న ఒక కుటుంబం గర్భాశయాన్ని అద్దెకివ్వడం ద్వారా వచ్చే ఆదాయంతో బతకాలనుకుంటే, బిడ్డను కన్న తర్వాత వీసా సమస్యతో బిడ్డను వదిలించుకుంటే ‘విత్తనం నాదికాకపోయిన భూమినాదే’ కాబట్టి నేనే పెంచుకుంటానని ఆ తల్లి ధైర్యంగా బిడ్డను స్వీకరిస్తుంది.
మనిషికి నిజమైన ఆనందం సంపాదనలో లేదని పదుగురికి సహాయం చేయడంలోనే ఉందని చెప్పే కథ ‘మనిషి దేవోభవ’. అత్తాకోడళ్ల పోట్లాటలు కొత్తకాదు కాని టీవిల దగ్గరనుండి నేటి ఫేస్‌బుక్ వాడకం దాకా వాళ్ళ రుసరుసలు, తిట్టుకోవడాలు హాస్యంగా వివరిస్తూనే కొడుకుగా, భర్తగా పాత్రలను పోషిస్తూ ఆ పురుషుని బాధలను వర్ణించారు ‘ఒక యుద్ధం ఒక సంధి ఒక శాంతి’ కథలో. భార్యభర్తల మధ్య ఉండే చిన్నచిన్న సంఘటనలకు విపరీతంగా ఆలోచించి చిన్నాభిన్నం అవుతున్న ఇతివృత్తాలు అనేకంగా ఉన్నాయి. అందుకే తొందరపడి కఠిన నిర్ణయాలను తీసుకోవద్దని చెప్పేకథ ‘మనసా! తొందరపడకే.’ విలాసానికి బానిసైన ఒక బ్యాంకు ఉద్యోగి పతనావస్థకు దర్పణం ‘జారుడుమెట్లు’కథ. ‘రెయిన్‌రెయిన్ గో అవే’ రైమ్స్ నేర్పే కానె్వంటు చదువులను నిరసిస్తూనే వాన అవసరాన్ని చాటిచెప్పిన కథ ‘వాన వాన వల్లప్ప’. కుటుంబం ఆనందాల హరివిల్లు అంటారు. ఒక ఇంజనీరింగ్ ప్రొఫెసర్ ఉమ్మడి కుటుంబంగూర్చి పెద్ద ఉపన్యాసం ఇస్తే, ఒక చానల్ రిపోర్టర్ ఆయన అబద్ధాలను బట్టబయలుచేసి, తల్లిని మరిచిన నీది ఒక ఉమ్మడి కుటుంబమా? అని నిలదీస్తుంది ‘ఆత్మపదార్థం’ కథలో. ఇంకా కుల వివక్ష కొనసాగుతుందని, కష్టాల్లో ఉన్నవాళ్ళకు వాటి పట్టింపు ఉండదని, ఉత్తరాఖండ్ వరదల్లో యాత్రికులను సైనికులు కాపాడిన సాహస విధానాన్ని చక్కటి కథనంతో వివరించిన కథ ‘గబ్బిలం’. మొత్తంమీద విభిన్న సామాజిక అంశాలపై రాసిన సింహప్రసాద్ కథలు ఒక్కసారైన చదవాల్సిందే. కొలకలూరి ఇనాక్, పోరంకి దక్షిణామూర్తి, రాచపాళెం చంద్రశేఖరరెడ్డి ముందుమాటలు ఈ సంపుటికి అదనపు ఆకర్షణ.

-గోపగాని రవీందర్ 20/12/2014.ఆంద్రభూమి – శనివారం – అక్షర

“వటపత్రశాయి” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

‘వటపత్రశాయి’ on kinige

 

Vatapatrasai600

Related Posts:

సగటు జీవితాల్లో హాస్య చతురత – “సుబ్బలక్ష్మి కథలు” పుస్తకంపై సమీక్ష

‘చినుకు’ మాసపత్రికలో ప్రచురించబడిన చిన్న చిన్న కథలతో ఈ పుస్తకాన్ని ప్రచురించారు. మధ్యతరగతి సంసారాల్లో జరిగే సంఘటనలకు కాస్తంత హాస్యం జోడించి కథలుగా రూపొందించారు. సుబ్బారావూ సుబ్బలక్ష్మీ ఈ కథలలో నాయికా నాయకులు.పెన్ను, సెల్‌ఫోను లాంటి ఇంగ్లీషు పదాలు తెలుగులో కలసిపోయాయి. మాతృభాషాభిమానంతో అన్నీ తెలుగులో పలకాలని ప్రయత్నిస్తే ఎంత గందరగోళంగా ఉంటుందో తెలిపే కథ ‘బాబాయ్ అభిమతం’.శ్రీరామ నవమి పందిట్లోనుంచి చెవులు చిల్లుపడేటట్లు వస్తున్న పాటలకు తట్టుకోలేకపోయింది సుబ్బలక్ష్మి. బాగా ఆలోచించి మైక్ సెట్ కట్టేయించడానికి ఒక పథకం వేసి విజయం సాధిస్తుంది. ‘శ్రీరామనవమి’ కథలో ఇది కథాంశం.అన్నం తిన్నాక కంచం కడిగి బోర్లించడం మొదలుపెట్టాడు సుబ్బారావు. వద్దని సుబ్బలక్ష్మి చెప్తున్నా వినిపించుకోడు. కొన్నాళ్లయ్యాక పరిస్థితి మారిపోవడంతో కడగడం మానేస్తాడు సుబ్బారావు. ఇది ‘ఎంగిలి పళ్లెం’ కథ.పుస్తకమంతా ఇటువంటి చిన్న చిన్న సంఘటనలతో ఉంది. కథల సంఖ్య 21. పుస్తకం చివర ‘మల్లెతీగ’ పేరుతో ఒక నాటిక కూడా ఉంది. అందులోనూ హాస్యరసం ప్రధానాంశం.

-ఎం.వి.శాస్ర్తి,ఆంధ్రభూమి-అక్షర,27-09-2014.

సుబ్బలక్ష్మి కథలు” పుస్తకం డిజిటల్ రూపంలో కినిగె లో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి..

సుబ్బలక్ష్మి కథలు on kinige

 

SubbalaksmiKathalu600

Related Posts:

“చమత్కారం” పుస్తకంపై సమీక్ష

పుస్తకం పేరు ‘చమత్కారం’. చమక్కులు సరే నషాళానికి అంటే కారం కూడా ఉన్నదేమోనని వెదికితే చలవ మిరియాల కారమే దొరుకుతుంది. కబుర్లు చెప్పుకోనివాళ్లు కలసిమెలసి ఉండలేరు. మునిమాణిక్యం మొగుడూ పెళ్లాల సరసాలూ, విరసాలూ కలబోసిన స్వారస్యాన్ని మనకి అందించారు. శ్రీపాద వారూ తమ కథల్లో కొంత వాటా పంచుకున్నారు. పక్కవాళ్లని పలకరించకుండా ఉండలేరు కొంతమంది ప్రయాణాల పదనిసలలో. లోకాన్ని పట్టించుకోని రచయిత అందరూ అనుకునేట్లు నరకానికే పోతాడు. భమిడిపాటి ఎంచుకున్న గురుశిష్యుల సరస సంభాషణలు చదివితే ఏవో సినిమా పాటలు గుర్తొస్తాయి. ఒకోసారి ‘చెపితే వింటివ గురూ గురూ’ అంటే ‘వినకే చెడితిర శిష్యా శిష్యా’ అన్నట్టుంటుంది. భమిడిపాటి నూరిన చమత్కారాల్లో రాజకీయాలూ, విద్యారంగం, మహిళా లోకం, ప్రభుత్వ పథకాలూ, నరుల బలహీనతలూ వగైరా వగైరాలన్నీ ప్రస్తావనకొచ్చాయి.

ఆంధ్రభూమి,13-09-2014.

 చమత్కారం…! డిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

చమత్కారం…! on kinige

 

Chamatkaram600

Related Posts:

కాలక్షేపం కథలు పుస్తకంపై సమీక్ష

సాహితీ ప్రప౦చ౦లో అందరికీ అప్తుడు,రచయిత,జర్నలిస్టు మేడా మస్తాన్‌రెడ్డి.పలు పత్రికల్లో ఆయన రాసిన ముప్పయి కధల సంకలనమే ఈ పుస్తకం.ఇ౦దులోని కధలన్నీ హాస్యపు జల్లులు కురిపిస్తూ మనసును అహ్లాదపరిచేవే.ఈ పుస్తకానికి కాలక్షేపం కథలు అని పేరుపెట్టినప్పటికీ, ‘అన్నన్నా ! ఇవన్నీ జీవితాన్ని పరిశీలి౦చిన కధలు సుమా!’అని పఠితలచేతే అనిపి౦చగల చతురుడు మస్తాన్‌రెడ్డి. మచ్చుకి ‘ఎదురుదెబ్బ’ కధను చూస్తే భార్యతో నిత్యం తిట్టించుకునే భర్త బడాయికిపోయి చవగ్గా బట్టలు తెచ్చానని చెబితే ఊళ్ళోవాళ్ళక్కూడా బట్టలు తెమ్మంటూ భార్యయిచ్చిన లిస్టు అతగాడికి చేతి చమురొదిలిస్తుంది.మరో కధ ‘సుభాషితం’. రైల్లో పెళ్ళికూతురులా నటి౦చే హైటెక్ వ్యభిచారి కథ.ఇలా ఇ౦దులోని ప్రతీది పరిశీలనలోంచి కధగా రూపుదిద్దుకున్నదే.

నవ్య వీక్లీ , 12-11-2014 .

KalaKshepamKadhalu

 కాలక్షేపం కథలు డిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

కాలక్షేపం కథలు on kinige

 

KalakshepamKathalu600

Related Posts:

మిధ్యావాదనల మీద మెరుపు దాడి – “అవుటాఫ్ క‌వ‌రేజ్ ఏరియా” పుస్తకంపై సమీక్ష

వలస పాలనాకాల౦లో అగ్రహారాల్లో ఉన్న బడుల్లో మనువాద కావ్యాలనే బోధించేవాళ్ళనీ,ఏవో కూడికలు,గుణకారాలు తప్ప ఇతర ప్రకృతి సాంఘిక శాస్తాలేవి బోధించలేదని మద్రాసు గవర్నర్ జనరల్ మన్రో తయారుచేసిన అధికారిక నివేదిక తెలుపుతోంది. సాహిత్యమే ఒక సంపూర్ణ జ్ఞాన వ్యవస్థ అని నమ్మిన ద్విజవర్గం దాన్ని సంస్కరించడానికీ , సమానంగా పంపిణీ చేయడానికి నిరాకరింరారు. వలసాధునిక విలువల చైతన్యంతో పునరుజ్జీవన ఉద్యమం మొదలైంది.అదే భూసురుల సంఘసంస్కరోద్యమ౦ అయింది. అన్ని సాహిత్య ఉద్యమాలూ నిచ్చెన మెట్లు అంతర్వుల సామాజిక వ్యవస్థను పరిరక్షించే ప్రయత్నం చేశాయి.అభ్యుదయ,దిగంబర,పైగంబర,విప్లవ, స్త్రీవాద,తెలంగాణ వాద సాహిత్య ఉద్యమాలన్నీ కుల వాస్తవికతను నిరాకరించటమో లేదా గుర్తించి విస్మరించటమో చేశాయి కాని దళితవాదం, ముస్లింవాదం మాత్రం కులవ్యవస్థకు మూలమైన బ్రాహ్మణవాద భావజాలం మీద అవిరామ పోరాటం చేస్తూనే ఉన్నాయి. దళిత కధ నిజమైన జీవితాన్ని చిత్రించింది.మాదిగ కధ సమాజ చలన సూత్రాన్ని వివరించింది.సామాజిక వాన్తవికతలోని సంబావ్యతలను దళిత కథ చిత్రికపడితే,మాదిగ కధ కుల వాస్తవికతలను సూటిగా నిర్మించింది.అందుకే కుల వాస్తవికతను నగ్నంగా ప్రదర్శించే కథారూపం కూడా ఎలాంటి ఆభరణాలు లేకుండా నిరాడంబరంగా నిలబడి పకపకా నవ్వుతుంది.డాక్టర్ పసునూరి రవీందర్ రాసిన ఈ కధలు అగ్రకుల పాఠకులను చికాకు పెడతాయి,ఆగ్రహం తెప్పిస్తాయి. అగ్రవర్ణ పాఠకులకు కోపం తెప్పించేలా,వారిలో మార్పు తెచ్చేలా కధలు రాసేవాడే నిజమైన కథకుడు.

దళిత రాజకీయాల సంక్షోభ సమయమిది. హిందూత్వ అఖండ మెజార్టీతో అధికారంలోకి వచ్చిన సందర్భమిది. మానవ హనన రాజకీయాలకు సంపూర్ణ అధికారం దక్కిన విషాద సందర్బంలో ప్రచురిస్తున్న కథలవి. వేల సంవత్సరాలుగా దళితులను అస్పృశ్యులను చేసి,పరాధీనులను చేసి పాలిస్తున్న మనువాదానికి అనేక తలలున్నాయి.పెద్ద తల కాంగ్రెస్,చిన్నతల బీజేపీ. ఆ మనువాదానికి ప్రాదేశిక ముఖాలు చాలా ఉన్నాయి.వాటిలో ఒక ముఖం ఆంధ్రప్రదేశ్ ను పాలిస్తుంది, మరో ముఖం తెలంగాణను పాలిస్తుంది. దళిత రాజకీయాలను భూస్థాపితం చేసేందుకు బహెన్‌జీ మాయావతికి వ్యతిరేక౦గా ఈ అన్ని తలలూ అన్ని ముఖాలూ ఏకమయ్యాయి. తలలు వేరైనా, ముఖాలు ఎన్నైనా ఆత్మ మాత్రం ఒక్కటే.

మనువు వారసులకు,జాంబవంతుడి వారసులకూ మధ్య జరుగుతున్న సంగ్రామమే ఈ దేశ చరిత్ర అంటాడు విశారదన్.జాంబవంతుడి వారసుడిగా యుధ్ధనాదాన్ని వినిపిస్తున్నాడు డాక్టర్ పసునూరి రవీందర్. సాహితీ రంగంలో దళితుల కర్తవ్యం ఎలా ఉండాలన్న విషయం మీద సైధ్ధాంతిక చర్చలేవీ ఇప్పటివరకు జరగలేదు కాని దళిత రచయితలు మాత్రం సాహితీ క్షేత్రంలో చురుకైన పాత్రను పోషిస్తున్నారని ఈ కధలు నిరూపిస్తున్నాయి.ఈ కధలు ప్రపంచీకరణానంతర సాంఘిక జీవితాన్ని మన కళ్ళముందు పెడుతాయి. కులం ఒక పురాతన జ్ఞాపకమని దాన్ని అందరూ ఎప్పడో మరిచిపోయారని చాలామంది అగ్రవర్ణ పాఠకుల అభిప్రాయం.కులభావన ఆధునిక సమాజంలో ఎలాంటి ప్రాసంగికత లేని విషయమని,వివాహ నందర్భంలో తప్ప కులానికి ఎటువంటి విలువా సంఘ జీవితంలో లేదని ఆండ్రీబేతేయల్ లాంటి  సోషియాలజిస్టులు రాసేశారు. కులానికి ఆధునిక సమాజంలో ఎలాంటి ప్రాసంగితా లేదని వాదించిన ఆండ్రీ బేతేయిల్ బీసీలకు రిజర్వేషన్లు ఇవ్వాలని కేంద్రం నిర్ణయించినప్పుడు 2004లో బహిరంగంగా వ్యతిరేకించాడు.

పట్టణీకరణలో భాగంగా వెలిసిన అనేక ప్రభుత్వ, ప్రవేటు సంస్థలు వ్యాపార వాణిజ్యకేంద్రాలకు కుల౦ పట్టింపు ఉ౦డదని ఈ సోషియాలజిస్టుల భావన.ధనిక. పేద తారతమ్యమే తప్ప కుల భేదాలకు అస్కారం లేదనీ, అ రకంగా కులం సంఘ జీవిత౦ ను౦చి కనుమరుగై పోయిందని అగ్రవర్ణ వాదన.ప్రపంచీకరణ జరిగిన తర్వాత కులం మరింత బలహీనసడిందని మరో వాదన . శాస్త్ర ,సాంకేతిక అభివృధ్ది ముఖ్యంగా టెలికమ్యూనికేషన్స్ రంగంలో వచ్చిన అభివృధ్ది ప్రజల ఆలోచనల్లో మార్పు తెచ్చిందన్నది వాళ్ల పిడివాదం.కాని రవీందర్ కధలు అగ్రకుల వాదనలేవీ పసలేవని నిరూపిస్తున్నాయి. ఆధునికతను పుణికి పుచ్చుకున్న అగ్రవర్ణాలు మరింత శక్తివంతులయ్యారు.శాస్త్ర ,సాంకేతిక వికాసం వలన బ్రాహ్మణ బనియాలు మునుసెన్నడూ లేని రీతిలో బిలియనీర్లయ్యారు.దళితులు , శూద్రులు, ఆదివాసులు, ధర్మపరివర్తిత మైనారిటిలు కేవలం ఆధునికతకూ దాని సాంకేతికతకూ కేవలం వినియోగదార్లుమాత్రమే అయ్యారు. ఆధునిక యజమాని అగ్రకులస్తుడు- దాని భాధితుడు బహుజనుడు.

కంప్యూటర్ హవా ముగిసింది.ఇప్పుడంతా రియల్ఎస్టేట్ హవా నడుస్తుంది . గేటెడ్ కమ్యూనిటీలన్నీ అగ్రవర్ణ గేరీలయ్యాయి.అత్యాధునిక అపార్ట్‌మెంట్ బిజినెస్ దళితులకు ఒక్క ఫ్లాటు అమ్మడం లేదు . రియల్ఎస్టేట్ వెంచర్లు దళితులకు ప్రవేశం లేదంటున్నాయి. ‘గోవర్ణం’కథలో రియల్ఎస్టేట్ నిజస్వభావాన్ని చూపించింది.దళిత ఉద్యమకారుల వైఫల్యాలను ‘ఊగి,ఊగి… ఉయ్యాల’చూపిస్తుంది. ‘మేరా నెంబర్ కబ్ అయేగా…?’ కథ పల్లెసీమలను పట్టిపీడిస్తున్నకులాధిపత్యాన్ని ప్రతిఫలిస్తుంది.ఆధునిక కులరాజ్యం (మోడర్న్ క్యాస్ట్‌స్టేట్) దళితులను సామూహిక నరమేధం చేస్తుంది. ఈ సామూహిక హనన క్రియకోసం ఆది కొత్త ఆయుధాలను ఉపయోగిస్తుంది. తాగుడుకు బానిసను చేసిదళితులను చంపేస్తుంది.ఈ హత్యాకాండకు ‘సంపుడు పంజెం’ కథ సాక్ష్యం,కంప్యూటర్, క్యాస్టు రెండూ కలిసి జ్ఞానాన్ని కూడా వెక్కిరిస్తున్నాయని ‘జాగీర్’కధ వివరిస్తుంది. ఒక్కటేమిటి ఈ సంకలనంలోని ప్రతికథ ఆమూల్యమైనది.

తెలంగాణ ఉద్యమంలో ఒళ్ళు తెలియని పూనకంతో వూగిపోతున్న కాలంలోనే ఈ కధలన్నీ రాశాడు .భౌతిక పరిస్థితులను మార్చినంత మాత్రాన సమాజం లోని మానవ జీవితం మారదనీ,వాళ్ళ ఆలోచనా ప్రపందాన్ని మార్చటం వల్లేసంఘ పరివర్తన తీసుకురావచ్చనే అంబేద్కర్ అవగాహనకు పసునూరి రవీందర్ కధలు ఉపకరిస్తాయి.జీవితానికి,రచనలకూ మధ్య వైరుద్యంలేని కథకుడితడు.అనేక కధల్లోని ప్రొటొగానిష్టు ఆతడే.కానీ అన్ని కధల్లోని అంటగానిష్టుమాత్రం క్యాస్ట్ సిస్టమ్.

-డాక్టర్ జిలుకర శ్రీనివాస్, ఆంధ్రజ్యోతి-వివిధ, 10-11-2014.

10_11_2014_006_008

అవుటాఫ్ క‌వ‌రేజ్ ఏరియాడిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

అవుటాఫ్ క‌వ‌రేజ్ ఏరియా on kinige

 

OutofCoverageArea600

Related Posts:

“ఊహాచిత్రం” పుస్తకం పై సమీక్ష

“తెలుగు భాషను మరుగుపరుస్తున్నారన్న అపవాదును మోసే తరంలోనివాడిని. ఆంగ్ల మాధ్యమంలో చదువులు, కార్పొరేట్ ఉద్యోగాల పరుగుల మధ్యలో తెలుగు భాషాభిమానాన్ని, సాహితీ ఆసక్తిని సజీవంగా ఉంచుకోవచ్చని చెప్పడానికి నేను ఒక చిన్న ఉదాహరణ మాత్రమే.. రేపటి తరానికి రెండు కథలు, నాలుగు పద్యాలు, కాసిన్ని సామెతలు చెప్పి తెలుగు భాషని రుచి చూపించండి. ఆ తరువాత పఠనాసక్తిని కలిగించి వదిలిపెట్టండి. ఏ మాధ్యమంలో చదివినా, జీవనానికి మరే భాష అవసరం అయినా తెలుగు మీద మక్కువ ఎక్కడికీ పోదు. అందుకు నేనే సాక్ష్యం..” అంటున్నారు ఊహాచిత్రం కథల సంపుటి రచయిత అరిపిరాల సత్యప్రసాద్.
ఆయన అన్నది అక్షరసత్యం. వెనుకటి ఏడు తరాలు చూసుకున్నా కలికాలానిక్కూడా రచయితలు అనేవారు లేని కుటుంబ నేపథ్యంలో పుట్టిన రచయితలో సాహిత్యాభిలాష పుట్టడానికి కన్నతల్లి తొలి పునాది వేశారు. అమ్మ అంటే ఇప్పుడాయనకు ఒకటే జ్ఞాపకం. పాత సినిమా పాటలు, లలిత సంగీతం, రేడియో పాటలు. నిత్యం పని చేసుకుంటూ ఆమె వీటి మధ్యే బతికిన రోజులు రచయిత జీవితంలోనే అత్యంత సంతోషకరమైన జ్ఞాపకాలలో ఒకటి. తర్వాత నాన్న రాత్రిపూట రేడియోలో వినే కర్నాటక సంగీతం. త్యాగరాజు, శ్యామదాసు, పురంధరదాసు, సుబ్బలక్ష్మి, శమ్మంగుడి, పట్టమ్మాళ్. వీళ్లంతా నాన్న సేకరించిన వందలాది సంగీతం క్యాసెట్ల రూపంలో రచయిత బాల్యంలో మెరిసిన సంగీత సామ్రాట్టులు. అమ్మ సాహిత్య, సంగీతాభిరుచి, నాన్న సంగీత రికార్డుల సేకరణ.. కళల గురించి ఏ ఇంట్లోనయినా ఆసక్తి కలగడానికి ఇవి చాలవా?
ఇక మేనత్త పరిచయం చేసిన పోతన పద్యాలు, బాల్య జీవితాన్ని పద్యమయం చేసేశాయి. తెల్లవారు జామున చెట్టుమీది పూలు కోస్తూ, ఆమె పాడిన పద్యాలు, శ్లోకాలు రచయితకు నేటికీ నందివర్ధనం చెట్టు మీద నుంచి రాలిపడిన మంచుబిందువులంత స్పష్టంగా గుర్తుకొస్తూనే ఉన్నాయి. ఇక నాన్నమ్మ చెప్పిన పూటకూళ్ల పెద్దమ్మ కథలు, కాశీమజిలీలు, భోజరాజు కథలు, విక్రమార్కుడు, రామాయణ, మహాభారత కథలు, రమణీయ బాల్యంలో మెరిసిన రసరమ్య గీతాలు.
లోహితా లోహితా అంటూ హరిశ్చంద్రుడు ఎంత ఏడ్చాడో కానీ, నానమ్మ ఆ కథ చెప్పిన ప్రతిసారీ ఏడవడం ఆశ్చర్యకరమైన, మర్చిపోని జ్ఞాపకమైతే, కథతో, అందులో ఉండాల్సిన ఎమోషన్‌తో తొలి పరిచయం అప్పుడే ఏర్పడిపోయిందట.
ఆ తర్వాత కనపడ్డ పుస్తకమల్లా చదవటం, ఇంగ్లీషు, తెలుగు, కాలక్షేప నవలలు, సీరియస్ రచయితలు ఇలా కిరాణా కొట్టులో కట్టిచ్చిన పొట్లాల కాగితంతో సహా కనబడ్డ పుస్తకమల్లా చదివి నమిలేస్తున్న క్రమంలో శ్రీశ్రీ కవిత్వంతో పరిచయం మయూరి వారపత్రికలో కలం కల కవితగా పరిణమించింది. ఆ పునాది 1995 ఆంధ్రప్రభ ఆదివారం పత్రికలో దీపావళి కథల పోటీలో సాధారణ ప్రచురణకు బాట వేసింది.
మీకంటూ ఒక శైలి ఏర్పడాలంటే ఇంకా ఎక్కువగా చదవాలంటూ రచయిత, సాహితీ విమర్శకులు వసుంధర సలహాతో ఆరేడు సంవత్సరాలు ఏమీ రాయకుండా అజ్ఞాతవాసంలో ఉంటున్నట్లుగా అధ్యయనంలో మునిగిపోవడం. ముళ్లపూడి, కొకు, బుచ్చిబాబు, చలం , షిడ్నీ షెల్డన్, అగాథా క్రిస్టీ వంటి మహామహుల రచనలు చదువుతున్న కొద్దీ కుంచించుకుపోయి నేను రాసినవి కథలేనా అనే అనుభూతితో అలా చదువుతూ పోవడం… గుజరాత్‌లో చదువులు, కార్పొరేట్ ఉద్యోగాలు, ఉజ్జయని మంచినీటి కటకట ప్రభావంతో మళ్లీ కలం కదలిక. ఈ క్రమంలో కొత్తగా పరిచయమైన టెక్నాలజీ సాయం తీసుకుని బ్లాగులు, అంతర్జాలంతో మొదలై ఇప్పుడు వివిధ పత్రికలు, ఆన్‌లైన్ పత్రికలలో రచనల పరంపర.
ఇదీ 35 సంవత్సరాల ఆధునిక విద్యాధిక యువకుడి జీవిత సాహిత్య నేపధ్యం. ఈయన తొలి కథల సంపుటి ‘ఊహాచిత్రం‘ తెలుగు సాహిత్యానికి ఒక సత్యప్రసాదం. తెలుగుభాష త్వరలో అంతరించనుందన్న అనుమానం అంతర్జాతీయ ప్రచారమవుతూ భయపడుతున్న కాలంలో ఇలాంటి నమ్మకాల్ని, అతి ప్రచారాలాను, అనుమానాలను నిర్ద్వంద్వంగా తొలగించే శక్తివంతమైన కథల గుచ్చమే ఊహాచిత్రం. ఈ సంపుటిలోని 13 కథలు మళ్లీ మనముందుకు కొకు, రాచకొండ, రంగనాయకమ్మ, మల్లాది, యండమూరి.. ఇలా సమకాలీనంగా ఉన్నత శిఖరాలకు చేరుకున్న మహాకథకులందర్నీ మరోసారి గుర్తుచేస్తూ జీవితాన్ని కాచి వడపోసిన  అరిపిరాల కథలు. తెలుగు తెలతెలబోతోంది, తెలుగుకు భావి లేదు అనే రాతల్ని, కూతల్ని కూడా అభాసగా మారుస్తున్న కథలను ఈసంపుటిలో మనం చూడవచ్చు.
ఊహాచిత్రం, స్వప్న శేషం, తుది బంధం, ఐదువందల రూపాయల నోటు, చిరాకు రామనాథం, ఏడు తరవాత, మంత్రిగారి సమాధి, చినుకులా రాలి, వానర వీరుడు, చిలక రాయబారం, మబ్బుతునక, ఈరేశంగాడి ముచ్చట, ఓపెన్ టైప్, మేరా భారత్ మహాన్, పద్మావతీ శ్రీనివాసం, మంచినీళ్ల బావి, కలిసివచ్చిన ఇల్లు, భూదేవతమ్మ ఇవీ ఈ సంపుటిలోని 13 కథలు. నేల మీద జీవధారల్ని కాలుష్యం చేసి తన మనుగడకే ముప్పు తెచ్చుకుంటున్న మనిషి తీరు పట్ల తీవ్ర అభ్యంతరం,  ఆధునిక దాంపత్యానికి అపరూప విశ్లేషణ, డబ్బే సర్వస్యమనుకునే నేటి తరం తీరుపై అపూర్వ స్పందన, తనను నచ్చే ప్రపంచం, తానుండే ప్రపంచం ఒకటి కాని స్థితిలో భావుకుల స్వప్నశేషాలు. కార్పొరేట్ ఉద్యోగుల జీవితాల్లో పద్మావతీ శ్రీనివాసం, కళ్లకు కట్టిన మనోవిశ్లేషణ, మంచినీరు తాగునీరుగా, అమ్మకపు నీరుగా మారిన వ్యాపారీకరణ, జీవన వేదాంతాన్ని ఇమిడ్చిన అద్బుతమైన కథన కౌశలం, ఇవన్నీ కలిస్తే అరిపిరాల కథలు..
కంపెనీ కొన్నప్పుడు ఆ కంపెనీని వృద్ధిలోకి తీసుకొచ్చిన ఉద్యోగస్థులు ఆ కంపెనీలో భాగం కాకుండా పోతారా (ఉద్యోగం పోగొట్టుకున్న వాడి ఆవేదన). ‘పొలం భూదేవత. తల్లితో సమానం. అమ్మనెలా అమ్మమంటావ్? భూదేవతంటే లక్ష్మీదేవి కాదు. అన్నపూర్ణ, పదిమందికి అన్నం పెట్టే తల్లి’ తోటి సైనికుడు చనిపోతే కనీసం అటువైపు చూడనైనా చూడకుండా యుద్ధంలోకి పరుగెత్తే సైనికుల్లా కొలీగ్స్..  ‘సంసార కాలం మొత్తం ముళ్లు ఏరిపారెయ్యడానికే సరిపోయింది. పూలదారులు పక్కనే ఉన్నా ముళ్లు ఏరే పనిలో వాటిని గుర్తించనే లేదు’.
కుప్పిలి పద్మగారన్నట్లు ‘ఈ కథలు మనలని గాభరాలో ముంచెత్తవు, నిద్రపుచ్చవు, నిర్లిప్తంగా కూడా ఉంచవు కాని, మన చుట్టూ ఉన్న మనుష్యులని ఆరోపణలతో కాక, ఆత్మీయంగా అర్థం చేసుకునే వైపు మనల్ని నడిపించే పాజిటివ్ కథలు. మనకు ఊహ తెలిసిన నాటి నుంచి మనం తెలవారుఝామున వినే చరిపరిచిత స్వరాన్ని ఈ కథలు తిరిగి మనలోకి ప్రవహింపచేస్తాయి.’ ఆధునిక జీవితంలోని డొల్లతనాన్ని, కపటత్వాన్ని ఆవిష్కరిస్తూనే మనిషి మనిషిగా బతకడం లోని ఆనందాన్ని కూడా వివరించే కథలివి. సత్యం కోసమో. జీవితానికి అర్థం కోసమో.. లేక తనకే తెలియిని ఒక జ్ఞాపకం కోసమో రచయిత సాగించిన వెతుకులాటను ఈ కథల్లో చూసిన తర్వాత మనం కూడా కాస్త ఆలోచనలో పడతాం.
ఇంతకుమించి ఏ కథకుడికైనా కావలసింది ఏమిటి? అరిపిరాల సత్యప్రసాద్ గారి కథలను మనమూ చదువుదామా మరి.

 ఆంధ్రప్రభ , 7 మే 2014 .

ఊహాచిత్రండిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

ఊహాచిత్రం on kinige

 

OohaChitram600

 

Related Posts:

చిత్తూరువారి కథల విందు! – “చిత్తూరు కథ” పుస్తకంపై సమీక్ష

ఇది చిత్తూరు జిల్లా గురించిన కథ కాదు! ఆ జిల్లాకు చెందిన రచయితలు వెలార్చిన కథలు. చిత్తూరు వేషభాషలు, నైసర్గిక చిత్రణల నేపథ్యంలో జీవితంలోని వివిధ పార్శ్వాల్ని తడిమే కథలివి. జిల్లాకు చెందిన కథా రచయితలు కె.సభా (మిథున లగ్నం), మధురాంతకం రాజారాం (అంబ పలుకు.. జగదంబా పలుకూ), నరేంద్ర (పురోహిత్ పరిషత్), మహేంద్ర (జర్తె), వల్లంపాటి వెంకటసుబ్బయ్య (అందని పళ్లు), కరణం బాలసుబ్రహ్మణ్యం పిళ్త్లె (జింకపిల్ల), ఆర్.వసుంధరాదేవి (పిచ్చిగీతలు), సుంకోజి దేవేంద్రాచారి (అన్నంగుడ్డ), పేటశ్రీ (చిత్తానూరు పంచమి)… ఇలా 44 మంది కథలున్నాయిందులో. ఎక్కడికక్కడ ‘స్థానిక’ గొంతుకల్ని గట్టిగా వినిపించడం ఆధునికానంతర లక్షణం. ఆ ప్రభావంతోనే గత రెండు దశాబ్దాలుగా తెలుగు కథ.. ఇంతవరకూ మాటపెగలని కంఠాలెన్నింటినో వినిపిస్తోంది. ఈ స్థానికత, ప్రాంతీయత ఆధారంగా సాహిత్య సృజనే కాకుండా.. ప్రత్యేక సంకలనాలు రావడం ఇటీవలి పరిణామం. వాటిలో ‘చిత్తూరు కథ‘ ప్రమాణాల పరంగానూ విశిష్టమైందని చెప్పాలి. ఆ విషయంలో సంకలనం తీసుకొచ్చిన తెలుగు భాషోద్యమ సమితి ప్రయత్నం అభినందనీయం.

– జె.రాజు , ఈనాడు ఆదివారం ,8 ఆగష్ట్ 2014.

ChittorKatha

“చిత్తూరు కథడిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

చిత్తూరు కథ on kinige

ChittooruKatha600

Related Posts: