ఈ కథానికలూ మంత్రాల్లాంటివే! – “మాటే మంత్రము” పుస్తకంపై సమీక్ష

ఆకాశం అనంతం. కనిపించే నిర్మలమైన ఆకాశం దాని సహజ రూపం కాదు. అలాగే నిశ్శబ్దంగా అన్నింటినీ భరించేటంత అవనిలోనూ సహజత్వం లేదు. ఇందుకు కారణాలు లేకపోలేదు. ఆకాశానికి భూమికీ మధ్య జరిగే మానవ సంఘర్షణలు, మనిషి మేధో మధనాల ఫలితమే ఈ అసహన మనోకృతులు ప్రకృతిని కూడా ఆవరించాయి. సముద్రాన్ని దేవతలు మధిస్తే అమృతం వచ్చినట్లు, వీటన్నింటినీ ఎంతో కొంత చదివి ఆకళింపు చేసుకొని సానపడితే తప్ప కథానిక పుట్టదు. తోడిన కొద్దీ మానవ జీవితంలో ఎన్ని సమస్యలున్నాయో వాటికి ఆలోచనాభరిత పరిష్కారాలే కథానికలు. ఒక వ్యక్తి తనకొచ్చిన సమస్యను పరిష్కరించుకోవడానికి ఎంతో ప్రయాస పడుతుంటాడు. అదే సమస్య ఎదుటి వ్యక్తికి రాగానే పరిష్కారం క్షణాల్లో చెప్పేయగలడు. అంటే ప్రతి సమస్యకు పరిష్కారం ఉందని మనకు అర్థమవుతుంది కానీ ఆ పరిష్కారం మనకెంత వరకు వర్తిస్తుందో అనేది ఆలోచించాల్సిన విషయం. సి.ఉమాదేవి రచించిన ‘మాటే మంత్రము’ అనే కథానికల సంపుటిని కథల సంపుటిగా సంబోధించారు. కానీ నిజానికిది కథానికలు. ఊహాజనితమైన ప్రపంచంలో నిత్యం ఊయలులూగుతూ తమకు దక్కని, తాము ఎదురుచూడని సన్నివేశాలతో కదిలేది కథని, వాస్తవ ప్రతిరూపాలన్నీ కథానికలనీ ప్రముఖ కథకులు వేదగిరి రాంబాబు గారి నుండి తెలుసుకున్నప్పటి నుండి చాలామంది కథానికలే రాస్తారని అర్థమైంది. ఆ కోవలో ఆలోచిస్తే ఉమాదేవిమాటే మంత్రము’ కథానికల కోవలోనివే అని చెప్పవచ్చు.
మానవ జీవతానికి రెండు రిటైర్మెంట్లు. ఒకటి ఉద్యోగరీత్యా, రెండవది జీవితరీత్యా! జీవితరీత్యా రిటైర్ అవ్వడానికి ఇంత వయసని ఎక్కడా లేదు. ఆ వయసనేది దేవుడు నిర్ణయం. కానీ ఉద్యోగరీత్యా రిటైర్‌మెంట్ అనేది తప్పనిసరి కానీ ఆ సంబంధిత వ్యక్తికి మాత్రం దిగులు ఆవరిస్తుంది. పైకి నవ్వుతూ కనిపించినా తనకున్న ఒక పని పోయేసరికి తను ఇక ఏమీ చేయలేడా? అనే ఆవేదన వెంటాడుతుంది. అందుకు తగినట్లుగా ఉదయమే ఆయనకేం తొందర? ఇంట్లోనే ఉంటారుగా అనే ఇంటిలోని వారి రకరకాల మాటలు వింటున్నా, తనకిన్నాళ్లు ఇచ్చిన ప్రాముఖ్యత ఇవ్వడం లేదనిపించి దిగులు పడిపోయేవారు ఎందరో. అదే విషయాన్ని ‘మౌనమే నీ భాష’ అనే కథలో అనంతం పాత్ర ద్వారా ఎంతో చక్కగా తెలిపారు. నాన్నకు పని లేదు. కనుక ఏదో ఒకటి మాట్లాడతారు’ అనే కొడుకు మాటలకు ఎంతో ఆవేదన చెందిన తండ్రి అనంతం ఇకపై మాట్లాడకూడదని నిర్ణయించుకుని వౌనం పాటిస్తాడు. ఆ మౌనం భరించక తిరిగి కుటుంబ సభ్యులందరూ మీరు మాట్లాడితేనే బావుంది అని దగ్గరకు చేరే సంఘటనల్ని ఈ కథలో చాలా అద్భుతంగా పలికించారు. ఇంట్లో వారు హడావిడిలోనో, కోపంతోనో, పని వత్తిడితోనో ఏదయినా అంటే అందులో ఏ మాత్రం నిజం ఉండదని తెలియజేయడం ఎంతో బావుంది. రచయిత్రి ఉమాదేవి తమదైన శైలిలో రచించారు. వయసు పెరిగినా మనసు పెరగదనేది నిజం అనిపిస్తుంది కొన్ని విషయాల్లో. సృష్టికి ఉదయాస్తమయాలు ఉన్నట్లే, మనిషి ఆకలిదప్పులు, ఆశలు ఆవేశాలు ఉండనే ఉంటాయి. వాటిని గురించి తెలిపే కథ ‘ఏం చేస్తున్నావు బుజ్జీ’ అనే కథ. సెల్‌ఫోను తనకెందుకు ఇంట్లోనే ఉంటుంది కదా? తనకేమయినా ఫోను వస్తే నాకు చేస్తే నేను ఇస్తాను కదా అనేది సాధారణంగా ప్రతి ఇంట్లో ఉంటుంది. స్త్రీకి స్వతంత్రత ఉండదనే విషయం ఇంకా అక్కడక్కడా కనిపిస్తూనే ఉంటుంది. అలా కాదు పిల్లలు పెద్దవారయి అమ్మకు ఒక ఫోను ఉండాలి అని కొనిస్తే, ఆ అమ్మకు మెసేజ్ ఇస్తే, అదీ అపరిచిత వ్యక్తి? అనేది సరదాగా సాగిన ఒక సంఘటనను కథానికగా మలచిన తీరు చాలా బావుంది.
ఉమాదేవి కథలన్నీ నాలుగు గోడల మధ్య జరిగే సంఘటనలే. ఇల్లు నాలుగు గోడలే అయినా ఉదయం నించి రాత్రి దాకా నలభై రకాల సమస్యలు వెంటాడుతూనే ఉంటాయి. సమస్యలు అయితేనేం? సామరస్యాలు అయితేనేం? అంతా అపురూపమే! ఇల్లంటేనే ఒక అపురూపం. అలాంటి అపురూప సంఘటనలను ఒకచోట చేర్చి ‘మాటే మంత్రము’ అనే శీర్షికతో కథానికల సంపుటి తీయడం ప్రశంసనీయం. ముఖ్యంగా నాన్న ఉండాలి, నాన్నా నీకేం కావాలి? మీరు క్యూలో ఉన్నారు. జీవిత చక్రం, అమ్మ సన్నిధి, పలుకే బంగారుమాయెనా? వర్షించని కన్నులు లాంటి కథలు పాఠకుల్ని ఎంతో అందమైన లోకంలో విహరించేలా చేస్తాయి. పెదవులపై చిరునవ్వు చిందించేలా చేస్తాయి. మొత్తానికి అందరినీ హాయిగా చదివించే కథలు ఇవి. ఎందరినైనా ఆకట్టుకోగల కథలివి.

-శైలజా మిత్ర, ఆంధ్రభూమి-అక్షర, 09/08/2014.

 

“మాటే మంత్రము” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మాటే మంత్రము on kinige

 

MateMantramu600

 

Related Posts:

ఆప్తవాక్యాలతో కర్తవ్య బోధ – “మంచిమాట- మంచిబాట” పుస్తకంపై సమీక్ష

 

ఇఫ్పటి పిల్లలు తల్లిదండ్రుల మాట వినకుండా పోతున్నారని, ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే మరో వ్యాసం ఆలోచింపజేస్తుంది.

ఆంధ్రభూమి, వనితాజ్యోతి, వండర్ వరల్డ్, ఆంధ్రప్రభ మొదలైన పత్రికల్లో ప్రచురింపబడిన వ్యాసాలలోని కొన్ని వ్యాసాలను మంచిమాట- మంచిబాట అనే పేరుతో సి.ఉమాదేవి వ్యాస సంకల్పం చేశారు. నేటి సమాజంలో మన చుట్టూ- జరుగుతున్న సంఘటనలు, మానవ మనస్తత్వాలు, జీవన విధానం, సంస్కృతికి సంబంధించిన వ్యా సాలు మనకు ఇందులో కనిపిస్తాయి. మన స్నేహితులతో మాట్లాడేటప్పుడు చెప్పే విషయాల్లా అనిపిస్తాయి. రచన సరళమైన శైలిలో వుంది. పిల్లలకు, పెద్దలకు అవసరమైన మంచి మాటలున్నాయి. మంచి మాటలను చెప్పి వదిలివేయలేదు. కొన్ని సందర్భాల్లో వాటిని తప్పకుండా ఆచరించాల్సిన అవసరాన్ని కూడా నొక్కిచెప్పారు. అరువుసొమ్ము బరువుచేటు, ఫాల్స్‌ప్రెస్టేజీతో ఇబ్బందులు తప్పవు, పటిష్టమైన కుటుంబం అవసరం, పెళ్ళిళ్ళల్లో వృధావ్యయం వ్యర్థం అనే నీతులను ఈ వ్యాసాలు బోధిస్తాయి. వృద్ధులంటే వయస్సు వృద్ధిచేసుకున్నవారు కాదు. పిల్లలను అభివృద్ధిపథంలోకి నడిపిన వారనడం, ప్రతి బిడ్డా ఒక పరిపూర్ణ వ్యక్తిగా రూపుదిద్దుకుంటేనే దేశానికి ఉన్నత పౌరులు తయారవగలరు, ప్రేమ అనేది రక్షణనివ్వగలగాలి, అనే వాక్యాల ద్వారా సందేశాన్ని అందించారు. మనల్నిబట్టే మన పిల్లలలో తల్లిదండ్రులు నిజాయితీగా వ్యవహరించాల్సిన ఆవశ్యకతను చెబుతారు. మానవత్వం, మృదుభాషణం అవసరమంటారు. ఒడినుండి బడికి లాంటివి సలహాలను, ధైర్యాన్నీ ఇస్తాయి. ర్యాగింగ్‌ను అరికట్టడం, డ్రైవింగ్‌లో మెళకువలు, వంట చేయడంలో జాగ్రత్తలు, పొదుపు ఆవశ్యకత మొదలైనవి నేటి సమాజానికి ఉపకరిస్తాయి. తెలుగులో మాట్లాడితే శిక్షలు వేస్తున్న నేటి పాఠశాల యాజమాన్యాల తీరును విమర్శించారు. సంబరాన్ని పెంచే పండుగలు వ్యాసంలో పండుగ వాతావరణాన్ని వర్ణిస్తే అరకులోయలో ప్రకృతి వర్ణన చేశారు. వర్క్‌హాలిక్‌గా వుండకుండా మనస్సును విశ్రాంతి వైపు మళ్ళించాలి, జీవించే కళను నేర్చుకుని వదిలివేయడం కాదు ఆచరించాలి. నెగెటివ్ థింకింగ్‌తో కుంచించుకుపోతున్న విజయావకాశాలు మొదలైనవి ఆత్మవిశ్వాసాన్ని పెంపొందిస్తాయి. పసి పిల్లలపై భారం మోపి వారిని వత్తిడికి గురిచేయవద్దంటారు. పిల్లలకు తల్లులే మంచి కౌన్సిలర్స్ అని చెప్పి పరీక్షల సమయంలో వారికి కల్పించాల్సిన సౌకర్యాలు, తల్లిదండ్రులు తీసుకోవలసిన చర్యలను వివరించారు. పిల్లలను బడికి పంపించేటప్పుడు తీసుకోవాల్సిన జాగ్రత్తలు తెలిపారు. ఇప్పటి పిల్లలు తల్లిదండ్రుల మాట వినకుండా పోతున్నారని , ఈ పరిస్థితిని చక్కదిద్దాలని చెప్పారు. ఇక స్ర్తీలకు సంబంధించిన వ్యాసాలు కూడా ఎక్కువ వున్నాయి. ఆమె ఎందులో తక్కువ?.. వంటి వ్యాసాలు స్ర్తీల గొప్పదనాన్ని వర్ణిస్తాయి. నేటికీ బాల్యవివాహాలు జరుగుతుండడాన్ని విమర్శించారు. ఆంధ్రప్రదేశ్‌లో మహిళల స్థితిగతులను చర్చించి మనస్తత్వంలో మార్పు అవసరమన్నారు. ఆడదే వంట చేయాలా? అనే పేరుతో ప్రశ్నించినట్లుగా వుండే వ్యాసం స్ర్తిలు వంటచేస్తేనే వారికీ, ఇంట్లోని వారికీ తృప్తికలుగుతుందని వంటను తంటాగా కాకుండా బాధ్యతగా చేయాలన్న భావాన్ని స్ఫురింపజేశారు. ఇంటిని తీర్చిదిద్దుకోవడంలోనే నేర్పు చూపించాలన్నారు. హోదాలు, సంపాదనలో వ్యత్యాసాలు, అధికారం చెలాయించడం లాంటివి దాంపత్య జీవితానికి ఆటంకం కలిగించే అంశాలని, చూడముచ్చటగా అన్యోన్యంగావుండే ఆదర్శదాంపత్యం అవసరమని, జీతాలు కాదు జీవితాలు పంచుకోవాలంటారు. ప్రేమకంటే సిన్సియారిటీ ముఖ్యమంటారు. ఈ రకంగా మనసున మనసై వ్యాసం హితవును బోధిస్తుంది. ఈ రకంగా ఈ పుస్తకం మంచిమాటను చెబుతూ మంచి బాటను చూపిస్తుంది.

-కె.లక్ష్మీఅన్నపూర్ణ, ఆంధ్రభూమి-అక్షర, 27/09/2014.

 

మంచిమాట- మంచిబాట” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మంచిమాట- మంచిబాట on kinige

ManchiMataManchiBata600

 

 

 

 

Related Posts:

అతివ అంతరంగ మథనం – “అన్వేషణ” నవలపై సమీక్ష

మనిషి జీవిస్తున్నాడా? లేక జీవిస్తున్నానని భ్రమలో ఉన్నాడా? అనే ఒక సందిగ్ధం ఈరోజుది కాదు. పురాణాల నుండి వస్తున్నదే! ఐతే- ఆ మాట నిర్భయంగా నేడు అంటున్నారు. అనుకుంటూనే ఆలోచిస్తున్నారు. గంటి భానుమతి రచించిన ‘‘అన్వేషణ’’ నవలలో నిజంగా మానవ జీవితంలోని అనేక కోణాలను అన్వేషించారు. అందరికీ తెలిసిన సమాధానాలపై ఎదురు తిరిగారు. తెలియని ప్రశ్నలను సంధించారు. ఈ 21వ శతాబ్దంలో కూడా ఇంకా అత్తింట్లో ఆవేదనలు, భర్త మూలంగా అవమానాలు, అనుమానాలు ఎదుర్కొంటున్న నేటి సమాజపు దుస్థితిని అభివర్ణించిన తీరు ఎంతో ఆకట్టుకుంది. అసలు స్త్రీ సంఘానికి భయపడాలా? లేక తన మనస్సాక్షికి భయపడాలా? అంటే నా ధోరణిలో మనస్సాక్షికే ఎక్కువ మార్కులు వేస్తాను. సంఘం అనేది గాలివాటుకు ఎగిరిపడుతున్న ఎండుటాకు లాంటిది. అదిగో అని చూపితే కనిపించకున్నా, అవును నాకూ కనిపించింది అంటూ ఎదుటిమనిషిని మరింత నిర్వీర్యం చేస్తుంది. కానీ మన మనస్సాక్షికి తెలుస్తుంది మనమేంటి? మనం జీవిస్తున్న విధానం ఏమిటి? అని. ఒక స్ర్తి అయినా, పురుషుడైనా మనస్సాక్షి ముందు తలెత్తుకుంటే చాలు గెలిచినట్లే..
అసలు  స్త్రీ అంటేనే ఒక కుటుంబం. స్త్రీ లేనిదే కుటుంబాలు ఎంతగా వెలవెలపోతుంటాయో మనం గమనిస్తూనే ఉంటాం. ఈ నవలలో విజయ అనే పాత్ర ఎన్నో సందిగ్ధాల మధ్య సతమతమవుతూ తన జీవితం అలా ఎందుకు ఒంటరి అయిపోయిందనే విషయంపై అన్వేషణ కొనసాగిస్తుంది. అలాంటి సమయంలో తనను ప్రేమించిన వ్యక్తి కూడా తల్లిదండ్రులు ఎవరో తెలియకుంటే పెళ్ళిచేసుకోవడం కష్టమని అనడం విజయను మరింత బాధిస్తుంది. పెళ్ళికి యువతి కావాలా? యువతికి యువకుడు ఉంటే చాలదా? అంటే చాలదు. ప్రేమకు ఇద్దరు చాలు పెళ్లికి మాత్రం రెండు కుటుంబాలు కావాలి అనే మాట విన్నాం. అయితే కుటుంబం ఎందుకు? అంటే మాత్రం రాబోయే తరాలకు ఒక చరిత్ర కావాలి. నాన్న అమ్మ ఎలాగో, అమ్మమ్మ, తాత, పెదనాన్న, చిన్నాన్న పిన్ని అత్త లాంటి వరసలన్నీ ఎంతో కావాలి. వారందరూ మనకంటూ ఏమీ చేయకపోవచ్చు. కానీ ఉన్నారనే ఆశ ముందుకు నడిపిస్తుంది. తల్లిదండ్రులు పునాదులైతే నా అన్నవాళ్ళు మూలస్తంభాలు. ఆ విషయమే ఈ నవలలో కనిపిస్తుంది.
గంటి భానుమతి ఎంతో సున్నిత హృదయులు. వీరిలోని నొప్పించేతత్వం లేని తనమే ఈ నవలకు పునాది అయింది. కారణం ఈ నవలలో మరీ బాధించే పాత్రలు చూపలేదు. కాలానుగుణంగా మనిషి తత్వం మారుతుందే తప్ప ఎవరూ చెడ్డవారు కారనే తత్వాన్ని తెలియజేసిన తీరు కడు రమణీయం. కాకుంటే మనుషుల్లో ఏదో ఒకటి కావాలని బాధ, ఉంటే ఎవరికి చెందుతుందో అనే బాధ, ఆస్తుల పంపకాలు, అక్కచెల్లెళ్ళ పోరాటాలు, రక్తసంబంధీకుల సమస్యలు చదువుతుంటే ఒకటుంటేఒకటిలేదనే తత్వంతో మనుషులు ఎదగలేకపోతున్నారా అనిపించక మానదు. అదే విషయం విజయ జీవితంలో కనిపిస్తుంది. తండ్రి వచ్చినా, అమ్మమ్మ, తాతయ్యలు ఉన్నా ఆస్తుల పంపకాలలో అనేక చేదుకోణాలను చూస్తుంది. పెద్దలు కుదిర్చిన వివాహాన్ని చేసుకున్న విజయ తల్లిని అన్వేషించడం మాత్రం ఆపలేదు. చివరకు తన తల్లి అత్యాచారానికి గురై చేయూతనిచ్చేవారు ఉన్నా అందుకోలేక, సమాజానికి ముఖం చూపించలేక మరింతగా కుంగిపోయి తన జీవితాన్ని పోగొట్టుకుందనే నిజాన్ని తెలుసుకుని కుమిలిపోతుంది. మరో వివాహం చేసుకుని వారి ద్వారా కూడా బిడ్డలున్నా వారి నుండి ఆదరణ లభించకపోవడంతో మొదటి భార్య కన్నబిడ్డ విజయ తండ్రిని తానే కొడుకై ఆదరిస్తుంది. తల్లిదండ్రులు ఎలాంటివారైనా అనుబంధం ముందు ఓడిపోక తప్పదని నిరూపిస్తుంది.
మనిషి జీవితంలోని మార్పుచేర్పులకు సమాజమే కారణం అయితే, వ్యక్తిగా తనను తాను గమనించుకునే స్థితికి మనిషి ఎపుడు చేరుకుంటాడు? అదే స్త్రీ అయితే తన పరిస్థితి ఏమిటి? అనే ప్రశ్నలను సంధించి సరికొత్త సమాధానాన్ని అందించిన తీరులో సాగిన వైనం మనల్ని ఆద్యంతం అలరిస్తుంది. వ్యక్తిత్వం అనేది ఒక స్ర్తికి సంబంధించింది అనడం కంటే వ్యక్తిత్వం ప్రతి వ్యక్తికి సంబంధించింది అని ముగించి ఉంటే మరింత బావుండేదనిపిస్తుంది. ఎందుకంటే ఒక ప్రశ్నగా స్త్రీ నిలబడినంతకాలం సమాజం తనకిష్టమైన సమాధానాలు చెబుతూనే ఉంటుంది. తానే ఒక సమాధానమైన రోజు ప్రశ్నలన్నీ ఏమవుతాయి? ఆలోచించాలి…!

-ఎస్.ఎం. అక్షర, ఆంధ్రభూమి, 21/06/2014

***

అన్వేషణ”నవల డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అన్వేషణ on kinige

Related Posts:

జీవితమే ఇతివృత్తం! – “సన్మానం” పుస్తకంపై సమీక్ష

పొత్తూరి విజయలక్ష్మి కథలకు అనుబంధాలే పునాదులు. ఆమె రచనల్లో హాస్యం అంతర్లీనం, వ్యంగ్యం నిబిడీకృతం. ‘సన్మానం‘ కథ పూర్తయ్యేలోపు పాఠకుడి కళ్లలో నీళ్లు తిరుగుతాయి. చిన్నప్పుడు పాఠాలు నేర్పిన గురువులంతా కళ్లముందు మెదులుతారు. మానవ సంబంధాల్లోని అతి సున్నిత కోణాన్ని అంతకంటే సున్నితంగా ఆవిష్కరించారు రచయిత్రి. చుట్టాలతో స్నేహితులతో కళకళలాడాల్సిన పెళ్లిమండపాలు ఈవెంట్ మేనేజ్‌మెంట్ వాళ్లతో నిండిపోతున్నాయి. ఆ మేరకు, పలకరింపులూ కృతకంగా మారిపోతున్నాయి. ఆ ధోరణి బారిన పడవద్దంటూ ‘మర్యాదలు వచ్చేస్తున్నాయి జాగర్త’ కథలో హెచ్చరించారు. ‘భారత రసాయన శాస్త్రం’, ‘చీరెల సుబ్బారావు’, ‘చిరుదివ్వె’… ఒకటేమిటి, పుస్తకంలోని ప్రతి కథా జీవితంలోని ఏదో ఓ సమస్యకు పరిష్కారాన్ని చెప్పేదే, మనుషుల్లోని కృత్రిమత్వాన్ని ఎత్తిచూపేదే.

– భరత్, 29 జూన్ 2014, ఆదివారం అనుబంధం

 

 

 

 

 

 

 

 

సన్మానం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

సన్మానం on kinige

Related Posts:

అమ్మకు జేజేలు – “అమ్మ కథలు” పుస్తకంపై సమీక్ష

జననితోనే జగతి వర్ధిల్లుతుంది. ‘అమ్మ’తో ముడిపడిన సంఘటనలూ, సన్నివేశాలూ, అనుబంధాలూ, ఆప్యాయతలూ ఇతివృత్తంగా కథా సంకలనాన్ని తీసుకురావాలన్న రచయిత్రి ఉమాదేవి ఆలోచన గొప్పది. ‘అమ్మంటే..!’ కథ తల్లికి అసలుసిసలు నిర్వచనాన్నిచ్చే ప్రయత్నం. మృగాల్లాంటి మగాళ్ల చూపుల నుంచీ మాటల నుంచీ స్పర్శలనుంచీ కూతుర్ని ధైర్యంగా కాపాడుకున్న ఓ తల్లి కథ ‘సహానా’. అమ్మలో గురువునూ దేవతనూ సంస్కర్తనూ- మొత్తంగా ఓ పరిపూర్ణ స్త్రీమూర్తిని దర్శించిన కొడుకు… ఆ తల్లి జ్ఞాపకాల్ని, కట్టుకున్న భార్య స్టీలుసామాన్లవాడికి అమ్మేసినప్పుడు పడిన నరకయాతనే ‘మాన్వి’. ‘బతుకమ్మా’, ‘వెన్నెలమ్మా’, ‘గూడు’, ‘ఒకనాటి ఉద్యానవనం’… ఒకటేమిటి సంకలనంలోని 17 కథలూ అమ్మ ప్రేమకు అక్షరరూపాలే.

- ఎ.వి.జనార్దనరావు, ఆదివారం అనుబంధం, 4th May 2014

 

 

 

 

 

 

 

 

అమ్మ కథలు” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అమ్మ కథలు on Kinige

 

 

Related Posts:

కినిగె రచయిత్రుల ఈ-పుస్తకాలపై 25% ప్రత్యేక తగ్గింపు!

కినిగె పాఠకులకు అంతర్జాతీయ మహిళా దినోత్సవ శుభాకాంక్షలు!
అంతర్జాతీయ మహిళా దినోత్సవం సందర్భంగా కినిగె పాఠకులకు ప్రత్యేక కానుక అందిస్తోంది.
కినిగె రచయిత్రుల ఈ-పుస్తకాలను 25% ప్రత్యేక తగ్గింపు ధరకే పొందండి. ఈ తగ్గింపు కొద్ది రోజులు మాత్రమే!

రచయిత్రుల పుస్తకాలు on Kinige

 

Related Posts:

నిరాశకు నిష్క్రమణ పలికే కథల సంపుటి ‘ఆసరా’

గీతలన్నా, గీతాలన్నా తనకిష్టమని చెప్పే శ్రీమతి వారణాసి నాగలక్ష్మి మంచి కథా రచయిత్రిగా కూడా పాఠకలోకానికి పరిచితురాలు. వానచినుకుల్లో తడుస్తున్న వాళ్ళకు గొడుగు ఎవరైనా ఇస్తే ఎంత ఆసరానో కన్నీటి జడిలో తడిసే వారికి కొండంత ధైర్యాన్నిచ్చే ‘ఆసరా‘ సంపుటిలోని కథల వంటి కథలు అంత ఆలంబన. ‘బంగారపు పళ్లేనికైనా గోడ చేర్పు ఉండాలి’ అన్నట్లు, ఎంతటి వాళ్ళకైనా ఏదో ఒక సమయంలో ఆసరా అవసరపడుతుంది. ‘పాడి ఉన్నా పంటలు ఉన్నా పంచుకునే మనిషుండాలి’ అని తోడు-నీడ సినిమా పాటలో అన్నట్లు కష్టాలను కన్నీళ్ళనే కాదు, మన ఆనందాన్నీ పంచుకునే వాళ్ళున్నదే జీవితం.
ఈ సంపుటిలో వరసగా నాలుగు కథలు చదివాక నాకు ఏం చెప్పాలని పదే పదే అనిపించిందో సరిగ్గా అవే మాటలు ‘మేఘన’ కథలో కనిపించాయి. “సృజనాత్మక రచనలో చెప్పదలచిన విషయాన్ని మొహాన కొట్టినట్లుగానో, లేదా అరటిపండు వొలిచి చేతిలో పెట్టినట్లుగానో చెప్పకూడదు. పాఠకుడిలో ఆలోచన రేకెత్తించేలా, చిరునవ్వు మొలిపించేలా, నిద్రపోతున్న వ్యక్తిని వెచ్చని సూర్యకిరణం మేల్కొలిపినట్లుగా, మనసు ఆర్ద్రమై కళ్ళు చెమర్చేలా, సూచనప్రాయంగా, దృశ్యాదృశ్యంగా రచన సాగాలి” మేఘన కథలో సృజనాత్మక రచన వర్క్ షాప్ నిర్వహించే సాహితీ వైద్యుడు సుధీర్ సంజయ్ చెప్పిన మాటలు నిజానికి రచయిత్రివే. శ్రీమతి నాగలక్ష్మి కథల్లో కనిపించే నేటి మానవ సంబంధాలు, సమస్యలు, అంతస్సంఘర్షణలు, వాగ్వివాదాలు, చిలిపి తగవులు – అన్నింటిలోనూ సౌకుమార్యం కనిపిస్తుంది. తిట్టినా అందులో పదునుతోపాటు నాగరికత కనిపిస్తుంది. నవ సమాజాన్ని నిశితంగా పరిశీలించి నిర్లిప్తంగా ఉండే మనుషుల్ని ఈ సమస్య గురించి ఆలోచించమంటుంది. ఈ సంపుటి పేరు ‘ఆసరా’ గర్భస్థ శిశువుగా ఉన్నప్పుడు తల్లిపేగు (బొడ్డుతాడు) ఆసరా. చివరి వార్ధక్య దశలో చెట్టంత బిడ్డలో, చేతికర్రో ఆసరా. ఈ మధ్య సాగే జీవనయానంలో ఆసరా ఎన్నోసార్లు అవసరమవుతుంది. మొదటి కథ పేరే ‘ఆసరా’ సైబర్ కేఫ్‌లలో చిరుచీకటి నిండిన కేబిన్లలో యువతీ యువకులు యౌవనమైకంలో చేసే శృంగార చేష్టల్ని వీడియో తీసి బ్లాక్ మెయిల్ చెయ్యటం గురించి మనకు తెలుసు. అటువంటి సమస్య వచ్చినప్పుడు ఎగతాళి చేసి స్నేహితులు, తిట్టి తల్లిదండ్రులు వాళ్ళని మరింత నీరుగారిపోయేలా చేస్తారు. అందుకు ఫలితమే ఎన్నో ఆత్మహత్యలు. ఆ కాసేపు వివేకంతో, ఓర్పుతో ధైర్యం చెప్పేవాళ్ళుంటే, సమస్యకు పరిష్కారాన్ని సూచించే వాళ్ళుంటే ఆ ‘ఆసరా’ జీవితాన్నే నిలబెడుతుందని ఈ కథ చెబుతుంది. తప్పు దిద్దుకోవటానికి తల్లి చేయూతనిస్తే ఒక పడుచుపిల్ల జీవితం మళ్లీ పచ్చగా మారుతుందని చెప్పే ఈ కథ ఇటు యువతకు, అటు తల్లిదండ్రులకు కనువిప్పు. సమాజంలో ‘పీడించటం’ అనేది వర్ణాలకు, వర్గాలకు పరిమితం చేస్తుంటారు. ‘అమృతాన్ని సాధించు’ కథ చదివినప్పుడు బలవంతులు, బలహీనుల్ని పీడిస్తారనీ, అందుకు వర్ణ, వర్గాలు అతీతమని అనిపిస్తుంది. పదిమంది మెప్పు కోసం ఆదర్శ వివాహాలు చేసుకొని వివక్ష విషాన్ని కడుపులోనే దాచుకొని పండంటి కాపురాన్ని పాడుచేసుకుంటున్న ఒక జంట కథ ఇది. తన ప్రేమకోసం తన వాళ్ళందరినీ వదిలి వచ్చిన భార్యను ‘అగ్రవర్ణపు అహంకారి’గా మాత్రమే చూసే అవినాశ్ ఆత్మన్యూనతా భావంతో, పేరుకుపోయిన పగతో భార్య నీరదను నిజంగానే ‘కురిసే మేఘం’గా మార్చాడు. అవినాశ్ పురుషుడిగా తన ఆధిక్యత భార్య మీద చూపిస్తే నీరదను ఆసరాగా నిలిచే సునంద ఇంట్లో పనిపిల్లమీద ఆధిపత్యం సాగిస్తుంది. ‘తప్పులు దిద్దువారు తమ తప్పులెరుగరు’మరి!
ఒళ్లు కొవ్వెక్కిన వెధవ ఒంటరిగా వచ్చే ఆడపిల్లను మానభంగం చేస్తే తప్పు చేసిన వాడు హాయిగా తిరుగుతుంటాడు. ఆ అమ్మాయి ఆత్మహత్య చేసుకుంటుంది. అమెరికా మొగుడు మోసం చేస్తే ఆమెకూ ఆత్మహత్యే గతి. మనకు కనబడుతున్న కన్నీటి కథలివి. కాని ‘సంధ్యారాగం’ కథలో ‘సావేరి’కి సుమేధ ఆసరాతో బ్రతికి సాధించాలనే పట్టుదల వచ్చింది. బొద్దింకను చూస్తే భయపడే సావేరి పసిఫిక్ మహా సముద్రం మీద ‘హాట్ ఎయిర్ బెలూనింగ్’ చేసేంత ధైర్యవంతురాలైంది. “’వే’ని వెతికి పట్టుకోవాలి. అది తీసేస్తే ‘సారి’ మిగిల్తుంది. నువ్వు ‘సావేరి’ని. అందమైన రాగానివి.“ అన్న స్నేహితురాలి మాటల ఆసరా విలువ అమూల్యం.
జీవితాన్ని మధురంగా, రాగసుధా భరితంగా ఊహించుకుని కలలుకనే అమ్మాయిలు తనను పట్టించుకోని భర్త దొరికితే మానసిక వేదనకు గురౌతారు. ఆ కోపంలో ‘మొమెంట్ ఆఫ్ ప్లెజర్’ ఫలితంగా వచ్చిన గర్భాన్ని తీయించేసుకోవాలనుకుంటారు. అది భర్తకు బుద్ధి చెప్పటమనుకుంటారు. కడుపున పడిన బిడ్డను కాదనుకునే హక్కు తల్లికి లేదని, జన్మనివ్వటం అద్భుతమైన ఘట్టమనీ చెప్పే కథ ‘చిన్నబోదా చిన్నప్రాణం’. ఆడపిల్లల్ని వద్దనుకున్న పాపం తరతరాలను కట్టికుదుపుతుందని ‘రేపటి ప్రశ్న’ కథ హెచ్చరిస్తుంది. అత్తగారొస్తుంటే దెయ్యం వస్తున్నట్లు భయపడిన కోడలు ఆమె ప్రేమతోరాసిన ‘ఒక ప్రేమలేఖ’ మానవ సంబంధాల తియ్యదనానికి నిదర్శనం. అర్థం చేసుకోవటం కష్టం. అపార్థంతో నిందలు వెయ్యటం సులభమనే సందేశం ‘ప్రేమతో మీ పెద్దత్త’ కథలో చూడవచ్చు. అమ్మ అనురాగానికి అద్దంపట్టిన కథ ‘గోడమీదబొమ్మ’. బాపు- రమణల ‘రాధాగోపాళం’ను చూసి ముచ్చటపడి రచయిత్రి మురిపెంగా రాసుకున్న కథ ‘శ్యామాగోపాళం’. (ఆఁయ్! అమ్మా! మమ్మల్నే ఇమిటేట్ చేస్తావా? మా పాత్రల్ని (గిన్నెలు కాదు రాధా గోపాళం) జాతీయం చేస్తావా? అని పెద్దాళ్ళిద్దరూ ఖోప్పడ్డారేమో?) కథా వస్తువులు, కథ నమూ నచ్చే కథల ‘మిక్చర్’ ‘ఆసరా’ కథా ప్రియులను మెప్పిస్తుంది. నేటి నిజాలను హితంగా, మితంగా చెప్పిన శ్రీమతి నాగలక్ష్మి అభినందనీయురాలు.

డా. బి.ఉమాదేవి, నది మాసపత్రిక, సెప్టెంబరు 2013

* * *

“ఆసరా” కథా సంపుటి డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.
ఆసరా On Kinige

Related Posts:

ఆశావాదమే జీవనవేదం

వివిధ పత్రికలలో ప్రచురించబడిన ఇరవై కథానికలు ఈ పుస్తకంలో ఉన్నాయి. జీవితాన్ని వేర్వేరు కోణాలలో పరిశీలించి విశ్లేషించటం ఇందులో చూడవచ్చు. పుస్తకానికి ముందుమాట రాస్తూ డా.వేదగిరి రాంబాబు ‘మానవ సంబంధాలమీద రచయిత్రికి గట్టి నమ్మకం ఉందని, నిర్మలమైన ప్రేమతో అవి నిలబడతాయని రచయిత్రి గాఢంగా నమ్ముతున్నారని’ అన్నారు. పరిచయాలు వేరు, స్నేహాలు వేరు, ప్రేమలు వేరు, అవసరానికి సహాయ పడటం వేరు- దేని స్థానం దానిదే. అది తెలుసుకోకుండా ఒక దానిని మరొకటిగా భావించినప్పుడు సమస్యలొస్తాయి. ఈ సత్యాన్ని తెలియజేసేదే ఈ పుస్తకంలోని ‘పగటి కల’ కథ. దుర్మార్గంగా వ్యవహరించటం అనేది పరిస్థితులనుబట్టి ఉంటుందని, దానికి ఆడా, మగా అన్న తేడా ఉండదనీ ‘జాతర’ కథ సూచిస్తుంది. ఈ కథ ముగింపులో ‘పురుషులవల్ల స్ర్తిలు బాధలు పడుతున్నారన్నది ఎంత నిజమో, అదే విధంగా ఒక కోణంలోంచి గమనిస్తే పురుషులు కూడా స్ర్తిల మూలంగా ఎంతో నరకం అనుభవిస్తున్నది కూడ నిజం’ అని రచయిత్రి చెప్పటం ఆలోచించతగ్గది. జీవితాన్ని విశ్లేషిస్తూ ఆశావాద దృక్పథం అవసరమని తెలుపుతుంది ‘పిచ్చుక గూళ్లు’ కథ. ‘అడ్డా’ కథ కార్మికుల జీవన పోరాటాన్ని సమస్యలతో సర్దుకపోవటాన్ని తెలుపుతుంది. ‘చచ్చి సాధించేది ఏదీ లేదు. సమస్యలను ఎదుర్కోవాలి. బతుకు పోరాటం కొనసాగించాలి’ అనే ఆశావాద వైఖరిని ‘జీవితానికి ఆవలి గట్టున’ కథ ఉద్బోధిస్తుంది.

ఎం.వి.శాస్ర్తి , ఆంధ్రభూమి అక్షర పేజి, 13/07/2013

* * *

“అడ్డా” పుస్తకం డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.
అడ్డా On Kinige

Related Posts:

పాక్షిక ఆత్మకథ

పుస్తకం : ఆత్మకథాంశాల ఉత్తరాలు

రచన : రంగనాయకమ్మ

నేపథ్యం : రంగనాయకమ్మ చాలా ఏళ్ల క్రితం కొందరికీ(ముఖ్యంగా కృష్ణాబాయికి); ఆ కొందరు రంగనాయకమ్మకూ పరస్పరం రాసుకున్న ఉత్తరాల్ని కలిపి అచ్చేసిన పుస్తకం ఇది.

విషయం : ఇది పొరపాటు ఊహే అయినా, రంగనాయకమ్మను తలుచుకోగానే, ఒక శిలావిగ్రహం గుర్తొస్తుంది. ప్రతిసారీ రూల్సూ రెగ్యులేషన్సూ అంటుందా ఏమిటీ, అని. కానీ ఆమెలో కూడా అందరిలాంటి కొన్ని సరదాలు, చమత్కారాలు, ఆటపట్టింపులు ఉన్నాయని చదివినప్పుడు ఒక రిలీఫ్ ఏదో కలిగింది. గాంధీతో తొలినాళ్ల కాపురం గురించిన ఆమె మాటలు చూడండి: ‘‘చలేస్తోంది. కిటికీలు వేసెయ్యి’’ అంటే, ‘‘ఎవరికి చలి? ఏ వర్గానికి చలి?’’ అంటాడు. ‘‘స్త్రీ వర్గానికి’’ అంటే, ‘‘అయితే కొంచెం ఆలోచించాల్సిందే’’ అని వొక రెక్క వేస్తాడు. చావుగా వుంది ఇతన్తో.’’

విడిగా ఆత్మకథ రాయని రంగనాయకమ్మ జీవితాన్నీ, ఆమెతో ముడిపడివున్న(సంబంధం తెంచుకున్న) వాళ్లను గురించిన ఆమె భావనల్నీ తెలుసుకోవడానికి ఈ లేఖలు పనికొస్తాయి. ఫుట్‌నోట్స్ ఇవ్వడం వల్ల వాటి నేపథ్యాన్నీ, అదనపు సమాచారాన్నీ అందించగలిగారు. ఉదా: కొడవటిగంటి కుటుంబరావు వాళ్లింట్లో భోజనానికి కూర్చున్నప్పుడు, ‘తినడం అయ్యాక మీ పళ్లెం తీసి సింకులో పెట్టెయ్యండి,’ అని ఆయన అనడంతో నొచ్చుకున్నారట! చెప్పకపోయినా పెట్టేస్తానుకదా, అని. రచయిత్రి అన్ని పుస్తకాల్లాగే హార్డుబౌండుతో, తక్కువ ధరలో లభ్యం.

రాజిరెడ్డి సాక్షి ఫన్‌డే 22 జూన్ 2013

* * *

“ఆత్మకథాంశాల ఉత్తరాలు” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ను అనుసరించండి.
ఆత్మ కధాంశాల ఉత్తరాలు On Kinige

Related Posts:

పాత, కొత్త తరాల ఆలోచనల సారం

పుస్తక రచయిత్రి ఉమాభారతి నాట్యకళలో పేరుప్రఖ్యాతులు సంపాదించటమేగాక, అమెరికాలో ఒక డ్యాన్స్ అకాడమీని స్థాపించి, ఎంతోకాలంగా వందలాది యువతీ యువకులకు శిక్షణ ఇస్తున్నట్లు పరిచయ వాక్యాలలో తెలిపారు. అదంతా ఒక ఎత్తయితే నాట్యకళకు ఏ విధంగానూ సంబంధం లేని కథారచనాప్రక్రియ చేపట్టి అందులోనూ నైపుణ్యం సాధించటం విశేషం.
పాత తరంవారి ఆలోచనలు ఏ విధంగా ఉంటాయో ఈ కథలలో కనిపిస్తుంది. అదే విధంగా ఇప్పటి తరంలోని వారిలో కనిపిస్తున్న విచిత్రమైన పోకడలు, వాటివల్ల కలిగే చిక్కులు వంటి వైవిధ్య భరితమైన కథల సమాహారమే ఈ పుస్తకం.
పెద్ద చదువులు చదివి అమెరికాలో ఉద్యోగంలో ఉన్న కొడుకు ఒక విదేశీ యువతిని పెళ్లిచేసుకొని అమ్మానాన్నలకు పెళ్లిఫొటోలు పంపించినప్పుడు వాళ్లు పడే బాధ ‘విదేశీ కోడలు’ కథ తెలియజేస్తుంది. కథ చివరలో ఉన్న ఒక వాక్యం- ‘ఏ కొడుకైనా తాను పెళ్లాడబోయే యువతికి, తన తల్లితండ్రులకి మధ్య కాస్త పొంతన, అవగాహనా ఏర్పడేలా చిన్న ప్రయత్నం చేయవలసిన అవసరం ఎంతైనా ఉంది’ అనేది ఆలోచించతగ్గది. కన్న కొడుకుల నిరాదరణకు గురై కష్టాలను అనుభవించాల్సి వచ్చినా ఏమాత్రం బాధపడకుండా, జీవిత కాలమంతా తన వారి సంక్షేమంకోసం ఆలోచించే తల్లుల కథ- ‘అమ్మతనం అద్భుతవరం’. అయితే ఇందుకు భిన్నంగా ద్రోహచింతన తలపెట్టిన కూతురి విషయంలో కఠిన వైఖరినవలంబించే తండ్రి ‘మా నాన్న పిచ్చోడు’ కథలో కన్పిస్తాడు.
ఎంత పెద్ద చదువులు చదివి, పెద్ద ఉద్యోగాలుచేస్తున్నా వినయ విధేయతలున్నప్పుడు మాత్రమే రాణిస్తారు. అందుకు బదులు మనిషిలో అహంభావం చోటుచేసుకున్నప్పుడు ఎదుటివారిలో అన్నీ తప్పులుగానే కనిపించటం మొదలవుతుంది. పర్యవసానంగా ఏర్పడే దుష్పరిణామాలవల్ల ఒక్కొక్కసారి జీవితాలే నాశనమవుతుంటాయనే సంగతి ‘ముళ్ల గులాబి’ కథ తెలియజేస్తుంది. యువతరంలో విపరీతపు పోకడలు తలెత్తకుండా అడ్డుకట్టవేయాల్సిన అవసరాన్ని ఈ కథ గుర్తుచేస్తుంది.
ఆడుతూపాడుతూ తన వారికోసం నిస్వార్థంగా పనిచేసే తెలుగింటి ఆడపడుచును ‘కాఫీ టిఫిన్ తయ్యార్’ కథలో చూస్తాం. ఒక పరిధి దాటిన తరువాత స్వార్థచింతన కూడా అవసరమేనని ఈ కథ సూచిస్తుంది.
నాట్యకళను ప్రాతిపదికగా చేసుకున్న రెండు రచనలు కూడా ఈ సంకలనంలో చోటుచేసుకున్నాయి.
పాఠకుల మేధస్సుకు పదునుపెట్టగల శక్తి ఈ పుస్తకంలోని కథలలో ఉంది.

ఎం.వి. శాస్ర్తీ
ఆంధ్రభూమి దినపత్రిక, 18/05/2013 నాటి ‘అక్షర పేజి’

* * *

విదేశీ కోడలు” కథా సంపుటి డిజిటల్ రూపంలో కినిగెలో లభిస్తుంది. కినిగె వెబ్ సైట్ ద్వారా ప్రింట్ బుక్‌ని తగ్గింపు ధరకి తెప్పించుకోవచ్చు. మరిన్ని వివరాలకు ఈ క్రింది లింక్‌ని అనుసరించండి.
విదేశీ కోడలు On Kinige

Related Posts: