రన్ ఫర్ ది హైలాండ్స్

ప్రముఖ రచయిత మధుబాబు కలం నుంచి జాలువారిన మరో షాడో అడ్వెంచర్ – “రన్ ఫర్ ది హైలాండ్స్“.

షాడో గజదొంగగా ఉన్నప్పటి కథ ఇది. కొద్ది కాలం క్రితం లక్షదీవులలో జరిగిన గొడవల్లో షాడోవలన కిల్లర్ గ్యాంగ్ తీవ్రంగా నష్టపోతుంది. ప్రతీకారం కోసం ఎదురుచూస్తున్న కిల్లర్స్ గ్యాంగ్ బీహారులోని బక్ బక్ బల్హారీ, షాహిరీ షబ్నమ్ సింగ్, షేక్ రఫూక్, మహబూబ్ ఖాన్, పాపా హజ్రత్ వంటి పేరుమోసిన రౌడీలందరినీ ఒక జట్టుగా చేసి షాడో మీదకి ఉసిగొల్పుతుంది.

షాడో ఎంతగానో గౌరవించే మాజీ న్యాయమూర్తి ఛటర్జీని, ఆయన మేనకోడలు మల్లికను రౌడీమూకలు కిడ్నాప్ చేసి, చిత్రహింసలు పెడతారు. షాడోని కవ్విస్తారు.

చివరికి షాడో భరత్‌పూర్‌లో అడుగుపెడతాడు. గంగారాం సాయంతో రౌడీల పీచమణుస్తాడు. ఈ క్రమంలో ఎన్నో అడ్డంకులు ఎదుర్కుంటాడు. స్పెషల్ బ్రాంచ్ ఏజంట్లు కుట్ర ఏమిటి? షాడోకి నమ్మినబంటుగా ఉన్న రామభక్త హనుమాన్ ఎవరు? పోలీసులు షాడోని ఎందుకు పట్టుకోలేకపోయారు? ఛటర్జీని, మల్లికని షాడో ఎలా విడిపించాడు? కులకర్ణిగారు షాడో ముందు ఉంచుదామనుకున్న ప్రస్తావన ఏమిటి? షాడో జపాన్ ఎందుకు వెళ్ళాల్సి వచ్చింది?

ఈ ప్రశ్నలన్నింటికీ సమాధానాలు ఈ ఆసక్తికరమైన నవలలో లభిస్తాయి.

రన్ ఫర్ ది హైలాండ్స్ డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.

రన్ ఫర్ ది హైలాండ్స్ On Kinige

కొల్లూరి సోమ శంకర్

Related Posts:

నైట్ వాకర్

ప్రముఖ డిటెక్టివ్ రచయిత మధుబాబు కలం నుంచి జాలువారిన మరో షాడో స్పై అడ్వెంచర్ “నైట్ వాకర్“.

కలకత్తా నగరంలోని డిఫెన్స్ రీసెర్చి లేబరేటరీలో సైంటిస్ట్‌గా పనిచేసే డా. మహేంద్రనాధ్ ఇతర్ శాస్త్రవేత్తల్లా ఆయుధాల మీద, వాటిని ప్రయోగించటానికి అవసరమైన ప్రేలుడు పదార్థాల మీద తన దృష్టిని కేంద్రీకరించకుండా, మానవ శరీరం మీద, శరీరంలోని నాడీ వ్యవస్థ పనిచేసే పద్ధతుల మీద విచిత్రమైన పరిశోధనలు చేసాడు. శరీరంలోని నాడీ వ్యవస్థను నిర్వీర్యపరిచి మనిషిని పూర్తిగా దెబ్బతీసే ఒక విచిత్రమైన నెర్వ్ గాస్‌ని కనుగొన్నాడతను. ప్రయోగించిన మరుక్షణం ఎదురైన ప్రతి మనిషిని డమ్మీగా మార్చేస్తుందది…. ఎందుకూ పనికిరాని మూర్ఖుడి క్రింద తయారుచేస్తుంది.

ఆ గాస్ ఫార్ములాని మిలిటరీ అధికారులకి అందజేసేముందే లేబరేటరీలో వున్నవాడు వున్నట్లే అదృశ్యం అయ్యాడు మహేంద్రనాధ్. ఆ భయంకర ఆయుధం శత్రువుల చేతికో, మరే సంఘ విద్రోహుల చేతికో చిక్కితే సర్వనాశనం తప్పదని భావించిన ప్రభుత్వం, మాయమైన మహేంద్రనాధ్‌ని, అతని వద్ద వున్న నెర్వ్ గాస్ ఫార్ములాని వెతికి పట్టుకోమని స్పెషల్ బ్రాంచిని ఆదేశించింది.

అదే సమయంలో దేశంలోకి అక్రమంగా ప్రవేశించిన చైనీస్ మిలటరీ ఇంటలిజెన్స్ ఆఫీసర్ యాంగ్ చీ జాడలు తెలుసుకునే బాధ్యతని సి.ఐ.బికి అప్పగిస్తారు.

మహేంద్రనాధ్ అదృశ్యమవడానికీ, యాంగ్ చీ అస్సాం సరిహద్దులో కనపడడానికి సంబంధం ఉందా? లేబరేటరీలోని మూడవ బ్లాకు పేలిపోడానికి కారణం ఎవరు? అక్కడ సీక్రెట్ అరలో షాడోకి దొరికిన ఫోటోలు ఎవరివి? ఇంతకీ మహేంద్రనాధ్ తనంతట తానుగా మాయమయ్యాడా లేక ఈ సంఘటనలో విదేశీహస్తమేదయినా ఉందా? స్పెషల్ బ్రాంచ్ ఏజంట్లు షాడోని ఎందుకు హింసించారు? వారి నుంచి షాడో ఎలా తప్పించుకున్నాడు? మహేంద్రనాధ్ ఏమయ్యాడు? దేశానికి ప్రమాదకరంగా పరిణమించిన ఆ నెర్వ్ గాస్ ఫార్ములాని షాడో సంపాదించగలిగాడా?

ఈ ప్రశ్నలన్నింటికీ సమాధానాలు ఈ రోమాంచక నవలలో లభిస్తాయి.

“నైట్ వాకర్” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.

నైట్ వాకర్ On Kinige

కొల్లూరి సోమ శంకర్

Related Posts:

మిషన్ టు పెకింగ్

ప్రఖ్యాత డిటెక్టివ్ నవలా రచయిత మధుబాబు రచించిన నవల “మిషన్ టు పెకింగ్“.

సరిహద్దులమీద ఉద్రిక్తతల్ని సృష్టించే దేశాల తాకిడిని తట్టుకోవటం కోసం తప్పనిసరిగా సైనికబలాన్ని పెంచుకోవాల్సిన పరిస్థితులు మన దేశానికి ఎదురవుతున్న నేపధ్యంలో భారత క్షిపణి పరిశోధన శాస్త్రవేత్తలు రెండు వందల కిలోమీటర్ల దూరంలో వున్న టార్గెట్‌ని గురితప్పకుండా ఛేదించగల క్షిపణిని తయారుచేసారు. అయితే, ఆ క్షిపణిని ప్రయోగించే సమయంలో అనుకోని విధంగా బయటపడిన ఒక విచిత్రాన్ని గమనించి అవాక్కయ్యారు.

వారెవరూ ఊహించనిరీతిలో అది రెండువేల కిలోమీటర్ల దూరం ప్రయాణం చేయగల సత్తావున్న ఆయుధంగా… ఆర్డినరీ క్షిపణి కాస్తా కాంటినెంటల్ బలాస్టిక్ మిస్సయిల్‌గా రూపొందింది. తక్కువ దూరంలో వుండే టార్గెట్‌ని ఛేదించేటందుకు క్షిపణిలో అమర్చిన కంట్రోల్ మెకానిజం ఎక్కువ దూరానికి సరిపోదని గ్రహించి, వెంటనే మార్పులు చేశారు ఇంజనీర్లు. అత్యంత ఆధునికమైన కంప్యూటర్ వ్యవస్థను అందులో ప్రవేశపెట్టి పరీక్షల నిమిత్తం ప్రయోగించారు. ఆఖరి క్షణంలో ఏదో పొరపాటు జరిగి క్షిపణి అదుపు తప్పి చైనా భూభాగంలోకి దూసుకుపోయింది. సికియాంగ్ పర్వతశ్రేణుల్లో ఎక్కడో కుప్పకూలిపోయింది.

ఆ క్షిపణి అవశేషాల్ని వెతికి, వాటిల్లోనుంచి కంట్రోలింగ్ వ్యవస్థను విడదీసి వెంటనే భారతదేశంలోకి తీసుకురాకపోతే…. శత్రువులకు ఆ వ్యవస్థ రహస్యం తెలిసిపోతుంది…. ఆ క్షిపణి తయారీకి ఖర్చుపెట్టిన ధనమంతా వృథా అయిపోతుంది.

సి.ఐ.బి తరపున ఈ బాధ్యత షాడోకి అప్పగిస్తారు. భారతదేశంలోనుంచి గాని, బర్మా వైపునుంచి గాని సరిహద్దులు దాటి చైనాలోకి అడుగుపెట్టడం ప్రమాదకరమని నిర్ణయించుకుని, జపాన్ నుంచి బయలుదేరాడతను. గంగారం సహాయంతో చిన్న సైజు వ్యాపారవేత్తగా పత్రాలు సృష్టించుకుని మారువేషంలో కాయ్‌ఫెంగ్ నగరంలో అడుగుపెడతాడు. షాడో పట్ల అనుమానాలు పెంచుకున్న అక్కడి పోలీసులు అతన్ని పట్టుకోడానికి రకరకాల ప్రయత్నాలు చేస్తారు. వారి నుంచి తప్పించుకోడానికి, వారు అరెస్టు చేసిన హూవాన్ చూ అనే మంచి దొంగని వారి అదుపులోంచి తప్పిస్తాడు.

ఈ క్రమంలో ఎన్నో ప్రమాదాలు ఎదుర్కుంటాడు. తానెవరో హువాన్ చూకి తెలియజేయకుండా, పెకింగ్ నగరం గుండా మిస్సైల్ కూలిపోయిన ప్రాంతాలలోకి చేరుకోడానికి ప్రయత్నిస్తాడు. ఈ ప్రయత్నాలలో హువాన్ చూ సోదరి ఈషా షాడోకి ఎందుకు అడ్డు తగిలింది? ఆమె ఎవరు? అటవీ ప్రాంతంలో చైనా ఆటవీక జాతి నాయకుడు షాడోకి ఎందుకు సాయం చేసాడు? షాడో గూని ఎలా మాయమైంది? షాడో ఈషాకి అందించిన అపూర్వ కానుక ఏంటి?

ఈ ప్రశ్నలకి జవాబులు ఈ రోమాంచక నవలలో లభిస్తాయి.

“మిషన్ టు పెకింగ్” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

మిషన్ టు పెకింగ్ On Kinige

కొల్లూరి సోమ శంకర్

Related Posts:

కిల్ క్విక్ ఆర్ డై

ప్రముఖ డిటెక్టివ్ రచయిత మధుబాబు రచించిన షాడో స్పై థ్రిల్లర్ “కిల్ క్విక్ ఆర్ డై“.

పాకిస్తాన్‌‍లో ఉన్న అతికొద్ది కోటీశ్వరులలో ఒకడు ముస్తఫా. అతనికి దేశవిదేశాలలో ఎన్నో వ్యాపారాలున్నాయి. అటువంటి దేశాలలో బోర్నియో కూడా ఒకటి. అక్కడి వ్యాపారాలను పర్యవేక్షించడానికి వెళ్ళిన అతని కొడుకు రుస్తుం కనిపించకుండా పోతాడు. పాకిస్తాన్ ప్రభుత్వం, స్పెషల్ బ్రాంచ్ కలుగజేసుకున్నా కూడా ఏమీ ఫలితం లేకపోవడంతో, ముస్తఫా తన బాల్యస్నేహితుడైన ఇండియన్ హోం మినిస్టర్‌ని సాయం కోరుతాడు. సి.ఐ.బి నియమ నిబంధననలకి వ్యతిరేకమైనా, సాయం కోరి వచ్చిన మనిషిని కాదనలేక, ఆ ఎస్సైన్‌మెంట్‌ని స్వీకరిస్తారు కులకర్ణి.

రుస్తుంని వెదికే బాధ్యత మొదట శ్రీకర్‌కి అప్పగిస్తారు. శ్రీకర్ అక్కడికి వెళ్ళిన తర్వాత కేసులో ఎటువంటి పురోగతి లేకపోవడంతో, షాడో రంగంలోకి దిగుతాడు.

టునాంగ్ సిటీ అంతా గాలిస్తాడు. రుస్తుం ఉన్నాడనుకున్న భవనాన్ని గుర్తిస్తాడు షాడో. కాని అప్పటికే ఎవరో వాచ్‌మన్‌‍ని చంపేసి, రుస్తుంని అక్కడినుంచి తప్పించేసారు. మర్నాడు ఆ భవనంలో ఏవైనా ఆధారాలు దొరుకుతాయేమోనని వెదకాలనుకుంటాడు షాడో. పోలీసులని ఏమార్చేపని శ్రీకర్ చూసుకుంటే, షాడో ఆ భవంతిలోకి ప్రవేశిస్తాడు.

ఓ చిన్న ఆధారం దొరుకుతుంది షాడోకి. తీగ లాగితే డొంకతా కదిలినట్లు, ఆ చిన్న ఆధారంతో, రుస్తుంని అపహరించిన వాళ్ళ గుట్టు రట్టు చేద్దామనుకుంటాడు షాడో. ఈ ప్రయత్నంలో ఎన్నో ప్రమాదాలను ఎదుర్కుంటాడు.

ఇంతకీ రుస్తుంని ఎవరు, ఎందుకు అపహరించారు? షాడోతో పాటు రుస్తుం కోసం వెదుకుతున్న గ్యాంగ్ ఎవరిది? రుస్తుంకి పరిచయం ఉన్న వ్యక్తులను ఒక్కొక్కరిగా చంపుతున్నది ఎవరు? వీరందరి బారి నుంచి షాడో రుస్తుంని ఎలా కాపాడాడు?

ఈ ప్రశ్నలన్నింటికీ సమాధానం కావాలంటే ఈ నవల చదవాల్సిందే.

“కిల్ క్విక్ ఆర్ డై” నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‌ని అనుసరించండి.

కిల్ క్విక్ ఆర్ డై On Kinige

కొల్లూరి సోమ శంకర్

Related Posts:

ఫిస్ట్ ఆఫ్ షాడో

సుప్రసిధ్ధ రచయిత మధుబాబు కలం నుంచి జాలువారిన మరో స్పై థ్రిల్లర్ “ఫిస్ట్ ఆఫ్ షాడో“.

ఝరియా దేశపు సైంటిస్టులు ఒక భయంకరమైన పాయిజన్ బాంబ్‌ని కనిపెడతారు . ఆ పాయిజన్ వ్యాపించినంత మేరా ప్రాణికోటి నిర్వీర్యమైపోతుంది. ఆ పాయిజన్ బాంబుల్ని ప్రయోగాత్మకంగా పరీక్షించి చూడటానికి, పశుపక్ష్యాదులు తప్ప మానవులెవరూ నివశించని పసిఫిక్ ద్వీపాలకు తరలిస్తుండగా, మూడు బాంబులు చోరీకి గురవుతాయి. వాటిని అపహరించిన జోసెఫ్ అనే క్రిమినల్ ప్రపంచంలో వున్న క్రిమినల్ గాంగ్స్‌ అన్నిటికీ ఆహ్వానాలు పంపి బాంబుల్ని అమ్మకానికి పెడతాడు.

సమాచారం తెలుసుకున్న ఇంటర్‌పోల్ జోసెఫ్ అంతు చూడడానికి కొందరు ఏజంట్లను పంపుతుంది. కానీ వారంతా దారుణంగా హత్య చేయబడతారు. చివరికి ఇంటర్‌పోల్ షాడోని ఆశ్రయిస్తుంది. జరుగుతున్న దుర్మార్గానికి ముగింపు పలకమని ఆదేశిస్తుంది. సుమత్రా దీవుల్లోని ముఖ్యపట్టణమైన మేదాన్ చేరుకున్న షాడో ఎన్నో సాహసాలు చేస్తాడు. జోసెఫ్ స్థావరం ఎక్కడుందో కనుక్కుంటాడు.

ఇంటర్‌పోల్ ఏజంట్లను షింగ్‍టాయ్ వీరుల చేత చంపించిన జోసెఫ్‌ని షాడో ఎలా ఎదుర్కున్నాడు? నరరూప రాక్షసులైన షింగ్‌టాయ్ వీరుల ప్రత్యేకత ఏమిటి? షాడోకి మార్గదర్శనం చేసిన పిచ్చివాడు ఎవరు?

ఈ ప్రశ్నలన్నింటికి సమాధానాలు ఈ ఆసక్తికరమైన నవలలో లభిస్తాయి. మరిన్ని వివరాలకు ఈ క్రింది లింక్‌ని అనుసరించండి.

ఫిస్ట్ ఆఫ్ షాడో On Kinige

కొల్లూరి సోమ శంకర్

Related Posts:

కెండో వారియర్

సుప్రసిద్ధ డిటెక్టివ్ నవలా రచయిత మధుబాబు రచించిన షాడో స్పై ఎడ్వెంచర్ “కెండో వారియర్“.

బందిపోటు దొంగతనాలకు రోజులు చెల్లిపోయాయని షాడో చెప్పిన మాటలు విని పోలీసులకి లొంగిపోతాడు గజదొంగ బగ్రూసింగ్. గోరఖ్‌పూర్ జైలులో శిక్షని అనుభవిస్తుంటాడు.

ఉన్నట్లుండి అతను ఓ రోజు జైల్లోంచి తప్పించుకుని పోవడంతో కథ మొదలవుతుంది. సాయం చేస్తున్నట్లు నమ్మించి ఓ షావుకారు మళ్ళీ పోలీసులకు పట్టిద్దామని చూస్తాడు. చుట్టుముట్టిన పోలీసుల బారి నుంచి షాడో సాయంతో తప్పించుకుని షాడో ఇంటికి చేరుతాడు బగ్రూసింగ్. జైల్లోంచి పారిపోయివచ్చిన కారణం చెబుతాడు. షింటాయ్ తెగల వారు తన కూతురు పుత్‍లీని ఎత్తుకుపోయారని తెలిసిందని, వాళ్ళ అంతు చూసేందుకే జైల్లోంచి తప్పించుకున్నానని చెబుతాడు.

షింటాయ్ తెగ వాళ్ళని బగ్రూసింగ్ ఎదిరించలేడని, వాళ్ళని ఎదుర్కుని పుత్‍లీని తాను రక్షించి తీసుకువస్తానని చెబుతాడు షాడో.

షింటాయ్ తెగల స్థావరాన్ని అన్వేషిస్తూ బర్మాలో అడుగుపెడతాడు షాడో. అక్కడ అనుకోని పరిస్థితులలో ఒక యువతిని రక్షించడం కోసం తాన్‌మియా అనే వ్యక్తిని చంపాల్సివస్తుంది. అక్కడి నుంచి షాడోకి సమస్యలు మొదలవుతాయి. అక్రమంగా సరిహద్దు దాటి వచ్చినందుకు బోర్డర్ సెక్యూరిటీ ఫోర్స్ వారు, హత్య చేసినందుకు స్థానిక పోలీసులు షాడోని వెంటాడుతూంటారు.

ఈ నేపధ్యంలో షింటాయ్ తెగల స్థావరం కనుక్కోడానికి షాడో ఏమేమి ఇబ్బందులు పడ్డాడు? షానీ గ్రామంలో షాడో పోట్లగిత్తలతో ఎందుకు పోరాడవలసి వచ్చింది? షింటాయ్ తెగల నాయకుడు టోటిమా ఎత్తుకెళ్ళిన పుత్‌లీ ఎక్కడుంది? ఆమెని షాడో ఎలా రక్షించాడు? ఈ ప్రశ్నలన్నింటికీ జవాబులు ఈ రోమాంచక నవలలో దొరుకుతాయి.

చివరిదాకా ఆసక్తిగా చదివించే ఈ నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‌ని అనుసరించండి.

కెండో వారియర్ On Kinige

కొల్లూరి సోమ శంకర్

Related Posts:

ట్రబుల్ మేకర్స్

సుప్రసిద్ధ నవలా రచయిత మధుబాబు కలం నుంచి వెలువడిన షాడో ఎడ్వంచర్ ట్రబుల్ మేకర్స్.

కులకర్ణి సి. ఐ. బి చీఫ్‍గా రిటైరయ్యే సమయం దగ్గర పడుతూంటూంది. ఆయన స్థానంలో షాడోని నియమించాలని బిగ్ బాస్‌లు తలుస్తారు. షాడోకి అన్ని అర్హతలున్నా, నావీ గురించి అతనికి తెలిసింది తక్కువ కాబట్టి ఐ. ఎన్. ఎస్. కావేరిలో అప్రెంటిస్‌షిప్ చేయాల్సిందిగా ఆదేశిస్తారు. మొదట్లో కొద్దిగా వ్యతిరేకించినా, చివరికి కావేరిలో అప్రెంటిస్‌గా చేరుతాడు.

షిప్‌లో తెలుసుకోవాలసినవన్నీ తెలుసుకుని, తన పనితీరుతోనూ, చురుకుదనంతోనూ స్పెషల్ కన్సిడరేషన్ మీద వైస్ కాప్టెన్‌గా ప్రమోట్ అయ్యాడు. సిబ్బంది, ప్రయాణీకుల ఆదరణనీ, అభిమానాన్ని పొందుతాడు.

ఇలా ఉండగా, దక్షిణాఫ్రికాలోని కల్హారీ రేవులో కావేరీని అధికారులు చాలా సేపు ఉంచేస్తారు. కల్హారీ లేబొరేటరీలోంచి ఓ సూపర్ బాంబ్ మాయమైంది, ఆ బాంబుని పేల్చడం తెలిసిన మోర్గాన్ అనే సైంటిస్ట్‌ని దేశద్రోహులు అపహరించారట. వారిని వెదకడం కోసం రేవులోని అన్ని నౌకలను మిలిటరీ అధికారులు వెదుకుతూ, కావేరి ప్రయాణాన్ని వాయిదా వేయిస్తారు. ఓడని ఆమూలాగ్రం పరీక్షిస్తారు. చివరికి ప్రయాణం కొనసాగించడానికి అనుమతినిస్తారు.

ఉన్నట్లుండి నౌకలోని సిబ్బంది కొంతమంది హత్యకి గురవుతారు, మరికొందరు కనపడకుండాపోతారు. నౌక ప్రయాణించాల్సిన మార్గం కాకుండా మరో మార్గంలోకి వెళ్ళిపోయి, కొండరాళ్ళని ఢీకొట్టే ప్రమాదాన్ని తృటిలో తప్పించుకుంటుంది.

షిప్‌లో ఏదో జరుగుతోంది? కనపడి మాయమవుతుతున్న కొత్త వ్యక్తులు ఎవరు? సిబ్బంది హత్యల వెనుక ఉన్న మిస్టరీ ఏంటి? షాడో దాన్నెలా ఛేదించాడు?

ఈ ప్రశ్నలన్నింటికీ సమాధానం కావాలంటే ఈ రోమాంచక నవల చదవాల్సిందే.

చివరిదాక ఆసక్తిగా సాగిపోయే ఈ నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్ క్లిక్ చేయండి

ట్రబుల్ మేకర్స్ On Kinige

కొల్లూరి సోమ శంకర్

Related Posts:

నెవర్ లవ్ ఎ స్పై

ప్రముఖ డిటెక్టివ్ నవలా రచయిత మధుబాబు కలం నుంచి జాలు వారిన మరో సస్పెన్స్ థ్రిల్లర్ నెవర్ లవ్ ఎ స్పై.

నవల షాడో బిందుల పెళ్ళితో ప్రారంభమవుతుంది. పెళ్ళికి షాడోకి కావల్సిన వాళ్ళంతా వస్తారు, పెళ్లి ఘనంగా జరుగుతుంది. కొత్త దంపతులు హనీమూన్‌కి నేపాల్ వెడతారు. రెండు నెలలు సెలవిచ్చిన కులకర్ణి, నేపాల్ విడిచి ఎక్కడికీ వెళ్ళద్దని షాడోని హెచ్చరిస్తారు. ఆనందంగా కాలం గడుపుతున్న షాడోకు రామతీర్ధ నుంచి ఓ ఉత్తరం అందుతుంది. వెంటనే వచ్చి తనని కలుసుకోమని రాస్తాడు రామతీర్ధ.

భారతదేశం నుంచి పారిపోయివచ్చిన సైంటిస్ట్ జనార్ధన్ వివరాలు చెప్పాలని పిలిచిన రామతీర్ధ, ఆ వివరాలేమీ చెప్పకుండానే దుండగులు దాడిలో చనిపోతాడు. హనీమూన్ సంగతి పక్కకి పెట్టి బిందూ, షాడోలు జనార్ధన్ జాడకోసం రంగంలోకి దిగుతారు. ఎన్నో సాహసకృత్యాలు చేస్తారు, ఎన్నో ప్రమాదాలను ఎదుర్కుంటారు.

సైంటిస్ట్ జనార్ధన్‍ని ఎవరు, ఎందుకు అపహరించారు? ఏమాశించి జనార్ధన్ భారతదేశాన్ని విడిచాడు? ఈ ప్రశ్నలన్నింటికీ సమాధానం కావాలంటే ఈ రోమాంచక నవల చదవాల్సిందే.

ఈ నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్ క్లిక్ చేయండి

నెవర్ లవ్ ఎ స్పై On Kinige

కొల్లూరి సోమ శంకర్

Related Posts:

బ్లడ్ హౌండ్

సుప్రసిద్ధ రచయిత మధుబాబు రచించిన మరో థ్రిల్లర్ బ్లడ్ హౌండ్.

స్వాతంత్ర్యానంతరం, అత్యంత కిరాతకులుగా పేరుపొందిన మిజో జాతి ఆటవికులను నయనాభయానా లొంగదీసుకుని వారిని మిజో రిజర్వేషన్ పరిధిలో ఉంచింది ప్రభుత్వం. కానీ కొన్నేళ్ళకు ఆ తెగవారు మళ్ళీ ఆయుధాలు ధరించి జనాలను ఊచకోత కోయసాగారు. కారణాలు తెలుసుకుందామని వెళ్ళిన మిలిటరీ అధికారులపై సైతం దాడి జరిగింది. దేశద్రోహులెవరో వారిని ఎగదోస్తున్నారని ఆర్మీ అధికారులు గ్రహించారు. ఆటవికులకి మద్యం అలవాటు చేసి వారితో ఎవరో నాగరికులే దాడులు చేయిస్తున్నారని తెలుస్తుంది.

ఆ పరిసరాల్లో ఉన్న షాడో పరిస్థితి తీవ్రత గ్రహించి ఆర్మీ అధికారులను హెచ్చరిస్తాడు. అక్కడ్నించి బయల్దేరి వచ్చేస్తుండగా, మిజో జాతీయులు మరో మారణకాండ కొనసాగించడంతో, షాడో జోక్యం కలిగించుకోవాల్సి వస్తుంది. “వందమంది దుండగులను పట్టుకోవడానికి ఒక బెటాలియన్ సైన్యాన్ని పంపిస్తే అందరూ వెక్కిరించరా? మిజో జాతి కళ్ళలో మనం చులకనై పోమా?” అని ఆర్మీ అధికారులు సంశయిస్తుంటే, షాడో రంగంలోకి దిగక తప్పదు.

మిజో జాతి గెరిల్లాల వెనుక ఉన్న నాగరీకుడు ఎవరు? ఆటవికులను ఎగదోయడంలో రహస్యమేంటి? ఈ ప్రశ్నలన్నింటికీ జవాబులు ఈ రోమాంచక నవలలో లభిస్తాయి.

ఆసాంతం ఆసక్తిగా సాగిపోయే ఈ నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‍ను అనుసరించండి.

బ్లడ్ హౌండ్ On Kinige

కొల్లూరి సోమ శంకర్

Related Posts:

కమాండర్ షాడో

ప్రఖ్యాత డిటెక్టివ్ నవలల రచయిత మధుబాబు కలం నుంచి జాలువారిన మరో థ్రిల్లర్ నవల “కమాండర్ షాడో“.

మన దేశంలోకెల్లా అత్యంత ప్రమాదకరమైన నది బ్రహ్మపుత్రానది. ప్రతీ ఏడాదీ ఈ నదికి వచ్చే వరదల వల్ల వేలాది మంది మృత్యువాత పడుతూంటారు. ఎన్నో వేల ఎకరాల పంట నాశనం అవుతుంటూంది. దీనికి విరుగుడుగా బ్రహ్మపుత్రానదిపై ఆనకట్ట నిర్మించాలని తలపోస్తుంది ప్రభుత్వం. అయితే నదీ పరివాహక ప్రాంతమంతా దట్టమైన అటవీప్రాంతం కావడం వల్ల, ఆనకట్టకి సరైన స్థలాన్ని అన్వేషించడానికి ఆర్మీ అధికారులను పంపుతుంది. కల్నల్ రాంప్రసాద్ నాయకత్వంలో వెళ్ళిన బృందం మాయమవుతుంది. వారిని వెదుకుతూ వెళ్ళిన కమాండర్ త్రిపాఠీ నాయకత్వంలోని మరో బృందం ఆచూకీ తెలియకుండాపోయింది. బ్రహ్మపుత్రానది వారిని మింగేసిందా? లేక ఆ ప్రాంతాల్లో తలదాచుకునే బందిపోట్లు వారిని హతమార్చారో ఎవరికి తెలియలేదు.

చివరకి ప్రధానమంత్రి ఈ రెండు బృందాలను సంరక్షించే బాధ్యతని షాడోపై ఉంచారు. మిలిటరీ నుంచి కాప్టెన్ హిమానీ అనే ఇంజనీరు కూడా బయల్దేరాడు.

మిలిటరీ అధికారులు ఏమాయ్యారు? చనిపోయాడని అందరూ భావించిన బందిపోటు దొంగ బేలూ సింగ్ బతికే ఉన్నాడా? మిలిటరీ అధికారులు సైతం నెగ్గుకురాలేని చోట షాడో ఎలా విజయం సాధించాడు? షాడోకి ఎవరెవరు సాయం చేసారు? షాడో బందిపోట్ల ఆటలను ఎలా కట్టించాడు?

ఈ ప్రశ్నలకి సమాధానాలు కావాలంటే ఈ రోమాంచక నవల చదవాల్సిందే. ఆసక్తిగా సాగిపోయే కథనం పాఠకులని కట్టిపడేస్తుంది.

ఈ నవల డిజిటల్ రూపంలో కినిగెలో లభిస్తుంది. వివరాలకు ఈక్రింది లింక్ నొక్కండి

కమాండర్ షాడో On Kinige

కొల్లూరి సోమ శంకర్

Related Posts: