మరో ‘విషవృక్షం’- “ఇదండీ మహాభారతం” పుస్తకం పై సమీక్ష

లక్షకు పైగా శ్లోకాలున్న సంస్కృత మహాభారతంలోని విశేషాంశాలను తీసుకుని, ముఖ్యమైన కథలూ, ఘటనలేవీ పొల్లుపోకుండా దాదాపు అయిదువందల పేజీలకు కుదించి, హేతువాద దృక్పథంతో ‘ఇదండీ మహాభారతం‘ గ్రంథాన్ని ఆవిష్కరించారు రంగనాయకమ్మ. దాదాపు నాలుగు దశాబ్దాల క్రితం ఆమె రాసిన ‘రామాయణ విషవృక్షం‘ అనేకానేక చర్చలకు కేంద్ర బిందువుగా నిలిచింది. తాజా పుస్తకానికి- ‘మొగ్గా పువ్వూలేని, కాయాపండూలేని, మోడు! మాయల, మంత్రాల, వ్యర్థాల, వైరుధ్యాల, వికృతాల, వికారాల, క్రూరత్వాల, అబద్ధాల, కట్టుకథల, పుక్కిటి పురాణాల పుట్ట!’ అనే విశేషణాలు తగిలించడాన్నిబట్టి- ఆమె ఎంత తీవ్ర పదజాలంతో, భావజాలంతో విశ్లేషించారో అర్థంచేసుకోవచ్చు. ప్రజల్ని సంస్కృతి పేరుతో బుట్టలో వేసుకునే మత గ్రంథాల్లోని నిజానిజాలను ప్రజలకు తెలిపితీరాలన్నదే తన లక్ష్యమనీ ఆ ప్రయత్నంలో భాగమే ఈ పుస్తకమనీ రచయిత్రి చెబుతున్నారు. కె.ఎం.గంగూలీ, కవిత్రయం, పురిపండా అప్పలస్వామి రాసిన గ్రంథాలను ఆధారంగా తీసుకున్నారు. భారతంలోని అనేక కథలూ, ఘటనలూ, పాత్రలూ, వాటి స్వభావాలూ, ప్రవర్తనలకు సంబంధించి పలు సందేహాలు లేవనెత్తి, ప్రశ్నలు సంధించారామె. అనుచితమైన వర్ణనల్నీ, ఆనాటి సామాజిక పరిస్థితుల్నీ తనదైన, పదునైన శైలిలో విమర్శించారు. చివరికి ఫలశృతినీ వదల్లేదు. మొత్తానికి ఈ పుస్తకం కొత్త ఆలోచనలు రేకెత్తించేదిగానే ఉంది.

- దత్తు,ఈనాడు-ఆదివారం,4-1-2015.

 

idandiMahaBharatham

“ఇదండీ మహాభారతం డిజిటల్ రూపంలో కినిగె లో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

ఇదండీ మహాభారతం on kinige

 

IdandiMahabharatam600

 

Related Posts:

పాక్షిక ఆత్మకథ

పుస్తకం : ఆత్మకథాంశాల ఉత్తరాలు

రచన : రంగనాయకమ్మ

నేపథ్యం : రంగనాయకమ్మ చాలా ఏళ్ల క్రితం కొందరికీ(ముఖ్యంగా కృష్ణాబాయికి); ఆ కొందరు రంగనాయకమ్మకూ పరస్పరం రాసుకున్న ఉత్తరాల్ని కలిపి అచ్చేసిన పుస్తకం ఇది.

విషయం : ఇది పొరపాటు ఊహే అయినా, రంగనాయకమ్మను తలుచుకోగానే, ఒక శిలావిగ్రహం గుర్తొస్తుంది. ప్రతిసారీ రూల్సూ రెగ్యులేషన్సూ అంటుందా ఏమిటీ, అని. కానీ ఆమెలో కూడా అందరిలాంటి కొన్ని సరదాలు, చమత్కారాలు, ఆటపట్టింపులు ఉన్నాయని చదివినప్పుడు ఒక రిలీఫ్ ఏదో కలిగింది. గాంధీతో తొలినాళ్ల కాపురం గురించిన ఆమె మాటలు చూడండి: ‘‘చలేస్తోంది. కిటికీలు వేసెయ్యి’’ అంటే, ‘‘ఎవరికి చలి? ఏ వర్గానికి చలి?’’ అంటాడు. ‘‘స్త్రీ వర్గానికి’’ అంటే, ‘‘అయితే కొంచెం ఆలోచించాల్సిందే’’ అని వొక రెక్క వేస్తాడు. చావుగా వుంది ఇతన్తో.’’

విడిగా ఆత్మకథ రాయని రంగనాయకమ్మ జీవితాన్నీ, ఆమెతో ముడిపడివున్న(సంబంధం తెంచుకున్న) వాళ్లను గురించిన ఆమె భావనల్నీ తెలుసుకోవడానికి ఈ లేఖలు పనికొస్తాయి. ఫుట్‌నోట్స్ ఇవ్వడం వల్ల వాటి నేపథ్యాన్నీ, అదనపు సమాచారాన్నీ అందించగలిగారు. ఉదా: కొడవటిగంటి కుటుంబరావు వాళ్లింట్లో భోజనానికి కూర్చున్నప్పుడు, ‘తినడం అయ్యాక మీ పళ్లెం తీసి సింకులో పెట్టెయ్యండి,’ అని ఆయన అనడంతో నొచ్చుకున్నారట! చెప్పకపోయినా పెట్టేస్తానుకదా, అని. రచయిత్రి అన్ని పుస్తకాల్లాగే హార్డుబౌండుతో, తక్కువ ధరలో లభ్యం.

రాజిరెడ్డి సాక్షి ఫన్‌డే 22 జూన్ 2013

* * *

“ఆత్మకథాంశాల ఉత్తరాలు” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.
ఆత్మ కధాంశాల ఉత్తరాలు On Kinige

Related Posts:

పిల్లల కోసం ఆర్ధిక శాస్త్రం

ఈ పుస్తకం పిల్లల కోసమే మొదలు పెట్టాను. ఈ పిల్లలు, 7, 8 తరగతుల నించీ 10 వ తరగతి వరకూ వున్న పిల్లలు.

పిల్లలకు చిన్న తనం నించీ ఆటలూ పాటలూ కథలూ చాలా కావాలి. ఆ కథలు, మాయలతో మంత్రాలతో వున్నా, వాటితో పాటే పిల్లలకు సైన్సు విషయాలు కూడా అందుతూ వుండాలి. సైన్సు అంటే, మనం నివసించే ప్రకృతి గురించీ, మనం జీవించే సమాజం గురించీ, నిజమైన విషయాల్ని రుజువులతో సహా వివరించే జ్ఞానం.

ప్రకృతి విషయాల్లో, ప్రతీ సైన్సునీ నేర్చుకోనక్కరలేదు. వైద్య శాస్త్రం ప్రతీ మనిషికీ క్షుణ్ణంగా అక్కర లేదు. రోజూవారీగా పాటించ వలసిన ఆరోగ్య సూత్రలు తెలిస్తే చాలు. అనారోగ్యాలు మీద పడినప్పుడు, వాటి సంగతి వైద్యులు చూసుకుంటారు. వైద్యులకు తెలిసినంత శాస్త్రం, ప్రతీ మనిషికీ అక్కర లేదు. ఇతర ప్రకృతి శాస్త్రాల సంగతి కూడా అంతే. కానీ, మనం జీవించే సమాజం గురించి చెప్పే శాస్త్రం సంగతి అలా కాదు. మనం మనుషులం; జంతువులం కాదు. జంతువులైతే పుట్టినవి పుట్టినట్టే జీవించి మరణిస్తాయి. వాటికి ఏ శాస్త్రాలూ, ఏ జ్ఞానాలూ అక్కర లేదు. కానీ, మనుషులకు, మనుషుల సంబంధాల గురించి తెలియాలి. ఆర్ధిక శాస్త్రమే, మనుషుల సంబంధాల్నీ, వారి జీవిత విధానాల్నీ, వివరిస్తుంది. ఈ శాస్త్రమే, నిన్నటి – ఇవాల్టి – రేపటి జీవితాల్ని చూపిస్తుంది. ఇది ప్రతి మనిషికీ తెలిసివుండాలి.

విజయనగరం నించి ‘నానీ’ అనే పిల్లల మాసపత్రిక ఒకటి వస్తూ వుండేది (ఎడిటర్: ఎన్. కె. బాబు). ఆ పత్రిక కోసమే, మొదట ఈ పాఠాలు ప్రారంభించాను. అప్పుడు, ‘డబ్బు’ వరకే చెపుదామనుకున్నాను. ఈ పుస్తకంలో వున్న 8 వ పాఠం వరకే ఆ పత్రికలో వచ్చింది. తర్వాత, ఆ పత్రిక ఆర్ధిక ఇబ్బందుల వల్ల ఆగిపోయింది. పిల్లల కోసం, మిగతా పాఠాలు కూడా చెప్పాలని దీన్ని పూర్తి చేశాను.

అయితే, పిల్లల కోసం ఇంత పుస్తకమా? ఇందులో వున్న చివరి పాఠాలు పిల్లలకి అర్థమవుతాయా? అని, నాకే కొన్ని సార్లు సందేహాలు వచ్చాయి. ‘పిల్లల కోసం’ అనే దృష్టి తోనే పాఠాల్ని ఎక్కువ వివరాలతో చెప్పవలసి వచ్చింది. ఇది పిల్లల కోసం కాబట్టి, పుస్తకంలో అక్షరాల సైజు చాలా పెద్దది. చాలా చొట్ల బొమ్మలు. ప్రశ్నలూ – జవాబులూ. చివరి పాఠాల్లో పత్రికల వార్తలు కూడా. ఈ కారణాల వల్ల, పుస్తకం పెద్దది అయింది. కానీ పాఠాలన్నీ చిన్నవే. ఈ మాత్రం పాఠాలు లేకపోతే, ఈ సైన్సుని కనీసంగా అయినా తెలుసుకోవడం సాధ్యం కాదు.

పిల్లలలో అనేక స్థాయిల వాళ్ళు వుంటారు. పుస్తకాలు చదివే అలవాటు, నేర్చుకోవాలనే ఆసక్తి వున్న పిల్లలకు ఇది సమస్య కాదు. తర్కంతో సాగే విషయాలని అర్థం చేసుకోవడంలో సమస్య రాదు.

ఈ పాఠాల పేర్లూ, వాతిల్లో మాటలూ, వాటిల్లో పాత్రలూ, పిల్లల చెవుల్లో, మనసుల్లో పడితే చాలు. అసలు ఇలాంటి శాస్త్రం ఒకటి వుందని పిల్లలకి తెలిస్తే చాలు. ఒక సారి చదివితే అర్థం కాని పాఠాన్ని ఇంకోసారి చదువుకుంటారు. ఇక అదంతా వాళ్ళ ఆసక్తి. పిల్లలకు ఎక్కడైనా అవసరమైతే, పెద్ద వాళ్ళు కొంచెం సహాయం చేస్తే, అసలు సమస్యే ఉండదు.
అయితే, తెలియని ఏ శాస్త్రం నేర్చుకునేడప్పుడైనా, పెద్దలు కూడా పిల్లలతో సమానులే. పెద్దల్లో కూడా నూటికి 99 మందికి, సమాజం గురించి చెప్పే శాస్త్రం తెలీదు. దీని కోసం మార్క్స్ ‘కాపిటల్’ చదవాలి. కానీ, అది మొదట్లో అసాధ్యం. అందుకే, ‘కాపిటల్’కి ‘పరిచయం’ గతంలోనే రాశాను. దాన్ని పెద్దలు తేలిగ్గానే చదువుకోవచ్చు. అయినా, దాని కన్నా ముందు ఈ పుస్తకం, ప్రారంభ పాఠాలుగా ఉపయోగపడుతుంది. ‘కాపిటల్’ అంటే భయపడే, బద్దకించే పెద్దల కోసం కూడా దీన్ని దృష్టిలో పెట్టుకున్నాను. పిల్లల పుస్తకాలు పెద్దలు కూడా చదవాలి; నేర్చుకోవాలి. పిల్లలకి నేర్పాలి.

రంగనాయకమ్మ.

(“పిల్లల కోసం ఆర్ధిక శాస్త్రం” పుస్తకం ముందుమాట నుంచి)

* * *

పిల్లల కోసం ఆర్ధిక శాస్త్రం డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.
పిల్లల కోసం ఆర్ధిక శాస్త్రం On Kinige

Related Posts:

రామాయణ విషవృక్షం

‘రామాయణ విషవృక్షం’ మొదట్లో 3 భాగాలుగా (మూడు వేరు వేరు పుస్తకాలుగా) ఉండేది. ‘విషవృక్షం’లో మొదటి భాగాన్ని రచయిత్రి 1974లోనూ, 2వ భాగాన్ని 1975లోనూ, 3వ భాగాన్ని 1976లోనూ రచించారు. ఆనాటి నుంచి ఈనాటి వరకు మొదటి భాగం ఏడు ముద్రణలూ, రెండవ భాగం ఆరు ముద్రణలూ, మూడవ భాగం నాలుగు ముద్రణలూ వచ్చాయి. 2005 నుంచీ ఆ 3 భాగాలూ ఒకే సంపుటంగా (ఒకే పుస్తకంగా) కలిసిపోయాయి.

అన్ని భాగాలు కలిసిన సంపుటం ఇప్పటికి మూడు సార్లు ముద్రణలు పడింది: 2006 అక్టోబరులోనూ, 2008 మేలోనూ, 2012 ఫిబ్రవరిలోనూ. 2012 ఫిబ్రవరి ముద్రణలో, గతంలో లేని కొత్త వ్యాసాలు 3 చేరాయి. ఇది 2012 ఫిబ్రవరి ముద్రణకు డిజిటల్ రూపం.

* * *

“పాతనంతా తిరస్కరించడమే అభివృద్ధి అనుకుంటారు కొందరు” అనేది, నూతనమైన ఆలోచనలమీద ఒక విమర్శ! కానీ, ఇది ‘పాత’ కాదు. ‘పాత’ అయిపోలేదు. ‘రామాయణం’ ప్రచారం చేసే విలువలూ, సంస్కృతీ ఈ నాటికీ నిత్య జీవితాల్లో ప్రతిబింబిస్తూనే ఉన్నాయి. ఈ నాటి సాంఘిక సమస్యలకు ‘రామనామ జపాన్ని’ పరిష్కారంగా చెప్పే ఏ ఒక్క సంఘటన అయినా చాలు – ఆ గ్రంథం ‘పాతదైపోలేదని’ నిర్ణయించడానికి!

ఈ ప్రయత్నానికి అర్థం – పాతనంతా తిరస్కరించడం కాదు. ‘పాత’ అంతా మానవ చరిత్రే. ఆ ‘చరిత్ర పరిణామం’లో, రామాయణ పుట్టుపూర్వోత్తరాల్నీ, దాన్ని నిత్యం ప్రచారం చేసే వ్యవస్థ నిజ స్వరూపాన్నీ, వీటిని స్పష్టం చేయడమే ఈ పుస్తకం లక్ష్యం.

రామాయణ విషవృక్షం On Kinige

Related Posts:

బలిపీఠం (eBook) – Ranganayakamma

సంస్కరణాయుతమైన ఇతివృత్తాన్ని ఎన్నుకొని ”బలిపీఠం” పేరిట వ్రాసిన ఈ నవల, 5-9-1962 నించీ 2-4-1963 వరకూ ‘ఆంధ్రప్రభ’ వార పత్రికలో సీరియల్‌గా వచ్చింది. ఇప్పటి వరకు 13 సార్లు పునర్ముద్రితమైంది.

ఈ నవలలో ముఖ్య విషయాలు – సంఘ సంస్కరణా, కులాంతర – మతాంతర వివాహాలూ.

వరద వెల్లువగా కొట్టుకుపోతున్న సంఘానికి ఎదురు నిలిచి, దాని లోని అవకతవకలను ఎత్తి చూపి, పవిత్రంగా – ధర్మబద్ధంగా – సంస్కార పూరితంగా బ్రతకాలనీ, సంఘాన్ని బ్రతికించాలనీ, తాపత్రయపడే వారు కష్ట నష్టాలపాలు గాక మానరు. కారణం, వారిలో పెరిగిన ఔన్నత్యం, చుట్టూ సంఘంలో ఇంకా పెరిగి వుండదు. వారిలో ఉద్భవించిన ధర్మాధర్మ పరిజ్ఞానం, సంఘంలో ఇంకా ఉద్భవించి వుండదు. వారిలో రేకెత్తిన సంస్కార భావం, సంఘంలో రేకెత్తి వుండదు. వారు సంఘం కన్నా చాలా ఎత్తుకు పెరిగి వుంటారు. మొట్టమొదట వారిని అందుకోలేని సంఘం, అపార్థాలతో, అప హాస్యాలతో వారిని కించపరచ ప్రయత్నిస్తుంది. అంత మాత్రాన నిజమైన సంస్కారు లెన్నడూ వెనుకంజ వెయ్యరు. బలీయమైన వారి వ్యక్తిత్వం, కొండ వంటి సంఘాన్ని ఎదిరిస్తుంది. జయిస్తుంది. నిలుస్తుంది.

‘బలిపీఠం’లో వున్న అరుణా, భాస్కర్‌ల వంటి వ్యక్తులు, జీవితంలో కొంత మందైనా తటస్థపడుతూ వుంటారు. పాత కొత్తల మేలు కలయికను లోతుగా అవగాహన చేసుకోలేక, సంకుచితమైన భావాలకు అంకితమైపోయిన అరుణ, ఎంతైనా అభాగ్యురాలు! స్వార్థ చింతన లేక, త్యాగ బుద్ధితో జీవితాన్నే పందెం పెట్టిన భాస్కర్‌కు, చివరికి తాను ఓడిపోలేదన్న సత్యం చాలు, ఆత్మ శాంతికి.

కులాల కలయికలను నిరసించటం గానీ, ముందడుగులు వేసే వారిని నిరుత్సాహ పరచటం గానీ, ఈ నవల ఉద్దేశ్యం కాదు. అన్ని విధాలా తమను తాము అదుపులో పెట్టుకోగలిగిన శక్తివంతులే, సామాన్యులను మించిన సంస్కారులు అవుతారు. తీవ్రమైన సాంఫిుక విప్లవానికి, సంస్కార హృదయాలే అత్యవసరమైనవి.

బలిపీఠం నవలకి 1965లో, ఆంధ్రప్రదేశ్‌ సాహిత్య అకాడమీ బహుమతి లభించింది. అప్పుడు రచయిత్ర్రికి బహుమతుల సంస్కృతి గురించి ఏమీ తెలియక దాని మీద వ్యతిరేకత లేక, ఆ బహుమతిని తీసుకున్నారు. ఆ తర్వాత కాలంలో, ఎటువంటి అవార్డునైనా స్వీకరించడం మానుకున్నారు.

—-

కొడవటిగంటి కుటుంబరావు బలిపీఠం నవలని వీరేశలింగంగారి రాజశేఖర చరిత్రము, ఉన్నవ లక్ష్మీనారాయణ పంతులుగారి మాలపల్లి నవలలతో పోల్చి, తెలుగు నవలా సాహిత్యంలో ఇదొక మైలురాయని అన్నారు.

—–

ఈ నవల ఆధారంగా బలిపీఠం (1975) సినిమా దాసరి నారాయణరావు దర్శకత్వంలో నిర్మించబడినది.

——

Related Posts:

స్వీట్ హోం

స్వీట్ హోమ్ నవల మొదటి భాగం 1967లోనూ, రెండవ భాగం 1968లోనూ, మూడవ భాగం 1999లోనూ వెలువడ్డాయి. 2004లో ఈ మూడు భాగాలూ కలిపి ఒకే సంపుటంగా వెలువడింది.

ఈ నవల విమల, బుచ్చిబాబు అనే భార్యభర్తల కథ. బుచ్చిబాబుకి, ‘భర్త స్వభావం’ లేదు. భార్య మీద పెత్తనాలు చెయ్యడం, ఆధిక్యత కోసం తహతహలాడడం చెయ్యడు. విమలకి కూడా ‘భార్య స్వభావం’ లేదు. భర్త ముందు పిరికిగా, జంకుగా లొంగుబాటుగా ప్రవర్తించదు. ఇద్దరూ చనువుగా, స్నేహంగా ఉంటారు.

కొంతమంది మనుషులు తెలియకే తప్పులు చేస్తారు. తప్పు చేసినట్టు తెలుసుకుగాని దాన్ని సరిజేసుకోడానికి తహతహలాడుతారు. విమలా బుచ్చిబాబు అలాంటి వాళ్ళే. మరి వీరి కథ చదువుకోడం, వీళ్ళని తెలుసుకోడం పాఠకులకు ఆసక్తిగా ఉండదూ?

సంసారంలో కలకాలం కలసిమెలసి సాగేందుకు, నిండైన జీవితం గడిపేందుకు భార్యభర్తలు ఎలా నడుచుకోవాలో సూచించే కథ ఇది. కథ హాస్యంగా సాగుతూనే, భార్యభర్తలు ఒకరితో ఒకరు ఎలా మెలగాలో, పిల్లలతో ఎలా ప్రవర్తించాలో చెబుతుంది.

ఒక ఇల్లు నిజంగానే స్వీట్ హోమ్ అవ్వాలంటే, స్త్రీ పురుషులిద్దరూ చాలా జ్ఞానవంతులై వుండాలి, మంచి చెడ్డల విచక్షణ గల వాళ్ళై వుండాలని అంటారు రచయిత్రి.

స్వీట్ హోం నవల ఇప్పుడు ఈ-పుస్తకంగా కినిగెపై. వివరాలు ఇక్కడ

స్వీట్ హోమ్ On Kinige

Related Posts: