రూపాయి చెట్టు

సుప్రసిద్ధ రచయిత సలీం రాసిన కథల సంకలనం ఇది. ఆయన సాహిత్య స్వభావం మానవతావాదం. మానవ సంబంధాలలోని మంచినీ, చెడుని, కథలుగా మలుస్తారు. వాదాల జోలికి పోని రచయిత సలీం. మనిషే ఆయన వస్తువు.

ఓ వ్యక్తి హైదరాబాద్ నగరంలో స్థలం కొనుక్కుని, కొంత ప్రదేశంలో ఇల్లు కట్టుకుని, ఖాళీ స్థలం మొక్కలు పాతుతాడు. కాలం గడిచేసరికి అదో చిన్న తోటలా మారుతుంది. తన పిల్లల్ని ఎంత శ్రద్ధగా, ప్రేమగా పెంచాడో, ఆ మొక్కలనీ అట్లాగే పెంచాడు. కాని పిల్లలు పెద్దవాళ్ళై బాగా చదువుకుని అమెరికాలో స్థిరపడ్డాక, వాళ్ళకి డబ్బు జబ్బు చేస్తుంది. తల్లిని ఒత్తిడి చేసి తండ్రితో బలవంతంగా ఆ ఇల్లు స్థలం అమ్మించి, వచ్చిన డబ్బులో వాళ్ళిద్దరూ చెరో ఇరవై లక్షలు తీసుకుని తండ్రికి ఓ అపార్ట్‌మెంట్ కొనిచ్చి, మిగిలిన డబ్బు బ్యాంకులో వేసి వెళ్ళిపోతారు. మొక్కల మీద, తోట మీద మమకారం వదులుకోని తండ్రి గుండె నొప్పి తెచ్చుకుంటాడు, స్వచ్ఛమైన ఆక్సీజన్ కొనుక్కోవలసి వస్తుంది. “అమ్మకానికి ఆక్సీజన్” కథ హృద్యంగా ఉంటుంది.

ఓ బాల మేధావి బాల్యానికి అతని తల్లిదండ్రులు ఏ విధంగా నాశనం చేసారో “బోన్సాగి” కథ చెబుతుంది. తోటి పిల్లలతో ఆటపాటలకి దూరమై, తన కన్నా పెద్దవారి ఎగతాళికి గురైన ఆ బాలుడి మనసు విలవిలలాడిపోతుంది.

జీవితంలోని మూడు చలికాలాల్లో ఒక వ్యక్తి ప్రవర్తించిన తీరుని చెబుతుంది “మూడు చలికాలాలు” కథ. బాలుడుగా ఉన్నప్పుడు చలికాలంలో తల్లి పొద్దున్నే లేచి చలికి వణికిపోతు ఇంటి పనులు చేసుకోడం చూసి తల్లి మీద సానుభూతి చూపిస్తూ, అమ్మకి సాయం చేయనందుకు నాన్నని తిట్టుకుంటాడు. అదే బాలుడు పెరిగిపెద్దయ్యాక, పెళ్ళి చేసుకున్నాకా, చలికాలంలో తన భార్యకి ఎలాంటి సాయం చేయడు. భార్యకి లోకువై పోతానని భావిస్తాడు. అదే వ్యక్తి ముసలాడయిన తర్వాత తన లోపాన్ని గ్రహించి చలికాలంలో కోడలికి సాయం చేస్తాడు.

కాలువలో కొట్టుకొచ్చే శవాల మీద బంగారాన్ని దోచుకుని దానితో జీవితాన్ని గడిపేసే వ్యక్తి కోటేశు. పెళ్ళయిన చెల్లెలు కట్నం పూర్తిగా ఇవ్వలేని కారణంగా పుట్టింటికి తిరిగొచ్చేస్తుంది. వేరే ఏ పని చేయని కోటేశు చెల్లెల్ని కాపరానికి పంపలేడు. తను చేసే పని దుర్మార్గమైనదని తెలిసినా గత్యంతరం లేక దానినే కొనసాగిస్తుంటాడు. ఓ రోజు నీటిలో ఓ శవం కొట్టుకు రావడం కనిపిస్తుంది, సంతోషపడతాడు. ఆ శవం మీద ఏదైనా బంగారం ఉంటే దాంతో తన చెల్లెల్ని కాపురానికి పంపేయచ్చని ఆశ పడతాడు, గబగబా ఈదుకుంటూ వెళ్ళి బోర్లా పడున్న శవాన్ని తన వైపుకు తిప్పుకోగానే…..ఆ శవం తన చెల్లిదని గ్రహిస్తాడు. హృదయ విదారకంగా ఉంటుంది “లాకులు” కథ.

వైద్యం ‘సేవ’ నుంచి ‘వ్యాపారం’గా మారిపోడాన్ని, రోగులు డాక్టర్ల కంటికి వంద రూపాయల నోట్లు గుత్తులు గుత్తులుగా పూసిన పూల చెట్టులా కనిపించడాన్ని “రూపాయి చెట్టు” కథలో వర్ణించారు.

మందుల తయారీ కంపెనీల మాయాజాలానికి అమాయకులు, నిరక్ష్యరాశ్యులు అయిన పేదవారు ఏ విధంగా బలైపోతారో “వలయం” కథ చెబుతుంది.

నిజమైన మానవత్వం అంటే ఏమిటో నిరూపించిన వ్యక్తి కథే “వామనుడు”. అప్పటి దాక తన మిత్రులు వారి బిడ్డల గొప్పతనాన్ని వర్ణించి చెబుతుంటే, తన బిడ్డని తలచుకుని కించిత్ న్యూనతకి గురైన ఓ తండ్రి సమజాంలో హోదాలు సంపాదించేలా పిల్లల్ని పెంచడం కన్నా, వారిని మానవత్వం ఉన్న మనుషులుగా పెంచడమే గొప్పని గ్రహిస్తాడు.

ఓ వ్యక్తి నిర్జీవమైన శిధిల కళాఖండాల వెంటబడి, సజీవురాలైన మాతృమూర్తిని వృద్ధాశ్రమంలో పడేసిపోతాడు. ఆమె గురించి పట్టించుకోడు. తల్లి చనిపోయిందని చెప్పడానికి వచ్చిన ఆశ్రమం వ్యక్తిని ఎవరిలానో పొరబడి మర్యాదలు చేసి తన సేకరించిన పురాతన వస్తువులన్నింటినీ చూపుతాడు. చివరికి విషయం తెలుసుకున్నాక, తను సేకరించిన ఆ విగ్రహాల మధ్య తనూ ఓ నల్లని విగ్రహంగా నిలబడిపోతాడు. “శిధిల శిల్పాలు” కథ హృదయాన్ని బరువెక్కిస్తుంది.

ఉత్సాహవంతుడైన ఓ ముస్లిం నటుడు తమ వర్గం వారిలో అవగాహన పెంచేందుకు వారి ఆర్ధిక సాంఘిక సమస్యలపై ఓ నాటకాన్ని వేయాలనుకుంటాడు. సహనటిగా తన భార్యతో కలసి నాటకానికి సిద్ధమవుతాడు. నాటకంలో ఓ సన్నివేశంలో భాగంగా మూడు సార్లు తలాక్, తలాక్, తలాక్ అని అంటాడు. నాటకం చూస్తున్న ప్రేక్షకులలో ఉన్న పెద్దలు, ఖాజీ వారిద్దరూ నిజంగానే విడాకులు తీసుకున్నట్లు నిర్ణయిస్తారు. ఏ నాటకం వల్ల తోటి ముస్లింలకు ప్రయోజనం కలగాలని కోరుకున్నారో అదే నాటకం వలన తమ జీవితాలు చీకటిమయం అవుతాయని ఆలోచించలేకపోయిందా జంట. చివరికి భార్యాభర్తలిద్దరూ ఆ నిర్ణయాన్ని తిరస్కరిస్తారు. “తలాక్” కథ ఆలోచింపజేస్తుంది.

” ఆరో అల్లుడు” కథ కూడా ముస్లిం జీవితాలకి సంబంధించినదే. డబ్బువస్తుందని ఆశపడి చిన్నపిల్లని దుబాయ్ షేక్‌కిచ్చి పెళ్ళి చేసి పంపేసి, ఆ తర్వాత అక్కడ్నించి ఆ అమ్మాయి కబుర్లు తెలియక, విలవిలలాడిపోతారు. చివరికి చాలా రోజుల తర్వాత ఆ అమ్మాయి నుంచి ఉత్తరం వస్తుంది “నాన్నా మీకు ఆరో అల్లుడు” అని మాత్రమే రాసుంటుంది.

జల్లెడలోంచి జారిన నూక ప్రభుత్వోద్యోగులుగా మిగిలిపోయి – జల్లెడలో మిగిలిన నాణ్యమైన గింజలు ప్రైవేటు సంస్థల పరవవడాన్ని “నూకలు” కథలో వివరిస్తారు.

నిరుద్యోగులతో ఆటలాడుకునే గోముఖవ్యాఘ్రాల నిజస్వరూపాన్ని “భవదీయుడు” కథ తెలియజేస్తుంది. చివరిదాక ఆసక్తిగా చదివించే ఈ కథ అమాయక నిరుద్యోగుల పట్ల సానుభూతిని కలిగిస్తుంది.

ఒంటరితనమే తన జబ్బని తెలుసుకోలేని ఓ ముసలి తండ్రి తనకి ఏవేవే జబ్బులున్నాయని భ్రమపడుతూ ఓ కుర్ర డాక్టర్‌ని వేధిస్తూంటాడు. ఓ సారి గుండె నొప్పి అంటూ వస్తాడా ముసలాయన. ఒంటరితనమే ఆయన జబ్బని గ్రహించిన డాక్టరు కొడుకు దగ్గరికి అమెరికాకి వెళ్ళిపొమ్మని చెబుతాడు. తన కొడుకు కూడా డాక్టరేనని చెబుతూ… వేరెవరితో మాట్లాడిన కొడుకుతో మాట్లాడినట్లు ఉండదని, రెండు మూడు రోజులకి ఈ డాక్టరుతో మాట్లాడే కొన్ని నిముషాలే తనకి గుండె నొప్పినుంచి ఉపశమనం కలిగిస్తాయని అంటాడాయన. ” పిడికెడు గుండె” కథ చదువరులను కదిలిస్తుంది.

ఏ బంద్ జరిగినా, ఏ ఉద్యమం జరిగినా ముందుగా బలయ్యేవి ఆర్టీసీ బస్సులేనని చెబుతూ, ఓ బస్ చేత తన కథ చెప్పిస్తారు “చేతులుంటే ఎంత బావుణ్ణు!” కథలో. ఈ కథ చదివి బస్‌లపై దాడి చేసేవారిలో ఒక్కరైనా మారితే ఎంతో బాగుంటుంది.

“ఆశ్రమం” కధ గురించి చెప్పడం కంటే చదవడమే బావుంటుంది.

ఇరవై కథలున్న ఈ సంకలనం చదువరులను ఏ మాత్రం నిరాశపరచదు.

ఈ సంకలనాన్ని విశాలాంధ్ర పబ్లిషింగ్ హౌస్ వారు 2004లో ప్రచురించారు. ఈ పుస్తకం డిజిటల్ రూపంలో కినిగెలో లభ్యమవుతుంది. వెల 90 రూపాయాలు. ఈ పుస్తకాన్ని నెలకు 30 రూపాయల అద్దెతో కూడా చదువుకోవచ్చు.

రూపాయి చెట్టు On Kinige

కొల్లూరి సోమ శంకర్

Related Posts:

సలీం ఈ పుస్తకాలు 30 శాతం తగ్గింపు ధరకు

సలీం, ఆధునిక తెలుగు సాహిత్యంలో పేరెన్నిక గన్న రచయిత, ప్రతిష్టాత్మక సాహిత్య అకాడమీ అవార్డు విజేత (2005), ఆంధ్ర ప్రదేశ్ ప్రభుత్వం నుండి భాషా పురష్కారం (2003) గ్రహీత. ఇతని రచనల్లో ఆరు ఇప్పుడు కినిగె పై అందుబాటులో ఉన్నాయి. అంతే కాకుండా ఈ పుస్తకాలన్నీ కొనండి 30 శాతం తగ్గింపు పొందండి!!

పుస్తకాలు
1. వెండి మేఘం
2. కాంచన మృగం
3. కాలుతున్న పూలతోట
4. రాణిగారి కథలు
5. రూపాయి చెట్టు
6. ఒంటరి శరీరం

సలీం ఈ పుస్తకాలు 30 శాతం తగ్గింపు ధరకు On Kinige

Related Posts:

వెండి మేఘం Telugu Novel by Saleem

 

తెలుగు నవలా సాహిత్యంలో ముస్లింల జీవన విధానాన్ని, ఆచార వ్యవహారాల్ని – కటిక దారిద్ర్యంతో పాటు అవమానాలకూ పరాయీకరణకూ బలౌతున్న దూదేకులవారి దయనీయ స్థితిని సమగ్రంగా చర్చించిన మొట్టమొదటి నవల – వెండి మేఘం

పెళ్లంటే ఏమిటో తెలీని పదేళ్ళ వయసులో – తనకంటే పాతికేళ్ళు పెద్దయిన వ్యక్తికి రెండో భార్యగా – అతని కొడుక్కి తల్లిగా వచ్చిన ‘అన్వర్’ . . . స్త్రీలు ఆత్మగౌరవం, స్వంత వ్యక్తిత్వం కలిగి ఉండాలంటే జీవితమంతా పోరాడటం మినహా మరో దారిలేదన్న నిర్ణయానికి రావటానికి దారితీసిన పరిస్థితులు . . .

పవిత్రత ఉన్నచోట నిర్భయత, నిర్భయత ఉన్నచోట స్వంత్రత తప్పకుండా ఉంటాయని నమ్మిన ఆమె జీవితంలో చోటు చేసుకున్న అనూహ్యమైన సంఘటనలు . . .

పల్లెటూళ్లో పుట్టి, నిరక్షరాస్యతలో పెరిగీ, జీవితానుభవాలతో రాటుదేలిన ఒక ముస్లిం స్త్రీ ఎదుర్కొంటున్న సామాజిక, ఆర్థిక, సాంస్కృత సమస్యలు . . . వాటిని అధిగమించడానికి ఆమె చేసిన జీవన సమరానికి సజీవ చిత్రణే వెండి మేఘం

వెండి మేఘం On Kinige

 

To buy or rent eBook visit now @ http://kinige.com/kbook.php?id=186

Related Posts:

రూపాయి చెట్టు By సలీం–కథల సంపుటి

ఈనాడు కథల్ని దళిత కథలని, స్త్రీవాద కథలని ప్రాంతీయ కథలని విభజిస్తున్నారు. సలీం రచించిన కథలు అలాంటి విభజనకు లొంగవు. ఈనాడు మన సమాజం ఎదుర్కొంటున్న అనేక సమస్యల్ని తన దృక్కోణంలోంచి విశ్లేషించే ప్రయత్నం చేశాడు రచయిత. ఇతను ఎన్నుకున్న ఇతివృత్తంలోనూ, కథాకథనంలోనూ కొత్తదనం ఉంది. పాఠకులను తన వెంట తీసుకెళ్ళగల్గే చక్కని శైలి ఈ రచయితకుంది. ఎలాంటి డొంక తిరుగుళ్ళు లేకుండా సూటిగా కథనంలోకి ప్రవేశించడం ఈ రచయిత ప్రత్యేకత. పాఠకులకు శాస్త్రీయ దృక్పథాన్ని, అభ్యుదయ దృక్పథాన్ని కల్గించాలన్న అభినివేశంకూడా ఈ రచయితకుంది.
-ఆదివారం ఆంధ్రభూమి

ఇతని రచనల్లో మారుతున్న మానవ సంబంధాలు, డబ్బుచుట్టు గిరికీలు కొడుతున్న సామాజిక స్థితిగతులు, మహానగరాల విస్త్రుతిలో కనుమరుగైపోతున్న ప్రకృతి రామణీయకత దర్శనమిస్తాయి.
- విశాలాంధ్ర దినపత్రిక

ఈ రచయిత భావుకుడు. సౌందర్య సరస్తీరాల్లో ఆడుకుని అలసిసొలసి పోవడమే కాదు. జీవితంలోని నిష్ఠుర వాస్తవాల్ని కూడా గుర్తించగలిగిన వాడతను. కథ చెప్పే తీరులోని అందం రచయిత స్వంతం. ఈతని రచనాశైలి పాఠకుడిని ఆకట్టుకుంటుంది.
- ఆంధ్రభూమి వారపత్రిక

సలీం సాహిత్య స్వభావం మానవతావాదం. మానవ సంబంధాల్లోని మంచినీ, చెడునీ ఆయన కథలుగా మలుస్తారు. పతితుల పట్ల, బాధాసర్పదష్టుల పట్ల ఆయనకు అంతులేని జాలి. ఆ జాలి కరుణ ఆయన కథలన్నింట్లోనూ కన్పిస్తాయి. సలీం కథలు చదువుతుంటే మానవ స్వభావాలను ఎంత బాగా పట్టుకున్నారా అని ఆశ్చర్యం కలుగుతుంది. వాదాల జోలికిపోని రచయిత సలీం. మనిషే ఆయల వస్తువు.
-ఆంధ్రజ్యోతి వారపత్రిక

రూపాయి చెట్టు On Kinige

 

To buy or rent visit now http://kinige.com/kbook.php?id=184 

 

Happy Reading,

Kinige team.

Related Posts:

రమణీయ రచన – ‘రాణీగారి కథలు’ By సలీం

Ranigari Kathalu
Sequel Stories by Saleem
రమణీయ రచన – ‘రాణీగారి కథలు’

నవల అయినా, కథ అయినా కొత్తరకం కథా వస్తువుని తీసుకుని అద్భుతంగా రాసి మెప్పించగల మంచి రచయిత సలీం. ఇప్పుడు మతాంతర వివాహం చేసుకున్న హిందూ-ముస్లిం యువతీయువకుల జంట, తమ పెళ్ళి అయినప్పటినుంచి తమ పిల్లకి పెళ్ళి చేసే వరకు మత విశ్వాసాలతో ముడిపడిన కుటుంబాలతోనూ, రాజకీయాలతో నిండిన సమాజంలోనూ ఎటువంటి కష్టాలూ, సుఖాలూ అనుభవించారో ‘రాణీగారి కథలు’గా రమణీయంగా రచించాడు సలీం.

కథానాయకుడు సైఫ్, కథానాయిక రాణి పాఠకుల మనస్సుల్ని దోచుకునేటట్లు ఉత్తమ పురుషలో కథలు వ్రాశాడు. పెళ్ళిళ్ళు ‘ఘనంగా’ చెయ్యడంలో పోటీలు పడుతున్న ఈ రోజుల్లో ‘ఆకాశమంత పందిరి’ వేసి, ‘నక్షత్రాలు అక్షింతలుగా’ కురిసేలాగ అందంగా పెళ్ళి ఎలా చెయ్యవచ్చునో ఆఖరికథ చదివితే తెలుస్తుంది. మత సామరస్యం ఎలా సాధించవచ్చునో సంసార పక్షంగా, సరళంగా, ఆహ్లాదకరంగా గీతావిష్కరణ చేస్తూ, ‘మనసుకు లేదు మడి’ అని బోధించాడు. మతానికి అతీతమైన మంచితనానికీ, ప్రేమకీ, మానవత్వానికీ ప్రతీకలు ఈ కథలు. రచయిత సలీం అన్ని విధాలా అభినందనీయుడు.

-అబ్బూరి ఛాయాదేవి

‘వెండి మేఘం’ నవలా రచయితగా శ్రీ సలీం చాలామంది తెలుగు పాఠకులకు పరిచితులే. సమాజంలోని అనేక చీకటి కోణాలను సున్నితంగా స్పర్శిస్తూ వెలుగు కిరణాలను ప్రసరింపజేసే శ్రీ సలీం కథలు సూటిగా సాగిపోయినా కిరణంలోని తరంగాల్లా కాంతిపుంజాల్లా ఆలోచనల్ని రేకెత్తిస్తాయి, మనసుని గాఢంగా హత్తుకుంటాయి.

‘రచన’ మాసపత్రికలో ధారావాహికంగా వచ్చిన ‘రాణీగారి కథలు’ పాఠకుల్ని ఎంతగానో అలరింపజేశాయి. ప్రేమ అనేది మనసుకు సంబంధించినదనీ, దానికి జాతి, మత, కులపరమైన వక్ర భాష్యాలు చెప్పరాదని సమాజంలోని ఛాదసులను, విద్యార్హతలున్నా సంస్కార రహితులను తర్కసహితంగా మందలించే శ్రీ సలీం ‘రాణీగారి కథలు’ తెలుగు కథా సాహిత్యాభిమానులను అలరిస్తాయని నిస్సందేహంగా చెప్పవచ్చు.

- ఎలక్ట్రాన్

పేర్ల చివర ‘యస్ ‘ తగిలించుకొనో, మాటల్లో సెక్యులరిజంని నిత్యం స్మరిస్తూనో కనిపిస్తున్న రాజకీయాలు కళ్ళిపోయాయి గాని మనుష్యులు, సమాజం ఆరోగ్యంగానే ఉన్నాయని తెలియజేసే ‘రాణీగారి కథలు’ చెప్పిన శ్రీ సలీంగార్ని అభినందిస్తున్నాను. మంచిని మెచ్చుకోని నిర్పిప్తత మనకుండరాదని నమ్ముతూ …

- కవనశర్మ

రాణీగారి కథలు On Kinige

 

To Buy or Rent visit now http://kinige.com/kbook.php?id=183 

 

Happy Reading,

Kinige Team!

Related Posts: