కాలానికి కాపలాకాసే కథలు -” నిత్య గాయాల నది ” పుస్తకంపై సమీక్ష

ఇవి గత 13 ఏళ్ళలో వేర్వేరు పత్రికల్లో అచ్చయిన కథలు. ఈ కాలానికి తెలంగాణ చరిత్రలో చాలా ప్రాధాన్యత ఉంది. ఒకరకంగా తెలంగాణ ఉద్యమ నిర్మాణంతో మొదలుపెట్టి ఇప్పటి పునర్నిర్మాణ దశ వరకూ కథా సమయం విస్తరించింది. ప్రత్యేక తెలంగాణ ఉద్యమంతో నేరుగా అనుబంధంలో ఉండి రాసినవి కొన్ని కాగా, ఉద్యమ భావజాలాన్ని నిర్మించే అంశాలను చర్చించిన కథలు మరికొన్ని. బెజ్జారపు రవీందర్నిత్య గాయాల నది‘ కథా సంపుటిని చూస్తే ఉద్యమంతో పాటు ఎదిగొచ్చిన ఆర్థిక, మార్కెట్ శక్తుల చలనం కనిపిస్తుంది. భూ పాలకుడినే కాదు, భూమినే విముక్తి చేయాల్సిన అవసరం (పరాయి గ్రహం) తెలిసివస్తుంది. ఈ సంపుటిలోని 11 కథల్లో ‘చరణం జారిపోయాక’ వంటి ఒకటి రెండు కథలను వదిలేస్తే… రేపటి తెలంగాణ కోసం జాగారం చేస్తున్న, జాగురూకతని సూచిస్తున్న కథలే మిగతావన్నీ. “అల్లూరి దేశభక్తుడు… కొమరం భీం తీవ్రవాది ఎలా అయ్యా”రన్న ప్రశ్నతో (నిత్యగాయాల నది) మొదలయి. “తెలంగాణ వస్తే బస్సు చార్జీలు తగ్గుతాయా” అనే వాస్తవిక నిష్ఠూర ప్రశ్న (మూడు తొవ్వలు) దగ్గర ఈ కథలు పునర్నిర్మాణ దశలోకి మళ్ళాయి.

నిజానికి జాతి నిర్మాణం కోసం, ప్రజల విముక్తి కోసం జరిగే పోరాటాలను ప్రాంతీయ సంకుచిత కోణంలో కాక… ఒక సార్వజనీన సాంస్కృతిక విలువగా చూడాలి. ఉమ్మడి రాష్ట్రంలో ఆ పని జరగలేదనేది వాస్తవం. ఒక ప్రాంత సాంస్కృతిక ప్రత్యేకత నిరాకరించబడినప్పుడు సవ్యంగానో, అపసవ్యంగానో ఇలాంటి ప్రశ్నలు ఎదురుకాక తప్ప దు. ఈ ప్రశ్నలు ఉద్యమ భావజాల పునాదులుగా పనిచేసినా, ప్రజల నిత్య వ్యవహారిక, దీర్ఘకాలిక సమస్యలే ప్రాతిపదిక అవుతాయి. ఈ ప్రాతిపదికపైనే తెలంగాణ జనజీవనంలోని విశిష్ట, ప్రత్యేక నిర్బంధ పరిస్థితులను వేర్వేరు కాన్వాస్‌లు, భిన్న స్వరాల్లోంచి రవీందర్ చర్చించారు. కారల్ మార్క్స్ నుంచి మంత్రసానులు, గ్రామదేవతల దాకా అల్లుకుపోయిన తెలంగాణ వంటి సమాజంలో పునర్నిర్మాణ ప్రక్రియ ఎన్నో లోతులను చూడాల్సి ఉంటుంది. మూడు తొవ్వలు కథలో రవీందర్ సూచించినట్టు, సున్నితమైన భార్యాభర్తల సంబంధాల్లోని ఘర్షణలకూ ఒక భౌతిక ప్రాతిపదికను అది కనుక్కోవాల్సి ఉంది. కాలానికి కాపలా కాయడమే కవులు, కథకుల ప్రధాన కర్తవ్యం అనుకుంటే… ఆ పనిని రవీందర్ సమర్థవంతంగా చేశాడనే చెప్పాలి.

- వి. అరవింద్ , ఆదివారం అనుబంధం-ఆంధ్రజ్యోతి , 2 ఫిబ్రవరి 2014 .

నిత్య గాయాల నది” పుస్తకం డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

నిత్య గాయాల నది on kinige

 

NityaGayalaNadi

Related Posts:

“ఊహాచిత్రం” పుస్తకం పై సమీక్ష

“తెలుగు భాషను మరుగుపరుస్తున్నారన్న అపవాదును మోసే తరంలోనివాడిని. ఆంగ్ల మాధ్యమంలో చదువులు, కార్పొరేట్ ఉద్యోగాల పరుగుల మధ్యలో తెలుగు భాషాభిమానాన్ని, సాహితీ ఆసక్తిని సజీవంగా ఉంచుకోవచ్చని చెప్పడానికి నేను ఒక చిన్న ఉదాహరణ మాత్రమే.. రేపటి తరానికి రెండు కథలు, నాలుగు పద్యాలు, కాసిన్ని సామెతలు చెప్పి తెలుగు భాషని రుచి చూపించండి. ఆ తరువాత పఠనాసక్తిని కలిగించి వదిలిపెట్టండి. ఏ మాధ్యమంలో చదివినా, జీవనానికి మరే భాష అవసరం అయినా తెలుగు మీద మక్కువ ఎక్కడికీ పోదు. అందుకు నేనే సాక్ష్యం..” అంటున్నారు ఊహాచిత్రం కథల సంపుటి రచయిత అరిపిరాల సత్యప్రసాద్.
ఆయన అన్నది అక్షరసత్యం. వెనుకటి ఏడు తరాలు చూసుకున్నా కలికాలానిక్కూడా రచయితలు అనేవారు లేని కుటుంబ నేపథ్యంలో పుట్టిన రచయితలో సాహిత్యాభిలాష పుట్టడానికి కన్నతల్లి తొలి పునాది వేశారు. అమ్మ అంటే ఇప్పుడాయనకు ఒకటే జ్ఞాపకం. పాత సినిమా పాటలు, లలిత సంగీతం, రేడియో పాటలు. నిత్యం పని చేసుకుంటూ ఆమె వీటి మధ్యే బతికిన రోజులు రచయిత జీవితంలోనే అత్యంత సంతోషకరమైన జ్ఞాపకాలలో ఒకటి. తర్వాత నాన్న రాత్రిపూట రేడియోలో వినే కర్నాటక సంగీతం. త్యాగరాజు, శ్యామదాసు, పురంధరదాసు, సుబ్బలక్ష్మి, శమ్మంగుడి, పట్టమ్మాళ్. వీళ్లంతా నాన్న సేకరించిన వందలాది సంగీతం క్యాసెట్ల రూపంలో రచయిత బాల్యంలో మెరిసిన సంగీత సామ్రాట్టులు. అమ్మ సాహిత్య, సంగీతాభిరుచి, నాన్న సంగీత రికార్డుల సేకరణ.. కళల గురించి ఏ ఇంట్లోనయినా ఆసక్తి కలగడానికి ఇవి చాలవా?
ఇక మేనత్త పరిచయం చేసిన పోతన పద్యాలు, బాల్య జీవితాన్ని పద్యమయం చేసేశాయి. తెల్లవారు జామున చెట్టుమీది పూలు కోస్తూ, ఆమె పాడిన పద్యాలు, శ్లోకాలు రచయితకు నేటికీ నందివర్ధనం చెట్టు మీద నుంచి రాలిపడిన మంచుబిందువులంత స్పష్టంగా గుర్తుకొస్తూనే ఉన్నాయి. ఇక నాన్నమ్మ చెప్పిన పూటకూళ్ల పెద్దమ్మ కథలు, కాశీమజిలీలు, భోజరాజు కథలు, విక్రమార్కుడు, రామాయణ, మహాభారత కథలు, రమణీయ బాల్యంలో మెరిసిన రసరమ్య గీతాలు.
లోహితా లోహితా అంటూ హరిశ్చంద్రుడు ఎంత ఏడ్చాడో కానీ, నానమ్మ ఆ కథ చెప్పిన ప్రతిసారీ ఏడవడం ఆశ్చర్యకరమైన, మర్చిపోని జ్ఞాపకమైతే, కథతో, అందులో ఉండాల్సిన ఎమోషన్‌తో తొలి పరిచయం అప్పుడే ఏర్పడిపోయిందట.
ఆ తర్వాత కనపడ్డ పుస్తకమల్లా చదవటం, ఇంగ్లీషు, తెలుగు, కాలక్షేప నవలలు, సీరియస్ రచయితలు ఇలా కిరాణా కొట్టులో కట్టిచ్చిన పొట్లాల కాగితంతో సహా కనబడ్డ పుస్తకమల్లా చదివి నమిలేస్తున్న క్రమంలో శ్రీశ్రీ కవిత్వంతో పరిచయం మయూరి వారపత్రికలో కలం కల కవితగా పరిణమించింది. ఆ పునాది 1995 ఆంధ్రప్రభ ఆదివారం పత్రికలో దీపావళి కథల పోటీలో సాధారణ ప్రచురణకు బాట వేసింది.
మీకంటూ ఒక శైలి ఏర్పడాలంటే ఇంకా ఎక్కువగా చదవాలంటూ రచయిత, సాహితీ విమర్శకులు వసుంధర సలహాతో ఆరేడు సంవత్సరాలు ఏమీ రాయకుండా అజ్ఞాతవాసంలో ఉంటున్నట్లుగా అధ్యయనంలో మునిగిపోవడం. ముళ్లపూడి, కొకు, బుచ్చిబాబు, చలం , షిడ్నీ షెల్డన్, అగాథా క్రిస్టీ వంటి మహామహుల రచనలు చదువుతున్న కొద్దీ కుంచించుకుపోయి నేను రాసినవి కథలేనా అనే అనుభూతితో అలా చదువుతూ పోవడం… గుజరాత్‌లో చదువులు, కార్పొరేట్ ఉద్యోగాలు, ఉజ్జయని మంచినీటి కటకట ప్రభావంతో మళ్లీ కలం కదలిక. ఈ క్రమంలో కొత్తగా పరిచయమైన టెక్నాలజీ సాయం తీసుకుని బ్లాగులు, అంతర్జాలంతో మొదలై ఇప్పుడు వివిధ పత్రికలు, ఆన్‌లైన్ పత్రికలలో రచనల పరంపర.
ఇదీ 35 సంవత్సరాల ఆధునిక విద్యాధిక యువకుడి జీవిత సాహిత్య నేపధ్యం. ఈయన తొలి కథల సంపుటి ‘ఊహాచిత్రం‘ తెలుగు సాహిత్యానికి ఒక సత్యప్రసాదం. తెలుగుభాష త్వరలో అంతరించనుందన్న అనుమానం అంతర్జాతీయ ప్రచారమవుతూ భయపడుతున్న కాలంలో ఇలాంటి నమ్మకాల్ని, అతి ప్రచారాలాను, అనుమానాలను నిర్ద్వంద్వంగా తొలగించే శక్తివంతమైన కథల గుచ్చమే ఊహాచిత్రం. ఈ సంపుటిలోని 13 కథలు మళ్లీ మనముందుకు కొకు, రాచకొండ, రంగనాయకమ్మ, మల్లాది, యండమూరి.. ఇలా సమకాలీనంగా ఉన్నత శిఖరాలకు చేరుకున్న మహాకథకులందర్నీ మరోసారి గుర్తుచేస్తూ జీవితాన్ని కాచి వడపోసిన  అరిపిరాల కథలు. తెలుగు తెలతెలబోతోంది, తెలుగుకు భావి లేదు అనే రాతల్ని, కూతల్ని కూడా అభాసగా మారుస్తున్న కథలను ఈసంపుటిలో మనం చూడవచ్చు.
ఊహాచిత్రం, స్వప్న శేషం, తుది బంధం, ఐదువందల రూపాయల నోటు, చిరాకు రామనాథం, ఏడు తరవాత, మంత్రిగారి సమాధి, చినుకులా రాలి, వానర వీరుడు, చిలక రాయబారం, మబ్బుతునక, ఈరేశంగాడి ముచ్చట, ఓపెన్ టైప్, మేరా భారత్ మహాన్, పద్మావతీ శ్రీనివాసం, మంచినీళ్ల బావి, కలిసివచ్చిన ఇల్లు, భూదేవతమ్మ ఇవీ ఈ సంపుటిలోని 13 కథలు. నేల మీద జీవధారల్ని కాలుష్యం చేసి తన మనుగడకే ముప్పు తెచ్చుకుంటున్న మనిషి తీరు పట్ల తీవ్ర అభ్యంతరం,  ఆధునిక దాంపత్యానికి అపరూప విశ్లేషణ, డబ్బే సర్వస్యమనుకునే నేటి తరం తీరుపై అపూర్వ స్పందన, తనను నచ్చే ప్రపంచం, తానుండే ప్రపంచం ఒకటి కాని స్థితిలో భావుకుల స్వప్నశేషాలు. కార్పొరేట్ ఉద్యోగుల జీవితాల్లో పద్మావతీ శ్రీనివాసం, కళ్లకు కట్టిన మనోవిశ్లేషణ, మంచినీరు తాగునీరుగా, అమ్మకపు నీరుగా మారిన వ్యాపారీకరణ, జీవన వేదాంతాన్ని ఇమిడ్చిన అద్బుతమైన కథన కౌశలం, ఇవన్నీ కలిస్తే అరిపిరాల కథలు..
కంపెనీ కొన్నప్పుడు ఆ కంపెనీని వృద్ధిలోకి తీసుకొచ్చిన ఉద్యోగస్థులు ఆ కంపెనీలో భాగం కాకుండా పోతారా (ఉద్యోగం పోగొట్టుకున్న వాడి ఆవేదన). ‘పొలం భూదేవత. తల్లితో సమానం. అమ్మనెలా అమ్మమంటావ్? భూదేవతంటే లక్ష్మీదేవి కాదు. అన్నపూర్ణ, పదిమందికి అన్నం పెట్టే తల్లి’ తోటి సైనికుడు చనిపోతే కనీసం అటువైపు చూడనైనా చూడకుండా యుద్ధంలోకి పరుగెత్తే సైనికుల్లా కొలీగ్స్..  ‘సంసార కాలం మొత్తం ముళ్లు ఏరిపారెయ్యడానికే సరిపోయింది. పూలదారులు పక్కనే ఉన్నా ముళ్లు ఏరే పనిలో వాటిని గుర్తించనే లేదు’.
కుప్పిలి పద్మగారన్నట్లు ‘ఈ కథలు మనలని గాభరాలో ముంచెత్తవు, నిద్రపుచ్చవు, నిర్లిప్తంగా కూడా ఉంచవు కాని, మన చుట్టూ ఉన్న మనుష్యులని ఆరోపణలతో కాక, ఆత్మీయంగా అర్థం చేసుకునే వైపు మనల్ని నడిపించే పాజిటివ్ కథలు. మనకు ఊహ తెలిసిన నాటి నుంచి మనం తెలవారుఝామున వినే చరిపరిచిత స్వరాన్ని ఈ కథలు తిరిగి మనలోకి ప్రవహింపచేస్తాయి.’ ఆధునిక జీవితంలోని డొల్లతనాన్ని, కపటత్వాన్ని ఆవిష్కరిస్తూనే మనిషి మనిషిగా బతకడం లోని ఆనందాన్ని కూడా వివరించే కథలివి. సత్యం కోసమో. జీవితానికి అర్థం కోసమో.. లేక తనకే తెలియిని ఒక జ్ఞాపకం కోసమో రచయిత సాగించిన వెతుకులాటను ఈ కథల్లో చూసిన తర్వాత మనం కూడా కాస్త ఆలోచనలో పడతాం.
ఇంతకుమించి ఏ కథకుడికైనా కావలసింది ఏమిటి? అరిపిరాల సత్యప్రసాద్ గారి కథలను మనమూ చదువుదామా మరి.

 ఆంధ్రప్రభ , 7 మే 2014 .

ఊహాచిత్రండిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

ఊహాచిత్రం on kinige

 

OohaChitram600

 

Related Posts:

చిత్తూరువారి కథల విందు! – “చిత్తూరు కథ” పుస్తకంపై సమీక్ష

ఇది చిత్తూరు జిల్లా గురించిన కథ కాదు! ఆ జిల్లాకు చెందిన రచయితలు వెలార్చిన కథలు. చిత్తూరు వేషభాషలు, నైసర్గిక చిత్రణల నేపథ్యంలో జీవితంలోని వివిధ పార్శ్వాల్ని తడిమే కథలివి. జిల్లాకు చెందిన కథా రచయితలు కె.సభా (మిథున లగ్నం), మధురాంతకం రాజారాం (అంబ పలుకు.. జగదంబా పలుకూ), నరేంద్ర (పురోహిత్ పరిషత్), మహేంద్ర (జర్తె), వల్లంపాటి వెంకటసుబ్బయ్య (అందని పళ్లు), కరణం బాలసుబ్రహ్మణ్యం పిళ్త్లె (జింకపిల్ల), ఆర్.వసుంధరాదేవి (పిచ్చిగీతలు), సుంకోజి దేవేంద్రాచారి (అన్నంగుడ్డ), పేటశ్రీ (చిత్తానూరు పంచమి)… ఇలా 44 మంది కథలున్నాయిందులో. ఎక్కడికక్కడ ‘స్థానిక’ గొంతుకల్ని గట్టిగా వినిపించడం ఆధునికానంతర లక్షణం. ఆ ప్రభావంతోనే గత రెండు దశాబ్దాలుగా తెలుగు కథ.. ఇంతవరకూ మాటపెగలని కంఠాలెన్నింటినో వినిపిస్తోంది. ఈ స్థానికత, ప్రాంతీయత ఆధారంగా సాహిత్య సృజనే కాకుండా.. ప్రత్యేక సంకలనాలు రావడం ఇటీవలి పరిణామం. వాటిలో ‘చిత్తూరు కథ‘ ప్రమాణాల పరంగానూ విశిష్టమైందని చెప్పాలి. ఆ విషయంలో సంకలనం తీసుకొచ్చిన తెలుగు భాషోద్యమ సమితి ప్రయత్నం అభినందనీయం.

– జె.రాజు , ఈనాడు ఆదివారం ,8 ఆగష్ట్ 2014.

ChittorKatha

“చిత్తూరు కథడిజిటల్ రూపంలో కినిగెలో లభిస్తుంది.  మరిన్ని వివరాలకు ఈ క్రింది లింక్‌ని అనుసరించండి.

చిత్తూరు కథ on kinige

ChittooruKatha600

Related Posts:

ఈ కథానికలూ మంత్రాల్లాంటివే! – “మాటే మంత్రము” పుస్తకంపై సమీక్ష

ఆకాశం అనంతం. కనిపించే నిర్మలమైన ఆకాశం దాని సహజ రూపం కాదు. అలాగే నిశ్శబ్దంగా అన్నింటినీ భరించేటంత అవనిలోనూ సహజత్వం లేదు. ఇందుకు కారణాలు లేకపోలేదు. ఆకాశానికి భూమికీ మధ్య జరిగే మానవ సంఘర్షణలు, మనిషి మేధో మధనాల ఫలితమే ఈ అసహన మనోకృతులు ప్రకృతిని కూడా ఆవరించాయి. సముద్రాన్ని దేవతలు మధిస్తే అమృతం వచ్చినట్లు, వీటన్నింటినీ ఎంతో కొంత చదివి ఆకళింపు చేసుకొని సానపడితే తప్ప కథానిక పుట్టదు. తోడిన కొద్దీ మానవ జీవితంలో ఎన్ని సమస్యలున్నాయో వాటికి ఆలోచనాభరిత పరిష్కారాలే కథానికలు. ఒక వ్యక్తి తనకొచ్చిన సమస్యను పరిష్కరించుకోవడానికి ఎంతో ప్రయాస పడుతుంటాడు. అదే సమస్య ఎదుటి వ్యక్తికి రాగానే పరిష్కారం క్షణాల్లో చెప్పేయగలడు. అంటే ప్రతి సమస్యకు పరిష్కారం ఉందని మనకు అర్థమవుతుంది కానీ ఆ పరిష్కారం మనకెంత వరకు వర్తిస్తుందో అనేది ఆలోచించాల్సిన విషయం. సి.ఉమాదేవి రచించిన ‘మాటే మంత్రము’ అనే కథానికల సంపుటిని కథల సంపుటిగా సంబోధించారు. కానీ నిజానికిది కథానికలు. ఊహాజనితమైన ప్రపంచంలో నిత్యం ఊయలులూగుతూ తమకు దక్కని, తాము ఎదురుచూడని సన్నివేశాలతో కదిలేది కథని, వాస్తవ ప్రతిరూపాలన్నీ కథానికలనీ ప్రముఖ కథకులు వేదగిరి రాంబాబు గారి నుండి తెలుసుకున్నప్పటి నుండి చాలామంది కథానికలే రాస్తారని అర్థమైంది. ఆ కోవలో ఆలోచిస్తే ఉమాదేవిమాటే మంత్రము’ కథానికల కోవలోనివే అని చెప్పవచ్చు.
మానవ జీవతానికి రెండు రిటైర్మెంట్లు. ఒకటి ఉద్యోగరీత్యా, రెండవది జీవితరీత్యా! జీవితరీత్యా రిటైర్ అవ్వడానికి ఇంత వయసని ఎక్కడా లేదు. ఆ వయసనేది దేవుడు నిర్ణయం. కానీ ఉద్యోగరీత్యా రిటైర్‌మెంట్ అనేది తప్పనిసరి కానీ ఆ సంబంధిత వ్యక్తికి మాత్రం దిగులు ఆవరిస్తుంది. పైకి నవ్వుతూ కనిపించినా తనకున్న ఒక పని పోయేసరికి తను ఇక ఏమీ చేయలేడా? అనే ఆవేదన వెంటాడుతుంది. అందుకు తగినట్లుగా ఉదయమే ఆయనకేం తొందర? ఇంట్లోనే ఉంటారుగా అనే ఇంటిలోని వారి రకరకాల మాటలు వింటున్నా, తనకిన్నాళ్లు ఇచ్చిన ప్రాముఖ్యత ఇవ్వడం లేదనిపించి దిగులు పడిపోయేవారు ఎందరో. అదే విషయాన్ని ‘మౌనమే నీ భాష’ అనే కథలో అనంతం పాత్ర ద్వారా ఎంతో చక్కగా తెలిపారు. నాన్నకు పని లేదు. కనుక ఏదో ఒకటి మాట్లాడతారు’ అనే కొడుకు మాటలకు ఎంతో ఆవేదన చెందిన తండ్రి అనంతం ఇకపై మాట్లాడకూడదని నిర్ణయించుకుని వౌనం పాటిస్తాడు. ఆ మౌనం భరించక తిరిగి కుటుంబ సభ్యులందరూ మీరు మాట్లాడితేనే బావుంది అని దగ్గరకు చేరే సంఘటనల్ని ఈ కథలో చాలా అద్భుతంగా పలికించారు. ఇంట్లో వారు హడావిడిలోనో, కోపంతోనో, పని వత్తిడితోనో ఏదయినా అంటే అందులో ఏ మాత్రం నిజం ఉండదని తెలియజేయడం ఎంతో బావుంది. రచయిత్రి ఉమాదేవి తమదైన శైలిలో రచించారు. వయసు పెరిగినా మనసు పెరగదనేది నిజం అనిపిస్తుంది కొన్ని విషయాల్లో. సృష్టికి ఉదయాస్తమయాలు ఉన్నట్లే, మనిషి ఆకలిదప్పులు, ఆశలు ఆవేశాలు ఉండనే ఉంటాయి. వాటిని గురించి తెలిపే కథ ‘ఏం చేస్తున్నావు బుజ్జీ’ అనే కథ. సెల్‌ఫోను తనకెందుకు ఇంట్లోనే ఉంటుంది కదా? తనకేమయినా ఫోను వస్తే నాకు చేస్తే నేను ఇస్తాను కదా అనేది సాధారణంగా ప్రతి ఇంట్లో ఉంటుంది. స్త్రీకి స్వతంత్రత ఉండదనే విషయం ఇంకా అక్కడక్కడా కనిపిస్తూనే ఉంటుంది. అలా కాదు పిల్లలు పెద్దవారయి అమ్మకు ఒక ఫోను ఉండాలి అని కొనిస్తే, ఆ అమ్మకు మెసేజ్ ఇస్తే, అదీ అపరిచిత వ్యక్తి? అనేది సరదాగా సాగిన ఒక సంఘటనను కథానికగా మలచిన తీరు చాలా బావుంది.
ఉమాదేవి కథలన్నీ నాలుగు గోడల మధ్య జరిగే సంఘటనలే. ఇల్లు నాలుగు గోడలే అయినా ఉదయం నించి రాత్రి దాకా నలభై రకాల సమస్యలు వెంటాడుతూనే ఉంటాయి. సమస్యలు అయితేనేం? సామరస్యాలు అయితేనేం? అంతా అపురూపమే! ఇల్లంటేనే ఒక అపురూపం. అలాంటి అపురూప సంఘటనలను ఒకచోట చేర్చి ‘మాటే మంత్రము’ అనే శీర్షికతో కథానికల సంపుటి తీయడం ప్రశంసనీయం. ముఖ్యంగా నాన్న ఉండాలి, నాన్నా నీకేం కావాలి? మీరు క్యూలో ఉన్నారు. జీవిత చక్రం, అమ్మ సన్నిధి, పలుకే బంగారుమాయెనా? వర్షించని కన్నులు లాంటి కథలు పాఠకుల్ని ఎంతో అందమైన లోకంలో విహరించేలా చేస్తాయి. పెదవులపై చిరునవ్వు చిందించేలా చేస్తాయి. మొత్తానికి అందరినీ హాయిగా చదివించే కథలు ఇవి. ఎందరినైనా ఆకట్టుకోగల కథలివి.

-శైలజా మిత్ర, ఆంధ్రభూమి-అక్షర, 09/08/2014.

 

“మాటే మంత్రము” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

మాటే మంత్రము on kinige

 

MateMantramu600

 

Related Posts:

జీవనపార్శ్వాలు – “బహెన్” పుస్తకంపై సమీక్ష

ముస్లింల అస్తిత్వ వేదనలకూ సామాజిక సమస్యలకూ అద్దంపట్టే కథా సంకలనం- బహెన్. రహమతుల్లా రాసిన ఈ పన్నెండు కథల సంపుటి వారి జీవనపార్శ్వాల్ని స్పృశిస్తుంది. వారిలోని ఆత్మగౌరవ చైతన్యాన్నీ పరిస్థితుల్ని దీటుగా ఎదుర్కోడానికి పడుతున్న తపననూ ప్రస్ఫుటం చేస్తుంది. ముస్లిం మహిళల జీవితాల్లోని అనేక కోణాల్ని ‘మా’ కథ వ్యక్తీకరిస్తుంది. రంజాన్ పర్వదిన దృశ్యాల సమాహారంగా ‘చాంద్‌కి ఈద్’ ప్రకటితమవుతుంది. సహజత్వానికి దూరమై, కృత్రిమత్వానికి దగ్గరైన ఓ వ్యక్తి మానసిక స్థితిని ‘బుచ్చిగాని బాగోతం’ వెల్లడిస్తుంది. గోద్రా సంఘటనల పరిణామాల్ని ‘బోర్డర్స్’ కథ ఆవిష్కరిస్తుంది. ‘బా’ కథ తండ్రిపట్ల ఉండే మమకారాన్ని ధ్వనింపజేస్తుంది. అబ్దుల్లా పాత్ర ఎదుర్కొనే కష్టనిష్ఠురాలను ‘కిరాయి మకాన్’ ప్రతిబింబిస్తుంది. వర్తమాన పరిస్థితుల్ని కథల్లోకి అన్వయించి, వాటిలో జవజీవాల్ని నింపడంలో రహమతుల్లా సఫలీకృతులయ్యారు.

– కావూరి లాస్యశ్రీనిధి , ఈనాడు ఆదివారం , 25-07-2014.

 

Bahen_EenaduSunday_25-07-2014

 

బహెన్డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

బహెన్ on kinige

 

Bahen600

Related Posts:

ఆత్మీయ ‘కధా’ సంపుటి – “గోరింట పూచింది” పుస్తకం పై సమీక్ష

చాలీచాలని సంపాదనతో కూడా కన్నవారు ఎంతమంది పిల్లలనైనా పోషిస్తారు.ప్రయోజకులైన సంతానం మాత్రం తల్లిదండ్రుల పోషణకు వంతులు వేసుకోవడం చూస్తున్నాం. ఈ ధోరణిని రచయిత మొదటి మూడు కధలలో మరోమారు ఎత్తిచూపారు. గ్రంధశీర్షికతో వచ్చిన ‘గోరింటపూచింది’ కధ 1970వ దశకంలో వచ్చిన ఉపాధ్యాయ దంపతుల ఇతివృత్తంతో వచ్చిన చిత్రాన్ని గుర్తుచేసింది.పల్లె వాతావరణాన్ని కళ్లకు కట్టే ‘గూడుతెగిన పక్షులు’ కధ ఇప్పుడు 50వ పడిలోని వారిని గత స్మృతులలోనికి తీసుకువెళుతుంది. పురాణగాధ ‘కచదేవయాని’ ఇతివృత్తాన్ని సమకాలీన పరిస్థితులకు అనుగుణంగా మలచారు. మొత్తం 13 కధల్లో స్నేహం , గుప్తదానం , రాజకీయాలు , ఎన్నికలు ప్రధాన ఇతివృత్తాలుగా ఉన్నాయి. రెండు కధలకు శీర్షికలు పొసగినట్లు లేదు . విషాదాంత కధకు సానుకూల కోణంలో (గోరింట పూచింది),సుఖాంత కధకు విషాద అర్ధంలో (గూడు చెదిరిన పక్షులు) శీర్షికలు పెట్టారు.

  • -అరవపల్లి జగన్నాధస్వామి , ఆంద్రజ్యోతి- ఆదివారం , 28 సెప్టెంబర్ 2014.

 

GorintaPoochindi @ Andhrabhoomi#Akshara_28-09-14

 

గోరింట పూచింది” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

గోరింట పూచిందిon kinige

 

Gorintapoochindi600

Related Posts:

కథ వెనకున్న కథకు పట్టం కట్టిన తానా పుస్తకం – ‘కథ నేపధ్యం-2′ పుస్తకంపై సమీక్ష

కథకు నేపధ్యం ప్రకృతి సమాజమే – జంట పక్షుల్ని విడదీసిన వాల్మీకి పశ్చాత్తాపంతో రామాయణ ఇతిహాస కథను సృష్టిస్తే ,  భారత భాగవతాల పేరిట వేలాది గొలుసుకట్టు కథలు సమకూర్చాడు వ్యాసుడు .ప్రాచీన భారతీయ కథా సంస్కృతి ఒక చెంప ,పారిశ్రామిక విప్లవ కాలం ను౦డి నేటి  ప్రపంచ అర్థిక విధానాల దుష్పరిణామాల వరకు ఐరోపా ను౦డి సంక్రమి౦చిన ఆధునిక కథా ప్రక్రియ మరోచెంప భారతీయ కథా సంస్కృతిని అనాదిగా పరిపుష్టం చేస్తూ వస్తున్నాయని కోవెల ప్రసన్నాచార్య , జగన్నాధ శర్మ వంటి ఎంతోమంది చెప్పగా వింటున్నాం.

గురజాడ ‘దిద్దుబాటు’  మొదలు పాలగుమ్మి ‘గాలివాన’ వరకు …. సామాజిక , వర్గ ప్రయోజనాల కోసం రాస్తున్న నవ చైతన్య కధల వరకూ తెలుగు కథ ఖండాంతరాలకు విస్తరించింది . కథకు ఆలోచన రూఫుదిద్దుకోవడానికి వెనుకున్న ప్రేరణ ఏమిటి ? సమాజ౦పై  చెరగని ముద్ర వేస్తున్న కథలు ఎలా పుడుతున్నాయి . ఆ కథల్లో నిజమెంత ? కల్పన ఎంత ? వైవిధ్యమున్న గొప్ప కథలు ఎలా ఫుట్టాయి ? అనే విషయాల్ని కధకుల స్వీయ విశ్లేషణలతో అక్షరీకరించాలనే తానా ప్రచురణల సంకల్పానికి అక్షరరూపమే 900 పేజీల  ‘కథ నేపధ్యం’ ఒకటీ , రెండూ భాగాలు.

గత యేడాది జనవరిలో 25 మ౦ది కథలు నేపధ్యాలతో ‘కథ నేపధ్యం -1’ వెలువడగా,ఇప్పుడు తాజాగా ‘కథ నేపథ్యం -2’  విడుదలైంది .35 మ౦ది రచయితల కథలు ,నిజజీవిత౦లో ఉన్న ఆ కథలోని పాత్రలు, రచయితలు ఎలా ప్రేరణ పొందారు . దాని సామాజిక ప్రయోజన౦ ఏమిటి ? అనే అంశాలిందులో ఉన్నాయి. శ్రీకాకుళం జిల్లా రచయిత అట్టాడ అప్పల్నాయుడు నాగావళి కధ ‘భధ్రయ్య ‘ , కరీ౦నగర్ జిల్లా రచయిత అల్లం రాజయ్య కథ ‘మనిషిలోని విధ్వంసం’ కథల్లో బాధితులు భధ్రయ్య , రాజారాంలకు రచయితలు చూపిన దిశానిర్దేశం పోరాటమే ! భధ్రయ్య పిడికిలి బిగించి ఊరేగింపులో కలిసిపోతే , కొడుకు ఆత్మహత్యను చూసి భరించలేక రైతుబిడ్డ రాజారాం నడిచెళ్ళి చౌరాస్తాలో కూలబడిపోతాడు.( అందులో ఒకటి  రామగిరి అడవికి పోయేదారి ).

లైంగికహింస భరించలేక పెళ్ళయిన రెండు నెలలకే పరాయిదేశంలో భర్తను హతమార్చిన భార్య దీపిక కథ ‘పరివర్తన’  వాస్తవఘటన ఆధారంగా అరె సీతారామయ్య రాసిన కథ . ఎక్కడైనా స్త్రీ సమస్య ఒక్కటే అంటారాయన – అంతర్గత సంఘర్షణ అనంతరం నమాధానపడి మానవపరమార్ధాన్ని గ్రహించి వాస్తవ ప్రపంచ౦లోకి వచ్చిన నళిని కథ ‘గుర్తు’  అంతర్గత నేపధ్యాన్ని వివరించే అర్.వసుంధరాదేవి కథ ఇది. ఎందరో స్త్రీల జీవితాల్లో జరిగిన యథాతథ ఘటనలకు కథారూపం ఆర్.ఎమ్.ఉమామహేశ్వరరావు ‘ఒంటేపమాను’ఓ సమూహానికి ప్రతినిధిగా బతికిన చెంచేలమ్మ కథ ఇది. సామరస్యానికీ , సౌందర్యానికీ ప్రాధాన్యమిచ్చే స్త్రీకి, విధ్వంసాన్ని, ఘర్షణను ఆశ్రయించే పురుషుడికి మధ్య సంబంధాలను చెప్పే కుప్పిలిపద్మ కథ ‘వనమాల’.  ఇలా ఇందులో కథలు పఠితలో మానసిక చైతన్యాన్ని సమకూర్చే౦దుకు దోహదం చేస్తాయి.

-లలితా త్రిపురసుందరి , నవ్య వీక్లీ , 17 సెప్టెంబర్ 2014 .

KadhaNepadyam2@NavyaWeekly_17Sep2014

“కథ నేపథ్యం -2” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

కథ నేపథ్యం -2 on kinige

KathaNepathyam2600

Related Posts:

మానవతా స్పర్శ – ‘నిర్ణీతి’ , ‘ఆరునెలలు ఆగాలి’ పుస్తకాలపై సమీక్ష

మానవీయ విలువలూ, ఆత్మీయతా స్పర్శా, అపారమైన ఆర్ద్రతా కలిగిన కథలే కలకాలం నిలబడతాయి. పి.ఎస్.నారాయణనిర్ణీతి’ సంపుటిలోని కథలు ఆ కోవకే చెందుతాయి. ‘పెళ్ళివారిల్లు పెద్దముత్తయిదువులా ఉంది’ లాంటి పోలికలు కథలకి కొత్త అందాన్నిస్తాయి. ‘పంచాగ్ని’ కథలో భారతి ఇంట్లో అద్దెకు దిగిన ఇద్దరు కుర్రాళ్లలో ఒకడైన సుధాకర్‌కి తెలిసిన ఓ నిజం, అతను ప్రవర్తించిన తీరూ పాఠకుల మదిలో చెరగని ముద్రవేస్తుంది. ‘నిర్ణీతి’ కథలో స్నేహానికి కల్యాణి ఇచ్చిన విలువా, దానివల్ల ఆమెకు ఎదురైన అనుభవం, ఫలితంగా ఆమె తీసుకున్న నిర్ణయం ఆసక్తిని రేపుతాయి. అత్యాచారానికి గురైన యువతి ధైర్యంగా నిలదొక్కుకుని, ఆత్మవిశ్వాసంతో పోరాడి ప్రతీకారం తీర్చుకోవడం ‘ఆరునెలలు ఆగాలి‘ నవల ఇతివృత్తం. అందుకు ఆమె పన్నిన వ్యూహాలూ, ఎదుర్కొన్న పరిస్థితులూ పాఠకులను ఉద్వేగానికి గురిచేస్తాయి.

- అయ్యగారి శ్రీనివాసరావు, ఆదివారం అనుబంధం, 3rd Aug 2014

 

 

 

 

 

 

 

 

ఆరు నెలలు ఆగాలి” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

ఆరు నెలలు ఆగాలి on kinige

 

Related Posts:

జీవితమే ఇతివృత్తం! – “సన్మానం” పుస్తకంపై సమీక్ష

పొత్తూరి విజయలక్ష్మి కథలకు అనుబంధాలే పునాదులు. ఆమె రచనల్లో హాస్యం అంతర్లీనం, వ్యంగ్యం నిబిడీకృతం. ‘సన్మానం‘ కథ పూర్తయ్యేలోపు పాఠకుడి కళ్లలో నీళ్లు తిరుగుతాయి. చిన్నప్పుడు పాఠాలు నేర్పిన గురువులంతా కళ్లముందు మెదులుతారు. మానవ సంబంధాల్లోని అతి సున్నిత కోణాన్ని అంతకంటే సున్నితంగా ఆవిష్కరించారు రచయిత్రి. చుట్టాలతో స్నేహితులతో కళకళలాడాల్సిన పెళ్లిమండపాలు ఈవెంట్ మేనేజ్‌మెంట్ వాళ్లతో నిండిపోతున్నాయి. ఆ మేరకు, పలకరింపులూ కృతకంగా మారిపోతున్నాయి. ఆ ధోరణి బారిన పడవద్దంటూ ‘మర్యాదలు వచ్చేస్తున్నాయి జాగర్త’ కథలో హెచ్చరించారు. ‘భారత రసాయన శాస్త్రం’, ‘చీరెల సుబ్బారావు’, ‘చిరుదివ్వె’… ఒకటేమిటి, పుస్తకంలోని ప్రతి కథా జీవితంలోని ఏదో ఓ సమస్యకు పరిష్కారాన్ని చెప్పేదే, మనుషుల్లోని కృత్రిమత్వాన్ని ఎత్తిచూపేదే.

– భరత్, 29 జూన్ 2014, ఆదివారం అనుబంధం

 

 

 

 

 

 

 

 

సన్మానం” డిజిటల్ రూపంలో కినిగెలో లభిస్తుంది. కినిగె వెబ్‌సైట్ ద్వారా ఆర్డర్ చేసి ప్రింట్ పుస్తకాన్ని తగ్గింపు ధరకి పొందవచ్చు. మరిన్ని వివరాలకు ఈ క్రింది లింక్‌ని అనుసరించండి.

***

సన్మానం on kinige

Related Posts:

అమ్మకు జేజేలు – “అమ్మ కథలు” పుస్తకంపై సమీక్ష

జననితోనే జగతి వర్ధిల్లుతుంది. ‘అమ్మ’తో ముడిపడిన సంఘటనలూ, సన్నివేశాలూ, అనుబంధాలూ, ఆప్యాయతలూ ఇతివృత్తంగా కథా సంకలనాన్ని తీసుకురావాలన్న రచయిత్రి ఉమాదేవి ఆలోచన గొప్పది. ‘అమ్మంటే..!’ కథ తల్లికి అసలుసిసలు నిర్వచనాన్నిచ్చే ప్రయత్నం. మృగాల్లాంటి మగాళ్ల చూపుల నుంచీ మాటల నుంచీ స్పర్శలనుంచీ కూతుర్ని ధైర్యంగా కాపాడుకున్న ఓ తల్లి కథ ‘సహానా’. అమ్మలో గురువునూ దేవతనూ సంస్కర్తనూ- మొత్తంగా ఓ పరిపూర్ణ స్త్రీమూర్తిని దర్శించిన కొడుకు… ఆ తల్లి జ్ఞాపకాల్ని, కట్టుకున్న భార్య స్టీలుసామాన్లవాడికి అమ్మేసినప్పుడు పడిన నరకయాతనే ‘మాన్వి’. ‘బతుకమ్మా’, ‘వెన్నెలమ్మా’, ‘గూడు’, ‘ఒకనాటి ఉద్యానవనం’… ఒకటేమిటి సంకలనంలోని 17 కథలూ అమ్మ ప్రేమకు అక్షరరూపాలే.

- ఎ.వి.జనార్దనరావు, ఆదివారం అనుబంధం, 4th May 2014

 

 

 

 

 

 

 

 

అమ్మ కథలు” డిజిటల్ రూపంలో కినిగెలో లభిస్తుంది. మరిన్ని వివరాలకు ఈ క్రింది లింక్‌ని అనుసరించండి.

***

అమ్మ కథలు on Kinige

 

 

Related Posts: