తెలంగాణ మాండలికంలో దళిత నవల – “సూర”నవల పై సమీక్ష

దళితులపై కొనసాగే ఆర్థిక, లైంగిక దోపిడీలను వివరించడంతోపాటు దళితులలో వున్న మూఢ విశ్వాసాలను, వెనుకబాటుతనాన్ని ‘సూర’ నవల చిత్రీకరించింది.ఊళ్లో బతకలేక మాల చెన్నడు, చంద్రి పట్నం వచ్చి కూలీనాలీ పనులు చేసుకుని బతుకుతుంటారు. తమ కొడుకు సూరడు చదువుకొని బాగుపడాలని వారి కోరిక. గారాబం, చెడు సావాసాలు మరిగిన సూరడ్ని దండించి బంధువు, కాలేజీ విద్యార్థి అయిన కేశవులు ఓ దారికి తెస్తాడు. పటేల్ కాశిరెడ్డి తమ ఇంట్లో పని చేయడానికని సూరడ్ని, చదివిస్తానని చెప్పి సర్కారు బళ్లో వేస్తాడు. కాశిరెడ్డి ఆర్థిక పరిస్థితి క్షీణించడంతో సూరడు హాస్టల్లో చేరిపోతాడు. హాస్టల్స్‌లో కొత్త ఉద్యోగాలు వస్తున్నాయి. పదివేలు తెచ్చుకుంటే అందులో కుదురుస్తానన్న కాశిరెడ్డి మాటలు నమ్మి చెన్నయ్య, చంద్రి ఊళ్లో తమ వంతుకు వచ్చిన పొలాన్ని అయినకాడికి అమ్మి పదివేలు తెచ్చి కాశిరెడ్డి చేతుల్లో పోసి, తర్వాత తాము మోసపోయామని తెల్సుకుంటారు. చేసేది లేక తిరిగి ఊరికి వచ్చి గుడిసె వేసుకుంటారు. తాగుడు మరిగి అనారోగ్యం పాలయిన చెన్నడు మంత్రాలు, భూతవైద్యుడు చుట్టూ తిరుగుతుంటాడు. తల్లిదంఅడుల కీచులాటలు, దాయాదులతో పోట్లాటలు చూసి విసిగిపోయిన సూరడు ఊరికి రావడం మానేస్తాడు. కాలేజీలో చేరిన సూరడికి నాగిరెడ్డి పటేల్ కూతురు పరిచయం కాస్తా ప్రేమలోకి దిగుతుంది. నాగిరెడ్డి తన కూతురు సూరడితో తిరగడం పరువు తక్కువని భావిచి సూరడ్ని చంపడానికి ప్రయత్నిస్తాడు. దాంతో ప్రేమికులిద్దరూ లేచిపోయి పట్నంలో కాపురం పెడతారు. అక్కడి నుండి సూరడు ఊరికి వచ్చి ఊళ్లో చేతబడి, మూఢ నమ్మకాలను పోగొట్టటానికి కృషి చేస్తాడు. ఊళ్లో మాల, మాదిగ పిల్లలను చేరదీసి వాళ్లకు చదువు చెప్పి రెండు గూడేలను ఏకం చేద్దామనుకుంటాడు. నాగిరెడ్డి ఊళ్లోని దళితుల పాస్‌బుక్కులు తీసుకునిపోయి బ్యాంకులో పెట్టి, అప్పులిప్పిస్తానని సంతకాలు చేయిస్తాడు. వచ్చిన డబ్బంతా తానే కాజేస్తాడు. అప్పు కట్టమని దళితులకు నోటీసులు వస్తాయి. నిలవేసిన దళితులను బెదిరించి పోలీసులతో కొట్టిస్తాడు. మరల సూరని మీద హత్యా ప్రయత్నం చేయిస్తాడు. దీంతో విసిగిపోయిన దళిత గారీబు పటేల్‌ను పొడిచి చంపి పోలీసులకు లొంగిపోతాడు.
ఇందలో మంచిగా బతుకుదామని చెన్నయ్య, చంద్రి ఊరు విడిచి పట్నం వస్తారు. ఊళ్లో వున్న పొలం అమ్ముకుని, ఆ డబ్బు పటేల్‌కిచ్చి మోసపోతారు. దాంతో తిరిగి ఊరికి వచ్చి కీచులాటలు, పోట్లాటలతో తమ జీవితాన్ని గడిపేస్తారు. అలా కాకుండా పటేల్ మోసం చేసినా, ఇక ఊళ్లో ఏం లేదని తెలుసుకుని పట్నంలోనే స్థిరపడి బతకడానికి ప్రయత్నం చేస్తే బాగుండేది. పట్టుదల, ముందుచూపు, స్వంత నిర్ణయాలతో, నీతివంతురాలిగా కనిపించే చంద్రి, సూరడు పెద్దవాడు కావడంతో గయ్యాళిగా, అప్రధాన పాత్రగా మారిపోవడం ఏం బాగాలేదు. అలాగే జయలక్ష్మి ప్రేమ వ్యవహారం కూడా పచ్చిగా, ఫాస్ట్‌గా, ఏకపక్షంగా సాగిపోతుంది. సహజత్వం లోపించింది. బాగా చదువుకుని ప్రయోజకుడై సూరడు దళితోద్ధరణకు పూనుకుంటే బాగుండేది. అలా కాక ఒక లక్ష్యం అంటూ లేకుండా తెగిన గాలిపటంలా ప్రవర్తించే సూరడు తన సుఖం తాను చూసుకునే వాడిలా చిత్రీకరించడం వల్ల ఆ పాత్ర ప్రయోజనమే దెబ్బతింది. ఆదర్శవాదం జోలికి పోకుండా యధాతథ వాదంతో నవల నింపేసినట్లు అనుకోవాలి. దళితులలో వున్న అజ్ఞానాన్ని, అమాయకత్వాన్ని ఆసరాగా చేసుకొని వాళ్లను పూజలు, మంత్రాల పేరిట ఎలా దోపిడీ చేస్తున్నారో ఇందులో చక్కగా తెలియజేశారు. గిరిజనులు హరిజనులే అన్ని ఉద్యోగాలను తన్నుకుపోతున్నారని అగ్రవర్ణాల వారు రెండు సందర్భాలలో తమ అక్కసును వెలిబుచ్చితే వారికిచ్చిన సమాధానాలు చెంపపెట్టులా ఉన్నాయి.
ఈ నవలను పూర్తిగా తెలంగాణ మాండలికం అందునా నల్లగొండ మాండలికంలో రాయడం విశేషం. ఇది ప్రాంతీయ మాండలికమే కాదు, కుల మాండలికం కూడా. ఉచ్ఛారణ పరమైన మాండలికాన్ని యథాతథంగా అక్షరీకరించడం వల్ల ఇది ఇతర ప్రాంతీయులకు ఒక పట్టాన అర్థం కావడం కష్టం. వస్తువును పక్కనబెడితే మాండలికాన్ని అభిమానించేవారు, రకరకాల మాండలికాల పట్ల ఆసక్తి గలవారు తప్పకుండా చదవాల్సిన పుస్తకం. పదేళ్ల కింద వచ్చిన ఈ పుస్తకం మళ్లీ రెండవ ముద్రణగా మన ముందుకు వచ్చింది.

-కె.పి.అశోక్‌కుమార్, ఆంధ్రభూమి-అక్షర,08/02/2014.

 సూరడిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

సూర on kinige

 

Sura600

Related Posts:

ఆలోచనల అక్షరాకృతి – “కేర్‌టేకర్” నవల పై సమీక్ష

నవల అనగానే పాఠకుడికి కొన్ని అంచనాలు ఉంటాయి . తను చదివిన , తనకు నచ్చిన నవలలతో పోల్చుకుంటారు . “నేటి మనిషి మనుగడకు మానవత్వమే అత్యవసర ఔషధం” అనే భావన ఈ నవలకు ప్రేరణగా రచయిత్రి చెప్పారు. ఈ భావన అంతర్లీనంగా ఎంత ఉదారంగా ప్రవహించిందీ నిర్ణయించగల నిర్ణేత పాఠకుడే .

నవల ఆరంభం నుండి ఆకట్టుకునేలా రచన సాగింది. ఇది నవలకి బలాన్నిచ్చే అంశం . రచయిత్రి సమాజంలోని విభిన్న వ్యక్తుల తత్వాలు ,మనస్తత్వాలు పాత్రల ద్వారా బహిర్గతం చేశారు . సంఘర్షణ వల్ల కథలో పట్టు ఉంటుంది . అది కూడా ఈ నవల్లో ఉంది . వెరశి మంచి నవల .

 -కాటూరి రవీంద్ర త్రివిక్రమ్ , చిత్ర సకుటుంబ సచిత్ర మాస పత్రిక .

CareTaker

కేర్‌టేకర్” పుస్తకం డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కేర్‌టేకర్ on kinige

 

Caretaker600

Related Posts:

తిరిగిరాని జీవనం – “కొల్లేటి జాడలు” పుస్తకంపై సమీక్ష

ఎవరయినా తమ చిన్న నాటి జీవితం గురించి ఎందుకు రాసుకుంటారు? ఎందుకు పాత జ్ఞాపకాలను కలబోసుకుంటారు? మక్సీమ్ గోర్కీ, అలివర్ గోల్డ్ స్మిత్, ఆర్కె నారాయణ్ తదితర ప్రపంచ ప్రసిద్ధ రచయితలు కీర్తి శిఖరాలను అధిరోహించిన  తర్వాత కూడా మళ్లీ వెనక్కు ఎందుకు తొంగిచూశారు? తాము ఎప్పుడో అధిగమించిన బాల్యాన్ని మళ్లీ ఎందుకు గుర్తు చేసుకున్నారు? అసలుకు… జనం ఎందుకు తమ పూర్వ జీవితాలను గుర్తు చేసుకుంటారు? వీటికి సమాధానం చెప్పడం ఎంత సులభమో.. అంత కష్టం కూడా. క్లుప్తంగా చెప్పాలంటే బాల్యం అనేది మనం మళ్లీ మళ్లీ వినాలనుకునే మధుర గీతం.

ఏ వర్గ జీవితం గడుపుతున్నా, ఏ ఆర్థిక స్థితిలో ఉన్నా తల్లిదండ్రుల ఆలనా పాలనలో మనిషి గడిపే భద్రజీవితం బాల్యం. అందుకే మనిషి ఎంత ఉన్నత స్థాయికి ఎదిగినా.. తమ చిన్ననాడు కుటుంబం కలిగించిన భద్రతను దానివెనుక ఉన్న జీవన సమతుల్యాన్ని పదే పదే గుర్తు చేసుకుంటూనే ఉంటాడు. కాని మన కళ్లముందే మనకు ఆనందం కలిగించిన ఆ మధురమైన ఊహలు చెదిరిపోతే… ఉమ్మడి కుటుంబ జీవితంతో పాటు ఒక ప్రాంత జీవితాన్ని చిరకాలం నిర్దేశించిన సమాజం, దాని జీవన వ్యవస్థ కరిగి, ఆవిరైపోతే… మనిషి తనకు తాను చేసుకుంటున్న విధ్వంసం మన పునాదులనే, మధుర జ్ఞాపకాలనే ఉన్నఫళాన పెకిలించి వేస్తుంటే.. ఆ జీవుడి వేదన ఎలా ఉంటుందో.. విషాదంగా, దయనీయంగా చిత్రించిన అరుదైన నవల ‘కొల్లేటి జాడలు
తెలుగు పాఠకలోకానికి సుపరిచితులైన అక్కినేని కుటుంబరావు చిత్రించిన బాల్య స్మృతులే ‘కొల్లేటి జాడలు‘. తన బాల్య జీవితాన్ని ఆనందంతో, కమ్మటి జ్ఞాపకాలతో నింపిన ఒక మంచి నీటి సరస్సును ఒకే ఒక్క తరం.. ధ్వంసం చేసిన తీరును, ఒక సామాజిక విషాదాన్ని భయానక స్వరంతో ఆయన ఈ పుస్తకంలో పొందుపర్చారు. తన కళ్లముందే ఆసియా ఖండపు అతి పెద్ద మంచినీటి సరస్సు సమూలంగా నాశనమైపోయిన తీరు పట్ల రచయిత విలాపమే ‘కొల్లేటి జాడలు‘. ఈ కోణంలో చూస్తే ఇది ఒక వ్యక్తి ఎప్పటికీ తిరిగి రాని బాల్యం గురించి రాసుకున్న కథ మాత్రమే కాదు. ఒక సమాజం చేజేతులా నాశనం  చేసుకున్న తిరిగిరాని జీవనం గురించిన మ్రోగించిన ప్రమాద ఘంటిక.
జీవితంలో డబ్బుకు కాకుండా అవసరాలకు మాత్రమే ప్రాధాన్యత ఉండిన రోజుల్లో కొల్లేరు ఒక మంచి నీటి సరస్సుగానే కాకుండా తనను నమ్ముకున్న వారందరికీ నిలకడైన, సరళంగా సాగిపోయిన స్థిర జీవితాన్ని అందించింది. మంచినీటి సరస్సులో పుష్కలంగా దొరికే చేపలను పట్టి బతికే జీవితంలో ఉన్న సరళత్వాన్ని ఈ నవల ఎంతో సహజంగా చిత్రించింది. అదే సమయంలో పెట్టుబడి సహస్ర రూపాల్లో ప్రవేశించి చేపలను, రొయ్యలను పెంచి, ఒక అద్భుత సరస్సును మురికినీటి కయ్యలుగా మార్చిన క్రమంలో… ఒక తరం జీవితంలో, ఒక సమాజ గమనంలో ప్రవేశించిన విధ్వంసాన్ని కూడా ఈ నవల పట్టి చూపింది. పక్క ఊళ్లకు పోయి చేపలమ్ముకుని బతికిన జీవితంలో భారీ పెట్టుబడి ప్రవేశించి దూరప్రాంతాలకు చేపల ఎగుమతిని ప్రారంభించిన జీవితం మొదలైన క్రమంలో అక్కడి ప్రజలు, సమాజం, వారనుభవించిన ఉమ్మడి సంస్కృతి ఎలా కళ్లముందే ఆవిరవుతూ వచ్చిందో కొల్లేటి జాడలు కళ్లకు కట్టేలా చూపింది.
ఈ నవల తనకు తానుగా, ఆనందం నుంచి విషాదం వరకు పయనించిన ఒక స్థల పురాణం. రచయిత అరవయ్యేళ్ల క్రితం మిగిల్చుకున్న కొల్లేటి బాల్య జ్ఞాపకాలను అక్షరం అక్షరంలా మలిచి ఒక సమాజ విధ్వంసాన్ని పాఠకులకు, తన ప్రాతం ప్రజలకు చూపించడానికి చేసిన ప్రయత్నమే కొల్లేటి జాడలు. వాళ్ల తప్పు వాళ్లకు తెలిసింది గాని చాలా ఆలస్యంగా తెలిసింది అంటూ కొల్లేటి ప్రాంత ప్రజల కనువిప్పును రచయిత పట్టుకున్న తీరు అక్కడ ఒక దశాబ్ద కాలంలో జరిగిన దుష్పరిణామాలను పట్టి చూపించింది.
కొల్లేరు అంటే ఒకప్పుడు ప్రకృతి, స్థానిక సమాజం ఒద్దికగా, సామరస్యంగా, సరళాతిసరళంగా సాగిన ప్రశాంత జీవితం. ఆ సరస్సు తీరం వెంబడి ఉన్న గ్రామాలు, మనుషులూ, గొడ్డూగోదా, పనిపాటలూ, వంటలు, తిండి, సంబరాలు, వినోదాలు, శ్రమ, అలవాట్లు, ఆచారాలు వంటి వన్నీ అక్కడ దొరికే చేపల చుట్టూ, పండే పంటల చుట్టూనే కాకుండా, ప్రకృతికి, మనిషికి మధ్య సహజ సంబంధానికి గుర్తుగా తారాడుతూ వచ్చాయి. ప్రకృతితో ఈ మానవీయ సంబంధాన్ని కొల్లేటి జాడలు అత్యంత మనోహరంగా చూపించింది. తరాలుగా దోనెలో కూచుని తిరిగిన జీవితాన్ని అక్కడిప్పుడు డబ్బు కమ్మేసింది. మామూలుగా కాదు.. ఒక జీవావరణ, జీవన, పాలనాపరమైన విషాదం అక్కడిప్పుడు తాండవిస్తోంది.
ఇప్పుడు కొల్లేటిని మనం రచయిత చూపుతున్న కొత్త దృష్టితోనే చూడాలి. ఆ ప్రాంతంలోని రెండు మూడు మధ్యతరగతి రైతు కుటుంబాల చుట్టూ తిరిగిన ఈ నవల, 60 సంవత్సరాల క్రితం జీవితంతో పోలిస్తే కొల్లేటికి ఇప్పుడు జరిగిన సామూహిక మానభంగం ఎంత హేయమైందో యావత్ సమాజానికి చూపిస్తూ ఒక సామూహిక భయాన్ని, తీవ్ర హెచ్చరికను చేస్తోంది. చిన్నతనంలో తమందరినీ సాకిన ఒక అద్భుతమైన నీటి సరస్సు ముక్కలై, విధ్వంసమై, మాఫియా చేతుల్లో చేపల చెరువులుగా మరణిస్తున్న దృశ్యం రచయితనే కాదు. పాత్రలనే కాదు, చదువుతున్న పాఠకులను కూడా కలకాలం వెంటాడుతుంది. ఆనాటి మంచి నీటి సరస్సు జాడల వెంట రచయిత జ్ఞాపకాల పడవ ప్రయాణమే కథ. ఇది కథ కంటే జీవితం. కాల్పనిక పాత్రలు కాకుండా కొల్లేటి ప్రాంత ప్రజలు సామూహికంగా తమను వ్యక్తం చేసుకున్న స్వీయ గాథ ఇది.
కమ్యూనిస్టు ఉద్యమాల ప్రేరణతో అక్కడ అయిదు వందల ఎకరాలలో సమిష్టి వ్యవసాయం మొదలై అయిదేళ్లు బంగారం పండించి కరువు సమస్యను దూరం చేసుకున్న మంచి ప్రయోగం కూడా రాజకీయాలు,  స్వార్థం కారణంగా ఎలా కుప్పగూలిపోయిందో, చివరికి ఆ ప్రాంతం ప్రాంతమే చేపల చెరువులుగా మారిపోయి జీవితాన్నే ఎలా కంపు పట్టించాయో రచయిత చెబుతున్నంత వరకు కొల్లేరు విషాదం తెలీదు.
లక్ష ఎకరాల విస్తీర్ణం, పశ్చిమ గోదావరి జిల్లాలో ఎక్కువగా, కృష్ణా జిల్లాలో తక్కువగా పరుచుకున్న కొల్లేరు, ఆసియాలో అత్యంత ప్రాచీనమైన మంచినీటి సరస్సు. ప్రపంచ ప్రసిద్ధమైన పక్షుల ఆవాస కేంద్రం. ఒకప్పుడు లక్ష పెలికాన్ జాతి పక్షులకు ఆశ్రయమిచ్చిన పలస కేంద్రం. అలాంటిది రోజుకు కొల్లేరు తీరప్రాంతం నుంచి 500 లారీల చేపలు కలకత్తాకు ఎగుమతి అయ్యేంతగా అక్కడ జీవితం ఎదిగిపోయింది.
ప్రపంచంలో మరే దేశంలో అయినా ఇంతపెద్ద మంచి నీటి సరస్సు ఉంటే ఇంత అన్యాయంగా దీని ఊపిరి తీసేవారా అనే ప్రశ్న తలెత్తుతుంది. ఈ ప్రశ్న లేవనెత్తడమే ఈ నవల విశిష్టత. తమ ప్రాంతాన్ని మళ్లీ పూర్వ వైభవంలోకి తీసుకుపోవాలని ఇప్పుడక్కడ వ్యక్తులు, సంస్థలూ చేస్తున్న ప్రయత్నాలు ఫలించాలని కోరుకోవడం తప్ప కొల్లేరు గురించి ఇంకేమీ ఆలోచించలేం.

- ఆంధ్రప్రభ , 21 మార్చి 2014.

 

కొల్లేటి జాడలు”నవల డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కొల్లేటి జాడలు on kinige

 

KolletiJaadalu600

 

Related Posts:

కర్ణుడి కోణంలో… “కర్ణ మహాభారతం” పుస్తకం పై సమీక్ష

ప్రతినాయకుల పక్షాన నిలిచినా…కథానాయకుడికి ఉండితీరాల్సిన లక్షణాలన్నీ ఉన్నాయి కర్ణుడికి. ఆ శౌర్యం, ఆ ధైర్యం, ఆ దానగుణం… మహాభారతంలోని ఏ పాత్రలోనూ కనిపించవు. అంతిమంగా పాండవుల విజయాన్ని ఆకాంక్షించే సామాన్య పాఠకుడు కూడా… మనసులో ఏ మూలనో కర్ణుడి పట్ల అభిమానాన్ని కనబరుస్తాడు. కురుక్షేత్ర సంగ్రామంలో ఆ యోధుడు ప్రాణాలు కోల్పోకుండా ఉంటే బావుండని ఆశిస్తాడు. కర్ణుడి జీవితం నిండా అవమానాలూ మోసాలే. నీటిపాలు చేసిన కన్నతల్లి కుంతి నుంచి… బాధ్యత మరచిన సారథి శల్యుడి దాకా… ఎన్నో అనుభవాల గాయాలు. కురుపాండవుల అస్త్ర ప్రదర్శన సమయంలో నేనున్నానంటూ రంగప్రవేశం చేయడం మొదలు… అర్జునుడి చేతిలో నేలకొరిగే దాకా… ప్రతి మలుపునూ కళ్లకు కట్టినట్టు వివరించారు. కర్ణుడు కేంద్ర బిందువుగా శ్రీశార్వరి చేసిన విశిష్ట రచన ఇది..

- వైష్ణవి, ఈనాడు ఆదివారం అనుబంధం, 14 సెప్టెంబర్ 2014

KarnaMahaBaratam_14Sep14

“కర్ణ మహాభారతం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కర్ణ మహాభారతం on kinige

 

KarnaMahabharatam600

Related Posts:

మానవతా స్పర్శ – ‘నిర్ణీతి’ , ‘ఆరునెలలు ఆగాలి’ పుస్తకాలపై సమీక్ష

మానవీయ విలువలూ, ఆత్మీయతా స్పర్శా, అపారమైన ఆర్ద్రతా కలిగిన కథలే కలకాలం నిలబడతాయి. పి.ఎస్.నారాయణనిర్ణీతి’ సంపుటిలోని కథలు ఆ కోవకే చెందుతాయి. ‘పెళ్ళివారిల్లు పెద్దముత్తయిదువులా ఉంది’ లాంటి పోలికలు కథలకి కొత్త అందాన్నిస్తాయి. ‘పంచాగ్ని’ కథలో భారతి ఇంట్లో అద్దెకు దిగిన ఇద్దరు కుర్రాళ్లలో ఒకడైన సుధాకర్‌కి తెలిసిన ఓ నిజం, అతను ప్రవర్తించిన తీరూ పాఠకుల మదిలో చెరగని ముద్రవేస్తుంది. ‘నిర్ణీతి’ కథలో స్నేహానికి కల్యాణి ఇచ్చిన విలువా, దానివల్ల ఆమెకు ఎదురైన అనుభవం, ఫలితంగా ఆమె తీసుకున్న నిర్ణయం ఆసక్తిని రేపుతాయి. అత్యాచారానికి గురైన యువతి ధైర్యంగా నిలదొక్కుకుని, ఆత్మవిశ్వాసంతో పోరాడి ప్రతీకారం తీర్చుకోవడం ‘ఆరునెలలు ఆగాలి‘ నవల ఇతివృత్తం. అందుకు ఆమె పన్నిన వ్యూహాలూ, ఎదుర్కొన్న పరిస్థితులూ పాఠకులను ఉద్వేగానికి గురిచేస్తాయి.

- అయ్యగారి శ్రీనివాసరావు, ఆదివారం అనుబంధం, 3rd Aug 2014

 

 

 

 

 

 

 

 

ఆరు నెలలు ఆగాలి” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

ఆరు నెలలు ఆగాలి on kinige

 

Related Posts:

అతివ అంతరంగ మథనం – “అన్వేషణ” నవలపై సమీక్ష

మనిషి జీవిస్తున్నాడా? లేక జీవిస్తున్నానని భ్రమలో ఉన్నాడా? అనే ఒక సందిగ్ధం ఈరోజుది కాదు. పురాణాల నుండి వస్తున్నదే! ఐతే- ఆ మాట నిర్భయంగా నేడు అంటున్నారు. అనుకుంటూనే ఆలోచిస్తున్నారు. గంటి భానుమతి రచించిన ‘‘అన్వేషణ’’ నవలలో నిజంగా మానవ జీవితంలోని అనేక కోణాలను అన్వేషించారు. అందరికీ తెలిసిన సమాధానాలపై ఎదురు తిరిగారు. తెలియని ప్రశ్నలను సంధించారు. ఈ 21వ శతాబ్దంలో కూడా ఇంకా అత్తింట్లో ఆవేదనలు, భర్త మూలంగా అవమానాలు, అనుమానాలు ఎదుర్కొంటున్న నేటి సమాజపు దుస్థితిని అభివర్ణించిన తీరు ఎంతో ఆకట్టుకుంది. అసలు స్త్రీ సంఘానికి భయపడాలా? లేక తన మనస్సాక్షికి భయపడాలా? అంటే నా ధోరణిలో మనస్సాక్షికే ఎక్కువ మార్కులు వేస్తాను. సంఘం అనేది గాలివాటుకు ఎగిరిపడుతున్న ఎండుటాకు లాంటిది. అదిగో అని చూపితే కనిపించకున్నా, అవును నాకూ కనిపించింది అంటూ ఎదుటిమనిషిని మరింత నిర్వీర్యం చేస్తుంది. కానీ మన మనస్సాక్షికి తెలుస్తుంది మనమేంటి? మనం జీవిస్తున్న విధానం ఏమిటి? అని. ఒక స్ర్తి అయినా, పురుషుడైనా మనస్సాక్షి ముందు తలెత్తుకుంటే చాలు గెలిచినట్లే..
అసలు  స్త్రీ అంటేనే ఒక కుటుంబం. స్త్రీ లేనిదే కుటుంబాలు ఎంతగా వెలవెలపోతుంటాయో మనం గమనిస్తూనే ఉంటాం. ఈ నవలలో విజయ అనే పాత్ర ఎన్నో సందిగ్ధాల మధ్య సతమతమవుతూ తన జీవితం అలా ఎందుకు ఒంటరి అయిపోయిందనే విషయంపై అన్వేషణ కొనసాగిస్తుంది. అలాంటి సమయంలో తనను ప్రేమించిన వ్యక్తి కూడా తల్లిదండ్రులు ఎవరో తెలియకుంటే పెళ్ళిచేసుకోవడం కష్టమని అనడం విజయను మరింత బాధిస్తుంది. పెళ్ళికి యువతి కావాలా? యువతికి యువకుడు ఉంటే చాలదా? అంటే చాలదు. ప్రేమకు ఇద్దరు చాలు పెళ్లికి మాత్రం రెండు కుటుంబాలు కావాలి అనే మాట విన్నాం. అయితే కుటుంబం ఎందుకు? అంటే మాత్రం రాబోయే తరాలకు ఒక చరిత్ర కావాలి. నాన్న అమ్మ ఎలాగో, అమ్మమ్మ, తాత, పెదనాన్న, చిన్నాన్న పిన్ని అత్త లాంటి వరసలన్నీ ఎంతో కావాలి. వారందరూ మనకంటూ ఏమీ చేయకపోవచ్చు. కానీ ఉన్నారనే ఆశ ముందుకు నడిపిస్తుంది. తల్లిదండ్రులు పునాదులైతే నా అన్నవాళ్ళు మూలస్తంభాలు. ఆ విషయమే ఈ నవలలో కనిపిస్తుంది.
గంటి భానుమతి ఎంతో సున్నిత హృదయులు. వీరిలోని నొప్పించేతత్వం లేని తనమే ఈ నవలకు పునాది అయింది. కారణం ఈ నవలలో మరీ బాధించే పాత్రలు చూపలేదు. కాలానుగుణంగా మనిషి తత్వం మారుతుందే తప్ప ఎవరూ చెడ్డవారు కారనే తత్వాన్ని తెలియజేసిన తీరు కడు రమణీయం. కాకుంటే మనుషుల్లో ఏదో ఒకటి కావాలని బాధ, ఉంటే ఎవరికి చెందుతుందో అనే బాధ, ఆస్తుల పంపకాలు, అక్కచెల్లెళ్ళ పోరాటాలు, రక్తసంబంధీకుల సమస్యలు చదువుతుంటే ఒకటుంటేఒకటిలేదనే తత్వంతో మనుషులు ఎదగలేకపోతున్నారా అనిపించక మానదు. అదే విషయం విజయ జీవితంలో కనిపిస్తుంది. తండ్రి వచ్చినా, అమ్మమ్మ, తాతయ్యలు ఉన్నా ఆస్తుల పంపకాలలో అనేక చేదుకోణాలను చూస్తుంది. పెద్దలు కుదిర్చిన వివాహాన్ని చేసుకున్న విజయ తల్లిని అన్వేషించడం మాత్రం ఆపలేదు. చివరకు తన తల్లి అత్యాచారానికి గురై చేయూతనిచ్చేవారు ఉన్నా అందుకోలేక, సమాజానికి ముఖం చూపించలేక మరింతగా కుంగిపోయి తన జీవితాన్ని పోగొట్టుకుందనే నిజాన్ని తెలుసుకుని కుమిలిపోతుంది. మరో వివాహం చేసుకుని వారి ద్వారా కూడా బిడ్డలున్నా వారి నుండి ఆదరణ లభించకపోవడంతో మొదటి భార్య కన్నబిడ్డ విజయ తండ్రిని తానే కొడుకై ఆదరిస్తుంది. తల్లిదండ్రులు ఎలాంటివారైనా అనుబంధం ముందు ఓడిపోక తప్పదని నిరూపిస్తుంది.
మనిషి జీవితంలోని మార్పుచేర్పులకు సమాజమే కారణం అయితే, వ్యక్తిగా తనను తాను గమనించుకునే స్థితికి మనిషి ఎపుడు చేరుకుంటాడు? అదే స్త్రీ అయితే తన పరిస్థితి ఏమిటి? అనే ప్రశ్నలను సంధించి సరికొత్త సమాధానాన్ని అందించిన తీరులో సాగిన వైనం మనల్ని ఆద్యంతం అలరిస్తుంది. వ్యక్తిత్వం అనేది ఒక స్ర్తికి సంబంధించింది అనడం కంటే వ్యక్తిత్వం ప్రతి వ్యక్తికి సంబంధించింది అని ముగించి ఉంటే మరింత బావుండేదనిపిస్తుంది. ఎందుకంటే ఒక ప్రశ్నగా స్త్రీ నిలబడినంతకాలం సమాజం తనకిష్టమైన సమాధానాలు చెబుతూనే ఉంటుంది. తానే ఒక సమాధానమైన రోజు ప్రశ్నలన్నీ ఏమవుతాయి? ఆలోచించాలి…!

-ఎస్.ఎం. అక్షర, ఆంధ్రభూమి, 21/06/2014

***

అన్వేషణ”నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అన్వేషణ on kinige

Related Posts:

వెంటాడే విషాద స్వరం – “మూలింటామె” పుస్తకంపై సమీక్ష

పల్లెబతుకుల్ని ఓ తోలుబొమ్మలాట మాదిరిగా పాఠకుల కళ్లకు కడతారు నామిని. మనుషుల ప్రవర్తనలు, భిన్న ప్రవృత్తులు, అవసరాలు, ఆలోచనలు, రాగద్వేషాలు… అక్షరబద్ధం చేసి పికాసో ‘గోర్నికా’ చిత్రాన్ని గుర్తు చేస్తారు. ‘పచ్చనాకు సాక్షిగా’, ‘మునికన్నడి సేద్యం’ చదివినవారికి నామినిని కానీ నామిని శైలిని కానీ ప్రత్యేకంగా పరిచయం చేయాల్సిన పన్లేదు. ‘మూలింటామె‘ నవల కూడా అంతే వైవిధ్యమైన రచన. ఒకానొక గ్రామంలో … ఒకానొక సంఘటన నేపథ్యంలో ఉత్పన్నమైన పరిస్థితుల క్రమాన్ని అత్యంత ప్రతిభావంతంగా చిత్రించారు నామిని. మార్కెట్ సూత్రాల్ని ఒక గ్రామం ఒంటబట్టించుకున్న తీరుకు వసంత (పందొసంత), కడదేరుతున్న పాతతరం విలువలకు కుంచమమ్మ (మూలింటామె) ప్రతినిధులుగా పాఠకుల కళ్లముందు కదలాడతారు. పుస్తకాన్ని మూసేసిన తర్వాత కూడా, ఓ విషాద స్వరమై ‘మూలింటామె‘ మన ఆలోచనల్లో తారట్లాడుతూనే ఉంటుంది. ‘నా మనవరాలు మొగుణ్ణొదిలేసింది. అంతేగానీ, మియాం మియాం అంటూ నీ కాళ్ల కాడా నా కాళ్ల కాడా చుట్టకలాడే పిల్లిని చంపలేదే’ అన్న మూలింటామె మాటతో నవల ముగుస్తుంది. ఆ ముగింపు పాఠకుడి మదిలో అనేక ఆలోచనలకు ఆలంబన అవుతుంది.

–వెంకట్, ఈనాడు ఆదివారం అనుబంధం, 22 జూన్ 2014

 

 

 

 

 

 

 

 

మూలింటామె” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

మూలింటామె on kinige

 

 

Related Posts:

‘ఆంధ్రనగరి’ చారిత్రక నవల ఇప్పుడు ఈ-బుక్ గా మీకోసం!

ఆంధ్రనగరి పుస్తకావిష్కరణ జరిగి ఈరోజుకి సరిగ్గా సంవత్సరం. అందుకే ఇదే రోజు ఈ పుస్తకాన్ని ప్రపంచవ్యాప్తంగా ఉన్న పాఠకులందరికీ కినిగె ద్వారా అందుబాటులోకి తీసుకువస్తున్నారు రచయిత శ్రీ సాయి పాపినేని గారు.
ఎంతో పరిశోధించి, మరెంతో పరిశ్రమించి హాయిగా సాగిపోయే భాషలో ఈ చారిత్రక నవలను రచించారు రచయిత. విమర్శకుల ప్రశంసలను, పాఠకుల అభిమానాన్ని ఎంతగానో చూరగొన్న ఆంధ్రనగరి నవల కినిగెలో ఇప్పుడు ఈ-బుక్ మరియు ప్రింటు బుక్ రూపాలలో కూడా లభిస్తుంది.

18-06-2013న జరిగిన ఆంధ్రనగరి పుస్తకావిష్కరణ వివరాలు

 

 

 

 

 

 

 

 

 

 

 

తెలుగు సాహితీవనంలో ఒక తొలకరి జల్లు

ప్రస్తుతం ప్రపంచమంతా చారిత్రక నవలా సాహిత్యానికి ఎంతో ప్రాచుర్యం ఉంది. ఇంగ్లీష్ కాల్పనిక సాహిత్యానికి ఉన్న విస్తారమైన అదరణ వల్ల విజయవంతమైన రచయితలకి ఆర్థిక లబ్ధి కలుగుతుంది. అందువలన చారిత్రక నేపధ్యంపై విస్తృతమైన పరిశోధన జరపటం వాళ్ళకు సాధ్యమయింది. కానీ ప్రాంతీయ భాషా సాహిత్యానికి ఉన్న పరిమితమైన ఆదరణ దృష్ట్యా, ఎంతో ఖర్చుపెట్టి లోతుగా పరిశోధించటం అంత సులువైన పని కాదు. ప్రాంతీయ భాషలలో చారిత్రక నేపధ్యంతో పూర్తి అవగాహనగల రచనలు అంత తరచుగా రాకపోవటానికి ఇదే ముఖ్య కారణం. ఈ నేపధ్యంలో సాయి పాపినేని గారి ఆంధ్రనగరి మన తెలుగు సాహితీవనంలో ఓ తొలకరి జల్లు.
క్రీ.పూ. మూడవ శతాబ్దిలో వేళ్ళూని వెయ్యేళ్ళపాటు మహోజ్వలంగా సాగిన మహాంధ్ర సామ్రాజ్యచరిత్రకి అద్దంపట్టిన ఈ నవల, నిన్న హుస్సేన్‌సాగర్ నడిబొడ్డున బుద్ధవిగ్రహంవద్ద అవిష్కరించబడింది. ప్రముఖులు, సాహితీవేత్తలు, పాత్రికేయుల సమక్షంలో, సోమా గ్రూప్ అధినేత, శ్రీ మాగంటి రాజేంద్రప్రసాద్‌గారి చేతులమీదుగా, ఈ కార్యక్రమం జరిగింది. రాజేంద్రప్రసాద్‌గారు ఈ సందర్భంగా మాట్లాడుతూ, “శ్రీ సాయి పాపినేనిగారు ఈ నవల గురించి ఎంతో లోతైన పరిశోధనచేసి దాని రచనని ఒక మహాయజ్ఞంగా నిర్వహించారు. ప్రాచీనాంధ్ర సంస్కృతిని మనవాళ్ళకి పరిచయం చేయాలనే ఆయన ఉద్దేశ్యం మంచిది. అదే వారి ప్రయత్నానికి కావలసిన సహకారం అందిచడానికి నన్ను ప్రేరేపించింది. వారి ఈ ప్రయత్నం సఫలమవ్వాలనీ, ఈ ఆంధ్రనగరి పుస్తకం లక్షలాది తెలుగువారిలో మన సంస్కృతిపట్ల అవగాహననీ, గౌరవాన్నీ పెంపొందించాలనీ ఆశిస్తున్నాను”, అన్నారు.
క్రీ.శ. 18వ శతాబ్దాంతంలో, అమరావతి స్తూపాన్ని కనుగొన్నప్పటినుండీ, అది పురాతన వస్తు సంగ్రహకులూ, పురాతత్వవేత్తలూ, ప్రభుత్వోద్యోగుల చేతుల్లోపడి ఈనాటికి నామమాత్రంగా మిగిలింది, అప్పటి వారి అనాలోచిత నిర్ణయాలవల్ల అమరావతి శిల్పసంపద అనేక మ్యూజియమ్‌లకి చేరి ప్రపంచపు నలుమూలలా ఖ్యాతిగాంచినా, మన తెలుగువాళ్ళకి మాత్రం దూరమయింది. వెయ్యేళ్ళు మన ఆంధ్రుల రాజధానిగా వైభవం కనుజూచిన ఈ మహానగరం, నేడొక మట్టి గుట్టగా మిగిలింది. రచయిత తన మనోనేత్రంతో ఆకాలానికివెళ్ళి, కృష్ణా నదీమతల్లి ఒడిలో వెలిసిన ఈ అపూర్వ నాగరికతయొక్క ఉత్థానపతనాలని, తన పాత్రలతో, కథనంతో పునరుజ్జీవింపజేసి కనులకు కట్టినట్లు మన ముందుంచాడు. అటు రోమన్ సామ్రాజ్యంనుండి, ఇటు చైనా వరకూ జరిగిన, సమకాలీన ప్రపంచ రాజకీయ, వాణిజ్యపరమైన ఘట్టాలని ముడివేస్తూ, ముఖ్యోద్దేశానికి ఏమాత్రం భంగం కలిగించకుండా కథ మలచబడింది. ఈ నవల యొక్క సరళమైన శైలీ, జీవం ఉట్టిపడే పాత్రలు, చరిత్రపట్ల మక్కువ కలిగిన ఏ కొద్దిమందికి మాత్రమేగాక చదివిన ప్రతి తెలుగువానికీ సంతృప్తినిస్తాయి.
ఈ నవల ఆర్ట్స్ & లెటర్స్, హైదరాబాద్ వారిచే ప్రచురించబడి, విశాలాంధ్ర పబ్లిషింగ్ హౌస్ వారిచే పంపిణీ చేయబడుతుంది. ప్రాచీన చరిత్రపై ఎన్నో పుస్తకాలను ప్రచురించి మనకందించిన ఆర్ట్స్ & లెటర్స్ సంస్థ అధ్యక్షులు శ్రీ చెన్నూరు ఆంజనేయరెడ్డిగారు ఈ సందర్భంగా మాట్లాడుతూ, “ఆంధ్రుల చరిత్రలో ప్రాచీన చారిత్రక యుగం ఎంతో ప్రాముఖ్యం సంతరించుకొంది. ఈనాటి ప్రజల జీవనంపైనా, ఆలోచనావిధానంపైనా ఆనాటి ప్రభావం ఎంతో ఉంది. అప్పటి సంఘంలో సర్వమానవాళితో స్నేహ సద్భావనలను వెల్లివిరిసాయి. మన ఆంధ్రదేశం ప్రపంచపు నలుమూలలకీ నాగరికతని పంచింది. మనచరిత్రలోని ఈ స్వర్ణయుగాన్ని మీముందుంచే ఈ నవలని అందించటానికి ఆర్ట్స్ & లెటర్స్, హైదరాబాద్ సంస్థ ఎంతో గర్విస్తుంది”, అన్నారు.
ప్రఖ్యాత తెలుగు రచయిత, విద్యావేత్త, ఆచార్య కేతు విశ్వనాథరెడ్డిగారు ఆహూతులతో మాట్లాడుతూ, “భాషాపరంగా చూస్తే సాయి పాపినేనిగారిది చారిత్రక ఇతివృత్తానికి, నేపథ్య నిర్వహణకు పాత్రల చిత్రణకూ అనుగుణమైన రచన. సారళ్యము, ప్రసన్నత, గాంభీర్యము తగుపాళ్ళలో మేళవించిన ఆధునిక శైలి”, అని రచయితని ప్రశంసించారు.

-18th June 2013

***

ఆంధ్రనగరి” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి. 

ఆంధ్రనగరి on kinige

Related Posts:

‘కర్ణ మహాభారతం’ పుస్తకంపై సమీక్ష

మహాభారతంలోని వందలాది పాత్రల్లో ఉత్తమోత్తమమైన పాత్ర కర్ణపాత్ర. సామాన్యంగా జీవించిన మహాయోగి. తుదివరకు మృత్యు ఛత్రచ్ఛాయలో నడిచి మృత్యువునే భయపెట్టినవాడు. భారతంలో సిసలైన సజీవ పాత్రలు కర్ణ, కుంతి. కర్ణుడు ఆత్మయోగి. తన వెనుక మృత్యువు కాపలాగా ఉందని గుర్తెరిగి కూడా గెలుపు ఓటమిలను ఆశించకుండా యుద్ధమే కర్తవ్యంగా భావించినవాడు. ప్రతి మనిషికీ కర్ణుడే గొప్ప ఆదర్శం. మిత్రులుగా నటించే శత్రువులు, శత్రువుల్లా కోపించే మిత్రులూ ఉంటారు. అందుకే ఈ కర్ణుని కథ చిరస్మరణీయం. ప్రతివారు తప్పక చదవాలి.

- నవ్య, 4th June 2014

 

 

 

 

 

 

 

 

 

 

కర్ణ మహాభారతం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

కర్ణ మహాభారతం on Kinige

Related Posts:

పల్లె వాతావరణానికి అద్దం

‘ఒక మారుమూల గ్రామంలో వెన్ను బద్ద విరిగి పక్కకు ఒరిగిన పాతపడిన ఇంట్లో నులక మంచం మీద కట్టెలా పడి ఉన్న దేవమ్మను చూడ్డానికి కూతుళ్ళు, అల్లుళ్ళు, కొడుకులు, కోడళ్ళు, మనవలు, మనుమరాళ్ళు అందరూ వస్తున్నారు’ అంటూ ‘భూదేవి‘ నవల ప్రారంభమవుతుంది. ఇది పల్లె జీవితానికి అద్దం పట్టిన నవల. గ్రామీణ వాతావరణం… అక్కడి కుటుంబాల స్థితిగతులు… వారి మనస్తత్వాలను… ముఖ్యంగా దేవమ్మ పాత్రను… ‘భూదేవి’ నవలలో చక్కగా చూపించారు రచయిత సింహప్రసాద్‌. ప్రధాన పాత్ర కథా ప్రారంభం నుండి చివరి వరకు ఎక్కడా చిరాకు లేకుండా సాగిపోతుంది. భూదేవి ఓర్పుకు పెట్టింది పేరు అంటుంటాం.. ఆ రకంగా నవలలోని పాత్రకు తగిన పేరు ఎంచుకుని న్యాయం చేశారు. ఎన్నో కష్టాలు ఓర్చి పిల్లలను పెద్దవాళ్ళుగా చేసి తీర్చిదిద్దిన తర్వాత .. ఎవరిదారి వారు చూసుకుని తనను పట్టించుకోకుండా వదిలేయడంతో కుమిలిపోతోంది. చివరికి స్నేహితుడు నాని చెప్పిన మాటలతో… కన్నీళ్ళు తుడిచే చేతుల కోసం ఎందరో ఆశగా ఎదురుచూస్తున్నారని… వారి కోసం పనిచేయడానికి మళ్ళీ సిద్ధమవుతాననడంతో నవలను ముగిస్తారు. నవల పల్లెవాసులకే కాదు! ప్రస్తుత పరిస్థితుల్లో పట్టణ వాసులకు కూడా అతికినట్టు సరిపోతుందని చెప్పవచ్చు. అంతేకాదు! ఆ సంఘటనలు మన చుట్టు పక్కలో.. మన ఇంట్లోనో జరిగినట్లు ఉంటుంది. ఏ పాత్రకు, ఆ పాత్ర ఏ లోపం లేకుండా కథను సహజంగా తీర్చిదిద్దారు. ‘నడవటానికి పాదాలుండాలి గాని లోకం నిండా దారులే.. పరోపకారానికి మనస్సుండాలి గానీ చేయడానికి ఎన్నెన్నో మార్గాలు’ వంటి మనస్సును హత్తుకునే ఎన్నో వాక్యాలు ఈ నవలలో ఆకట్టుకుంటాయి.

జి.వేణుమాధవరావు, ప్రజాశక్తి ఆదివారం అనుబంధం, 10 నవంబరు, 2013

* * *

‘భూదేవి’నవల డిజిటల్ రూపంలో కినిగెలో లభిస్తుంది. కినిగె వెబ్‌సైట్‌పై ఆర్డర్ చేయడం ద్వారా ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్ చూడండి.
భూదేవి On Kinige

Related Posts: