కర్ణుడి కోణంలో… “కర్ణ మహాభారతం” పుస్తకం పై సమీక్ష

ప్రతినాయకుల పక్షాన నిలిచినా…కథానాయకుడికి ఉండితీరాల్సిన లక్షణాలన్నీ ఉన్నాయి కర్ణుడికి. ఆ శౌర్యం, ఆ ధైర్యం, ఆ దానగుణం… మహాభారతంలోని ఏ పాత్రలోనూ కనిపించవు. అంతిమంగా పాండవుల విజయాన్ని ఆకాంక్షించే సామాన్య పాఠకుడు కూడా… మనసులో ఏ మూలనో కర్ణుడి పట్ల అభిమానాన్ని కనబరుస్తాడు. కురుక్షేత్ర సంగ్రామంలో ఆ యోధుడు ప్రాణాలు కోల్పోకుండా ఉంటే బావుండని ఆశిస్తాడు. కర్ణుడి జీవితం నిండా అవమానాలూ మోసాలే. నీటిపాలు చేసిన కన్నతల్లి కుంతి నుంచి… బాధ్యత మరచిన సారథి శల్యుడి దాకా… ఎన్నో అనుభవాల గాయాలు. కురుపాండవుల అస్త్ర ప్రదర్శన సమయంలో నేనున్నానంటూ రంగప్రవేశం చేయడం మొదలు… అర్జునుడి చేతిలో నేలకొరిగే దాకా… ప్రతి మలుపునూ కళ్లకు కట్టినట్టు వివరించారు. కర్ణుడు కేంద్ర బిందువుగా శ్రీశార్వరి చేసిన విశిష్ట రచన ఇది..

- వైష్ణవి, ఈనాడు ఆదివారం అనుబంధం, 14 సెప్టెంబర్ 2014

KarnaMahaBaratam_14Sep14

“కర్ణ మహాభారతం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కర్ణ మహాభారతం on kinige

 

KarnaMahabharatam600

Related Posts:

మానవతా స్పర్శ – ‘నిర్ణీతి’ , ‘ఆరునెలలు ఆగాలి’ పుస్తకాలపై సమీక్ష

మానవీయ విలువలూ, ఆత్మీయతా స్పర్శా, అపారమైన ఆర్ద్రతా కలిగిన కథలే కలకాలం నిలబడతాయి. పి.ఎస్.నారాయణనిర్ణీతి’ సంపుటిలోని కథలు ఆ కోవకే చెందుతాయి. ‘పెళ్ళివారిల్లు పెద్దముత్తయిదువులా ఉంది’ లాంటి పోలికలు కథలకి కొత్త అందాన్నిస్తాయి. ‘పంచాగ్ని’ కథలో భారతి ఇంట్లో అద్దెకు దిగిన ఇద్దరు కుర్రాళ్లలో ఒకడైన సుధాకర్‌కి తెలిసిన ఓ నిజం, అతను ప్రవర్తించిన తీరూ పాఠకుల మదిలో చెరగని ముద్రవేస్తుంది. ‘నిర్ణీతి’ కథలో స్నేహానికి కల్యాణి ఇచ్చిన విలువా, దానివల్ల ఆమెకు ఎదురైన అనుభవం, ఫలితంగా ఆమె తీసుకున్న నిర్ణయం ఆసక్తిని రేపుతాయి. అత్యాచారానికి గురైన యువతి ధైర్యంగా నిలదొక్కుకుని, ఆత్మవిశ్వాసంతో పోరాడి ప్రతీకారం తీర్చుకోవడం ‘ఆరునెలలు ఆగాలి‘ నవల ఇతివృత్తం. అందుకు ఆమె పన్నిన వ్యూహాలూ, ఎదుర్కొన్న పరిస్థితులూ పాఠకులను ఉద్వేగానికి గురిచేస్తాయి.

- అయ్యగారి శ్రీనివాసరావు, ఆదివారం అనుబంధం, 3rd Aug 2014

 

 

 

 

 

 

 

 

ఆరు నెలలు ఆగాలి” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

ఆరు నెలలు ఆగాలి on kinige

 

Related Posts:

అతివ అంతరంగ మథనం – “అన్వేషణ” నవలపై సమీక్ష

మనిషి జీవిస్తున్నాడా? లేక జీవిస్తున్నానని భ్రమలో ఉన్నాడా? అనే ఒక సందిగ్ధం ఈరోజుది కాదు. పురాణాల నుండి వస్తున్నదే! ఐతే- ఆ మాట నిర్భయంగా నేడు అంటున్నారు. అనుకుంటూనే ఆలోచిస్తున్నారు. గంటి భానుమతి రచించిన ‘‘అన్వేషణ’’ నవలలో నిజంగా మానవ జీవితంలోని అనేక కోణాలను అన్వేషించారు. అందరికీ తెలిసిన సమాధానాలపై ఎదురు తిరిగారు. తెలియని ప్రశ్నలను సంధించారు. ఈ 21వ శతాబ్దంలో కూడా ఇంకా అత్తింట్లో ఆవేదనలు, భర్త మూలంగా అవమానాలు, అనుమానాలు ఎదుర్కొంటున్న నేటి సమాజపు దుస్థితిని అభివర్ణించిన తీరు ఎంతో ఆకట్టుకుంది. అసలు స్త్రీ సంఘానికి భయపడాలా? లేక తన మనస్సాక్షికి భయపడాలా? అంటే నా ధోరణిలో మనస్సాక్షికే ఎక్కువ మార్కులు వేస్తాను. సంఘం అనేది గాలివాటుకు ఎగిరిపడుతున్న ఎండుటాకు లాంటిది. అదిగో అని చూపితే కనిపించకున్నా, అవును నాకూ కనిపించింది అంటూ ఎదుటిమనిషిని మరింత నిర్వీర్యం చేస్తుంది. కానీ మన మనస్సాక్షికి తెలుస్తుంది మనమేంటి? మనం జీవిస్తున్న విధానం ఏమిటి? అని. ఒక స్ర్తి అయినా, పురుషుడైనా మనస్సాక్షి ముందు తలెత్తుకుంటే చాలు గెలిచినట్లే..
అసలు  స్త్రీ అంటేనే ఒక కుటుంబం. స్త్రీ లేనిదే కుటుంబాలు ఎంతగా వెలవెలపోతుంటాయో మనం గమనిస్తూనే ఉంటాం. ఈ నవలలో విజయ అనే పాత్ర ఎన్నో సందిగ్ధాల మధ్య సతమతమవుతూ తన జీవితం అలా ఎందుకు ఒంటరి అయిపోయిందనే విషయంపై అన్వేషణ కొనసాగిస్తుంది. అలాంటి సమయంలో తనను ప్రేమించిన వ్యక్తి కూడా తల్లిదండ్రులు ఎవరో తెలియకుంటే పెళ్ళిచేసుకోవడం కష్టమని అనడం విజయను మరింత బాధిస్తుంది. పెళ్ళికి యువతి కావాలా? యువతికి యువకుడు ఉంటే చాలదా? అంటే చాలదు. ప్రేమకు ఇద్దరు చాలు పెళ్లికి మాత్రం రెండు కుటుంబాలు కావాలి అనే మాట విన్నాం. అయితే కుటుంబం ఎందుకు? అంటే మాత్రం రాబోయే తరాలకు ఒక చరిత్ర కావాలి. నాన్న అమ్మ ఎలాగో, అమ్మమ్మ, తాత, పెదనాన్న, చిన్నాన్న పిన్ని అత్త లాంటి వరసలన్నీ ఎంతో కావాలి. వారందరూ మనకంటూ ఏమీ చేయకపోవచ్చు. కానీ ఉన్నారనే ఆశ ముందుకు నడిపిస్తుంది. తల్లిదండ్రులు పునాదులైతే నా అన్నవాళ్ళు మూలస్తంభాలు. ఆ విషయమే ఈ నవలలో కనిపిస్తుంది.
గంటి భానుమతి ఎంతో సున్నిత హృదయులు. వీరిలోని నొప్పించేతత్వం లేని తనమే ఈ నవలకు పునాది అయింది. కారణం ఈ నవలలో మరీ బాధించే పాత్రలు చూపలేదు. కాలానుగుణంగా మనిషి తత్వం మారుతుందే తప్ప ఎవరూ చెడ్డవారు కారనే తత్వాన్ని తెలియజేసిన తీరు కడు రమణీయం. కాకుంటే మనుషుల్లో ఏదో ఒకటి కావాలని బాధ, ఉంటే ఎవరికి చెందుతుందో అనే బాధ, ఆస్తుల పంపకాలు, అక్కచెల్లెళ్ళ పోరాటాలు, రక్తసంబంధీకుల సమస్యలు చదువుతుంటే ఒకటుంటేఒకటిలేదనే తత్వంతో మనుషులు ఎదగలేకపోతున్నారా అనిపించక మానదు. అదే విషయం విజయ జీవితంలో కనిపిస్తుంది. తండ్రి వచ్చినా, అమ్మమ్మ, తాతయ్యలు ఉన్నా ఆస్తుల పంపకాలలో అనేక చేదుకోణాలను చూస్తుంది. పెద్దలు కుదిర్చిన వివాహాన్ని చేసుకున్న విజయ తల్లిని అన్వేషించడం మాత్రం ఆపలేదు. చివరకు తన తల్లి అత్యాచారానికి గురై చేయూతనిచ్చేవారు ఉన్నా అందుకోలేక, సమాజానికి ముఖం చూపించలేక మరింతగా కుంగిపోయి తన జీవితాన్ని పోగొట్టుకుందనే నిజాన్ని తెలుసుకుని కుమిలిపోతుంది. మరో వివాహం చేసుకుని వారి ద్వారా కూడా బిడ్డలున్నా వారి నుండి ఆదరణ లభించకపోవడంతో మొదటి భార్య కన్నబిడ్డ విజయ తండ్రిని తానే కొడుకై ఆదరిస్తుంది. తల్లిదండ్రులు ఎలాంటివారైనా అనుబంధం ముందు ఓడిపోక తప్పదని నిరూపిస్తుంది.
మనిషి జీవితంలోని మార్పుచేర్పులకు సమాజమే కారణం అయితే, వ్యక్తిగా తనను తాను గమనించుకునే స్థితికి మనిషి ఎపుడు చేరుకుంటాడు? అదే స్త్రీ అయితే తన పరిస్థితి ఏమిటి? అనే ప్రశ్నలను సంధించి సరికొత్త సమాధానాన్ని అందించిన తీరులో సాగిన వైనం మనల్ని ఆద్యంతం అలరిస్తుంది. వ్యక్తిత్వం అనేది ఒక స్ర్తికి సంబంధించింది అనడం కంటే వ్యక్తిత్వం ప్రతి వ్యక్తికి సంబంధించింది అని ముగించి ఉంటే మరింత బావుండేదనిపిస్తుంది. ఎందుకంటే ఒక ప్రశ్నగా స్త్రీ నిలబడినంతకాలం సమాజం తనకిష్టమైన సమాధానాలు చెబుతూనే ఉంటుంది. తానే ఒక సమాధానమైన రోజు ప్రశ్నలన్నీ ఏమవుతాయి? ఆలోచించాలి…!

-ఎస్.ఎం. అక్షర, ఆంధ్రభూమి, 21/06/2014

***

అన్వేషణ”నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అన్వేషణ on kinige

Related Posts:

‘కర్ణ మహాభారతం’ పుస్తకంపై సమీక్ష

మహాభారతంలోని వందలాది పాత్రల్లో ఉత్తమోత్తమమైన పాత్ర కర్ణపాత్ర. సామాన్యంగా జీవించిన మహాయోగి. తుదివరకు మృత్యు ఛత్రచ్ఛాయలో నడిచి మృత్యువునే భయపెట్టినవాడు. భారతంలో సిసలైన సజీవ పాత్రలు కర్ణ, కుంతి. కర్ణుడు ఆత్మయోగి. తన వెనుక మృత్యువు కాపలాగా ఉందని గుర్తెరిగి కూడా గెలుపు ఓటమిలను ఆశించకుండా యుద్ధమే కర్తవ్యంగా భావించినవాడు. ప్రతి మనిషికీ కర్ణుడే గొప్ప ఆదర్శం. మిత్రులుగా నటించే శత్రువులు, శత్రువుల్లా కోపించే మిత్రులూ ఉంటారు. అందుకే ఈ కర్ణుని కథ చిరస్మరణీయం. ప్రతివారు తప్పక చదవాలి.

- నవ్య, 4th June 2014

 

 

 

 

 

 

 

 

 

 

కర్ణ మహాభారతం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

కర్ణ మహాభారతం on Kinige

Related Posts:

పల్లె వాతావరణానికి అద్దం

‘ఒక మారుమూల గ్రామంలో వెన్ను బద్ద విరిగి పక్కకు ఒరిగిన పాతపడిన ఇంట్లో నులక మంచం మీద కట్టెలా పడి ఉన్న దేవమ్మను చూడ్డానికి కూతుళ్ళు, అల్లుళ్ళు, కొడుకులు, కోడళ్ళు, మనవలు, మనుమరాళ్ళు అందరూ వస్తున్నారు’ అంటూ ‘భూదేవి‘ నవల ప్రారంభమవుతుంది. ఇది పల్లె జీవితానికి అద్దం పట్టిన నవల. గ్రామీణ వాతావరణం… అక్కడి కుటుంబాల స్థితిగతులు… వారి మనస్తత్వాలను… ముఖ్యంగా దేవమ్మ పాత్రను… ‘భూదేవి’ నవలలో చక్కగా చూపించారు రచయిత సింహప్రసాద్‌. ప్రధాన పాత్ర కథా ప్రారంభం నుండి చివరి వరకు ఎక్కడా చిరాకు లేకుండా సాగిపోతుంది. భూదేవి ఓర్పుకు పెట్టింది పేరు అంటుంటాం.. ఆ రకంగా నవలలోని పాత్రకు తగిన పేరు ఎంచుకుని న్యాయం చేశారు. ఎన్నో కష్టాలు ఓర్చి పిల్లలను పెద్దవాళ్ళుగా చేసి తీర్చిదిద్దిన తర్వాత .. ఎవరిదారి వారు చూసుకుని తనను పట్టించుకోకుండా వదిలేయడంతో కుమిలిపోతోంది. చివరికి స్నేహితుడు నాని చెప్పిన మాటలతో… కన్నీళ్ళు తుడిచే చేతుల కోసం ఎందరో ఆశగా ఎదురుచూస్తున్నారని… వారి కోసం పనిచేయడానికి మళ్ళీ సిద్ధమవుతాననడంతో నవలను ముగిస్తారు. నవల పల్లెవాసులకే కాదు! ప్రస్తుత పరిస్థితుల్లో పట్టణ వాసులకు కూడా అతికినట్టు సరిపోతుందని చెప్పవచ్చు. అంతేకాదు! ఆ సంఘటనలు మన చుట్టు పక్కలో.. మన ఇంట్లోనో జరిగినట్లు ఉంటుంది. ఏ పాత్రకు, ఆ పాత్ర ఏ లోపం లేకుండా కథను సహజంగా తీర్చిదిద్దారు. ‘నడవటానికి పాదాలుండాలి గాని లోకం నిండా దారులే.. పరోపకారానికి మనస్సుండాలి గానీ చేయడానికి ఎన్నెన్నో మార్గాలు’ వంటి మనస్సును హత్తుకునే ఎన్నో వాక్యాలు ఈ నవలలో ఆకట్టుకుంటాయి.

జి.వేణుమాధవరావు, ప్రజాశక్తి ఆదివారం అనుబంధం, 10 నవంబరు, 2013

* * *

‘భూదేవి’నవల డిజిటల్ రూపంలో కినిగెలో లభిస్తుంది. కినిగె వెబ్‌సైట్‌పై ఆర్డర్ చేయడం ద్వారా ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్ చూడండి.
భూదేవి On Kinige

Related Posts:

సాధన

ప్రముఖ రచయిత మధుబాబు రచించిన నవల “సాధన“.

సి.బి.ఐ. స్పెషల్ ఆఫీసర్ సాధనా సక్సేనా డేరింగ్ డాషింగ్ అండ్ డైనమిక్ లేడీ. ఎన్నో స్పెషల్ కేసులు సాధించి సి.బి.ఐ.కి మంచిపేరు ప్రఖ్యాతులు తెచ్చిపెట్టింది. ఉన్నట్లుండి ఆమె అదృశ్యమవుతుంది. దేశభద్రతకు ముప్పు కలిగించే విద్రోహచర్యకు సంబంధించి కీలక సమాచారం ఏదో సాధనా సక్సేనా వద్ద వుందని సి.బి.ఐ. వర్గాల అనుమానం. ఆ పనిమీదే ఆమె పహాడ్‌గంజ్‌కి బయలుదేరి వెళ్ళటం జరిగింది. అలా వెళ్ళినా సక్సేనా తిరిగి రాలేదు. ఆమెను ట్రేసవుట్ చేయటంలో సి.బి.ఐ. వర్గాలు విఫలమయ్యాయి. పదిరోజులయినా ఆమె జాడ తెలీకపోవటంతో సిబిఐ డైరెక్టర్ సామంత్ సిన్హా వాత్సవను పిలిపించుకుని స్వయంగా కేసు వప్పగిస్తాడు.

దీనికి కొద్ది రోజుల ముందు ఓ క్లబ్ మీద రైడ్ చేస్తుంది సాధన. ఆ రైడింగ్‌లో కొందరు విదేశీయులు అనుమతి లేకుండా కనబడతారు. వారిలో ఒక నీగ్రో జాతి యువకుడు సాధనపై కాల్పులు జరుపుతాడు. అతని గురి నుంచి తప్పించుకుని, తన గన్‌తో వాడిని కాలుస్తుంది సాధన. వాడి జేబులను వెతికితే, కొన్ని ఆధారాలు దొరుకుతాయి. అందులో ఒక నాణెం అత్యంత ప్రమాదకరమైన జాకాల్ గ్రూప్‌దని గుర్తిస్తుంది. ఈ తతంగంలో మాజీ రక్షణ మంత్రి గోవర్థన్ దాస్ హస్తం ఉందని తెలుసుకున్న సాధన మరింత సమాచారం కోసం ఆ ఆధారాలను అనుసరించి పహాడ్‌గంజ్ చేరిన సాధన అదృశ్యమవుతుంది.

రంగంలోకి దిగిన వాత్సవ సాధన ఆచూకీ కనిపెట్టడంలో కొంతమేర విజయం సాధిస్తాడు, ఆమె నాగాలాండ్‌లోని కొహిమాలో ఉందని తెలుసుకుంటాడు. ఈ క్రమంలో ఎన్నో ప్రమాదాలనెదుర్కుంటాడు. సాధనని ఎలా తప్పించాడు? సాధారణంగా ఒకరి ఎసైన్‌మెంట్‌లో మరొకరు జోక్యం చేసుకోని శ్యామ్ సుందర్, వాత్సవలు ఈ ఎసైన్‌మెంట్‌లో ఎందుకు కలవాల్సి వచ్చింది? సాధనకి, వాత్సవకి, శ్యామ్‌కి అనేక ఆటంకాలు కల్పించిన ఎస్. ఐ. ఎవరు? వారు ముగ్గురు దేశద్రోహుల ఆట ఎలా కట్టించారు?
ఈ ప్రశ్నలన్నింటికీ జవాబులు ఆసక్తిగా సాగిపోయే ఈ నవలలో లభిస్తాయి.

* * *

సాధన నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్ చూడండి.

సాధన On Kinige

Related Posts:

ది ఎండ్

కదలు, నవలల్లో పాత్రలు ప్రారంభంలో వున్నట్లు ముగింపు వరకు వుండక పోవచ్చు. చాలా పాత్రలు పరివర్తన చెందచ్చు. మంచి దిశగా పరివర్తన చెందిన పాత్రలతో అనేకానేక రచనలకు మంచి ముగింపు సాధ్యమై వుండొచ్చు. మరి అటువంటి రచనలు, పాత్రలు సృష్టించిన రచయితే పరివర్తన చెందితే, అనంతరం వచ్చే రచనలు ఎలా వుంటాయి, అటువంటి రచయిత ఏ విధమైన రచనలు చేయడానికి ఇష్టపడతాడు అని ప్రశ్నించుకుంటే, అసలు రచయిత ప్రవర్తన, లేదా పరివర్తన, కాదూ, ఈ రెండింటి ప్రభావం అసలు రచనలపై ఎందుకుండాలి అన్న ప్రశ్న కూడా ఉదయించవచ్చు.
ఇదంతా ఎందుకు…? అంటే మల్లాది వెంకటకృష్ణమూర్తి అనే ఫక్తు కమర్షియల్ రచయితగా పేరు తెచ్చుకున్న వ్యక్తి, పూర్తి ఆధ్యాత్మికత వైపు మనసా, వాచా, కర్మణా మళ్ళినపుడు, రచనలకు కథాంశాల ఎంపికలో ప్రాధాన్యతలు మారినట్లు కనిపించడమే కారణం. ఇటీవల ఆయన కలం నుంచి వెలువడిన ‘ది ఎండ్‘ నవల చదివితే ఇది స్పష్టంగా కనిపిస్తుంది. పెరిగిపోతున్న అవినీతి, లంచగొండితనం నేపథ్యంలో రాసిన నవల ఇది. నిజానికి ఇదే సబ్జెక్ట్ ను, ఆయన కావాలనుకుంటే కాస్త సెక్సీ థ్రిల్లర్‌గా మార్చవచ్చు. కానీ ఆయన అలా చేయకుండా, పూర్తిగా ఇన్‌ఫర్మేటివ్‌గా, సగటు భారతీయ ఉద్యోగులు లేదా ఆర్జనపరులు ఎలా వుండాలి… ఎలా వుండకూడదు అన్న విషయాన్ని సూటిగా చెప్పేసారు. మారనిది ఏమిటంటే, ఆయన శైలి. ఎప్పటిలాగే ఒక సబ్జెక్ట్ తీసుకుంటే దాని లోతులకు వెళ్ళే పద్దతి మారలేదు. నవలలో అవినీతి గణాంకాలు కానీ, చాక్‌లెట్ కొటేషన్లు, రకాలు కానీ ఈ విషయాన్ని స్పష్టం చేస్తాయి. అలాగే కథనాన్ని నెమ్మదిగా కొనసాగిస్తూ, ఏ చిన్న విషయాన్ని కూడా విడిచి పెట్టకుండా, కథ చెప్పినట్టు కాకుండా అందించే ఆయన శైలి కూడా అలాగే వుంది. శైలి సంగతి అలా పెడితే జనం మంచిగా వుండాలి. ధర్మంగా వుండాలి, సక్రమ ప్రవర్తన కలిగివుండాలి. అలా వుండకపోతే ఎన్ని బాధలు సంప్రాప్తమవుతాయి… అసలు ఆ బాధలు తెలియచెబితే తప్పులు చేయకుండా వుంటారేమో, అన్న ఆలోచనతో రచయిత రచన సాగించినట్లు అనిపిస్తుంది. ముఖ్యంగా చదువరులను థ్రిల్‌కో, ఉత్కంఠకో గురిచేయాలన్న తాపత్రయం మచ్చుకైనా కనిపించదు. పైగా వారిని మంచి మార్గంలోకి మళ్ళించాలన్న తపన అంతర్లీనంగా కనిపిస్తుంది. నవల కథాగమనం ఎంతమాత్రం అనుమానం రాకుండా, పాఠకులు ఊహించిన దారినే సాగుతుంది.
తను పరివర్తన చెందానని రచనా వ్యాసంగం ఆపేయడమో, లేదా వృత్తి, ప్రవృత్తి వేరని ఆత్మవంచన చేసుకుని, యధాప్రకారం పాత పద్ధతిలోనే రచనలు చేయడమో చేయకుండా, నొప్పివ్వక, తానొవ్వక అన్న రీతిలో, తన నమ్మిన ధర్మం మేరకే రచనావ్యాసంగం కొనసాగించుకుంటూ, సంతృప్తి చెందుతున్న మల్లాదిని అభినందించొచ్చు.

వి.ఎస్.ఎన్, ఆదివారం ఆంధ్రభూమి 13 జూన్ 2010

* * *

“ది ఎండ్” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ లింక్‌ని అనుసరించండి.
ది ఎండ్ On Kinige

Related Posts:

డేంజరస్ గేమ్

బర్మాలో గొప్ప సాధువుగా పూజలందుకుంటున్న బాబా హరిదేవ్ అనే సాధువుని కలవడానికి వెడతాడు బైజీన్ కాకా అనే బీహార్ కి చెందిన జమీందారీ వంశీకుల సేవకుడు. ఆ రాజవంశానికి చెందిన కైలాశ్ నారాయణ్ అనే మాజీ జమీందారు కూతురు రూప తల్లిదండ్రులును, అయినవాళ్ళని వదిలివచ్చి, బాబాజీ ఆశ్రమంలో ఉంటోంది. ఆమెని తిరిగి ఇంటికి పంపమని అడగడానికి బైజీన్ కాకా బర్మా వెడతాడు. ఆ అమ్మాయి రానడంతో, బాబాజీ ఇచ్చే పాదతీర్థంలో మత్తు పదార్ధాలు కలపబడుతున్నాయని నిరూపిస్తాడు బైజీన్ కాకా. ఇంతలో ఆశ్రమంలోని దుండగులు అతన్ని హత్యచేసి, రూపని మరో ప్రాంతానికి తరలిస్తారు. అదే సమయంలో బర్మాలో భారీ భూకంపం వస్తుంది.

షాడోకి అత్యంత సన్నిహితుడు, గురుసమానుడు అయిన ఠాకూర్ రాంచంద్ మేనల్లుడు ఆ భూకంపంలో చిక్కుకుపోయి గాయపడతాడు. అతన్ని రక్షించి భారతదేశానికి తీసుకురావడానికి షాడో కులకర్ణిగారి అనుమతి లేకుండా బర్మా బయల్దేరుతాడు.

మాండలీ నగరంలోనూ, చుట్టు ప్రక్కల ప్రాంతాలలోని ఆరోగ్యవంతమైన యువకులు ఉన్నట్లుండి మాయమైపోతూంటారు? వారి వెనక ఎవరున్నారో తెలియదు. నిజాలు తెలుసుకునే ఈ ప్రయత్నంలో షాడోకి ఎన్నో మాండలీ నగరం పోలీసులనుంచి ఎన్నో ఇబ్బందులు ఎదురవుతాయి. అనుకోకుండా తన పాత శత్రువు షింగ్‌టాయ్ యోధులతో తలపడాల్సి వస్తుంది.
అదే సమయంలో భారత ప్రభుత్వం కూడా ఒక ప్రత్యేకమైన ఎసైన్‌మెంట్ పై షాడోని బర్మా పంపాలనుకుంటుంది. ఏమిటా ఎసైన్‌మెంట్? షాడో అయిపు తెలియక స్వయంగా కులకర్ణిగారు బర్మా బయల్దేరుతారు. ఆయనకెదురైన ప్రమాదాలు ఏవి? షాడో, కులకర్ణి ఎలా కలుసుకున్నారు? రూపని షాడో ఎలా రక్షించాడు? దేశానికి సంభవించబోయే ప్రమాదాన్ని షాడో ఎలా తప్పించాడు?

ఈ ప్రశ్నలన్నింటికి జవాబులు మధుబాబు రచించిన “డేంజరస్ గేమ్“నవలలో దొరుకుతాయి. చివరిదాక ఆసక్తిగా చదివించే ఈ థ్రిల్లర్ డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.

డేంజరస్ గేమ్ On Kinige

Related Posts:

సమాజంలో జరిగే వింత పోకడలకు అద్దం పట్టిన నవల – సయ్యాట

సయ్యాట నవల చదివేకొద్దీ చదవాలనిపిస్తుంది. ఆధునిక సమాజంలో ఉండే పరిస్థితులు అన్ని ఈ నవలలో ఉన్నాయి. రచయిత పేరుగాంచిన ఐపిఎస్ అధికారి పి.వి. సునీల్‌కుమార్ కావడంతో ఈ నవలలో ఉన్న అంశాలు అన్ని వాస్తవానికి దగ్గరగా ఉన్నాయి. కొన్ని సంఘటనలు మనం నిత్యజీవితంలో చూస్తూ ఉంటాం. మరి కొన్ని వింటూ ఉంటాం. మనం చదువుతున్నప్పుడు ఈ సంఘటనలు అన్ని నిజంగా జరిగాయి కదూ అనిపిస్తుంది. కానీ ఈ నవలలో వచ్చిన అంశాలన్నీ నూటికి నూరుపాళ్ళు నిత్యసత్యాలు. స్త్రీ పాత్రలు నాలుగు ఉన్నప్పటికీ, ఒక్కొక్క పాత్రలో ఒకొక్క ఔచిత్యం మనకు కనబడుతుంది. ఇద్దరు స్నేహితుల మధ్య సరదాగా జరిగిన పందేన్ని రచయిత ఎంతో చక్కగా వివరించారు. భార్యాభర్తల మధ్య అనురాగం ఏ విధంగా ఉంటుందీ, భర్త ఎంత చెడు పనులు చేస్తున్నా భార్య సహించడం, మరో భార్య వాటిపై నిఘా పెట్టడం వంటి విషయాలు ఎంతగానో రంజింపజేస్తాయి. పశ్చిమ బెంగాల్ ప్రజల జీవన వ్యధ, అక్కడ ఒక వర్గం పడుతున్న బాధలు కూడా ఉన్నాయి. గిరిజనులు దోపిడీ ఎలా జరుగుతుందీ వివరించారు. ఆధునిక ప్రపంచంలో ఉన్న సంఘటనలూ వీటిలో రచయిత కళ్ళకు కట్టినట్టు చూపించారు.

దొంగ స్వామీజీలు నేటి యువతను ఎలా వంచిస్తున్నారో ఉంది. ఈ నవలలో ఇద్దరు యువకులు తరుణ్, రాహుల్ పందానికి ఒక నడి వయస్సు గల ముకుందరావు మధ్యవర్తిగా ఉండడం, బ్రహ్మానందస్వామి వ్యవహారం ఏ విధంగా బట్టబయలైంది, నేటి టివి ఛానళ్ళలో పని చేస్తున్న యాంకర్ల జీవితం, సాఫ్ట్‌వేర్ కంపెనీ ఉద్యోగుల విషయాలూ ఉన్నాయి. అయితే, ఈ నవల చివరిలో రచయిత మిత్రుడు మూర్తి ఈ నవల సమీక్షని ఎంతో చక్కగా చేసారు. నేటి యువతరం ఈ నవలను చదివి ఎన్నో తెలియని విషయాలని తెలుసుకుంటారు. అయితే ఆంగ్లం రాని వారికి ఈ నవలలో ఉన్న కొన్నిఆంగ్ల పదాలకు అర్థం తెలియక తికమకవుతారు.

టివి గోవిందరావు
వార్త దినపత్రిక, ఆదివారం అనుబంధం 8 జూలై 2012

* * *

సయ్యాట నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.
సయ్యాట On Kinige

Related Posts:

రుద్రాణి

సుప్రసిధ్ధ రచయిత మధుబాబు కలం నుంచి జాలు వారిన అద్భుత సోషియో-ఫాంటసీ నవల రుద్రాణి.

షాడో కొడుకు మాస్టర్ షాడో గంగారాంని చూడాలనుకోవడం, ఢిల్లీ నుంచి అస్సాం రావడంతో కథ మొదలవుతుంది. పిల్లాడితో కలసి దేవీ ఉత్సవంలో పాల్గొనడానికి వెళ్ళిన బిందూ, గంగారాం సమక్షంలోనే షాడో కొడుకుని ఎవరో అపహరిస్తారు. గంగారాం ఎంత ప్రయత్నించినా బాబు ఆచూకీ తెలియదు. మొత్తం సి.ఐ.బి ఉద్యోగులందరూ అస్సాం, చుట్టుపక్కల ప్రాంతాలలో వెతుకులాటకి సిద్ధమవుతుంటారు. టోక్యో నుంచి ఇండియాకి చేరిన షాడో కులకర్ణిగారితో కలసి బిడ్డ తప్పిపోయిన ప్రాంతాలలో వెతకడం మొదలుపెడతాడు. చివరికి ఓ కొండ గుహలో తన కొడుకుని బంధించడం గమనించి, అక్కడి దుండగులని ఎదిరించి బిడ్డని సురక్షితంగా బయటకు తీసుకొస్తాడు. బిడ్డకి రంగు రాయి ఒకటి ఆకర్షణగా చూపి తనతో తీసుకువెళ్ళిన ఆ మనిషి కనబడడు, ఆ రాయి కనబడదు.

ఇంతలో ఇంటర్ పోల్ నుంచి షాడోకి అత్యవసరమైన సందేశం ఒకటి అందుతుంది. కొన్ని దేశాలలో పాత కాలం వజ్రాలు, విలువైన జాతి రత్నాలు దొంగిలించబడుతున్నాయట నార్వేదేశంలో అత్యంత ప్రాచీనమైన రెండు వజ్రాలున్న కంటైనర్ ఒకటి ఆఫ్రికా ఎడారులలో మిస్సయిందట. దాన్ని ట్రేస్ చేసి అప్పగించాలి. ఇంటర్‌పోల్ డైరక్టర్ గ్రిఫోర్డ్ విన్నపంతో ఆ ఎస్సైన్‌మెంట్ ఒప్పుకుంటాడు షాడో. ఇప్పటివరకు గుండాలు, రౌడీలు, దొంగలు వంటి మాములు సాంఘిక నవలలా సాగిన కథ క్రమంగా జానపద సరళిలోకి మారుతుంది. షాడోని, అతని వెంట వచ్చిన వ్యక్తిని కొందరు ఆటవిక జాతుల వాళ్ళు పట్టుకుని మరో నాగరిక నేరస్తుల గుంపుకి అప్పగిస్తారు. వీళ్ళతో జరిగే పోరాటాలు, యుద్ధాల నేపధ్యంలో కథ జానపదం వైపు మళ్ళడానికి బీజం పడుతుంది. రకరకాల వజ్ర్రాలను సేకరించి మిట్టమధ్యాహ్నం సూర్యకిరణాలు వాటి మీద పడే సమయంలో పసిపిల్లల రక్తంతో వజ్రాలను తడిపితే ఓ అద్బుతమైన, సుసంపన్నమైన లోకంలోకి ప్రవేశించగలుగుతారనే నమ్మకంతో ఈ దురాగతాలకి ఒడిగడుతోందో ముఠా.

అనుకున్నట్లుగానే ఆ విలువైన రంగురాళ్ళ మీద సూర్యకాంతి పడగానే ఓ ప్రకాశవంతమైన మెరుపుతో కూడిన ఆవరణ కనబడుతుంది. మాయమైన వజ్రాల కంటైనర్ కంటబడడంతో, దాన్ని మీదకి దూకే క్రమంలో షాడో ఆ కాంతి వలయంలో పడి కొత్త లోకంలోకి అడుగుపెడతాడు. ఇక ఇక్కడి నుంచి కథంతా జానపద రీతిలో సాగుతుంది. నగరంలోని సంపన్నులు బీదల్ని ఊరికి దూరంగా ఉంచడం, హేళన చేయడం గమనిస్తాడు షాడో. తనకి ఆశ్రయం ఇచ్చిన కుటుంబనికి మేలు చేసి, ఓ వర్తకుడి పటాలంలో చేరి వలీదా నగరంలో అడుగుపెడతాడు. వర్తకుడిని, వర్తకుడి కూతురిని ఆ నగరపు ఖైదు చేయించడంతో, రాజు ముందుకు వెళ్లక తప్పదు షాడోకి.

షాడో లాంటి వీరుల కోసమే తానింత కాలం ఎదురుచూస్తున్నట్లు చెబుతాడా రాజు. షాడోని ఓ సాయం చేయమని అడుగుతాడు. అది ఎంత ప్రమాదకరమో, ఏ విపత్కర పరిస్థితులకు దారితీస్తుందో ఏమీ ఆలోచించకుండా వెంటనే అంగీకరిస్తాడు షాడో. బదులుగా, వర్తకుడిని అతని కూతురిని విడుదల చేయమంటాడు. రాజు షాడోని ఓ గదిలోకి తీసుకువెడతాడు. రాజుగారి కొడుకు అక్కడ అపస్మారక స్థితిలో ఉంటాడు. ఏదో విషజంతువు గాయపరచడం వల్ల అతను ప్రమాదంలో చిక్కుకున్నాడు. విషం ప్రాణాలు తీయకుండా చేయగలిగిన వైద్యులు అతనికి స్పృహ తెప్పించడంలో మాత్రం విఫలమయ్యారు. “ఇక్కడికి పదిరోజుల ప్రయాణంలో సులోమీ పర్వతాలున్నాయి. ఆ పర్వతాల్లో వున్న పిశాచాలకు చిక్కి ప్రాణాలు పోగొట్టుకోకుండా అవతలి ప్రక్కకు చేరుకోగలిగితే సువిశాలమైన సులోమీ మైదానప్రాంతం అగుపిస్తుందిట…. రకరకాల రాజ్యాలు, వివిధ రకాల నగరాలు కలిగివుండే ఆ మైదాన ప్రదేశంలో ఎక్కడో దట్టమయిన అటవీప్రాంతం ఒకటి వున్నదిట….. ఆ అడవిలో రుద్రాణి అనే పువ్వు దొరుకుతుందిట_ ఆ రుద్రాణి పుష్పంతో తయారుచేయబడిన లేపనాన్ని ఉపయోగిస్తే నా కుమారుడు ఆరోగ్యవంతుడవుతాడని వైద్యులు చేపుతున్నారు. నువ్వు ఆ పుష్పాన్ని తెచ్చిపెట్టాలి” అన్నాడు రాజు.

కథ క్రమంగా అంతిమ ఘట్టానికి చేరుకుంటోంది. రుద్రాణి పుష్పం కోసం ఆ పర్వతాలలో అడుగుపెడటాడు షాడో. ఎన్నో ప్రమాదాలను ఎదుర్కుంటాడు. ఓ ముసలామె షాడోకి ఆతిథ్యం ఇచ్చినట్లే ఇచ్చి, అతని గుర్రాన్ని చంపి ఆ మాంసంతో విందు చేసుకోవాలనుకుంటుంది. తోటి ముసలాళ్లందరిని పిలుస్తుంది. వారు షాడో మీద పడగా, వారితో పోరాటం పూర్తయ్యేసరిక్ తెల్లారిపోతుంది. కాలినడకన ఇంకో పర్వతం వద్దకు చేరుతాడు. అక్కడో రెండు ఆటవిక జాతులు ఒకరితో ఒకరు యుద్ధం చేసుకోగా, ఒక ఆటవికలు గుంపు మరో గుంపుని పూర్తిగా తుడిచిపెట్టి వెళ్ళిపోతుంది. అక్కడే ఉన్న షాడో వారందరిక్ సామూహిక దహన సంస్కారాలు చేస్తాడు. వాళ్ల పిల్లలతో కలసి, శత్రుస్థావరం వైపు వెడతాడు. ఉపాయంతో వారిని అణచివేసి, పిల్లల తల్లిదండ్రులను విడిపిస్తాడు.

అక్కడి నుంచి బయల్దేరి మూడో పర్వతం వద్దకి చేరగానే పురాణాలలోని గండభేరుండ పక్షి లాంటి అతి పెద్ద రాక్షస పక్షి షాడో మీద పడుతుంది. అది తన పిల్లలకి ఆహారంగా షాడోని ఎత్తుకెళ్ళి ఓ చీకటి గుహలో పడేస్తుంది. అక్కడ్నించి తప్పించుకోవాలంటే అది ఇంకో ఆహారాన్ని తెచ్చినప్పుడు దాని కాళ్ళు పట్టుకుని దాంతో పాటు గాల్లోకి ఎగరడం తప్ప మరో మార్గం కనపడదు. ఆ ప్రయత్నంలో పక్షి గాయపడి తప్పించుకోడంతో లోయలోకి దిగి నడక సాగిస్తాడు షాడో. ఓ వాగు వద్ద కొంతమంది మనుషులు ఎదురయితే వారితో పాటు అడవిలో కట్టెలు కొట్టి వాళ్ళ గ్రామానికి వెళ్ళి ఆహారం తిని విశ్రాంతి తీసుకుంటాడు. అక్కడి గ్రామపెద్దను రుద్రాణి పువ్వు గురించి అడుగుతాడు.

ఇంతలో గండభేరుండ పక్షుల గురించి దండోరా వినబడుతుంది. ఆ ప్రాంతపు రాణి ఆ దండోరా వేయిస్తోంది. గండభేరుండ పక్షుల గ్రామలపై దాడి చేస్తున్నయాని, సురక్షితంగా ఉండండి అంటూ రాణి చేసిన ప్రకటన అది. అక్కడ జరిగిన ఓ సంఘటన వలన షాడోని రాణి గారి ముందు ప్రవేశబెడతారు. ఇక్కడ నుంచి నవలలోని చివరి అంకానికి తెరలేస్తుంది. రాణి గారి శత్రువుని నిర్మూలించే క్రమంలో షాడో దట్టమైన ఓ లోయలోకి జారిపోతాడు. ఎందరెందరో చేరాలని ప్రయత్నించిన ఆ అద్భుతమైన, సుసంపన్నమైన లోకమే అది. ఎక్కడ చూసినా, బంగారం… వజ్రాలు… జాతి రత్నాలు ఉన్నాయక్కడ. అంతే కాదు వజ్రాల కంటైనర్‌ని దొంగిలించిన అగంతకుడు కూడా కనపడ్డాడు. పోరాటాలూ, సాహసాలు ముగిసాక, షాడో ఆ వజ్రాల కంటైనర్‌ని చేజిక్కించుకుంటాడు. వలీదా రాజుకి రుద్రాణి పుష్పం అందిస్తాడు. తను వచ్చిన పని ముగిసింది కాబట్టి తిరిగి మామూలు ప్రపంచంలోకి అడుగుపెట్టాలని అనుకుంటూ వజ్రాలపై సూర్యకాంతి పడేలా చేసుకుని విజయం సాధిస్తాడు. ఆ క్రమంలో వెలువడిన పొగ ఉక్కిరిబిక్కిరి చేయడంతో స్పృహ కోల్పోతాడు. తెలివి వచ్చేసరికి ఇంటర్ పోల్ ఏజంట్లు, తన మిత్రుడు సమీర్ కనబడతారు. ఎప్పటిలాగే ఎస్సైన్‌మెంట్‌ని విజయవంతంగా ముగించినందుకు ఇంటర్‌పోల్ షాడోని అభినందిస్తుంది.

వీధి గుండాల పోరాటాలతో సాంఘిక గాధగా మొదలై, ఆటవికుల, జంతువులు మధ్యగా సాగి రాజులు, రాణులు, సైనికులు, కుట్రలు కుతంత్రాలతో జానపద కథగా మారి మళ్లీ డిటెక్టివ్‌లు, సీక్రెట్ ఏజెంట్ల రాకతో థ్రిల్లర్‌గా మారిన ఈ నవల చివరిదాక ఆసక్తికరంగా సాగి పాఠకులకి అమితాసక్తిని కలిగిస్తుంది.

రుద్రాణి నవల డిజిటల్ రూపంలో కినిగెలో లభిస్తుంది. వివరాలకు ఈ క్రింది లింక్‌ని అనుసరించండి.

రుద్రాణి On Kinige

కొల్లూరి సోమ శంకర్

Related Posts: